Song of a Depressed Man-II

~By: Zasiam                                                        

KILEMNA THUGUK: GOSPEL CENTENARY

~By: Pastor V Nenglian

"Mihing' lampite'n Toupa a suklungkim' chiangin, a melmate nangawn amah toh kilem dingin a bawl hi" (Paunakte 16:7)

KILEMNA THUGUK, or lungmuangtaka (peacefully) om theihna thuguk bang om hiam chih tomchikin en khawm le ut huai sa in hiai ah Gospel Centenary lungsim a nei kawm in ka hon luikhia hi. I tenna khovel a tom a gen in kilemlouhna khovel ahi, chile kikhial lawmlawm lou ding hi. Lemna leh muanna lunggulh na ziaka pawlpi kiphuankhia tam mahmah ta ding, hihmahleh, i kho theih apan tuni tan khovel ah thawmhau na ding bangmah a om nawn himhim kei chih hun  om kha nailou a bang. Huchihlaiin, hun paisa sut hi le'ng khotang chidam, Innkuan chidam, gamsung galmuang chih bel ana om thei lua hi ding hi, chihtuh haih vuallouh a theitheih ahi jel hi.

SIAMSINPAWL KHAWMPI

~ By: John Thawmte

OUR THANLON TIMES, Chapter 12 hongsuak ah Pu Zokhual’ comment “...Neulai a SSPP conference khong khovel a hun nuam pen a kingai a, nuam petmah himai. Singing the SSPP songs and looking the future with dreamy eyes. Yes, those were the days!!!!”  cih ka simleh Lamka Block Siamsinpawl Khawmpi ka zattei khakte, tam hetlou napi’n, ka ngaihsutna ah a hong dawk souhsouh mawk ua. Pu Zokhual gen bangin, huailai hunte hunnuam pen pawl ana hi ngut mahtak eive cih phiing in om! Tulai in debate, duet, lengkhawm, la-pawl, quiz, nam-laam, adg dg cihte kidem a Conference neih zaizai cih le theihphak hi nawnlou mahbang.

MANIPUR EXPRESS | OCTOBER 08, 2010

ZRO President di’n Thang Lian Pau
Lamka, Oct 7: Zomi Re-Unification Organisation (ZRO) Headquarters in General Assembly-cum- Presidential election Oct 4, 2010 apan aneih uh zan (Oct 6, 2010) in zousiang ua, kum 5 dan a aneih zel uh President election leng nei in huai ah President lenlel Thang Lian Pau @ Sia Pau mah President ding in kituaktak in telching uhi. Sia Pau ahihleh ZRO President ahihban ah Centre government tawh Suspension of Operation (SoO) nei helpawl tuamtuamte’ kigawmna United People’s Front (UPF) ah leng Chairman lenlel ahi hi.

Hibangkalah, thudang khat kizadanin, Zomi Council Hqtrs inntekna in Songtal khua (Thanlon Sub-Division) ah zan nitak apan Zomi sung a civil society tuamtuam te’n General Assembly-cum-conference nei ua, lawhchingtak in paitou zel in zinghal Oct 9, 2010 in zousiang ding uh chih thu kiza hi. Tuni zinglam dak 11 in ZRO Advisor Khaizasong Guite @ K Guite in Zogam Artists Association (ZAA) te’ album bawlthak laa 12 om na  ‘Tunnu Zogam Volume – IV’ music video honkhiakna nei a, Rev & Dr Luaichinthang in Pathian kiang ah lan hi. Hiai music video kibawlthak kuapeuh in leisak siausiau ding in leng ZAA in ngetna nei uhi.

Union Secretary in mun tuamtuam a  MSDP nasepna  enkhia  
Lamka, Oct-7: Vivek Mehrotra IAS,  Secretary, Ministry of Minority Affairs, Govt of India in CCpur district sung mun tuamtuam  a Multi-Sectoral development programme(MSDP) nuaia nasepte enkhe dingin zan nitaklam dak 4:40 in Lamka hongtung a,Imphal apan official hunkhop in hongzui uhi. Amah  tuni zingsang  dak 8:30 in STC/BSF Mualkoi a kipankhia in Lamka khua leh akim mun tuamtuam ah MSDP 2008-09 fund zanga kibawl nasepna tuamtuamte enkhia hi. Union Secretary in  Nehru Marg a Water Tanky kibawl ahon(inaugurate) banah New Lamka a JB school building kibawl leng hong hi.

