You are here: HomeRSS FeedsLatest Articles

Ka Houlimna Uh

Wednesday, 12 August 2015 07:36

~ By : VzSiam

 

 

Douna lingling, douna lingling e

Gual in kumkhua douna lingling e

Gual in kumkhua douna lingling e

Dou’ haan ah nau bang va kap tang e

 

Tulai Facebook khawng a houlimna sousang theilua in, a nop natak khat bang om lehlam. Chim hetlou a omom theih. Facebook hong om zenzen le naak phattuamlua. Ahi a, a siatpih bel tampi om veve. Skul hiam kolez hiam ka kailai a ana omlouh tuh ka kipah mahmahna khat eive. Kihaichilh mawk ahih chia, laisim man dia kigingta hetlou.

 

Khodou bang hong ging nawnta ahihman in zankhat tuh hiai Khodou toh kisai ka houlimkha uhi. Lawmte’ kiang a, ‘Ei pawl in Khodou manglou ding i hi uhiam,’ ka chih thahahleh, koilak dou malak ah, Paite-te’n khua i doulam uh le theilou a tamzaw ana hi tel zouzen uh! Khenkhatte’n houh, ‘Burma-te’ a hilou maw Khodou pawi kichi,?’ achih utoh. Burmate’ suan-le-paak ahihlam uh kitheilou a! Khente’n, ‘Paite-te’n khua kidou ngeilou,’ a chih utoh, khente leuleu in, ‘(ei pau in) Phavang chi le a dik di,’ peuh chi a a hon sutsut uleh dik salua in Khodou peuh Phavang hon suah dek thepthup uh! A theilou diakkhol khat in houh, ‘…melma (sa-leh gal) nei a om gige ipupa te ahi uh. Sa mat-Gal mat hun in (nang gintak dan =Khua Dou) vualzawh hun in- zu-leh sa in lawm…’ chi’n Khodou ka chih tuh ipu-ipate’ hunlai a khua leh khua a kidou tuah vengvung uh genna a hisak maimah hi. Neknek mai. Dah mah tel hang!  Tua mipa mah in, ‘Paite ten nidang a Khodo Pawi azat namun uh leh azat dan uh, amun amual dik tak hon taklang in,’ chi’n houlimte a hon kalh tang hial hi. Nuih lamlam bang za, lah khasiat bang le tuh suak. Banghang a khangthakte’n i pi-le-pu’ tawndan hichi theihlouh tel i hi u hiam chih in a om a, awlmoh a om mahmah hi. Ahi a lah ei le a mi hilhsawn dia a theilua le kihilou, a mong neuchik i na kuikha chihman hi’n.

 

Khangthakte’n tua bang a i pi-le-pute’ tawndan leh vai tuamtuamte a hichi theihlouh utuh amau’ va mohsak theihle a hikei ua, khang masate’n i piaksawn siamlouh ziak uh ahi lel mai hi. Huaiziak in khang masate’n i mohpuakna uh zou hetlou i hilim uh. Hiai pupa dan leh ngeina khawng kipiaksawn le ana ngai khollou a, theih leh chiamteh ana ngai khollou ahihleh bel thutuam. Kei leuleu in bel kipiaksawn a, theih leh kep poimoh sa hi geet kei ve. I chih hang a ei bang le a theilua kihi tuanlou zel. Mi’ gen leh laibu a i muh tamlou chik khawng a pan thei kihi lel. Laibu ana gelh khang masate’n a diklou deuh bang in ana gelh le utuh a diklou mah a kithei di.

 

Hiai Khodou vualnop tuh Chimnuai a Guite hausa Tuahchiang in vai a hawmlai a hong piang hi ding in ki-ummoh hi. Guite hausa Tuahchiang pen Paite-te ahi i chih leh bel hiai Khodou tuh Paite-te’ pat ahi chihna ahi. Khodou chih phetlouh, khosung ki-ukna leh nopni-dahni a bangkua kizopnate, innsung dongta i chihte hiai Tuahchiang hun a hong piang hi ding a gintaat ahi. Tuahchiang’ hun a kipan hiam, ahihkaleh a ma’ mapek a na kipanta hiam theikhang, himahleh Tuahchiang hun in leng Khodou a kizangta chih Thanghou’ Khodou la in a chiansak hi:

 

Douna lingling, douna lingling e

Gual in kumkhua douna lingling e

Gual in kumkhua douna lingling e

Dou’ haan ah nau bang va kap tang e

 

