Angels' Vision News | January 12, 2012
Tuni a scrutiny om ah mi 6 kia in candidate 34 paisuak
10th Manipur Assembly Election 2012 toh kisai in zan a nomination file theih hun a bei toh kiton in tuni’n DC/CCpur office a BRGF Hall ah scrutiny neih in om hi. Tutung Manipur Assembly Election neihna ding ah constitution 6 apan mi 38 in nomination file ua, candidate 7 kia in 33 paisuak uhi. 55/Tipaimukh ah nomination file mi 7 pha ua, huaite lak ah JMBP candidate H. Sanglawm leh LJP candidate Chawngthalei kia ua, Dr. Chaltonlien Amo (INC), Dr. L. Fimate (TC), NgurriVung (Ind) leeh Ngursanglur (Ind) paisuak uhi.
56/Thanlon ah mi 6 in nomination file ua, a kia omlou in paisuak vek uhi. Candidate te ahihleh Vungzagin Valte (INC), Thangkholal Thangsing (AITC), K. Chinkhansuan (NCP), V. Hangkhanlian (NPP), T. Nengzakham (JMBP) leh Tuanzalian (CPI) hi uhi.
57/Henglep ah mi 7 in nomination a file na uah Lunkholal Haokip (Shivsena) kia a, Sehpu Haokip (NPF), Genlunthang (CPI), Dr. Jainson Haokip (MSCP), T. Manga Vaiphei (INC), T. Thangzalam Haokip (AITC) leh Thangliansang (NCP) paisuak uhi.
Tutung election a dia nomination file tamna pen 58/CCpur ah mi 8 in nomination file ua, 3 kia in 5 paisuak uhi. Scrutiny a paisuakte ahih uleh Phungzathang Tonsing (INC), K. Vungzalian (Ind), P. Songlianlal (TC) Thanglam Lhungdim (Shivsena) leh Chintuahlian (Ind) hi ua, Lallawisang (JMBP), H. Sanglawm (Ind), leh Chawngthalei (LJP) kia uhi.
59/Saikot ah nomination file mi 6 pha ua, a kia omlou in a vek un paisuak uhi. Amaute ahihleh TN Haokip (INC), M. Chungkhosei Haokip (BJP), Lalthalien (NCP), Lunkholal (TC), K. William Vaiphei (NPP) leh Holkholun Lhungdim (Shivsena) hi uhi. 60/Singngat ah leng nomination file mi 6 pha in Pisuak vek uhi. Amaute ahih uleh Ginsuanhau (INC), Ngaineikim (Ind), T. Hangkhanpao (TCP), Henlianthang Thanglet (MSCP), Thianching (Ind) leh Lunkhomang (CPI) hi uhi.
Tutung election om ding ah CCpur District in apan candidate 33 om ding a, huaite lak ah numei candidate 2 kia om ding hi.
-----------------------------------
Jacintha Lazarus IAS DEO/CCpur in in thusuah a bawlna ah hong tung ding Jan. 16,2012 sunnung dak 1:00 in BRGF Hall DC office ah CCpur District sunga Assembly constituency a candidate teng a ding in sum zatna (expenditure) toh kisai training om ding hi. Hiai hun ah candidate te ahihkei leh a agent te uh tel teitei ngai ding uh hi’n taklang hi.
-----------------------------------
Spirit of Oneness chih thupi pansan in 64th Zomi Nam Ni Celebration Committee saina in hongtung ding February 1 – 18 sung 2nd Zomi Nam Ni Football Tournament om ding hi. Hiai tournament a tel ut CDSA nuai a affiliated club te’n January 25 tan in CDSA office, Hiangtam Lamka ah entry fee Rs. 5,000 piaklut theih ding a, January 26 in Manager meeting om ngal ding hi. Hiai tournament ah champion club in Rs. 1 lakhs kipahman sang ding a, runners-up in Rs. 50,000 sang ding hi. Tuaban ah Best goalkeeper, Top scorer, man of the tournament leh man of the match kiang ah Rs. 1000/- kipahman piak hiding hi’n thutut kingah.
-----------------------------------
Rayburn High School a Primary Teacher sepna dia application pelut te’n zingchiang January 13, 2012 zinglam dak 10:30 in Rayburn High School ah written test om ding hidan in Thang Zamuan Tombing, Headmaster, Rayburn High School apan thutut kingah a, tuaban ah, academis session January 24 apan kipan ding chih himahleh January 31 a ding in suan in om a, admitted student kuapeuh January 31 zinglam dak 9:00 a full uniform toh school tunkim chiat ding in leng headmaster in theihsakna bawl hi.
-----------------------------------
Vangaitang Suak Unau Kipawlkhawm(VUK) saina in tuni zinglam dak 11:00 apan in Hiangtam Lamka a Upa T. Khamtual tenna inn ah Vaingaitang kum 85 chinna leh The Vangai Range Magazine 2012 honna programme om hi. Huai ah Langkhanpau Guite, Chairman ADC/CCpur kuallian a pang in Magazine hong a, Chief Host in Ngulkhenthang Tangpua, BDO/ Vangai pang hi. Khuallian in agenna ah mahni pianna khua ngaihnat poimawh hi’n gen a, Naga te’n leng apianna khua uh ngaina in asihhun un leng gari taitheihlouhna mun ah leng mihing tha a kipua in misi pen apianna khua mah ah vui uh hi’n gen hi. Kuapeuh in mahni pianna khua ngaina a, puahhoih poimawh hi’n gen hi.
-----------------------------------
RMSA/CCpur saina in tuni zinglam dak 11:00 in Blue Star Academy Auditorium ah “One Day training on filling of Data Capture Format” kichi om a, huai ah Huai Sian Mawi, Addl Dist Programme Manager, RMSA, CCpur Dist in sinsakna nei hi. Huai hun ah town area sung a private school tuamtuam apan Principal/Headmister tamtak kihel uhi.
-----------------------------------
Tedim Road lampi dung BRO nuai a bawlna Krismas leh kumthak lopna ziak a hun bangtan hiam a khawl nung in tuni’n sutzop in om nawn hi. Hiai lampi bawlna ahihleh nikum November iapat pat himahleh tunitan zoh hinailou hi. Hiai toh kisai a BRO nuai a nasemte’n Angel’s Vision News palaite kiang a a genna uah, nidang a lampi a bawl chiang ua worker 30 val bang in sem gige ua, himahleh tutung in mi 18 kia in sem ahih man un nasep leng ze-awl mahmah ahih gan hi. Nasemte lak ah singtangmi 12 leh Vaite 6 tel uhi. Hiai lampi bawlna ziak in gari taite leh khe a paite a ding in nawngkai thei mahmah a, hiai ziak in traffic jam leng om deuh gige hi’n leng kigen a, hiai sang a nasepna kinzaw le uh chih deihthu tamtak in Angel’s Vision palaite kiang ah gen uhi.
-----------------------------------
Angels' Vision News | January 11, 2012
(A news a ban na sim na ding in a thukigelh tung ah click zel in)
Who's Online
thang, system32, lammin, phunchiak, ghauzel, zwanmwat, Mtunglut, Lian ngaihte, chhurbuur, matei, tcngaihte,