Vivek Mehrotra IAS,  Secretary, Ministry of Minority Affairs in Nehru Marg a Water Tanky ahon khit in Nehru Marg a AG school campus a Water tanky kibawl enkhia a, huai apan Saidan khua  a Water Tanky kibawl enkhia hi. Saidan  apan New Lamka a JB school building a honkhiak zawh in  Lanva Model H/S building kibawl thak enkhia hi. Lanva apan SSPP Residential school building enkhia a, huai apan in Thingkangphai a school building kibawl leh PHSC enkhia hi. Huai mun apan  Tualnuam khua a Somkholal Model Jr H/S building enkhia a, huai  apan Lamzang khua pha in huai khia a  PHSC a Labour Room kibawl enkhia hi. Huai apan Lamka lama kiknawn in Khuga Dam IB ah tawldam hi.

Union Secretary in Khuga IB ah  Press/Media-te kimuhpih a, MSDP tawh kisai state govt in fund 80% fund release in  Agency Fund chi’n 11.75 % deduction abawl tungtang dotna ah state in percentage a lak(deduct)  a theihpatna hi’n gen a, state govt ah thil omdan dotna bawl ding hi’n gen hi. Central Sponsored Scheme(CSS)  himhim a paidan in Central apan state govt tawn a, huai apan Dist tuamtuam a DC te kianga piak hi a,  Central apan direct in  DC-te khut ah fund piak hilou chi’n gen hi.

Minority & Others Backward Classes(MOBC)  apan  scholarship tawh kisai a genna ah Ministry of Minority in state teng ah Minority community apan student tamthei pen in Pre-Matric & Post Matric scholarship  a ngahna ding un theihsak hizel chih  gen a, Manipur a Minority tamthei pen in huai scholarship a ngahna ding un state govt  mipite theihding a suah(publicise)  ding a theisak ding hi’n gen hi.

Union Secretary in MSDP tawh kisai State & Dist Level Committee om a, huaiah MLA, Minister, MP te leng member hi uh a, huaiteng pangkhawm a hoihtaka sepsuah theih hi’n gen hi. MSDP 2008-09 tawh kisai CCpur dist in tunitan 2nd instalment angah nailouh lamdang sakthu gen a, Central policy dungzui in 1st instalment piakzawh  kha 1 nunga 2nd instalment release ding  ahihdan gen hi.  Aman Central ah CCpur Dist a MSDP 2008-09  2nd instalment tunitan  release louhthu leng tun ding ahihdan leh  release dinga panla ding hi’n gen hi.

Khuga Dam IB ah Union Secretary sawtlou  a tawldam nungin  STC/BSF ah kiknawn a, huai apan nitaklam in Imphal ah kiknawn hi.  Union Secy  in mun tuamtuam a MSDP 2008-09 nasepna a etkhiakna  hun ah DC/CCpur; SDO/CCpur; DRDA staff-te; ZEO/CCpur;  DACO/CCpur ban ah govt officials ban ah security tamtak in zui uhi.

LSC te’ nasep phatuam mahmah
Lamka, Oct 7: Lamka Sports’ Club (LSC) te’n Hiangtam Lamka area sung (Tedim road leh Tipaimukh) road banah kongzing poimawh deuhteng a electric post leh singkung om teng rong ngou nuhsuak vek ua, nitak hun a gari taite’ ading in phatuam mahmah hi. Tuabanah, LSC te mah in lampi laai a speed breaker om te leng rong ngou mah in marking bawl ua, huai leng phatuam mahmah chih thu kiza hi. Speed breaker om na theihlouh ziak leh electric post-te lampi lai phial a akiphuh ziakin accident tamtak ana om ta hi.

