You are here: HomeArticlesGeneralHill Area Committee (HAC) Puah phat I Na dingin: Ngaihdan Kupna

Hill Area Committee (HAC) Puah phat I Na dingin: Ngaihdan Kupna

Written by  T. Gouminlal Published inGeneral Wednesday, 15 March 2017 00:47
Hill Area Committee (HAC) Puah phat I Na dingin: Ngaihdan Kupna

By T. Gouminlal


Hun bangtang hiam paisa apan in Manipur government n iManipur singtangmite a nelh siah dan I na tangkou pih ta uhi. Tutung in naktak in hon nelhsiah dan uh muhsuah na leh khan loh na awm in I lak ki khekna thak hon piang in muh theih in awm hi. Huai khan lohna in hon muhsak cuh, I gam daan bupi nuai singtangmite hamphatna piak a awm te ahi dan bang tak ki zang thei lou cih ahi.

 

Adiak in 3 Bills hon kipass dan in nak tak in singtangmite humbit na dia dan kibawl te et kik na hon tun in HAC pen sut hat kin ngai ahih dan hon thei sak hi. Tutng election ah discussion a tam zo a dotna pai tam pen ahi phial in ka thei hi. Huai ziak in hiai HAC provision Manipur singtang mite a din bang chi bang in bol dik leng phatuam ding hiam cih I ki kum ut ahi.

 

HAC pen tu leh tu a Manipur Sintang mite a ding kiven na ding a I neih sun awm lel ahih man in hiai pen puah phat leh bawl hoih zat ding I koih uh hoih mahmah ding hi. Hiai pen a hon hat chiang in hiai tungtawn in political leh development nasep te hon hat ding hi. I demand te uh political demand I neih te uh leng hiai tungtawn in hon pai hat thei ding in gintak huai hi.

 

India in zalenna amuh tung in phualpi solkal in tribal mite bang chi vaihawm ding? Amau te India khua leh tui ah bang chi bang hamphatna leh tanvou nei sak leng, a tamzo, namdang te lak hon khosuak in a hon ding suah theih ding ua cih ngaihtuahna nei uhi. Hiai hun in ah ngaihdan thum na awm hi.

 

Khat na ah, Tribalmite India gam leh khua leh tui ah namdang te toh gawmkhawm ding-Namdang te a tamzote toh mekmat amau lak awmsak ding (Assimilation Policy), Adiak in Ghurya in hiai na tangkoupih nak mahmah hi. Amah ngaih dan in singtangmite te pen, Hindu sahkhua bultung (Lowerform/basic Hindu) zui ahi uhi huai ziakin amaute Hindu sahkhua mah a pikik vek a Hindu nuai a awmsak ding hileh, Hindu sahkhua nuai ah hon khangtou ding ua, namdang te mah bang in hon changkang ding uh cih ngaihdan ana nei hi.

 

Nihna ah, Singtangmite a tuam liauliau a, namdang mite tetoh kisukha hetlou a wmsak ding, amau te tawndan, a pu-pa’ sahkhua te uh zui a a gam leh a leitang uh kuamah to kisu kha hetlouh a tuam vilvel a koih ding cih ahi nawn hi. Hiai ngaihdan pen Isolationist te ngaih dan ahi. Hiai ngaihdan neite ngaihdan ahih leh namdang te toh hon ki chi polh le uh Identity uh leh a hihna, a Pi-Pu’ tawndan uh mangsak ding uh ahi chihna ziak ahi. Huchia singtangmite amau gam mi changkang zo ten etnop bawlna park dan phial koih ding, tribal museum a koih ding cihna hi leuleu hi.

