Thuhiltu | August 05, 2011
Sub-Inspector of Police post 14 kila ding
Director General of Police in July 30, 2011 ah thusua abawldan achun Manipur Police Department nuai ah Sub-Inspector of Police (Radio Technician) GCS Class III, Non-Gazetted, Non-Ministerial a ding ah post 14 lak ding ti ahia, amau chun Rs. 9300-34800+Grade Pay Rs. 4300 law ding hi un a gen hi. Zia a ding ah recruitment chu 2nd Bn. Manipur Rifle Ground ah um ding ahia, Churachandpur leh Senapati district te a ding ah August 22 & 23, 2011 leh Physical Efficiency Test um ding ahi.
Zia a ding ah lekha thiamna chu Science Graduate with Physic/Deploma in RAdia Communication Engineer/Engineering Graduate in Electronic & Telecommunication Engineer or Electrical and electronic engineer te chu dawisakna bik piak hiding ahi. Zia a ding ah pawsal candidate a di’n sandan chu General candidate te a ding ah 5’2” hiding ahia, ST/SC a ding ah 5’1” hiding ahi. Chun numei candidate General candidate te a ding ah 4’11” hiding ahia, ST/SC a ding ah 4’10” hiding ahia, chest ahileh normal ah 30 inches ahi ding ahia, 33 inches a sanpawm thei uh ngai ding ahi.
Zia ban achun a kum uh hi leh June 1, 2011 ah kum 18 tiang ahi ding ahia, a tam tawp ah June 1, 2011 ah kum 25 ahi ding ahi. Ahin, zia pat achun ST/SC a ding ah kum 5 kibelap thei ding ahia, OBC candidate te a ding ah kum 3 kibelap thei ding ahi. Zia a ding ah lunglutna neite chun Churachandpur SP Office ah August 6, 2011 apat Rs. 110 pia’n application form lak thei ding ahia, zia chu Employment Exchange, Churachandpur ah 13 August, 2011 tiang ah piaklut ding ahia, chuleh 16 August, 2011 tiang ah SP Office Churachandpur a tun ding ahi.
Zia post chu numei te’nle apply thei ding ahia, ahun kipia tiang ah pelutlote chu ngaisak hilo ding ahiu. Chun, application chutawh candidate te’n educational qualification attested piakkhawm ngai ding ahia, zia ban achun date of birth, ST/SC/OBC certificate leh lekha poimaw dang dangte original chu Physical Efficiency Test hun ah chawi ngai ding ahi dan SP Churachandpur i/c M Rajen Singh thusuak chun a taklang hi.
ZILLAI MERITOROUS AWARD 2011
Zillai General Headquarters in August 6, 2011 ( Kiginni) zingkal dak 10:30 leh Kangvai Community Hall ah 2011 ah Class X & XII lawtinna kipakpina leh ZILLAI MERITOROUS AWARD 2011 hawmdawna nei ding ahiu a, zia hun achun T. Manga Vaiphei MLA, Chairman MTDC, Pu Khatkhotong Baite, President, Vaiphei Peoples Council, GHQ., Pu Paulunthang Vaiphei IAS , Commissioner leh Pu Khailianthang Vaiphei IPS, IGP te chu chief guest, functional president leh guest of honour ah pang ding ahiu. Zia hun achun Zillai ngaikhawk leh dawisakte banah kipakpina dawng dingte pang ngai ngei ding leh a pang theilo te’nle a thasang ua mi sawl ding in Zillai hotute tea pat hiatsakna leh chialna a bawl ui.
District Level Inter School Trial-cum-Selection Test
District Youth Affairs and Sports Office, Churachandpur in tuni thusua abawlna achun District Level Inter School Trial-cum-Selection Test kiti August 18 – 20, 2011 kikal sung ah Tuibuong Peace Ground leh Indoor Hall, Churachandpur ah um ding ahi.
Zia hun ah item dingte chu under 14 years boys ah football, numei kum 17 nuailam boxing leh pawsal kum 14 & 17 nuailam um ding ahi. Chun, Badminton ah numei leh pawsal ah kum 14 leh 17 nuailam a um ding ahia, Wushu numei leh pawsal ah kum 19 nuailamte a ding um ding ahi. Chun, Table Tennis ah numei leh pawsal kum 14 & 17 nuailam a ding um ding ahia, zia a ding ah lunglutna nei palyer leh school te’n District Youth Affairs and Sports Office, Churachandpur ah August 8, 2011 apat office kaihun sungin eligibility certificate lakthei dng ahia, zia eligibility certificate piaklut hun nunung chu August 16, 2011 hiding ahi thu District Youth Affairs and Sports Officer, Churachandpur Lunkhosei Haokip apat thu hiat ahi.
CDSU in first spot Essay competition bawl di
Churachandpur District Student Union in first spot Essay competition kiti Technowlogiz Advisory Service (TAS) Pvt. Ltd., Guwahati apat sponsor na’n August 5, 2011 leh Churachandpur College ah nei ding ahiu. Zia competition chu category 2 ah kikhen ding ahi Category A ah Class V-VIII hiding ahia, Category B ah Class IX – XII hiding ahi.
