You are here: HomeRSS FeedsThe Lamka Post

The Lamka Post | June 26, 2017

Monday, 26 June 2017 20:30

Chief Minister in Inter-District leh City Bus Service khahkhia

IMPHAL, June 24: BJP makaih Manipur government in 100-Days programme a bawlte lak a khat state sung a public transport tunding nawn­na ding in tuni, June 25 in Chief Minister N. Biren Singh in Manipur State Transport chih mibvuah in inter-district leh city bus services khahkhia hi. Inter-district leh city bus services ahihleh Chief Minister in Manipur State Road Transport Corpora­tion (MSRTC) complex, Moirangkhom, Imphal a pan khahkhia hi.

 

Inter-district leh city bus services khahkhiakna hun zatna ahihleh State Transport Department saina in Inter-State Bus Terminal (ISBT) com­plex, Deulahland ah neih hi a, huai ah Chief Minis­ter city bus service khah­khia hi. Hiai hun zatna ah chief guest leh functional president in Chief Min­ister N. Biren Singh leh Parliamentary Secretary (Transport) Khashim Vashum pang uhi.

 

Hiai hun a chief minister in a genna ah, tunding thaknawn a om public transport system lohching ngei ding a lam-en ahihdan gen hi. Huai ban ah inter-district leh city bus services honkh­iak a om pen Eid-Ul Fitre patna ni ahihban ah Rath Jatra festival toh kituak geih a khahkhiak khak a om ziak inleng kipahthu gen hi.

 

Chief Minister in a genzelna ah, tuni honkh­iak nailouh a om district dangte ah leng inter-dis­trict bus services khahkh­iak hipahta ding leh hiai toh kisai a poimoh ding bus leng state govern­ment in a kintheilam a ngaihtuahpah ding hidan in gen hi. Kikawmtuahna leh kizoptuahna leh lung­sim leh ngaihtuahna a kipumkhatna tunding nawnna ding poimohpen ahihdan genkawm in chief minister N. Biren in mipite kiang ah MST pen mahni mimal a bang a bawl chiat ding in ngen hi. Huai ban ah diktatna leh siangthouna in kimuan­tuahna hon tun ding a, kimuantuahna in nam tuamtuamte lak a kipum­khatna bawlkhe ding hi­dan inleng gen hi. Works Minister Th. Biswajit, CAF & PD Minister Karam Shyam, MAHUD Min­ister Th. Shyamkumar, Tribal and Hill Areas Development Minister N. Kayisii, IFCD Minister Letpao Haokip, Edu­cation Minister Th. Radheshyam leh MTDC Chairman Vungzagin Valte in hiai hun zatna presidium member hih­na toh uap uhi. Huai ban ah Parliamen­tary Secretary-te, Advisor to CM Shri Rajat Sethi, Transport Commissioner M. Lakhsmikumar leh police top rank­ing official-te ban ah civil official-te’n leng hiai hun zatna uap uhi.

 

Works Minister Th. Biswajit in a genna ah, state sung a kikawmtuahna a bik in singtangdawn tanpha a kikaw­mtuahnate puahphatna ding a PMGSY nuai a central government in fund po­imoh bangbang hon piakbeh ding a kimansa a om ahidan gen hi. Transport Department in public transport system a patkhiak toh kiton a Works Depart­ment inleng kikawmtuahna lampite a hoihthei bangpen a bawlsawm a panla ahihdan leng Works Minister in gen hi.

 

Chief Minister N. Biren in Govern­ment’s 100-days programme a bawlkh­iak kipahpihthu genkawm in hiai pro­gramme in minister-te leh official-te lak a hun bikhiahsung a khantouhna muhtheih bawlkhiakna ding a kithalopna piangsak hidan in Th. Biswajit in gen hi.

 

Inter-district leh city bus services first phase ah MST in ISBT, Deulahland a pan in city bus service lampi nih a pankhe masa ding hi. Huai ban ah Inter-district bus ser­vices toh kisai in Imphal-Noney, Imphal- Moreh, Imphal-Kakching, Imphal-Yairip­ok, Imphal-Moirang leh Imphal-Pherzawl kikal ah patkhiak masak hiding hi.

 

Inter-district leh city bus services a ding in transport department in phase 3 pansan in bus 150 a ngaihtuah ngai ding a, huai lak ah state government in bus 5 lei 5 lei ding in lemsakpihna pia hi. First phase ah semi-low floor bus 10 tel in bus 15 service pat masak hiding hi.