(Lawmte’n khua a dou lingling ua, kei bel Liandou’ haan ah ka va kap)

 

Hiai i chih theihna bel Geltui pen Thanghou leh Liandoute’ khua hi a, huchia luun leh pha mahmah a omlai un Tuahchiang in va sim a, zou in luah pah a, Geltui ah a tapa Lamlei, Hauzel leh Dousel nusia in teeksih hi, kichi hi. Huaiziak in Tuahchiangte, Thanghou leh Liandoute khawng Paite i chih leh tuh Paite-te’n Khodou ana kizangna ahi chih a chiang hi. Amaute Paite hikei i chih lelah thutuam hi ve’n chin.

 

A huai Thanghou leh Liandoute tantan gamla lua i chih leh leng a nai zawdeuh gen ding a omlai hi. Tedim a Guite hausa Mangsum, huai leuleu tuh Goukhothang’ pu,  heu a luun leh pha mahmah a a omlai un nikhat tuh khua hon douta uhi. Khodou vualnuam a khophawklou a a laamlaam lai un zingsang phalvak in Zoute’n thakhat in va sim laizang uhi. Khodou vualnuam a om ahih chiang un sa-le-gal om ding in zong ummoh zenzenlou uhi. Galte a dianlut tak un khodou zusiim dia hong kuan sa in zuteep ding peuh in na kai gaigai laitei uhi. Galte’n lupna a lum leh tute khawng thah dia a baantang ua a va kaih chiang un, ‘Ke’n zaw teep ngap nawn mahmah lou hi veng aw,’ chih toh thuah in a zui khankhan uhi. Huchia galte’n tamkhop dainawl a a thah nung un gal om ahi chih hon phawk ua, hong kikouzaak ta uhi. Huai phet in Kampau’ tapa Tuangngul in temluka khat man zok in galte’ lak a dianglut in a tem vai chihtak in a vai a, asi-aliam tamkhop a om nung un galte lau in a taizaak uhi. Huchia amah Tuangngul’ liim beel a siding-mangding tamkhop suakta ahih chiang un Tuangngul in la phuak hi:

 

Haat lawmlawm e hat lawmlawm e

Ka namtem hat lawmlawm e

Zoutui suk a zatamte aw

Ka namtem hiam bang haat e

 

Goukhothang-te khawng Paite-te i chih letuh Paite-te’n Khodou ahihkaleh Sawmzuneek ana zang uh ahi chih hiai in a chian nawn leuleu hi.

 

Huchilou Kamzamang’ hun in leng Hanship khawng ah ana hahzat mahmah lunglung ding uh chih deuleulou in i gen ngam hi. Kamzamang’ hun tuh pupa’ nun leh khristian nun a kikheek hun laitak ahi a, Hanship bang ah buai naphet in a buaikei uhi. Khristiante peemkhe hial dia a hong kisak chiang un khosung upate’n hi salou in hong kilem thei khong ua, huchia peemkhelou phet ahi uhi.

 

I Paite pau gelhna ding laimal leng huailai khawng a sapte’ laimal kheel a ana leptawm zual uh hilim in chin. Tu a ahoihzaw ding geelna a zatdan neuchik kheek ding chih bang sih ngaihdah a ngaidah, tangtel sihtan mah bang thei bang om hang a. Huai tepawl Kamzamang’ hunlai in na omkha le u tuh buaihuai kha ngial un teh! Kum a sang a sim ana zuih uh pupa’ tawndan, zu leh sa, ton leh aih, kithoih-kimuut chihte tawpsan a Pathian thu-awi ding chih bang a naak eng utlouh khiat didan uh! Khangthu a Pathian thu deihlou pawl chia chiamteh telawi’ lak ah a telkha di eive ua. Deihlouh ding leng ahi him. Pu leh pa’ tawndan paikhia a midangte’ tawndan leh sahkhua va zuih duulduul ding chih bang tuh manthatna ei peetpeet ve! Ei buaipih laimal khat leh nih kheek khawng toh teh di vual hilou. Himahleh Pathian’ vaihawm mah hi’n teh. Tutan kimangthang nai samlou, Paite kichi di ki-omlai! Manthat naak sang a kikhankhiat loh, khovel in hon theih kholoh. En le khovel theih kholoh.

