You are here: HomeRSS FeedsLatest Articles

Elija Hiai Ah Bang Hih Na Hia?

Friday, 13 May 2016 00:56

Pastor Rawna Kopsiam

 

Tangtawn Toupa Pathian Vanglian pen a dinga phatuam ngai mahmah ka hi. Huai hun lai a phatuamngai leh awlmawh tak a sep ding bang om a mai zen de aw. Laisiangthou hiai thu kigelhna mun i sim leh a phatuam ngaihhuai ding dan kimu thei hi. Israelten Pathian thukhun a nawlkhin ua, maitamte a laichim uhi. Namsau in kamsangte a that behlap lai zaw mah uhi. Awlmawh leh phatuamngai theite a ding in phatuam ngaihhuai mahmah ding mah ahi.

 

Phatuamngai leh awlmawh tak a asepna ziak point dang khat ahihleh a semthei om sun a mah chauh om kisa kha dan ahi. Amah leng thah sawm zaw mah uh hituak. Amah thah in om leh kuamah hiai nna sem ding mi om nawn lou ding sa kha in, nna sep pen awlmawh lua leh phatuamngai lua hi kha ding hi. Pathian in bel hiai nna sem thei ding nang chauh om kisa na tha hah maw. Baal ma a kun ngeilou, tulai pau deuh in gen lechu corruption bawl utlou mi 7000 nei ka hi chih san daih mai hi.

 

Mosi in a minamte a ding a Pathian toh kihou in ni 40 leh zan 40 ann angawl hi. Elija in Pathian tuak ding in ni 40 leh zan 40 ann ngawl in lampai nilouh hi. Jesun leng melmapa khemna tuak ding in ni 40 leh zan 40 ann ngawl masa hi. Hiai ni 40 leh zan 40 annngawl apangte Mellamdanna tang ah hong kimu khawm uhi. Hotdamna nna sepding dan vaihawm khawm uh hih tuak. A thuak uh leng a thupi a, a sepkhiak uh leng manpha hina mai zen e.

 

Elija hinkhua a lamdang ka sak khat ahihleh awlmawh leh phatuam ngai chikawmpi a kibu nilouh mawk. Phatuam ngailua kichi napi Pathian kianga sih bang ngen thepthup zel. Toupa ka hinna hon hawisau saklai inla hon panpih in sepding tam lua ahi chi zaw leh kilawm hia. Sih ding a nget hang Pathian in sisak dek lou, hingsa a van a pitou maidan ahi ve. Elija leh a nna sep ah Pathian in lungkim na tak nei hi ding in ka gingta. Mihingten i utlouh pen uh sih ding hia, ahampha maw, sihna tuak lou chih mawk. Eilawi leng Toupa hongpai tan ah muan huai in a nna sem peuh leng sihna chiam lou in huihkhua ah a mah tuak ding a laktouh a om ding i hive le. Tua bang hamphatna i tang zou diam kingaihtuah ni unau.

 

Elija hiai ah bang hih na hia ? chih dotna bang bang nang leh kei kiang ah dot in hong om tei leh bang chi’n i dawng di uam maw. Tangtawn Toupa Pathian Vanglian pen a ding a phatuamngai mahmah ka hi i chi ngam kei zaw mah lai ding uh e. Toupa gam nna sepna toh kisai a phatuam ngaihna nei mahmah lou i hih chia. Ahihkeileh gam leh nam khantouh nang in phatuam ka ngai mahmah i chi ngam diam? Nekguk takgukna lam ah phatuamngaihna ka nei lian mahmah i chi maimah diam. Phatuamngaih dan chituamtuam a om.

 

Khenkhatten sing leh gua humbit nang in phatuam ngai mahmah a sing nou tampipi a suan lai un, pawl dang khatten satsia in hal mang in phatuam ngai uhi. Khenkhatten gamsa humbitna dinga phatuamngai tak a nna a sep lai un khenkhat leuleu ten samat ut in gamvak leh thangkam phatuamngai mahmah zel. Tangval Saul in Christiante sawisak leh mat nna sep phatuam ngaitaka a seplai in Jesu toh kimai tuah ua, Toupa kua na hia ? a chih leh Jesun na sawi Jesu ka hi chi mai mah hi. Enleng phatuam ngaitaka i seplai in Jesun na suk zahlak, na suk minsiat, a nek ding leh atan dingteng na laksak vekpa Jesu ka hi hon chi mai mah diam maw.