 

 

CM N Biren in school naupang­te a di’n music project pankhia

Imphal, June 25, 2017 (DIPR): Tuni Pathianni a Pal­ace Compound, Imphal a Manipur State Film Development Society (MSFDS), auditorium a State Government’s 100- days programme toh ki­sai in Chief Minister Shri N. Biren Singh in ‘Sup­port of Musical Instru­ments and Teaching of Music to School Children’ hongkhia hi.

 

Tuni a program zat­na hun ah school nau­pangte kiang a music lam toh kisai a theihna behlapna ding a ding a ni 25 sung daih ding music workshop leng honkhiak in om hi. Workshop ah resource person in artiste minthang Nameirakpam Tiken, Leimapokpam Tiken, Guru Reuben Mashangva, Huidrom Dhana, Haobijam Senyai, L Budhi, Bachaspatima­yum Rajeshwor, Deepen Kamei, Dankhojam Lum­kin, RK Surjit leh Laish­ram Prithviraj –te pang ding uhi. Program zatna hun a Chief Guest a pang Shri N. Biren in a gendan in, khotang chih mipite nekzonna leh siamna a tuam dungzui in, nekzon­na khatpeuh a kikim vek a zahna piak teitei ding ahi chi’n gen hi. State dang leh gam tamtak a pan mipite’n state a tawndan a hauhsaknate a muh khit chiang un, Manipur khantouhna a thupidan theikhe zel uh chi’n gen hi. Mipite lunggulh leh deihte pichin ding in gov­ernment kipumpiak den a, Manipur kichi State a nam tengteng a ahi chi’n N Biren in gen hi.

 

 

MAHUD in office a luah nung ni 100 chinna lawm, booklet hongkhia

IMPHAL, JUNE 25, 2017 (DIPR): Manipur a BJP makaih coalition government in office a luah nung ni 100 chinna lopna programme toh kisai in, tuni Pathian­ni in Municipal Adminis­tration, Housing & Urban Development (MAHUD) inleng Khwairamband Ima Keithel ah “MAHUD in 100 Days” lawm uhi.

 

Manipur Urban Development Agency (MUDA) leh Imphal Mu­nicipal Corporation saina toh program zatna hun ah booklet leng honkhiak in om hi. Chief Guest a pang Minister for Consumer Affairs, Food and Public Distribution Shri Karam Shyam in nasepdan chi­tuam tak paipih MAHUD Minister Shri Thounao­jam Shyamkumar kip­ahpih mahmah a hihdan gen hi. Shyamkumar kichi thathoutak elective member khat ahi chi’n gen a, MAHUD Minister in nasep a paipihte ah hanthawnna leng naktak in poimoh chi’n gen hi. Karam Shyam inleng a thugenna ah, State a kong bangkim a khantouhna a om poimoh chi’n gen hi. Khovel a mi kuapeuh in i mohpuaknate uh theikh­ia leh semkhia hileng hinkhua ah masawnna om thei ding chi’n gen hi.

 

Functional Presi­dent MAHUD Minister Shri Th. Shyamkumar in Imphal khopi sung sian­gthoutak a koih poimoh a hihdan uangtak in gen hi. Ima Keithel kichi khovel pumpi a numeite kia in a etkai omsun market chituam bik khat a hih ziak in, State phou­langtu khat ahi chi’n gen hi. MAHUD in ni 100 sung in State Cabinet in a zatkhiak scheme 57 nuai a programme 2 zang­khia hi. Pradhan Mantri Awas Yojana- Housing for All (Urban) benefi­ciary-te ading in stamp duty & registration fees/ tax awngsut a, nin om­lou ding in Imphal khopi laigil bawlkhia uh chi’n gen hi. Imphal kichi Smart City a khek ding tupna toh department in scheme tuamtuam khenkhat Self Employ­ment Programme (SEP) leh a dangdangte pansan in town leh khopite a za­wnna sukbeina ding in a panlaknate uh hatsak sem uhi.

 

 

Hengkom khosung miteng damlou; LDI tut in om

LAMKA, June 25: Ccpur district a Henglep Sub-Division sung a om Hengkom khosung mi­teng thakhat thu a dam­lou a om chih thu ziak in zan nitak in KKL Tuila Block leh KKL-GHQ in KKL Ambulance in dam­lou mi 21 va pua in, nitak dak 11:30 vel in Lamka Damdawi Inn casualty pawtung uhi. Hengkom khopi damloute zan ni­tak leh tuni zingkal tan in doctor leh nurse-te’n buaipih ua, glucose khai in a natna un zonkhiakna ding in tuni’n a sisan uh la uhi.

