MANIPUR EXPRESS | OCTOBER 03, 2010
Pankhawm ding thu leh singtangmite khawsuahna ding gen uh
Zomi Council makaih in MDC-te vaidawnna leh Seminar om
Lamka, Oct 2: Zomi Council in CCpur district apan MDC chingte vaidawnna kawm in Thanlon sub-divn sunga Mualnuam khua ah ni 1 sung Seminar a om banah MDC thakte vaidawnna leng om a, huai ah amaute adia thumsakna leh hanthawnna thu manpha tamtak genkhiak in om hi.
Ningani nitak in ‘One Day Seminar in Felicitation of elected MDCs’ ah district sung apan telkhiak a om MDC 24 laka 21 kihel uh a, nitak masa ah MDC-te pahtawina hun zang in Zomi Council in amaute kiangah thilpiak pia a, Local Pastor EBCC Mualnuam in thumsakna nei hi. Pahtawi a om MDC-te hanthawnna leh hasotna leng Chairman, Zomi Council leh Ex-Chairman LB Sona in nei uhi. Anipini in ‘Power and functions of MDC vis-à-vis Protection of Tribal Rights’ chih thupi zangin Chinlunthang, LLB in seminar makaih a, M Vumlianmang in Keynote Addess gen hi. Hiai hunah Panelist in George Zangkholian LLB pang hi. Tua khit in K. Vungzamoi in ‘Grass-root level democracy in Manipur Hill Areas: The road ahead’ chih thupi pansan in seminar makaih nawn a, amah khit in Rajeev Bhattacharya, Chief of Bureau (NER) The Bengal Post in ‘Role of Media in Conflict Situations’ chih thupi zang in seminar makaih hi.
Hiai seminar nanungzawte ah LB Sona leh S Singlianmang Guite in pang uhi. Letpu Haokip, Chairman COPTAM in keynote address gen hi.Nipini nitak in MDC thakte apan thugenna, ZRO President Thang Lian Pau apan hasotna thugen om a, Tuivai Area Development Committee tr’n MDC-te kiangah thilpiak (malta tun khat chiat) pia uhi. Tutung seminar ah bang chileh singtangmite khawsuak thei ding hiam chih tungtang naktaka gen hi a, Seminar tuamtuam a paper presentation zawh ahihphet in ngaihdan kikupna hun neih hizel a, tua hunah singtangmite adia khawsuah theihna dia pankhawm a poimawh dan naktaka gen in om hi. Kuki Innpi Manipur Vice President Jangngam Haokip in Kuki ahihkeileh Zomi chi a kigen tuamtuam hun hunawnlou ahihdan leh unau khat-sisan khat i hihdan uh gen a, min a kilawhna atuam ziak lel a kituambawl hun nawnlou ahihdan gen hi.
Tuabang mah in COPTAM Chairman Letpu Haokip in leng singtang mite kipumkhat theihlouh ziaka mite sikden leh thaneh a om ahihdan tangkou in tutung Census Overlapping ziakin thildang tamtak pholhsuah a om ahihdan gen hi. SPF solkar in kum 20 mahmah neihlouh a om MDC election ahon saikhiakna tungah seminar a paikhawmte’n kipahhuaisa uh a, himahleh state danga 6th Schedule omna munte a power neihzah nei dia bawl hiding chia thuchiam abawl uh tuni tan pichin ahihlouh pen lamdang sakthu gen uhi. Tua banah, MDC telching thak a omte’n state thuneitute ahihkei leh Party high-command-te thu sang maha mipi deihtelna zui zaw dia deihsakna tamtak leng genkhiak in om hi. Singtang gam apan khangkhia, singtang mite vaihawmna mun taktak pen singtang gam mah ahihziaka tutung seminar ah lampi haksa in tawlhuai mahleh singtang mah a neih ahihna ah hiai hun zatna a kihel makai tamtak in phathuai sakthu uh gen uhi.
