You are here: HomeNewsLamka PostThe Lamka Post | January 06, 2014

The Lamka Post | January 06, 2014

Written by  Published inLamka Post Monday, 06 January 2014 17:17
The Lamka Post | January 06, 2014

Karbi Anglong District sousang

DIMAPUR, Jan 5: Dimapur Civil Hospital a siluang 9 lak a 4-te hihna theihchet ahihnung a, misite Karbi mi ahihdan uh theihkhiak ahihnung in Assam state sung a Karbi Anglong district ah sousanna leh thangpaihna thupitak om a, huai in tulel a Rengma Naga leh Kari kal a buaina pailel naktak a tokthou ding in kilang hi.

 

Nagaland leh Assam gamgi Bokajan ah Kiginni a kipan nitak curfew koih hi a, buaina thupizaw a tunkhak ding venna in Assam solkal in tunitaklam in hiai munte ah security tamtak koihlut behnawn hi.

 

Dimapur district administration in buaina khawkzaw a tun ding venna in security hihkhauh a, tua banah buaina tunthei ding thuthang hoihloute kuama'n thehzaklou ding in Dimapur deputy commissioner in ngen hi. 

 

Karbi-Rengma namkal buaina ahihleh Kiginni a Dimapur a siluang 9 lak a khat theihchet ahihnung a kipan in sousang mahmah hi'n kigen hi. Tua nung in, tuni'n mi dang 4-te hihna theihchet hinawn a, Karbi mi mah ahihziak un, huai in buaina khawkzaw tunthei ding a om man in, abik in Karbi Anglong district sung ah hiai namkal buaina husa thawmging ngaih mahmah hi'n thusuak in taklang hi. (NNN)

 

Miz in 2013 in damdawi khamtheih tamtak mankhia

AIZAWL, Jan 5: Mizoram solkal nuai a Excise & Narcotics department leh Mizoram police in 2013 sung in damdawi khamtheih tamtak mankhia a, huaite lak ah Pseudoephedrine kichi tampen hi'n thusuak in taklang hi.

 

Thusuak in a taklatdan in December 18, 2013 tan in Mizoram state sung ah Pseudoephedrine kilogram 4658.6241 matkhiak hi a, khamtheih dang matkhiak a omte ahihleh Actisun -20,000 tablets, Levet- 20,000 tablets, Ephrelime -11 bottles leh Pacitane -490 tablets hi'n taklang hi. 2013 a matkhiak a om damdawi khamtheihte ahihleh kumdang a matkhiak khak a omlou hi'n thusuak in taklang hi.

 

2013 sung in Miz ah Air leh Noise pollution sang

AIZAWL, Jan 5:  Mizoram Pollution Control Board (MPCB) in tuni a thusuah a bawlna ah, kumdangteng sang in 2013 sung in Mizoram ah air polution leh noise pollution sangpen lai hi'n taklang hi.

 

MPCB in December 31, 2013 leh January 1, 2014 a  Aizawl, Lengpui, Lunglei, Champhai leh Kolasib khopite a huihniin (air pollution) toh kisai a taklatna ah, 2012 sang a 2013 a huihniin naktak a kibehlap zaw hi'n taklang hi. MPCB in huihniin kibehlap chi a, a taklatte ahihleh suspended particulate matter (SPM), respirable suspended particulate matter (RSPM), Sulphur Dioxide (SO2) and Nitrogen Dioxide (NO2) chihte ahi hi.

 

MPCB in Bawngkawn, Laipuitlang, Dawrpui leh Khatla ah huihniin tehna vanzat koih a, huaite tungtawn in kum paisa a Nitrogen Dioxide (NO2) 10.48 pen 2013 in 14.81 tungtou hi. Kum paisa a RSPM 59 a chiamteh hi a, himahleh 2013 in 60.25 tungtou a India gamsung pumpi a RSPM 60 sang inleng sangzaw lai hi. Tua banah kum paisa a SPM 131 pen  2013 in 152 tungtou a, India gamsung a 140 sang inleng sangzaw hi. Lengpui, Lunglei leh Kolasib ah leng huihniin kibehlap mahleh lauhuai tan (dangerous level) bel tunglou hi'n MPCB thusuak in taklang hi. Champhai ah bel khopi dangte banglou in nuihniin kiam mahmah hi'n kigen hi. 

