You are here: HomeArticlesGeneralTuunnu Ngaih Ana E!

Tuunnu Ngaih Ana E!

Written by  ZM Tonsing Published inGeneral Saturday, 13 May 2017 00:50
Tuunnu Ngaih Ana E!

~ ZM Tonsing

 

"Hon pawt sansan ke'n la ka kiang ah hong om maimai ve Mang" chi a ka Nu'n ahon genlai in ka thupi ngaihkei. Ama kiang a om sang in kholak pawt a, lawm-le-vualte toh kithuah a hunzat ka telzaw. Himahleh, tuchiang in huai ka Nu hon thugen ka lungtang ah amang theikei a, ka piching deuhdeuh leh a ging ngaih deuhdeuh zaw mah hi.

 

Naupang chik ka hihlai a ka Nu'n hiai khovel gimthuakna paisan a, a tangtawn mun di hon zotsan himahleh ka tung a ka Nu a khasiat khakna khawng om khak di ka lau. Ahun nanung, damlou lupna ngak a a om lai a bang dia ana huchi ngaihnat louhtel ka hia? Pawtkhe lou a, ama kiang a om maimai dia ahon zotlai a ngaihsaklou a, ka pawt mangsan nilouh lainite ka ngaihtuah kiik chiang in ka Nu tung ah ka kisuanglah petmah hi.

 

Kiphatna hilou in lai ka siamthei vanglak hi. Mi khenkhat bang a laisim thanuam leh kuhkal hikei mahle'ng examna result a suah chiang in all in all topper ahihkeileh section topper chihkhawng ah ka pang sek hi. Ka lohchinna hon kipahpih in ka Nu'n ama hihtheihtawk chi’n ahon kipahpih latsakna'n a nungzang ah ahon paw gaigai zel hi. Section Topper, All in all topper banah ah sport a lawmman tuamtuam ka khut a tawisenglouh ka laklai a ka Nu' biang a kipahna khitui luangkhia ka muh ka mitkha ah a mang ngeikei di.

 

Huaiziakin, tutan a lohchinna khawng ka neih chiang in ka Nu damlai hileh chihkia ka lungsim ah om in, ka kipahna tuh hunlui hon phawksaktu lel ahi zaw ta hi. Midang in hon kipahpihlou chihna hikei mahleh ka Nu hon kipahpih dan leh midang hon kipahpih dan kibang lou a; ka Nu kipahdan leh midang kipahdan le kibanglou hi. Tuamah bang in, ka Nu damlai a ka kipahdan leh tuhun a ka kipahdan leng kibang tuanlou hi.

 

Ahun sawt a puakdan siam di khawng kisa-sim mahle huai naksang in Nu poimohna, a manphatna uh kitheisuah dedeuh hi. Nithak-hunthak te'n hunlui ngaihna puanbang thaksak semsem a; zing nisuak et-lawm tak tuh ka Nu ngaihna puangsaktu lel ahi. Ka heisuk-heitouh a ka thiltuahte apaisa ka Nu hon phawksaktu lel ahizaw ta uhi. Muntuam-gamtuam ah ka om a, lawm-le-vualte'n a thiltuah uh leh ahunzat dante uh anu te uh kiang ah gen in, anuam leh haksa ah kikum khawm mahle uh ke'n kikuppih di Nu ka neikei!

 

Ka Nu toh hiai leitung a Kum 10 hiamlel hun zangkhawm kha himahle ung, zuih dia kilawm khekhap tampi ahon nutsiat hi. Huai ahon nutsiat khekhapte pial mangsanlou a, zui hile'ng ka damsung a salam leh khalam a ka lampi tanvaktu di'n ahun tawk mahmah di. Lai ka sim di chiang a thumna hon neihpih a, ka laisim sungteng ka zul a Bible simkawm a hon tutpih gige ka Nu ahi. Lai ka sim zohchiang a eipau a laigelh didan hon zilsak ngitnget leng ka Nu mah ahi.

 

Hatlou sasa in innkuan maitam ahon neihpih a, ahihtheih dandan a thu gen in leh Bible sim in thumna ahon neihpih zel hi. Kikhop taima mahmah ahihziak in huaimah tuh ka kikhop chiang a biakinn a ka Nu hon phawksaktu ahi. Huanah, om danhoih leh khohei-gamtat kilawm chihte ahon zilsak a, mitoh kimuhchiang a taklam khut a kichibai di chihte ahon hilh hi. Naupang chik, vei leh tak le theikhen nailou ka hihziak in, mi ka chibai di chiang in ka Nu kiang ah ka taklam khut ka va dongzel hi. Huaituh tunitan a mi toh ka kichibai hun a ka Nu hon phawksaktu ahi gige lai hi.

 

Mi tamtak nute toh hunnuam zang a, thu-le-la a kikupkhawm dialdial lai un ke'n hun tomchik ka Nu toh ka zatkhop laite uh ka gen a ngai maimah hi. Min Nute' Ni a, a nute uh itna leh ngaihna latsakna a thilpiak hoih pipi pia a, a nute uh damsawtna dia vualzawlna a ngetsak lai un "hon dampih laisam hile chinzaw maw Nu..." chihlouh kan gen di ka neikei. Thilteng ah hunlui sut a, "Ka Nu damlai a..." chih a ngai maimah hi. Huanah, na Nu kua a, amin bang a, bangsem ahia chihte khawng dotna houchik bang mahleh a dawng haksa mahmah a, lungsim-ngaihtuahna a paisau sak thei petmah hi.