 

TV a thugen minthang mahmah Nu Joyce Meyer in a hinkhua athiltuah khat hichin gen hi. Miten a hon poimoh ziak un a hong pan sek ua, kei leng poimoh ka kisa mahmah hi. Ka min kigelhna car ka neia, car koihna ah kei a chauh koihna ding ka min kigelhna mun a om a, Office kongkhak tung ah ka min a kigelha, ka tutna ah ka min a kigelha, Ka min kigelh muh hi nuam ka sa mahmah hi. Nikhat ka car koihna mun seka ka va koih lai in Pathian in hiai ah sep ding na nei nawn kei hon chita mai a, ka phuguih hial hi. Ka nna sepna ah awlmawh leh poimoh ka kisak sak mai zen toh. Pathian in hiai nna khawlsan ding a hon chih nung in leng kum khatvel ka semlai teitei hi. Ahialah hiai ka seplai teitei hun ka hinkhua a ka thiltuahte lak a ahaksa pen leh nuam lou pen pawlte lak a hunkhat hi in ka thei chi hi.

 

Unaute nang leng Pathian in hiai ah sepding na nei nawn kei hon chih nung a leng poimoh kisa lua, kitawp mai utlou lai, sem teitei, Kisuan khia ut mahmah lou lai na hi hia ? Elija in leng phatuamngai kisa tak a a seplai in Pathian in Elija hiai ah bang hih na hia ? Na hong kipatna lam ah kilehkik inla, Damaska gamdai gamkeu ah hoh in. Tua mun na tun chiang in Aramte ( Suriate ) kumpipa hi ding in Hazael thaunilh in. (Pathian nawlkhin Israelte polam apan sawisatu ding Israelte melma ahi. Pathian in i lampialna apan i hong kik theihna ding a melma thahat tak bang hon sawisa sak ek zel hi ve aw) Israelte kumpipa ding in Jehu thaunilh inla (Pathian nawlkhin Israelte a mau sung a pan sawisatu ding. Amah nawlkhinte Pathian in gawtlouh in koih kei hial veh aw.) nang tha kheng ding in Elisa zong thaunilh in. ( Elisa leng Pathian nawlkhinte Kumpi Hazael leh Jehu khut apan suaktate thattu ding chilai zaw mah. Pathian thangpaihna apan suahtak zawh kilamet huai kei maw ) A dam om sun kei kia ka hi a chih khak tha hah Elija a din a zum huai mah di maw. Pathian in a thakhek ding bawl khia ding in sawl daih mai hi.

 

Ei kia khawng a sem thei om sun i kisak khak lau huai mahmah e. Ei sang a fel zaw, phatuamngai zaw leh muanhuai zaw tampi om ahi chih phawk thak zel hoih mahmah leh kilawm. I gam leh i society bangzahta in kisia in diktatna om nawn lou chisek mah lehang i Pathian in a mah a dia midiktat kep siangthou khinkhian nei gige ahi chih theih din hoih mahmah hi. Pathian in nna semtu kikhek hun sata hinteh. Elija hiai ah bang hih na hia? achih na mun leh huai hunlai tak ah zaw a hih thupi khawl kei hial veh aw maw. Lau a kibu hi leltak a. Ei leh ei poimoh i kisak luat laitak khawng i nna sep a thulim louh laitak khawng hi nuam mahmah hi. Ei poimoh i kisak sang a min poimoh hon sak laitak khawng uh i poimoh taktak lai hun hi nuam zaw hi. Elija leng poimoh a kisak mahmah hang Pathian in poimoh sa nawn khawl lou hinteh. Tua i sep lel nna pen i damsung a ei kia sep ding khawng i sak khak ding lau huai hi. Pathian in midangte zong a sem ding na sepkhawl khin himai thei ahi. Nang sep ding zong Pathian in nna dang poimoh deuh mai khat na sep khawl khin hi mai thei ahi. Pathian dong kawm zel in sem ni.

