You are here: HomeArticlesInterviewInteraction with CT Lian, MDC New Lamka West

Interaction with CT Lian, MDC New Lamka West Featured

Written by  Mung Ngaihte Published inInterview Thursday, 30 July 2015 00:44
Interaction with CT Lian, MDC New Lamka West

Lamka leh a sehvel a Pu CT Lian, Social Worker chih a aneu-alian, atek akhang’ theih(lar) a om, MDC election a telching ahong hih chiang in ZOGAMonline in hunlem masapen ana taangin kihoulimpih thei hi. Aman le dotnate kiteltak leh lungtunhuaitak in hon dawng a, mipite leng sim kithalawp mahmah ding un kilamen hi. Amah Pu Lian, misuanhuai mahmah khat ahi a, 2004 kum in University of Wales, United Kingdom ah MBA zil ding in va lut a, MBA a zil kawmkawm in a zilna line mah pansan in Bussiness lian lou E-Mart chih minvuah hon pan khia hi. Lai a zil khitin gamdang ahiam, vaigam ahiam a sepna lianpi neih sawm mailou in veina aneih I gam mah ah hong kik in ahihtheih bangbang in akul leh ama’ sum seng in I gam puah hon pan hi. Lamka hong tuntun in business lam Whole Sale, Home Delivery leh CT Lian Convenience Store hon pan a lohching mahmah in mite etton din hong om pah hi. Ama’ makaih na nuai ah Lamka Building Society (LBS), Lamka Traders and Self Employees Association (LATSEA) chih-te hong piang khia a, tuni tan in mipi leh Dawr kaite'n phattuam pih mahmah a theih in om hi. Tu in amah toh houlimna simtheih ding in anuai ah i koihkhia hi.


ZOL = ZOGAMonline || CT = CT Lian

 

ZOL: Congratulations! Pu Lian. Tutung MDC Election a na lohchinna hon kipahpih a alem leh sawtlou houlim dia ZOGAMonline apan hong kuan hive ung aw..
CT: Hamphat huai na tel e. Ka kipak lua. Chibai na vek un awle.

 

ZOL: Kipahhuai ei. A thupi lah kihihzoulou a. A token dan in kipahpih latsakna- chini serkhat k’on tawi ua, n’on sansak ding hilou di hia maw..
CT: Khai! Hiaite ngailou hi a. Na hong kilat lel un thupi gen lawkhin aka hia. N’on tawi ngal ua lehlah ka hon sang mai di awleh. Kipak ing ei.

 

ZOL: Pan pah maile. Milar himah lechin na bulpi khawng athei khollou omthei hi’n maw. Na pianna vangkhua, sungkuan, unau phazah, zonglai maw zongnawnlou chih khawngte non gen mai diam?
CT: Kei ka hih leh Pa Tualkhansong leh Nu Dimgou te goutan masapen ka hi a, Tuithapi khua ah ka piang hi. U nau li(4) kapha ua, sanggam numei nih leh pasal khat ka nei hi. Taksa dan in single, koppih nei nailou, a zonglai ka hi.

 

ZOL: Ahihleh, leitung pilna lamah siamna sangtak nei china, tua na bussiness lah lohching mahmah zomah, a bangchi dan a MDC khawng hon tuh thepthup na hia le? Na business pammaihlou a maw?
CT: Gamdang apat innlam ka hong paikik in, I gam ka et chiangin mi kuapeuh dependent culture a om gaivek danin ka mu mawk hi. Chihbel, Tate Nu leh Pa’ tungah, Pate State Govt. tungah, State Govt. te Central tungah kinga pumlum ka sa hi. I gam a Govt. in project bawl lelah anou nei theiding (sustainable project) bawllou, sum omsun teng nemang, I district sunga omte khat leh khat kikhem kualkual – atawp a Khuangbai banga kine bei mai didan peuhin ka mu mawk hi. Hichi bang culture in I gam ah khantouhna hon tunlou ding ahi chih chiangtakin ka mu a, ke’n bel I gam pen Ei aneitute mahin I natural resources-te mah zanga kitoudelh theih didan mu kilkel dan a ka kitheih man in- I gam ah lunglutna khat ka na nei hi.

 

Tu 21st Century huna hichituk a technology hoiha, khovela information tengteng iim vual omlou ding khopa thilteng i khuttunga muhtheiha a om lai-a, i gama nekguknate, mipite khem a i om dante uh banah, i gam in vision hoihtak neia (sustainable development project) pai khalou dana ka muh chiang in ka om theikei. Kei muh bang noule mu hile uchin nou le om maimai lou a MDC a tawmlut vek ding in k’on gingta hi.