 

Huchilou a naizaw deuh a a kizatna khat genlai ni. Japan gal lai in Bukpi a teng Singgou-te’ inn ah tangval lawi khat giakkhawm uhi. Hiai tuh haam i chih ahi. A sawmpi uh Singgou’ nu Damphal hive’n, mi polhnuam leh vual khawlthei mahmah ahihman in a sawmte’n nuam a sa mahmah uhi. Hun hong paizel a, zi leh ta nei a kikhen thaang ding dinmun a hong din chiang un kikhelah in sawmzuneek hon sawm uhi. Innteekpu Singgou Naulak in vok khat a sawmte hon goh a, sawmte ak hong kidong in tampi hon ngah uhi. Innkong a gopi phut in huai leek ah khau zan in akkha a khai diudeu uhi. Hiai tuh ‘akkha khai’ a kichi a, khodou chiang a kihih zel ahi. Zu leh sa toh nuam sa tak leh kikhelah tak in Chinkhothang (Thangkeng)’ la phuah Chiantuang la kaih a sa in sun leh zan in a laam uhi.

 

Sawmkholh tangvual tul mai di’n i lawmlou e

Huan a damthei paalluun aw ellai le’ng

 

Sawmkholh tangvual koi a sawl bang hei hiam aw

Ziin in gi bang hon hawi leh chilai ing

 

Ziin in gi bang hon hawi le chi lai ing e

Sau tuunnu toh i nun kumkhua sawt hen

 

Sawmkholh vual in lungdeih a mung bang phuh

A tulmoh in chiau lumsuang bang gil hen

 

Buh-al baanna pigua aw kai sawt hen aw

Seinou khawlna sau tuunnu khan sawt hen

 

Ahihleh Khodou i chihiam, Sawmzuneek i chi hiam bang hi peuhmah ahia? Khodou tuh kumchin hunnuam ahi a, buhlaak zoh vel a kimang tangpi ahi, a chi uh. Hiai khodou tuh nungak leh tangval a diakkhol ahi deuh mai ding e. Haam a giakte’n kumteng in khodou chiang a goh ding voknou loh ua, mi vulsak uhi. A vulhman ding in a vulte’ lou bang khohsak uhi. Huai lou in khuaibu, khuaitou/khuaibeel chihte khawng ahi deuh mai ding e, khawng a muhte uh la in inntung ah koih ua, huaimun ah khuate’n a bu uh lawi tuanlou in khuaibu tampipi bang ngah uhi. Huaiziak ahi ding e:

 

Vahkhua a hang keemsang dawn ah

Mang tuunnu’n ningbeel vual e

Mang tuunnu’n ningbeel vual e

Lengkel tangkhau in khih e

 

Paam a vahkhuai phungching kisa e

Kumkhua khenna’n va la’ng e

Kumkhua khenna’n va la’ng e

Saumang toh etlawm sa’ng e

 

Vahkhuai a hang tazaw maw

Momnou a hang tazaw maw

Momnoute hanlung chiamna aw

Lengkel in sum bang tuah e

 

Chia khuai peuh la ana phuahkhum uh.

 

Buhlaak zoh hun awl chiang in hiai khodou mang zel uhi. Diwali puja a batna bang leng om. A ziak bel meilah de in khosung taan uhi. Kum kikhenna dan a aneih uleng hisim leh kilawm.  A tung leh nuai a late’n gen hi:

 

Kumkhenna dia lahmei ka vaal

Ka mei aw singkhua taan aw

Ka mei aw singkhua taan inla

Lamtui ka vangkhua taan aw

 

Huchi’n gante gou in, zute sa in khodou a mang uhi. Kongtual a gua phut in a leek kui ngilngel ah khau zan in huai khau ah akmul a siat tiptep uhi. Huchi’n zu-le-sa ne in tua akmul kai nuai ah sun-le-zan in a laam uhi. A khuai laakte uh hiai hun a ne in sawm neitu innteek pa’n gan a a aihsak hun le om. Khodou chiang in, ‘Na zun na eek namsia, na khua na tui zuan in,’ chi in dawi leh kau hawl in tuga-heiga peuh in bangsak-bangkhang leh inn kilkawm teng baan saat uhi.  Hiai natak ahi ding e Khodou a kichihna. Dawi leh kaute dou a hawlmang. Ahihkaleh dou i chih vaitun chihna le hizel a, kumhoih hong tung ding ana vaidawn, kumhoih hon pethei Lungzai ana zindou chihna bang leng hithei zel. Hiai tuh mi gen khawng i zaaksawn niilnial ahi a, thil dang toh bang theikokalh sim napi theih dandan hon gelh tuh kihi, a pianzia theihna di beek in chidan i hi.

