You are here: HomeRSS FeedsThe Lamka Post

The Lamka Post | April 21, 2017

Friday, 21 April 2017 08:18

CM makaih in Administrative Secretaries meeting nei

Imphal, April 20: G o v e r n m e n t department tuamtuam nuai a developmental project tuamtuam omte toh kisai in tuni’n Chief Minister office chamber ah Chief Minister N. Biren Singh makaih in Administrative Secretaries review meeting om hi.

 

Hiai review meeting ah Addl. Chief Secretary Shambhu Singh, Addl. Chief Secretary (Home) Suresh Babu, Principal Secretary (Finance) Vineet Joshi ban ah department tuamtuam a pan secretaries, commissioners leh director-te tel uhi.

 

Hiai hun ah Manipur government thak nuai a department tuamtuam in ni 100 sung a developmental project tuamtuam a sepkhiak dingte uh genkhawm uhi. Hiai hun a Chief Minister in a genna ah, kha teng a hiai bang a department tuamtuam in review meeting nei ding hidan in gen hi.

 

 

Centre in Manipur singtanggam a di’n Rs 22.6 cr sepkhia

IMPHAL, April 20: Union minister for tribal affairs Jual Oram in tuni, Ningani a, a genna ah, Centre Govt in fiscal year pailel 2017-18 sung a Manipur singtanggam khantouhna dia Rs 22.6 crore guang ahihdan gen hi.

 

Union minister ahihleh tuni in ni nihsung Manipur veh ding in Imphal hongtung a, Chandel district a pan district thak bawlkhiak a om om Tengnoupal district a BJP Foundation Day zatna hun ah hiai thugen hi. Union minister in a genna ah, Manipur singtanggam a dia sehkhiak a om Rs 22.6 crore ahihleh market-sheds, sericulture a ding infrastructures, skill development leh hospital bawlna dia zat hiding hi’n gen hi.

 

Centre a BJP-makaih NDA government in gamsung a singtang dawn kuamah phakkhak ngeilouhna munte phaksuak ding tup-le-ngim a nei ahihdan gen kawm in Prime Minister Narendra Modi leh cabinet minister-te’n India gamsung pumpi district 707 om lak ah district 300 val siksuakta uh hidan in gen hi. Tunitan a district phakkhak nailouhte leng NDA government kum 3 a chin chiang a phaksuak hiding a, huai bel January 26, 2018 tan hiding hi’n gen hi.

 

Manipur mipite’n BJP in vai a hawm theihna dia hun hoih a bawlsak ziak un kipahthu gen a, election ma a BJP in a thuchiamte tangtun hiding hi’n Union Minister in gen hi. Huai ban ah 2012 Manipur assembly election ah BJP in vote kikhia teng lak ah 2 per cent mu a, himahleh election nanung pen vote 36.3 percent mu in seat 21 ah vualzou hi. Centre a BJP makaih NDA government bang a Manipur a BJP makaih Manipur government inleng kivaihawmna leh thil bangkim a siangthou leh diktattak a vaihawm ding ahihman in mipite muanna ngah ding ahihdan gen hi.

 

Prime Minister Narendra Modi a pan theihsakna dungzui a Manipur hongpha leh a hong phakna ziak pipen ahihleh central sponsored programme tuamtuamte a tunna ding muntak tungna hiam chihte hong enkhia hidan in Jual Oram in gen hi. Jan Dhan Yojana lohchingtak a sepsuah a om leh hiai programme patkhiak ahihnung a mi crore 28 val in bank accounts nei uh hidan in gen hi. Huai ban ah Pradhan Mantri Ujjwala Yojana (PMUY) nuai ah innkuan crore 2 val in LPG connection a thawn a ngah uh ahihdan leng gen hi.

 

2014 a pan BJP in vaihawmna a letnung India gamsung a khua lakh 18 val electric tunlouhna munte lak ah kum thum paisa sung a khua lakh 12 phial electric tunsak hita hi’n leng Union Minister in gen hi. Huai ban ah Clean India Mission nuai a government in below poverty line a omte a ding toilet leh school leh college a numei leh pasalte a ding a tuam a toilet bawlsak a om hidan inleng gen hi.  

