ZogamOnline

LAMKA, Feb. 21 : Council of Hr Secondary Education Manipur(CoHSEM) saina in February 23, 2012 apan March 22, 2012 kikal sung, Manipur pumpi ah class XII exam om ding hi. Churachandpur district ah exam centre 2, Centre A, Churachandpur Governemnt College leh Centre, B, Lamka College te zat hi ding hi.

Exam Centre A Churachandpur Govt. College ah khopi sung a college/ higher secondary school tuam tuam 7, te exam ding ua, Arts a ding in Candidate, mi 527 leh Science a ding in mi 396, a vek a kigawm, candidate mi 923 in exam pe ding uhi. Huai ban ah, Exam Centre B, Lamka College Exam Centre ah college tuam tuam 5 in exam pe ding uhi. Exam Centre B a exam ding te lak ah, Arts ah mi 322, Science ah mi 316 leh Commerce ah mi 83, a vek a kigawm mi 721 in exam pe ding uhi.

Bike in Bolero khawl lai phukha; mi 2 liam

LAMKA, Feb. 21 : Tuni zinglam dak 10:15 vel in Lamka Public Ground kiang a Tipaimukh Road zul a Bike khat in Bolero khawllai phu kha in, bike a tuang mi 2 in liamna tuak uhi.

Mit a mu te gen danin, Public Ground kiang a, Bolero MN02 A 5232 khawl lai, Discover bike MN02 A 1409 a mi 2 kipua in a nunglam va hua ua, bike a tuang tegel in liamna tuak uh chi in gen uhi. A bike pen ahihleh, a mai lam kisia a, ban ah, a bolero pen leng, a nunglam bumper ban ah, bike a tuang ten, a lu ua a tat khak na uh, bolero nunglam pang leng kuak hi.

Biak a tuang mi 2 te, Satkholal s/o Semkholun of Canan Veng, Tuibuong leh Gigin of Family Lane, Bijang te hi ua, damdawi inn puantun ahih tan un khua phawk nai lou ua, a nih tuakun, amai lak uh liam hi.

Thanlon DI(Schools) makaih in meeting nei

LAMKA, Feb. 21 : Tuni sunnung dak 2:00 in Pumshong Hangshing, DI of School, Thanlon makaih in, Thanlon Block sung a om, staff tuam tuam ten meeting nei uhi.

Meeting na toh kisai a Pumshong Hangshing apan thu kiza dan in, hun bangtan hiam paisa a, ZEO in thusuah a bawl, 2011 final result te submit ding chih leh, School chih in, Free text book, Uniform ban ah, bag te lim a lak te uh a submit nai lou ten,a kin thei lam a a submit ding uh, a submit lou te a counter sign bawlsak lou ding chi in thupukna la thak uhi. Huai ban ah, a hongtung ding February 23, 2012 ni a, Leijangphai High Shcool, Sainoujang LP School, Tuipiphai Aided Junior High Shcool, Tuikumuallum LP School leh Bungjang LP School te insepction bawl ding chi in leng thupuk na la uhi.

Pumshong Hangshing, DI, Thanlon in a gen zel dan in, staff te toh meeting a neih zoh un, Thanlon Block sung a school tuam tuam 22 a headmaster teng toh meeting nei nawn uh ahidhan gen a, himahleh huai hun ah, headmaster mi 18 kia tel uh chi in taklang hi. Headmaster te meeting na hun ah leng, staff te toh a genkhawm te mah uh gen in leh, Headmaster teng in Admission Drive bawl ding, Staff teng in tukha sung a a school mun uh phak a admission bawl pih ding chih leh, School building nei nai lou, leh staff kidaih louh thu toh kisai leng genkhawm na nei ua, hiai te, Imphal lam a a thu tut ding chi a thukim uh ahihdan gen hi.

lamka.net

Comments (1)

Write comment

You must be logged in to post a comment. Please register if you do not have an account yet.

< Prev		Next >