Tunung in ADC dangte tawh kithuzak in hiai banga ngaihdan kikup khawmna neihzom zel hileh chi’n leng tamtakte’n ngaihdan gen uhi. ZRO President Thang Lian Pau in a thugenna ah, tutung a MDC thakte muanhuai a sakdan gen in amaute kiangah thuvaikhak tamlou nei hi. Aman gospel centenary kum ahihtawh kiton in kingaihdam tuahna in vai ahawm ding deih ahihdan gen a, tua tawh ton in MDC thakte pen lemna leh muanna banah kipumkhatna tuntu ahih uh lamen a, amaute ziak mah a unau kitheih thakna aom ding deih hi’n gen hi. Tua banah, amaute MDC dia party high-command hiam in atel uh hilou a mipi’n atel uh ahihdan atompen a kum 5 sung bek thei den tinten ding in ngen hi.
Aman a genzelna ah, MDC thakte’n gam leh nam a itna ziakua, gam leh nam pethei Pathian abuan thak ua, tua ziak mah a ihmu mawh hial a hongpan uh deih ahihdan leh midang namdangte’n agam leitang uh ‘inches’ 1 lel leng piakkhiak ding a phallouh lai ua, ‘eite’ apan laksak a om gam leh leitangte lakik di’n hong kisa un chi hi. Mipi ai-oh dia telching a omte’n angma siallou ding; huaiham lou ding; tutna mun dia kilawm leh khawlna mun dia kilawm ah ‘tu’ a ‘khawl’ ding in leng President in thukhak hi. Seminar atelte’n Nipini nitaklam in Mualnuam khua mipite leh MDC thakte tawh ankuang sawkkhawm uhi.
Jawan Gospel Camping omding
Lamka, Oct-2: EOC Missions Deptt in sepaih panglai, Police leh ex-servicemen-te ading in “Jawan Gospel Camping” kichi Dec 16-19, 2010 sung ECCI campus a Evangelical College of Theology (ECT) ah bawlsawm uh a, huai ah Rev Dr Kh. Khaizakham, Principal, ECT in thugen ding hi. Huai a telnuamte adingin mi 1 zelin registration fee Rs. 200 sun ngai ding chihthu om hi.
UK ah MA (Theo) sin dingin kuan ding
Lamka, Oct-2: Nang Suan Mung Hatzaw s/o Dr T. Hatzaw of Go Cin Khup Veng, New Lamka in England(UK) gam Manchester a Leeds’ University ah MA (Theology) zil ding in kuan ding chihthu om hi. Amah tulelin New Delhi ah om a, Oct 5, 2010 (Tuesday) zingsang baihtakin New Delhi apan England zuan in lenna in lengkhe ding hi.
Khuado Pawi- 2010 zang uh
Lamka, Oct 2: Tedim Chin Cultural Club HQ saina in tuni’n Lanva a Tedim Chin Cultural Hall ah Khuado Pawi-2010 zang uhi. Huai ah Cultural show leh Cultural dance tuamtuam lahna om a, Pastor Kam Piang in minam ading in thumsak a, Khampu Hatzaw, AE (Electric) in Khuado Pawi tawh kisai thugen hi.
DC in khua 18 a nasepna enkhia
Lamka, Oct 2: Mahatma Gandhi (Father of the Nation) pian ni Oct 2 a National Cleanliness Day kizang zel bangin tuni in leng CCpur Dist ah National Cleanliness Day zat hi a, govt office asemte’n amau office campus chiat hahsiang uh a, khaw tuamtuam in leng amau khua/ vengsung hahsiang in social work nei uhi. Cleanliness Day zat hun laitakin DC/CCpur Jacintha Lazarus in M. Songgel; Molnom; M. Ramthar; Khomoi; Tuibuong DHQ; B. Vengnom; B. Vaiphei Veng; Hmar Veng; Sielmat; Rengkai; Muolvaiphei, Saikot; Hmuia Veng; Lailam Veng, Hebron Veng New Lamka; Vengnuam New Lamka; Konpui leh Zomi Colony pha in nasepnate enkhia hi. Aman tuni sunnung in leng Tuining leh B.Kalzang khua pha a, B.Kalzang a MSDP fund a school kibawl enkhia in Tuining khua ah BRGF leh NREGS nasepnate enkhia hi.
S. Uttam Singh a tenna inn tungkik
Lamka, Oct 2: Rayburn High School class VIII-A simlel Salam Uttam Singh (15) s/o Salam Ibosana Singh of Thanga Salam Leikai (Bishnupur Dist) Sept 29, 2010 sunnung in Phailian a Rayburn Hostel apan pawtkhia zan nitak in a Thanga Salem Leikai a a tenna inn uh tung hi’n Police apan kiza hi.