 

 

PCI Day 2017 zang

LAMKA, April 20: Zan, April 19 nitak a kipan in Presbyterian Church in India (Reformed) in saptuam kiphuhkhiaknung kum 33 chinna, Mualkoi PCI(R) biakinn ah SLPYF leh LPYF makaih in zang uhi. Zan nitak in tualsung saptuam tuamtuam a pan phatna la, lapawl, artist leh band tuamtuam in phatna lasa ua, Coordinator Ministries Rev H Chinthiansong in thugen hi.

 

Tuni, April 20, 2017 sunma dak 10 in PCI(R) Day nipini zang ua, hiai hun Elder V Nunlian in makaih hi. Pastor K. Zamkhansuan in thumna in hun pan a, Elder T. Thangzakhup, Founder Member PCI in PCI Day pulak in Rev. M. Khamlianmang, PYF, Coordinator in thugen a Rev. Kham T. Valte in PCI (R) Maitam nei hi. Hiai hun ah Mualkoi PYFF, Elim PYF, BBZ Choir leh Rayburn PYF te’n lapawl sa ua, Pastor G. Paukhansiam in vualzawlna in hunkhak hi.

 

Nitak biakna kikhop ah Rev Khen P Tombing, Chief Coordinator in thutak gen in PCI(R) Day lopna zou uhi.  


 

 

HSLC Exam 2017 Evaluation Centre ding taklang

Imphal, April 20: Board of Secondary Education, Manipur (BSEM) Secy Dr. Chingangbam Sarat in theihsakna a bawldan in April 25 , 2017 a kipat a HSLC Examination Evaluation bawlna ding mun leh subject-te hiai bang in taklang hi.

 

Huaite ahihleh Johnstone Hr Sec. School ah Social Science, Manipuri, Elementary Manipuri (MM), Elementary Manipuri (RS), Home Science, Maola, Mizo, Thadou Kuki, Tangkhul, Paite, Ruangmei, Hmar, Vaiphei, Hindi, Elementary Hindi, Bengali.

 

C.C Hr Sec. School ah English, Mathematics, Science, Additional English, Computer Science, Higher Mathematics, Nepali, Thang-Ta, Liangmei, Zou, Kom, Fine Arts, Eshei Nongmai, Manipuri Jagoi leh Commerce ahi.

 

 

Govt school-te ah teaching system omsa tunding thak poimoh: Deputy CM

Imphal, April 20: Tuni Ningani in Deputy Chief Minister Shri Yumnam Joykumar in Langol, Imphal West ah Wangdei Primary School bawlna ding suangphumna nei hi. Hiai hun a Deputy Chief Minister in a gendan in, State a government school-te ah hun paisa teaching system omsa koihkik thak hunta ahi chi’n gen hi.

 

Dy CM Yumnam Joykumar in a gendan in, nidang in Government School-te ah homework, class work leh weekly examination chihte a hun bangzel in sai in omtou den a, teaching method ana hoih mahmah ahi chi’n gen hi. Himahleh tu hun in, suanlam tamtakte ziak in mangthangvekta chi’n gen hi. School khenkhat a student-te sang a teacher-te a tamzawk ziak un, government school tamzawte ah teacher-pupil ratio leng etthak tuak mahmah chi’n gen hi. Paizia bangkim etkaina ding a School Management & Development Committee inleng mohpuakna liantak nei ahi chi’n gen hi.

 

Shri Y. Joykumar Singh in a neulai a, Government School khat a, a kai hunlai a gendan in, huai hun lai a teaching system a hoih mahmah ziak in, government school a kipan student-te’n competitive exam tamzawte ah dinmun sang taktak luah uh chi’n gen hi. Maban a government school-te a teaching system hoihtak a om theihna ding in, a kisaikhakpih tengteng a pankhawm vek uh poimoh ding chi’n gen hi.

