ZogamOnline

Lamka khopi ah ‘gang system’ leh ‘hooliganism’ kichi kum tamtak aom louh nung in, tulai in khangnou, adiakin pasal taksa piching panpan pawl te’n mun khenkhatkhat ah a hon pankhe nawn uhi. Kuapeuh i tuailai hun ah i kiphatsak hunlai, lawmlevual ngaihna, kholak kiphatsakna kha in a hon mat hun a om vek ding. Himahleh, taihilhna leh pichingte’ thuhilhna ngaikhe peihlou, a hun phet, a leklua chih omsakloute, ‘hero’ apat ‘zero’ a hongsuak uh chih mit mahmah a muh theih di’n i theihchiat uh a gintakhuai. Kithuhilhna lam, nulepate, saptuam makaite, khotang makaite’ mohpuakna ah koih leng, tuni a i houlim ut pen tuh, i khotang bouruak bangchileh hiai mi kiphasak honte apat humbit in aom thei ding a, bang chi’n panla leng, hichi bang a kihonpawl khawm noinoi (a hoihlou lam in) sukbei ahi ding a, bang chi panlak leng i tate un gamtat, khohei kilawm, sang a lianzaw zahtak dan a zil thei ding ua.

Kum masa a Don Bosco school student-te leh St Mary’s school te a kisukbuai ziak ua St Mary’s thuneite’n naupang hunkhop a nohkhiak ziakun school thuneite’ a lehbuai dek mawk uhi. Hiai buaina  a ‘genesis’ leh thiltungte chiantak a theih hikei mahleh, student ‘gang’ khat in school thuneite’ theihpihlouh a compound nusia a school dang a kaite va kihonsualpih uh chih ahi. Tuabang a gamtang student-te thunun dingdan tungtang ah ngaihdan tamtak aom ding a, ngaihdan khat om thei tuh, hiai student-te school apat nohkhiak . Hiai student buaina bawlte’ tung a school thuneite a khauhpai sim uhleh, pawlpi khenkhat leh nulepate pichinhuailoutak in hong kigolh ua, school thuneite a lehbuai dek mawk uhi. Hiai thiltung in ‘gang system’ leh ‘hooliganism (tuailai kiphatsakna) apat i tuailaite humbit thei taktak nailou ihi uh chih a taklang hi a theih in aom hi. Hiai thiltung poimohloupi a thubuai lianpi (blown out of proportion) i suah ziakun mipi’n i thei uh chihman ahi a, veng tuamtuam, school tuamtuam ah 2010-2011 kikal sung in thiltung tampi aomta ding. Zanlam deuh in leng school khat apat khangnou bangzahhiam te’n  school dang khat a pasal naupang khat vuak ding a, ‘gate’ a va tang uh chihthu aom. Tha hat leh lau neilou kisa a veng sung leh kongzing a, ahonhon a kizui a, mi toh kisukbuai dingdan ngaihtuah (utloupi a mi toh kisubuai kha hilou) khangnou muh ding aom zeuhzeuh, hiai a sang a lianzawte zahlouhna leh kiphatsakna, kisaktheihna apat i khangnoute uh i siansuahna ding un pichingte leh heutute’n bang chi’n pan i la ua.

Nam sepaih i neih ma un ‘gang system’ aom a, ‘umpapa’ kichi i thei chiat ding uh. Himahleh, thautawi pawl a hong om leh, ‘gang system’ kichi aomlouhna khua, a sawt ta. Thautawi i om nawnkei chihna hilou in, thautawi te’n sorkar toh suai a hon kai ua, sa leh gal a kisukbuaina a ventak ziak a gang system hong kipankhe nawn dek himaithei. Ahihleh, tuni a i tuailai khenkhatte un ‘umpapate’ ‘role model’ a nei ahi ding uam?, ahih uh a gintakhuaikei. Bangziak in, umpapate’ hatlai in tulai a khangnoute a piang nailou ngen ahi sim ding ua, tuni a ‘umpapa member’ damlai aom leh leng, khangnoute’ ‘role model’ a neih theih ding hial ahihkei leh, a hunluite sut a (retrospect) thupi vasak luatna ding aomkei. A hatlai un bel, khangnou tamlou ana zolzou maithei uh, himahleh, tuni’n mi a kipilta. Tuni a khangnou tamtakte lungsim pikawi thei khat tuh, ‘hip hop culture’ ‘rock music’ chihte a hong hi nawn hi. ‘Hip hop’ leh ‘rock music’ a sia pumpi ahikei, himahleh, hiai in a tunkhawm te ahi asia. Eilawi in namsangzaw leh khanglou baihzawte’ ‘culture’ i copy uhleh, i noptalna ding chet ua copy-te ihih nak khem ziakun, i khanlohna uh khantouhna leh pilna a neilou in i siatpih gige uhi.

Tulai i khangnoute un a haichilh mahmah nawn dang khat uh; Korean ‘punk’ culture ahi. Korea-te sep-le-bawl lam hi’n, Pathian ah hileh mi thupi leh ettontham himahle uh, a khotang uh a ‘liberal’ ziakin, a hoihlou aomsam hi. I khangnoute un, a hoihlouhna teng chiamteh in,  tulai a ahonhon a kithuah a ‘lauh neilou’ deuhmai (dandeuh) a mi toh kisukbuai tuh, Korean movies a, a ‘role model’te uh chetdan khat ahi. A by-product dang khat, ‘mobile video sex clip’ bawlkhawm. Gamdang a tatsiatna tungte, ei lak hongtungta. Khangnou’ lai a kiphatsak, harh velvulna mihing hinkhua in a hon puakkhiak symptom-te hi a, a lamdang lua bel  hikei. Ahih ziakin, hiai hunsung a hutkhiak a omte, a damsung uh hoih tangpi ua, khahsuah a omte a damsung uh kise tangpi ahih ziakin, maban nulepate dingte tuabang a batlouh zel uh, i khang uh mong thei, Pathian thangpaihna i tung ua tung ding ahihdan thei in nulepate leh heutute’n hun paisate apat pilna ngah a, pan i lak uh a hunta.

Tuni thupil: Ka tapa aw, na pa’ thuhilhna ngaikhia inla, na nu’ sinsakna pampaih ken. A hang bel, tuate na lutang zepna pakkhi hi ding a, na ngawng zepna khainiang hi ding hi-Paunak 1:8-9

Comments (7)

Write comment

You must be logged in to post a comment. Please register if you do not have an account yet.

< Prev		Next >