EDDIE VAN HALEN
~By: Zen Lian
20th CENTURY sung ah guitar tum siam tungtuang leh a nasia pen khat telkhiat ding ci leng hamsa kha ding hi. Mi 2 telkhiat hileh bel Jimmy Hendrix leh Eddie Van Halen tegel mah ahi ding hi. Eddie Van Halen pen January 26th 1955 kum in Holland gam Amsterdam ah suak hi. Amah pen Guitar tum siam bek hilo in Keyboard, Laphuak leh Producer siam khat ahi hi. Producer ih cih ciang in nitumna gamte ah music thei, a siam mahmah leh music koici bawl ding, kuate tawh bang music bawla koici bawl khiat ding cih a siamte a cihna hi. Eigam dan a ka album khat a pian khiatna ding a sum leh paai a hong piaksakte producer hilo hi. A Pa pen Clarynet tumsiam mahmah khat hi in a nu pen ahihleh Indonesia te ahi hi. 1962 kum in Holland gam pan United State ah lal uh hi. Amah, Eddie Van Halen pen Eric Clapton leh Jimmy Page te guitar siamdan ngaina leh hoihsa pha deuh ahi hi.
Eddie Van Halen pen hizah liang a guitar tumsiam nasia leh thupi khat ahihna a hang tampi gen ding om hi. Tuate gen ding ci leng pellou a gen dingte anuai a bang teng hi ding hi:
1. Tapping. Hih tapping a kici guitar ban tung ah taklam khut me dawn tawh a kisun suk a ki tum pen ama muhkhiatsa a hihloh hang in kuama zat nailoh, ama puahtawm tawh hong tum ciang in lamdang kisa lua bek lo in Guitar tumdan ding hong zai sak (Guitar huang ong kheek) mahmah hi. Leitung bup ah thakhat thu in kizel pah lian hi.
2.Natural & Artificial Harmonic. Natural harmonic i cih pen guitar fret a 3 na, a 5 na, a 7 na munte ah, guitar khau tung ah damtakin khut nga le hang a siangtho hiuhiau a hong ging khia (Harp aw tawh ki nai) pen ahi hi. Artificial harmonic leuleu ahih ciang in ah Guitar Pickup tung pan ahizong in guitar pick tawh nen suk kawm in na khutme vun tawh control pian leng a eu ceca a hong ging pen a hi hi.
Hih a tung a tegel pen a kituak bang in hong zat ciang in Guitar hong thupi sak tuam mahmah hi. Artificial harmonic pen ging (aw) a sausak thei effect te tawh a zat ciang in lamdang lua ngiat hi. Tua bek thamlo in Floydrose tremolo tawh hong zat khop ciang in (tua hun lai in) Bomb khia tawh ki bang ci uh hi. Awsang, awniam tawh hong gawm ciang in vandawn ah a melody te leng keei mawk hi.
3.Vibrato & Tremolo Picking. BB King thu ih genna ah Vibrato them genzo hang. Tremolo picking cih ciang in guitar khau zang khat tung ah hi deuh in, fret 1 peuhpeuh ah meksa in taklam khut in pick tawh a manlang thei pen in tum cihna ci phawt ni. Hih technique tegel zong a tangzai mahmah in hong zang khia thei hi.
4.Tone. Van Halen ahihleh Guitar ging hoih ding in a bawl siam mahmah khat ahi hi. Amps tuamtuam te i awgin tel in pedal tuamtuam te hoihtak in zat siam hi. A ma aw pen (Brown Tone) ki cih sak hi.
5.Guitars. Hih siapipa pen guitar bang sing tawh ki bawlte koici gin cih khawng a na thei mahmah khat a hi hi. Bang sing leh kuate pickup gawm leng a gin dan hoih cih khawng thei in siam mahmah hi. A guitar mel mahmah zong a ausan tung ah a kang tawh kikui bialbual khat hihse in ih mitmuh mahmah ah zong lamdang hi. 
Frankenstrat Guitar kici in, hih guitar pen a ma deih bang a abawl phat kik a hi hi. Charvel brand te guitar body leh a ban gawm in, Gibson PAF te pickup pen a bridge ah thuah in Floyd Rose tremolo tawh zang hi. Volume control khat bek koih in, tone control zang lo hi (Hih GIBSON PAF pickup pen bass gin hoih mah maha, a treble lam tam lua lo hi). Tua ahihman in a harmonic ginte a aw kiamsak khangsak thei ahihman in ama aw gin pen hong tuam pian in lamdang sak mahmah hi.
6.Volume Sweells. Hih pen electric guitar volume tawh guitar tum dan nam khat hi in a tamzaw in a sau hetlo a kisam muntak ah tum uh hi. Van Halen in zong distortion+ delay tawh gawm khawm in tum in a tuampi, a lamdang mah kisa hi. Hih volume tawh control a guitar a tumsiam mahmah pen Jeffbeck hi in a hihhang hih a tam zaw in mangngilh pianta mawk hi.