Khongsai Inpi makai ding guang
Lamka, Oct 2: Khongsai Inpi/ CCpur te’n tuni zinglam in N. Molhoi ah “Installation Service of New Office Bearer 2010-13” nei uh a, huai ah mi tamtak paikhawm in bawng 1 leh vok 1 gou in ankuang umkhawm uhi. N. Lhungdim, President, Khongsai Inpi GHQ in Khongsai Inpi/ CCpur makaithakte kichiamsak a, Rev. Nguljathang, Director Youth & Music, ECA in hasotna leh thumsakna nei hi. Kum 2010-13 sunga Khongsai Inpi/ CCpur makaithakte ahihleh President in Daineikung Pudaite; V/President in Mangkhokam Khongsai & Hemkholal Khongsai; Secy. General in Paolen Khongsai; Joint Secy in L. Khupkhothang; Secy Finance in Lamkhosem Khongsai; Secy Inf. in Tongminthang Khongsai; Secy Culture & Custom ah Seilhun & Lettinkhai hi uhi. Adviser din Khupzadou; Songkhohen Khongsai; Jai Khongsai; Thangkhopao Khongsai leh Jamkhojang Khongsai guang uhi.
HOPE te’n Hospital hahsiang
Lamka, Oct 2: Lamka leh akim a NGOte kikhaikhawmna “Humanitarian Organisation for Progress & Empowerment (HOPE)” te’n tuni zingsang dak 6:30 apan Dist Hospital ah Cleanliness Day zang uh a, Hospital campus hahsiang in rickshaw zangin niin bua uhi. Amau Dist Hospital a Surgical Ward, Medicine Ward leh Maternity & Gyanea Ward a ekbuk leh zunbukte brush zang in hoihtak in hahsiang uh a, ekbuk leh zunbukte siangtuan mahmah hi. HOPE te’n social work neih sung ua zatding in Assam Rifles te’n Phenyl, munphiah (bloom) leh tui tamtak water tanker in supply uhi.
SoO hun kum khat behlap uh
Imphal, Oct-2: UPF leh KNO tawh Suspension of Operation (SoO) kilemna thukhun bawl Manipur govt leh India govt apan Joint Monitoring Group (JMG) pawlin Sept 29 & Oct 1, 2010 in New Delhi ah kihouna nei uh a, huai ah SoO hun (period) kum 1 sung behlap ding in thupuk uh chihthu kiza hi. Huai meeting ah Manipur govt lam akipan Chief Secretarty DS Poonia, IAS; IG (Intelligence) LM Khaute, IPS leh Joint Secretary (Home) Devesh Deval, IAS tel a; India govt lam akipan Ministry of Home Affairs a Joint Secretary (North-east) Shambhu Singh, IAS; Director (North-east) Dr Nahanathan, IAS banah Intelligence Bureau apan Joint Director leh Army a Director General (Military Intelligence) apan palai 2 leng tel uh chihthu kiza hi.
Huai ah state leh central govt tawh SoO a kilemna suaikai UPF leh KNO akipan JMG atel palaite leng tel uh chihthu kiza hi. Huai JMG meeting ah designated Camp tuamtuam a galvan koih (deposit) tungtang leng genkhawm uh hi’n kigen hi. SoO atel makaite’n govt apan khateng a sum muh ding mu nailou uh chih thu ah LM Khaute, IPS, IG (Intelligence) apan thutut kingahdan in cadre-te sum piak himahle uh makaite sum piak ding provision bangmah om nailou chi’n gen hi.
“Year of Gram Sabha” zatna uap
Imphal, Oct-2: Manipur govt nuaia Deptt of Rural Dev & Panchayati Raj vaisaina in Oct 2, 2009 akipan “Year of Gram Sabha” kizang tuni sunnung dak 2.00 in Porompat a Panchayat Bhavan ah hunkhakna function om hi. Huai ah Chief Guest in Chief Minister O Ibobi pang a, Functional President in Md Alauddin Khan,Minister (Rural Dev & Panchayati Raj) pang hi. Guests of Honour in Imphal East Zilla Parishad a Adhyaksha Mrs P. Bimola Devi; Imphal West Zilla Parishad a Adhyaksha S. Subhaschandra Singh; Bishnupur Zilla Parishad a Adhyaksha Mrs Ksh Sorojini Devi leh Thoubal Zilla Parishad a Adhyaksha MV Ataur Rahman pang uhi. Tuni a kikhopna ah State leh Block level Gram Panchayat kidemna tuamtuam banah State level essay competition a kipahman mute piakkhiakna leng om hi.
