You are here: HomeColumnsKimbawi' PaRih Dil Tuanglam

Rih Dil Tuanglam

Written by  Kimbawi’ Pa Published inKimbawi' Pa Wednesday, 15 March 2017 00:42
Rih Dil Tuanglam

Kimbawi’ Pa

 

Eimite Lamka lam a election buai a na buai vengvung kal un kou nupa in Mizo pi-pute’n sih nung chiang a akha un a tot/kan ua a ngaih uh Rih Dil lam ka manoh daih ua, thawveng tak ka hi uh. Lamka a veng sung khawng a hiaite’n kua a vote di ua aw, chih ngaihtuahna toh hon et liam maimai di ua om kha lou ka hi mai ua hamphathuai ka sa hi.

 

A sawmkhiak a haksa mahmah a, Zokhawthar a ka naute’ nupa in Aizawl a ka om nung un nih ve tak a hong veh uhi. Kou le amau veh sawm in hun tampi ka seng ua, hilele a hithei mawk kei lai ahi. A lin leh hohtuak salou hi hetlou in sawtpi a hoh di ka postpone zawmah uh.

 

Ka nau Ginzabiak, SIB a Junior Intelligenge Officer a sem ahi a, a nupa un hon u etdan a siam mahmah uhi. Tu in ta numei thum nei in Zokhawthar ah a khawsa lel uhi. Ka nupa un a sum omlou bilbel le hi tuanlou in a va veh di ah sawt ka buai mahmah lai uhi. Huchi’n:-

 

March ni 3 a kipatkhiak a Thohtan ni a kiknawn dia ka kisak uleh March ni 3 pen lampi hoihlouh ziak a Zemabawk a kipan a Tuirial tan lampi a khak ni uh ana hi zawmah lai hi. March ni 4 in Aizawl a kipan in ka kipankhia ua, Zemabawk khaw kiang lampi nawi ah sawtpi ka tang lai uhi. Thuampui a kipan Tuirial tan lampi a se mahmah mai hi. Tuirial a kipan Seling zuan in ka tai vangvang ua, Thlawi kual pel in zekai sim in Seling ka lut uhi. Thlawikual chih a hihna ziak ahihleh BRTF-te’n Lunglei lampi a sial lai ua Seling khua lut lou a lampi sial a tup uh ahi a, hilele Seling VCP in a khua uh lampi in a tot di a deihna ziak a BRTF sap a khua ua nuthlawi omte a va kihihsak leh lampi in Seling tawn a hihziak a Thlawikual a chih uh ahi.

 

Seling a kipan in Lamka lam zotna lampi mah a kizui vengveng a, Keifang tan a suk a tou a ka tai nung un a suk-atou mah zawt in Kawlkulh a kitung hi. Kawlkulh a kipan in Manipur a gamla nawn kei. Himahleh Zokhawthar zuan di chu suahlam manawh in ka kihei vangvang mai ua, theih ngeilouhna gam zuan na-nana chu lampi a sau ei. A kikal a khua om mahmah lou phial in Khawzawl ka tung uhi. Huai a kipan nawn in Champhai ka zuan nawn ua, gamla tham tak ahi.

 

Kawlkulh a kipan in theih ngeilouhna gam zuan ka hi pen uhi. Champhai ka tun un giah ka sawm sim ua, hilele ka masot uh Zokhawthar a paisuak hoih ka sa zaw uhi. Champhai leh Zokhawthar kikal km. 28 khawng lel himahleh Sumo tuanman 100/- ahi a, dakkal khat leh a kim (1/2 hrs.) a lut maimah hi. Khua leh khua kikal a kigamla thei mahmah a, huai in a hon thawmhau sak mahmah hi. Zokhawthar a tawldam lou sim a ihmu in a zing chiang in Myanmar lam ka mitsuan uhi.