 

Dy CM Y. Joykumar Singh in tulai a kithang mahmah tuition culture leh private school-te pibawlna toh kisai awlmoh huai a sak thu a gendan in, hichibang a panlaknate’n buaina omte sukvengna ding leh learning method dangte ah student –te amau kitungding theihna ding tan bawlkhethei tuanlou uh ahi chi’n gen hi. Sarva Siksha Abhiyan (SSA) nuai a phuhkhiak a om primary school in Langol Area a student-te kul leh poimohte pekhe ding ahi chi’n kimuang mahmah kawm in gen hi. Hiai hun in Wangdei Meitei Leikai Union President Chingangbam Shamungou inleng thugen hi.

 

 

 

PTC-GHQ in Guite Road bawlna enkhia

LAMKA, April 20: Paite Tribe Council (PTC) GHQ Executive member-te’n tuni’n April 20 in Bhartia Infra Company Ltd in a bawllel Guite Road va enkhia ua, Tuima tan va pha uhi. Hiai hun ah lamlian bawlna a suanghum kizangte leh hawkguam bawlna pen lungtunhuaisa lou ua, hiai toh kisai in tunung zek chiang in Bhartia Infra Company Ltd official-te kimuhpih ding uhi.

 

Guite Road bawlna in ahihleh masawn zel in khosiat ziak in alkatara/ bitumin zut panthei naikei mahle uh khophat chiat a alkatara zutna pan theita ding uh ahihdan company heutute’n gen uhi.

 

 

Sr Statistical Officer in kaisang

LAMKA, April 20: Vanlalfan Khuongpui s/o Zasangluoi, Muolvaiphei, Lamka, tuni in Senior Statistical Officer(Group B Gazetted) post in kaisang hi. Amah ahihleh Delhi a pan Graduate hi a, 2010 in Staff Selection C o m m i s s i o n ( S S C ) exam tungtawn in National Sample Survey Office(NSSO), Govt of India nuai ah Statistical Investigator mu a, Shillong ah sem pan hi. Tu in a zi leh tate toh Shillong ah khawsa lel ua, a posting-na mun ding ahihleh theihchiang hinailou hi.

 

 

NEFIS in, school teng a Hindi compulsory a bawl ding a Govt thupukna mohpaih

Imphal, April 20: Tunai zek a, Parliamentary Panel in state etkol Kendriya Vidyalaya-te tel in CBSE school teng a Hindi compulsory subject a bawl ding lemsakpihna bawl, President in pompihna a piak toh kisai North-East Forum for International Solidarity (NEFIS) in naktak in mohpaih hi.

 

NEFIS thusuak in a taklatdan in, President in pompihna a piak toh kiton in, HRD Ministry kiang ah Hindi kichi compulsory subject a bawlna ding a state government-te toh kithuzak a policy khat bawlkhe ding in theihsak hi uhi. Hiai thupukna in, tulel a BJP government in Hindi pau zanglou mipite tung a thagum a Hindi zangsak vek ding a kisimmohna lungsim nei a hihdan langsak hidan in taklang uhi. Hiai kalbi lak a om in, Hindi kichi pau zat a neikhalou state-te gammi pau leh hamte dopsang leh kepbit ding naktak a nelhsiahsak hidan inleng taklang uhi. Hindi zanglou state-te a cultural leh linguistic diversity kepbit ding phalsak Government of India in diversity spirit tawisang ding bangmahlou suah sawm hidan inleng taklang uhi. Tua toh kiton in NEFIS in non-Hindi linguistic background-te a kipan mipite tung a thagum a Hindi pau zatsak ding kalh in khauhtak in panla ding a, hiai thupukna leng naktak in mohpaihna uhi.

