You are here: HomeNewsWorld NewsNationalCyclone Phailin in AP leh Odisha nawk ding Army, navy leh air force te kigingsa in omta: Def minister

Cyclone Phailin in AP leh Odisha nawk ding Army, navy leh air force te kigingsa in omta: Def minister

Written by  Published inNational Saturday, 12 October 2013 12:20
Cyclone Phailin in AP leh Odisha nawk ding Army, navy leh air force te kigingsa in omta: Def minister

BHUBANESWAR, Oct 11:Tui kifawn hat mahmah leh vuahpi kithuah "Cyclone Phailin" kichi in tuni Sintawpni in east central Bay of Bengal nawkphei a, Kiginni chiang in dakkal khat a kilometre 205 a hat huihpi leh vuahpi kithuah in Gopalpur, Odisha mun nawk ding ahihdan Met department thusuak in taklang hi.

 


IMD bulletin thusuak nanungpen in a taklatdan in, pingpei hat mahmah 'Phailin' in east central Bay of Bengal kantan in 215 kmph a hat huihpi toh kithuah in west-northwestwards lam zuan in kikhin a, Paradip simlam leh - malsuah kikal kilometre 520 lak, Gopalpur a kipan kilometre 530 leh Kalingapatnam east-southeast a kipan 530km lak vel ah kizial hi. October 12 (Kiginni) nitaklam chiang in Kalingapatnam leh Paradip kikal a om Gopalpur (Odisha) toh kinaih mahmah north Andhra Pradesh leh Odisha coast lak 205-215 kmph kikal a hat huihpi toh kithuah pingpei leh vuahpi'n nawk ding hi'n thusuak om hi.

 


Kho omdan kikheng zihzehte'n state government patausak mahmah a, tuipi toh kinaih mahmah mun niamna mun a khosa mipite district thuneitute'n pikhe ding in state government in theisak hi. Pingpei nawkkhak ding lau mahmah Bhubaneswar mipite'n niteng van poimoh ding lei in dawr teng ah kivual ua, allu kg 1 ah Rs 12 in leizel mahle uh tu in Rs. 30 tungtou hi. Candle man leh antang mante leng naktak in khang hi. Kiginni chiang a pingpei hat mahmah 'Phailin' in Odisha a nawk ding ziak in, state government in kal khat sung tourist-te khopi a vak khesaklou ding in Hotel thuneitute kiang ah theisak hi.

 


Cyclone 'Phailin' kichi ahihleh "hat petmah" chi a chiamteh in om a, tu in dakkal khat a kilometre 200 - 210 kikal a hat a nung in Odisha leh Andhra Pradesh manoh lel a, Kigini nitak lam a hiai state nihte a phak chiang in bel dakkal khat a km 230 a hatta dia gintak ahi. Cyclone Phailin kichi ahihleh US a huihpi hat leh lauhuai mahmah a kigen 'Hurricane Katrina' kichi toh tehkak theihding hi'n thusuak om hi.

 


National Disaster Management Authority (NDMA) vice chairman M Shashidhar Reddy in a taklatna ah hiai cyclone phailin ziak in mihing 1.2 crore val in buaina tuakding a, genkholh a omsang a huaisezaw laithei ahihman in kuapeuh kigingsa a om gige ding in theisakna bawl hi.

 


Indian Meteorological Department (IMD) director general Dr LS Rathore in a genna ah, ‘cyclone phailin’ pen 'hat petmah' chi a chiamteh in om mahleh 'super cyclone' bel hihiallou a, super cyclone ahihleh dakkal khat a km 220-250 kikal a hat hi'n gen a, phailin leng super cyclone bang a hat hihiam chih etkhiak hilel hi'n taklang hi.

 


Andhra Pradesh leh Odisha state sung a siatna thupitak tungthei ahihdan hilhlawk khit hita a, Union Defence minister AK Antony in army, navy leh air force-te kiang ah emergency leh panpihna nasem ding a mansa a omding in theihsakna bawl hi.

 


Odisha's Disaster Management Minister Surya Narayan Patra in NDTV a theihsakna ah, mihing hinna humbit ding ngaih poimawhpen hiding a, tua zawh in nek-le-tak banah electricity hiding hi'n taklang hi. Tua banah, "1999 a kivenna bangmah bawl manlouh a cyclone in ngamkhat a hon phak ziak in mihing 15,000 val in sihna tuak mahleh tutung in bel kiventheihna leh panlaktheihna teng a panlak ahi" chi’n taklang hi.

 


Hiai cyclone phailin thawmging ziak in Andhra Pradesh ah Srikakulam district leh Odisha ah Ganjam, Puri, Khordha leh Jagatsinghapur district-te a kivenna ding bangkim kisakkholhna bawl in om a, lenna (choppers) leh antuun (food packages) leng 'phailin' in a nuaikhak diakna munding a gintaknate ah mansa a koih in omta hi. (PTI)

 

Read 753 times
Login to post comments