You are here: HomeArticlesInterviewHoulimna: K. Chinkhansuan, MDC Candidate New Lamka West

Houlimna: K. Chinkhansuan, MDC Candidate New Lamka West

Written by  Mung Ngaihte Published inInterview Wednesday, 27 May 2015 13:10
Houlimna: K. Chinkhansuan, MDC Candidate New Lamka West

Muana Ngaihte in ana sak, leh tulai a hong kisa khe thak nawn, 'Zogam Government' laa in, gam-le-nam ngaina tamtakte' lung khoih hi. Hiai laa phuahtu, Pu K Chinkhansuan ahihleh, i gam, i nam leh khotang a diing a nna tamtak ana seem a, pan ana la gige khat ahi. Unau melhaih hun makuam lak veel a, Lamka tual a tanchinbu te a pawlpi min a thusuah a hon bawlkhiat te' khamuan-huai dan, mangngilh theihvual hilou hi.

 

ZRO, PTC, YPA chih te ah dinmun poimoh taktak leen in ana kihel a, i laipau adia a thilhih thupi pen ahihleh 1994-1997 sung teng, eimite adia magazine manpha mahmah Zogam Tangkou ah Joint Editor in ana pang hi.

 

Tu in, New Lamka West District Council Constituency apan independent candidate in hong ding a, ama' tanchin leh a ngaihtuahna te theihkhiat seemna din, LamkaHuihkhi leh ZOGAMonline in amah houlimpihna kinei hi.

 

Houlimna apan eukhiat hiai bang in ...

 

* * *
[LamkaHuihkhi = LH | ZOGAMonline = ZOL | K. Chinkhansuan = KCKS]
* * *

 

LH & ZOL : Pu Suan, tua i neih diing MDC election a New Lamka West Constituency apan na tuh diing toh kisai in LamkaHuihkhi leh Zogamonline min in houlim khawm le'ng chi kei ve ua.
KCKS : Awle, houlim i hihtheih lam ahi. Kipahhuai e!

 


LH & ZOL : Na hinkhua thu tomchik hon gen ve. Lohchinna leh nasepkhiat hoihtak naneihte bang le.
KCKS : Ka khotheih nung ka theihdan in khua 7 (sagih) ah ka na tengkha ua, Behiang (T) kichi, nidang a Sialsih khua ah ka khanglian hi. Huai hunlai in Mission Compound ah Mission Support in School ka kai a. Ka neulai in Behiang khogal a Burma gamgi luibul a suangnou kikoihkhawmna, mun poimohtak ah ka hohkha a, huai ah thumna ka va nei ngei a, minam khat gamnih a khenzak a na omte, gamkhat a gawm ding thupi a nei in ka thum hi. Huai khawng apan le Politics lunglut a na hikhin ding ka hi.

 

New Lamka ah 1985 kumbul in ka teng ua, private a sem kawmkawm in saptuam nasepna tanvou tamtak ka lenkha a, pichin deuhdeuh dungzui in simlei vai (politics) ah ka hun neihte ka na zang hi. Gam-le-nam nasepna i chih phaktawp neilou nasep ahi a, kipahman mawk mai a muhzoh ahi kei hi. Mipi’ nasep i chih Pathian’ nasep dan a ngai in ka hai kuhkal thei mahmah hi.

 

LH & ZOL :  MDC na tuh-naziakte leh tup-le-ngimte n'on gen thei diam? I mi i sate a di'n bang na hihsawm a? Na plan leh policies hon gen ve.
KCKS : I bialsung a i mi i sate adia kihihsawm, tup leh ngim a kineite ahihleh:

 

1. I nam, i gam leh khotang a dia thil omsa, omtou zel dia deih; ana kisetate puah phat a kepbit ding.
2. Sianthouna leh damtheihna a dia poimoh penpen 'tuineek' ngaih poimoh pen a neih a, a poimoh bang a sepsuah ding.
3. Philanthropic organization leh Siamsin naupang khang hong paitou dingte’ khantouh na dia, issue omte peuhmah poimoh pen a ngaih ding.
4. Khotaang khantouhna ding a development scheme omte diktat taka paipih a, khan touhna ding a Fund laklut theihna lampi omteng a laklut a khotang puah ding.
5. I gam leh i nam makaite deihna bang a 'issue' omte peuhmah a lohchinna dia theihtawp suah a paipih ding.

 

LH & ZOL :  Bangziak a New Lamka West Constituency pentak a tuhsawm na hia?
KCKS :  Kum sawmthum val ka na tenna New Lamka huapkhak bial ka it tungtuan ziak ahi.

 

LH & ZOL : Hiai bial apan incumbent Mangchinkhup ban ah social worker CT Lian bang leng a hattuak mahmah ua. Amaute sang a bangziak a mipi'n nang hon telzawkna di uh point bangzah hiam n'on genthei diam?
KCKS : Candidate hat mahmah a na theihte uh net leh huihkhua ah a lum vengvung mah uhi. Kei ka hihleh bel tualsung a gikna nei mi hi’n ka kithei. Bialsung mipite’n amaute’ sang a hehpihhuaizaw ka hihna muchiang mahmah ua, ka kibatpih khosak haksate toh kithuahkhawm a a buainate uh panpih sawm ka hi. Pathian’ hon lemgelsak ahih peuhleh lohchinna om ahihman in.