Zia competition ah topic ding chu a mun ah piakkawm hiding ahia, zia category ah a thiam pen ah teldaw ah umte chun kipakman ah Rs. 10,000 sang ding ahiu. Zia kipakman chu September 5, 2011 leh piakdawna um ding ahi. Zia competition chu district sung ah quality education um theina ding ah student te motivate na ding ah guanggal hi’nle a kigen a, zia gual ah quality education um theina ding ah panlakna chuamchuam chu maban naicha ale um zel ding ahi dan Education Secretary, CDSU thusuak chun a taklang hi.
Entrance test a ding admit card lakthei
Manipur University ah MLISc academic session 2011-12 course zilna ding ah admission entrance test August 11, 2011 zingkal dak 10:30 leh University Community Hall ah um ding ahia, candidate te’n August 4 – 10, 2011 kikal ah Admit Card lakthei ding in a kigen hi.
Election Commission of India a program theng
Election Commission of India apat Chief Election Commissioner, Election Commissioner leh Dy Election Commissioner ban ah Director General (Expenditure Monitoring) te chu August 5 & 6, 2011 um ding ah Manipur pha ding ti ah kigen maleh a program uh theng thak in zankhat leh Manipur ah giaklo ding hi un a kigen hi. Thusuak in a gendan achun Election Commission of India team te chu August 5 zingkal dak 10:35 leh Imphal hung tung ding ahiu a, nitak dak 5:00 leh Delhi zuan kit ngal ding hi un Chief Election Officer, Manipur in tuni’n thusua abawlna achun a taklang hi.
Kwakta ah 5 days Photo Exhibition
Directorate of Advertising & Visual Publicity, Ministry of Information & Broadcasting, Government of India leh Kwakta Nagar Panchayat, Kwakta pangkhawm ah August 9 – 13, 2011 kikal sung ah Kwakta Community Hall, Bishnupur district ah Government of India in North East ah developmental scheme chuamchuam a sepdawte tawh kisai 5 days Photo Exhibition um ding ahi. Zia exhibition thupi ding achun ‘Development Initiatives in North East’ ti hiding ahia, exhibition honna chu Lt. Col JBS Rathi, 2nd in Command, 5/9 Gorkha Rifles in khuallian hikawm ah nei ding ahia, functional president ah Smt. Thoibi Bibi, Chairperson, Kwakta Nagar Panchayat te pang ding ahiu. Zia gual ma achun Moirang Multipurpose Hr. Secondary School ale August 16-20, 2011 kikal ah um kit ding ahi.
Manipur Press Club ah 66th Hiroshima Day mang di
Indo-Japan Friendship Association, Manipur te guanggalna’n August 6, 2011 leh Manipur Press Club, Imphal ah 66th Hiroshima Day, 2011 matna um ding ahia, zia chun khuallian ah RK. Anand, MLA pang ding ahi. Chun, guest of honour ah Kh. Nimaichand Singh, retd Headmaster & Writer pang ding ahia, functional president ah N. Ibomcha Singh, President, Indo-Japan Friendship Association, Manipur te pang ding ahiu. Zia hun achun Th. Tombi Singh, Dr. Palin leh S.P. Manaobi te’nle thugenna hun mang bakw ding ahiu.
RTI tawh kisai ah state level convention
Right to Information Act, 2005 chu kum 6 vel mat hitamaleh Manipur solkar in hoitak ah a mattheilo tawh kisia ah Transparency Initiatives Manipur te’n August 6, 2011 zingkal dak 11:00 leh Manipur Press Club ah First state level convention on Peoples’ Right to information kiti program a guanggal ui. Zia hun achun a lunglutna neite panthei ding inle a kigen bawk hi.
HSLC Compartmental Examination result suak
Board of Secondary Education, Manipur nuai ah High School Leaving Certificate Compartmental Examination, 2011 result tuni’n a suak a, pass percentage 93% ahi. Board of Secondary Education, Manipur thusuak in a taklat dan achun candidate exam pia 4577 lak ah 4257 in lawtinna a chang ua, zia lak achun first division ah candidate 118 te a lawting ua, second division ah 2623 leh third division ah candidate 1516 a lawting ui.
Zia hun ah examte Certificate cum marksheet chu Board of Secondary Education, Manipur Office ah August 9, 2011 apat school te’n lakthei ding ahia, zia exam ah lawtinglo himaleh 2012 ah regular candidate gual ah exam nuam te’n tuni apat ni 25 sung ah Class X ah re-admitted a bawl uh ngai ding hi’n thusuak chun a taklang hi.
Who's Online
tkama, thang, system32, kasicet, lammin, phunchiak, ghauzel, zwanmwat, Mtunglut, Lian ngaihte, chhurbuur, matei, tcngaihte,