 

Inn ka pai a ka Nu' mel mu di kisa sek mahle'ng ka Nu' mel muh di a om kei. Nu nang tellou a i inn sung hawmlua eive, hongpai ta ve, na tate nang omlou a khosa dia hon muang na hiam chi'n kap in kikou mahle'ng a hon dawng di ka Nu a om nawnkei! Inkuan kikhopna na hon neihpih lai nite, ka laisim lai a n'ong tutpih lai hunte, zingkal thohhun chi'a n'ong phawng lai nite ka ngai ngei e. Om dan hoih leh zuih dia kilawm lampite hon zilsak laive, hunsata na hiam? Zing khua vak diing buh-al khuangta, mi nute zingkal thou sauhsauh uh eive... Nu nangle thousam lou di na hiam?? Bang dia kei Nu thousamlou ahia!? Heina peuh i sulnung hitel a maw!

 

Hichih dilam theile'ng damlou lupna ngak a na om lai a hon pawt sansan lou di hi ing a. Nang zaw huaitan ana musuak hi chin a maw, ka na hailua kha a eive - hon ngaidam in aw Nu? Nu, k'on ngai, k'on poimoh, nang toh anuam-haksa a hun zatkhawm ka utlai ngei mai. Na thuhilhna, n'on lamlahna ka poimoh lai. Na pina tellou a hiai leitung haksatna bang chi palsuah di ka tel a! Hon muang baihna telchia maw, Nu. Nang toh kholhkhawm chim nailou keive, chimlou. Ka lawmte'n a kipah leh a haksatnate uh a nute kiang a gen uh eive, ke'n kua kia gen di ka hia? Ka kipah, lunggim leh mangbatnate hon ngaihkhiat saklai ve maw Nu...

 

Bangteng hileh Pathian' lemgel mihing' nanvual hilou ahihman in puakdan siam kizil mailouh a dang om tuanlou hi. Huanah, Nu khenkhat inkuan sung leh tate a diing a zuih dia kilawm lamlaktu leh hehnemtu hih naksang a lunggimna leh puakgik tuntu ahihlai ua hichibang Nu hoih leh manpha ka na neihkhak hampha ka kisa. Hun tomchik sunglel ka Nu' khazak nuai a khosa leh hun zangkha himahle'ng ka kipak a, hampha ka kisa veve. Banah, sawt hon dampih hileleng ka Nu a dia puakgik leh lungkham-mangbatna tuntu lel hikha thei ka hihna ah hun tomchik sung ahoih leh manpha pen a ka zatkhak manpha zaw hi.

 

Ahi a, a damlai Nu neite'n hampha na hihdan uh mangngilh lou a, nute it leh hawmthoh tak a kep a, suk khasiat louh pen tunung chiang a na kipahna mahmah hi zaw kha diing hi. A hon omlouh sannung in kisiik in kapkap le chin le a phatuam nawn kei diing. Huai banah, mi tamtak nute kiang a kipahthu genna di nasan neilou leh theilou, nu' itna himhim ana chiam khalou, a suangtu Nu nasan leng theilou leh mukhalou, kua ta ka hia chihleng theilou tamtak om ahihdan ngaihtuah lechin hampha na hihlam na kiphawk di. Huaiziakin, 'Nu' chih di nei a, hon dampihlai ahih zawkmah leh hampha kisa inla, ahunlai in kem in leh, a ngah diing ua kilawm pahtawina pia in. Kum khat a khatvei - Nute' Ni kia ah hilou, hunteng in.

 

Keileng naupang chik, sia-le-pha leng theikhen taktak thei nailou ka hihlai a ka Nu’n hon omlouhsan himahleh ahon itna ka theihsiamlouh ziak in kisuanlahna ngen in ka pumdim a, kisiamtanna di himhim ka mukei. Hunlui mualliamsa-te samkiik thei hile'ng ka Nu kiang ah ngaihdam ka ngen ut. Tu'n lah bangmah ka hihtheih a om nawnkei a, thilteng zaw kikhel ahi maive! Ka kisik himahleh hihtheih ka nei nawnkei. Thil ka theisiam deuhdeuh a, ka kisiikna di ka mu tam deuhdeuh lai hi.

 

Tuisik a kipan ittak leh hawmthoh tak a hon kem a, hon khoiliantu Nute itlou leh ngailou omlou ding hi. Midangte’ itna sangmah in le nute itna lianzaw hi. Ke'n leng kum bangzah hiam paita a kipan kum khat a nihvei - ka Nu hon omlouhsan ni leh Nute' ni in ahon paisansa ka Nu ka itna leh ngaihna thute ana gelhsek mahle'ng tunitan in gelhzoh chih om theilou a, gelh leng kigelh senglou himhim diing hi.

 

Nu, na leenna Thangvan sangpan na nutsiat na angkawi ka Zuapa leh na vondeihte a di'n thu honna ngetsaklai in aw. Hiai simlei gentheihna tuangnung siah a, laukha' inn lam zuan a khaubang k'ong chiah chiang un kipahna bukim toh honna dawn in aw. Tua Thangvan, nat-le-sat, gibang kikhen om nawnlouhna Gamnuam ah nunnuam sawlbang hei in tutkhawl tawntungta ni.

 

120617

 

Read 189 times
Login to post comments