 

LH & ZOL :  Independent a bangziak a tuhsawm nahia? Party ticket khawng ana ngen khalou himhim na de aw? National Party khawng zop ei adia hoih na sa hia, ahihkeileh eimah tualsuak regional party a pai hoih nasa hia?
KCKS :    Thudot khak a omte’n independent a din ding hon kawkmuh tampen ua, Party lam leh Ticket buaipih zawlou in, thoveng lehlam hi. Party zop thu ah National hi’n Regional hitaleh ei ‘issue/political agenda’ hon mualsuahpih thei dingte zop hoih ka sa hi.

 

LH & ZOL : Khotang leh gam leh nam adia kizang mahmah na hi a, adiak in PTC bang ah? I nam in bang poimoh pen hi in nathei a? I nam khanmohbawk adiak in politics lam ah bang hi in na thei?
KCKS : Khotang, gam-le-nam hi’n PTC a kizatnate ah seppihte’ haksatna i chi hiam khosak dan theihsiampih poimoh mahmah hi. Hichibang ‘team work’ ah hih alom a mohpuakna (collective responsibility) kilenkhawm ahihman in ‘ki-ittuahna’ kitasam thei mahmah hi. Khosak buai kholdiak Nam nasemte kankuah i siamlouh uh hi i khanmohbawk uh hi’n ka thei.

 

LH & ZOL : Zogam Tangkou magazine ana saitute lak ah nana tel a, na experience apat in eilak ah bangziak pentak hi’n na thei a magazine regular tak a ineih theihlouhna uh? Zogam Tangkou patthak theihdan bang omlou hia?
KCKS : Zogam Tangkou hi ka lawmte’n “Zougam” hon chihpih mawk ua, buai-pi in hon lap in khawlden kha hi. A panthak thei om leh kipahhuai in teh. Monthly Magazine i neihte uh hong khosuah zohlouhna ahihleh i tawmluat lai ban uah ‘market’ kichi, i zuaktheihna uh neulua ahi. Ta khawng tampi pi nei in i population uh tam leh publication himhim khosuak leh khangtou ding ahi.

 

LH & ZOL : Tua term beidek kuan a MDC ten Sixth Schedule hon ngetna uleh Churachandpur pen Lamka a khek ding toh kisai a resolution hon lakna uah bang ngaihdan na nei a? Nang MDC a telching hilechin hiaite toh kisai in bangchibang in panlak na sawm a?
KCKS : MDC ten Sixth Schedule phutna hon uangbawl pen uh telching thak a om dingte khualna hipah phot in, khang tampi daih ding mipite’ khosakna khual hi sawnsawn hi. Gam leitang kepbitna ding leh a kilual a khantouhna di’n Sixth Schedule provision a ki-etkol pen alou theilou ahi. A vangkim a i buaipih gige uh Kaihlam Wildlife Sanctuary policy thah theihna ding bang, Hausate’ gam a sing-le-gua puakkhiak a omte Hausate’n lah siah ne khalou in Forest Deptt. in tax a na la mawk chih khawng, leh khomin khek chihte 6th Schedule Provision ah thuneihna om vek hi.

 

LH & ZOL : Tua ADC Act nuai a MDC te power hoih huntawk in na thei hia? Bangbang  power piakbeh in omleh lunggulh huai nasa a? Hiai din bangchi panlak hoih nasa a?
KCKS : Tulel a kizang ADC Act nuai ah Section 1 of the 29 Principal Acts, subject 26 om a, zattheih ngellouh power a kipia hi. North East a Political status nei nanung Bodo Territorial Council (BTC), February 2003 a mu i chihte leng thuneihna sangtuam hi tuanlou in Sixth Schedule pattern mah ahi a, huaite thuneihna bangbang piak hilehang; i kiphin nawnma a di’n a hoih ding hi.

 

LH & ZOL : I gam keu gawp, sing leh lou tawmgawp. Adiak a New Lamka West constituency in a huamkhak sung Lanva Lui bang, hichi himaita. Panlak didan omlou adiam? MDC te'n hiai environment lam toh kisai in bangbang a semthei dia?
KCKS : I gam keugawp a, Lanva lui tuisuak sak ngai ahih chiang in unaupa CT Lian tepawl mah in hunkhat thu in, singnou tampi honsuan in a lasa pawl toh pipun deuh in sem lehang ahoih ding. MDC te’n Forest Department toh kithuah in a kinaihpih Village Authority te'n inntekna la in semkhawm-bawlkhawm lehang lohching ding hi.