 

Noise Pollution toh kisai in Aizawl khopi ah December 31, 2013 leh January 1, 2014 in Noise Pollution chiamtehna vanzat Khatla, Dawrpui, Laipuitlang leh Bawngkawn ah koih hinawn a, khopi dang nih ah leng hiai vanzat koih in om hi.

 

2012 a Aizawl khopi a Noise Pollution chiamtehna ah 59.03 dB hi a, himahleh 2013 in bel 46 dB in keniam hi.  Mizoram pumpi ah 2012 in Noise pollution 69.45 dB hi a, himahleh 2013 in bel 94.6 tungtou hi. (NNN)

 

Manipur Government in Moreh a Visa office hon ding lemsa

IMPHAL, Jan 5: Manipur cabinet in Tulihal Airport a Immigration Centre honkhiak ding lemsakna a bawl banah Moreh a Visa on Arrival (VOA) office honkhiak ding lemsakna bawlta hi.

 

Manipur Government thupuangtu banah Education and CAF&PD Minister M Okendro in a genna ah, tunitaklam a cabinet meeting om ah, state sung a Immigration Centre leh VOA office honkhiak ding lemsakna bawl hi a, hiai office a semtu ding ahihleh tulel a Manipur Home Department a semtute (staff) zat hiphot ding hi'n gen hi. 

 

Tuni a cabinet meeting neih a om ahihleh Chief Minister O Ibobi Singh in makaih a, huai hun ah Home Department in Tulihal Airport a Immigration Centre leh Moreh a Visa on Arrival (VOA) office a semtu ding lakna ding a post 26 bawlkhe ding in state cabinet kiang ah 'proposal' bawl mahleh state sung a sumlam dinmun haksatna ziak in cabinet in tulel a Government nasem lelte hiai office nih a semtu ding  a zat phot ding in thupukna bawl hi.

 

Thoubal ah NFSA meeting om

THOUBAL, Jan 5: Tuni'n Thoubal district deputy commisssioner office Conference Hall ah a khatveina District Level Committee Meeting for implementation of National Food Security Act, 2013 neih in om hi.

 

Hiai meeting ahihleh CAF&PD Minister M Okendro in makaih a, hiai hun ah Agriculture and Fisheries Minister Md Abdul Nasir,  CAF&PD Commissioner  Y Thamkishore, Thoubal district Deputy Commissioner T Ranjit, Thoubal district a kipan MLA-te leh Thoubal a kipan Pradhans leh Zilla Parishad member-te'n uap uhi.

 

National Food Security Act, 2013 ahihleh July 5, 2013 a kipan state sung a zat ding a pomkip hita a, hiai Act tungtawn in antang mantawnzaw in leitheih hiding hi. Hiai Act nuai a Targeted Public Distribution System tungtawn in Manipur milip za lak a 87 (87%) in hamphatpih ding hi. Hiai hamphatna ngahthei ding ahihleh chi nih in kikhen a, tuate bel Antyodaya Anna Yojana Household leh Priority Households ahi hi. AAY house- hold-te'n ahihleh kha khat in antang kg 35 mantawmzaw in ngahthei ding ua, Priority Household-te'n bel kha khat in mantawmzaw in antang kg 5 zel ngahthei ding uhi.

 

CAF&PD Commissioner  Y Thamkishore in hiai hun a, a genna ah, hiai Act in hun paisa a PDS hamphatpih khalou mi tamtak huamkha ding hi'n gen hi. Tua banah NFSA hamphatpih dingte hihna chiantak a zawhsiang ahihma hiai Act zat hinailou ding ahihman in AAA leh Priority Household khenna a tualsung mipi leh vaihawmtute'n kithuahpihna hoihtak pechiat ding in ngen hi.

 

CAF&PD Minister M Okendro in a genna ah, NFSA kichi ahihleh UPA government flagship programme hi a, khovel gam tuamtuam in Food Security Act nei mahle uh NFSA bang a lian uap khovel a omlou hi'n gen hi. Aman a genna ah, January kha sung a Priority Household chiamtehna zawhsiang a March 3, 2014 a kipan hiai Act zat ding chih pen thil baihlam hilou ding hi'n  gen hi.

