You are here: HomeRSS FeedsThe Lamka Post

The Lamka Post | May 25, 2017

Thursday, 25 May 2017 08:21

Ni 632 nung in Tribal Martyr-te luang zahna thupitak toh vuikhiak in om

LAMKA, May 24: August 31, 2015 a Mani­pur Assembly in “Protec­tion of Manipur People Bill, 2015; The Manipur Land Revenue and Land Reforms (7th Amend­ment) Bill, 2015 leh Mani­pur Shops and Establish­ments (2nd Amendment) Bill, 2015” a passed deihlou a Joint Action Committee Against Anti- Tribal Bills (JAC) makaih a singtangmite’n ni 632 kiphinna a neihnung un, Bills 3 ziak a kiphinna hun a si Tribal Martyr 9-te lak a vuilouh a om mi 8-te luang tuni’n zahna thupitak toh vuikhiak in om hi.

 

Lamka Public Ground, Hiangtam Lam­ka a Tribal Martyr-te sun­na hun zatna ahihleh Ma­nipur Government a pan in Public Works, Rural Development and Pan­chayati Raj, Commerce and Industries, Power, Information and Public Relations, Administra­tive Reforms and Train­ing Minister Thongam Biswajit; Social Welfare and Cooperation Minis­ter Nemcha Kipgen; PHE Minister Losii Dikho; Ag­riculture and Veterinary and Animal Husbandry Minister V Hangkhan­lian leh Chief Secretary Oinam Nabakishore in uap uhi.

 

Minister Biswajit in a genna ah, Anti-Tribal Bills 3 ziak a kiphinna ni 632 neih ahihnung in hun paisa a hihkhelh omte kitheisiam a government leh mipi lam a panlakna toh tuni a Bills 3 ziak a site luang vuikhiak theih a om man in kipahhuaisa ahihdan gen hi.

 

Government paisa in a hoih ding ngaihtuahna ziak a thil ana hihpen mipi’n a hoih leh hoi­hlouh thupukna bawl ua, himahleh Manipur gov­ernment thak in mipite a pan haksatna leh buaina omte ngaihkhiaksak a, mipite deihna bang a vaihawm ding ahi chi hi. Huai ban ah government in district teng phasuak a, state sung a mipite hak­satnate enkai ding ahi­hdan genkawm in state sung a tengkhawm com­munity tuamtuamte kua­mah kikhenthei omlou i hi uh chi hi.

 

Minister in a gen­zelna ah, a khenchiang in community tuamtua­mte kal a kitheihsiam louhna omthei mahleh pangkhawm a kitheihsi­am louhna omte hihveng ding in ngen hi. Tua ban ah Manipur government thak in community khat­peuh ahihkeileh mipite ngaihtuahna nasakthei ding a thupukna bang­mah bawllou ding leh thupukna bawl ding peu­hmah a kisaipihte a pan ngaihdan la masa ding ahi chi hi.

 

State sung a com­munity tuamtuam om­khawmte pangkhawm a state sung khantouhna dia panla ding a ngen in, singtang leh phaizang a kikhen Manipur ah phai­zang kia a khantouhna in state sung khantouhna tunlou ding ahihman in singtanggam khantouh­na dia government in panla ding ahihdan gen hi. Huai ban ah govern­ment kichi mipite nasem dia om ahihman in gov­ernment in state sung a kituahna leh lemna om­sak ding ahihdan gen hi.

 

JAC chief conve­nor H Mangchinkhup in Tribal Movement ni 632 chinni tanpha a JAC nungthuap a gin-omtak pang tribe council, stu­dent organisation leh philantropic organisa­tion-te tung ah kipahthu gen hi. Huai ban ah Ma­nipur government toh 7vei kihouna neih ahih­nung a deihthusam bang hizoukei mahleh May 10, 2017 a MPC Office, Lam­ka a Manipur Govern­ment toh JAC in kilemna (Memorandum of Un­derstanding) suaikaithei leh huai dungzui a tuni a Salphate luang manpha khakthei a ki-om ahi chi hi. Tribal Movement toh kisai a ‘long term goal’ leh ‘short term goal’ om ahihman in mipite’n khensiam a theihsiam poimoh ahihdan gen kawm in Manipur Gov­ernment toh MoU bawl a omte genchian a, MoU in a thutuunte nouneltak a suichian ding in ngen hi.

