A thugelh tampi te’ lak a thupi geen ka sakdiak te ahihleh New Delhi khopi a north-east mi nnaseem a om te’ chihtak dan leh kuhkal dan hon gelh, leh May 10, 2005 a singtang mi numei sualluih a a omlai a, mite’n eilam numei te honmuh niamdan uh toh kisai kapthukna thu hongelh te ahi hi.

Bangtan hiam paita apan meitei hel te’n i gam ah – i zodawn ah – bomb thang kam in mipi te genthei tak in hon ukkhum uhi. Hiaiziak in tamtak te’n hinna a taan ua, tamtak te damsung a dia poihlawng in a om uhi. Tamtak te belhdiing nu-le-pa bei in a om ua, tamtak te’n lusuunna thuak in khoisa vungvung in a hinkhua uh a zang ta uhi. A neekzonna uh loulam a zuan ngamkei ua, ki-enkolsak diing in khopi lam leng a zuan theikei uhi. Koilam a kipan panpihna hongtung diing hiam chih lametna leng amau te ah a omzou nawnkei. A kahna khitui te uh a kang ta. A tauna aw te uh a heu ta.

Huchiin, pawl tuamtuam leh maikai bangzah hiam te’ panlaakna ziak in tu in i gam ah ‘hahsiangna naa’ nasatak a beih in a om hi. A kipahhhuai. Mahleh, i mi te a di’n panpihna a tung zekai loman ta. Meima pawn thuuktak in i gamlei a hihliam khinta hi. A dambaih kei diing.

Hiaibang a i gam’ gentheihna aw zaak a a hong omtheihna tungtang ah thilkhat i mangngilh khakdiing a lauhuai mahmah. Huaibel ‘Thangkhanlal Ngaihte’ chih min ahi. Hiaimin ahi i zodawn meelma khut apan honkhia, chileng ka genval lokei diing. Amah, Thangkhanlal Ngaihte in Sangai Express leh North-East Sun te ah hiai landmine thu toh kisai a mipi te’ haksatna leh solkal’ kitheihmoh bawlna thu te hongelh tou ngiitngeet hi. Khatvei ka kihoukhak na ua “U Lal, tutung Impression ah bangthu na gelh ale?” chia ka dotna hon dawnna ahihleh hiai ahi: “Landmine thu mah hi, kihaichilh gawpta hia!” Ka lungsim a hon khoihkha mahmah hi. Nang di ngei na hi. Nangkia na hikei. Ka hong kizil toutou diing a, nikhat ni chiang in ke’n leng ka hongelh pih tei ta diing. Zolei a di’n. Zodawn a di’n.

Hiaibang a imi-isa te’ haksatna te bangchi’n i panpih a? Bangchi’n khovel theih di’n i na tangkou pih? Mipil-misiam, mihau-miluun kuateng i mite’ a di’n i ding a? Mundang genlouh in Delhi Univerity leh Jawaharlal Nehru University apan khangkhia siamsin hiaizah omte’ thawm koilam a ging ahia? Daihna-thawm (sound of silence) ngaihtak kawm a kipan hongging khia zaktheih omsun ahihleh zodawn apan mangbatna aw ahi.

Tuma zek in unau Hmar te’n buaina hontuak ua, mipi te’ haksatna te taangkou pih in a mipil-misiam te un simseng louh diing khop in newspaper, magazine leh website tuamtuam ah thusuah honbawl zungzung uhi. A thawm uh a ngaih a, gamla leeng a deengpha bok. David Buhril, Joseph Joute, Langsangzual Hmar, Isaac L. Hmar, Abel Hmar, Joyful L. Thiek, Lalremlian Neitham… ka geenseeng kei.

Kaal khat vel paita in Samrat Choudhury in Hindustan Times a ‘Offtrack’ column ah north-east a buaina a omchiang a national media te’n a ngeingaih louhdan uh hongelh kha hi. Adik mahmah mai. Imi-isa ngei, mipil-misiam i suan mahmah te’n a hongelh kaal ana ngaakzeel mahleng ka lohchin meelkei. Phawkpha lou i hi diing uam? Doctor khat in cancer natna a etkolna di’n aman cancer avei a ngai sese kei. I gam a khangkhia i hikei maithei, i tawndan te ngaineep leeng i hi maithei. Ahia, kum khat vaal sung vingveng hiaibang a i gam a ‘sihna hii’ a leennung a dai dide a i om nilouh pen theihsiam a haksa hi. Kuahiam khat hon hilhchiang theidiing i omdiam? Ahihke’h kuahiam khat laigelh diing dan honhilh theidiing i om diam? Thangkhanlal Ngaihte gelhpih thei diing…

Tu in Times of India leng ka simpeih nawn mangkei. The Sangai Express a kihei ka sawm zota. Ei-leh-ei kaal ah.