You are here: HomeArticlesInterviewExclusive Interview with Ningmuanching

Exclusive Interview with Ningmuanching

Written by  Kam Khenpau Tonsing Published inInterview Thursday, 16 June 2016 08:21
Exclusive Interview with Ningmuanching

Written by~ Kam Khenpau Tonsing

 

 

I LASAK IN MI A ZOHNA DI'N I LASAK DING A EIMAH KIMIN MASAK A POIMOH: NINGMUANCHING

 

LP : Lamka Post

NMC : Ningmuanching Guite

 

Min: Ningmuanching Guite

Pa Min: G. Chinkhenkham

Nu Min: Donnem

Date of Birth: 18th January 1995

Present Address: L.V. Lane, Hebron Veng, New Lamka, Lamka, Ccpur, Manipur.

 

 

LP: Khangthakte lak a lasiam minthangtak na hi a, bangchik a pan lasak na na pan a ?

NMC: Kei ka hihleh naupang neuchik ka hih a pan in la lam ah lunglut na ka na neita a, lasiamte khong bangchu ngaisang thei petmah... Labu ka ettheih a pan mipi ma ah lasak ka na panta - Sunday school, biakinn leh school khong ah la ka na sa zel.

 

 

LP: Album single hi’n collection hita leh bangzah na bawlta a ? 

NMC: Ka first studio record ahihleh 2007 kum a Pawl VI ka sinlai in ka na bawlta. Single music video album bel khat "Nang Phatna Laa" chih ka na bawlta hi.

 

 

LP: La siam mawngmawng na hi hia ahihkeileh kizil a siam na hi hia ?

NMC: Haha...Thil himhim pianken a siamsa mawng chih a omkei a, hileleng Pathian in hihtheihna/siamna mihingte a hon pe chiat a, Pathian in kei leng lasak theihna 'talent' hon pia ahi ngei ding a, lasak ka lunglutna mah ahih toh kizil a sak bang le nuam kasa hi. Kei mah khomkhom khong in ka na kizil sek a, hileleng huchia lasakna lam toh kisai a 'training' chihdante bel ana lakha nai tadihlou chih di hi.

 

 

LP: Album piching hilou la record bangzah na bawl kha ding ?

NMC: Album collection ah "Saan nem aw", "Phatna Luangkhawm" Vol 1 & 2 leh "Ka Phatna Zaila" chihte ah ka na kihel khata. Album piching a kiguanglou la ka na khumkhiak himhim zah bel sawm-le-nga khong a pha di tutadih in. Huai banah tunung sawtlou a hong kihong pahta ding "Ka Lunggulh pen" kichi Gospel music video album mah heutupa K. Thangchinlian' Late ah leng la bangzahhiam ka sa hi.

 

 

LP: Na lasakte lak a bang la in na lungsim hon khoihkha pen hi'n na thei a ?

NMC: Ken ka lasakte hoih kasa thei mahmah a, a la thute hoih ka sak ban ah ka lungsim hon khoihkha chiat a, ka theih ziaktak inleng a sak mahmah leng nuam kasa thei a hon kilawpsak mahmah hi. Ka lasakte'n hon khoihdan khat om chiat vek hi'n ka thei.

 

 

LP: Na lasakte lak ah nang phuah a omkha hia ?

NMC: Ka lasakte lak ah kei phuah bel om naita dihlou chih di hi.

 

 

LP: Maban ah album bawltouh zel na sawm hia ? 

NMC: Pathian in lem hon sakpih leh maban ah leng bawltouh zel ut-huai kasa.

 

 

LP: Pathian la leh gam ngaih la banah zawl la toh kisai bang ngaihdan na nei a ?

NMC: Pathian la leh gam ngaihla banah zawl la i chihte hiai khovel a i hinsung ua ei mihingte'n i poimoh vek uh hi'n ka thei. Huai kawmkal ah, Pathian la i chih pen khovel a i hinsung kia hilou a tangtawn a tulngeilou ding la ahihman in thupi ka sa a, ka sachim thei ngei kei ding.