K.K.Siam Ngaihte, DANICS si
Lamka, Oct 7: Khamkhansiam Ngaihte @ K.K. Siam Ngaihte DANICS s/o Upa (late) Vaikam of Mualkoi, tulel a Motia Khan, New Delhi a om, tuni (October 7, 2010) zingkal dak 6 velin damlouhna ziak in Institute of Liver and Biliary Hospital, Vasant Kunj, New Delhi ah si hi. Aman Delhi Government nuai ah hun sawtkuamtak executive leh magisterial post len in nna ana sem a, Zosuan-te genlouh India malsuahbial a student leh sepna tuamtuam neite’ adia mi phatuam mahmah hi’n kigen hi.
Tuni sunnung dak 1:00pm in Motia Khan a a Quarter ah EBCC Saptuam inntekna in suunna programme om a, nitaklam dak 4:00pm in Nicholson's Christian Cemetery, Mori Gate (Kashmere Gate Metro Station) ah vui in om hi.  SSPP Ghq President Siamnunlian Valte in leng suunthu puang hi.

LICI in mi 4 kiangah Death Benefit  pia
Lamka, Oct-7: New Bazar a LICI Jevan Madhu (Micor Insurance) office ah tuni zinglam in Covenant Childrens’ Home Agency nuai a LICI Jevan Madhu policy holder a si mi 4  innkuante kiang ah Death Benefit kichi LICI Jevan Madhu makai te’n pekhia uhi. Death Benefit ngahte  (late) Hau Joseph Rs.17350/; (late) Niangzangai Rs.17220/-; (late) Thuamkhogin Rs. 18450/- leh (late) Neikholam Rs. 17250/- hi uhi. Kum 2 vel paisa apan LICI Jevan Madhu Home nuaia Agency in Covenant Childrens’ Home-te  pang uh a, huai sung in mi 7 kiang ah Death Benefit pekheta uh hi’n kigen hi.

JSY sum kihawm khia    
Lamka, Oct-7: National Rural Health Mission(NRHM) tungtawn a  numei nauneite panpihna sum (JSY) kichi kum 2009 a piak nailouh teng leh April 2010 tan ading mi khat kiang ah Rs.700/- zel Dist Family Welfare office(Dist Hospital huangsung a om)ah kihawm khia a, naunei te’n Doctor discharge certificate xerox copy, residencial certificate leh revenue stamp 1  tawi in laktheih ding chihthu om  hi. Huailou in numei leh pasal nau neilou dia kibawlte leng mi 1 zel Rs.600/- pia uhi.

Singngat ah PCI (R) khawmpi
Lamka, Oct-7: Singngat khua a Presbyterian Church ah Oct 8-10, 2010 sung Singngat Presbytery leh Singngat Presbytery Youth Fellowship te’n khawmpi 4veina nei ding uh a, Elder H.Khamlian, Moderator, Singngat Presbytery in hong ding hi. Khawmpi sung in  Rev H.Chinthiansong, Presbyterian Co-ordinator Lamka Presbytery  in thugending a, Elder 6; Deacon 4 leh Emeritus 3te  ordination pe ding hi.

Bijang ah Annual Confence omding
Lamka, Oct-7: Ch BA Centre Church, Bijang ah Oct 8-10, 2010 sung CCpur Baptist Fellowship (under MBC) te’n ‘thumanna(obedience)’ chih thupi zangin  Annual Conference  29th veina nei ding uhi. Huai ah   Rev Dr.En Za Sian, CBA; Rev Liankhanlal Simte, EBCA; Rev K.Mawia, CBA; Rev James Jangkholen, KBC leh Rev  J.K Touthang, Ch BA te’n Pathian thu gen ding uhi.

Division Khawmpi 2   om ding
Lamka, Oct-7: EBCC Central Lamka ah Oct 8-10, 2010 sung EBC Lamka North Division Kumsim Khawmpi  4th veina   om ding a, huai ah Rev. L.Khamkholun, Gen.Secy EBC; Rev. K.Kamchinkhup, Director of Ministries, EBC leh Rev. T.Lalzagin, Divn. Supdt/ LND te’n Pathian thu gending uhi. Bible study  ah Pastor Dr Hs.Chinsuanthang leh Pastor S.Thualgouthang te’n makai  ding uh a, Seminar ah Rev. L. Khamkholun leh Rev K. Kamchinkhup te’n sinsak ding uhi. Khawmpi sung in business session  omding a, kum  2010-11 sung sum zat ding(budget)  Rs.2,27,77,400/- genkhawm in pom(pass) ding uhi.

