You are here: HomeColumnsZokhualPolitics leh a Kim-le-Kiang

Politics leh a Kim-le-Kiang

Written by  Khamkhokam Guite Published inZokhual Thursday, 16 February 2017 00:48
Politics leh a Kim-le-Kiang

Gelhtu : Khamkhokam Guite


I lak uah politics toh kisai in lungkiakna leh beidotna nasa tak om hi in kilang a; thil paidan I etchiang in huchi bang a lungkete mohsak huailou zomah hi.

 

Ahihleh, mi gam leh mi namte’n bang chi bang a politics sai ua, bang chi bang a politics tungtawng a - nation building lohchingtak nei ua; huai gahsuah ziak mah a amau minam in lalgam leh ki-uk tuamnate nei ua; a lung-gulh gam uh tung ua, ‘a place under the sun’ nei thei ahi ding uh? Alehlam ah, bangziak a minam khenkhatte politics diklou kokhuk a kia a, nam mangthang leh nam thulimlou suak in, a gam uh tanpha khahsuah ahi ding uh? Hiai atung a dotnate dawng dekta lehang, I subject uh lian law ding ahih chiang in, anuai a bang in ei toh kituak ding (indirect) dawnna I pe ding:

 

Pathian in gam enkol tak asak a, gam leng apiakte leh, lohchingtak a nation building bawl thei - democracy kivaipuakna gam a teng bokte’n, political party tungtawn in election fight uhi. A political party te un gamsung kivaihawm ding dan, khua-le-tuite etkol ding dan leh adang dang thugin/ideology nei ua; huai thugin pomtheite huai party member hi uhi. Huai party in khua leh veng teng ah Unit nei ua. Huai Unit te grassroot level political worker te hi uhi.

 

Constituency khat sung a Unit bangzah hiamte Block hi ua; Block bang zah hiamte District level in khaikhawm hi. District level bangzah hiamte State level in khaikhawm nawn hi. Huai political party organisation huchi bang a kikhai khawmtou ditdiatte’n election chiang in, a party min ua candidate te a ding in vote zong in campaign bawl zel uhi. Huan ah, candidate dingte party in teelkhia uhi. Huai political party te’n Unit level, Block level, District level leh State level te ah ‘political training’ bangleng nei zelzel uhi.

 

Eilak ah ahihleh, huchibang Political Organisation chihtham omlou a, political partyte’ ideology theipha ban leng I om kholkei uhi. Etsakna maimai ding in: Ginpu in Tuivai Constituency ah political party khat, PJB I chi ding, huai party official candidate hihtheihna ding ava-ngen hi. Tuivai Constituency ah PJB party Unit, Block etc bangmah omlou hi. Ginpu in leng “PJB party ideology ka thei a, ka gingta a, ka pom in ka kilaan thei e”, chi leng hilou lai hi. Huchi ahihleh, Pu Gin in bangziak a PJB party ticket va-ngen ahi ding? Dawnna : Election a tuhna ding sum PJB te’n ana piak uh akilam-et ziak hi maithei hi. Huai sum zang a Tuivai Constituency sung a ‘kei ka hi’ kichi deuhteng ‘kipaksak phimphem’ dia, ching mai di kichi dan hi ding hi. Huai ban a PJB te’n Ministry bang a bawl zenzen uleh, ‘kei le PJB kei sam vele’ vachih a, aguhbawk khat tuahkhiak theihna ding, chi hi maithei hi.

 

Huchi mah bang in, Etsakna dangkhat gen in I kam ka’ tale hang : Tuitha Constituency ah Thangpu in Kangrez party ticket ngen hi. Mipite’n Kangrez a theih zawngtak uh hi in, vote khiak ni chia Kangrez symbol susuk mai di uh ahi, chih a ngaihdan ahi. Huai chia, Kangrez party in election fight na dia a sum piak uleh - aman, ‘koikoi hiam a’, ‘bang chichi hiam a’, ‘bang zahzah hiam a’ sum amuhte zang a Tuithaphai a ‘pai phenphen aa gaw lenlen teng’ muuk a chikhum nuhsak ding in, ching mai di, kichi dan ahi.

