You are here: HomeNewsEntertainmentBombay Times leh Priyanka in Mary Kom tungtang houlimna nei

Bombay Times leh Priyanka in Mary Kom tungtang houlimna nei

Written by  The Lamka Post Published inEntertainment Friday, 22 August 2014 11:31
Bombay Times leh Priyanka in Mary Kom tungtang houlimna nei

Kei sang in Mary Kom in a hair style a khek munzaw: Priyanka

Bollywood actress Priyanka Chopra kichi numei hat leh a hinkhua a haksatna-te gumtak a maituah thei mi himahleh boxer Mary Kom lem a hon chiin hial chiang in bel haksa sa petmah hi. Tulel a, a buaipih Mary Kom script a hihleh Priyanka in a pianna pa kiang a tangthu a gen nanungpen hi a, hiai movie shooting a patnung ni 4 lel paipan in a pan sihsan hi.

 

Amah (Priyanka) tanchin leh Mary Kom biopic toh kisai Bombay Times in houlimna neihpih a, tuabanah Manipur state a Mary tenna inn a veh hun thilthak a muhkhiakte tungtang houlimna nei uhi.

 

BT: Boxer Mary Kom lemchin kichi nang a din bangchituk in a haksa a?

Priyanka: Hiai movie kei a ding in thil maimai ahikei, a haksatna a tam petmah. A masapen in ka pianna pan hon sihsan nung ni 4 lel paipan in shooting nei din ka kuankhia a, tuni chiang in leng ka pa tanchin ka buaipih non man naikei hi. Aman (a pa) chiklai peuh in kei a kipan tangthu ngaihkhiak a lunggulh gige a, tua dungzui in ann ka neklai chiang bang un ka film bawlte tanchin kagenzel hi. Tutung a Mary Kom tanchin tuh ka pa kiang a ka gen nanungpen ahi. Hiai toh kisai a hon thuhilhna nanungpen bel, Mary lem ching ding na hih leh Hindi film a heroine-te bang in omken, na hih vanglak leh naktak in pang in hon chi zel hi. Ka nu leh ka pa tuh keisang in sports a lunglut zaw ua, kei ka hihleh amau toh teh in mi thadah mahmah kahi. Huaiziak in Mary lem ching dia training ka neih lai in gym a ka omdan ka pan a hon thei a, inn ka tunkik chiang in hon nuihsan maimah hi. Na boxing glove kivei sak maimai kenla, tha leh zung seng in pang in hon chi hi. Ka pan hon sihsan nung in a thugente ka lungsim ah a thamden a, naktak in ka pang hi. Tuni chiang in a hihleh boxing ring sung ah kisual taktak ding in hon koih leuchin hihtheihna chiang ka nei mahmahta ding chi hi.

 

Mary Kom taksa bang a taksa hoih na neihtheihna din bang na hih a?

Priyanka: Lemchingtu khat ka hih ziak in ka etton ding Mary omdan tuh ka etton ding mah ahi. Himahleh hiai toh kisai a, a haksa masapen bel amah bang taksa leh melpuak bawlkhiak ding chih ahi. Himahleh kei bel North Indian mi kahi a, amah bel North Eastern mi ahih ziak in ka melput uh a kibang kei khopmai. Tua ziak in prosthetics, VFX leh thil tuamtuamte zang in ka mel ka bawl lamdang uhi. Shooting ka patma in bel kuapeuh in leng ki-fit hon sa mahmah ua, himahleh ka hon pat hial chiang in bel fit teuhlou ka hihdan ka kithei hi. Gym a taksa sawizoinate ka haw mahmah a, nuam mahmah ding kasakte haksa petmah hongsuak hi. A haksa mahmah khat nawn bel boxing kimawlna ahi nawn hi. Mary Kom coach in a hon sinsak a, kei a ding lueuliau in ring hon bawlsak mahle uh ka lungkiak dek ton a om sek hi. Himahleh tu in bel push-up 50 vei leng ka zou a, maban ah kihtak luat ding ka neikei.

 

Ka training lai in film dang 2 ah ka kihel a, huaite buaipih in zinglam dak 9 a kipan nitak 9tan ka buai gige hi. Huaite ka zoh phet chiang in tawlngakna ding hun omlou in training ring sung ah ka lutpah a, nitak dak 12:30 ginma ihmut na ding hun ka neikei himhim. A ziak bel Boxer khat in hun sawtkuamtak a thil ana hih zoh pen ken kha 3 sung lel a ka zoh poimawh ahi.

 

Goa ah inn khat kanei a, huai ah director Omung Kumar leh ka team mate-te toh om in a sawng tung pen gym in ka bawl ua, hunawl tomkhah ka neih teng un screen lianpi khat ah boxer film ka en zel uhi.