 

Minister in a genzelna ah, hiai Act toh kisai theichianlou mi tamtak omlai ahihman in, mipite'n a theihsiam chiatna ding ua 'awareness programme' neih poimawhlai hi'n gen a, mipite kithuahpihna tellou a NFSA pen tangtung theilou ding ahihdan gen hi.

 

Thoubal district sung NFSA nuai a Priority Households ngah ding a 'proposal' kibawl inn 72,730 hi a, AAA household ahihleh 10,516 hi'n kigen hi. NFSA dungzui a AAA Household hithei dingte ahihleh innsung a vualphalou omna; innsung pa omlouhna inkuan; nu leh pa sihsan naupang omna innkuan; innkuansung a HIV/AIDS vei omna; niteng a kilohtawm a nek zong; mi innsung nasem a kiloh a nek zong; rickshaw hawlte leh kum khat a innsung a sumlut Rs 1 lakh tungloute hiding hi.

 

Rengma-Karbi buaina ziak a misi 9 lak ah 4 theihchet hita

DIMAPUR, Jan 5: Rengma Naga leh Karbi namkal buaina ziak a thah hiding a gintak Dimapur a misi 9 lak ah tunitan in mi 4 theihchet hita a, amaute ahihleh Karbi community a kipan hi ua, midang 5 ahihleh ahihna uh theihchet hinailou hi.

 

Misi innkuante leh Karbi Anglong Peace Committee (KAPC) member bangzahhiam in tuni'n Dimapur Civil Hospital ah misite va enchian ua, huai hun in misi 9 lak ah mi 4 ahihna uh theihchet in om hi.  Tuni a theihchet a om misi 4-te ahihleh Rajiv Engti (18) s/o Bura Engti, Sunil Rongpi (25), Mangal Sing Engti (24) leh Doni Rongpi (25) hi uhi.

 

Thusuak in a taklatna ah, thah a om mi 9-te ahihleh nasem a om hi ua, ni 10 paisa in Kohima tawn in Karbi Anglong zuan in hong pai ua, lamkal ah galvantawi pawlkhat in ana mat nung ua, a thah uh hi'n taklang hi. Tua banah ahihna uh theihchet nailou 5-te leng Karbi nam a kipan mah hiding ua gintak hi'n thusuak in taklang hi.

 

Thah a om mi 9-te ahihna a taksa uh muat phialta a, post mortem bawl a om tungtawn in ni 10 vel paisa a thah a om uh hi'n taklang hi. Hiai mi 9-te ahihleh Diphupar Police Station nuai a om  Pachaspura kiang a Chumekedima area a kipan a luang uh muhkhiak ahihnung in, Kiginni in Dimapur District Civil Hospital tut hi uhi. (NNN)

 

2014 sung a AFSPA lakhe ding in phu

Imphal Jan 5:  Human Rights Initiative (HRI) Executive Director Babloo Loitongbam in tuni a, a genna ah Prime Minister of India Dr. Manmohan Singh leh UPA (United Progressive Alliance) government in kum 10 val Manipur mipite Armed Force Special Power Act (AFSPA), 1958 toh kisai a zekhem hi'n gen hi. 

 

Hiai thu ahihleh Babloo Loitongbam in tuni a The Manipur People’s Convention on Repeal Armed Force Special Power Act 1958 kichi Lamyanba Shanglen, Imphal East a zatna hun a, a gen ahi hi. Aman a genzelna ah, Prime Minister Dr. Manmohan Singh in kum 10 paisa a Kangla fort a, a thugenna ah, Manipur a kipan AFSPA lakkhiak hiding in ana chiam hi'n gen a, Central a UPA government in mipite tung a, thuchiam a bawlte limsaklou hi'n ngawh hi.  

 

UPA government in kum 10 val vaihawmna a letsung in, Supreme Court of India in Manipur a AFSPA kizang tungtang suichian ding in Special Investigation Team tanpha bawlkhia in state sung ah thil omdan suisak hi. Huai leng Manipur a AFSPA zat ahih ziak a  Extra Judicial Victim Families Association pawl in hiai dan zat ahih ziak a sihna tuak mi 1,528 sihna thu Supreme Court a tut ziak ua hong piangkhia hi'n Babloo in gen hi.