 

LH & ZOL : Hiaitan i society/politics a na kipeina ah nop nasakna, na kipahna, hon thathousak, ahihkeh haksana na sak leh hon lungkesak bangbang khawng ahia, hon gen ve maw.
KCKS : I society/politics a ka kibualnate ah haksa thuak leh tasamte ka huhkhak chiang in ka kipak sek hi. Gintaklouh leh lam-et phaklouh lam apan huhna ka muh chiang in leng ka kipak law zel a, mipi’ nasep hon thathousak hi. Kithuahpih gin-om leh chitak a tamkei a, i kithuahpih sekte’n Active Politics khawng ah hon langbawl chiang un lungsim a na mahmah a, mangngilh pah ding haksa ka sa hi. Lungkiak chih zaw ka nei kholkei.

 

 

* * *

 

BIO-DATA
Min : K. Chinkhansuan
Pamin : K Nanggin
Numin : Ngulzaniang
Azi : Chingngaihlian
Atate : Pamthianmawi, Nianglunkim, Gouthianmuang,
K. Ginsuanmung, Chingthianhoih leh K. Thangzamuan.
Tenna : Dorcas Veng, New Lamka, Lamka.
Laisiamna : M.A. (Pol.Science).
Hihna/ Profession : Social Worker.
Hobbies : Documentation.

 

KHOTANG/GAM LEH NAM ADIA KIZAT KHAKNA TE :
A. National Movement:
1. Assistant Director, ZIB, ZRO, 1993-1995
2. Finance (Emergency) i/c, ZRO, 1996
3. Secretary, Information & Publicity, ZRO, 1997-2002

 

B. Community:
1. Member, Zomi Council Working Committee (ZCWC), 2008-May 07, 2015
2. Member, Indigenous Tribe Leaders Council (ITLC), 2008-2011
3. Joint Secretary (Adm)/ Assistant Secretary, Zomi Council, 2011
4. Secretary, Finance Committee, Zomi Council, 2011

 

C. Students’ Welfare:
1. Music Secretary, Siamsinpawlpi (SSPP) Lamka Block, 1986
2. Finance Secretary, Siamsinpawlpi (SSPP) Lamka Block, 1987
3. Vice-President, Siamsinpawlpi (SSPP) Lamka Block, 1988
4. Information Secretary, Siamsinpawlpi (SSPP) Headquarters, 1987-1988
5. Secretary (Education), Siamsinpawlpi (SSPP) Headquarters, 1992-1993
6. Secretary (Education), All Zomi Students Association (ALZOSA), 1992-1993

 

D. Philanthropic Organisations:
1. Assistant Secretary, Y.P.A. New Lamka Unit, 1989
2. Secretary, Y.P.A. New Lamka Unit, 1990
3. Vice-President, Y.P.A. New Lamka Unit, 2006-2008
4. Adviser, Y.P.A New Lamka Block, 2008-2011
5. Adviser, Y.P.A Dorcas Veng Unit, 2012- till date

 

E. Social Involvements :
1. Assistant Secretary, PNC New Lamka Unit, 1992-1995
2. Member, Board of Directors, Paite Literature Society, 1995-1998
3. Secretary (Organisation), PNC Headquarters, 1996-1997
4. CWC Member, PNC Headquarters, 1996-1999
5. Advisory Board Member, Obadiya school, 2006-2012
6. Advisory Board Member, Only Grace Home, 2006-2011
7. Advisory Board Member, Lamka Driving school, 2009-2012
8. Member, Paite Cultural Society (PCS), 2011-2014
9. General Secretary, Paite Tribe Council (PTC): Gen. Headquarters, 2008-2015
10. Secy. PTC Diamond Jubilee Celeb. & 2nd Paite Nam Khawmpi, 2010-2011

 

F. Journals/Periodicals:
1. Joint Editor, Lungleenvumpi, Hanship Centenary, 1992
2. Publisher, Voice of New Lamka, 1986-1990
3. Joint Editor, Monthly Magazine Zogam Tangkou, 1994-1997
4. Joint Editor, Lungvaakna in Tuailai ’90
5. Chief Editor, Voice of New Lamka, 2008-2009

 

G. Professionals :
1. Office Assistant, Ebenezer Academy, 1986-1993
2. Assistant Teacher, Ebenezer Academy, 1993
3. English Teacher, Mount Olive School, Kangvai, 2004
4. Project Officer, Covenant Children’s Home, 2004-2008

 

H. Religious Organisations:
1. Music Secretary, Khristian Tuailai Pawl (KTP), New Lamka ECC, 1987
2. Secretary, KTP, New Lamka ECC, 1988-1989
3. Contest Director, KTP Lamka District ECC, 1989, 1994-1995
4. Assistant Secretary, KTP Lamka District ECC, 1987-1990
5. Vice-Chairman, KTP, New Lamka ECC, 1990
6. Finance secretary, KTP New Lamka ECC, 1990
7. Secretary, KTP Lamka District ECC, 1990-1993
8. Chairman, KTP Lamka District ECC, 1996-1990
9. Assistant Registrar, Tuailai ’87
10. Assistant Director, Tuailai ’90
11. Registrar, Ulian Bible Camp, 1992

Read 1713 times Last modified on Wednesday, 27 May 2015 13:19
Login to post comments