Huai hun tawh kituak in EBCC Hebron, New Lamka ah EBC Lamka South Division te’n  Kumsim Khawmpi  4th veina  nei ding uh a, huai ah  Rev Khamkholun, Gen Secy EBC leh Rev Thawndoulian, Divn. Supdt/ LSD te’n Pathian thu gending uhi. Devotional talks hun ah Pastor N.Chinsuankham leh Pastor K.Vumzathang te’n makai ding uhi. Khawmpi palaite’n  business session ah kum 2010- 2011 sung a budget ding  Rs.3,43,22,000/- genkhawm in pass ding uhi.

NEWS LAKTOM:

CCpur dist ah suti hilou ding
Mera Chauren Houba of Lainingthou Sanamahi festival ziakin Oct 8,2010 in Manipur phaijang bial dist 4 a govt office leh institutiuon omte suti hiding hi. CCpur district ah bel ngeina bangin office kaichiat ding uh a, hundang ah suti zang ding uhi.

Golden Jubilee lopna om ding
Sielmat Christian Hr. Secondary School phuhkhiat nung un kum 50 chinna Golden Jubilee lopna Oct 12, 2010 zinglam dak 10:00 in school campus ah om  ding  a, huai ah Pathian kianga kipahthu genna om  ding hi.

Auto Rickshaw accident in liam
Thoibitom (40) w/o Hakim of Zenhang Lamka tuni zingsang  dak 6:30 vel in Auto Rickshaw a tuanglai Police Station kong  a speed breaker ah accident a, alu leh a veilam ban  liam in Dist Hospital ah  om hi.

BT road ah guta khat pummat uh
Imphal, Oct 7: Tuni nitaklam dak 1:15 velding in Imphal khawpi laizang a om Bir Tikendrajit Road a Gambhir Shopping Complex nuai ah mi khat in Activa vom MN 01W/7564 chabi dang khat zang a a guksawm lai mipi’n theikhia in pummat ua, bangtanhiam a soisak nung un City Police te’ khut ah pekhia uhi. Mat a om ahihleh, Md Sanathoi (30) s/o Md Amu of Keibung Sanachabi hi a, gari neitu ahihleh, Ksh Lenin s/o (late) Ibobi of Wangkhei Mayum Leikai hi’n kigen hi.

Misao gas ah bomb va pai
Imphal, oct 7: Tunitak dak 6:10 pm vel in meltheihlouh pasal 2 Pulsar bike a tai te’n Chingmeirong a om Misao Gas Agency te’ godown ah bomb va paihpuak ua, huai ah a si le liam kuamah omlou chih thu kiza hi.
 
Ganja Kg 400 val mankhia uh
Imphal, Oct 7: 23 Assam Rifles leh 39 Assam Rifles banah Custom official te’n zan nitaklam dak 6:30 velding in Lamsang Police station huamsung aom Lamdang Lokchao area lak joint operation nei ua, huai ah inn khat apan Ganja kg 400 val mukhia in aneitu leh ganja teng custom department, Imphal te’ khut ah pekhia uhi.

Estimate commtt chairman thak
Imphal, Oct 7: Manipur Legislative Assembly Secretary Y Indira Devi in tuni’n Speaker min a notification a suahna ah, Committee on Estimate for 2010-11 a Chairman ding in Elangbam Suraj Singh MLA appointment pia hi.

CM in workshop hongkhe ding
Imphal, Oct 7: Organising committee International Live Minimal Access Surgery workshop saina Regional Institute of Medical Sciences (RIMS) jubilee hall, Lamphelpat, Imphal ah Herniacon 2010, Selsi-Ez-Con 2010 leh Asi Manicon 2010 kithuah workshop thupitak om ding a, zingchiang nitaklam dak 3:30 pm in Chief Minister Okram Ibobi Singh in khuallian hikawm in hongkhe ding hi.

