GAPKHUAM

GAPKHUAM

Lambom Nuhsawl Khiak Dih Ni!

~ By: Pauzagin Tonsing

AWLMOHNA LEH lungngaihna toh a gal a ngaihtuahtuah hun kei e, chi in July 23, 2009 zing a kipankhe diing ka chih uh hinapi in ka lampi tot diing uh hoihsem deihna lam in tuani gari taikhe lou hi. A zing khua hong vaak philhphelh in Guite Road tawn a tai gari a tuang dite ticket lakna mun ka va zuan hi. Counter ah mi khat ana om a, seat a masa lam thum hon na reserved sak in chi in teng 100 ka va koih zat hi. Huchi in dak 5:30 diing vel in a hoh diingte tua counter mun a ka kisukkhawm kim tak un ticket va la in teng 230/- piak beh in zoudawn lam zuan diing in ka tuta pheenphaan mai uhi.

Mite’ ngaih in bangpi tohloh kholkeilele siguizamte a sisan lum a luanlai teng namte iitna beingeilou diing ahihman in banghiam hih hoih sakna puakgik in om gige hi. Lungsim a lian mahmah ahih chiang in Centre for Community Initiative nuai a nnapi khat a Community Video neih diing chih tup ahi ahi. Hiai pichinna diing leh a masa pen diing in, kipan tungtung ahihna toh, partnership a neih hoih diing a gintaak ziak in Hornbill Cable Network toh pangkhawm a Mannu’ Ni Khat Hunzatdan Taangpi video a bawl khe diing in HCN apan Thangginlian Samte leh hon panpihtu diing in S Kamkhotuan toh Tuima zuan bus ah ka hong tuang leenlaan uhi. Gintaak bang geih in nitaklam dak 1 vel in Tuima tung in zing leh suun ann kikop ka hon ne uhi.

(pix: TUIMA)

Tuima apan dak 2 vel a kipankhe khia in, khe in a sangzaw lam ka delh tawntung chih bang deuh in ka hong kisiingsa tou uh hi. Mual khat kai khin in kho-ul in hon tuam in hihngei hetlouh bang phial in tawlnou in hon bawm hi. Himahleh bangtan hiam kong pai touh chiang un mun awngkhat ana om a, lampi toh kizom in lou khat ana om hi. Tawl leh bah mahmah a omlai thathak hon pia in camera dokkhia in loubuuklam ka delh pah uhi.

(Pix: loubuuk masa)

Hiai lou neitu kua ahia chih theikei  mahle buuk kilamdan leh a lou letdan in tangkhat lou hih tuak hi. Buuk lianlou ahihban ah a kongkhaak leh sawnkhiak kichian a om kei hi. Huan thuk mun ding alim-alai leng a omlouh man in loulam a suun meh diing kihuan ngeilou hi diing uhi.

Guite Road lampi lui kizui ahihna ah lampite gari taithei hi. Tawl leh kho-ul in hon pum tuam in kiabh simsim mahmah hi. Himahleh leisang lui a chihna mun uh ka tun un huikhi leeng hiauhiau leh zoutui vot dikdikte in tawl sa dam sak mahmah hi.  Mineral water i chihchih uhte sang inle a lim a, fridge a koih toh bang in a gawl hul mahmah a dapsak hi. Tuidawnna diing nou chih om tuanlou ahihman in Pu Lalneihthang chihdanleh golas in tui kidawn khitkhit hi.

(Pix: leisang lui)

(Pix: golas)

Zin lampi leh lou lampi kisuktuahna mun ka tun un vaipai thawm zak diing a om panpan hi. Hiai kisuktuahna mun pen Myanmar lam toh kikawmtuahna dia lampi khat leng ahi. Hiai mun apan I dakkhiakleh gaal a Bualtal (Myanmar) kichian tak a akimuh ban ah Haichiin lam leng galmuh theih hi. Agal apan et mai in alang lam pen gamdang (foreign) diing a bang kei hi.

(Pix: bualtal)

Pupate’n vailou kuanna lambom khawng ah kisawlseh a chihdante uh om diing hilehle vaipai om nailouh ziak uh hia ahihkeileh kuamah leng kisawlseh ngam nawnlou uh hia chih i thei kei. Himahleh nungak-tangval kingai tak khawng ana kisawl seh in hichi bang la khawng in ana kidawng uh hi.

(Pix: lambom)

Lambom nuhsawl khiak dih ni,
Tutkhawl dih ni
Ngaih aw tomte mualhem a a khawl ve aw
Mualhem ah n’on ngakdahleh, ngaih aw
Tomte tulta nuhsawl zingnuai ah na pal ve aw.