 

Kisualna taktak:

Hiai film ah ka lehlam a pang tengteng bel a kizil tawm khatmah leng a omkei uh. Amau bel boxer taktak ngen ahi uhi. Pavitra kichi ngial Hissar boxer minthang ahi a, aman hiai film ah Sri Lankan boxer lem ching hi. Boxing kimawlna taktak ah bel nat leh sat thuak mahle uh a nalou dandan in kilat sawm teitei ua, himahleh film ah bel expression a latsak poimawh hi. Ka kisualpihte kiang ah chiamnuih in hichin kana gensek, ‘ka hon suk(hit) khak chaing in suang (stone) bang in omken, na kibawl kei leh honzoulou ding mah kahi chin ka gen hi.

 

Ni khat tuh ka kisualna uah ka lu (head) a kipan sisan hong pawt a, himahleh amah maitang suksak ding ka mohpuakna ahilai. Kisual taktak-te bang a kisual mah ka hih chaing un ka liam mun sim mahmah. Himahleh damdawi zang in ka kikem ua, a ninawn chiang in shooting ka sunzom zou veve hi. Huchibang in ni 25 sung niteng in dakkal 12 bang shooting ka sunzom ziahziah a, a tawplam ah bel numei hattak ka hong suakta hi.

 

Mary toh kibatlouhna leh a sulnung zuihna khenkhat:

Mary in kei sa kei sang in a hair style a khek munzaw, amah hair style tuamtuam a deih hi. Tuabanah, make-up, lipstick leh nail polish chihte leng a ngaina hi. Amah leh a innkuante toh Manipur ah ni 3 sung hun kazang ngei ua, a pianna khua, a school kaina, a college kaina leh a pasal toh a kitenna biakinnte uh ka en ua, tuabanah a pi kum 100 phial leng hon kimuhpih hi. A pianna khua leh a nu leh pate omna mun ka muh a kipan film in bang melpu ding hiam chih ka lungsim ah hong kilang pah hi.

 

Ka kibatlouhna khat nawn uh a hihleh,a school kailai in samkilh (clip) deih petmah a, himahleh ken bel huaite ka haw mahmah leuleu hi. Bangteng hileh aman ana zang a hih manin film ah ken leng ka zat teitei poimawhhi. Kitenna hun ah amah kitenna puan diktak ka silh hi.

 

Mary Kom melput leh taksa diktak bangchibang ahia?

Priyanka:Mi neu ahi. Ka muh masakna pen ah lamdang sa in ka kiguih phial hi. A sam khahkhia in a bil ah gold bilbah bat a, a khutchinte kinuh vak silhselh hi. Manipur ka hoh hun in Mary kimawlna gym leng amah leh a tante toh ka en ua, huai ah bel kei trainingna dia vanzatte toh a kibang kei, mahni khutsuak leng bangzahhiam a nei hi. A bik in intung khum a kipan tyres kikhai khawng a training na vanzat ahi. Mary kichi poisak neilou mi pa mahmah himahleh a langkhat ah nu a hihna leng theisiam mahmah a, annhuan leh meh huan chihte siam petmah hi.

 

Mary toh mimal tak in bang relationship nanei ua?

Ka nih un khota a kipan khangkhe tuak kahi ua, pasalte(male) sulnung nuai a khosa kana hi uhi.  Aman boxing kimawlna ana pat lai in numeite India aioh in kimawl thei nailou uhi. 2000 kum a kipan India aioh in kimawl thei pan phet hi. Tuanung in khovel ah India tuh dinmun sangtak ah koih zou hi. Amah bang in kei leng Miss World tungtawn in kana minthang ngeita. Ka lungsim uh leng a kibang mahmah, himahleh kei ka zahkai zaw deuh hin ka kithei. Kei bel ka iit leh ngaihte toh ki kisual thei ua, amah bel a pasal angsung ah zahkai mahmah leuleu hi. A pasal leng a melhoih mahmah a, himahleh Mary in minthanna thupitak a hon ngah a kipan midangte’n chaimnuih zel mahle uh aman bel poisalou in a zi, Mary kiang ah, ‘tu laitak nang minthan hun lai ahi chin lungkim mahmah hi.  Tulai khovel a pasal tamtakte’n amah a kipan zillai zil ding nei nahi uh, a ziak bel Mary kimawl sung in a pasal in a tate enkol in bangteng sem zel a, tu in a sepgah a pasal natan in leng louban ahi chi hi.

 

 

 

Read 1369 times Last modified on Friday, 22 August 2014 11:58
Login to post comments