 

Business i chih pen sumdawnna lam kia genna hilou eive. Mikhat hiam organisation khat hiam in a nasepna (professional deuh) pen business hi in ka na ngai hi. Kei hih mundang, gamdang a hun sawttak ana khosa, milaka nasem gige ka na hihna ah leh ka sepna lam peuha theihtawp suaha gin-om mi khat kana hihteina ah, eilama heutu khenkhat, mipi nasem dinga khaloh la hinapi - semloupi a ne ahihkeileh gelhmang, zulhzautak a nasem, midangte ading va neksak, va eusak, mikhem, diktat zoulou ka tuahkhak chiang in amau dinmun a ding hile’ng chih kingaihtuahna hon pesek hi. Hiaite banah eilawi, amipite mahmah inle I gam pen amah a hong hoih mai di sa hile kilawma ngak a ngak thoh dan in ka mu a, banah, I gam a Tuailai tampite nnasep ding neilou a om ka muh chiang in pammaih kana sagu mahmah mawksek hi. Kei public leader hile’ng ka sep ding thei hi a ka kitheih man in, ka ut leh ka utlouh thu hilou in, hon sam, hon noh om hileh kilawm in nidang a ka ngaihtuahkhak ngeilouh MDC bek a tuahlut utna lungsim ka lungtang a hong om in, hong tuaklutkha ka na hizaw. Siamziak, chitziak hilou in awlmohna ziak liauliau ahi.

 

ZOL: Ahihleh MDC election a na kikhinpihte saptuam hi’n khotang ah hileh, mi tallang leh experience neisa ngen; mipi theih leh pomsa ngen, bang chidan a nang sialpuuk thei mawk na hia le? A thuguuk om tawk ding hiveh aw..
CT: Nagen adik tham kha di. Ahihziak in I gam a Politician leh Public Leader kichi tamtakte’n a sep di uh mipi nna sang a amau mimal nna sem tamzaw sek uh hi a kilang ahi maithei. K’en leng MDC leh Public leader ka hihlouh in leng ka hihtheih sunsun in mipi nna ka na sem hi. Hichi kawmkal ah, voter - mi genthei, meithai, liangvai tampite leh lehkha thei chiang voter te’n iim seselouh in I sulnung teng amun a omlouten le internet tungtawn in theichiat uhi. Hichi bang khovela semnuam chiatchiat himahle’ng, tutung chuh mipi a tamzawt’en amaute sanga a hon muanzawk ziak ua hon vawkching kha dan uh hi’n ka mu hi.

Lohchinna thuguk - I tuppen hoihtak a masuana, haksat huna leng lungkemailou a, lungduaitak leh gin-omtak a I sepsep leh atawp in kuhkalna ziak in kilohching hi in ka thei hi.

 

ZOL: MDC in development fund kiningching neilou ahihlam na theihsa himahleh, na campaign-nate ah fund om hun ngaklou a, a poimohna ah nang sum leh tha mahmah seng a nasem ding na chih mipi vote muh na’ng maimai a na gen hia, ahihk’eh tum taktak a sepsuah tinten sawm mah na hi hia? I chihna bel hiaitan i gam puahlouh a om a nen- a ham in puahdek le sum tampi beimawk di hi a..haha
CT: Kei MDC ka hih matham apat in ke’n ka muhsuahte lak apan 20% ka koihkhia hi. Hiai sumte in ka hihtheih khomkhom in gam leh khotang a ding thil phatuam hihna in ka na zang gige hi. Nidang in bel hiai thu mipi kiang ah ka na genkha ngeikei mah. Ahihziak in tutung election vai ah mipi lak a ka hon genkha chihthu ahizaw hi.

Hiai a ka thugen vote zonna lel himailou in atak mah gen ka hi. Huan, vote zonlai in ‘kei hon vote ching le uh chin, ke’n I gam pen Singapore ahihkeileh Switzerland ka suah ding chi ka hipah keia, himahleh govt. sum om leh omlouh ngak a tutu mailou in ka hihtheih khomkhom in I gam ading in nna ka sem ding ka chi hi. Fund a omkei lele ama a ka sep bang in semtou zel le’ng mipi lungkim veve ding in ka um tinten hi.

