You are here: HomeArticlesInterviewHoulimna: H Pauzalal - “Lohsapna pen lohchinna sang a paltam zawk ding ahi”

Houlimna: H Pauzalal - “Lohsapna pen lohchinna sang a paltam zawk ding ahi”

Written by  Mung Ngaihte Published inInterview Saturday, 09 May 2015 02:24

Tulai a Lamka khovel tokliing mahmah, MDC election ahi. Hiai adia Ngazam bial apan candidate H Pauzalal, LamkaHuihkhi Bureau leh ZOGAMonline in houlim pihna kinei a, aman a tup, a ngiim leh i dinmun a muhdan tampi gen. H. Pauzalal ahihleh khotang leh gamvai adia ana kizang gige ahi a, tu in tanu 2 leh tapa 3 nei in, a zi toh a innkuan un Dorcas Veng, New Lamka ah khosa lel uhi. Siamna lam ah BA (Political Science) zou a, Phaitong khosuak ahi. Ngazam bial in a huamkhak ahihleh Bukpi, Hanship, Bungpilawn, Dialkhai, Mualpheng, Palkhuang, Sumtuk, Aibulon, Khazang, Phaitong leh Sinzawl ahi.

 


 

* * *
LHB: LamkaHuihkhi Bureau
ZOL: ZogamOnline
* * *


LHB & ZOL: Na hinkhua thu tomchik hon gen ve. Lohchinna leh sepkhiak nana neihte bang.
PZL: Ka hin khua ah gen ding tampi ka nei kei. Lohchinna sang in lohsapna tuak tam zaw in ka kithei. Ahihhang in Pathian' ompihna toh hehpihna ziak a khatvei tei lohchinna a hon tut ka lam-et gige ahi.

 

LHB & ZOL: MDC na tuh dek na ziak n'on gen thei diam? Na tup leh ngim.
PZL: Nam nna sepna a ka tung a siamzawte' nung ka na zuihna apan chouna thupi tak a om a, eilawi a ding a vaihawmna niam pen (MDC) apan i nam (Zomi) heutute dong kawmkawm a, i mi, i sate a dia panpihtu hih ding ka tup leh ngiim ahi gige.

 

LHB & ZOL: Bangziak a Ngazam bial a a tuhsawm na hia? Ngazam mipite' dinmun - khosak leh nekzonna bang ahia? A haksatna uh bang ahia? Amau adia na hihsawmte bangbang a?
PZL: Ngazam bial ka khanletna ahi a, i nam adia unit leh block level a leadership ka na tan patna bial ahihziak in, ka ngaina a, ka awlmoh a, tua bial a MDC tuh ana sawm gige mah ka hi.

 

LHB & ZOL: Ngazam mipite' dinmun na muhdan, leh a haksatna uh bang ahi dia? Amau adia na hihsawmte bangbang a?
PZL: Nek zonna leh khosakna lam ah i zoudawn a din a khangkang pawl tak ahi diam ka chi sim. Development fund ahi ding bangtak lut thei hileh mipite haksatna (nekzonna leh khosakna) ah a dawn zang tuan mahmah ding.

 


LHB & ZOL: Zoudawn taisan a Lamka a i pemlut souhsouh uh a hoihpen hin na thei hia?
PZL: I zoudawn taisan a Lamka i deih sosouh uh zaw a hoih pen hi in thei kei mah ing.

 

LHB & ZOL: Bangchi leh hiai pemkhiatna thupi i daal in, i veng thei dia?
PZL: Bubit tak a i teen theihna ding un mimal in pan a la zoukei dia. Pankhawmna mah poimoh in ka thei.

 

LHB & ZOL: Ching din na kilam-en hia?
PZL: Bial mipite' hehpihna ziak a lohchinna ka tan ka kilam-en mahmah.

 

LHB & ZOL: Bangziak a Independent a din sawm?
PZL: I nam issue gen theihna platform hoih pen a ka theih ziak in ahi.