 

Ahihleh, hiai atung a ‘politician’ - Ginpu leh Thangpu en mah dih: nam-le-gam vai a tel kha hia, a Constituency uleh mipite tung ah mohpuakna anei uh hia? Adiktak in, mimal business enterprise or investment hi zawlou maw! Mimal sum dawnna, gendan tuam khat in, ‘Nohchi zuak politics’! Huchi bang a MLA chingte tung a lametna lianpi leh sangpi na neih mawkpen, mawkmawk lodeuh ding mah hi! Gam leh nam a dia nna hoih sepkhiak khak zenzen uh hiam, ahihkeileh, sem dan a kilat atup ua leh leng, MLA a chin nawn zel a ut ziak uh hipen ding hi.

 

Political party I neihlouh uh a poina tampi a om ua. Etsakna ding in, Political party I neihlouh ziak un, political training om ngeilou hi. Huai ziak in, politics thei kisathou mahle hang, aphatuam ding politics : gam bawlna politics, nam bawlna politics, mipite tup kibang – lunggulh kibang delh a pankhawm dan leh adang dang meltheih kha nailou I hi, chih kilang chian hi. Political party neile hang, party in political training – party tup leh ngim, kithutuahna leh kithutuah ding dan, mi tuamtuam leh background tuamtuam neite’n tup-le-ngiim kibang neihtheih dan, solkar etkol dan chih khawng I political party in hon sinsak ding hi. Huan ah, opposition I hih chiang a I mohpuakna, ruling party I hih chiang a responsible ruling party hih theih dan leh politics bang hi a, politics in koisan hon tun ding hiam chihte kizil ding tampi petmah om hi.

 

Social media leh mun tuamtuam a eilawi houlimna leh I thuvawk dan khawng uh I muh a, I zak chiang in, I kam polawng ua unity I chihchih hang un, unity mangmat phalou leh amek-amak manphalou ngen kihi sim in kilang hi. Unity nei ding in, heutute malak ding kia hiam hilou in, kei leh nang, mi vantangte’n ‘kei mohpuak ahi’ I chih theih deuh vek ua, huai ding a I omna munchiat ua, I dinmun chiat ua I pantheih deuh vek chiang kia un unity om thei ding hi. Huanah, unity nei ding a kisinsakna leng I lak uah om ngeilou himhim hi. Facebook leh social media tuamtuamte a minlem I zat a, kuaman hon theihlouh ziak maimai a kithutuahna, kihoutheihna suse thei ding thu I post a, I thehdalh leh, lungsim tak a unity deihlou chihna, mahni mohpuakna len zoulou chihna hi ding hi.

 

Huan ah, kithutuahna I neih theihna ding in, ei mimal hiam, nambing hiam, I thikthusia leh I kim-le-kiang a unaute huphulhna chiim-mangthei (subsume) ding – ei sang a lian zaw tup-le-ngim I neih ding uh ahi hi. Nagate enle chin, tribe tuamtuamte ki-it tuah lua leh kingai lua leng hisamlou uhi. Ahihziak in, amau nambing sang a lian zaw – Naga politics in khuikhawm hi. Eilak ah leng unity I neih ding leh, huchi bang a ei nambing sang a lian zaw leh, ei nambing tup-le-ngim te sang a lian zaw tup-le-ngim in hon nawmvalh a, hon chiim-mang ding ahi hi. Huchi bang tup-le-ngim I neihlouh ziak un unity kineitheilou a, politics ah leng kilohsam hi. Huaiziak mah in, I politics uh leh I politiciante uh, sum-le-pai leh dinmun khawng a lei zoh leh khemzoh in om pahpah ua; alehlam ah, huaitan kaan politics leng kineilou mah hi. Huaiziak mah in, politics toh kisai a pawl I bawl teng uh leng – angeibok, sum bawlna khawl suak suk tawmtawm hi.