 

Nehru in ngaihdan thumna hon po khia in ah, singtangmite pen a tuam a koih hiam, a hih kei leh Sahkhua lian zo te lak zep mang mai pen hoih lou tuaktuak ahi. Huai ziak in mau leng hun hon paitou ding a khan touh theihsamna ding in kivaihawm na dan tuam toh a hihna uh leh a Pi-Pu’ tawndan uh kem bit kawmkawm a nadangte toh India a khantouh dungjui a khantouh theih samna ding un, kivaihawmna tuam in pe ding himahleh a tuam a kivaihawmna hiam ahih kei leh I tuam koihkhiat louh a mau te namdang te toh tengkhwm mah leh kivaihawmna a tuam deuh bawlsak ngai ahih dan tangkoupih hi.

 

Huchi bang in ah singtang mite tenna gam te khen in hon awm hi, schedule area, leh tribal area in ki khen hi. Tribal Areas, 6th Schedule nuai ah kivaihawm na tuam piak in awm hi. Schedule areas, zanggam a tribal mite pen 5th Schedule nuai ah piak in awm.

 

Manipur singtang mite pen India gam a teng thou thou ding in singtangmi vangse mahmah I na hi uh hi. India kivaihawmna daan bupi in singtangmite a dinging in kihumbitna ding in singtangmite kivahawmna tuam (A Tuam a ki vaihawmna hilou) na Pia hi. Schedule areas leh Tribal areas in ki khen a Sechudel areas, under the fifth Schedule ah Tangmite pen kivaihawmna tuam Panchayatiraj extention Act nuai ah kivaihawm uhi. Tribal areas, Assam, Meghalya, Nagaland leh Mizoram te ah Sixth Schedule piak in awm a, Himah leh Manipur Sintangmite hiai te Indian constitution nuai ah awmkha lou se se hi. Himah leh Article 371 (c) na nuai ah India government in 1971 in dan na bawl a, Huai nuai ah Hill Area Committee na phut in Singtangmite kivenna ding in honna pia hi. Himah leh hiai pen, Automatic thautawi khat a kipan a kivenna ding, temta kipiak toh kibang hi.

 

Hiai pen singtangmite, Metei a tamzo ten a amau thu thu hon kaihtal louhna ding uh leh, amau deihdan kia thil a sai louhna ding ua singtangmite tawmchik ten leng Manipur daan bawlna innpi (Legislative Assembly) ah aw I suah theih sam na ding leh, singtangmite te toh kisai hoih isak te I gen theihna ding leh gam a khantouhna (Development) awm theihna ding huai nasep awm te etkai, kivaihwamna (ADC leh VA) te en kai ding cih ahi.

 

Articule 371(c) nuai ah HAC in tribal mite kihumbitna ding a a bawl himahleh, ideih bang in a hon humbit kei cih kum 45 bang HAC nuai a I kivai puak nung inleng Manipur government in a ut dandan in a hon vai hawm khum thei hi cih I tuahsa uh leh I theihsa uh ahi. Hiai kuhumbitna a poi moh mahmah hi. Hiai a HAC provision ki nak gen mahmah ta ahih man in theihsa dan in koih phot in ah. Bang ziak a hiai pen singtangmite deih bang hon humbit thei lou hiam cih leh bang chi bang in bawl thak leng singtangmite HAC in hon humbit zou zodeuh ding hiam cih ngaihtuah khawm leng cih I ut ahi.

 

Hiai HAC pen I zat det ding cih na hi kei mah leh, , a tuam a kivaihawmna 6th schedule nuai hiam ahih kei leh UT ichi hiam ahih kei leh lah State-within-State I chi hiam I muh ma un hiai pen I zat pha tuam kei uh leh thil tampi ki man suah man thei ahih man in HAC pen a kin thei lama bawl hoih a Tangmite a ding a kihumbitna belhtak a I bawl ding uh mohpuakna masa in hi ka koih hi.

 

Hiai pen a kingak detding hi kei mah leh, I khual buk pen keh lua ahih man in ah, giahbuk tung khuh dan poimoh mahmah hi. I tupna mun I tungchiang in zo I va bel nawn kei maithei . Himah leh hiai ai awmsung I belh theih kei leh vuahzu, nisa huihpi in hon nuai theigige ahih man in mangthang thei lailai ihi uhi.

