You are here: HomeNewsWorld NewsNortheastManipur a party upapen, MPP vice president kaplup in om

Manipur a party upapen, MPP vice president kaplup in om

Written by  Published inNortheast Thursday, 14 November 2013 14:47
Manipur a party upapen, MPP vice president kaplup in om

Imphal Nov 13: Manipur khangthu a dia political party upapen Manipur Peoples Party (MPP) a vice president hihna lenlel Haobijam Manisana tuni’n meltheihlouh galvan tawi mi 2 in kaplum uh hi’n thusuak in taklang hi. Thusuak in a taklat dan in, Kum 65 a upa MPP vice president Haobijam Manisana ahihleh tuzing dak 10:5 vel ding in party office zuan a car a tailai NH-150, Tulihar airport a kipan gamlalou ah meltheihlouh bike a tai mi 2 in kaplum uhi.

 


Lamphel Police station, Imphal West huamsung, Changangei area a kaplup a om, Haobijam Manisana ahihleh Bishnupur district DC office kim a teng hi a, hichibang attack a tuah hun in Alto car, Silver color, registration numbers MN-1K/8866 hek kawm in Imphal, Tulaihal airport lam manoh in tai hi. Police thusuak in a taklat dan in, motor bike a tuang mi 2te’n bangtanhiam a zuih nung ua hunlem a muh masakpen ua kaplum pah uh hidia gintakhuai ahihdan gen uhi.

 


Police-te’n thiltung a theih phet un delhpah mahle uh Haobijam Manisana bel a mun ah ana sikhinta a, a kim leh kiang verification bawl mahle uh muhsuah leh matkhiak ding omlou hi. Police in gintakthu a taklat zelna uah, Haonijam a hihleh thau lianlou zang a 6/7vei vel kap in om a, tuate lak ah thautang 3-4 vel a taksa tung a lut a hihdan leh car bang a thautang lutna mun 5 vang ahihdan taklang uhi. Police-te’n bangtanhiam verification a bawl nung un RIMS morgue a koih ding in siluang pokhia uhi.

 


Hichibang thiltunna mun ah state top official tuamtuam; ADGP LM Khaute IPS, IG Kailun IPS, DIG Clay Khongsai IPS leh SP Imphal West L Jayentakumar IPS chihte paikhawm ua, tuabanah police in thiltung toh kisai case khat chiamteh hi.

 


MPP vice president suunna leh zahtak latsakna in MPP in party flag a kimkhat ah khaikhiak in om hi. RIMS a MPP President, Sovakiran in thuthaksaite kiang a, a genna ah, hiai thiltung toh kisai a politics khut kigolh hidia gintakhuai ahihdan leh MPP leng dai maimai lou ding ahihdan gen hi. Tuabangkalah BJP Manipur Pradesh a kipan Th Chaoba inleng RIMS mah ah MPP Vice President sihna toh kisai gen leh sak tamlou nei hi.

 


Aman a genna ah, hichibang khovak nuai a political leader khat kaplum ngamte mohpaihna sangpen a mohpaih ahihdan leh, Manipur state sung a dia security khauh mahmahna mun a hichibang thltung lamdangtak pen mipi kuapeuh in leng mohpaih chiat ding in ngetna leh theihsakna bawl hi. Amaute banah MPCC Vice President Th Mangibabu, Parliamentary secretary of Youth Affair banah, Thanga Assembly constituency MLA M Prithiviraj in leng RIMS ah siluang va en a, aman leng political leader khat sihna a puaknat thu genlang hi. (UNA)

 

 

Read 1071 times
Login to post comments