 

Tuni a hunzatna ah, paikhawm mipite'n state sung a AFSPA zat a om toh kisai in thupukna thum la uhi. Huaite ahihleh "2014 sung a Manipur a kipan AFSPA lakkhiak ahihna dia pangkhawm a hihtheih leh septheih omteng sep ding", "AFSPA lakkhiakna ding a working commitee in a baihtheipen a Action Plan bawlkhiak ding" chih leh " Working Committee in state sung a pawlpi leh nam tuamtuam omteng khaikhawm a AFSPA lakkhiakna ding a panlakkhawm ding" chihte thupuk uhi.

 

Tuni a  Manipur People’s Convention  makaihna nuai a   Repeal Armed Force Special Power Act 1958 kichi ahihleh pawlpi tuamtuam in a bawlkhiak Organization Committee for the People’s Convention on AFSPA saina nuai a neih a om ahi.     

 

Dy CM in thuthaksaite kimuhpih

IMPHAL Jan 5:  Manipur Manipur deputy chief minister Gaikhangam in tuni a Imphal pansan thuthaksaite a kimuhpihna ah state government in state sung a helpawlte hihbeina ding in helpawlte luahna munte security force-te luahsak zel hiding hi'n gen hi.

 

Hiai toh kisai state government in Union Ministry of Home Affairs (MHA) toh kithuzak a panla hi'n gen a, helpawlte a taisanna munte security force-te lauhsak hizel ding hi'n gen hi. Tua banah ah state sung a helpawl tamzawte pen army-te thuneihna nuai a om hita uh hi'n leng gen a, helpawlte camp omte army-te'n a luah zel theihna ding ua state government leh Ministry of Home Affairs toh kithuzaktuah zel ahihdan gen hi.

 

Lok Sabha kitelna ding toh kisai dotna a dawnna ah, Deputy chief minister in Lok Sabha kitelna ding toh kisai in state sung a Lok Ayukta bawlkhiak himaithei hi'n dawng hi. UNC leh GoI leh Manipur kihouna toh kisai dotna a dawnna ah, Manipur cabinet in hiai kihouna a luikhiak ding thu poimawh bangzahhiam bawlkhia ahihdan gen hi. UNC toh kihouna pailel in Manipur gam leitang mipite a ding thilhoihlou bangmah tunlou ding ahihdan leh maban a kihouna ding toh kisai a leng Union Home Ministry in Manipur government ngaihdan la mahmah ding ahihdan gen hi. (UNA)

 

The Hotel Classic in Sendra, Loktak Lake puah ding

Imphal, Jan. 5: Tuni sunnung dak 1.30 in The Hotel Classic General Manager Salam Momo in Sendra, Loktak Lake, Bishnupur District, Manipur ah thuthaksaite kimuhpih in huai mun a Sendra Park & Resort kichi a patkhiat uh toh kisai mipi theih di'n pulak hi.

 

Momo in a gendan in The Hotel Classic panlakna toh patkhiat a om hiai Sendra Park & Resort bawlna ding in Manipur Sorkal nuai a Tourism Department toh thukimna kha 6 sung daih ding bawl uh ahihdan gen a, hiai pen etkhiat touh zel a hoihlam a nawtleh bel maban ah a hun suksau theih ding chi hi.

 

Hiai Sendra Park & Resort patkhiatna ding in nikum November, 2013 apan in amun leh mual hahsiang pan uh ahi chi a gen kawm in Momo in tu kum thak January 1, 2014 apan restaurant dan a honkhiat in om masa chi hi. Maban a panlak dingdan a genna ah Phases 4 in kikhen ding a, Phase khatna ah picnic bawlnuamte a ding a mun leh mual bawlsak hi ding a, nektak leh tui kiningching koih hi ding chi hi. Phase 2na ah amun a om theihna ding bawkta bawl touh hi ding a, hiai nasepna pen kha nawn February, 2014 sung in bawl zoh hi ding chi. Huaizoh in Phase 3na pat nawn hi ding a, huai ah bel naupangte lunglutna kimawlna tuamtuamte koih hi ding chi in leng gen hi. Hiaite tengteng zoh ahihchiang in Phase 4na kipan ding a, huai ah kivenkholhna vanzatte toh kithuah tuitung a kimawl theihna tuamtuamte koih touh hilai ding chi hi.