 

HAC provision I neih I kisak theih pih mahmah in bang ziak singtangmite hon humbit lou hiam chih pen sut tak mahmah hi. Bangziak Manipur government in HAC taikan daan bawl gige HAC thuneihna nelhsiah a awm gige hiam I cih chiang I ziak tampi om ding hi.

 

Khat na ah HAC in HAC member te Party thuneihna a pan humbit na ding bangmah awm lou hi. India democracy pen party system a pai ahih ziak party in party member te tung ah thu neihna lian tak nei hi. Party member khat party cih louh dan apai chiang in party member pen a hih na pan topsak theih ahi ziak in. Huai ziak tak in HAC member ten ahih ding bang tak uh sep suah ngam ngei louh uh hi kha ding hi.

 

Anih na ah, Bill tung tang ah, India dan in Bill pen speaker of the house’s dicretion a koih ziak in hiai in nak tak HAC su kha hi. Bang ziak a hiam I cih leh, Money Bill pen HAC a tot ngai sese lou in Assembly ah ki introduce thei a ki pass thei hi. Speaker in Bill khenkhat Money Bill hi kei mah Money Bill bang ana pom chiang in Tribal te su kha ding hi mah leh HAC tawn lou in pai suak sak thei ahih man hiai pen bawl dik ding in hoih mahmah hi.

 

Athumna ding in ah, definition of Hill areas in in the Hill Ara Committee Act 1972 leng a definition of hill areas a diklouh ziak in tang gam sukha ding tampi te kidivert thei gige hi. Huai ziak in hiai teng bawl ding dik ding kisam in ka thei hi.

 

HAC bang chi suk hat ding?

HAC pen khenkhat te ngaih dan in provision hat tak, hoih mahmah ahi, tribal te 6th Schedule nuai a awm toh kibang I hi chi phial in ki muang mahmah hi. Himahleh hoihtak I vel chet chiang in ah, huchi bang hial hi lou in dengdel mahmah leh exploit theih gige mun awm hi. Huai mun te hoih tak I vel chet a, I bawl dik ding kisam hi. I Bawl dik ding a kisam kasak poimoh mahmah thum awm hin ka thei hi. Huai te I en suk ding.

 

A nuai a igen ding te tua mipi ai-oh a I sawl palai ten hih kin theih dan hon ngaihtuah leh ci hut huai saknalian pi awm hi. Hiaite I hih theih vek chiang in bang tan hiam vaihawmna tuam I ommasiah ki bit deuh thei ding hi.

 

Thumal zat (Hill Area)pen bawl dik ngai pah hi.
1970s ma lam in Manipur Singtangmite te toh kisai a kigen khak chiang in “Hill Tribes” (The Rule for Management of Hill Tribes 1935) cih thumal hiam ahih kei leh “ Hillpeople” (The Manipur Hill People Regulation,1947) cih thumal na kizang gige hi. Himah leh Manipur in statehoold hon muh a kipan in dan ki bawl te ah “people” cih pen hon lamang in “Hill Area” Chauh hon zang hi. Hiai pen poi mahmah ahi. Hiai thu awmzia bel, Manipur Government in Manipur a Tanggam a mite pen humbitna pia hilou in tanggam chauh humbit sawm chihna suak hi. Gendan dang hiai thumal in a gen ut pen bel, Hill Areas a chih chiang geographical areas chauh a en a huai a sung teng te rights leh mipi te leh gam pen khat in enlou in gam leh a sungtengte mipite khen kha suaku hi. Manipur government in singtang mite leh a tenna gam uh a Pu-pa’ gou leh gam ahihna pompihlou cihna suak hi.Hiai pen a definition leh thumal zat I khek meng kei uh leh, gam tampi ina khahsuahsa, geographical plain area khua awm te ML@R Act nuai ah hon kai lut lut lai ding uhi.