Helte 4 leh a panpih 1 kimankhia
Imphal, Oct-2: Imphal West Commando leh 22-Assam Rifles kithuah in zanhal zankimlai in Hailakandi a Lala Bazar ah KCP (MC) a self-styled Capt Suranjoy @ Sanjoy of Yumnam Khunou (Bishnupur dist), self-styled 2nd Lt H. Sarat Singh @ Chaohei of Yairipok Yambem Mayai Leikai (Imphal East) leh self-styled Lt O. Ibochouba @ Ranjit of Ningthoukhong Awang Leikai (Bishnupur dist) mankhia uh a,amau apan Rs. 80,000 banah explosive kg. 40, safety wire metre 40, pen drive 2 leh mobile 3 mukhia uh chih police thusuak in gen hi. Thoubal Commando-te’n zan nitak dak 11.00 velin National Highway 39 a Samaram Lamkhai ah frisking leh checking a bawlna uah UNLF activist N. Kokin @ Lambu of Samaram Lamkhai mankhia uh chihthu leng om hi. Huailou in 15-Assam Rifles te’n tuni zingsang dak 3.00 velin Wangkhem area a operation a bawlna uah Prepak (VC) pawl adia overground worker Md Gafar (34) of Wangkhem mankhia uh a, Thoubal Police Station ah pekhia uh chihthu om hi.
Dakkal 24 sung General Strike puang
Imphal, Oct 2: Manipur Women Police Constable lakna dia Oct 2008 a written test om Sept 30, 2010 tan in a result suaksak ding in All Manipur Women Police Constable te’n Chief Minister kiang ah memorandum a piak uh bangmah thu a om tuanlouh ziakin All Manipur Women Police Constable pawl Oct 3, 2010 zankim (midnight) apan Oct 4, 2010 zankim tan Manipur pumpi General Strike puang uhi.
HTC in Director, Census thutawp pia
Imphal, Oct-2: Hill Tribal Council (HTC) Moreh in state govt a Director of Census Enumeration ah lehkha pia in Census,2011 ah bangziaka Moreh phaijang bial dana koihtheih hiding hiam chih dotna leh thutawp pia uhi. Small Town Committee dana Moreh kipuak lai in Moireh a om mihing tamzaw singtangmite adia phattuamna a om tuanlouh ziakin July 31,1991 in Chandel district HQ a public meeting thupukna bangin beisak hi a, mipite deihna bangin kum 3 paisa apan mipite’n MGNREGS tungtawna hamphatna leng ngahthei uh ahihdan taklang uhi. Huaiziakin Moreh kichi singtanggam ahih bangin tutunga Cansus ah leng singtanggam (rural) maha chiamteh ding leh phaijang bial (urban area) ahihlouhdan kichiantaka koih ding in theisak uhi.Huchi ahih kei aleh India govt ah thil omdan tut hiding a, huai ziaka nawngkaina a om leh state govt in mawhpaw ding chi’n Jangmang Haokip, President, HTC, Moreh in suaikai hi.
PTC Mizoram election om ding
Aizawl, Oct 2: Paite Tribe Council, Mizoram Headquarters in 29th Sept 2010 a thupukna alak dungzui un October 14, 2010 chiang in Aizawl ah PTC Mizoram vaipaw ding election nei ding uhi. Hiai hun ah, President, Vice President leh Treasurer telna om dia, Dr H Thansanga Ex-Minister & Chairman, Mizoram Paite Union (MPU) in election vai ah Convenor len dia, Rev H Chinzapau, Dal Go Nang, Gen Secy, MPU, Ruata Tonson President, SSPP Mzr HQ K Thanglianzau, Asst Secy, Mizoram Paite Cultural Society leh JS Tuang Chairman, Zomi Innkuan, Aizawl te election commission member hiding uhi. Hibangkalah, India President Pratibha in September 23 a Mizoram University aphaklai in PTC Mizoram Hqtrs te’n Raj Bhawan ah President nu kimuhpih in Mizoram ah Paite Autonomous District Council pe ding in ngen uhi. Mizoram PTC in ahihleh PADC banah, Siamsin Hostel leh MPCS mina DoNeR a Cultural Hall bawl ding in ngen ua, hiai hun ah, PTC Mizoram apan Maveni Hangzo President, Laldouthang V/President, Dal Go Nang Gen Secy, Damsavung Treasurer leh VL Liana Paite Secy (Orgn) te tel uhi.