 

JAC chief convenor in a genzelna ah, Sal­phate luang vuikhiak a om pen Tribal Movement beina leh tawpna hilou in, hun thak kipatna ahi chi hi. JAC in a thilphut khenkhat state govern­ment in a hihtheih chiang om a, central govern­ment khut a kinga leng om ahihman in mipite’n thathak la a, pantheihna lam chiat a pang ding in gen hi. Tua ban ah Gov­ernment toh Suspension of Operation (SoO) nuai a galvantawite’n ‘tripartite talks’ neilel uh ahihman in singtangmite’n politics toh kisai a buaina i neihte uh hihveng ahihtheihna dia SoO nuai a om gov­ernment toh kihouna nei pawlpite mipi’n i nungth­uap a, kithuahpih dan i siam uh poimoh ahi chi hi. Huai ban ah Tribal Movement tungtawn a singtangmite’n tup-le-ngim a neihte uh mitsuan a pai himahle hang ngaih­dan kibatlouhna tuamtu­amte ziak a hiai tantung leh mipite’n nungthuap a tawsawn ngaplai hileh i thilphutte uh lohching ngei ding i hi chi hi.

 

Tuni a Tribal Martyr-te sunna leh vuina toh kisai in Manipur Chief Minister N Biren Singh, Mizoram Chief Minister Lal Thanhawla, Naga­land Ex-Chief Minister & Lok Sabha MP Neiphiu Rio, Zoram National Party Lalduhawma, Ra­jya Sabha MP Daimary Biswajit leh Union Min­ister Jual Oram ban ah ZORO GHQ leh mi tua­mtuam in Salphate sun­pih thu khak uhi. Huai ban ah Mizoram a pan in Mizo Zirlai Pawl (MZP) GHQ leh Mizo Students Union (MSU) GHQ a pan makaite’n leng hiai hun hong uap in thugen uhi.

 

Tuni a Tribal Martyr-te sunna leh vuina toh kisai in zingkal dak 9:30 in Joint Philan­thropic Coordination Committee-te’n Lamka damdawi Inn morgue a Cold Storage a pan in Sal­pha 8-te luang lakhe ua, tua zoh in morgue kong ah Salphate sungkuante’n puantuamna nei in Rev V Khamvum, Principal, GBC in thumna in hospi­tal a pan khakhia hi.

 

Salphate luang truck 8 a pua in Lamka Public Ground ah paipih hi a, hiai hun ah student-te’n hospital a pan Lamka Public Ground tan uni­form silh in ‘human chain’ bawl in zahna pia ua, sunma dak 11 a pan in sunna programme ki­pan hi.

 

Sunna programme ah NNC Rayburn Col­lege-te’n March Past nei in Salphate zahna pia ua, tua zoh in ‘Gun Salute’ om hi.

 

Hiai hun ah Rev K Hangnung, President, BPM/NTBCS in Salphate sungkuante leh liamna tuakte a di’n thumsak a, Vanlalrinliana, President, MZP; Chinlunthang, President, UZO; B Dong­zalian Simte, President, STC; H Pau Za Cin, Presi­dent, TCU leh T Khaili­anthang, President, YPA-GHQ in thugen ua, Rev S Vung Minthang, Gen. Secy., EBC in khamuan­na thugen in Rev Stephen Chinzathang in thumna in Salphate luang khakh­ia hi.

 

Tua zoh in Ccpur Royal Riders’ Club-te’n makaih in Salphate luang a kivuina ding mun Mata Khuga Dam a Tribal Mar­tyrs Memorial Park zot­pih hi a, Salphate omna veng a Pastor-te’n Cross pua in Rev J.F. Lalropuia, Presbyterian Church of India in hankhuk khat ah Tribal Martyr 8-te luang vuikhawm hi.