 

Khodou tuh hunbi nei a kizang ahi a, huchilou pupa’ tawndan tuamtuam dangte bang leng theihtuak tampi om ding hi. Ton, sa-aih-gaal-aih, kithoihna tuamtuam- khobawl, uisiang-at leh a dangdangte. I pupa’ ngeina a tamzaw zu-le-sa, dawi-le-kau toh kisai ahihman in khristian i hih nung in kizom thei nawnlou hi. Himahleh a min a manlouhna ding in tuhun toh kituak in zang thei lehang houh a hoihna tak khat a om di e. Tawndan nei, nam hon hisakte hiaite khawng ahihman un.

 

Etsakna ding in Uisiang-at chih bang haichi tuhte a hong dot chiang ua hai hoihna di bang leh kum hong tung ding a kumphat ding leh dinglouh aisanna a kithoihna kibawl zel hi a, hiai bang a min la in kumteng in haichi dot hun in Pathianni khat biakinn ah Uisiang-at mang le hang kilawm mahmah leh kilawm. Huai tuh haichi hiam, ahihkaleh kumkhat pumlum sung a mite’ a dia vualzawlna ngetsakna bang hileh. Tuma in la phuahsiam Pi NC Doungel in a laphuahte hon Ai a, huai bang leng hong kilawm mahmah.

 

Khenkhat tageet lah innvengte’n a a na kep ua a na puah ziak ua ei a sim a sim utnawnlou bang ki-om. Innvengte’n huai a pan a khodou ana zat gige ziak ua khodou bang khodou leng chi nuam nawnlou in ‘Phavang’ peuh hihsak sawm mawk. Huchi ding leng hisamlou ahi. En leng i zang dia, ki-unauna haatsaktu a i zat ding uh ahi. Midante’n a zatlouhlai ua leng a zang ding eite i hizaw uh. Buh a vuak ni ua buhphual a giah ding thu a a tapa pa’n, ‘Pa, kei giakna ning, a dang teng pai le uteh poilou,’ a chih leh a pa’n, ‘Bawi, nang ei voi i hon ven,’ a chih bang sim ua, mi khenkhat tuh gam leh nam bang leng ana it kholdah mai uhen la, awlmoh in ana nei dahmai le uh a gam-le-nam’ ua dia chidamna hizaw dia gintaathuai bang om. Amau lah gam leh nam it kisa a phe langlang uh, en lah ki-awimoh sim. A ei awimohhuai kihizaw hiam lah thei khang. Gam leh nam it i kisak kaal a i innveng hua ana kihi nilouh chih bang leng thil omthei lawpi khat hi leuleu. Nam dangte huatna peuh gam leh nam itna ana sa nilouh.

 

Nam it ziak khawng a kam i kaat nop a, vai i hawm ut a thu i veek ut leh i khangthu khawng thei masa ni hang in, i tawndan leh ngeinate khawng theiphot ni hang in, hileh huai chiang in adik-atang a pau in vai i hawmthei kei dia hia. I kipatna theichian phot le hang, i mabaan kalsuan dingdan leng ngaihsut a baihlam deuh kha mai na ke. Huchi lou pi a, nung-le-ma theilou a, tu laitak a i dinna munkia thei a vaihawm sawm a thu i veek mawk leh tuh veekkhial kha mahmah di i ka. Humhin i sawm nilouh pen meeklumkha zenhouh le zaw naak kikheel law d’e.

 

Thil peuhmah a keem zouzou, a zuun zouzou’ a himai a, huaiziak in ei a ngeekngeek himahleh i kep a i zuunkei letuh denchiang a mi’n hon keem a hon zuun ding ua, amau a hong hikhong ding. Hiai thei kawm a kep theihtheih, zuun theihtheih i kep a i zuun mengmeng ding uh ahi. A huchih ke zaw a pilte’n hon zang zungzung ding ua, lah va khonung zat phiing lah nuamlou ding, hi heelhawl di i hih bang uh aw aw. Paite khonung pil mah tungkiik di.

 

[Khanglui late kam a kipe sawnsawn ahihman in theihdan tuamtuam omkha ding hi]