Association of Surgeon of India, Manipur State Branch a President banah organising committee chairman Professor G S Moirangthem in workshop makaih (preside) ding a, Guest of Honour in Dr NK Pandey President, Association of Surgeon of India pangding a, Patron in Prof NB Singh MLA & founder President Assn of Surgeon, Manipur state chapter pang ding hi.

Manipur Governor apan message
Imphal, Oct-7: Manipur Governor Gurbachan Jagat in Oct 8,2010 a kizang ding Mera Chaoren Houba festival tawh kisaiin Manipur mipite kipahna thuchah (greeting message) thon hi. Governor in a message ah Mera Chaoren Houba kichi kumtenga Sept/Oct kha a zat hi a, Manipur mipite kala kituahna leh kipumkhatna kepbit touhzel ngimna a nopbawlna(festival) kizang hi’n taklang hi. Hiai festival in khawtang (society) ah leng kilainatna, unauna leh kilawmtakna hatsaksem ding a deihthu Governor in taklang a, zatdan phatuam leh deihhuai banah state adia kong bangkima khantouhna dia zat ahih ngei leng deihthu puang hi.

Territorial Army Day zat hiding
Imphal, Oct-7: Manipur government inntekna in Oct 9,2010 zinglam dak 11.00 in GM Hall ah “Territorial Army Day,2010” zat hiding a, huai ah Manipur Chief Minister O. Ibobi in makai ding hi. Chief Minister in huai a kikhawm official-te,Army,Assam Rifles,Territorial Army leh chiama om mi poimawhte lak ah Territorial Army Day tawh kisai thugen ding a, huaizawh in Commanding Officer, 165-Bn Territorial Army in kipahthu genna in hunkhak ding in official programme kibawl hi.

Imphal East dist ah 144 Cr PC kipuang
Imphal, Oct-7: Imphal East distict pumpi ah  Oct 9,2010(Kiginni) zingsang dak 6.00 akipan in 144 Cr PC koih hiding a, thuthak om masiah sutzop hiding hi. Huai dungzui in pawlam mun 1 ah mi 5 sanga tamzaw omkhawm phal ahihlouh ding banah police leh security duty-te chihlouh kuamah hiamhei leh  galvan tawikhia a om theihlouh ding banah vanzat a neihtheih ding suang leh chiangpum tawikhia leng om theilou ding hi. Dist Magistrate/Imphal East thusuak dungzui in district sunga muanna leh bitna dinmun hihsia leh buaina bawlthei dia patauh-huai om  ziakin huaite dalna dia panlakna din 144 Cr PC kipuang hi’n taklang hi.

State Excise in Rs. 82,69,548 mukhia
Imphal, Oct-7: Manipur govt nuaia Excise department in July & August,2010 sungin revenue dan in Rs. 82,69,548 mukhia uh chi’n thusuak om hi.  July 2010 sung kia in excise deptt in revenue Rs. 45,51,932 mukhia in August 2010 sung in Rs. 37,17,616 mukhia uhi. State excise department in April,2010 akipan August,2010 tan in revenue a muhkhiak teng uh kigawm avek in Rs. 2,02,53,006 tung pha chih thusuak om hi.

Custom leh A/R te’n ganja mukhua
Imphal, Oct-7: 39-Assam Rifles leh Custom official-te kithuah in tuni’n Lamsang PS kiang Lamdan Lokchao a om inn khat akipan in ganja kg. 400 mukhia uh chihthu om hi. Ganja muhkhiakna inn ah kuamah a omlouh ziakin mihing kuamah matkhiak omlou hi’n gen uhi. Assam Rifles thusuak danin ganja muhkhiak hun zan nitak dak 8.30 vel hi a, tuni’n Imphal a Custom deppt office ah Assam Rifles-te’n ganja kimukhia teng pekhia uh chihthu om hi.

