You are here: HomeRSS FeedsLatest News

Churachandpur district sung a om Sub Division tuamtuam omte lak ah Thanlon khua leng Sub division Headquarter khat himahleh keplouh puahlouh a om ahihdan muhtheih in om hi. Thanlon khosung a mipite’n a haksatna uh toh kisai Angels Vision palai kiang a a theihsak dan un, nidang in mizawngte khualna in State Bank of India in Thanlon ah Branch khat hongkhia uh a, 2014 kum in India Prime minister in India gamsung a teeng mizawngte khualna ziak a kuapeuh in zero account a Bank account hongthei ding chih ahihman in, SBI Thanlon Branch in leng Thanlon mipite a ding in Zero Balance in bank account honsak uh a, khenkhat in ATM card leh account number mu mahle uh tuni tan pass book mu nailou uh hin Thanlon khomipi te’n gen ua, Pass Book toh kisai in 2014 hunlai a Manager hihna leen a kisuan ziak in bangmah kansui thei tuanlou uh hin gen uhi.

Hiai toh kisai in Thanlon khomi Thangkhanpau in a gendan in, sum saving bawl utte a ding in account number a piakte uh zang in Lamka a SBI Ccpur Branch ah saving bawl thei mahle uh, Thanlon apan niteng a sum a muhte uh saving bawlna ding a Km 150 val a gamla apan bahara tam taktak seeng a hong pai uh ngai ahihman in, niteng a kiloh tawm a loukhou a nekzongte a ding in thil hithei lou hin gen a, a kisai pih thuneitute’n tua Branch kihong a hih hing thak uh deihthu gen uhi. Hiai toh kisai in SBI lam te’n a genna uah Thanlon SBI branch hoihtak a a function theihna ding in security poimoh a, himahleh state government in security kiningching a piak theih nailouh ziak in function thei nailou hin gen uhi. SBI Thanlon Branch building toh kisai in, Manipur Development Society in a bawl uh SDO building compound ah SBI a ding in building khat dinkhiak himahleh Manipur Development Society in tuni tan District thuneitute khut a a piakkhiak nailouh ziak in luah theih nailouh hin gen a, process om teng a fel chiang in SBI in thanlon a Branch a neih uh hoihtak a function sak in, Zero balance a account hongsate pass book leng huai hun a piakkhiak hiding hin gen uhi. Damdawi inn toh kisai in Thanlon khua ah Primary Health Centre kichi om a, himahleh tua mun a sem nurse leh Doctor te’n kha khat a khatvei a phaklouh hun uh leng om ahihman in, damlou tamtak a ding a nawngkaina nasatak tun hin Thanlon khomi Matthew in gen a, Sub division head quarter ahihbang in Thanlon PHC a posting kha Doctor te a sepna mun ua om hile uh nit eng a Thanlon khosung kia hilou a, mun gamla taktak Lamka naih zoulou te’n leng Thanlon PHC a ki-ensak ding a zuan ding uh hin gen hi. Government School toh kisai in Thangkam in a genna ah, Thanlon High school ah tulel in semtu Teacher 9 om a, himahleh Teacher appointment taktak te sepna mun ah a tamzaw omlou uh hin gen hi. School a semtu diktak a solkal in a lakte kuan kei mahle uh Thanlon High School in kumlui in student 30 nei ua, huaite lak a Class X student 3 om in, tukum a HSLC examna ah candidate 3 lak ah mi khat in second division a passed hin gen hi. SDO office leng a building hoihtak kilam khin mahleh semtu khatleng muhding omlou a, Lamka khosung a Jion Street ah Thanlon SDO office extension om ahihman in, Thanlon khosung a lai poimoh saiding neite’n a lai poimoh uh khosung a baihlam tak a sai theih ding hinapi in Thanlon khosung a SDO office building hoihtak omsa luahlouh a om ziak in, Thanlon Sub Division sung a teeng te’n Bahara tampipi seeng a Lamka a a lai poimoh ding uh a lak uh ngai maimah hin kigen hi. Singtang gam khantheih louhna, School hoih omlouh ziak ban ah damtheihna toh kisai a ki-etkol na ding ginatak omlouh ziak hi a, tua te hoihtak a om in omleh kuamah in singtang gam pawtsan lou ding ahihdan leng muhtheih in om hi.

Ding Khuptong | Angels Vision
xxxxxxx