 

Huai banah la lam toh kisai a i gam leh i nam in khantouhlam i manoh mahmahlai un lehlamtak ah kiatniamna om zek hi in ka mu. Tulaitak in Pathian la lam ah  khantouhna nasatak a om lellel hi'n ka thei a, kipahhuai lua...!! Huchih lailai in, gamngaih la, laa tualleng leh a diak in zawlla lam ah ma kisawn lawlou in ka thei a, a phuaktu di kisam hia ? Ahihkeh a lunglut tawmta ?

 

 

LP: Eimite lak ah Gospel Singer leh country song singer kuate ka ngaisangpen a ?

NMC: Eimite lak a gospel lasa Pastor H Biakson-te nupa ka ngaisang a, gam ngaihla leh la tualleng lam ah V Siampu leh Thawnkham ka ngaisang.

 

 

LP: Nungaklai, laisiam, la siam leh melhoih zawmahlai na hihchiang in, tangval tampite lungsim luahtu na hi a, tua ziak in LAM-ETNA a omlai diam chih bangle kithei nuam dan hive aw.

NMC: A khaih...!!! N'ong kamsiamlua uh ka chii... kipah bang tuh nak om ele... Bangteng hileh "Nu" hih di chu "Kigaklai" chu ahi a.... huai thu bel personal deuh in kidong le maw...Hahahhaaha..

 

 

LP: I gam a lasiamte'n a phutawk uh pahtawina ngah uh hi'n na thei hia ?

NMC: Mihing lampang leh khovel a namdang/gamdangte' kipahtawituahna dan toh et in bel eilamte'n mi kiphazou nailou deuh a dia aw ka chi hi. Himahleh, mite pahtawina leh phatna muh nuam ziak a lasa kihi zawlou in chin, Pathian in siamna a hon piak tungtawn a Amah phatthei dia ka om man in vuina ding sang in ka kipak a, phulouh pahtawina tang hi in ka kithei a, ka kipahna lam a lian zaw.

 

 

LP: Lasak toh kisai in pahtawina bangbang na na ngahta a ?

NMC: Lasak toh kisai in pahtawina huchia gentham hikei mahleh high school, college, hostel chih khong ah ka na ngah bang ana omkha zeuhzeuh sam hi. Huailou in, ZogamOnline saina in ZOLMA 2014 ah "Most Promising Artist" chih pahtawina ka na tangkhata.

 

 

LP: I gam a social media - fb/whatsapp zatdan hoih huntawk hi'n na ngaihtuah hia ?

NMC: I gam ah facebook/whatsapp kizangtheita a, kizangsiam dek panpanta ahihman in tu dinmun a di'n, hun leh mun tamzaw ah i zatdan uh hoih huntawk law lawmlawm di'n ka ngaihtuah kei. Hiai toh kisai in ngaihdan tamlou hon kumleng - I tenna gam in 'Freedom of Speech and Expression' kichi hamphatna a hon piak lailai in, utteng gentheih/gelhtheih chihna hipahlou in ah 'Freedom comes with responsibility' chihpen mangilhkei le hoih kasa hi. Huan ah, siamsinte a di'n, keile siamsin khat ka hihna ah - Social network khong a kilarsak viau hoih kasa kei a...a hoih naksang in thumantaklouh a tam zaw, i hun neih sunsun uh sengthawn kei hial ni..!!

 

 

LP: I gam in a taksap lianpen bang hi'n na thei a ?

NMC: Hiai toh kisai in ka lungsim ah "Faithfulness is more important than fruitfulness" chih hong dawk naksek a. Tu dinmun a i gam in a poimoh lianpen hiding inle ka gingta. Pathian thu i zakna uh kum 100 bang valta a, Pathian thu theilou leng ki-om nawnlou hi. Khalam thil leh simlei vai ah, a gah hong om ding pen buaipih masalou in, thil khatpeuh i sep leh bawlna uah 'Ginomna' leh 'Diktatna' toh mailam nawtthei lehang maw...