 

Tuni a Salphate sunna program ah CBA, EBC, PCI-Tuithaphai Presbytery, NTBC leh ZPCS in Joint Choir a neih ban ah lasiam tua­mtuam in lasa uhi. Hiai hun ahihleh DC/Ccpur, SP/Ccpur, Brig. 27 Sector Assam Rifle, Chairman & Vice Chairman ADCC, EM/ADCC leh MDC-te ban ah government offi­cial tuamtuam in uap uhi.

 


Bills 3 ziak a si Tribal Martyr-te luang vuikhiak ahih chiang a, a tanchin uh suahkhiak ding a Lamka Post staff-te’n Tribal Martyr-te innkuan­pihte tungtawn a Salphate tanchin a kaihkhawmte uh pek 2, 3 leh 4na ah kikoih a, tuni a kimloute zingchiang in hong kikoihzom ding hi.

 

 

Governor in Halima Aziz Junior College hongkhia

Imphal, May 24: Tuni Nilaini in Mani­pur Governor Dr. Na­jma Heptulla in Jamia Halima Aziz Educational Trust Campus Khabeisoi (Azamnagar) Imphal East District ah Chief Guest hihna toh thuah in Halima Aziz Junior Col­lege hongkhia hi.

 

Dr. Najma Heptulla in naupangte tung a sia­msinna a bik in technical line lam uangbawl ding a hanthawn teacher leh nu-leh-pate naktak in phat hi. Mipite kiang ah Prime Minister Naren­dra Modi’s ‘sab ka saath, sab ka vikash’ leh ‘equal­ity for all’-te a muanna koih ding in ngen hi. Khabeisoi Kerang Kho­midok khua in govern­ment high school leh higher secondary school khat leng neilou hi. Kum 2014 a kiphutkhia Jamia Halima Aziz Educational Trust in khotang a nam zawngkhal leh bahte tung a educational facility piak ding tupna toh Kha­beisoi a Junior College honkhiak in om hi. Trust in tagah numei leh pasal naupangte leh genthei leh tasamte tate tung ah free education leh accommo­dation pekhia hi. Tutan in hiai Trust ah tagah stu­dent 2400 in minkhumta ua, mizawng leh genthei student 6012 pha ua, cat­egory dang a kipan in stu­dent 3326 om uhi.

 

 

Police leh AR-te’n KLA/KLO cadre 12 mankhia

LAMKA, May 24: Police a pan kizadan in, May 22, 2017 in Va­jing khua ah KLA/KLO cadre bangzahhiam om chih report om dungzui in SP/Ccpur makaih in police team leh Assam Rifle-te’n operation va bawl in KLA/KLO cadre 12 mankhia uhi. Am­aute ahihleh Lunmin­len Haokip @ William (19) s/o Tongminthang Haokip of S. Munpi Vil­lage, Kangpokpi district; Lalriamthang Kilong @ Sesiem (28) s/o Lunk­homang Kilong of Aige­jang, Kangpokpi district; Letminlun Guite (20) s/o Henkhothang Guite of Jangnomphai, Ccpur district; Ginminthang Haokip @ Akash (24) s/o Hempao Haokip of Muolphai, Ccpur district; Lalkholen Guite @ Johny (26) s/o Khupthang Guite of Khamenlok, Kangpokpi district; Ka­mgougin Hangshing (19) s/o Chungpao Hangsh­ing of Saikul, Kangpokpi district; Haogin Doungel (24) s/o Holmang Doun­gel of Aigejang, Kang­pokpi district; Jangkholal Haokip (18) s/o Doulun Haokip of Shangkai, Ukh­rul district; Thangminlal Touthang (25) s/o Hem­tong Touthang of Jang­nomphai, Ccpur districtl Nangzalun Haokip (18) s/o Hemkholal Haokip of Thingjanglhang, Kang­pokpi district; Khaijan­gam Touthang (25) s/o Letkhojang Touthang of Damsong, Kangpokpi district leh Henminlal Haokip (25) s/o Lhun­jang Haokip of Jangnom, Ccpur district hi uhi.