 

Aban a genzelna ah, hunchiam kha guk sung in Sendra mun a Rertaurant mun apan Dakmual (view point) omna tan sung teng amau enkai ding ua, a lut a vakhodak nuamte'n Kongpi ah lutman a piak uh ngai ding chi in General Manager in gen hi. Naupang lutman mi khat zel ah Rs. 5/- students Rs. 10 leh piching Rs. 15 hi ding a, skul naupang a vahohte'n bel Identity Card a tawi teitei uh ngai ding chi hi. Kuapeuh hiai mun a mimal, pawlpi ahihkeileh innkuan a hoh leh nektak nei nuamte'n Imphal a The Hotel Classic ah khamkholh theih chi a a gen ban ah nekmante a tangpi in mi khat ah Rs. 150 leh 200 kikal man ding a, amau deihdan bangzel in leng a tamzaw khamkholh masak theih ding ahihban ah nektak vanzat kuamah kipuak ngai nawn lou in amau pe vek ding uh chi in leng gen hi.

 

Tualsuak nektakte ban ah gamdangmi hong paite a ding leng khamkholh theih ding ahi chi in genbeh lai hi.

 

Hiai thil thak a patkhiak uh toh kisai mipi'n leng kipahpih mahmah uh ahih dan gen kawm in amun sianthouna ding toh kisai pen etkaina Municipality lam a thuneite toh kithuzak ahihdan gen a, tuinek siangthoutak gari in nawnlut hi ding chi in gen hi. Ama'n a genzelna ah hiai mun a amau nuai a sem ding in khosung mi mahmah lak ahihdan uh gen a, a vahohte gari khawlna mun ding leng a khomite toh pangkhawm a mun sehkholh hita chi in leng gen hi. Tuni in hiai Sendra mun mahmah The Classic Hotel in band minthang The Gravity leh Anggu & The Musos kichi sam in sun nitum in live in laa sasak den ua, huai mun en dia kuan sapgam apan pasal khat leh numei nga tel in mi tamkhop paikhawm in hun nuamtak zang uhi.
Thuthak om nawn matan hiai mun bel, nidang bang nawn lou in, The Hotel Classic etkolna nuai ah omta ding a himahleh amun vehnuam leh zang nuamte a ding in chiklaipeuh in amau hotel North AOC, Imphal mun ah hiam ahihke'h 0385-2443967/69 leh 2445162 tungtawn in khamkholh (booking) theih gige ding hi.

 

Malaria in naupang khat si; khat damlou

LAMKA, Jan 5: Thanlon Sub Divn sung Khuanggin khua a teng Pauzamung (9) s/o Pausianmang of Khuanggin Malaria PF ziak a damlou, Jan 3, 2014 ni’n Lamka Damdawi Inn puaktung in om mahleh dam zoulou in zankim dak 12:45 in si a, Jan 4 ni’n Khuanggin ah vui ding in puakkik in om hi.

 

Tuabanah, Mr. Mangthianlal (7)  s/o Kamchinsiam of Vengnuam New Lamka, Khianggin a va zin Mr. Pauzamung toh giakkhawm leng Malaria PF ziak mah in Lamka Damdawi inn a Children ward ah etkol in omlel hi. Malaria Deptt in Khuanggin khua apan Malaria PF case 2 a muhkhiak om ziak in ‘red alert’ in puang ua tu'n ahih beina ding in panla ngal uhi.  

 

Police leh Traffic Police in drive sun zom ding

LAMKA, Jan 5: Lamka khopi sung ah tulai in gari hek tamzaw in license neilou a gari hek ban ah gari lai neilou a tam ziakin Jan 4, 2014 in mun 3 ah Police leh Traffic Police kithuah in gari taivelte check (drive) pan uhi. Zingchiang Jan 6, 2014 ni'n leng drive sun zom ding ua, huai munte ahihleh DTO/CCPur office kongmai Tedim Road, Tedim Road Lailam leikiang leh Tipaimukh road CCPur College kong ah check bawl ding uhi. Gari hattaite leng control ding uhi.  

 

IAS (probation) mi 18 in Lamka hongtung

LAMKA, Jan 5: IAS Probation training centre Mussoorie apan in IAS 2013 batch pasal 12 leh numei 6 te Delhi apan tunitak dak 5:30 in Lamka hong tung ua, EBC Guest House, New Lamka ah giak uhi.  Amaute'n zingchiang Jan. 6, 2014  zinglam in ZEO/CCPur office ah Education system tungtang houlim pih ding ua, sunnung in CMO/CCPur office ah Medical toh kisai houlim pih ding uhi. Huai zoh Jan 7, 2014  sunma in 27- Sector Assam Rifles ah Army nasepna tuamtuam genkhom ding ua, huai zawh sunnung in SP/CCPur office ah Police te nasep dan kikum ding ua, huai apan in DFO/CCPur office ah Forest tungtang kikum ding uhi. Amaute ahihleh Jan 8, 2014 in kiknawn ding uhi.