 

 

LP: La tungtawn a i gam a minthang na hihziak in, hiai toh kisai a haksatna na tuah khak a om hia ?

NMC: La lam toh kisai in huchia haksatna chih di ka tuak naita dihkei….Pathian ompihna ziak leh nu leh pa leh sungkuante'n le a hon kithuahpih ua.

 

 

LP: La lam a hon hanthawntu (inspire) bang/kua ahia ?

NMC: Lasiam, mihoih mi bangzahhiam ka muh/ka tuahkhakte banah ka Pa Siam, V. Paukhansiam mahmah in hon 'inspire' hi'n ka thei. Huai banah ka nu leh pa ngeile la lam a lunglut mi ahi tuak ua, amaute ziak a le hichitan tungthei ka hi. Hichibang a hon kithuah pihthei ding nu leh pa ka neih ziak inleng Pathian kiang ah kipahthu ka gen thakthak ahi.

 

 

LP: La siam na hihman in, la sa in mundang/gam dang koi munmun ah na paikhata a ?

NMC: Huchia a lasa di mawng in mundang/gamdang ah paikhakna ka nei naita dihkei.

 

 

LP: La siam i neihsunte mipi'n hichih zaw deuh lehang khangtou zaw ding i hi uh chih khong ngaihdan na nei hia ?

NMC: I gam a la siam i neihsunte uh mipi'n gal-et mailou in, a dinmun uh theihpih in a haksatnate uah kithuahpih lehang, tha-le-zung, sum-le-pai leh hun tampi seng a haksatak a album/la hon bawlkhia uh ahihna ah zahtaksak in, teisawnsak ahihkeileh youtube leh a dangdang ah, a bawltute phalna tellou in mawk koihsak keithei lehang hoih di'n ka gingta. A mi mahmah a le i tawm lai uh toh ei ate mah ngaina in kipahtawidan siam lehang kikhangtou mahmah di'n gingta.

 

 

LP: Khangthak lasiamte kiang ah bang thuchah nop na nei a ?

NMC: Khangthak lasiam leh la lam a lunglutte kiang a ka thuchah nop ahihleh lasatute'n ei lam a pan hihtheihna om pen a hoihtheitawp a zatsawm in panla lehang chih ka deih hi. Huai banah a bik in Pathian la bang ah, i lasak ding pen a la thute hoihtak a ngaihtuah in, Pathian Khasiangthou ompihna toh ei a satute mahmah bangle kimin dimdem a i omtheih photphot leh i lasak in mite lungsim dengkha leh zou hi'n ka thei. Huai banah kei ngaihdan in, lasak lunglut taktak i hihleh tep-le-nuam, dawntheih leh khamtheih chituamtuamte a kibuallouh hoih kasa.

 

 

LP: Lamka Post in lasiamte houlimpih a, a tanchin uh hiai bang a hong kitaklat zel pen hoih nasa hia ?

NMC: Lamka Post in hiai bang a i gam a lasiamte tanchin na suah uh hoih kasa mahmah a, lasiam i neihte pahtawina khat leng hi'n ka thei. Huai banah hiai tungtawn a mipite leh lasatute kal a kitheihsiam tuahna hoihzaw sem hong pian ka lam-en a, mimaltak inleng hiai i interview uh hamphatpih mahmah hi'n ka hithei.

 

I News uh tungtawn a la lam a khangtouhna ding a pan na hon lak uh thupi ka sa a, phat-huai leng ka honsa. I gam leh nam tawisangtu hiding in i biak Pathian in hon makaihtou zel hen aw. Kipaklua ka hi. Toupa'n Lamka Post vualzawl hen. 

Read 2293 times
Login to post comments