ZogamOnline

FOOTBALL DANDEUH in, la leh music lam i siamlouh hu un eimite’n i ngaina mahmah uhi. A upa lamte’n la leh music a ging nem deuh i ngaina ua, khangthak lamte’n a bengseng thei lamlam hileh kilawm i ngaina uhi. Trash, Alternative, punk leh hip-hop chihte khong a kithankhiakma tham in rock, heavy metal chihte’n Lamka zang hon zelsuak khinta hi. Huai hunlai in, a music toh a kituahlouh ziak leh ei lak a dia a hihtheih nailouh ziak in nungak-tangval ahihkeileh nupa bang music toh kituak a lam khawm helhel chih omlou hi. Lam khawm helhel omlou i chih chiang in a lam omlou chihna hithahahlou a, concert bang a om chiang in mipi teng pheng lam in, buaina a omkei leh concert lohchinglou chihna toh kibang phial in, buaina piang teitei sek hi. Concert a buaina piang i chih thil tuamtuam ziak hithou mahleh a tangpi in concert en dia kuante’n zu leh khamtheih kham nung a hunnuam zatna mun dia i zat ziak uh ahi. Mi toh kiselbuai a kisualloute lak ah leng buaina chituam deuh om thouthou sek a, nidang a Lamka a concert om ziak a zi ahihkeileh pasal neihloh bang leng hunkhop i om uh gintakhuai hi.

Huai banah, Lamka a concert om ziak a hiai khovel a hong piangkhia leng khangthakte lak ah hunkhoptak i om uh gintakhuai lai hi. Music leh music toh kisai himhim i zatsiamlouh ziak ua hiai bang teng ana paltou i hi ua, huai ziak mah in saptuam lam in rock music leh heavy metal nakpitak in hon soisel ua, setan vai, setan biakna hidan in dem uhi. Dem di’n leng a music gin himhim leh a la thu tampite ah demna ding a om mah a, a sel utte a di’n leng selna ding a tawm tuankei. Setan vai ahihleh ahihlouh pen thutuam hizezen leh, zu leh khamtheih toh a kizuikei chihna ngaihna bel omlou himhim hi. La leh music lam a khovel pumpi a minthangte tamtak zu leh khamtheih’ suak-le-sal ahi ua, a minthang deuh diak Jim Morrison, Jimmy Hendrix, Janis Joplin leh sawt nailou in Kurt Cobain, khamtheih ziak in a si uhi. Huai banah, numei leh pasal kal a thangtatna tungtawn a kilohsawn AIDS natna ziak in Freddy Mecury leng ana sita hi. Ei lak ah ahihleh, music lam a lutte sang mah in leng, music i siamlouh hang un, a ngainatu mipite’n zu leh khamtheih toh music i kizuisak hoih mahmah ua, khovel in hon phalou ahi sim hi.

Tua i gente sawt naikei mahleh ‘nidanglai’ chih ding ahi dia, tuchiang in bel khang leh music kithang leng kidangta hi. Khang leh music kithang leng kidangta ahihman in mipite lungput leh chindan leng a kidangta chih uthuai mahmah mahleh kichithei nailou hi. A music in zil mahleh nungak-tangval ahihkeileh nupa bang lam khawm helhel kichi om nai tuanlou a, concert a om chiang a kuamah a lam omlou chihna leng hinai tuanlou hi. Mipite tunitan in kipheng lam lai a, zu leh khamtheih kham nung a hunnuam zatna mun ding mah in kizanglai hi. Mipi phenglamna lak a kinawkkha leh kihekkha zek a om chiang bang in leng buaina piang pahpah thou lai hi. I gensa teng gen nawnnawn sang in a tomkim in gen leng, ‘nidanglai’ hun ah tunitan in i omlai uhi. Hiai bang dinmun ah, Lamka zang a concert kichi himhim sai vetlouh di’n hoih sim a bang hi. Concert ah gamngaihla sa in Pathian la sa mahlehang mipite om ding dan pen rock music a gin chiang a a om dan uh toh kigamlalou hial ding ahi. Himahleh, concert khong zalentak leh buaina om hetlou a nuamtak a zat ding en kiban nailou ahi chi’n concert nei ngeikei leng, supluatna hikholkei mahleh, siamlouh khat nei gige kisuak ding ahi.

Tu’n COMFA panlakna in mautaam kial thuakte a dia panpihna kaihkhawmna di’n Concert For The Hungry om dek hi. Mi’n concert a et chiang un, buaina a pianna mun om tham mahleh, a tangpi in zukham-sakhamte leng mahni nuamsak dan chiat in lam vek ua, kihetkha in kinawkkha mahle uh mipi tamtak kikaihkhawmna concert a bel thil om ding mah hidan in koih ua kuamah kiselbuai gentaklouh kisual hetlou uhi. Concert i chih hunnuam zatna ding leh a nuam theitawp a zat ding mah ahi. Himahleh, buaina bawl ding zong a zat bel changkanghuailou tawpkhawk leh khual apat hong uapte hon muh ding bang a zahlakhuai tawpkhawk khat ahi. Concert For The Hungry pen thovengtak a leh a nuam theitawp a zat banah a tup pipen, mautaam kial thuakte panpihna ding pen kuapeuh in i mangngilhlouh ua, huai banah, ‘nidanglai’ hun i taisanna concert ahihding deihhuai petmah hi.

Comments (3)

Write comment

You must be logged in to post a comment. Please register if you do not have an account yet.

< Prev		Next >