 

Ahihleh, banglohta ding? Hiai bawlhoih ding in a bul aa I kiknawn ua, I kipat thak uh ngai ding bang hi. Huai ding in, anuai a ngaihdan hong kipolut, lungsim langleihsa lou a I ngaihtuah uh deih huai I sa hi:

 

Manipur Naga te’n Nagaland akipan in political party khat, Naga Peoples’ Front (NPF) kichi lalut uhi. Tu term ah Manipur ah MLA 4 tan bangleng nei uhi. NPF in State khat, gam khat na enkolta a, tua Nagaland a ruling party hilel laileng ahi hi. Manipur Naga te’n hiai political party a laklut uh phattuam pih mahmah ding un I gingta hi. ‘Phattuampih’ I chihchiang in, Nagaland akipan sum tampi mu ding uh chihna hilou in, nation building, modern Govt etkol dan chihte leh ngaihdan hoih tuamtuam zil thei ding uh, I chih thu hi. Manipur Naga te’n NPF a laklut ma un amau tuam in political party neilou ua; congress party khawng toh ekchiang kikop maimah sam uhi!

 

Manipur a non-Naga Tribal te a ding in Political Party poimoh kholdiak a, aziak ahihleh, nam-le-gam bawl thei politics toh akigamlat luat ziak uh ahi hi. Alehlam ah, nam-le-gam bawlthei politics toh akigamlat luat ziak mah un, political party neih haksa zel hi. Ami tamzawte’n political party neih akulna theilou uhi. Manipur a non-Naga Tribal te I chih chiang in, G-Group achihte uh, Thadou-Kuki leh Paite kampau te a dominant community ahi uhi. I theihchiat mahbang un, Thadou-Kuki leh Paite kampau I chihte ‘nation building’ leh ‘modern Govt’ etkolna lampang a haamhaih leh gam-mang’ penpente ahi uhi.

 

Thadou-Kuki te utpen ahihleh khota’/khopel khat ,inn 10 leng phalou khua khat a ‘hausapa’ aa pan ahi hi. Tuni in hiai bang chiahchiah hikei mahleh, alungput un miteng uap zoulou a; a thuphung in, nation building lamsang a mahni lalna ding, mahni metna ding mah ngaipoimoh zaw uhi. Paite kampaute I chih chiang in - ‘beh kuanglui’ hiam, ‘inndongta vai’ a thil hih tit-tit hiam, nek khawm hiam tankaan a lungsim un banphalou hi. Huaiziak in, nation building leh modern Govt etkol chihte mangmat phabanlou ua(Thadou-Kuki leh Paite te’n), lung-gulh vungvung inleng nei ngeilou himhim uhi. Huaiziak mah in, nam bawlna leh gam bawlna dia, heutu a vok-khiakte uh hi in, Nam-le-gam bawlna ding a pawl kibawl khete hitaleh, degrade pahpah in, sum bawlna khawl mah suak tawmtawm uhi.

 

Ahihleh, banglohta ding? Kikup khawm ding in, anuai a ngaihdan nihte hong kilui khia hi. Hiai anuai a kipia ngaihdan nihte kia hilou, ngaihdan hoih zaw adang thei I omleh, puaklut theih gige ahi hi.

 

Hih ding dan chi nih om theite :

  • Tualtou Political Party khat bawl khiak ding ahi. Hiai ahihleh ahi ding mah hi in kilang a, ahihziak in, ataktak a semkhia a, lohching sak ding in, I pianken ua I taksap/I neihlouh teng mah kiphamoh ding hi. Huaite : gentheih poisalou a, party adia pang a, alohchin matan sempeih mihing. Huan ah, sum-le-pai hiam; dinmun hiam; ahihkeileh, huaitegel mi’n atah chiang uale khemzoh mawngmawnglouh mihing. Hichi bang mihing eilak ah I muzou diam? 
  • Hiai atung a No.1 hihlohching ding in, a ‘right stuff’ nei mihing I om ding uam, chih hih dotna poimoh tak ahi. A olsam zaw, ahihziak a I kisaktheihna(false pride) uh chillum toh valh zek ngai maithei ding ahihleh, Naga te’n Nagaland akipan NPF a laklut mahbang ua, Mizoram akipan Tualtou Party – MNF(Mizo National Front) hiam, ZNP(Zoram Nationalist Party) hiam CCPur District a laklut ding ahi hi. Party thak liklek bawlkhiak sang in, khawi pichingsa political party - MNF hiam, ZNP/MPC hiam I lak uah phut khe lehang, I damkhosuah loh ngei ding un I gingta hi. 

 

Na ngaihdan bang ahia le?

Read 545 times Last modified on Thursday, 16 February 2017 01:24
More in this category: « Lamkawi Ah
Login to post comments