 

BD final year ka sim lai in, nikhat ka heutute un final year teng hon sam khawm ua, BD na zir zawh chiang ua bang sem ding chih hon dong chiat uhi. Ka lawmte a tam zaw sepna neisa ahi ua, kik a tua nna mah sem zawm ding chi uhi. Huan sepna nei nailou khenkhat ten leng hiai huai ka sem ding chi in gen uhi. Ka theih khelh kei leh huai lai a sepna ding gen thei nailou kei kia hi in ka kithei. Ka Principal uh Rev Dr Bruce J Nicholls (New Zealandte) in tua bang mah na gen theih nai kei leh leng lungkham het ken, ei chu a nna semtu lel i hi a, A nna sem ding in eilam kiman peuh leng Pathian in koi mun hiam ah hong zang mahmah ding ahi. Tua na lawmte hiai huai ka sem ding chite leng a damsung teng uh huai nna sem khawl lou hial ding uh ahi. Kei leng tua hiai Bible college ah Principal a ka hong pan ding manglam a leng man ngeilou ka hi chin hong gen pih a, hong kha muang sak mahmah a ka mangngilh thei het kei hi.( Semtu leh nna sep kikhek kual thei zel mah ahi i chih nop na ahi.)

 

Na semtu hoih in a mau tha khek ding mi a sek khe thei ua, thakhektu ding mu heutu / nna semtu mi lohching ahi. Thakhektu ding dal chihtak a dal kumpi Saul hinkhua en mah dih. Pathian in hon paisan nung chiang a zaw awlmawh sim lele hithei taktak nawn lou ei ve. Kikhekna a hong om dek chiang in haksa i sa lua sekna ua Pathian lemgel hi zaw mai thei ahi. Toupa ka minam uh leh ka gam ua ding in bang sem dia hong deih na hiam chi in Toupa zingvai hawmsak leng. Aman zingvai hong hawm leh i gam leh minamte chidam ding hi. Ei singtang mite lak a bang ziak a saptuam hichi lawmlawm a pawl tampi om hiam chih thu a kigen chiang in, khenkhatten doctrine thugin thu a buai hi kei ve hang aw, heutu hih ut a kitam ziak ahi chi nak khem uhi. Heutu hih i ut nak leh a utloute sang in hoih zaw veve. Mohpuakna la ngam chihna ahi man in. Heutu hih utten zong Kumpi David bang in ngak zou lehang ei hun hong tung mai ding ahi. Heutu hilel ten zong Tangtawn Toupa’n Tangtawn Toupa thuman a kipahpih zaha haltum thillatte leh kithoina thillatte kipahpih hia ? chih ngaihsut ding in hoih mahmah hi. Hiai thu i limsak kei leh Mene Mene Tekel Upharsin i heutu hihna tawpna a hong hih khak ding lau huai lua hi.

 

Unaupa T Pumkhothang in a phuah, Nungak Ningmuanching in zaila a a awih en zaila in awi siamtei kei hang in, i thumna la uh hi ding in a thu in gelh thoh nawn mai ni. Leitung om ma na ngawn a vaihawmpa, Na vaihawm dante hoih in siangthou hi. A paisate leh omlelte, hong om lai dingte theikhawlpa in zingvai hong hawm sak aw. Gam a ding in leh Nam a ding in vai hong hawm in. Toupa na vaihawm dante hoih in siangthou hi. Lemna Pathian in kou dinga vai nong hawm leh, vualzawhnate kou a hong hi ding. Toupa aw kou dia vai nong hawm sak leh ki itna kituahna lian semsem ding. Kiniam khiakna toh vaihawmpa Toupa nang na hi. Koute a din zingvai hong hawm sak aw. Ka gam uh ka lei uh liangvai lua e, Toupa aw nong huh ding kong ngen uhi. Koute a ding in na zahngaihna hong ngen lai ung. Hong huh in aw Toupa kong ngen uhi. Amen.