7. Guitar Endorsement. Kramer guitar brand (tun GIBSON ten leita) khat bawl sak, Musicman te in AXIS series khat ah Van Halen min tawh bawl sak, Peavey (mixer leh Guitar amps bawl)te in EVH Wolfgang min tawh bawl sak uh hi. A tawpna ah FENDER brand te tawh Frankenstrat guitar bawl kik ding ki thukim uh hi.
8.Amplifiers : Amp pen ahihleh Marshall amp zang in SuperLead circut tawh khel se hi. Tua khit teh Peavey te in 5150 ci in amp khat bawl sak uh.
Van Halen Band.
Hih Van Halen cih band min tawh hong din khiatma un Mammoth cih min tawh tum masa uh hi. Tua hun lai in David Lee Roth pen P.A van nei khat hi aa, Mammoth te in a kawm zelna tawh ki maingap uh in a band vuah lasa ding in zawn uh hi. David Lee Roth in a band min pen Van Halen ci in khel sak hi. 1978 pan 1984 sungin la phuak khawm uh in Album 4 bang a hawm khia uh hi. 1984 ciang 1984 cih album khat hong hawm khiat ciang in leitung bup ah hong minthang pah uh hi. Hong minthang mahmah pah uh in zong ki thutuak zo nawnlo uh in, David Lee Roth in ama min tawh Band dang khat hong kipan hi. Tua band pen Van Halen Band dem ding a a ngaihsut ahih mah bang in Lead guitars tum ding Steve Vai leh Bass ding Billy Sheehan cih te tawh hong kipan uh hi.
David Lee Roth tawh Van Halen band in album 6 - Van Halen (1978), Van Halen II (1979), Women and Children First (1980), Fair Warning (1981), Diver Down (1982), leh 1984 (1984) cihte hawmkhia uh hi .
David Lee Roth in hihbang a band thak khat hong pat ciang in Van Halen in Samm Hager (mawtaw bawlna workshop pan hong mukhia uh a) toh album khat 5150 kici hong hawm khia in a minthang ngei bang in minthang toto uh hi. Sammy tawh OU812, For Unlawful Carnal Knowledge leh Balance live album (Live: Right Here, Right Now) cih te hong hawm khia uh hi. Tuakhit ciang in Sammy tawh kikhen leuleu uh hi.
Sammy Hager tawh a kikhen khit ciang in Extreme te lasa pa Gary Cherone tawh zom to in Van Halen 3 hong hawm khiat leuleu uh hang in nidang bang in tampi zuak zo nawn lo uh hi. A sawt lo in Van Halen in a gawl ah Cancer natna hong ngah sawnsawn in tawl khat sung mah khawl cip phial hi. 2004 ciang in Sammy tawh hong kipawl kik in The Best of Both Worlds album hong hawm khia kik in US gam sung khuapi 80 ah state show nei ziahziah kik uh in sum million $55 ngah uh hi.
Tua khit 2007 pan 2008 ciang dong David Lee Roth tawh kipawl kik in US Khuapi te ah state show bawl kawi 2 uh a Van Halen tapa Wolfgang in Bass guitar tum sak hi.
Van Halen Thu Tuamtuam Pawl Khat.
# Van Halen in 2009 June in Janie Liszewski tawh kiteng in tua mopawi ah a tapa Wolfgang (bass) in moliah sem hi. A zilui kum 26 bang a kitenpihsa Valerie Bertinelli in mopawi va sim hi.
# Micheal Jackson la Beat It solo pen Van Halen in a tum hi.
# Hotdog pen microwave tawh sa sak ziau in ne kici hi. Annek na lam ah genhak het lo hih tuak hi.
# Beer bel ne den pian in a ip sung ah a lawm t’a ding val puak sak den hi ci. Ciing sa mahmah ing.
# Tua teng bek hi lo in Van Halen Guitar siamna leh Guitar tum dan lampi thak khat hong sialna hang in leitung bup guitar tumdan pawl khat hong ki behlap tuam hi. Hih pen a ma thupina pen hi kha ding hi. Kawlgam bang ah Van Halen i product mi tampi tak ki om hi. Tu laitak kawlgam guitar pu Chit San Mg bang in 1988 kum khawng 1984 album ngai in kisin sin hi. Kei bang ka tapping solo tum theih masak pen 1984 album pan Jump solo a hi in 1988 sang kikhak sung ahi hi.
Hih Van Halen cih mipa a om man in laiatpa bang zong mipi mai a guitar tumthei a suah theihna thu khat zong ahi hi. Tu hun ciang in mi khempeuh mit ah a lamdang nawn lo a bat hang in ama hun lai in a late ih ngaih ciang ih dip bang a khua diaidiai tanghial mah ahi hi. Science Fiction Movie vai mahmah in, lamdang lua mahmah hi.
Hih teng hileh Van Halen thu pawl khat thei zo in hong lamen ing in, khawl bawl phawt ni. 
Who's Online
thang, lammin, phunchiak, zwanmwat, Mtunglut, tcngaihte, chhurbuur, matei,