 

Hiai thumal leh a hilchetna khek a poi moh dan pen haih vual louh a itheih ahi.”Hill Area” Definition in hi chin gen hi. “The Hill Areas" mean the areas specified in the First Schedule of the Order. The First Schedule mentions the hill districts and sub-divisions therein created by the Government of Manipur from time to time as the Hill Areas” {The Manipur Legislative (Hill Area Committee) order, 1972}. “hill areas’ means such areas in the hill tracts of the State of Manipur as the State Government may, by notification in the official Gazette, declare to be hill areas” (The Manipur Land Revenue and Land Reform Act, 1960). Hiai bang dan Hill areas, definition kipia ahih chiang in, government in Gazette notice a suah maimai hiam a ut huhun hill areas hilou chi tribal gam khat peuh hon puan sak thei gige hi. Huchi ahih na ah I gam pen HAC leh ML & R definition leh word kizang I bawl dik phot uh ngai hi I gam a bit tatak theihna ding in ah.

 

Hiai singtang gam leh phaizang gam ahi cih khenchet na ding in government discretion chauh ah kinga ahih man in HAC in bel nang theihna tatak nei lou hi. Huai ziak in tunung chiang in government in Hill area kichi pen Tangdawn gam ken lak teng chauh ahi, tang bul mual zang teng leng plain area koih lut thei gige hi. Hiai nakpi tak I natuah sa uh ahi.

 

Huai ziak in HAC tungtawn in I gam humbitni I cih leh HAC pen Manipur Hill Tribal Area Commiittee (MHTAC) Cih hiam I khek uh a ngai hi. Adefinition ah geographical areas kia himai lou in tribal mi tenna district sung Tribal mite majority ahihna district teng Hill Tribal Area a puang ding ahi. Hiai pen, HAC provision leh a hon kibawl khiat na san toh kituak zo ding hi. Aziak pen singtangmite kihumbit na ding piak hina pi, singtangmite leh a gam uh khen cih hithei lou hi. HAC afailure na lian pen hi in ka mu hi.

 

Governor in Money Bill tungtang ah Speaker decision revoke theihna power neih ngai ding hi.
Innpi ah Bill pen chi li in kikhen tang pi, Money Bill, Financial Bills, Constitutional Amendments Bills and Ordinary Bills ahi tang pi hi. Himah leh constitutional Amendment Bill pen central govt leh Central innpi hih hitang pi. Hiai a I gen ut pen bel, Bill pen ordinary Bill ahih kei leh Money Bills? Cih tungtang confusion awm chiang in ah, Article 110(3) na in Innpi Pa’ (House Speaker) thuneihna tanvou pe liuliau ahih na ah, hiai pen singtangmite a ding a thil poi mahmah khat ahi. Singtangmite kia ahi kei India Parliament ah leng confusion na awm zezeuh hi. Etsak na ding in ah Tutung 3bills Manipur government in Money Bills are hon pass pen Article 110 (1) na nuai Money Bill definition toh kituak kei mah leh, Manipur Legislative Assembly in Money Bill chin pomsak in HAC pai pel in Bill na pass hiai uh hi. Hiai pen bawl dik theih dan ding lampi ngaihtuah ahih kei leh tunung chiang inleng hiai bang in HAC thuneih pai pel hi veve ding hi.

 

Ahih leh hiai bawl dikna ding in ah, Constitutiontional Amendment hon ngai ding hi. Hiai, Singtang miten humbit na ding toh kisai dan a tuam Article 371 (c) nuai kibawl ahih ngal leh, hiai dan hon piankhiak na san toh kituak in singtangmite a ding Bill toh kisai ah leng dan neu kha chik khek zek hon ngai hi. HAC members ten, Assembly a Bill ki introduce pen, Speaker in Money Bill in pom mah leh, HAC MLA ten singtang gam sukha bill hih a nak a, Money Bill toh kisai khak na nei lou hi a theih ua, Manipur Innpi pa thutan na a ginglelhna (doubt) a neih uh leh, governor ah a thu tut theh na ding mechanism khat a neih poimoh hi.