Bangtan hiam kong pai nung un Kangkap lui kichihna mun kitung hi. Hiai mun ah bangpi omlou bangmahle tuikholna dia sing lianpi kisui singkuang (singtex!) ana om hi. Atheite gendan hin hiai mun ah munzaang neuchik om a, huai ah ling kimawl theih hi. Huaiziak in ana teeng masate’n ‘kang’ a kapna mun uh ahih ziak in Kangkap kichi ahi chi uhi. Tuamun apan saulou ah toso sing upa deuh ana om a, suangdoh tung ah suangphuh bangzah hiam leng ana om a, nidang a khualzinte khawltawldamna mun poimoh tak ahi. Huikhi laang hiauhiaute’n teenniik lem in gim leh tawlna teng bei zou hi.

Hiai mun ah vaipaite’n a hon phak ziak un bangtan hiam sung ka khawl uhi. Loukuan vaipaite’ a gial thei mahmahta ua, nidang a tualpuan ngou-vombikbek khawng toh kuant vaipuan toh kuanta uhi. Nupite’n vaipai kawm in a nna ngeimah uh a sem lai uhi. Inn ngak diing neilou nupite’n a tate uh loulam a ton pih leng a om uhi. Teek lua chih a om kei ua, chiangkhun toh loukuan lai leng om hi.

(Pix: vaipai)

(Pix: chiangkhun khun)

(Pix: naupua)  

Nupite’n inn tun nung a kisilna diing tuitawi sang in chi uh hia ahihkeileh hihdan ngeina mah in chi uh hia ahihkeileh readymade a tung (?) diing chi uh hia theikhang in. Tuisel kichihna mun ah ana kisil khiukheu uhi. Amau kia kisilsiang uh hilou in a tate na tawm uh sil ua, a nasep van mah uh toh paikikzaw hihial lou diing uhi.

(Pix: tuiseel1)

(Pix: tuiseel)

Lou kuante dawn diing in naupang bangzah hiam leng hong pai uhi.

(Pix: vaidawn)

Huchi in lasiam leh phuaksiam u V Siampu in ‘Teenna Zawlpi aw” chih a phuahna khua nitaaklam ann nekhun vel in ka tung uhi.

(Pix: khosung luttouhna)

A gal a ngaihtuah mai in nitaak hun diing huphulhhuai sim bangmahle hunk hop in solar lam a kineih siseuh ua, phutuan leh khawnvaak mai hilou in tube vaak silsel nuai ah nitaak hun zat theih in ana om hi.

Zingkhua hong vak in ak a khuang chilchel hi. Sumtawng a ann suk ging zak timtim om khakleh chi a I bildoh hang in zaak diing a vang mahmah hi. Huaisang in ann sukhawl (rice mill) ging buungbuung maimah hi. Vok ann pia om khakleh chi a khosung a ka vaaktuah hang un muh diing a om nawn kei mawk hi. Ka kan uhleh kuamah in vok kholai a kikhahzan nawnlou ahi hon chi ua, ‘En huai lim kila ut a,’ ka chi sese uhi. Ni awk in a valh ni ahi a, lemlak ka sawmsawm hang un meipi zing in a liah hoih luat ziak in ka la thei kei uhi.

(Pix: ni awkvalh)

Ka kuanna san un zing pat diing chi himahle ung duhthusam bang a recce lam ka zohlouh ziak un a tawplam a pat hoih diing ahi chih ngaihdan ka hon nei uhi. Huchi in Mannu kiang a hoh in i thil hih diing pen loulam a pat ngai diing ahihna ah ann tuun a, loukuan diing in ka kisakhia uhi. Ka kuandan un nauvual’ loubuuk khat a shooting diing ka chih uh himahleh lou tuah masak pen na ngawn a pat bang ka ut sim uhi. Aziak ahihleh a loute uh kilometer 6 khawng a gamla ahi a, bah lo man geet ka hipeuhset uhi. Mi’ lou a tua bang va hih mawk diing in a haichi tuamtuamte uh poimoh kia hilou a mi’ nasep tha-it mahmah lai a va tohbuai diing ka kisuanlah ziak un Mannute’ lou mah ka naih uhi. 

Tawl in gimhuai mahleh loubuuk tung a, tui-um apan vot dikdik zozen tui dawn zou, tuibuk lim tak in hon muamleh I tawlnate bang hong theng hiaihiai hi. Huchi in ddeihthusam bang in ka hih di bangbang ka hon hih uhi. ‘…huchileh hoih diing hi a…’ chi a duhthusam ka samte uh a hong tangtung zenzen pawl bang a hong om hi. Khuaimu bang hong leng a, vuah zuk ziak a nasem lai loubuuk a tai a, vaimiim em chihkhawng pichin theih diing in minute 30 vel vuah hong zu hi.