 

ZOL: Kawlgam lamte ZRDP, lasiam Vum Nang (Second Hand Ngaihno) bang phawk zozen hang. Amah le gam puah sawm a nasep kipan mai khat hihtuak, huchia pan alak chiang a, sorkal inle sum-le-pai ahithei dandan a vukzaw mai khat hihtuak hi.
CT: A gam sorkal in a vuh leh vuhlouh zaw ka theichiangkei na a, lunglutna taktak toh thilhoih hih I kipat ngam naknak leh mimal hon huh ding hong om maidan khat hi in leng ka thei hi. Banah, ‘mimal tam ahong lunglut zoh peuhleh bang ding a govt. hong lunglutlou di’ chih ka ngaih dan ahi. Bangteng hileh a kipan om leh anungzui ding om chihchuh chiantak in ka theita hi. I gam mite’n thudik-thutang, thilhoih deih uh ahi ka chi ngam.

 

ZOL: Candidate dangte’n Old-age pension, IAY, Tagah-meithai panpihna adg. leh Fund hongpaite diktaka hawm ding chih khong gentam uh (nang bel na hihdik disa in koih le) abang, hoihlua. Khangsawnte khuallou in ei a nitumkuante kia ki-enkol toutou mawk le i tunung ding khawk mahmah lou ding a diam? Khangthakte a ding bang plan na nei a?
CT: Khangthakte ading biik in I gam a nasemtu ding a tamtheipen trained khiak ding, I gam a sepding ahihkeileh septheih (job opportunity)a tamtheipen bawlkhiatna dia I gam a skill training institute om ding, Rural Self Employment Training Institute (RSETI), Community College leh local bank omte toh pang khawm a entrepreneurships- mahni a kitoudelhna nnate leh khut nnasep leh farming (Agriculture-Animal Husbandry leh Cottage Industry) I chihte hahtak a puah ahi ka tuppen.

 

ZOL: Huai n’on gen nguut leh I khangdawngte talent hoihpipi nei tam a tam, nu-le-pate’n deihsak lua ahihhanga laisim, laisiam di kia a thuhilh thei, thil dang a opportunity a tamluatlouh ziak le hikha ding. Bang lamlam ah makaih leh opportunity bawlsak theih om ding in na mu a?
CT: Khovel a misiamte gendan dik ka sak khat bel, mihing khat peuh in I sepna lam I hihna lam khatpeuh a I lohchintheihna ding in amasa penin i sepding ei mimal lunglutna ahih ding ahi chih ahi. Huchi a lunglutna tak na neihkei hial leh nanu-napate’n nekmuhna dia ana sep uh(parent profession) toh kituak nnate sep ahoih ding a, huchi a hiai tan a leng hih di na theihkei lai leh I gama a lemtang (opportunity) om dandan, etsakna ding in Lamka a ding mehlei(vegetable garden) chihte, hahbawl leng lohchinna a om ding chih ahi.

Bangteng hileh, ke’n tulai a I gam a job opportunity om hia a ka muh ka promote khenkhat chuh :- huan bawl, gankhoi, furuniture bawl, transformer leh solar light mechanic, plumber, heavy vehicle machanic, electrician te banah, hardware engineer, software engineer, internet base trading lam himhim leh banking service lam hahbawl hoih ka sa.

 

ZOL: Laisim loudeuh lam ah, veng chih in Community Hall lianpipi a neihte functions, conference neihna chihlouh zatlouha om demdom geuh abang hi. Huaite sung ah indoor games bangbang hiam koih theihlouh di a diam? Leitung pumpi enle Badminton, Table Tennis chih khawng indoor games a minthang leh dominate te ei taksa leh melpuak kibatpih Asia mite ngen hia, a facility nei in neu apan kichil le ei naute khawng le khovel a a topper te a hihlouhna di uh omlou tuanlou na sa hia? Mary Kom bang living example hipah! Huai ding khawng lampi sial na sawm hiam?
CT: Ke’n leng nagen hi kasalua. Eipawl in athak bawl di kia ki sawm. I neihsa infrastructure tamtak a zatna di kitheilou ka sa hi. Community Hall I chihpen kumkhat a khatvei/nihvei khawng kikhopna ding a zangthei lel lai ihi uhi. Community hall khat sum lakh 40/50 bei a I lamte uh kum khat a 20/25 vei khawng kikhopna a I neih lel lechuh –Community Hall khat kum 30 khawng daih ding in hisaptale’ng 10% depreciation inla tale, zonglua hina piin khatvei i kikhop man uh sing 4/5 suakthei mawka, hiai pen pammaih mahmah bang thei hi.