 

Hiai a poimohna ziak ahih leh, speaker of the house pen formerly member of the ruling party ahi. Speaker ahih akipan in ah party member ahih na a bei cih himah leh party influence om thoug thou hi.Etsakna ding in ah, tua nai zek Bill pass nah un a Manipur Legislative Assembly Speaker in in favor of the party in Bill Money Bill in nap om hi. Speaker bias Uttarakhand government case ah leng muh theh hi.Bill toh kisal himhim ah, Speaker in final decision nei a, huai speaker decision pen not subject to judicial review ahih ziak in hiai pen thil poimoh mah mah khat ahi.

 

Manipur context ah enta leng, Manipur Legislative member kha 40 te plain meitiei community apan ahi ua, Singtang miten speaker hihna hiam ahih kei huai lak ah power influence nei lou a community tamzo thu neihna hi gige ahihman in, speaker leng community pressure influence a gamtat hun tampi awm ding hi. Huchia, community khat favor Bill a hon accept chiang in singtang mite a ding huai problem address na ding mechanism awm kei leh, singtang mite humbit in awm tuan kei ding hi.

 

Huai ziak in government in Manipur singtangmite humbit tatak ding acih leh, Innpi pa ginlel a awm hun ah (in matter related to tribal rights and its protection), governor in huai bill velchiang in Money Bill ahih leh hih louh khenchiang ding in thuneih neihsak hoih mahmah ding hi.

 

Aziak pen, tribal wellbeing and protection of tribal in the schedule areas and Tribal is to the president ahi huai ai oh a wm governor ahih man in, Innpi a a tamzo ten a mau deihdan a singtangmite a tal kaihlouhna ding in hiai Bill tungtang ah confussion leh ginglel na awm ngeingei leh governor in thupuk na lak ding cih HAC dan nuai ah koih tel theih hileh HAC pen hat tuam mahmah ding hi.

 

Hiai a I gen te parliamentary Act ahih ziak in thil baihlam hon hi khollou ding hi. Hitamah leh hiai bang hih theih na ding rights I neih pen I representative ten hoihtak a lampi hon gel uh leh thil hi theilou ding a awm kei hi. Tu in BJP government state ah ahi, huai ah eilak ah leng pan mun poimoh len thei ding awm ahih banah, BJP in Rajya Sabha ah number hon ki khek ding ahih na BJP te a ding in daan pass pen hon nuam tuam mahmah ta ding ahih na ah. Hiai hun political lobby hoihtak central level neih ahih leh Bill pen introduce haksa low ding in up huai lou hi.

 

HAC member te Party thuneihna a pan humbitna poimoh nawnhi.
India Partliament in, 1952 in Party khat in a party member te a thunun theihna ding dan “Anti-Defection Law 1952 na pass uhi 2003 in Amendment na bawl uhi. Hiai awm ziak ahih leh, party member khat innpi a Bill a kilui khiak chiang in party deihna bang lou a vote in party zuausan sek hi a diak in 1950 lak in Rajiv Gandhi hun lai congress party member te naktak in horse trading leh floor crossing problem na nei uhi. Hiai ziak in party member khat in party kalh a gam tat leh party in huai mi pa hiam huai mi nu hiam pai khe thei, a paihkhiat chiang in a hih na teng tawpsak thei vek hi. Hiai bang ki thununna pen in HAC provision nak tak in su dau kha hi.