 

 

Kho 4 a Asha Worker ding guang

LAMKA, April 20: Chief Medical Officer (CMO) Ccpur in Village Health Sanitation Committee in ngetna a piaklut dungzui in, PHC 4 a omna khua a ASHA Worker ding in mi 4 guang hi. Huaite ahihleh Henglep PHC nuai ah Kimneingak w/o Lamkhuallian of Saimoulien in Kimlalven mun luah ding a, Saikot PHC nuai ah Tinhat w/o Paumuanlian of L Gangpimual in Chinneilam mun luah in, Thanlon PHC nuai ah Ms. Chinzahat d/o Liankhup of Bukpi in Late Chingkang mun luah in Town Area nuai ah Nengneilhing w/o Thongtinsei of B Vengnom in Chinneithem mun luah ding hi.

 

 

TSA-GHQ in student 2 sualluihte mohpaih

LAMKA, April 20: Thadou Students’ Assn, GHQ a Gen Secy., Michael Lamjathang Haokip in tuni a thusuah a bawlna ah, April 14, 2017 (Good Friday) nitak a Imphal East district sung Lamlong Bazar kiang a mi 7 in student 2 a sualluih uh naktak a mohpaih uh ahihdan taklang uhi.

 

Hiai thiltung toh kisai Manipur police team in kintak a suizui a migiloute a matkhiakna tung ua TSA in kipahthu gen hi. Huai ban ah thiltung toh kisai a thudik a vaihawm ahihtheihna dia POCSO Law zang ding inleng state thuneitute ngen uhi. Mat a omte tung a gamsung dan toh kisai a gawtna khauhtak pe ding leh hiai toh kisai a kigolhkha peuhmah kuamah hawi neilou ding inleng ngen uhi.

 

Student nih sualluihna tungtang a Mrs Nemcha Kipgen, Minister for Social Welfare, Govt of Manipur in awlmoh a, mimaltak a pan a lak ban ah a poimoh bang a panpihna piak a chiam ziak inleng TSA-GHQ in kipahthu gen uhi.

 

Hiai thiltung toh kisai a mipite pilvang ding leh POCSO Law dungzui a sualluih a omte min taklat leh genkhiak pen gawttheih ahihdan phawk ding in ngen uhi.

 

Inn mun leh gamdang a numei leh naupangte’n bitna a ngahkei uh leh koimun mah a khantouhna omtheilou ding ahihdan leng numeite leh naupangte’n a dikna uh a zattheihkei uh siamsinna in omzia neilou ding hidan inleng taklang uhi.

 

Tulai hun a ding in numei sualluih leh numei tung a thangtatna toh kisai in bangmah suanlam ding omthei nawnlou ahihmanin khotang a pawlpi tuamtuam leh government leh mipite’n numei tung a tatsiatna leh numei leh naupangte bitna ding a panla chiat ding in ngen uhi. Huai ban ah tunung hiai bang thiltung deihhuailou om nawnlouhna dia government inleng a poimoh bang a panla ding in TSA-GHQ in ngen hi.  

 

 

Mandap ah WW-II hun a Japanese Army-te’n a bomb khiak nung uh kum 44 chinna zat in om

Imphal, April 20: Khovel a Kidoupi Nihna neih a hih sung a April 20, 1943 a Japanese Army-te’n Khurai Chingangbam Leikai Mandap a bomb a khiak hun sihna tuak mohna neiloute tung a zahna pak pekawm in, tuni Ningani in bomb khiak a hihna mun Mandap ah sihna tuakte inkuanpihte leh tanau lainate’n 44th Death Anniversary zang uhi.

 

