Thuleng i buaipihdante uh
Internet, IT, electronics, magazine tungtawn a numeite sukzahlakna, sukminsiatna ahihkei leh, sum deih ziak a ut mawng a taksa dikloutak a zang numeite khenkhat ziakin numeite sukminsiat leh etdan dikloutak a et in om ua, numei tamtak in a gu thuak uhi. Eilak ah leng, internet, smart phone leh electronics vanzat changkang taktak a hong lut nung, MMS sex scandal tuamtuam a vangkim in kithangsek a, Jesu’ hunlai bang in, a mohkhu leh, a minsia tuh numeite mah ahi zel uhi.
Numei pasal kal a thangtatna leh khelhna kuamah in hoih i sakei ua, himahleh, hiai tungtang a, siangthou vilvel majority i hih uh a gintakhuaikei hi. Tuadan a et in, a muan mahmah uh tangvalte toh om khawmlai, kuamah in theilou ding saklai a, ‘mobile video’ a kila a kholak a thehdarh a om maimah chih khawng minsiatna tuakkha numeite tuh a vangsia ua, gamtang khial leng hilou, kisukminsiat ut ziak maimai ‘video’ a thehdarh a om zawkmah a omte tuh a vangse tawpkhawk hi ding uhi. Numei khenkhat lah saupi gellou in, a taksa uh mobile video kilasak pawl bang om maithei, tuabang video-te kholak leh pasalte lak a thehdarh a om a, amau (numeite) minsiat ding kuamah in khual hetlou ding ahihlam theilou ding uhi. Himahleh, a gintak sang un, mobile a va kilak laizang chih tuh, numei tamtakte’ a din thil zahlakhuai hi ding a, himahleh, a kikhel ding teng kikhel khinta zel ding hi. Sapte bel, ‘open’ tak in kizuak ua, ‘open’ tak in lem/video kila ua, sumdawnna in nei ua, a gamtatlai un, a tawptan (video/milem kilapen thehdarh a om ding hiam) chih thei khinsa ahi uh. Himahleh, eilawi lak a mobile video/milem a kila numeite sumdawnna ding a kila hi ding ua a gintakhuailouh banah, a tawptan muphalou ding ua, hilh leh theihsak in leng a om samkei ding uhi. Numeite dikloutak a phoulat leh sukminsiat ahih chiangun, Kristiante chilou hial in, i kipahpih mahmah uh hileh a kilawm a, a kintheilam a mi hilhsawn leh thehdarh i utlai uhi.
Numei pasal kal a omdan kilawmloute theihsuah leh matkhiak ahih chiangun, Jesu’ hunlai a angkawmnu mat ahihdan deuh in, numeite mah a minsia in a pangsek uhi. Tuni tan in, i khotang ah, numei omdan kilawm (sianthouna) kuapeuh in a kipoimohngaih a, inkuan leh khotang suminhoihtu leh suminse theitu numei mah a hi sim uhi. Hiai ngaihdan mah pansan a kinei ahi ngei ding a, pasal toh omdan kilawmlou a om numei theihsuah leh matkhiak ahih chiangin, numeite mah a minsia ahi ua, inkuan leh khotang houlimna in i zanglai uhi. Numeite sukminsiat baihlam, midangte’n amau gilvahna ding leh taksa utna sukpichinna ding a numei mah vanzat a neih baihlam mahmah hi. Numei leh pasal khat a om khawm ziak ua khelhna ahih bangbang in, amau gamtatna lemla, numei lem la a, zuak leh thehdarhtute gamtatna leng khelhna ahi. Numeite tuabang a ‘victimise’ a, Kristian pih unau numei khat minsiatna poisaloute i bang uhi.
Numei pasal kithuahna milem ahihkei leh numei milem thanghuai toh kisai a India dan khauhpenpen ahihleh IT Act a Sec 67 ahi. Hiai Act dungzui in, mihing lungsim leh gamtat khohei susethei ding ‘milem/video’ thanghuai bawl, thehdarh leh suahkhiate peuhmah kum 5 suangkultansak ahihkei leh, Rs 1 lakh liausak hi ding ua, 2vei matkhiak ahih uhleh, kum 10 suangkultan ahihkei leh Rs 2 lakh liausak hi ding chih ahi. IT Act in electronic lam deuh (video, audio, CD, website, computer, cell phone) huam hi. Numei hiam, numei leh pasal hiam in thehdarh/zuaksawn ding hilou a, amau deihtelna a mobile video/lem a kilak uh, a kithutuak ahih nak uhleh, mohpaih theih ahikei ua, himahleh, kithutuakna tellou tuabang milem/video te midang in a et theih ding ua, bawl leh, thehdarh tute IT Act nuai ah mohpaih theih ahi.
Tulai in numei khat a sungte adia vangsiathuaitak a, awklupna toh mobile ‘clip’ thu mekmat in a om hi. Mobile clip a soisak a om nu pen, a awklumnu ahihleh hihlouh media group khat in a taklang a, mipite’n thupukna i bawl ding uhi. Himahleh, lungsim subuai khat tuh, soisak a om numei pen, a awklumpen ahi chi a, mobile a thehdarh masapen kua, ahi de aw, mobile clip kua khut a kipan a, kua thehdarh ahi de aw, numei awklupna ziak ‘tangthu’ dik mah hiam. Numei soisatute Vaite ahih uhleh, Zosuante khut a bangchidana hiai ‘clip’ honglut kha? Alatu eimi mah hia ahihkei leh,Vaite? (eimi hial a hi ngaltel dia hia) Vaite in a lak uh, eimi’ khut a bangchi lut, a thehdarhtu (eimi pen) mihai mahmah hi ding. Soisak a om pen, eimi hi chitchiatkei leh leng, a thuakdan a hehpihhuai lokhin a, video clip va thehdarh laizangna in thil hoihlou tungsa, a khekleh. A thehdarhtu in, a awklumpen leh, soisak a om pen mimal a thei ahihleh, saikak theihna lungsim neilou hiam? A mikibang a ngaihdan nei ahihleh, Vai numeite gamtatdan leng diktuanlou ahihna ah, misi leh sungkuante khualna bek a, police/media a report theihlouh hiam? bang dia thehdarh sese? Thu, i buaipihdan uh a dikkei hi. Misi pen, na sanggamnu/na tanu hileh bang na chi dia?
Koute jaw Khris nasemtein leh Pathian thuguk kemte bangin min hon thei uhen. 1 Kor 4:1
Editorial | The Lamka Post May 05, 2011
Who's Online
thang, system32, lammin, phunchiak, ghauzel, zwanmwat, Mtunglut, Lian ngaihte, chhurbuur, matei, tcngaihte,