 

Editorial

 

RBI clean note policy leh i sum neihte

 

Kumlui in internet pansan, social network­ing site tuamtuamte leh media khenkhat ah, 2014 January 1 a kipan bank notes (sum) a thil kigelh peuhmah Reserve Bank of India in accept nawnlou ding a, market a leng zat­theih nawnlouh ding chih thuthang thehzak in om hi. India gamsung pumpi a mipite lak ah hichibang RBI thushah zuih hileh tomkhah sung lel in sum bangzahta value neilou in a om dia chih i ngaihtuah chiang in RBI in leng hichimawk in hiai thusuah hon bawl guih kei leh kilawm sak in om hi. Tuabanah, RBI in hiai thuthang diklou a hihdan clearification a hon bawlpah louh za­wkmah chiang in 2013 kum beikuan a kipan thuthang a hong hat deuhdeuh a, a tunglam gingtalou simte nangawn in leng i sumnei­hte uh i velpan ua, bank notes kigelhthang peuhmah deadline tunma ngei a koihkhiak khit sawm in bangzahhiamte’n pan i la man uhi. Tuabanah, khopi sung a dawr bawlte nangawn in huchibang notes-te hon accept nuamlou uhi. Himahleh RBI in clearification a hon bawl hial chiang in bel, RBI Clean Note Policy toh staff-te thilchin a kituahlouh ziak a staff leh official-te zuih dia a puan hileltak hi. RBI sung a staff leh official tamtak-te’n a koihkhak uh bank notes-te a thilgelh a chiing zongsang sim mahmah uh hihtuak hi.

 

Bangteng hileh hiai a kipan i gennop pen bel, RBI a kipan thuthang pen diklou a hihdan tu in chiangta mahleng mipite mahmah leng Bank Notes-te hihbuah i zong­sang a, sum a suaikaih, min gelh chih bang tamtakte chindan a hih ziak in RBI thupiak sese hikei mahleh thilchin kilawm a hih louh ziak in mipite’n leng tawpsan thei leng se lawmlawm lou ding hi. Sum a mimal min/ suai a hihkeileh banghiam number i gelh behlap ziak a, a value sangzaw a hihkeileh niamzaw leng ahisamkei a, i gelhsate i zatkh­iak nung a i muhkik nawn leh dau hoih chih leng a hisamkei, a hihbuahtu lel ahizaw a, tuabnah, sum kichi mi 1 in i neihteng i kep­det ding hizenzen lou a, a siat gawp mateng circle a pai a hih manin lungsim neutak pu a gelh thang sese pen a phattuamna ding himhim omlou hi. Phattuam naksang in a siatbaihna in pang zaw lai hi. Tuabanah, sum kichi a sang dingtute’n a san noplouh chiang ua value neilou hinawn leuleu uhi. Mihingte ngenteldan tuamtuam a hih manin RBI in order suahkhe sese kei leh leng na min gelh a suai na kaih ziak hiam, a hihkeileh seal na tah ziak hiam in na zatkhiakna dingte’n honna accept sak utkei uh henla, hiai sum pen hiai a, huai a ahi honna chihsan zenzen taleh deih leh deihlouh genlou a kipiak teitei theih zaat hilou a hih manin Bank Notes peuhmah tuh mi tengteng accept theih dia siangthou tak a kep poimawh petmah hi.

 

Hiai ban a i gennop nawn tuh, inter­net leh social networking media leh mass communication tuamtuamte ah a hoihlam sang in a hoihlou lam i khahkhe hat petmah a, theihchianglouh thute khat in post a, midangte’n comment a hon piak touhtouh chiang un a tawp ah thil se lawmlawm lou nangawn leng serious tak hong suakthei a hih manin i hun paisa, 2012 a thiltungte lungsim a nei a, maban ah hiai social media-te zatdan siam in pilvang mahmah leng uthuai petmah hi.

Read 471 times
Login to post comments