Hiai hun in, bomb khiak a hih ni a, a pa ana mansuah, Kh Nimaicharan in bomb khiakkhum a om, a mulkimhuaidan toh kisai gen hi. April 1943 in Japanese Army-te’n Allied force-te nohkhiak ding tupna in Manipur state sung mun tuamtuam ah bomb khia ua, vangtahhuaitak in bomb khiak a omte lak a khat in, sahkhua vai toh kisai ann nekkhawmna ding a mipi tamtakte kisuktuahna mun Khurai Chingangbam Mandap leng dengkha hi. Hiai ni in nautang 100 val thah in om ua, bomb khiak a hih zoh phet in a mun ah khenkhat in sihna tuak ua, mi khenkhat in a liamte uh enkol ding a hospital zotlai un lamkal ah sihna tuak uh chi’n Kh Nimaicharan in gen hi. World War II pumpi a Manipur a thiltungte lak a hinna tamtak mansuahna thupipen khat a hih ziak in, Manipur khangthu ah hiai bomb khiak a om mang ngei nawnlou ding chi’n Kh Nimaicharan gen hi. Hiai thil a tunnung kum 74 bang paita mahleh sihna tuak inkuante leh tanaute’n state government kiang ah, bomb khiakkhum a hihna mun Mandap kichi heritage site khatdan a puang ding a ngetna a bawlte uh a kisaipihte a kipan dawnna kipahhuai zak a hih dungzui in, maban kum hong paizel ding ah Mandap kichi state a mun poimoh khat hiding in bawlkhiak hiding chi’n gen hi.

 

Mandap kichi hinna tante theih gigena ding a mun poimoh khatdan a kepbit tuak a hihdan gen kawm in, Kh Nimaicharan in mipite kiang ah kithuahpihna leh gupna peding inleng ngen hi. Bomb khiak a hihna mun chiamtehna in Khurai Chingangbam Mandap ah leng ‘memorial place’ khat bawlkhiak in om khin hi. Bomb khiak ahih ni a, bomb in a suksiat thilte lemlak toh hilhchetna ding in, bomb khiak a hih zoh phet a lemlak khenkhat leng takkhiak in om hi. Kohima leh Imphal a kidouna phual munte en nuam tourist tamtak a kibehlap ziak in, kum tamlou paita sung in ‘memorial place’ in vehtu hau mahmah hi. Kh Nimaicharan in memorial stone khat a phuhkhiakna ah ‘Dedicated to the memory of those Unfortunate Number of Civilian Victims of the Japanese Bombing Disaster that had occurred at this Place of the then Khurai Chingangbam Mandap on the 20th of April, 1943 during the 2nd World War’ chih thu tuangsak hi.

 

Imphal Campaign Foundation, WW2 co-founder Yumnam Rajeshwor Singh in bomb khiak a hih hun a hinna tante min list (Khurai kim leh a kiangnai a Chingaral area tanpha a sihna tuak mi 100) pekhia hi.  


 

 

MGNREGS phase II block level inspection om ding

LAMKA, April 20: April 24, 2017 a pan in BDO/Lamka TD block makaih in MGNREGS 2016-2017 phase II block level inspection om ding uhi. Huai ding toh kisai a roster bawl a omdan ahihleh April 24, 2017 zingkal dak 6:30 a pan sunma dak 11:00 tan in Zoumunnuam, New Zouveng, Hiangzou, Zenhang Lamka, Khumujamba, Rengkai, Neihsial Veng leh Kerith Veng inspection bawl ding uhi. April 25, 2017 zingkal dak 6:30 a pan dak 11:00 sung in Hiangtam Lamka, Awnchinkap Veng, Elite Veng, Headquarter Veng, Hill town, Chiengkonpang, Lalzomlien Veng, Thengra Leirak, Salem Veng leh Hmuia Veng hiding a, April 26, 2017 zingkal dak 6:30 a pan dak 11:00 sung in Gouchinkhup Veng, Dorcas’ Veng, Bungmual, Pearsonmun, Mission Compound, Gangpimual, Tangnuam, Pangzawl, Lanva leh Nghathal hiding hi.

 

April 27, 2017 zingkal dak 6:30 a pan dak 11:00 sung in Lailam Veng, Sim Veng, Elim Veng, Hebron Veng, College Veng, Zion Veng, Kanan Veng, Vengnuam, V. Munhoih leh Khominthang inspection bawl ding ua, April 28, 2017 zingkal dak 6:30 a pan dak 11:00 sung in Kawnpui, Thingkangphai, T. Mimjang, Tongdam, Suangsiboh, Tualnuam, Immanuel Khopi, S. Munnuam, Tangmual, D. Leikot, Lingsiphai leh Bisanmual hiding hi. April 29, 2017 zingkal dak 6:30 a pan dak 12:00 tan in Mata, Buallian, Mata Mualtam, V. Bethel, Geljang, Zoumun, Ngoiphai, Phaibem, Zoutuinom, Lamzaag leh M. Khomunnuam inspection bawl ding uhi.