 

Amaute a pan in security force-te’n SBBL 2, Air Rifle 2, Walkie Talkie (Set) 4, mobile handset 10, sam­sung handset 5, comou­flague uniform khekol 7, puan-ak 6, T- shirt 2 leh identity card 163 mankhia uhi. Police in zan in CJM Court ah dingsak ua, court in June 1, 2017 tan Police custody a om dia theisak in Imphal Police Station ah koih uhi.

 

KLA/KLO cadre mat a omte tungtang SP/Ccpur in a genna ah, KLA/KLO ahihleh Gov­ernment toh Suspension of Operation (SoO) suai­kai leh Kangpokpi dis­trict sung Hebron Camp pansan a om himahleh Ccpur district sung Va­jing kho mipite hihbuai uh hi’n gen hi. Tuma zek a passenger pua Wing­er khat Vajing khua a khensete leng KLA/ KLO cadre-te hi ua, SoO nuai a om helpawlte lak a mipi subuai a buaina bawl a om leh secu­rity force-te’n kintak a mankhe zel ding uh hi­dan inleng gen hi.

 

 

Grass Root Football Coaching kipan

LAMKA, May 24: Football kimawlna lam a lunglut naupangte foot­ball kimawl dan diktak toh hong khanlet thei­hna ding uh deihna a kibawlkhia The Shep­herd’s Football Academy in naupang kum 14 leh 17 nuailamte a ding in Lalpuithluii Foundation School Ground, Pearson­mun ah kha khat sung daih ding Grass Root Football Coaching pan uhi.

 

Grass Root Football Coaching ahihleh tuni zingkal dak 7 in inaugu­ral programme om hi. Hiai hun ah chief guest in Lenlai Club neitu T. Kammuanlal Simte, MCS pang a, guest of honour leh chief host in New Lamka (West) MDC CT Lian Guite leh Vunglal­lian Tonsing, Principal, Lalpuithluii Foundation School pang uhi.

 

Hiai hun zatna Miss Biaklun Tonsing in makaih in, Upa Jam­sangchin in thumna a hun pan in The Shep­herd’s Football Academy neitu T. Khamminthang, Coach-cum- Manager in vaidawn thugen in Acad­emy patkhiakna ziak gen hi. Aman a genna ah, foot­ball kimawlna lam toh kisai in singtangmite’n talent leh skill hoihtak nei mah lehang neu a pan kimawl dan hoihtak a ki­sinsakna a omlouh ziak in kimawlmi tamzawte a tunding tan uh tunglou tamtak om a, hiaite awl­mohna ziak a The Shep­herd’s Football Academy pankhia ahihdan gen in Grass Root Level Foot­ball Coaching hongkhia a, naupangte kiang ah Jersey pia hi.

 

Chief Guest in a gen­na ah, Ccpur District ah football kimawlmi tasam kei mahleh kimawlmite kaihuaitu ding mi om­lou ahihna ah T. Kham­minthang in i gam in a poimoh mahmah foot­ball academy a patkhiak kipahpihhuaisa ahihdan gen a, ei singtangmite’n football kimawlna lam ah talent hoihtak toh pi­angkhawm himahle a kaihuaitu ding kitasam ahihna ah hichibang academy tamsem i gam in poimoh ahihdan gen hi. Huai ban ah football kimawlna kichi va pek a va mawk hat kia hilou in, eimah a siamna omte pholhsuah theihna dia kimawl dan (knowledge) theihkhiak poimoh a, tua ban ah, i lunglutna mah a kimawl in lohchinna hon tung ding ahihman in, lawmte kimawl ziak hiam ahihkeileh zan khat thu a lunglutphut chihte ahi­hlouh ding ban ah a nuamlam kia hi­lou in ei mah lungtang a pan hong pawtkhia toh kimawl a, extra ef­fort nasatak piak poimoh mahmah ahihdan gen hi.

 

Hiai hun ah Rev. N. Pumsuanmung, Youth Co-ordinator, EBC in naupangte kiangah hasot­na thu gen in, Grass Root Level Football Coaching a ding in thumsak hi.