 

Hichi hilou in, i community hall-te uh carpenter mistry tuamtuamte nnasepna mun/siamgatna mun, ahihkei lele, tua na gen indoor games tuamtuam mimal in I neihzohlouh uh khenkhat- air gun kap, thal kap, chess kimawlna, table tennis chihdan kimawlna tuamtuamte koih le nakpitak in kizang phatuam ding in ke’n leng um mahmah ing. I chih banga a I thilneihte uh I zat phatuam theihna ding ke’n leng panlak ka ut gige hi.

 


ZOL: Kimawlna lam i gen lailai in, hichituk a football lunglut hanga, 1970s vel apan a asiam kitatsatlou ive. Himahleh, India gama i tunna lungtunhuai nailou hi. A peksiam, a talent omsi a, nang muhdan in a bang pentak i sapna (lacking) hi ahia, chihleh, nang mahmah in contribute theih na nei diam, khangnou asiam leh lunglutte khualna in.
CT: Ahi, na gendik ka sa. Kei muhdan a I taksappen uh hi a ka theih chuh-Football I chih team work hinapi team a kimawl ding hihlam kiphawklou-kitangpan chiat, ei theihdan chiat a ball pek ihi uh. Football i chih mind game, plan and strategy neitak a kimawl ding hinapi, eilawi in hiai ding a class nei ngeilou, banah, a discipline kinak taaksap lua, migen zuithei himhim lou, heutute khatin hichi in hih in chih leh a ground sung a om chiang a mahni deihdan a pai teitei- heutute thu mangthei nailou kitamlolai in ka mu hi. Atom a gen in displine tasam leh planning omlou in ka mu hi.

 

ZOL: Employment lam ah lutnawn le. Na hah gen bok a, hiailam ah hon na kimuang gulua ahih bang. Bussiness entrepreneur khat, pau leh ham a buailou, gam zaa sikkha, networking bawl lah siam na hih chiangin mi tampi in tua na bussiness career hon zomtou a, khopi a private company liantaktakte i gam ah hon zawllut dia hon lam-en lua uhi. Himahleh, huaite leng gelphaklouh in Employment hih pung ding n’on chi a kipahhuai. Huchi bang hileh, tua Goverment in fund tawm chikchik a neihte a small-scale industry, cottage industry kháwng mah a kitoudelh mai di chi na hiam? Huaite’n niteng nekdi chauhlou a midang, gamdangte khantouhna tan hon tun din na mu hia? A fund khawng lah a hun a phat a muh hi khollou zomah dia. Hiai thu nang na tup dantak a saulua chilou in no’n gen thei diam?
CT: I gam hong khankhiakna ding in amasapen in I gam mimah ngai a, hiaizoh in, I gam a resource omte mah I zat masak ngai kasa hi. Hiai ding in small-scale industry, cottage industry kháwng mah a kibulpat masak mah ngai hi in ka mu. Factory hong omphut mawk kei ding a, industry a masak ding ahi. Huchi in, awlawl in kiptak leh dettak in hong paitou ding hi. Huchi in I gam ah khantouhna hong om ding in ka mu hi.

 

ZOL: Sianthouna lam le na ngaih poimoh a kipahhuai. Engineering lam le ana balsial nuai khin na hihna ah, tua na bialsung kia hilou, i hawmthoh i vangkhopi Drainage System kha bang na chi ngaih a? Ek bang a duum a khol temtum hang a, a kiang naichik ah well (tuikul) bang toulai hang a vuah lah hong zuk vanglak chia buak a hong bokhe mai. Ek buk/duum bawl lou in drainage hoihtak bawl in koimun hiam ah i hawktuite toh luangkhe leh chuh deihhuai petmah, huai ding a hithei ding in na mu hia?
CT: Eipawl in I theihlouhpi ngen sem, a theilou ngen in leng ‘ka theikei’ chi a mi dot sawmlou a semsuk maite I hitel uhi. Etsakna ding in, I gam a drainage /sewage hoihtak omloupi dailen buk a septic di bawlchiat, ahihziaka a khahkhiatna di sewage bawllou zel. Khat ekbuk kong; khat tuilakna mun hi zel. Hichi bang society a I omkhak ziak in gending, hihding a tam a; hamphathuai ka sa a, sep leng ka hihtheih khom in ka hon sepsawm ding hi. Hitamahleh, hihkhial hi a ka kitheihsek chuh orgainsation hi in, committee makai, heutu dinmunte ah eilawi in ‘kua’n nna a semthei dia, kua’n hon piithei dia’ chih nak sanga ‘kua ka thuthu in ka kaithei dia’ chizaw hanga, I ‘kaihtheih ding’ heutu I neihlai teng I gam ah khantouhna om ngeilou ding in ka mu hi.