 

 

EBC Pensioner Fellowship om ding

LAMKA, April 20: April 22, 2017 sunma dak 10 a pan sunnung dak 2 kikal in Chhungi Prayer Hall, GBC Campus, New Lamka ah EBC Worker Pensioners Fellowship 6veina om ding hi. Hiai hun Rev V Chinpau in makaih ding a, Recording Secy in Upa N Thonzagin pang ding hi.

 

Thumna hun masa Rev ST Jamkhanthang in makaih ding a, hiai hun pen ‘Kipahthu genna leh mimal kipumpiakna’ hiding hi. Tua zoh in Rev V Thangsuan leh Upa K Ginkhanthang a pan sharing om ding hi.

 

Thumna hun nihna Evan Thangkhanpau in makaih ding a, hiai hun pen ‘EBC Missionary-te leh Mission Field-te a dia thumna hun’ hiding hi. Tua zoh in Pastor Ngaithang leh Rev T Kamzakham a pan sharing om ding hi.

 

Thumna hun 3na Rev Ngulkam in makaih ding a, hiai hun pen ‘Mimal leh Saptuam pumpi halhthakna ding a Khasiangthou ngetna’ hiding hi.

 

Sharing hun a thupi dingte ahihleh nasep sung a sepna munte leh kipahna leh haksatna tuahte, pension nung a Pathian gam nasepna a kizatna leh tupdante, pension-sate’n Pathian gam nasepna a panlakna dia deihdan leh hoihsak dante chihte hiding hi.

 

 

Asia gambup a biakinn lianpen honkhiak hiding

DIMAPUR, April 20: Asia gamsung a biakinn lianpen Nagaland state sung Zunheboto a Sumi Baptist Church biakinn bawlzoh ahih toh kiton in hongtung ding April 22, 2017 in honkhiak hiding hi.

 

Hiai biakinn ahihleh May 7, 2007 in kibawl pan a, March 31, 2017 a zohsiang a om in biakinn bawlna ah Rs 36 crore lut hi. Hiai biakinn ahihleh mi 8,500 tan tut theihna dia kibawl hi a, biakinn omna mun ahihleh sea level a pan in 1864.9m in sang a, 26.1° N leh 94.52” E kikal ah om hi.

 

Biakinn dunglam feet 203 hi a, a vailam feet 153 hi a, feet 166 in sang hi. Biakinn in a tutkhum chia (area) ahihleh 23,73,476 Sq.ft. ahi. Biakinn limgelh (architect) ahihleh M/s. Akitektura, Dimapur hi a, a bawltu (engineer) ahihleh M/s. Map Project Services Pvt Ltd., Kolkata ahi.

 

 

LYF/MELC in Diamond Jubilee lawm ding

LAMKA, April 20: Manipur Evangelical Lutheran Church (MELC) nuai a Khanglai Pawl, Lutheran Youth Fellowship (LYF) General Headquarter in “Along with Jesus” chih thupi zang in zingchiang, April 21-23, 2017 sung MELC HQ Church, Zomi Colony ah LYF kiphuhkhiaknung kum 60 chinna Diamond Jubilee lawm ding uhi.

 

LYF Diamond Jubilee lopna April 21, 2017 nitak dak 6:00 in kipan ding a, hiai hun ah Upa V Lawmsang, Moderator, MELC in LYF Diamond Jubilee lopna hun hongkhia in, Music Secretary, LYF GHQ leh Music Committee MELC saina in Diamond Voice Solo Final Round om ding hi. Hiai hun ah Dr Steve Minlun leh Dr Langlunthang in thugen ding uhi.

