You are here: HomeRSS FeedsLatest News

Angel's Vision News | September 24, 2016

Wednesday, 28 September 2016 17:50

Khuga Dam a om Khuga Batallion (6th Sikh Light Infantry) te saina in tunizinglam dak 10:00 in Khuga Dam mun ah Indian Army a panglui Ex-servicemen-te a ding in Ex-servicemen Rally thupitak om hi. Hiai Rally ah CCpur District sung a Ex-Servicemen Association tuamtuam apan member 200 val kihel in, DC/CCPur Lunminthang Haokip, IAS leh SP/CCPur thak Rakesh Balwan, IPS banah Brig. Ajay Kumar, CO 27 Sector Assam Rifles tel in mi poimoh tamtak kihel ua, pension toh kisai a buaina nei te’n a haksatnate uh a tut theihna ding un Suvigya Cell hon ahih banah SBI Extension Counter leng koih hi a, natna tuamtuam neite ki-etsakna ding in Medical Camp leng om in, damlou ki-ensakte kiang ah damdawi leng a thawn in piak hi ua, CSD Extension Counter leng om ahih man in bukim mahmah a, Ex-servicement te a ding in phatuam mahmah hi’n kigen hi.

Brig. Ajay Kumar, CO 27 Sector Assam Rifles in a thugenna ah, Ex-Servicemen Rally kichi ahihleh sepaih panglui te’n pension toh kisai a haksatna tuamtuam a neihte uh a tut theihna ding uh tupna hidan a gen in, Nikum July kha apan in Ex-servicemen 500 val in pension toh kisai in a haksatnate uh tuntak in, tu in Ex-servicemen leh Meithai 145 valte case sukvengsak hita in, pension sum toh kisai a buaina nei Ex-servicemen 57 valte case leng sukveng hita in, a bank account chiat uah a pension sum uh hoihtak a lutta hi’n gen hi. CCpur District mipite khualna in Khuga Dam, 7 Assam Rifles leh Singngat ah Pre-recruitment rally neih a om in, mipite ngetna bang in CCpur District ah Recruitment Rally om theihna ding in panlak hi a, tukum in bel bangmah hih theih hinawnkei mahleh kum nawn April 2017 apan in CCpur district mipite a ding in CCpur District mah ah recruitment rally neih hita ding hi’n gen hi. Programme hunsung in, sepaih te’n pensioner-te theih tuak tuamtuam om thei a sinsak banuah mi tuamtuam kiang ah kipahpih etsakna in thil piak pia uhi.

 

XXXXXXXX


Reserve Bank of India, Imphal te sensakna tungtawn in hongtung ding September 26, 2016 (Seppatni) zinglam dak 10:00 in Simte Inn, Sim Veng ah Khangthah Zuun Pawl (KZP) General Headquarters inntekna in Financial Literacy Camp om ding hi. Hiai hun ah Lead District Manager, NABARD leh Bank tuamtuam te’n Loan leh Insurance Policy toh kisai a sinsak ding banuah Saving a poimoh dan leh lou bawlmi te’n bank tuamtuamte phatuamtak a azat theih ding dan utoh kisai sinsak ding uhi. Hiai Financial Literacy Camp ah lunglutna nei khempeuh tel theih ding a, haksatna tuamtuam omte dotna hun leng hon ahih ding hi. Programme ahihleh zinglam dak 10:00 geih a pat hiding ahihman in a tel ding khempeuh dak 10:00 ma a tungchiat ding in KZP GHQ in ngetna leh theihsakna bawl hi.


XXXXXXXX


Siamsinpawlpi Don Bosco Hr. sec. School Branch in tuni’n YPA Cemetery Hall, Dorcas Veng, New Lamka ah Don Bosco Hr. sec. School a kaithakte vaidawnna Freshers Meet nei uhi. Hiai hun zatna M. gouzamang Guite, EM/ADCC in Chief Guest hihna toh uap a, T. Lianchinpau, Vice President, SSPP GHQ banah Branch tuamtuam apan makai hunkhop hiai hun zatna ah kihel uhi. Programme ahihleh sunma dak 11:00 in kipan a, student te’n nam laam tel in item tuamtuam lahna a neih banuah mi poimoh chial a omte apan thugen ngaihkhiakna om a, Fresher te’n khat-khat in mellahna nei uhi. Thutut kingah dan in, tu academic session thak ah Don Bosco Hr. sec. School ah SSPP member thak 65 val om in, tuni a freshers meet zatna hun ah Pastor (Retd) V. Jelkhokai in amaute a ding in thumsakna nei hi.