 

Hiai Grassroot Foot­ball Coaching ah Lamka leh a sehvel a pan in nau­pang 30 in registration bawl ua, coaching a tel naupangte kiang ah jer­sey, shorts leh stocking a thawn a piak ahih ban uah training hunsung in amau taksa a dia hoih nek ding refreshment piak hiding ua, ni khat hal zel in kha khat sung training piak hiding uhi. T. Kham­minthang, Coach-cum- Manager etkaina nuai ah naupangte football kimawl dan sinsak hiding ua, footballer minthang Ngulkhosiam Guite in kithuahpih ding hi.

 

 

Manipur Govt in thautui hawmna a diklou omte enkai di’n special task force phutkhia

IMPHAL, May 24: Mipite kiang a gari thau­tui piakna a dikloutak a nasepna omte enkai ding in, tuni Nilaini in Mani­pur government in spe­cial task force phutkhia hi.

 

State consumer af­fairs, food and public distribution (CAF&PD) department thuneite’n retail outlet-te’n phalna tellou a petrol leh diesel selgu leh grey market a petrol sesa tamtak a mat­khiaknung un, govern­ment thak in panla hi.

 

Official thusuak dungzui in, May 17 in CAF&PD in special task force phutkhia a, Imphal East leh Imphal West district a petroleum re­tail outlet-te a dikloutak a nasepna a bik in hun tomchik sung thautui piakkhiakna leh thautui sesa hawmkhiak leh a dangdangte enkai ding in thuneihna sangtak pekhe ngal hi. May 21 in police team-te’n Imphal West district a brick field sung khat ah lepguk a om pet­rol tamtak mankhia uhi. Brick field a buluh hun un, mel leh puam tua­mtuam nei fuel storage tank hunkhop mukhia ua, petrol hihsiatna ding a kizang colouring agent tamtak leng matsak uhi. Thautui(petrol, kerosene leh ‘Zero’) 5000 litres, 2000 litres, 1800 litres leh 1000 litre-te kikoihna plastic storage tank 4 leng mukhia uhi. Thautui litre 2000 koihna steel tank khat leng mukhia uhi. Zero kichi density niam­chik nei gasoline chikhat ahi. Oil tanker truck(18 Kls) sung ah leng thautui 8 Kls mukhia uhi.

 

Police-te nahoih septe kipahpih kawm in, state CAF&PD min­ister Karam Shyam in dikloutak a gamtangte tung ah government in action khauhtak la ding chi’n chiam hi. Hichibang thilte a politics thu kigolh theilou ding a, thautui selgu leh hihsia mite tung a action lak hiding chi’n gen hi.

 

 

Dansiangthou in kiteng ding

LAMKA, May 34: Zingchiang, May 25, 2017 sunma dak 11 in New Lamka Baptist Chuch, Elim Veng, New Lamka ah Mr H Lianchinhau s/o Pumshong Hangsh­ing leh Miss Vungbiak­sang d/o G Thanzau of Teikhang, Mizoram, sap­tuam dansiangthou in kiteng ding ua, sunnung dak 1 in Simte Inn, Sim­veng ah moulopna nei ding uhi.

 

 

Nagaland CM tapa Khriehu Liezietsu kitawpna Speaker in pompih

KOHIMA, MAY 24: Tuni Nilaini in sitting Parliament Secretary for Youth Resources and Sports, State Lotteries and Music Task Force, Government of Nagaland leh Nagaland Chief Min­ister, Dr Shurhozelie Li­zietsu tapa Khriehu Liezi­etsu, a seat luah lel a pa tuh ding a awngsak ding in, Legislative Assembly Member a hihna a kipan in kitawp a, Nagaland Legislative Assembly Speaker inleng Khriehu Liezietsu kitawpna pom­pih hi.

 

February 22, 2017 in Nagaland Chief Min­ister 17na ding in Chief Minister Dr Shurhoze­lie Lietzietsu kichiam hi.Kum 31 a upa re­gional political makai Dr Shurhozelie Liezietsu a hihleh, February 2017 a mipite’n thagum a TR Zeliang a tawpsak hun un, MLA hikei mahleh Democratic Alliance of Nagaland (DAN) Legis­lature Party makai ding in kithutuaktak in telkh­ia uhi.