 

Zing-an nekhit in naunen sim tak in Triau lui lam ka manoh suk nainai uhi. Huai ah Land Customs Station a sem le hilou, nasem dia a goih uh khat a na om a, ken lah ka thei tuan kei. Huai a duty Inspector in a va hilh leh Sir, a hon chi thei pan hi. Inspector kiang a agenna ah ‘Midangte a let theihtheih utoh Superintendent hi dia a na koih lou ka hi’ achi hi. Triau lui gal ah zu open in ana kizuak mahmah hi. Pallel a ka om lai a beer ka dawn sekte ‘Tiger’ chihleh ‘Hayneken’ chih khawng ana om a, a lunglenhuai zawzen hi. Moreh lam a bang hetkei a, Nanphalong leh Tamu bang mai a van vuakna dawr lian bel a om hetkei hi.

 

Rih Dil en ut, chia ka gen chiang un huai a LCS omte’ migoih mah a hon sawl ua, lampi tou sim, black-topping nimnem ah ka tai tou vangvang uhi. Mual ka tung ua, a gal a kipan Rih Dil I et leh Lehkhaden a ‘tawka’ (hearts) bang mai ahi. Ka tung ua, a dil ka en ua, en bei ka hi mai uh. Kei, thukan lou chih tak in bangpi va kan di le ka thei kei hi. A dil tukdan the theih a hih mawk louhdante, vuah tampi zu lele a tui nin tuan lou, a tui khang tuan lou, chih leh tang/mual tung a hiai bang dil a om theih, chihte a lamdanna ahi pen mai. Motor boat khat a tuan theihna di a om a, tuan ka sawm tuan kei. Aziak tuh gen di ing a bei maimai di, ka chih ziak ahi.

 

Rih Dil kim ah bungalow (Bangla) bang deuh in li/nga vel a om a; Rih Dil Bar le a om hi. Hilele ka va lut khol kei hi. A letdan a dunglam 2 km. leh a vailam 1 km. vel hi’n a gen uhi. I va muh leh a mu a kihi mai a, gen tuan di a om kei hi.

 

Himahleh hiai dil in Mizote’ nidang hinkhua ah gen a nei mahmah hi. Mi a sih chiang ua a kha un Rih Dil tawn a pialgal kai uh hi’n a gingta uhi. Ei’ pi leh pute’n mi a sih chiang ua Gun gal kai uh, chih dandeuh toh a kibang hi. Nidang deuh a text book a bawl uah ‘Mizoram a dil lian ber Rih Dil ani; Burma ah a awm’ chih a zil uhi. Tuni chiang in a dil lian ber uh ‘Palak’ chi’n a gelhta uhi. Rih Dil kichi a lamdang lua ahi kei, a min thang mai ahi. Hilele a en utte’ kiang a gen hou/nep ka hi tuan kei. Tui kiching mai ahi.

 

Triau lui a kipan a Rih Dil tan a khua uh kizom kei mahleh Rih Khawdar a chi vek mai uhi. Ei pau (Tedim) leh Mizo paute a zat theih vek a, a lemtang mahmah hi. Mizoram lam bang lou hial in nek bawl a na siam mahmah uhi. Rih Dil en khin in Triau lui pang a Restaurant khat ah bawngsa hou bang teng toh a bawl uh ahia chih theihlouh ka ne ua, khing dikdek leh lim mahmah khat ahi.

 

24.02.2017 a kipankhia a Zokhawthar lut in 25& 26 tam in 27.02.2017 in Champhai ah ka giak phei uhi. February ni 28 in Champhai a kipan Aizawl zuan in ka pai uhi. Champhai ah khawlai ka pawtkhe khol kei a hilele in hoih pipi a tam mahmah hi.

Read 321 times

  • whoami
    whoami
    Friday, 17 March 2017 12:11

    March 4 a kipan khia chi a, a thugelh nanung lamah 24.02.2017 a kipan khia na bang zel ua...chih khawng kana buaipih dek mawk mawk ve. Kou le inkuanin 2012 June kha hiven, kava en tei ua...en khin hita.

Login to post comments