XXXXXXXX


All Tribal Women Union Bukpi te’n tuni’n District Hospital Morgue pha in, gam leh leitang a dia hinna ana pia Salpha mi 9-te galna nei in, salphate luang tutpih a ann ngawl thumna nei numei pawlte toh kithuahkhawmna nei uhi. Thutut kingah dan in, Bukpi khua a ATWU makaih numei pawl te’n gamsung buaina toh kisai banah tribal movement pailel toh kisai awlmohna liantak nei in, neih leh neihlouh genlou in amau sum kiseng in Bukpi khua apan Salphate gal ding leh Morgue a hun khat zang ding in zan in Lamka hong tung ua, tuni sunma dak 11:00 in District Hospital Morgue ah hun zatna nei uhi. Bukpi apan salphate gal dia hong zinte ahihleh mi 15 pha in, amaute Pumzalam, Adviser, ATWU/Bukpi in hon makaih a, amau mun khat ah tung khawm in, nek-le-tak ding teng leng hong kipuak uhi. Hiai hun ah Pumzalam, Adviser in a gendan in, numei pawlte panlakna pen election politics a hihlouh banah kuahiam dopsangna ding a paikhawm hilou in, 6th Schedule deihna ziak liaulai a paikhawm ahihman un a panlakna uh pahtak huai a sakthu gen a, ni khat tei 6th Schedule kimu teitei ding ahi chi’n gen hi. Mrs. Ningnunhoih, Member, ATWU/Bukpi in Pathian in mi neuter domsang in, mi lian leh mi lalte nengniam ahih dan muh theih a aom man in kipahthu gen in, Pathian omlou hileh hiai tan kiding zou nawnlou ding hi’n gen a, thudik-thutang gum a kali suan ziak a Pathian in hiai tan hon ompih ahi chi’n gen hi. Bukpi apan hong pai numei pawl te’n programme hunsung in gam leh leitang a dia hinna ana pia Salphate zahna pia in, puandum khat chiat in tuam uhi.


XXXXXXXX


EBC Lamka South Division in “Diktatna a kilamthakna” chih thupi zang in EBCC Hebron ah zan nitak in Kumsim Khawmpi a 10veina zan nitak in pan ua, tusun hun ah kho tuamtuam apan palai paikhawm te’n vaihawmna hun (Business Session) nei in, Budget leh Year Plan banah Agenda tuamtuam omte genkhawm uhi. lamka south Division Kumsim Khawmpi a 10veina ahihleh zan nitak in Rev. V. nenglian, Divisional Supdt., Lamka South Division in hongkhia in, khawmpi hunsung a biakna kikhopna hun teng ah aman khawmpi thupi pansan in thugenna hun zang ding a, zingkal teng in pastor K. Pumsuanthang, Local Pastor, EBCC Pethuel makaih in Bible Study neih hiding a, zingchiang nitak in khawmpi zousiang ding uhi. Tuni a Vaihawmna hun ah, Lamka South Division huamsung a kho 25 apan palai 606 om lak ah palai 538 paikhawm ua, 2017 kumsim khawmpi a U-lian ding guang in, Business Chairman ding in Upa Ngul Khanjam, Business Vice Chairman ding in Upa H. Shinkhokam a guan banuah Recording secretary ding in Upa V. Daikhansuan leh Asst. recording secy ding in Upa K. Dongzalam guang ua, tukum sung a Upa ana mualliam mi 12-te suunna hun zang uhi. tuaban ah Palai paikhawm te’n 2017-18 sung a budget dia Rs. 8.06 crore guan a om pomkipna nei in, saptuam dingkhe thak EBCC Nghathal leng pomsak in, EBCC Dorcas Veng, EBCC Hebron leh EBCC Tonglon (T) te’n saptuam upa teltheihna ding phalna a nget uh pomsak vek ua, kho tuamtuam in Agenda a puaklutte uh CEC Meeting a genkhawm ding in thupuk uhi. Thutut kingah dan in, tulel in EBC Lamka South Division huamsung ah khua 25 om in, milip 22,983 om a, Bible Training zousa mi 170 a om banah training lel mi 95 om lel hi. Tuaban ah, tu kum paita sung in EBC apan pawl dang a lut innkuan 8 om in, Pawl dang apan EBC a lut innkuan 21 om hi’n thutut kingah hi.


XXXXXXXX


Mizo Zirlai Pawl (MZP) Headquarter Manipur in tuni’n YMA Hall, Hmuia Veng ah Annual Conference a 43 veina leh tukum leh nikum a lohchinna ngahte pahtawina hun zang uhi. Hiai hun zatna ahihleh Joseph Lalhimpuia, Parliamentary Secretary, Government of Mizoram in Chief Guest hihna toh uap in, Lungmuana, IAS, Principal secretary, Govt. of Manipur leh JC Ramthanga, IAS, Principal secretary te’n Guest of Honour hihna toh uap in, Functional President in B. Vanlaltana, Vice President, MZP GHQ pang in, Vanlalrinliana, President, MPC Manipur in Chief Host hihna toh hiai hun zatna uap hi. Programme ahihleh sunma dak 11:00 in kipan a, Paul lalchhanhima, President, MZP Hqtrs, Manipur in vaidawnna thu gen in, MZP Lamka Branch te’n nam laam lahna a neih banuah lasa siam tuamtuam te’n laa sa in, mi poimoh chial a omte apan thugen ngaihkhiakna om hi. Thutut kingah dan in, tuni a programme zatna hun ah, MZP sung a Class X leh Class XII Board tuamtuam a mark mu tampen mi 3 kiang ah kipahpih etsakna in Memento leh sum pia in, nikum leh tukum a Mizo subject topper-te kiang ah memento leh sum Rs. 1000 tuak a piak banuah Graduation level a mark mutampente kiang ah kipahpih etsakng in certificate leh Rs. 2,000 chiat pia uhi. Tuabanah, tukum leh nikum a department tuamtuam a sepna muthak leh Ph.D ngah thak mi 6 kiang ah certificate pia uhi. Chief Guest in a thugenna ah, mi nam kal a o mi hihman in, kuapeuh in Mizo hihna tawisang sawm a panla chiat ding ahi chi a gen in, siamsinna lou a khosuahna ding bangmah omlou a, laisiamte kuaman musit thei taktaklou uh ahihman in, siamsinna lam ah tua sang a hah pan zo ding in hasuan hi.