 

Dan dungzui in, Chief Minister Dr Shurhozelie Liezietsu in kha 6 sung in MLA hi­hna a neih teitei ding chih a hihna toh, August 22, 2017 tan a Nagaland State assembly constitu­ency khatpeuh a kipan election a tuh ngai hi. Khriehu Liezietsu a hi­hleh Kohima district nuai a Northern Anga­mi-I assembly constitu­ency a kipan telching in om hi. By-election hun ding puankhiak hi nai­kei mahleh Election De­partment, Government of Nagaland in hiai thu toh kisai Election Com­mission of India (ECI) kiang tun khin hi. Maban a by-poll ah NPF makai luite’n a phuhkhiak uh Democratic Progressive Party (DPP) thak, Chief Minister Dr Shurhozelie Liezietsu langpang pipen suak ding uhi.

 

 

MP Demand Committee bandh in hindan buaisak

Imphal, May 24: Tuni Nilaini a Thoubal District MP Candidature Demand Committee in dakkal 24 sung daih ding bandh a puan un Thoubal leh Kakching ah hindan ngeina naktak in buaisak hi. State akipan Rajya Sabha seat khat om sun candidature right neilou outer Parliamentary seat a constituency 8 a kipan palai ding telkhiak ding ngetna tangkoupihna in kiphinna nei uhi. Rajya Sabha seat khat om sung ading a bye-election a hi­hleh zingchiang Ningani in neih hiding hi.

 

Lok Sabha Par­liamentary constitu­ency ading a gamsung a reservation policy in a huamkhaklouh AC 8te lak a khat, Wabagai AC a kipan, hun paisa a MP Haji Abdul Salam in si­hna a tuah nung in, hiai seat luahlouh in awng hi. AC dang 7te ahihleh Hei­rok, Wangjing Tentha, Khangabok,Kakching, Hiyanglam, Sugnu leh Jiribam hi uhi. Salam in a term a zohsianglouh ziak in, term om laiteng mualsuahpih ding a AC 8 a kipan palai dang khat in consolation dan a can­didature rights a ngah ding thil kilawm hidan in Committee in taklang hi. Bandh supporter-te’n lamlian a mei halkuang leh sing kahiangte kh­iaktan in, Wabagai Lam­khai, Wabagai Waikhom Leikai, Lai Pangalba, Hi­yanglam Wabagai Tera­pishak Kachathol area, Natekhong leh Sekmai­jing Tongkham munte ah lampi khaktan uhi. Kakchiang ah dawr, sum­sinna inn leh bazar-te khak in om uhi. Thiltung deihhuailou a om khak ding venna a police-te’n khauhtak a pan a lak ziak un, Thoubal district ah bandh khauhzou taktak­lou hi.

 

 

Health care sector poimoh ngaih masak hid­ing: Health Minister L Jayentakumar

Imphal, May 24: Tuni Nilaini in Manipur Health Minister L Jay­entakumar in Thoubal District Hospital enkhia hi. Hospital a veh zoh a tualsung makai leh volun­teer-te, club palaite, dis­trict health department official-te leh staff-te toh meeting neihna hun a, Minister in a gendan in, chidamna etkolna(health care) kichi state govern­ment in mitsuan pipente lak a khat ahi chi’n gen a, state in a etkol hospital-te dinmun kintak a puahpha a damna hoih leh dam­sawtna neih ahihtheihna ding in, government in naupang leh mipite lung­gulh piakkhiakna ding in thasiallou in nasemkhe ding chi’n gen hi.

