Thuhiltu | July 30, 2011
Haksatna gentheina ding ah ni 3 hunpe di’n dawn
Tribal Development/Hills Affairs toh kisai ah thingtangmi te’n a haksatnau leh zia tawh kisai ah gennawp a neiteu a gentheinau ding ah kalkhat sung ah ni 3 hun piakna ding ah Movement for Tribal People’s Rights Manipur in tuni’n TD minister hina tukhawm Manipur Chief Minister O. Ibobi Singh kiang ah memorandum a piau.
Thusuak in a taklat dan achun Tribal Development & Hills chu nisin ah sukneu deu deu in a um a, zia chu khawk ma ma ahi ziakin mun gamla tak apat hung kipan thingtangmi Meitei pau nangawn le thiamlo te’n Minister leh MLA te kimupi haksa a sak lai un Tribal Development minister pawkhawm Chief Minister kimupi ding chu thil haksa suak ahi dan a taklang hi. Zia gual dinmun chu ahi ziakin thingtangmite a ding ah a haksatna teu a tuttheina ding un Tribal Development minister hina pawkhawm Chief Minister in kalkhat ah ni 3 bek public interview hun bawlpiak ding in Movement for Tribal People’s Rights in dawtna abawl hi.
Imphal West Cdo te’n thingnuaimi 2 man
Imphal West police commando leh 18th Sikh Regiment kigawm te’n July 28, 2011 zingkal dak 7:30 ah Mayang Imphal huapsung Upokpi ah Thinglei kiang apat KCP (MTF) active member Houjam Thomba Singh @ Sanatombi (28) S/o H. Maipak of Thanga Khunjao chu a man ua, ama apat Chinese Hand grenade khat leh Detonator 10 le a mankhawm ui ti’n Imphal West Sr. SP thusuak chun a taklang hi. Zia ban achun July 28, 2011 nitaklam dak 4:30 vel ah Imphal West Police commando te’n Keishamthong Top leirak machin apat KCP(Lalheiba) sympathizer Potsangbam Yaipharel (31) S/o P. Rajen of Khagempalli Panthak a man kit ua, ama chu KCP(Lalheiba) ah Chanam Thaniljao @ Thanil (48) of Uripok Huidrom Leikai command na nuai ah sem hi’nle Imphal West Sr. SP thusuak chun a taklang bawk hi.
Gari mang thu ah pilvanna di’n SP in thusua
Hun bangchan ahem chiata apat gari two wheeler gu a tam ma ma ziakin Imphal West police te’n lam chi chuamchuam ah panla in zia gual ah gamtate matdaw ding a guau a, zia gual nasepna ding ah gari neitu te’n police te kithuapi ding leh kivenna ding ah panlakpi dingin Sr. SP Imphal West, L. Kailun in tuni’n thusua abawl hi.
Thusuak in a taklat dan achun anti-social activities apat kivenna ding ah suggestion zia gual hi bawl ahi dan a taklang a, zia chu gari parking ah double lock ahi ding, a poimaw leh chains/wire thua ding, Anti-theft device alarm system, auto brake system, driving wheels locking system te vua/thua ding, gari number plate chiantak ah number zik ding, Gari lekha original ei ma’n kikoi a, gari ah photocopies koi ding, parking ah koi phat leh mikhat enkai sak ding, gari koina mun ah umlo leh a kigu mang a um leh police control room/police station number City police station – 2458515, Imphal Police station – 2450002 leh Control Room – 2450214 ah gari number, model, colour, identifying marks umte hiatsak vak ding in thusuak chun a taklang hi.
CDSU malatna Spot Essay Writing Competition
Churachandpur District Students’ Union guanggalna nuai leh Techknowlogiz Advisory Services Pvt. Ltd. (TAS) sponsor na’n Lamka leh a sevel ah um student te a ding ah 1st Spot Essay Writing Competition 2011 kiti um ding ahi. Zia competition chu August 5, 2011 zingkal dak 10:30 apat nitaklam dak 1:30 kikal ah Churachandpur College ah um ding ahi.
Zia Essay chu category 2 ah kikhen ding ahia, category A chu Class V – VIII hiding ahia, category B achun Class IX – XII hiding ahi. Zia Essay chu suadaw nailo original ahi ding banah word 500 sang ah tamzawlo English ahi ding ahia, footnotes leh endnotes a um ding ahi. Zia competition achun school khat ah student 20 sang ah tamzaw a pantheilo ding ahia, application form chu school zosia Principal/Headmaster te kiang ah lakthei ding ahia, August 3, 2011 tiang ah CDSU Education Secretary kiang ah piaklut ding ahi banah category 2 a thiampen ah teldaw ah umte chun Cash Prize ah Rs. 10,000 gel dawng ding ahi.
Who's Online
tkama, thang, system32, kasicet, lammin, phunchiak, ghauzel, zwanmwat, Mtunglut, Lian ngaihte, chhurbuur, matei, tcngaihte,