BOAT, Imphal ah 64th Zomi Nam Ni
HQ veng a Lamka Press Club ah tuzing dak 8:30 in 64th Zomi Nam Ni Celebration Committee te'n Press/Media te kimuhpih in Feb 20, 2012 a 64th Zomi Nam Ni lop ding dan toh kisai pulakna nei uhi. Hiai hun ah State Level Zomi Nam Ni Celebration Committee a Chairman Dr. R Sanga in Zomi Nam Ni hongkipatdan tomkim tak in taklang a, Zomi Council panpihna in tukum in Imphal, Delhi leh Shillong ah Zomi Nam Ni lop hiding hi’n gen hi. State Level Zomi Nam Ni Celebration Committee kichi Feb 4, 2012 in Imphal ah kiphut khia a, Secy in N. Khamsuanthang guan aom hi'n gen hi.
Secy N. Khamsuanthang in Zomi Nam Ni lopna ding toh kisai agenna ah, tukum in Zomi Nam Ni lopna Manipur a dia auditorium suanhuai pen Palace Compound a om Bhagyachandra Open Air Theatre (BOAT) ah thupitak a lop hiding a, huai ah Chief Guest in Manipur Chief Minister O. Ibobi Singh pang ding a, Functional President in Gaikhanngam, President Manipur Pradesh Congress Committee hiding hi. Tuaban ah, Chief Host in Power Minister Phungzathang Tonsing leh Guest of Honour in Manipur a Tribal Ministers/ MLA-te , MDC te, Executive Member-te hiding un gen hi. Progam hun ah Guest appearance in Manipur a Actor minthang Gukul, Actress Abinao leh lasiam Sanananda te'n uap ding ua, ZAA apan Zomi lasiam tamtak in zaila awihna nei ding uhi. Hiai hun ah sound track kichi himhim zat hilou ding a, Zomi sung a music tumsiam telkhiat te’n live music bawl ding uh hi'n gen hi. Zomi Nam Ni theme 'Cultural Confromity' ahihdung zui in Kabui Cultural troupe; Tangkhul Cultural troupe; Thadou Cultural troupe; Mizo Cultural troupe; Hmar cultural troupe ban ah Zomi nuai a tribe 9 te apan cultural dance omvek ding a, Zillai, YVA, SSPP, YPA te'n pannaktaka la in kisak kholhna nasatak nei lellel hi'n gen hi. State Level Zomi Nam Ni lopna ding toh kisai in Lamka apan a kuansuk dingte a ding in gari ngaihtuahsak hiding hi’n Kapkhanmuan President ZSF GHQ in gen hi. Hiai hun ah mipi a tamtheipen kihel a, nuihmai kilawmtak toh hiai hun hong uap chiat ding in 64th Zomi Nam Ni Celebration Committee in mipite kiang ah chialna bawl hi.
…………………………………………….
Apaisa Feb 8, 2012 a CDSU in Mrs. Ngaisuanching sihna toh kisai a thusuah a bawl uh, a kisaipih thuneitute apan tunitan sepsuah bangmah a omlouh ziak in hongtung ding February 14 zankim apan February 15, 2012 zankim tan dakkal 24 sung daih ding CCpur district total bandh puang hi. CDSU in press release ah a taklat dan in hiai total bandh in Press/Media, District Hospital leh emergency services huamkhalou ding hi.
…………………………………………….
Emergency services lak ah damlou gimsia leh patau meikang telkha ding hi’n thusuak in taklang hi. Hiai toh kisai in mipi kuapeuh in hiai bandh pen Ms. Ngaisuanching suunna dan a ngai in leh thil phut uh lohchinna dia kithuahpihna pe ding in CDSU thusuak in taklang hi.
…………………………………………….
New Testament Baptist Churches Association (NTBC) saina in Suahhoih leh Ginum (Matt 25:21) chih thupi pansan in a 62veina Kumtawp vaihawmna leh Hagaulam Khawmpi 2012 February 12, 2012 tan daih ding zan nitak in Bible Hill, Rengkai ah kipan hi. Tuni zinglam dak 10:30 kikhawpna hun ah Rev. K. Hangnung in thutak genna hun zang a, Nepal leh Orrissa apan missionary report ngaihkhiakna om hi. Nitak biakna kikhop hun ah Rev. Sanga in Pathian thutak genna nei ding a, Manipur leh Sikkim apan Missionary report ngaihkhiakna neih hinawn ding hi. Hiai khawmpi ahih leh zingchiang Feb 12, 2012 nitak in khawmpi khakna om ding hi.
…………………………………………….