UNC leh Govt kihou nawn ding
Imphal, Oct-7: United Naga Council leh Manipur govt in India govt in theihpih in tuma a New Delhi a kihouna a neih uh Oct 16,2010 a sunzom nawn thei ding dinmun ah om uh chihthu kiza hi. UNC te’n Manipur (Hill Area) Dist Council Act,2008 dungzui in Council in thuneihna bangmah neilou in state govt zahngaihna  nuai ah om chi’n huai Act khenkhiak masak ding in govt nawh mahle uh govt in huai limsaklou in election sai teitei uh chi’n mawhsak uh a,MDC election phiat(null & void) dia a phut ban uah Manipur a om  Naga mite kivaipuakna ding tuam ngaihtuahsak ding in India govt nawh uhi. Tuma in Delhi a UNC leh Manipur govt kihouna ah Manipur govt sik in Delhi a Manipur Resident Commissioner  vatel hi.

Khaplang in suunthu puang
Dimapur, Oct 7: GPRN/NSCN chairman S.S.Khaplang in Kanglei Yawol Kanna Lup (KYKL) chairman Achou Toijamba naktak in suun a, Achou Toijamba kichi India malsuahbial a tualsuakmi (Indigenous people) te’ lak ah makai thupi penpen khat ahi chi chi’n GPRN/NSCN, MIP “dy. Kilonser”  P.Tikhak in thusuah abawlna ah taklang hi. Toijamba in Manipur mipite chauh hilou in India malsuahbial mipite’ khawsuahna ding ngaihtuah a, a nasep sate kuaman mangngilh lou ding a, North East mite’n heutu poimawh mahmah khat tan chi’n Khaplang in gen chi uhi. NSCN thusuak in agenbehna ah, Toijamba omlouh pen pawlpi tuamtuam ading in manna liantak hi a, society in leng mi poimawh petmah khat taan ahihdan theisuah semsem lai ding chi uhi.

Article:

Census diktak a sepsuah deih huai

-Thangkhopao Ngaihte, IAS (retd)

COPTAM leh CDSU te’n tutung census diktaka sepsuah a deih uh pahtakhuai ka sa hi. 1961 census laiin Jiribam ah SDC ka hihlai ahi a, 1971 census laiin Mao-East a SDO ka hihlai ahi a, 1981 census laiin Churachandpur a District Planning Officer ka hihlai ahi. Huchiin 1961, 1971 leh 1981 census te ah ka telkha hi. 1971 census leng 1970 kum a seppat ahi. Naga underground ten ah Mao-East sub-division sunga census bawl ding a deihlouh ziak un census duty dia sawla omte laka VLW 3(thum) mun tuamtuam apanin 12-7-1970 niin anaman (kidnapped) uh. Ka subdivision sung keimah mawhpuakna hiven chiin hiai buaina venna dingin ka theihtawpin ka pang hi. Pathian hehpihna ziakin underground ten ahon theisiam ua, 17-7-1970 niin ka VLW te ahon khahkhia ua, huai ni apatin buaina om nonlou in ka semthei ua, ka lung adam hi.

Census poimawh ziakin Joseph in a zikham Mari a gailai tonpihin David khua Bethlehem kichi ah a min uh khum dingin a hawh a, huai khua ah Mari in Jesu a neikhia hi, chih Bible ah i mu hi. Manipur gam sung ah census diktaka hih ahih a, mipi’n leng Enumerator-te  kithuahpih a, Enumerator-te leng inn(house) tenga hawh a, mi adamlai teng kimtaka agelh un tuh Pathian vualzawlna om ding ahi. Himahleh mipi’n diktaka sim ding a lunggulh louh a, Enumerator-ten dikloua agelh un tuh Pathian ma a zuau bawl himai ding ihi. Census overlapping chihte leng Pathian muh a khelhna hi ding ahi.

