You are here: HomeColumnsZokhualPolitics

Politics

Written by  Khamkhokam Guite Published inZokhual Saturday, 27 May 2017 11:57
Politics

Gelhtu: Khamkhokam Guite

 

Eilawi lak ah politics kichi thumal gentam ngailou in bang genna hi hiam chih, I thei tangpi ding un I gingta hi. Huchi kawmkawm in, politics I theihdan leh I hilhchet dan uh bel kikelki mahmah maithei ding in I um hi. Hiai ah, Politics kichi bang hi hiam chih leh a thumal hilhchian a, a pau hong kipatna akipan  suichian tum I hi kei ua; politics kichi bang hi a, eilawi in politics I meltheih dan uleh I paipih dan uh adik hiam? chihlampang sui touh tum I hi zaw hi.

 

Political scientist-te’n politics kichi a hilhchian dan uh chi khat ahihleh, “Politics ahihleh, thuneihna (power), vaihawmna (governance), gam-opkhumna toh kisai a solkar tup-le-mgim/ vaihawm dan (policy making),  thupukna bawl dan (decision making) leh thuneihna in akentel thil chi tuamtuam (power related) te kichiantak a sinna leh, huai thilte’n mipi vantang leh khotang hinkhua hon khoihkhak dan zilchetna ahi” chi uhi. A tom lam in genle hang, politics tuh social science sung a peng poimoh mahmah khat ahi, chihna ahi  hi.

 

Hiai atung a I genchet dan ua kipan kilang chian mahmah khat ahihleh, “mipi vantangte (common people/citizens)  tellou in politics  omtheilou a,  bukim boklou ahi” chihna ahi hi. Thuneihna leh vaihawmna in -  vaihawmtu leh vaihawmsak a om mipite huamtel vek hi. Huchi bang zel in, gamsung ki-ukdan leh kipi dan, kimakaihdan leh thupukna bawl akul chiang in, huchibang makaihtu/ thupukna bawltu leh makaih ding mipite a-om’ ngeingei uh a ngai chihna ahi hi. Huai ziak in, politics ah mipite’n vote khiak kia mohpuakna nei a; I telchingte uh kiang a kipan hamphatna leh deihsakna, sum-le-pai hiam leh thil dangdangte kia lamet a, buaipih khenlam ah hih ding leh mohpuakna I nei ua : huai ahihleh, politics sin a, zil a, suichianna neih a, khua-le-tui I hihna bang ua I mohpuaknate uh sepsuah ahi hi.    

 

I politics paipih dan uh ahihleh I khotang hinkhua uh limlang poimohtak ahi hi. Mipi vantangte khohei dan, aveizawng uleh, lung-gulh zawng te un gamsung politics  paipihdan  nasatak in khoih in, hei lamdang thei hi. Huchi mah bang in, politics in leng I khotang hinkhua uah khekhap nasatak bawl in; nose thei bok hi. India gam  a sahkhua ziak leh, chi-le-kuang ziak a kideidanna tungtang in India gam vaihawmna sang penpen Parliament leh, dan-le-thupiak etkolna lampang a thuneihna sang penpen neitu Supreme Court ah guu a khahdante; nam tuamtuam – chindan leh tawndan tuamtuam (cultural pluralism) khosak/teen khawm ziak a gamsung vaihawmna khek leh hih lamdang ngaisekte khawng I ngaihtuah chiang in, minam hinkhua in politics aa guu a khahdan I theithei mai uhi. I theihchiat mahbang un, inkuan sum-le-pai dinmun, innkuan ki-etkol dan, laizilna lampang a tunna chiang, media leh thildang khenkhatte’n politics I muhdan leh politics lampang toh kisai a ngaihdan I bawl dan uah thu’-nei in, hon thunun mahmah hi.

 

Huchibang tak a mipi vantang leh khotang in a ngaihpoimoh leh buaipih(social issue) thilte leh, nam zia in politics a suklamdang theih lai inleh, khovel gam tuamtuam a politics in “kilamdanna” a tut theih leh, eilawi lak ah politics in bang “kilamdanna” ahon tunta ale?

 

Social issue ziak a politics a kilamdanna leh kikhekna ahon tut ahihkeileh, I politics paidan un mipi vantangte hinkhua a kilamdanna a bawl, koi atamzaw ding? Huan ah, I lungsim paidan uh diklou bawldik (moral reformation) I ngaipoimoh masa ding uhia, ahihkeileh, I politics paidan uh diklou bawldik(system reformation)? Aziak ahihleh, khotang paidan diklou in politics I lak dan uhleh I saidan uh lungvei sak a; hubangmah in, politics diklou in leng I khotang hinkhua uleh minam zia suse thei bok hi.

 

America te political scientist khat David Easton in politics leh political system zil chetna dia model amuh khiak : Input-Output Analysis* ahihleh zilna vanzat mawltak leh theih olsam tak – politics in mipi vantangte lungsim paidan a khoihkhak dan leh mipi vantangte’n politics system( solkar leh akivaipuakdan) asuklamdang theih dan uh(input) leh political system in huai mipi vantangte deihdan lohching sak ding a vai a hawmdan leh, huai vaihawmna mipite’n ana laksawn/maituah dan ua (output) kipan a, mipi vantangte leh political system – khat leh khat kithunun tuah(check and balance)  a apaidan suina ahipen hi.