 

ZOL: Khosung inn leh lou huchi niainuai, plan bangmah a na omlou tu in plan ding chi in panla mawk leng a hithei ding in na mu hia? Na ngaihtuah kha ngei hia?
CT: Plan omlou a ana kibawl ziak a plan theih nawnlouh chih om mawk di hia. ‘Hithei nawnlou di hive aw’ chi maite hilou in, ‘a hihtheihna didan lam zong le omlai di hive aw’ chi thei mi ka hihziak in ka kipak hi. Sihna lou ngal khovel ah thil hihtheih nawnlouh om in ka theikei. Huaiziakin, I khosungte uh, kongzingte uh leh lampite uh a plan didan om lotel in ka mu hi.

 

ZOL: Town planning lam la? Lampi a kip a kawi neu chikchik natan le a min i pia ua, Ssptuam tuamtuamte’n inn number hon vuah ua, a changin goverment lamte khawng in inn number bang hong gelh zomah uhi. Himahleh, hiate postal address dan a zattheihlouh in post khawng a lai i kithot chiang ua koimun hiam dawr khat khawng ah nusia ua huchia a vangphate’n vamu chih khawng ahi. Student-te ading ngial in College admission, ahihkeileh sepna application leh adangdang ah buaihuai mahmah; van/parcel kikhak chih bang tuh genphak hilou. Hiai tungtang nang nana awlmohkha hia?
CT: Hiai toh kisai ke’nle sawtpeka kana vei mahmah khat, lah kei mimal a kasepsuah zohlou ahi. Ahihziak in tutung in chuh ka constituency sunga zat ding in sepsuah ka sawma, phatuam mahmah ding in gintakna ka nei hi. Hihtheih didan lahna kon nei ding:

 

Kong zing kikhen didan tampi leh inn no bulh didan:
Road- Zotna Lampi
Hight street- kongzing pi
Street- kongzing
Lane-Kongsuk/kongtou
Close- Zawi

Inn number:

Taklam a inn omte : even number ngen- 2-4-6-8
Vei lam a inn omte:Odd number ngen-1-3-5-7-9

 


ZOL: Ahihleh MDC hita na hih chiang in District Council nuai a school omte la, student le om khollou, mite simmoh a om mai, bang chi’n panlak na sawm a le?
CT: Hiaite pen athu omdan detail tak kithei leh huai chiah ngaihtuah pat theihdin ka ngaihsun. I education system uh hoih zawksemna ding in chuh ka hihtheih khom in panlak ka sawm gige ding hi.

 

ZOL: District Council nuai seselou i gam a govt. schoolte bangchi puah leng na chi? Khochih ah govt. school kingaktheihna hileh naupangte laisiam ding ua, nulepa in le neilou sasa a Lamka a naupang school kaisak ngailou dia zangkhai mahmah ding hive’n.
CT: Singtang khua a Skul omte mite kingakna tak ahihtheihna ding in – teacher hoihtak a ngai a, teacher hoih I laktheihna ding in a khaloh ahoih ngai nawn a, teacher hoih skul mun a tung theihna ding in lampi hoih ngai hi in ka mu hi. Huaiziak in, I singtanggam ua schoolte hoihtak a puah ahihtheihna ding in lampi hoih poimoh ahi. Lampi hoih peuhmah phot leh adangte awl a hong ommai dingin ka um lel hi.

 

ZOL: Lamka a siamsinna mun –school leh college te dinmun na muhdan n’on hilhthei diam? Hoih huntawk na sa hia?
CT: Lamka a siamsinna mun –School leh College omte ke’n chuh hoih hun salou, hoih hun hileh state polam mite’n hon bohlokhin ding uh ahi. Teacher leh lecturer te professional zou uh ka sakei a, tulel a I education system uh 21st century a ding in deihthohhuai ahihkeileh, kam muhzohna tham ding in ka umkei top- need lots more to do!!

 


ZOL: Gamdang khawng a siamsian a va-om na hihna ah Lamka ah siamsinna hichizaw deuhleh na chih point bangzah hiam no’n geenthei diam?
CT: Hichizodeuh leh chih phetlou in kipumkhekthei leh chizaw dan ka hi. Mahni kizon omlou – teaching staff te siamlouh ban ah, studentte thansak pen seniorte note etton leh by-heart system hoih ka sakei top ve.