 

(Pix: lou)

Ka lawi upapa un a lungleen hon khikhia a, hun paisa a a tuah tuamtuamte a hon gen chiang in nam hihna kichiantak nei, mahni hihna mansuahte I hihlam uh hong lang bang ka sa

Huai khuaimu hong leeng a, lungleeng tak in loubuuk apan gal lam en kawm in khuaila leh bang bang la hiam hon sak nung in, hiai anuai a la pen ngaihmahmah ka sa hi:

Huihkhi leeng in ka teenniik leem hiauhiau
Tanglai leeng in ka teenniik leem ngamlou,
Deihgim huihkhitaan n’ong leeng hiam
Tangduang ah sawlbang nam

(Pix: khuaimu)

(Pix: lou1)

©July 25, 2009
Share

Comments   

 
#10 tonxing 2009-08-04 21:22
Nuam mah mah ei..limlak te i et leh chidam huai mah mah. A video le et uthuai na zok e.

"Zawng mai san na lawmte gen oh..gen meng oh..hon melsiat khum ta zomah lai..gen meng oh.."
 
 
#9 whoami 2009-08-04 01:58
Emlou sakhi pok mah gen gen i kei! va cih mawk di hikei deuh vencin,huai tosaw sing gei a mualsuang a kigelh khawng bang le theih uthuai sawn sawn!
 
 
#8 pialnawng 2009-08-03 14:56
Bang em na gen uh, ni khatna kia hon gelh pan i keI, abanle lem toh i thuahna keI dI, geelguul gouh ;-)
 
 
#7 pialnawng 2009-08-03 14:55
Bang em na gen uh, ni khatna kia hon gelh pan i keI, abanle lem toh i thuahna keI dI ;-)
 
 
#6 ppguite 2009-08-03 11:31
Kaangkap cih lang sak ut lou a, Zawlpi ci ci a kei!

Siamsinpawlpi Kaangkap khawmpi hi lou hia mailai a "I ki vaipuak theih kei leh ki dung puak ni" a na cihna uh.

"Neekna a om sa ngawn ahi" cih slogan leng gen mangmoh khat ahi.
 
 
#5 whoami 2009-08-03 10:43
A kangkap khua le hon lak ngal ngal leteh a kei di Pu Nawng. Lakloh tak a hon koih na kei!
 
 
#4 rangkachak 2009-08-03 10:12
etnop in simnuam mahmah ka sa!! Tuima khua bang le khanghat mahmah cih a ciang...
Tuima apat Kangkap/Khuangg in lam manawh a paitou keenkeen in, Kangkap gam huai.. Burma lam Pangmual/Tongci in/Suangbem zotna lamkak/lamthuam mun cihvel a i khodak veng2 maituh kholen mui kai ziilzial teng 'tawh tawl adam aka'.
I paitouh zel leh suangdawh bang omzek in.. Pu Pumzanang Guite (hia?) in 'Khua mual lumsuang dawhtam khawnna nuam... Daidam tulpan kaita' acih la bang uh phawk huai hial hi'n maw...

Tua atung a lemlak a imuhtheih vaipai kisilte omna munphei teng khanwg ah Burma lam dawhteng kimuthei in... nuam hiv'aw!!! Etet maimah dia hoih!!!

Cileuleu le'ng, Kangkap gam/huamsung a lian mahmah in ka thei.. ka muhphakna ciang2 ah.
 
 
#3 mm11000volts 2009-08-02 14:34
Upaten unau nih tangthu gen leng ki bang lou a cih dan deuh un.. a khua tuam dung zui a a "accent" a awphawi tuam hin teh maw ....
Vangai tang a paite khua 9 te ale vakawlkap ham in a gen tuamvek chi uh hilou mo....
 
 
#2 whoami 2009-08-02 13:10
Khualzin inlam pai, bah leh tawltak a lamtou i hon khen ciang a tawlngakna,mual suang kiphuhna mun leh,Zawlpi kholui gei a tosaw sing te i hon muh thak ciang in lunglen a puang! Nunlui ngaih a na!
 
 
#1 ppguite 2009-08-02 11:09
Upaten unau nih tangthu gen leng ki bang lou a cih dan deuh un.. a khua tuam dung zui a a "accent" a awphawi tuam hin teh maw ....
Quote:
Huihkhi leeng in ka teenniik leem hiauhiau
Huihkhi laangin ka teenniik leem seeu seeu e
Taang laileng in leem ngamlou....
 

Please login to comment or register here

Who's Online

We have 9 guests and no members online

Zomi Video

About ZOL

Around 2005 when there were not too many Zomi websites the number of Zomi accessing the Net increased rapidly due to, besides others, two main reasons - those from Myanmar go abroad in large scale...