 

Amaute ahihleh Lamka Damdawi Inn a Observation Room ah om uhi. Amaute ahi­hleh Kholkholet (65) h/o Hoikhochin of Hengkom; Hoikhochin (60) w/o Kholkholet; Seigoulun (6) s/o Goukhosut; Than­glienmang (6) s/o Soim­insang; Lhaichonghoi (2) d/o Paotincha; Nehmin­lun (4) s/o Paominthang; Paulemthang (8) s/o Seiminsang; Limhoithem (9) d/o Paominthang; Chinneilhing(30) w/o Thangjapao; Chingboi (17) d/o Seimonsang; Ne­ngkhohoi (32) w/o Pao­minthang; Thangzapao (35) h/o Chinneilhing; Seiminsang (30); Pao­minthang(35) s/o Douk­honeh; Chinneithem (21) w/o Paotincha; Hoihneo­them (2) d/o Soiminsang; Pamcha (27); Hatneo (28) leh Baby Lhingnei­vah (1 month) hi uhi.

 

Damloute’n a gendan un, nipikal khat vel paisa in a khosung uah damlou mi bangzahhiam om ua, huainung in thakhat thu a khosung mi teng dam­lou a om uh hidan in gen uhi. Amaute’n khosik leh khuh thuah ua, khenkhat in a gil uh leh a taai uh naasa ua, himahleh gimse lua bel bel omlou uhi. Hengkom ah tulel in inn 15 om ua, khosung mi­teng damlou vek uh hidan in thutut kingah hi.

 

 

BSI-Ccpur Branch in Khawmpi nei ding

LAMKA, June 24: Bible Society of India (BSI) Ccpur Branch in July 15-16, 2017 sung EBCC Bethany, Zoar Veng, Bungmual ah ‘An­nual Conference-2017’ nei ding uhi. July 15 sunma dak 10:30 a kipan in Business Session om ding a, hiai hun Rev Van­mawia, President, BSI-Ccpur Branch in makaih ding hi.

 

July 15 nitak dak 6:30 in mipi biakna om ding a, hiai hun G Ngaizathang in makaih in Bethany BYF in biakna leh phatna pi ding uhi. Rev Vanmawi, President, BSI-Ccpur leh Upa H Sia­mzathang, Secy, EBCC Bethany in vaidawn thu­gen ding uhi. D Phailian MPCS Jubilee Church Chior leh EBCC Dorcas Veng BYF in phatna lasa ding ua, Rev Dr S K Manlun, Asst Secy, BSI-Ccpur in thugen in Rev T S Thangta, PCI(R) in hunkhak ding hi.

 

July 16 sunma dak 10:30 in mipi biakna om nawn ding a, hiai hun Rev Vanmawia, President, BSI-Ccpur in makaih ding a, Rev L Sata Gangte, ESC in thohlawm laan ding hi. BYF Bethany EBCC, ESC Tuibuong Choir leh ESC Chiengkonpang Choir in phatna lasa ding ua, Rev V Khamvum, Principal, GBC in thugen ding hi. Tua zoh in Upa Vanlal­lawm, Treasurer, BSI-Ccpur in Finance report pe ding a, Dr T K Mua­na, Secy., BSI-Ccpur in award hawmkhia in Rev Huolthangsei Thiek, Exe. Secy., EAC in hunkhak ding hi.

 

July 16 nitak dak 6:30 in mipi biakna om­nawn ding a, Upa Sut­jamang Kipgen, ECA in hiai hun makaih ding a, BYF Bethany EBCC in bi­akna leh phatna pi ding uhi. Major Lalramliana Hnamte, DC-Salvation Army in thohlawm lan ding a, Lamka Chhim TPP Choir leh BYF Bung­mual EBCC in phatna lasa ding uhi. Rev Zo­thangsing Zote, Exe. Secy., ICI in thugen ding a, Pastor H Ginkhochin, EBCC Bethany leh Upa Vanlallawm, Treasurer, BSI-Ccpur in kipahthu gen in Pastor T Muan Khup, BCM in hunkhak ding hi.