NYKS, Imphal Zone saina in Feb 8-10, 2012 sung Imphal a Arts & Culture Building ah "State Level Cutural Festival/ Yuva Kiriti kichi om a, CCpur ai-oh in Khonomphai Youth Club (Kom Culture) te tel uhi. Huai hun ah CCpur ai-oh a kuan Khonomphai Youth Club (Kom Cultural Troupe) te'n Tribal Folk Dance ah 1st a lak banuah Tribal Folk Music ah 2nd la ua, kipahman in Rs 10000/-, leh Rs 5000/- sang ua, Over all Best Dicipline ah leng kipahman in Rs 500/- sang uhi. Kipahman te ahihleh zan (Feb 10) in Prof N. Tombi Singh, Vice Chairman JNMBA in pekhia hi.
…………………………………………….
Mizoram Presbyterian Church, Manipur Area a ding Presbytery thak honna Rev. C. Vanlalhruaia, Ex-Moderator, Mizoram Synod in tuni sunma dak 10:30 in Hill Town Presbyterian Church ah nei hi. Thutut kingah dan in Manipur Area Presbytery nuai ah Lamka North, Lamka South, Tanggam leh Phaipi a khen in om a, amaute’n tuni a Presbytery thak honkhiakna program zoh ahih in Lamka North te’n Hill Town Presbyterian Church, Lamka South te’n Jubilee Church, D. Phailian, Tanggam te’n New Lamka Presbyterian Church leh Phaipi te’n Lamka Presbyterian Church pansan in amau area chiat ah Special Presbytery nei uhi.
…………………………………………….
Manipur Skill Development Society, MSDS saina a trade tuamtuam a training theihna dia interview hon neih uh hongtung ding February 13 & 14 in District Training Centre ah neih hinawn ding hi. Thutut kingah dan in February 13 & 14 in Flying Cats & Global Retail School leh Surya Vinayak Wellness Ltd., Noida apan official hunkhop hong pai in CCpur District sung a laisiam sepna neiloute a dia training theihna in interview hong nei ding uhi. Hiai hun ah Aviation, Travel, Tourism & Hospitality banah Beauty, hair, make-up leh Nail-art lampang a lunglutna nei kuapeuh in ngaihven theih ding hi. Hiai interview a lohchinna ngah te’n amau institute ah sum tawmchik seng in training thei ding ua, Manipur Skill Development Society in course fee piaksak vek ding hi. Interview a kuan ding te’n bio-data, Educational qualification certificate, passport size limlak copy 1 tawi ngai ding hi.
…………………………………………….
India gam a dia a masapenpen ding in Rayburn High School in Magic Studio kichi kisinsakna thak subject 3 a ding in tukum 2012 in pankhia ua, hiai toh kisai in tuni’n Rayburn PCI Church ah student-te nu-le-pate toh staff te’n meeting nei khawm uhi. Hiai magic studio kichi ahih leh teaching system toh kisai a India gam a kumlui September kha in patkhiak in om a, subject 3 English, Maths leh Science ah zat hiding a, computer set 37 pansan a student te sinsak hiding hi’n Thangzamuan Tombing, Headmaster, Rayburn High School apan thutut kingah hi.
…………………………………………….
JNV, Tuinom a Class VI sin ding lakna ding toh kisai in zingchiang February 12, 2012 in Rayburn High School, New Lamka ah Entrance Test om ding hi. Hiai entrance test ahih leh zinglam dak 9:30 in kipan ding a, entrance test a tel ding candidate teng zinglam dak 9:00 a exam centre a tunkim uh chiat ngai ding hi’n thutut kingah hi. Hiai entrance test neihna ding toh kisai in tuni’n Rayburn High School ah invigilator teng in rehearsal nei uhi.
…………………………………………….
Apaisa February 1, 2012 a Manipur University nuai a MA result puankhiat a om ah, MA (Education) a topper ngah Ms. Chinglianmawi @ Mawite d/o Upa K. Dongzasuan kipahpihna hun zatna tuni sun dak 12:00 in Upa K. Dongzasuan inn ah om hi. Hiai hun ah Rev. V. Khamvum, Chaplain, GBC in lohchinna ngah Chinglianmawi @ Mawite a ding in hasotna thu gen in Pathian kiang ah thumsakna nei hi.
Wallet Mang Zonna.
T. Dongsuan of Dorcas Road, New Lamka in asum bawm Zawng rong( Brown Colour) asung a ATB/SBI Card, PRAN CARD, PAN CARD, Driving Licence, CISF I Card leh ICICI Credit Card banah sum tamlou om mangsak a, amu te’n hehpihtak a Phone No. 9856364993/ 9612474740 te a theisak ding leh pekik ding in ngetna bawl hi. Hiai thilmang mutu kiang ah mitvakman leng piak chiam hi.
Who's Online
thang, system32, lammin, phunchiak, ghauzel, zwanmwat, Mtunglut, Lian ngaihte, chhurbuur, matei, tcngaihte,