Zomi Namni Football : SCL in Champion hihna la
LAMKA, Feb. 18 : Lamka Public Ground a 2nd Zomi Namni Football Tournamnet paitou zel in, tuni in Final match leh Closing ceremony neih in om hi. Hiai hun ah, Thangkhosei Haokip, President, Kuki Inpi, Manipur in chief guest hihna toh uap in, Th. Sangkhuma, President, Mizo Peoples Convention, Manipur in Chief Host hihna toh uap hi.
Chief Guest, Thangkhosei Haokip, President,Kuki Innpi Manipur, KIM in a thugenna ah, function tamtak kinei ta a, huai te ah, talent hoih taktak nei tampi muhkhiak a om ahihdan gen in, huchibang te, a talent te uh a zat siam uh a deih thu gen hi. Huai banah, kimawlna toh kisai, games spirit nei tak a kimawl ding ahihdan gen in, hiai Zomi Namni Football Tournament in, nam kal a kituahna kia hilou a, hiai tung tawn a, kimawlmi ten, a talent te uh, a sang zaw sem a azat theih na uh ahih a deih thu gen hi.
Final Match ah, Sports Club of Leatherite, SCL leh, Mualveng Youth Club, MYC(H) te kimawl ua, huai ah, SCL in 4-2 a zou in, 2nd Zomi Namni Football Tournament ah champion hihna la uhi.
Imphal a Zomi Namni zatna dingin bus 19 zat hiding
LAMKA, Feb. 18 : A hongtung ding February 20, 2012, Zomi Namni, a 64 vei na, Imphal ah thupi tak in zat hiding hi. Hiai ding toh kisai in, Imphal mun lou, mun dang a om te a ding in celebration committee in gari arrangement bawl uhi.
Gari lam toh kisai a mohpuakna la te apan lai kimu dan in, Singngat lam a kipan ding te a ding in Bus 3 om ding a, zinglam dak 7:30 in Singngat nusia in Imphal zuan ding uhi. Huai ban ah, Lamka khopi sung leh a sehvel a ding in bus 8 om ding a, veng tuam tuam ah kidoh in zinglam dak 9:00 in Lamka nusia in Imphal zuan ding chi in takalng uhi. Mipi a ding gari/Bus a kigawm vek in, 11 zat hi ding a, ban ah, cultural troupe te a ding in a tuam in gari, 8 om ding hi.
Activa leh Shaktiman truck kiphukha
LAMKA, Feb. 17 : Tuni zinglam dak 11:00 vel in Lailam Lei bul ah Shaktiman leh Activa kiphu in mi 1 in liamna tuak hi. Mit a mute gendan in, Tuibuong lam zuan a tai Activa (MN02-A/ 1189) in a ma a gari a pelh sawmna lam ah New Lamka zuan a tai Shaktiman (MN02 5354) toh kiphu kha uh chi in gen uhi.
Shaktiman ahihleh a tai na lam, a side dik mah mah a, activa pen ahihleh, a tai dan dik lou ahi chi in gen ua, himahleh, Shaktiman pen lianzaw ahihna ah, mi a tamzaw ten, shaktiman pen moh sa ve ve uhi. Activa ah mi 3 kipua ua, amau te lak ah, a nanung pen a tuang, Khualpu of Vengnuam, New Lamka gari apan kia in Shaktiman mailam liim, a veilampang pen in, a baan gawi kha in kek lian sim mahmah hidan in gen uhi. Khualpu ahihleh tu in Lamka Damdawi Inn ah etkol in om lel hi.
Zomi Namni Football : SCL leh MYC(H) Final kipek ding
LAMKA, Feb. 17 : Lamka Public Ground a 2nd Zomi Namni Football Tournamnet paitou zel in, zan in semi-final neih in om a, huai ah, Sports Club of Leatherite, SCL leh Mualveng Youth Club, MYC(H) te vual zou in, final kai uhi.
Final ahihleh zingchiang in Lamka public ground mun mah ah omding hi. Zingchiang a tournament khak na programme hun ahihleh zinglam dak 11:00 in kipan ding hi. Hiai hun ah Thangkhosei Haokip, President, Kuki Innpi, Manipur in Khuallian hihna toh uap in, Th. Sangkhuma, President, Mizo Peoples Convention, Manipur in Chief Host hihna toh uap ding hi. Final match leh closing function kipat ma in, light concert om masa ding a, huai zoh programme pat hi ding hi.
Gangpimual ah tenna inn nih kang
LAMKA, Feb. 16 : Zan nitak dak 12:45 vel in, Gangpimual a om, Jangkholam Neihsial leh Pauminthang te tenna inn mei in kang hi. Mei kang toh kisai, a kaat hun a electric pailou ahihna ah, bang a kipan hiding hiam chih thei lou uh ahihdan gen uhi.
Jangkholam leh Pauminthang te, pata hi ua, compound khat sung ah inn tuam tuak in om uhi. Meikang ahihleh, Jangkholam te kitchen apan kipan hidan in gen ua, a innpi tak te uh bel a kangse lua om lou hi. Meikang ziak in Jangkholam te buhhum bag 10, banah, innsung van chi tuamtuam hunkhop tak kangsia a, a sum a tuat a Rs. 73,500 man kang sia hidan in gen uhi. Pauminthang te a leng Antang bag 3 kang sia in innsung van tuam tuam a sum a tuat in Rs. 39,500 man vel ding kangsia hidan in gen uhi.
Inn kang toh kisai bialtu MDC in tuzing in a mun pha in, panpih na ding in Rs. 1000 pia in, a inntung uh bawl na ding langva ban 5 leng chiam hi. Innkang toh kisai mah in tuni in ZYA Gangpimual Unit te panlak na in, inn bawl in om a, banah, Gangpimual khosung a mi kiphal tamtak in niik ten puansilh banah, uum le beel leh van tamtak in panpih na leng pia uhi.
Ngaisuanching sihna toh kisai in mi 2 mat beh in om
LAMKA, Feb. 16 : Apaisa Feb 6,2012 zingkal baih tak a Centre Road leh Tipaimukh Road Junction a vuaktang phial a sisa a muhkhiak a om, (L) Ngaisuanching, sihna toh kisai, muanmoh leh thudot ding chi'n zan in Police in mi 2, Lalthuamluaia@ Thuama, 40 S/o (L) Chalruuma of Simveng leh Ngaisianman@Maman Vuite, 30 D/o Thangzatuan of Vengnuam New Lamka te man nawn in tuni in CJM mai ah din sak in om uhi.
Hiai toh kisai a police lam apan thu kiza dan in, mat a om mi 2 te, CJM in February 20 tan mah police custody a om ding in thutan khum hi.
lamka.net
Who's Online
thang, system32, kasicet, lammin, phunchiak, ghauzel, zwanmwat, Mtunglut, Lian ngaihte, chhurbuur, matei, tcngaihte,