 

Ahih leh hiai pen bang chi bang deal ding cih I et ngai nawn hi. Hiai pen Parliament Ordinary Act 1952 kipass ahi 2003 in Amenment na kibawl nawn hi. Hiai tungtang ah leng naktak in debate awm ta hi. Free speech leh liberty sukha ahih ban ah representative member khat pen accountable to the people who elect and to the house a ahihna sukha hi. Himah leh hiai in party member khat naktak accountable to the party dan koih in gakna leh gawtna pe thei hi. Huchi bang ahih chiang in a diak in Manipur Singtang mite I MLA te uh in inn pi ah member hih na nihnei khat hon suak hi. Khat na Legislators to the Manipur Assembly hi ua, huai banah, HAC member hi uh ahi.

 

Hiai omzia bel, Singtangmi MLA ten moh puak na nih nei uhi. Abik tak in Singtangmite lak ah political party a vek singtangmite huam khin vek tutadih in awm nailou in, Singtangmite party tuamtuam ah kitheh dalh uhi. Huaiziak in singtangmite dominimant party khat nuai ah with majority of the valley community awm gige uhi. Adiak in National party ah singtangmite pen minority higige ahihman in leh government khat peuh ah singtang mite minority withing the party hon gige den sim ahih ahih ziak thil buai huai pi awm thei.

 

Hiai ah amau party a minority ruling party in hiai HAC member te pen WHIP under Anti-defection law with respect to the interest of the tribal or any bills or legislative work or executive order te pen hangsan tak leh singtangmite humbitna ding a voice uh a suah theih na ding in huai Party WHIP in a a huap khak louh ding ahi. Himah leh amau mimal interest a, ministerial berth offer delhziak hiam ahih kei leh amau mimal interst ah party against a gam tat leh bel hiai pen zat theih di cih dan daan khat I puak khiat uh poi moh mahmahding hi.

 

Tu in BJP government nuai ah I hon awm ding ua, government ah majorigty phaizang mite mah hon ding uhi. Huai ah phaizang mite interest a daan hon hon kibawl te singtangmite a party sung mah a awm ten a din mun leh hih na man suah ding lau hetlou a pan a lak theihna ding uh pan mun I khoh uh ngai hi.

 

Huai ziak in, Anti-dfection Law Amentment kin thei lam bawl dia proposal piak a, exceptional clause, guanlut a huai ah Singtmite MLA ten singtangmite interest leh rights sukha thei tengteng ah party deihna anial kal thei ding cih leh, mimal punna deih na party a nial kalh theihlouh ding uh ahih dan pen gelh lut ding ahi.

 

Hiai te gel mohpuak na hoihtak a septheih na dingin un ah lauh thawngna bang mah nei hetlou singtang mite leh singtang gam toh kisai a na a septheih na ding un ah Anti-Defection Law a kipan in certain immunity provisions a neih uh poimoh mahmah ding hi. Manipur singtang mite leh singtang gam toh kisai kha bill khat pepeuh a hut na ziak in Party in HAC member khat Party WHIP a pe thei kei ding cih dan a awm kei leh party leader te lauhna ziak in hiai na sep office poimoh tak sem ngam lou leh sep khiat theilouh or spena ding dal in awm thei gige hi. HAC provision leh Schedule matters kipia toh kisai a moh puakna a sep khiat theihna ding in hiai dan nuai kipan party in kan khak louh ding ahi.

 

Thukupna leh thukhitna

2017 Manipur Legislative Assembly a government form penpen singtang mite a ding in hun lem leh hun hoih in ka mu hi. BJP in coalition government hon form dek ahih man in hiai in opportunity hoihtak hon pia in ka thei hi. Aziak ahih leh, BJP in 21 members chauh nei a, adangte panpihna ziak in simple majority 32 mu hamham hi. Hiai bang magic number pen a retain theih na ding un singtang mite ten bargain power hoihtak kinei hi. Singtang mi MLA te pen hon crucial mahmah ding ahih na ah. I issue uh hoihtak in frame in I table I koih theih leh hiai hun pen hun hoih hon suak leh lam ding hi.