XXXXXXXX


MZP Annual Conference zang dia hong zin Joseph Lalhimpuia, Parliamentary Secretary, Govt. of Mizoram leh a team te’n tuni sunnung dak 3:30 in District Hospital Morgue pha in, gam leh leitang a dia hinna ana pia Salpha mi 9-te galna nei uhi. Hiai hun ah JAC-AATB leh ATWU makaite kihel in, Benjamin, President, Lunglei MZP Hqtrs & Vice President, MZP GHQ in thugenna saulou nei in, Manipur singtangmite thuakna theihpih in, saptuam leh mipi’n thumna ah phawk gige uh ahih dan gen a, i pankhawmna in maban ah gah kilawmtak hon suang khe ngeingei ding ahi chi’n gen hi. Mizoram apan hong pai te’n salphate zahna pia in, a sungkuante kiang ah puanza khat chiat pia uhi.


XXXXXXXX


Vengnuam United Soccer (VENUS) in Vengnuam, New Lamka in a inntuan veng tuamtuamte lak ah football kimawlna dopsang ahih theihna ding tupna a Siktui sensakna tungtawn a The 1st Siktui Vengnuam League a sai uh kimawlna teng zohsiang hita in, tuni sunnung dak 2:00 in PT Sports Complex, New Lamka ah Tournament khakna programme zang ding uhi. Hiai hun zatna ahihleh M. Gouzamang Guite, EM/ADCC in Chief Guest hihna toh uap in thugenna hun zang ding a, vengsung apan mi poimoh tuamtuam tamtak in hiai hun zatna uap uhi. Chief Guest a pang M. Gouzamang Guite, EM/ADCC in a thugenna ah, tulai khovel ah mimal hiam ahihkei leh pawlkhat kia apan khntouhna om theilou ding a, thil neu chikchik i hihte apan khantouhna hong kipan zo ding ahih dan gen hi. Programme hunsung in Tournament Board te’n tournament toh kisai report pia in, Chief Guest in Champion hihna la FC Oligen kiang ah kipahman piakkhiakna nei hi. Hiai tournament ahihleh apaisa August 17, 2016 a kipan hi a, Vengnuam United Soccer (VENUS) in Vengnuam, New Lamka apan inntuan khia V. Munhoih, Kanaan Veng, Vengnuam South leh Khominthang huamsung a om football kimawlmite hanthawnna leh dopsangna ding tupna a sai ahih dungzui in hiai veng a omkhalou team dang kuamah telsak hilou hi. Hiai tournament ah team 12 kihel in khatvei chiat kimawl suak ua, champion team FC Oligen leh amau zomtu VASA te’n match 11 ah win 8, draw 1, Lose 2 nei in point 25 tuak laisuah mahle uh FC Oligen in Goal Difference 17 a neih ziak in Champion hihna la in Runners-Up VASA pang a, champion team in kipahman in rs. 5,000 sang uhi. Pethuel FC in point 12 toh 3na luah in, V. Kaizanang Memorial Football Team leh Khanglai FC te’n point 20 tuak laisuah mahle uh V. Kaizanang MFT in Goal Difference a neih hoih zawk ziak in 4na luah a, Khanglai FC in 5na luah hi. Point 18 toh Kanaan YC in 6na a luah banah Khominthang YC in point 15 toh 7na luah a, Eimi united Soccer, Khimkhem FC leh Munhoih FC te 8na, 9na leh 10na ah kizom suk ua, point 5 keleu laisuah Milaar Blue FC leh Labour FC te 11na leh 12na ah om uhi. Hiai tournament ah Pethuel FC apan Siamboi in goal 14 khum in Top Scorer hihna la in kipahman in Rs. 500 sang a, FC Oligen keeper Muankhanlian in Best Goalkeeper hihna la in kipahman in Rs. 500 sang a, Closing Ceremony zoh in Champion Team FC Oligen leh Tournament Board te’n exhibition match nei uhi.


XXXXXXX