 

 

YPA New Lamla Block in Block Meet nei ding

LAMKA, June 25: Tuni sunnung dak 2 in Young Paite Assn (YPA) New Lamka block makaih in New Lamka YPA Hall ah YPA New Lamka Block nuai a unit-te’n joint meeting nei uhi. Hiai hun ah YPA New Lamka block nuai a om Unit 12 a pan Executive Member-te tel uhi. Hiai hun ah S Man­lian, President, YPA-New Lamka block in pulakna nei in vaidawn thugen hi. Tua zoh in Awnsuan­hau, Secretary, YPA-New Lamka block in joint meeting agenda dingte pulak hi.

 

Hiai hun ah YPA New Lamka Block Meet neih ding tungtang genkhawm ua, vengsung kitanauna leh phatuamngaihna lam a tha­thak lakna ding ngim a Block Meet neih ding kituaktak in thupuk uhi. Hiai toh ki­sai in Block makaite a poimoh bangbang a panla a hon semsuah ding un thupuk uhi.

 

Huai ban ah New Lamka YPA Hanmual hahsiang ding tungtang genkhawm ua, hun lemchang masapen a block makaih a social work a hanmual hahsiang ding thupuk uhi.

 

YPA-New Lamka Block Vehicle Project toh kisai in hun lemchang ma­sapen a block makaite leh unit chih a pan president leh secretary-te’n a genkhawm ding un thupuk uhi.

 

Vengsung a khamtheih douna toh kisai in block in unit-te thuzak a, panlak ding in thupuk uhi.

 

Tua ban ah New Lamka area sung a YPA vai a donpi-donke tungtang a mi khenkhat in YPA nasepna leh thilhih peuhmah soisel a, kampau kilawmlou taktak a zat tungtang uh genkhawm uhi. Hiai toh kisai in YPA vai a nasepna leh thilhih ban ah donpi-donke tungtang a gen-le-sak neite a min uh chiamteh a YPA New Lamka Block a piakkhawm ding leh block makaite’n hiai tungtang a ngaihtuah ding un thupuk uhi.

 

Huailou in, Mizoram a tuilian leh menchim ziak a haksatna tuak unaute panpihna ding a YPA-GHQ a pan thei­hsakna dungzui in YPA New Lamka block sung a unit 12 in amau area sung chiat ah panpihna kaikhawmlel ua, unit tamzaw a pan panpihna a luttak ziak in YPA New Lamka Block makaite unit-te tung ah kipahthu gen uhi.

 

 

Mipite muanna toh Government thak in kipezoutak in nasem ding: N. Biren Singh

IMPHAL, June 25: Chief Minister N. Biren Singh in state sung khantouhna ding in Government thak in mipite muanna toh khantouhna leh masawnna ding a kipezoutak a nas­em ding ahihdan gen hi.

 

Hiai thu ahihleh Chief Minister in Manipur Government thak vaihawmna ni 100 chin ni a CM Bungalow a AIR/ DDK Imphal in interview a neih hun a, a gen ahi. Chief Minister in a genna ah gov­ernment thak in state sung a teng nam tuamtuamte kal a kitheih siamlouhna omte beisakna ding a panla leh nam tuamtuam tengkhawmte’n kimuanna tuahna a neih ding uh tup pipen a nei ahihdan gen hi. Mipite nungthuapna leh muanna tellou a government in sawt daihlou a, mipite muanna ziak leh nungthuapna ziak a National Highway-te a ni 139 a upa economic blockade leh Churachandpur District a ni 600 kip­hinna government in hihveng thei ahi­hdan leng gen hi.

 

‘Peoples’ Day’ leh ‘Hill Leaders’ Day’, toh kisai dotna a dawnna ah Chief Minister in hiai toh kisai a politician leh government-te hih ding ahihleh mipite nna sep ding hi a, mipite lung­gulh ahihleh kampau kia hilou a, nasep gah muh ding ahi chi hi. Government in kivaihawmna kichian leh kingak na­tak ban ah Manipur gamsung nekguk omlouhna state suahsak ding lunggulh ahihdan gen in, CM Secretariat a Anti- Corruption Cell leh Monitoring Cell honkhiak a om ahihdan gen a, huai ban ah Special Investigation Teams (SITs) leng phutkhiak a om ahihdan gen hi.

 

State sung a unemployment toh ki­sai a genna ah Chief Minister in, govern­ment in miteng kiang ah ‘white colour job’ petheilou a himahleh government in tuailaite kiang a Manipur Skill Develop­ment Mission nuai a skill development tungtawn a sepna guan ding ahihdan gen a, huai ban ah state sung a college 40-te a Vocational education course patkhiak ding ahihdan leng gen hi.