Pathian laukawma diktat leh hinkhua siangthou (holy life) neih tuh van gam tunna ding ahi, chiin Saptuam heututen agen uhi. Itna tellouin diktatna leng om theilou ahi. Zuau bawl tuh van gam lutlouhna ahi chih Bible ah hichiin imu hi; “Huan bangchi mahin huailai ah tuh thilnin hiam, ahihkeileh kihhuai leh zuau bawl himhim leng a lut kei ding hi. Himahleh Belamnou hinna laibu a min gelhte kia a lut ding uhi” (Kilakna 21:27). Belamnou hinna laibu a i min gelh a aom theihna ding tuh i thiltup lianpen hithei leh ut-huai hi.

Khawsak nopzawkna ding deihna in Churachandpur district sunga singtang khuate apanin mite Lamka khawpi sung leh akim a khuate ah a pemlut zel uhi. 1997 kum in Churachandpur district sunga buaina lianpi ana om ziakin singtang khuate apanin mi tamtakte Lamka lam ah ahong pemlut uhi. Huaiziakin singtang khuate ah mihing in kiamlam anawt dia, Lamka lam ah punlam a nawt ding, chih achiang hi. I pemkhiaksan khuate ah i min na kigelhlai henla, Lamka lama i tenna khua ah leng kigelh leh, mun nih a min nei ihi dinga, zuau bawl kisuak mai ding hi.  

Diktatna in nam tawisang ahihziakin eiten leng Britishte enton lehang adeih huai hi. Manipur a British vaihawmna ana mubaan singtangmi upaten “Mikang miten zuau gen ngeilou ahi” a chi uhi. Meitei upaten leng British-te a muandan uh taklatna in Lt.Col. H.Bhuban Singh gelh hiai anuai ah ka hon gelhkhia hi: “During the British Rule, law and order were so strictly enforced, local traditions and customs were so carefully protected, justice was so impartial and swift and administration was so surreptituously carried out through the Maharaja, so as not to make the people feel the impact of foreign domination that many wise men of older generations used to come and request us to send a telegram to Her Majesty, the Queen of England to come back and rule again in Manipur”. French Kumpipa Napolen in British-te tawh a kidoulai  laiin ahong vuallelta a; amah damna dingin British-te kiang mah ah avalut hi. World War II laiin Burma miten leng Independent tupna in Japante bel in Burma National Army abawl khia ua, Aung San tuh amaute Commander-in-Chief ahi. Japante tawh ahong kithuah taktak chiangun aheutute un Japante sanga Britishte ahoihzawkna uh mukhia in, “If the British sucked our blood, the Japanese ground our bones” a chi uhi. General Slim in Aung San kiangah “Hong inla i houlim dia i ngaihdan akituahkei leleng damin na kiknawn ding” chiin a thukhak a; muangtakin Aung San in Burma gam sunga General Slim omna ah 16 May 1944 niin avahawh hi. Aung San kiang ah General Slim in “Gelhthawh leng hilou a kama kithukhah (verbal promise) lel a bang dia hong ngam na hia, chi a adot leh, Aung San in “Because you are a British Officer” chiin a dawng(answered) hi.

Britishte tuh a melmate tanpha in a muanngamna uh bang ziak ahi a, chiin kidong lehangla hileh, “pianken diktatna a neih ziakun” i chi ngei ding un a gintak om hi. Khawvelin amaute a ngaihsangna uh a vun ngou ziak uh hizawlou ahi. Manipur gamsung ah diktatna a kitaksap luat ziakin adik leh diklou leng theihkhen zawhlouh abang maita ahi. Sangai Express of 8 August 2010 a article khat ah “Manipur today can be described as a land of thieves” chih akigelh ek mai hi.

Ei Churachandpur district sunga census Enumerator-ten innteng a lutin diktakin ana uh hon semsuah le uh, nam tawisang ahihna uh ahi dia, district dangte adia etton(exemplary) ahong hi dia, huaite banah Pathian vualzawlna in ahon zui ding chih a lam-et huai hi. St.Paul in tuni tanin “Itna leh thil hoih hiha kitokthou dingin i kingaihtuah tek ding uh” (Heb 10:24) a chilai hi.