 

LHB & ZOL: Khotang leh gam-le-nam adia nana kizatna te - PTC, COPTAM, JAC for Khuga Dam chih khawng leh adang tampi apan, i gam le nam adia issue poimoh nasak, leh na vei pen bang ahi dia?
PZL: Platform tuamtuam a nam nna ka na sep touhna ah nam issue awlmoh huai tampi ka na pal kha a, Manipur singtamite a dia kivaihawmna tuam (separate administration mahmah poimoh pen hi in ka thei.

 

LHB & ZOL: Tulel a MDC ten Sixth Schedule hon ngetna uleh Churchachandpur pen Lamka a khek ding toh kisai a resolution a hon lak uh, bang ngaihdan na nei a? Nang bang MDC a telching hong hilechin hiaite toh kisai in bang panlak na sawm a?
PZL: MDC te panlakna hoih kasa, ahihhang in ka demna bel hilou in kipan hak lua uh ka sa. Lohchin matan kuhkaltak a pan touh ka tup ahi gige.

 

LHB & ZOL: Tua ADC Act nuai a MDC te power hoih huntawk in na thei hia? Bangbang power piakbeh in omleh lunggulh huai nasa a? Hiai din bangchi panlak hoih nasa a?
PZL: Power bel a hoih huntawk kei, a thu a gen lel hilou in status khat a i om theihna ding in pangrual le ka ut mahmah, bang pen chih pen zaw gen thei tuan khang. Nam heutute demandte mah ahoih pen din ka gingta. Tuate a lohchin theihna dia a khuampi khat a pan ka tup ahi gige.

 

LHB & ZOL: Khuga Dam toh kisai, bang pentak ahia na phuut uh? Tuma a Delhi a Minister leh Ministry official tuamtuam te na hong muh uh bang a chi ta?
PZL: Khuga Dam hamphatpih leng chih ahi pen mai, ka deih pen. Delhi level a Manipur leh Ministry tuamtuam a ka tai nate uh a progress mahmah.

 

LHB & ZOL: Manipur solkal in i gam a New Land Use Policy (NLUP) zat ding achih pen bang chi na sa?
PZL: NLUP policy bel hoih ka sa. Ahihhang in tu leh tu a zat hileh a hoih diam, chih thu ahi in ka thei. “I gam” i chih theih ding om phot leh maw.

 

LHB & ZOL: I gam sung ah natural resource leh minerals om din na gingta hia? Oil om ahi chih khawng hong kigen man a, hiai toh kisai a exploration bangtan a tungta deh aw?
PZL: Natural Resources leh minerals i gam ah tamkhop om din ka gingta. ZHRF te' panlakna ahi a, ka kipahpih mahmah. A panlakna ziak uh a diam gen in a om nawnkei. Amau toh pangkhawm a a panlakna uh support ka sawm gige.

 

LHB & ZOL: I gam keu gawp, sing-le-lou tawm gawp toh kisai bang panlak hoih nasa? MDC ten hiai environment lam toh kisai in bangbang sem thei ding un na koih a?
PZL: Kikhual in i gam ah teng le i gam a keu din ka ging kei. MDC ten hiai environment lam ah septheih leh pan lak theihna lampi tamtak om din ka gingta hi, i lung a lut nak leh.

 

LHB & ZOL: Hiaitan i society/politics a na kipeina ah nop na sakna pen, kipahna pen leh hon thathousak pen bang ahi dia? Ahihkeh, hon lungkesak pen leh haksa na sakpen bang.
PZL: Lunglut tak a i mi i sate a dia kalsuan nuam ka sa a, khat leh nih in, “Hih hoih mahmah chia, heutupa,” chi kawm a a hon chibai lel tak un leng kipahna, thathohna hon pe mahmah in ka thei. Hon lungke sak pen ka chih di om kei. Lohsapna pen lohchinna sang a paltam zawk ding mah a ka ngaih ziak in. 

Read 2087 times Last modified on Saturday, 09 May 2015 02:32
Login to post comments