 

State sung hatna leh detdousaktu, nupite panpihna di’n government in toll free helpline number 181 pankhia ahihdan Chief Minister in gen hi. Hiai number ahihleh numei tung huhamtak a gamtatna toh kisai a panpihna ding kia hilou a, state sung a numeite’n lung­muanna a neih na ding uh ngimna ahih­dan leng gen hi. Numei tung a huham­tak a gamtangte kia etkaina na dia ‘fast track court’ bawlkhiak a om ahihdan gen a, numeite’n siamsinna hoihzaw a nei­htheina ding ua government in panla ahihdan leng gen hi. Central a police department a 33 per cent job res­ervation policy a om leh, State govern­ment in leng huai dan zui ding ahihdan leng Chief Minister Biren in gen hi.

 

Government in state sung a muhtheih a kikhekna a om theihna ding a panla ahihdan gen in, N. Biren in state government thak in ni 100 sung vai a hawm sung a, a nasepdan a sut­zoptouh theih zel leh India gamsung a state khangtoupente lak a Manipur tel­pha ding ahihdan gen hi. Huai ban ah gamsung mipite’n hunsawt kuamtak a ngaklah mahmah uh sukbuchinna dia government in a nasepna zekai sakzaw­lou ding ahihdan gen hi.

 

Vuahzuk hun a beichiang a RCC zang a tuilet ding dalna bawl a omte khauhzaw sem a bawl hi ding a, huai ban ah tuilian a kipan kivenna ding a luitawte hahsiang ding leh luitaw a thil kibawlte lakkhiak vek ding ahihdan Chief Minister in gen hi.

 

Mipite deihna bang a government in nna a sep ding poimoh ahihdan gen in Chief Minister in, media-te kho­tang limlang ahih na ah khotang din­mun diktak a phoukhiak ding uh ahi chi hi. Khotang khantouhna dia State media-te role kipahpih mahmah ahi­hdan gen in, government in a nasepte uh a muhtheihna ding uh leh khotang hoih zawk semna dia pan a lak theihna ding a media-te’n khotang lim diktak a phoukhiak ding uh ahi chi’n gen hi.

 

 

SSPP-GHQ makaih in Siamsin Zodawn Visit 2017 nei ding

LAMKA, June 25: Hongtung ding June 28-30, 2017 sung Siam­sinpawlpi General Head­quarters, Lamka saina in Siamsinpawlpi (SSPP) in Zodawn khua 6 veh ding uhi.

 

Hiai hun ah SSPP-GHQ, SSPP JHQ Lamka leh a nuai a SSPP branch-te a pan makaite kihel ding ua, school tuamtu­am a pan sinsaktu (teach­er) bangzahhiam leng a tel ding ban uah, Siam­sin Photo Contest 2017 a ding lemla utte’n leng a thawn in zuithei ding uhi. Huai ban ah, siamsinna ziak a khualgam a om inn lam hongpai a siamsinna leh Zodawn awlmohna nei a lunglutte’n leng a thawn in zuithei ding uhi.

 

Lunglutna neite’n Event Manager Mr Gou­thiansiam, Secy., HRD, SSPP-GHQ hiam, Siam­sin Photo Contest 2017 Committee member khatpeuh thuzak theih ding hi.

 

Hiai hun ah Zodawn khua Singngat, Tuivel, Suangdoh, Lungthul, Tuima leh Mualnuam pha ding ua, hiai khuate a Siamsinna Innte (school) leh a kisaipih semtute leh school man­aging committee-te toh hun zangkhawm ding uhi. Hiai hun ah SSPP Suangdoh Block Felici­tation leh Mualnuam khua a SSPP Tuivai Block Conference 2017 leng uap ngal ding uhi.

 

Hiai hunsung in Community Awareness & Interaction leng sai ding ua, resource person Pauneithang Valte, Chief Manager, SBI/Ccpur, Tuangkhanson, Man­ager, District Sub-Di­vision, MSPDCL, Gou­sonlian Samte, MSW leh Minlun, Advocate, BCoI in thupi tuamtuam pansan in sinsakna ding ua, kikupkhawmna leng om ding hi.

 

Hiai panlakna ahi­hleh SSPP-GHQ leh National Foundation for India in kithuah­khawm a, a sep uh ‘I Have a Dream Project’ tungtawn a saisuah hi a, Zodawn Siamsinna din­mun kiteltak a theihsuah ding tupna leh puahphat theih ding dan ngimna a panlakna ahihman in kuapeuh in kithuahpih a thumna toh delhzui diing in SSPP-GHQ in ngetna bawl hi.