Letter to the Editor:

Kupnop:- Town sung nala kuak leh sianthouna

Editor Pu,

Lamka town sung a nala kuakte neu theilua leh dai theilua in  vuahpi sawt louchik a zuk zek chiang in leng  hawktui akuak ah dimlet pah in nala kuak sung a nin leh kihhuai nengneng tamtak nala kuak mah tawn a hawktui in tuahmang vek zoulou in lamlai ah hawktui luang zungzung in tua hun laitak khawng a gari aneu alian khawng in atot khakkhak zawkmah chiang in pucca road in thuak lou in se pahpah zel hi. Lamlian asiat gawp chiang a lah bawl thak nawnna ding a hun sawt pipi ngak ngai zel.

Lamka town sung nala khuak kibawlsa teng athuk zaw in kibawl thak henla lamsak lam pang nala kuaksung a hawktui luangte lamkhang lama nuamtak a aluan khiat theihna ding in cement lei leng bangzah hiam kibawl behthak henla lamlian a jang simna munte ah leng nala kuak asuk in kibawl leh ut huai kasa hi. Etsakna ding in lam jaang lam zakhat a a sauna munte ah taklam leh veilam a akipatna mun fit nga tuak khawng a thuk sak ding in alai lam manawh a thuk sak deuhdeuh ding in alai tak laam sawmnga na mun fit sawm hiam a hih keh athuk zaw hiam a bawl ding in tuamun ah lam khanglam a hawktui nuamtak a aluan khiat theihna ding a cement lei hoihtak bawl ding. Akimlai tak chetchet a lei bawlna ding alem tanglouhna mun leng om khamai thei. Nala kuak pen asuk a bawl ding in lei pen alem tan na munmun a bawl hileh.

Tualou in, etsakna mah in Tedim road nala kuak le SONA TYRE kong pamzek apan fit nga khawng a thuk sak pah ding in parking lam manawh a thuk sak deuhdeuh ding in phailam a pan bus hongpai toute parking a alut touhna bul lak fit sawmnih athuk hiam ahih keh athuk zaw hiam a bawl ding in tuamun ah nala kuak a hawktuite lamkhang lam a nuamtak a luan khiat theihna ding a cement lei hoihtak bawl ding. Vuahpi tamtak zu leh leng nala kuak a hawktui let zoulou ding khop a thuk leh nala kuak sung a nin tamsim a om leh leng hawktui in nuam tak a atuah mang theihna ding in asuk ngen in kibawl henla lamlai ah hawktui tam tak luang nawn kei leh pucca road i neih sunte uh sawt daih zaw deuh ding in gintak huai kasa hi.

Gamdang khawpi sung mun jaang liantak ah leng vuahpi a zuk chiang a hawktui lamlai aluang zungzung theilou dia nala kuak hoihtak a bawlthei uh ahihleh Lamka town sung ah leng hoihtak in bawl ut lehang kibawl mawh samlou ding ahi. Aziak bel Lamka town sung ah munjaang lualian tak gen ding pi leng omlou in mun lianzaw asuk a tou ngen a hih ziak in. I gam sum leh pai taksapna ngen ahih tawh kituak in khatvei thu a bawl zawh ding pen ahaksa sim maithei. Nasepna ding solkal apan sum muhdan tawh kituak in awlawl in hoihtak in bawl toutou lehang i zouh hun om veve ding ahi.

Tualou in, Town sung pumpi lamlian teng leng khawpi sung Tedim road a pucca road akizut bang in nala kuak tehtuah kal teng ah kizut vek henla huaizawh chiang in town sung mipiten lamlian a nin leh leivui om teng ban ah lamnawl mun tuamtuam a nin koihkhawmna a nin om teng tawh khawpi pawlam ah kibaw khevek henla aban siah lamnawl a tengte leh dawr bawlte’n amau, huang tawh kituak niteng in lamlian phiat siang gige uh henla, lamnawl a nin koih khawmna a nin omte leng niteng in khawpi pawlam a bawkhiatute’n bawkhe gige le uh khawsung hong siangthou zawdeuh ding ban ah kuapeuh a ding in leng dam theihhuai zawdeuh ding ahi.

Pu Editor bang ngaih dan na nei hiam?

Sd/- (P. Chinkhanlal)
New Lamka (G)