 

April 22 sun kikhop ah Pastor Kapsuankhup, Shillong in, “Abide in Me” chih thupi zang in thugen ding a, Rev Thangliankham, DM incharge Youths in, LYF Diamond Jubilee souvenir hongkhia in, P Khamminlun, Vice-chairman, LYF GHQ in LYF tanchin tomkim gen ding hi.

 

Sunnung dak 12:30 in seminar om ding a, hiai hun ah Suanlian Tunung in ‘Self Reliazation’ chih leh Pupu Zou in ‘Help yourself to help others’ chih thupi zang in seminar makaih ding uhi. April 22, nitak biakna ah Rev. Kamminthang Taitom in “How Beautiful Are The Feet Of Them That Preach The Gospel” chih thupi zang in thugen ding hi.

 

LYF Diamond Jubilee nipini sunma dak 9 in Shesei Zou, ADCC Chairman, Chandel in Diamond Jubilee Mela/Khutsiam silbawl hong ding a, Rev TC Khup in Pathian min in laan ding hi. Sunma dak 10 in Rev (Rtd) Dr Hangminthang, Bishop MELC in Pathian min in LYF Diamond Jubilee suangphuh hongkhia in laan ding a, teltuam mi 60 in Diamond Jubilee dak khen ding uhi. Upa S Zamkhanpau, Gen Secy., LYF GHQ in phamsate sunna makaih ding a, Rev (Rtd) Dr Hangminthang, Bishop MELC in Jubilee message gen ding hi.

 

Nitak biakna kikhop ah Rev Dr Ginkhanmung, DS Lamka in. ‘Here I am, send me o Lord’ chih thupi zang in thugen ding a, Diamond Jubilee toh kisai a kitaitehna chituamtuam a kipahmante hawmna om in, Upa V Lawmsang, Moderator, MELC in LYF Diamond Jubilee lopna hunkhak ding hi.

 

 

SDO/BDO Lamka TD block makaih in meeting nei

LAMKA, April 20: Tuni sunma dak 11 in SDO/BDO Lamka TD Block makaih in Lamka TD block sung a kho hausa (chief/chairman) teng in KKL Complex, IB Road ah meeting nei uhi. Hiai hun ah Job Card toh kisai register tuamtuam 7 neih ding toh kisai leh huaite enkol dingdan Seiminthang Lenthang, MCS, SDO/BDO, Lamka TD block in sinsak hi.

 

Register 7 neih ding leh huaite zat dingdan ahihleh Register 1na pen Job card (application, registration leh issue) leh household employment register-na hiding a, Register 2na pen Gram Sabha Meeting (minutes and action taken) chiamtehna hiding a, Registration 3na pen demand, nasep ding gawmna leh sum hawmkhiakdan chiamtehna hiding a, Register 4na pen nasep dan chiamtehna hiding a, Register 5na pen van neihte chiamtehna ding leh Register 6na pen complaint omte chiamtehna ding ban ah Register 7na pen van tuamtuam chiamtehna a zat hiding hi. Lamka TD Block sung ah tulel in khua/veng 62 om a, tuni a meeting ah Village Authority Chairman/Secy 53 paikhawm uhi.

 

 

Forest toh kisai national seminar zou

LAMKA, April 20: North Eastern Council (NEC) sponsored-na in zan April 19 a pan in Rayburn College, New Lamka ah, ‘Protection of Forest for Sustainable Development in Manipur’ chih thupi zang in 2-Days National Seminar kipan a, tuni’n zousiang uhi.

 

Seminar ahihleh tuni sunma dak 9:30 in kipan nawn a, hun masa sunma dak 9:30-12:00 tan nei ua, hun nihna sunnung dak 12:30-3:00 kikal nei in sunnung dak 3 in valedictory function om hi. Hiai hun ah chief guest, guest of hour leh functional president in Brig. Ajay Kumar, Commandant, 27 Sector AR; Col. D.S. Murty, SC, SM., Dy Cdr, 27 Sector, AR leh Rev Dr Khen P Tombing, Principal, Rayburn College pang uhi.

