A taktak gam leh Manipur Singtangmite
Manipur a teng singtangmite tuh mi tamlou chik leh kigamlaloupi ngen himahlehang kithutuaklahpen pawl hiding in a gintakhuai hi. I pankhawm theihlouhna ziak bulpi uh leng hi, leh, politics lam toh kisai a ma i sawn taktak theihlouhna ziak uh leng hi khat tuh i hihna uh i itluat zezen uh ahi. Manipur a singtangmite tuh a tangpi thu a gen in Naga, Kuki leh Zomi in i kikhen ua, i hihna uh it chiat ihihman un a tuam chiat in i bitna ding uh lampi i ngaihtuah uhi. Manipur sorkar i sukdong chiang un phualpi sorkar kiang ah i tai zel ua, himahleh, phualpi sorkar in Naga, Kuki leh Zomi a i kikhenna uh hon theihsiampih in a hon awlmoh taktak diam? Gintak a haksa mahmah hi. Phualpi sorkar in tuh India pumpi en a vaihawm ahi a, eiloi in ittak a ‘nomeclature’ i chih zen mahte uh ama a dia neulaw mahmah ahi hi. I kikhennennate uh ama a dia awlmohhuai tham ching hikei mahleh hon awlmohlou a hikei a, singtangmite nam tuantualte ihihna ziak un bel a hon awlmoh tham hi.
Ahihleh, singtangmite ihihna ziak ua phualpi sorkar in hon awlmoh ahihleh a hon awlmoh diak theihna dia i ‘nomenclature’ ittakte uh koihkhe tuanlou a leng singtangmi dan bek a pankhawm vek theih hilou hiam? Zomi Council in Home Minister kiang a Manipur gamgi huamsung a Article 244A pansan a ADC 6 omsate huap a Autonomous Tribal State bawlkhiak ding leh huai bial teng 6th Schedule nuai a omsak ding ngetna memorandum a khiak un Manipur singtangmite huai dia hon chou a bang hi.
India sorkar in NSCN-IM toh hiamkham thukhun a neih uh khovel pumpi a Nagate omna teng huapsak a hon sawm ua pat Manipur phaizangmite a hong khanglou ua, kithutuaktak in Manipur gamgi kepbitna di’n naktak in pan hon la uhi. Hat leng a hat petmah ua, phualpi sorkar in Manipur gamgi heilamdang hilou ding hidan a tamveitak Manipur mipite kiang a thuchiam ana bawltak banah zan zek in leng Home Minister in Imphal ah state gamgi heilamdang hilou ding hi’n Manipur mipite khamuan nawn hi. Hichibang dinmun ah, Manipur state sorkar toh kizopna ‘beisak’ zen in Nagate’n ‘alternative arrangement’ ngen mahle uh a lohching tuan duam? Manipur gamgi sukeklou dia suaikaisa SoO nuai a om khenkhatte’n statehood ngen mawk lehang leng i suaikaihna ua ei leh ei kimadal khin hizomah ihihna uah i lohching tuan duam?
I deihthusam bangtak tuh nget theih mah ahi, hilehleng, a taktak gam ah i deihthusam pen piang zou ding hina hiam chih ngaihtuah ngai ahi. Huai ziak mah a Zomi Council in Autonomous Tribal State bawlkhiak ding a nget pen state sorkar leh phualpi sorkar valhsiam ding zawng, a taktak gam toh kituakpen mah hilou ding hiam chi ut ihi. Kithutuaktak in Autonomous Tribal State ngen lehang leng a minsa dan a lohmai theih ding a hituankei a, state sorkar in tuh dal theihtawp a hon dal thouthou ding ahihdan theihsa ahi. Hilehleng, SoO nuai a omte suaikaihna ahih banah Manipur in a zakdah penpen in state gamgi sukeklou ding ahihna ah i kithutuah nak ua leh thil hithei ahi.
Article 244A pansan a Autonomous Tribal State bawlkhiak hileh bel Manipur state sung a om hinapi a ATS in a tuam a “Legislature or Council of Ministers or both” nei thei ding chihna ahi. ATS huam sung teng 6th Schedule nuai a omsak ding chih hizomah ahihna ah “Legislature or Council of Ministers or both” nei thei ding ATS thuneihna ding tuh niam hetlou ding chihna ahi. Huai banah, tutan i kipal-awkna uh leh i it mahmah i ‘nomenclature’ chiat uh leng i mansuah tuankei ding ua, Meghalaya a Khasi Hills, Jaintia Hills leh Garo Hills a om bang deuh in ATS sung ah pha i sak dan tak un i kikhen sawn ding ua himai ahi.
A taktak gam dinmun toh entuah a hiai dan a thil i ngaihtuah leh Autonomous Tribal State tuh tulel dinmun a Manipur singtangmite a dia a hoihpen hi a theih in a om hi. Huai banah, a hoihpen chauh leng hilou a, a lampi omsun leng hizomah a hidiam chihsim in leng a om lai hi. Huai ziak in, Manipur a singtangmite’n bitna i deih taktak ua leh i nomenclature uh koihdap zual (paih ding hilou) a, kithutuaktak a singtangmi ihihna mah uh masuan phot hoih ding ahi.
Thupi: Gam tuh Toupa a ahi a, namchih tung a vaihawmpa a hingal a. Sam 22:28
Who's Online
thang, system32, lammin, phunchiak, ghauzel, zwanmwat, Mtunglut, Lian ngaihte, chhurbuur, matei, tcngaihte,