You are here: HomeRSS FeedsLatest News

Angels Vision News | March 29, 2017

Wednesday, 29 March 2017 22:00

Apaisa March 27, 2017 (Seppatni) zinglam a inn apan a pawtkhia Nu Niangkhanching of Elim Veng, tulel a Lamka College compound a teeng, YPA Elim Veng Unit makaih a mipi’n nasatak a azon nung un tuzingkal in Thangching Tang bul, Lanva Lui naak ah damtak a muhkhiak a om in, YPA Elim Veng Unit makai te’n Zou Youth Organization toh kithuah in tuzingkal in va pikhia in, zinglam dak 9:00 in a tenna inn Lamka College Compound ah vaidawnna programme saulou zat in om hi. Thutut kingah dan in, Nu Niangkhanching ahihleh ahihleh lungsim lam venlouhna hi’n kigen a, zanhal March 27 zing-ann nekhin pawtkhia inn tungkiklou in, a sungkuan te’n zon theihna teng a zon nung un mukhe zoulou in nitaklam in YPA Elim Veng Unit heutute theisak ua, YPA Elim Veng Unit-te makaih in vengsung mipi’n a zan a zan in zong ua, Mission Compound kho khung tan va tung in zan dak 11:00 tan zong mahle uh lohsam uhi.

Zan in a sungkuante banah YPA Elim Veng Unit leh YPA Lamka Block heutute makaih in zon theihna teng zong mahle uh mukhe zoulou uhi. Tuni’n YPA New Lamka Block leh ZYO makaih a mipi’n zong ding chih himahleh Tuinom khua a om pasal khat in phone tungtawn a a omna thei ahih dan hilh in, YPA leh ZYO makai te’n delhtou ngal in, Teiseng Gam ah louzau ah va mukhia in zinglam dak 9:00 in a tenna inn tut ua, huai ah vaidawnna programme saulou zat a om in, Nu Niangkhanching zonna a panlak dan leh muhkhiak a aom dan report ngaihkhiakna om hi. Hun zatna ahihleh inn tek te’n makaih in S. Manlian, President, YPA New Lamka Block in kipahthu gen a, Nu Niangkhanching va pikhete lak a tel Pa Chongliansang, President, YPA Elim Veng Unit in thil omdan pulak a, aman a gendan in, tuzingkal in Tuinom khua a om Kammalsawm s/o Goukhosat Haokip in mukha ahih dan YPA heutute phone tungtawn a hilh in, YPA makai mi bangzah hiam in delhtou ngal ua, Kammalsawm makaih in Thangching Tang bul, Lanva lui naak a lou buk khat ah galmuh in a sap uleh tai a, lou lai ah kidelh in Pa Haukhotuan, President, YPA Zion Veg Unit in ana makhelh in lui pang langkhat lam ah mankha a, nek ding tuamtuam a puakte uh a nesak zoh un innlam zotpih uh ahih dan gen hi. Programme hunsung in K. Hauzalian, Secy, YPA Elim Veng Unit in Nu Niangkhoching mukhetu Kammalsawm mellahna nei in, amah a muhkhiak dan gen a, zan nitaklam dak 4:00 vel a alou uah va vaklut ahih dan gen in, aman leng houlimpih in, innlam ah pai ding in tamveitak zawn mahleh utlou a, Kammalsawm in leng siing (ginger) tui bawl a dawnsak in, koimah a ana paikhelou ding in gen hi. Kammalsawm ahihleh Eimi Times leh Manipur Express newspaper hawmtu hi a, aman zingkal news ah ana simkha in, kintak in phone number kipia ah phone ngal ahih dan gen hi. Nu Niangkhanching innsungkuante sik-le-tang in Nangzathang, Vice President, ZYO GHQ in kipahthu gen in, hun haksa tawp a khentuam omlou a i kidelhtuah siausiauna uh manpha mahmah ahih dan gen in, hiai toh kisai a panla tengteng tung ah kipahthu gen a, a tapa Thangkhansuan Samte in hiai bang hun haksa a tuahna tung ua awlmohna liantak toh pan ana la YPA Elim Veng Unit, ZYO GHQ leh YPA New Lamka Block banah tha-le-zung kia hilou a sum-le-pai tamtak ana sengte tung ah kipahthu gen in, na phatuamngaihte uh chikmah chiang a dinkik zou ngeilou ding ahihman in, Pa Pathian in a leh tampi a vualzawl in hon vualzawl hen chi’n gen a, a nu ittak damtak a mukhetu Kammalsawm tung ah kipahpih etsakna in Zomi Puandum silhsak hi. Hiai toh kisai in YPA Elim Veng Unit in leng theihtawp suah a pan ana late leh tha-le-zung leh sum-le-pai tamtak ana sengte tung ah kipahthu gen uhi.

