Lamka Post Editorial

The Lamka Post Editorial | July 19, 2008

Details

Category: Lamka Post Editorial

Published on Saturday, 19 July 2008 11:58

Written by kawlva

Thupi: Gentheite leh pa neiloute vai tuh hawm unla; haksa thuakte leh tagate tung ah hih dik un. Sam 82:3

Singtang lam a i mi-le-sate haksatna
I lak ua namkal buaina ziak in 1997-98 kum in mihing hinna manphatak leh inn-le-lou tamtak manthang hi. Huai banah, sungkuan khosakna tamtak kisegawp in i khotang bouruak ngeina leng kikheng petmah hi. Hiai tualgal in nasatak a minautangte hinkhua a sukkhak banah sorkar nasan suakta tuanlou in singtang lam a sorkar office teng in, bit lawmlawm kei mahleh mun bitzaw dan a ngaih, Lamka khopi pansan in nna sem uhi. Tualgal om ahihman leh kuapeuh in i hinna uh iit chiat i hihna uah ahiding him in i ngai ua i theisiam uhi. Vangphathuaitak in i lak uah lemna leh muanna in vai hon hawm nawn a, tu’n bel kuapeuh i galmuang mahmahta uhi. Himahleh, tualgal a bei nung kum 10 bang paita mahleh singtang lam a sorkar office te’n Lamka pansan den mawk uhi. Singngat sub-division kia hikei mahleh, Singngat SDO/BDO in Singngat luah nawn sawmlou a Lamka khopi a pansan nilouh tungtang DC/CCpur kiang ah Singngat a KSO, KZP, ZSP leh SSPP kikhaikhawmna Joint Students’ Organisation in tut hi.

Bang department hiam a hih ding, neuchik hitaleh leng, neih ziak in Lamka mite’n Imphal naih ngai gige mawk leh bangchituk in a buaihuai dia? Etsakna di’n form fill-up lel ding khat neih ziak in sum-le-pai leh tha-le-zung banah nitha paih zen a Imphal naih ngai gige mawk leh bangchituk in i hehthasuak in i thangpai dia? I vangsiat ngial a leh a ‘dealing clerk’ bang ana kaikei zomah lai maithei! Thawnkik a a zinglam chiang a vang et nawn ngai ding a, a huchihkei leh Imphal a giah ngai ding chihna suak hi. Hiai bang dinmun ah mi kamtawmpen leng hang zukzuk ding a, mi zaidampen leng amah khamkham in heh mahmah sam ding in gintakhuai hi. Lamka leh singtang lam kikawmtuahna leh kithuzakna toh teh dia Imphal leh Lamka kikal kikawmtuahna leh kithuzakna bang hoih petmah hilai hi. Sub-division sung a singtang khuate’n sub-divisional headquarter a SDO/BDO office a hih ding a neih teng ua Singngat a naih ding uh leng thil haksa ahihlai a tua Lamka a hong naih uh ngai gige ding pen haksa mahmah ding hi. Lamka a hong tun chiang un leng hun tamtak ah a ‘vang un zoulou’ in ‘dealing clerk’ ana kailouh ni tuak mun mahmah zomah ding un gintakhuai hi.

Mipi’n hiai bang haksatna a tuah uh beisakna ding in DC/CCpur banah SDO/BDO-te mahmah in kintak a pan a lak uh poimoh hi. Hun sawtpi office luahlouh a a om nung in bel a luah nawnna ding in haksatna tampi om ngei ding hi. Himahleh, haksatna neilou kuamah omlou a, innsung a a pa pen in suanlam a bawlbawl mawk a leh bel a innsung buai deuhdeuh ding hi. Innsung a pa pen in sub-divisional headquarter luah ding in thupukna bawl phot peuhmah leh bel a innsungmite’n a zuihlouh-theilouh uh hong hiding a, thil paidan awl in hong dik di’n lamethuai hi. Hiai tungtang a haksatna tuak Singngat sub-division kia hikei mahleh, SDO/BDO office Singngat a tunding nawnna dia DC/CCpur kiang a JSO in ngetna a bawl uh toh vauna thuah uhi. SDO leh a staff te’n mipi haksatna a ngeingaihkei ua a ngetna uh August 15, 2008 tan a pichin ahihkeileh utleh-utlou a kiphinna a pat uh ngai ding hidan in leh thiltung deihhuailou a om a leh sorkar in a moh khu ding hidan in JSO/Singngat in DC/CCpur theisak hi. Singngat mipite haksatna pen zuau phuahtawm hilou a, a ngetna uh leng thudik mah ahi. Sorkar nasemte bel sorkar in a koihna mun mun a a om ding mah uh ahi. Tualgal a omlai in bel i kitheisiam ua, tualgal a ven nung a leng tu’n kum 10 bang kivei nawn manta hi. Mipi lam apat nohna a omma a leng sorkar nasemte’n a omna mun chiat uh a luahpah ding uh himahleh tua mipite kiphin ngai ding khop a thil a paisau pen diklou hi. Huai ziak in, sub-division dangte leng hong kipatma se ua i mipite haksatna phawkpih a, DC/CCpur leh a kisaipih thuneitute’n Singngat hi’n sub-division dangte tungtang hitaleh, kintak a a ngaihtuah ua, kiphin ngai seselou a thil paidan diklou a bawl dik pah uh poimoh mahmah hi.

This email address is being protected from spambots. You need JavaScript enabled to view it.

• < Prev
• Next >