 

Health Minister in Thoubal District Hospi­tal dinmun enkhe ding a chialna bawl tualsung mipite tung ah kipahthu gen a, doctor leh nurse-te taksap thilte koihvek ding leh damloute’n hospital a lungtunna a neihthei­hna ding un panlak hiding chi’n chiam hi. Hospital nasepna kichi khotang nasepna bang a ngai a, government kia in panla theilou ding a hih ziak in, tualsung mipite leh medical staff-te toh pang­khawm a panla ding a kip­umpiak poimoh ahi chi’n gen hi.Minister in Hospi­tal a toilet-te leh operation theatre a thil kisia omte enkhe ding a, maban ni nih sung ngei a engineer-te sawl ding a hihdan gen hi. Surgical operation neih a hihma a, damloute inkuante a kipan sum la hidan a ngoh a om dik­loutak a nasem staff-te tung a action pankhe ding hi’n leng chiam hi.

 

 

Sports Minister in IOA kiang ah a baihtheilam a National Games sai di’n theisak

New Delhi May 24: Tuni Nilaini in Sports Minister Vijay Goel in National Games sai ding zekaisak zihzehna thu toh kisai in a lungkim­louh thu gen hi. Tua toh kiton in, Indian Olympic Association(IOA) presi­dent N Ramachandran kiang ah a baihtheilam a National Games sai ding in theisak hi. National Games kichi kum 2 hal a saizel ding chih himahleh kum 4 a painung kum 2015 in Kerala ah Na­tional Games nanung­pen neih in om hi. Goa in a zintun ding National Games tutan zekaisak in om hi.

 

 

 

 

 

 

NEWS TOMKIM

 

TO a ding solar set 20 hongtung

LAMKA, May 24: Manipur Renewable Energy Development Agency (MANIREDA) in Sunshine Power Products Pvt. Ltd a pan in District Treasury office a zat ding solar power 5Kwp, 250 watt set 20 tuni’n hong koih uhi. Solar power ahihleh zingchiang a pan in company in fit ding ua, ni 4/5 sung vel a zoh hiding hi. Treasury office a solar power koih ahih toh kiton in electric pailouh hun chiang inleng office nasepna buai nawnlou ding hi.

 

 

Panpihna ankuang lui ding

LAMKA, May 24: EBCC Zoan, Bethel Veng, New Lamka in May 26, 2017 sunnung dak 3:30-6:30 kikal in a biakinn mun uah Sunday School Building Project toh kisai in panpihna ankuang lui ding ua, deihsaktute’n va umsak chiat ding in chial uhi.

 

 

Zillai in kipahpihthu puang

LAMKA, May 24: Zillai (Vaiphei Students’ Assn) GHQ in MBOSE, Meghalaya nuai a Class XII Arts a top 1 position la Miss Dimsonjem Vaiphei d/o Ginlalthuam, Chief of Mualngat Village, Ccpur district leh COHSEM, Manipur nuai a Class XII Arts a 9th position la Mr. Lalgouboi Vaiphei s/o Neklallem of D. Phailian, Ccpur district kipahpihthu puang uhi.

 

 

SUNNA:

Pauginmuang (18) s/o Ginzamuan of Khominthang, New Lamka, tuni May 24 in si a, tuni mah in New Lamka YPA hanmual ah kivui hi. RIP.

 

Upa B Do Za Lam s/o Thang Pau Buansing of Pangzawl, Lamka, cancer natna ziak a Guwahati a ki-enkol tuni, May 24 nitaklam dak 4 vel in si a, zingchiang in Lamka puaktung hiding hi. Amah ahihleh tulel a Pangzawl CBA Saptuam a Local Chairman lenlel ahi. RIP.

 

Ngaikhanching (74) m/o Thangmuankhup of Changangei, Paite Veng, Imphal, tuni May 24 nitak dak 7:30 vel heart-case in si a, zingchiang in kivui ding hi. RIP.

 

Chiinzangai w/o T. Tunchinthang of Bible Hill, Rengkai, tuni, May 24 in damlouhna ziak in si hi. RIP.

 

Ngaikhanchiin m/o Kamlianthang of Saiboh village, tuni May 24 nitak dak 8:30 vel in RIMS Hospital, Imphal ah si a, zingchiang in kivui ding hi. RIP.

 

 

 

 

 

…for more detail : here

 

 

 

RELATED

The Lamka Post | May 24, 2017