Thuhiltu | July 20, 2011
Vaiphei Insung maicham anngawlna
Vaiphei Insung Maicham Committee saina nuai in ahungtung ding July 30, 2011 ni leh “Maicham a mei chu a mitlo ding ahi” (Lev. 6:8-13) ti thupi mangcha in Isak Maicham mun, K. Kotlian, CCpur ah Vaiphei Insung Maicham zing ann ngawl ah pauchapgual na masapen, 2011 um ding ahi. Zia hun chu zingkal lam dak 8:00 ah kipan ding ahia, Rev. Khupkam Vaiphei (Exe. Secy. RCG) in hun masapen malat ding ahi. T
hu genna Rev (Retd) Genhawhen (Moreh) in nei ding ahia, Rev. B. Lala (Exe. Secy. KSP); Rev. D. Lulun Vaiphei (Exe. Secy. VBA); Rev. Thangkhawsei Baite (Exe. Secy. EMP) leh Upa T Manga Vaiphei, MLA & Chairman MTDC te chun Greetings nei ding ahiu. Zia hun matna Maicham labu chu amun ah chawkthei ding hi’nle thu hiat ahi. VIMC chun kumsin leh khatvei bek maichiam siam ding, Kristian insung tin ah maicham a dingdet thei na ding ah panlak ding ti leh Maicham mei mitsaklo ding tite thiltup nei ah apatdaw uh hi’n thusuak kimu chun ataklang hi. Tulai taka VIMC puitute chu – Chairman – Rev. (Retd) K. Lala Vaiphei; V/Chairman – Rev. Khupkam Vaiphei (Exe. Secy. RCG) & Rev. D Lulun Vaiphei (Exe. Secy VBA); Secretary – Upa K. Lianthang; Asst. Secy – Upa Khaineithang; F/Secy – Upa HT Thanga leh Treasurer – Pa Liankhawlun te ahiu.
Lamka College ah Workshop um ding
Lamka College te chun Director of Education (UHE), Govt of Manipur tawh kigawm ah NAAC nuai ah One Day Seminar –cum- Worshop on Assessment and Accreditation of Colleges of Manipur kiti chu July 20, 2011 dak 10:00 leh Lamka College Muti purpose Hall ah nei ding ahiu. Zia hun chu K. Thansang, ADC/CCpur, Prof. Vung D. Tombing, Former Director of Education (EUH) leh Dr. M. Lokendro, Principal, Lamka College te chun Chief Guest, Guest of Honour leh President hina tawh uap ding ahiu. Zia hun achun, Prof. Vunglallian, SG Lecturer (Retd), CCpur College; Dr. Th Manihar, Principal, MB College, Imphal leh Prof. Modhu, HOD, Pol Sc. Moirang College te chun zilsak ding ahiu.
Commando te’n hel chuamchuam mandawk
Imphal, July 19: Imphal West Police Commando te’n July 18, 2011 sunnung dak 2.10 a Moirang Kampu Mayai leikai a, KCP(KK Nganba) Sarangthem Naobi @ Amuba @ Wahensha (32) s/o (L) Kalachand chu a chenna in apat in a mandawk ui ti thusuak kimu chun a taklang a, ama chu army no. 1781 of 29th batch hidan in Sr. SP Imphal West thusuak a um hi.
Thudang khat achun, Imphal East SP thusuak taklat dan achun, July 16, 2011 zingkal lam dak 11.30 a Imphal East police commando te chun Checkon area apat KYKL cadre Laishram Homen Singh @ Korou @ Nanao (31) s/o L. Baikul Singh of Khongman Mangjil mandawk uh hidan in ataklang hi. Ama chun zia pawl chu October 2008 ah zawmpan in, army no. 177 of 30th batch ahiban ah Burma a S/S 2nd Lt. Litpa kiti nuai ah trained ahidan le thusuak in ataklang hi. Keirao Wangkhem Ngariyan Kshetri Loukon apat July 18, 2011 zingkal lam dak 3.30 in KCP (Noyon Group) cadre Khongnem @ Laljingba @ Inao (32) s/o (L) I. Ibobi Singh of Lamlai Makha leikai chule Imphal East police commando ten mandawk uh hidan in SP thusuak in ataklang hi.
Van mat piakdawna nei
Imphal, July 19: Director of Health Services leh AYUSH and Naturopethy te saina nuai in tuni’n district chuamchuam ah Primary health centres leh Community health centre a emergency a ding ah van mat chuamchuam Rs 1.5 crore man ding van mat chuamchuam leh furnitures CMO te kiang ah hawmdawna RD Wing, Lamphelpat ah Health minister L. Jeyantakumar in anei hi.
Thutut kimudan achun, zia hun achun Minister in agenna, district chuamchuam a rural leh remote area a damlona tawh kisai a thisan taksap hun a nai thei dinga Blood bank hawndaw pai hita ding in agen hi. Doctor leh Nurse te lainat na tawh damlote enkawl dingin le Minister in dawtna anei hi. Zia hun achun AYUSH State Project Director Dr. Guneshwar Sharma in, tuhun ading a damlo etkawl na dinga damdawi bep hilo a emergency kit pawimaw mama ta ahidan agen hi. Tuni vanmat hawmdawte lak ah Ultra Sound machine, Oxygen Cylinder, Hot trolly, Wheel Chair leh Dressing Instrument tite le pang hidan in thutut akimui.
MRCs 54 leh MCCs 44 um
Imphal, July 19: India gamsung a State chuamchuam ah Manuscript Resource Centres (MRCs) 54 leh Manuscript Conservation Centres (MCCs) 44 vel um hidan in PIB Imphal thusuak in ataklang hi. Manuscript Resource Centres (MRCs) Manipur a ding a, Manipur State Archives a total fund released Rs 13,39,148 hidan in le PIB thusuak in ataklang hi.
Who's Online
tkama, thang, system32, kasicet, lammin, phunchiak, ghauzel, zwanmwat, Mtunglut, Lian ngaihte, chhurbuur, matei, tcngaihte,