ULFA leader teng telsak di’n ngen
Guwahati, Oct 2: Assam a opposition party Asom Gana Parishad (AGP) pawlin United Liberation Front of Asom (ULFA) leh government in peace talks aneihsawmna uah ULFA nuai a leader teng telsak vek hihen chi ua, leader khat lak a, a dang khat nawlkhin kichi pen helpawl leader te khenzak tupna hi a, amau rank & files suk niam sawmna ahi chi uhi. Huaiziakin, government in hiai kihouna dingah khen tuam neilou a ULFA makaiteng atelsak vek uh kilawm ahi chi uhi. Assam assembly a opposition leader banah AGP makai CM lui Prafulla Kumar Mahanta in agenna ah, Government in ULFA makaite’ lak ah divide and rule policy a zat mawk leh thil hithei hilou ding a, heutu tawmchik tawh kihou in om zia neilou ding ahihman in government ading in pilvan mahmah nang om a, tuabanah, maban a assembly election om ding ah government in ULFA te bangchi dan hiam a zatsawm uh hiding in ginlelh huai mahmah chi hi. Mahanta in ahihleh, ULFA commander-in-chief Paresh Baruah leh ULFA general secretary Anup Chetia te Bangladesh ah om lel ua, government in amaute hiai kihouna a a teltheihna ding ua pan alak uh kitasam chi hi.
Kohima ah gari 6 halsiat in om
Kohima, Oct 2: Kohima’s Bayavü colony ah zan zingkal baihtakin meltheihlouh pawlkhat in gari 6 halsia uhi. Kenuozou colony mipite’n agendan un, zinglam dak 4 vel in lampi nawl ah meikuangmu ua, a va et ua leh gari 6 mei in ana kihaal chi uhi. Halsiat ta om gari te ahihleh Car khat leh 2-wheelers nga hidanin gen ua, bike 2 naktakin sia chi uhi. Khenkhat in agendan un gari 1 kihal in adangte ban peh hiding in gen ua, ahihziakin thil omdan theihchet hinailou a, police in thil omdan suizui lel hi.
Article
NA TANGTAWN MUNDING GELFEL IN
(Hebrute 9:27)
~By: Pastor Dr. Chinsuanthang
Editorial
I ki cheina vanzat te uh sanglua hilou hiam?
Fashion kichi sappau kammal hi a, ahihziak in eipau suaksuk gawp leng hita bang hi. Fashion in kicheidan leh khawsakdan gen ahi chi le hang dik thei thou leh kilawm. Mihingte ading in kicheina kichi poimawh mahmah a, i niteng hinkhua a i tuah touhtouh ahi hi. Kicheina ana poimawh lua a, kicheina in mihingte etlawmsak tuan mahmah ahi chih kuapeuh theih ahi. Fashion chih kammal tungtawn in Lamka Fashion chih tungtang enkhawm zek leng i ut hi.
Lamka khawpi sung ah fashion sang mahmah in, huai in i economic dinmun a hon sukha thei diam chih patauhna i neih ziak a tuabang thu gendek ihi a, nulepa ahihkei leh guardian te’ adia pilvanna ding om leh kilawm bang hi. Fashion in bangteng huamkha hiam chih a nen aham in theikei mah le hang, kicheina chauh hilou in, i gamtat khohei leng huamban ding in kilang a, huai tawh mekmat theih ding thil tamtak om hi’n kilang hi. Mobile phone kichi bang, ahihkei leh gari chih bang fashion dan a zangmai te ihi ta ua, neih leh neihlouh genlouh in a khawvel in hon pawkheta chih mai bang uthuai in kilang hi.