 

Huai ziak in HAC a “Hill Area” definition toh kisai ah, singtang miten kituak tak in ah pangkhawm in, hiai pen I common interest ahi. Minimum common interest, singtangmite teng teng hamphat na ding a kibulphuhna ahih ziak in hiai definition khek ding a bill introduce teitiei uh poi moh hi. Hiai hun ah I zoh kei leh single party majority hun ah ki hih zoulou ding hi. Huai ziak in tu term ah hiai pen puak suah, BJP government pressure hah tak piak a pass pih theihna lampi awm ding in gintak huai kasa hi. Aziak singtangmite MLA tellou in BJP government tu lel dinmun et in dingzoulou ding ahih ziak in. Hiai pen hun hoih tak ahi a singtangmiten I khah suahlouh uh hoih ding hi.

 

Adang te Money bill tungtang leh Anti-defection law tungtang ah, Parliamentary Act ahih ziak in baihlam lolou ding hi. Parliament I zoh louh tawp a leng Suprement court a PIL khiak huchia tribal te humbit na ding kipia provision tuamtuam Indian constitution in piak te toh kizoi tawn ahih dan chiangtak arugument Ipiak uh hon ngai ding ahi. Huchi supreme court in Indian constitution a provision kipia te kalh kha ahi cih hon convince chiang in hiai Money Bill leh Anti-Defection law pen parliament I zoh kei leleng, supreme court pansan sual a zohtheih na lam pi awm mahmah ding in lamet huai hi.

 

Atawpna pen ding in ah, hiai pen in singtangmite kivaihawm na tuam I neih ma ua ding a poi moh mahmah thil te ahi. Hiai pen I muh zo chaing khol ding cihna hilou hi. Kivaihawmna tuam pen chikchiang a mu ding chih I thei kei. Huai ziak in hiai pen leng, parallel work a pai, separate Administration demand leng a pai ton ding ahi. Huchi hileh, kun khat I loh sap le leng, lang khat ah tribal mite a ding a ku humbit na hoih zo mu veve ding hi cihna ziak ahi.

 

Hiai ah arugument awm thei tamlou I theihte bel, Indian Consitution in privilege I chi diam tribal te humbitna ding in dan tuamtuam ah safeguards tuamtuam hon pia hi.

 

  • Educational and Cultural Rights (Articles 15(4), 29, 46 and 350.)
  • Social Rights (Articles 23 and 24)
  • Economic Rights (Articles 244 and 275)
  • Political Rights (Articles 164(1), 243, 330, 334 and 371.)
  • Employment Rights (Articles 15(4), 16(4) and 16(4A).)

 

Hiai a kipia te hoih tak kebit leh, singtangmiten I zalzoh theihna ding in ah, Insitutional mechanism poi moh mahmah hi. Hiai a kipia te teng hoihtak etkai leh sepsuah ahih theihna ding in HAC tu leh tu a ding in HAC provision suk hat a huai member ten lauh nei lou leh hoihtak na a na a sep theihna ding un India daan toh kituak ahih man in court ah argument hoihtak piak theih nak leh lampi awm ding hi.Hiai ziak in hiaite sepsuah ahih theih na ding in 6th Schedule hiam, UT hiam poi moh mah I ngen uhi. Huai te I muh ma I bawl hoih tuak uh hiai HAC pen ahi.

 

Hiaip en thu khentatsa leh a dikpen cihna ziak ki gelh hilou in, ngaihdan tuamtuam hon pian theih khak leh chia gelh ahia, hiai tungtang ngaih dan nei ten kikup a a sang zaw leh hoih zo tribal mite rights humbit na ding, a kin zo a I bawl meng uh kisam ahi cihna ziak hiaiteng kon gen ahi. Ngaihdan kukup ki lak tuah a huchi I palai te uh tosawn siam leng lohching na baihlam ding hi.

Read 499 times
Login to post comments