 

 

TSA in MCSCC 2016 a lohchingte kipahpih

LAMKA, April 20: Thadou Students’ Association, Bengaluru Branch (TSA-B) in MCSCC 2016 a Manipur Police Service (MPS) dia lohching Kamkhohao Sitlhou- Lhouvum kipahpihna nei uhi.

 

Kamkhohao ahihleh TSA-B phuhkhiak ahih a pan Advisor hi a, Bangalore khopi a, a omsung in TSA a ding in nasatak in panla hi. Aman B. Tech. (Electrical) a zohnung in NIT Srinagar a BHEL ah sawtlou sem a, huainung in Asst Engineer (Manager), MSPDCL ah sem a, hiai nna a sepkawm in MPS ding in lohching hi.

 

Huai ban ah Thadou tribe sung a pan Manipur Civil Service (MCS) a lohching Paotingsei Kipgen, T. Khaiminlal Haokip leh T. Joseph Lhungdim leng TSA in kipahpih thupuang ua, MPS a lohching L. Thanggoulien Khongsai leh Shonjakhup Haokip; SDC a lohching Robert Lhungdim leh Glory Chingthiankim-te leng kipahpihthu puang uhi. Himahleh allotment puankhiakma a mualliam Onminlal Haokip sunthu puang in nutsiat a innkuante thuakpih thu leng taklang uhi.

 

 

 

 

 

NEWS TOMKIM

 

Ph.D Degree ngah

LAMKA, April 20: Ms Grace Kim Khaute d/o Ginkhanchin @ GK Chin, IP&TAFS, Financial Adviser, NEC in April 18, 2017 in ah Department of Education, Mizoram University nuai ah Doctor of Philosophy (Ph. D) degree ngah hi. A thesis ahihleh “Constructivist Approach to Teaching - Learning; Knowledge, Attitude and Practices of Elementary School Teachers in Mizoram” chih hi a, Prof. B.B Mishra in a guide hidan in thutut kingah hi.

 

 

Lamka ah SSC exam om ding

LAMKA, April 20: Hongtung ding April 30 chiang in Lamka a Exam Centre nih - Rayburn College, New Lamka leh Ccpur Govt College, Hill Town ah Staff Selection Commission(SSC) sai in Multu Tasking Staff (Non Technology) lakna ding in exam om ding hi. Exam ahihleh sunma dak 10:00 in kipan ding a, sun dak 12:00 in zou ding uhi.

 

 

Footpath a vanzuakte check

LAMKA, April 20: Ccpur Police OC makaih in tuni’n Traffic Control Police leh Police team kithuah in Tedim Road dung a footpath tung a meh leh van zuakte check in kikhinkhesak uhi. Mihing paina dia kibawl lamlian dung a footpath pen sun chiang a meh leh vanzuakna mun a suah ban ah lamlian gei a workshop leh dawr bawl khenkhat in footpath a pansan ziak un khe a paite a ding in nawngkaina lianpi tun hi.

 

 

Ex-Servicemen Rally om ding

LAMKA, April 20: April 22, 2017 chiang in IGAR South HQ., Mantripukhri ah Assam Rifle Ex-Servicemen Rally om ding hi. Hiai hun a AR Ex-Servicemen, Widow leh Veernari tengteng tel chiat ding in Secy, ARESM in theihsakna bawl hi. Hiai rally a tel dingte a ding in April 22 zingkal dak 5:30 in New Bazar ah bus om ding a, a hoh dingte hiai hun lap a tungkim chiat ding in ngen uhi. Huai ban ah hiai rally a tel ding teng in I-Card, Aadhaar Card, Canteen Smart Card leh Voter I-Card chihte keng chiat ding inleng theisak uhi.

 

 

SUNNA:

Mangkholal Guite of Vengsak, Pearsonmun, damlouhna ziak in tuni’n si hi. RIP.

 

Khampam (95) w/o G Phungkhokam of Zellang Veng, Hiangtam Lamka, tuni, April 20 sunnung dak 3 vel in teknat in si a, zingchiang in Lamka hanmual ah kivui ding hi. RIP.

 

 

 

 

 

…for more detail : here