 

ZOL: Zomi Nam politics thu ah, i nam heutute’n tribal teng a tuam a kivaipuak di deih in kal hon suanpih uh i chi ding. Nang a piangthei ding in na mu hia? District Council a member khat na hihna ah nang bangtan panlakpih thei ding in na kigingta a?
CT: Ka gensa mah bang in a piang theilou om in ka mukei. Huaiziak in, nam heutute tup piangthei lotham ding ka mu a, ahihziak, kei na buaina ahihleh piak in omlele I kivaipuak thei na di uam chih lam ahi ka na buaipih zawk. Gentehna in- kuahiam car neuchik khat lel leng hekthei nailou in heavy truck heksawm leh bang achi de aw chidan in ka ngaihsun hi. Ke’n bel neu chikchik a zohtouh a phaktouh mai dingte in ka mu hi.

 

ZOL: Na bial sung ah bang na awlmoh pen a? Bang na sem masapen dia?
CT: I gam a nekzontheihna ding sepna ka awlmoh masapen a- huaizoh Tui(Water) supply ahoihlouh ka awlmoh. Huai zoh, Lampi, Mei leh Gas supply leh Drainange system bawlhoih ka sawm hi. Lampi thuap masak ka tum hi

 

ZOL: Mimal sim abatna le om maithei mahleh.. social media a mi laigelh kimu ah Langkhanpau MDC a hong chin chiang in system transform lou in amah a hong ki-transformed chih khat om hi. Amah i dem ahikei, i siamtan le ahisamkei, public figure ahihna ah social media a om amin i gen mai ahi zaw. Nang le change, change na chi a, system omsa mi khat in vakhek pen thubaih hilou ahi chih na haih a ginhuai kei. Na campaign lai a change, change na chih chiang in a chi taktak na hi na maw? Hehe..
CT: Mihingte’n ei a theihna chiantak omloupi a, I muhmai hiam, migen I zak hiam, I theihchianlouhpi thil I ginthu pen atakdan a I genkhak chiangin, a tawp ei ah kinga theilou in mitung ah kingak hong ngai a, I gendanloupi, I utpen, I deihpen hikei mahleh, hichi bang thillamdang tuahtheih mah ana hihi. Huaiziak kuapeuh in, I hihna, siamna kitheihtel masak a, mitung a kingalou aIi septheih didan gen poimoh ka sa hi.

 

ZOL: PM, Narendra Modi bang le a campaign lai a thugen lah siam. Thil hihkhe zungzung thei dinga mipi in lametna nei hileh kilawm. Mipi lam-etna toh atak a delivery kikal omthei ding in na gingta hia chi mawk le…
CT: Mipi lam-etna toh atak a delivery kikal omthei tham e. Mihailou khat in a zohlouh ding a gen ka gingta kei. Ahihziak in, mipite’n bel mi thugen I na lehsak (interpret) dankhat leng na omkha thei hi. Etsakna ding: Bible bang leng thudik, thutang kigelh hinapi-a tup leh a ngim kibang hinapi mi tuamtuam in lakdan tuamtuam I neihziak un tu-in Saptuam tuamtuam tampi kineihloh hi. Huaiziak in, tup kibang hinapi in sepdan, lakdan kibang chih om gige theilou ahi chih hoihtak a I phok uh deihhuai ka sa hi.

 

Bangteng hileh, kuapeuh in I gam leh nam hoihna ding gen in I gennuam chiat ua, tup kibang hinapi sepdan hong kibat gige theihkei leleng hon theisiam a, chiklai peuh a mipite’n lungke mai lou a n’on nungthuap gige ua, noute toh pangkhawm a I gam leh I nam diktatna a tawisan’ zoh ka kilam-en.

 

ZOL: Awle, Pu Lian, i gam leh i mite na awlmohna, na tup na ngim, na sepnop, na sep ding dan leh na lungsim leh thu tuamtuam tampi mipite theih ding in na hon genkhia a, na hun manpha tampi na hon piak manin ka kipak mahmah uhi. I hunsak phot ding a, hong lohching leh hong lamzang ding in ZOGAMonline in kon deihsak uhi. Kipahhuai mahmah ei.

CT: Kei le Ka kipak e. ZOGAMonline masawn hen!!!

 

 

 

 

 

 

 

 

 

 

 

 

PHOTOS FROM CT LIAN OFFICIAL PAGE - YOU CAN   HERE

Read 3035 times Last modified on Thursday, 28 January 2016 20:32
Login to post comments