 

 

PTC Raising Day zang ding

LAMKA, June 25: Paite Tribe Council: General Head­quarters in June 27, 2017 chiang in, PTC 68th Raising Day, 2017 gahsuah theipen a zat ding ngimna toh kumdang banglou deuh in zat sawm uhi.

 

Hiai hun ah Paite namsung a heutu masa damlaite, PTC-GHQ Ex-President leh Ex-General Secy-te; YPA-GHQ Ex- President leh Ex-General Secy-te; SSPP-GHQ Ex-President leh Ex-General Se­cy-te; PLS Ex-President leh Ex-General Secy-te ban ah tulel a Paite namsung a pawlpi tuamtuam a pan President leh Secretary teng leh namsung a pan in­tellectual, saptuam makaite ban ah so­cial worker-te tel in Raising Day zang ding uhi. Hiai ni in nam dinmun leh maban ding tungtang ni khat sung kik­upkhawmna nei ding uhi.

 

PTC 68th Raising Day 2017 zatna ahihleh hunpi 3 in kikhen ding a, hun khatna ah zingkal dak 7:30 in PTC-GHQ office, Hiangtam Lamka ah PTC-GHQ President in Nampuan kaipalh ding hi. Tua zoh sunma dak 10:30 a pan in EBC Mini-Auditorium, New Lamka ah hunpi 2na leh 3na zang ding uhi.

 

 

 

 

 

 

 

 

NEWS TOMKIM

 

Kangvai ah Opium 20 kg man

LAMKA, June 25: Lamka Police Drug Cell i/c H. Thanglianmang Paite, SI leh Police Bight QRT Commander T. Jangkholal, SI makaih police team in tuni, June 25 zingkallam dak 2 in Kangvai Out Post ah gari taituahte frisking/check bawlna ua, huai ah Maruti Van, MN 0IX/9014 a pan Opium (Kaani) 20 kg vel mankhia uhi. Mat a om Kaani (Opium) neitu ahihleh Lunlam Kipgen (37) s/o Songkholun Kipgen of Boljang, Saikul Sub- Division hidan in police a pan thutut kingah hi. Police-te’n van (gari) sung a kipan in Kaani tuun 24 vel mukhia uhi. Matkhiak a om Kaanite ahihleh bazar rate a zuak hileh Rs. 16 lakh vel manzou ding hi. Hiai thu ah Police in FIR No. 37(6)2017 u/s 18(b)of NDPS Act chiamteh in suizui lel uhi.

 

 

PMEGP beneficiary-te’n meeting nei ding

LAMKA, June 25: Ccpur district sung a DIC, KVIB & KVIC nuai a PMEGP beneficiary tunitan a first & second phase a Bank in sum a piakkhiaklouhte’n June 27, 2017 sunma dak 11 in Bijang Loubuk Jr. High School ah emergency meeting nei ding uhi. Huai hun ah Manipur Chief Minister leh Industries Minister kimuhpihna report leh financial report nei ding uhi. Hiai meeting a tellou beneficiary-te association a register hilou ding hi’n MK Singh, Secretary, PMEGP Beneficiaries Assn., Ccpur in taklang hi.

 

 

Unau phik in doctor zou tuak

LAMKA, June 25: Rengkai a om Sangremsiema’ tanu phik - Mary Lalthianghlimi leh Irene Lalmuanpuii in tunaizek in Zoporozhye State Medical University, Ukraine a pan Doctor (Specialist Degree) ngah uhi. Unau tegel in Young Learner School a pan Class X passed ua, Rayburn College, New Lamka a pan in Class XII zou uhi.

 

 

SSPP JHQ Imphal in Musical concert nei ding

LAMKA, June 24: M/s Nganbi Motors, Honda Sangai leh Mahindra Tractor sponsor-na in zingchiang, June 26, 2017 in YPA Hall, Laimanai, Imphal ah Siamsinpawlpi Joint Headquarters, Imphal in ‘Siamsin Inn’ bawlna ding toh kisai a panpihna ding in Musical Concert nei ding uhi. Hiai hun ah Six Strings, Jenny Thomte, Christy Vunggohching, Anggu Singsit ban ah S Chingnu, Jems Arjun, Nancy, Mercy, Rosslyn Kikim leh Vungkhanching in perform ding uhi.

 

 

 

 

 

 

 

 

 

 

…for more detail : Here