 

Hiai Easton thilmuhsuah aa poimoh mahmah khat ahihleh, ‘demand stress’ chihleh ‘support stress’ ahi hi. David Easton ngaihdan in ahihleh, mipite norna anasat luat a, solkar in huai mipite norna a lohchinsak theih keileh, solkar vaihawmna kiphubuai leh kipalbuai in,  koilam hiam in thuak in – “demand stress” bawl hi. Huai I theihsiamna ding in : kawltu hekna khawl a kawltu na thun tamluat leh, a khawl ha in ne theilou in, khawl in a thuakphah hi. Huchi mah bang a, solkar in a sepkhiak theilouh ding thil mipite’n a nak ngetluat chiang un, kivaihawmna nawngkai in, solkar baibawm sak thei hi.

 

Huchimah bang in, mipite’n solkar kivaipuakna thil a I hih ding uh leh, solkar I panpih theihna – leiman leh siah I piak ding bangte uh hoihtak a piak, dan leh thupiak hoihtak a zuih, solkar malakna a mipite I tel theihna leh I telna ding munte ua ahi ding bang a tel, solkar leh vaihawmtute zahtak ding bangtak a zahtak, chihte mipite’n I ngaihsaklouh chiang un, solkar hatlou a, political system leng nawngkaisak in – “support stress” bawl thei bok hi.

 

Hiai thil nihte, solkar leh mipite hih hatlou theite pumpelh theihna ding in solkar in mipite kipahna leh hamphatna ding a bawl dia; mipite a dinmun ua a lungkim chiang un, huai in “demand stress” leh “support stress” hihtawm in, mipite’n solkar tung ah ginna a nga-ngamta ding uhi. Huchi bang a, mipite’n solkar aa muan ngamna hon neih chiang un, khua-le-tui hoih hi ding a amohpuaknate uh hon semsuah ding ua, huai in support stress hon hihtawm in, solkar in hon hatphahta ding hi. Huchi bang in, solkar leh mipite kipanpihtuah in, malam a kalsuan ding in semkhawm theita ding uhi.

 

David Easton ngaihdan pomlou leh gensetu tamtak ommahle uh, politics leh political system velchet a, ngenteltak a zilchianna ding in hoih mahmah in I thei hi. Eilawi tenna leh khosakna gam ah ahihleh, demand stress leh support stress a nasatluat ziak in solkar a hatkei a, leiba a hau a, corruption in solkar a tum-mang’ a, thil khempeuh ahihna ding bang hiphalou in, mipi vantang in politics I muhdan uh piangsual gawp in, mipite’n gam vaihawmna toh kisai a I mohpuaknate uh sepsuah utna I nei kei uhi. Huai gahsuah ahihleh, ‘I gam un masawn theilou hi ve aw’ chih mah hi sukzel hi.

 

Mipite’n solkar a I nget leh thilphutte solkar in hih lohchinlouh a hauhluat mahmah ziak un, kum hiai zahta kitelta in, kitelna gam a teng himahle hang, makaitute leh solkar ah ginna mipite’n nga ngam nawnlou uhi. Huai hih, I gam ua solkarna na bawlte tengteng leh, makai dia telching a na omsa tengteng mohna ahi, I chilou thei kei hi. Huchih kawmkawm in, solkar hihhat ding a, khua-le-tui hoih hi ding a sep leh bawl dingte hih peihneilou mihing mipite lak ah tam mahmah hi. Huai in solkar kivaipuakna baibawmsak in, zawngkhalsak mahmah hi. Hiai ahihleh, mipi’ lampang hih khelh ahi zel hi.

 

A khaikhawmna ding in ahihleh, hiai paidan (system) diklou in  lungsim paidan (moral) a susia a; politician leh solkar nasem corrupt mahmah, solkar nna leh gamsung vaihawmna mun ‘nasepna mun’ hilou a, ‘nek muhna mun’ aa bawl a pung hulhul uhi. Hiai mipite lungsim diklou in ‘politics’ kichi negu tamtam lohchinna mun, diklou tak a gamta’, mi duhgawl leh mi duh-amte vualzawlna muhna phualpi suaksak uhi. A tom lam in genle, mipi leh heutute kisusetuah kihipen mai hi.

 

Huchi bang politics diklou khazaak nuai ah eilawi leh I gam uh a koltaanna a sawtta hi. I politics uh hoihlou leh dikloutak bawlhoih tum a kikoute thawm in leng gamdai a kikou aw tukzoulou in, tuilak a pau mah bang uhi.  Huai kia mai hilou in, hichi bang politics diklou bawlhoih tum a politics huangsung a tawmlutte leng hiai thildiklou liantak in na hip mang in, na tawpkang hileh kilawm touzel hi. Huai bawl hoih ding in, koisan akipan hiam a, kuate hiam hong pai ding hilou in, nang leh kei, mi vantangte khut ah ki-nga hi. Huai ahihleh, I vote uh zang a mipite’n palai ding  mi hoih leh, mipite leh gam-le-nam it taktakte mah I vote chingphot ua; huai a abul I pat ding uh ahi hi. Politics lungvei in solkar lungvei bawllou theilou hi.

 

[*Easton’s Model and It’s Feedback, article shared by : Nitisha]

Read 279 times
More in this category: « Sialzawi Tanglam
Login to post comments