 

XXXXXXXX


Nehru Yuva Kendra (NYK)/CCpur saina in CCPur College nung a Youth Hostel ah tuailaite a ding in Youth leadership & Community Development training zan apan neih a om, tuni in leng sutzop a om in, March 31, 2017 in zousiang ding uhi. Hiai training ah Singngat leh Sangaikot Block huamsung a om Youth Club tuamtuam apan tuailai 40 val kihel in, Youth Hostel mun mah ah giaklut ua, resource person tuamtuam te’n tuailaite makaih theih ding dan leh khotang dopsangna dia panlak ding dan toh kisai sinsak uhi. Hiai training programme ahihleh zan a kipan hi a, zan in Suonkholam Gangte in Personality Development toh kisai sinsak in, tuni zinglam in CT Lian Guite, MDC in Self Management toh kisai a sinsak banah sunnung lam in Miss Manngaihkim, Extension Educator, KVK/VVpur in Agripreneurship toh kisai sinsak in, P. Khamsanglian, Progressive Farmer in loubawlna lam a lohchinna a ngahte tuailai paikhawmte mai ah pulak hi. Zingchiang leh zinghal in leng training sutzop hiding a, zingchiang in Medical Team te’n First Aid Treatment toh kisai a sinsak ding banuah Lh. Mangcha Khongsai, PEX/AIR in Role of Media toh kisai sinsak in Rev. Dr. TK Muana in omdan leh gamtat khohei dan toh kisai sinsak ding a, zinghal chiang in Suonkholam Gangte in Communication Skills toh kisai sinsak nawn ding a, H. Doungel, District Youth Co-ordinator, NYK/CCPur in tuailaite maban bawlding dan toh kisai sinsak in Youth Leadership & Community Development training programme a neih uh zousiang ding uhi.


XXXXXXXX


Bijang a om SBI-RSETI in tuailai kum 18 apan kum 45 kikal mite a dia a thawn a Short Term Course tuamtuam a training a piak uh paitou zel in, tu April khasung in leng Course 4 ah a thawn in training pen awn ding ua, lunglutna nei te’n ngaihven theih ding hi. April khasung a SBI-RSETI in Course tuamtuam a thawn a training piak dingte ahihleh Piggery, Rural Entrepreneurship Development Programme (REDP), Beauty Parlour Management leh Photography & Videography hiding a, April 8, 2017 apan in Vok khoi (piggery) lam a lunglutna neite a ding in training pat sawm in kisingsa lel uhi. Hiai course a ding in seat 25 lel om a, training hunsung ahihleh ni 10 sung hiding hi’nkigen hi. REDP ahihleh April 17, 2017 in kipan ding a, seat 25 lel om in, ni 13 sung training piak hiding uhi. Beauty Parlour Management ah leng seat 25 om in, training ahihleh ni 30 sung hiding a, April 24, 2017 in course pat hiding hi. Tuaban ah, Photography & Videography a ding in seat 25 lel hon ahih banah ni 30 sung training piak hiding ua, April 29, 2017 in course pat hiding hi’n kigen hi. Lunglutna nei te’n SBI-RSETI Temporary Office, Bijang ah office kai hunsung in ngaihven theih ding a, form leh thil bangkim huai mun mah ah ngah theih ding hi.


XXXXXXXX


Tuni sunnung dak 1:00 vel in Saikot khotaw Tuitha Lui ah siluang khat muhkhiak in om a, hiai toh kisai police-te theihsak a om in, ahihna theih chet ahih nung in a sungkuante’ kiang ah pekhia uhi. Siluang muhkhiak a om ahihleh nu Haudem (72) w/o Lamvung of Khominthang, New Lamka hi a, Tuitha Lui a naupang ngakuai khai te’n ava muhkhiak uh hi a, a taksa tung ah liamna ma muh ding omlou hi’n kigen hi. Thutut kingah dan in Nu Haudem ahihleh lungsim venglou hidan in kigen a, nidang in leng inn apan pawtkhe zel in damtak in inn tungkik zel hi’n gen uhi. Zan in a sungkuan te’n Khominthang ah pemlut pih ua, ngeina dan in zan in inn apan pawtkhia in, a sungkuan te’n inn thak a om utnailou a, inn lui pen ah va giak hiding in gingta ua, hiai tan tung dia ngaihtuahna leng neilou himhim uh ahih dan gen uhi. Nu Haudem luang ahihleh zingchiang in New Lamka Hanmual ah vuiliam hiding hi.


XXXXXXXX


Zillai General Headquarters saina Saipum khua ah zan nitak in Zillai Annual Assembly kipan a, tusung hun ah palai paikhawm te’n Business Session nei in, agenda tuamtuam puaklut a omte genkhawmna nei ua, tunitak in zousiang uhi. Annual Assembly ahihleh sunma dak 11:00 in kipan a, hun zatna K. Kamminlal Vaiphei, Speaker, Zillai GHQ in makaih in, Khatkhotong Baite, President,VPC GHQ, KT Vaiphei, Zillai GHQ Advisers leh Pu Kapbanyan, Zillai GHQ Ex President banah P. Kamkholal, Haupi Range MDC te’n hiai hun zatna uap ua, mun tuamtuam apan palai 60 val kihel in thupukna tuamtuam la uhi. Palai paikhawm te’n Manipur huamsung ah kivaipuakna (Administration) hoih zaw om theihna ding in Zillai District Administration kichi bawlkhia ua, Block omlouhna teng ah block thak hongkhe ding in thupuk ua, tua dungzui in hun lemtang masapen ah Lingsiphai Block, Singngat Block, Sangaikot Blockleh Congkhozou Block hongkhiak ding in guang uhi. Zillai General Headquarters in tu term sung in Zillai Area huam sung ah school om teng hoihtak a puah thak in a function theihna dia panlak ding in thupuk ua, District chih in amau area sung chiat ah panla ding in thupuk uhi. Tuaban ah, MIL (Vaiphei) Trainers (Resource Persons) Training neih ding kichi leng pompih in, MIL (Vaiphei) sukhatna dia Vaiphei Literature Society (VLS) toh kithuzak tuah ding in thupuk uhi. Business Session hunsung in S. David, Finance secretary in sum dinmun toh kisai report pia in, tu 2017-18 sung a ding budget luikhia a, palai paikhawm te’n budget dia Rs. 8,72,400 guan a om pompih uhi.


XXXXXXXX