Numei te leng maimai samlou in high school kai, naupang chikchik bang mobile deih a kiphin, Honda Activa tawh kikhoh a, school compound leh khawlak ah ki khoih ziahziah chih khawng i ut pen uh hong suakta maimah hi. Dan in naupang kumchinglou gari heek phallou a, himahleh, huai theiphalou nulepa kitam mahmah a, a theise lua, kitheilou sak i diam chih bang leng om thei zel hi. Nulepa te’n tate i etkol dan ah i pilvan mahmah kei a ahihleh, i tate’n hon nawmvalh gawpding un kilang hi. Khawvel pilna leh siamna sang deuhdeuh ta a, tate’n nulepa te baihlam chik leh nalh taktak in khem lumlet zou ta mahmah uhi. Tata’ psycho man pahpah zouding a nule pa te leng pilvan kisam hi.
Pasal naupang chikchik gari heek muh ding tam mahmah a, gari hoih leh etlawm taktak a kikhoh chih khawng naupangte’ utpen hong suakta a, i fashion paidan uh khengval law deuh hilou hiam chih theih ding in om hi. Lamka khawpi sung a gari khandan/kibehlap dan i et nawnchiang in, kha khat in gari 100 kimlak in kibehlap zou gige a, huchi hileh, Lamka khawpi sung ah kum khat in gari sang khat val tham bang kibehlap ding chihna suak a, nulepa te mahmah in leng gari neih kitaitehna a zang i ta du uam? Nule pa te’ fashion pen gari a pai adiam chih ut huai a, a zawng ahau in, mobile leh gari i etlah vek mawk a ahihleh, nikhat iki suihpaih khak ding uh lauhuai mahmah hi.
Tate hih dia i deihlouh nulepa te’n leng hihlouh mai ahoih pen hi a, tate naupang chikchik gari i khoihsak baihluat ua leh denchiang in accident leng hong pung deuhdeuh dia, laisim peih omnawnlou in, khamtheih khawng ah i tate uh hong paisuak khak ding uh nulepa kiven poimawh petmah hi. Tate lehkha siamding deihna ziak in tuition lakbel selou a, himahleh, mobile leh gari khawng a kitaitehna pen bangchi tuk in hausa himahle hang, i tate’ maban ding lungzin huai hizaw hi. Hinkhua (life) enjoy baihlaw te mi lawhching vang mahmah ua, vaite mi hausa taktak te’n leng a tate uh pawl XII tan beek a zawh ma uh material lam a kitaitehna te ah ki helsak vetlou uhi. I economy niamlam theilou in sangpi in iki taiteh kha naak ua, a khenchiang in vualzawl taklou i di uam chih theih ton atam hi.
Mi khat in a ta duat mahmah in, a duh teng aleisak vek aleh, a ta ha (teeth) teng tok gai gawp in lung in ne gai chitel uhi. Bangziak a i lak ah khamtheih hichi ot lawmlawm hiam chih bulsut a, study bawl taktak ding chi le hang, nule pa te mawhna tamtak om kha thei ding hi. I tate uh zalenna i piak nak luatziak un i thuak lawhkha sek uhi. Nidang in phula lane puanak kithang mahmah a, huai apan stage sangzaw hong kal in kicheina uang hiaihiai a, tuni chiang bang in Biakinn ah leng kikhop ngam huai nawnlou khop in kicheina sangta a, function tuamtuam te ah leng trop tak a vatel ding thil zumhuai hongsuak ta hi. Naupang piangtung chih theihphial te nasan in coat suit silh ta mai, i fashion un Mumbai fashion a phaklouhna a om tuam dia hia chih theih in om ta hi.
Westernisation in hon nak zawhluat ziak in haigai vek simta in i om ua, changkang tak a khawsak i ut chiat uhi. Khawpi tuamtuam te chetdan bang in i om nuam ua, hoihtak a I et vengveng chiang in lah mi zawng leh genthei ngen ina hi naak ua, i lungtung uah mei am kikoih lel te i suakta uhi. I tate dress (kicheina) mahmah leng enkai ni. Naupang neuchik chik lai tanpha loose tak a i etkol ziak in, puan-ak lah hingal, a puan bei phialphial tanpha silh i tam mahmah ua, huai dan a i om touh ua, vaigam ah leng huai bangmah a i va kichei touh ua le bel vaite’ a chil uh phuul law mahmah ding a, thil nuamloupi hongtun zelding hi.
Who's Online
thang, system32, lammin, phunchiak, ghauzel, zwanmwat, Mtunglut, Lian ngaihte, chhurbuur, matei, tcngaihte,