You are here: HomeRSS FeedsLatest News

Angel's Vision News | June 13, 2016

Tuesday, 14 June 2016 19:09

Zou Gospel Artiste Association (ZOGAA) in a bawl “Mangpa Phatna Mama Nuompen hi” kichi Zou Gospel Video Album honna leh latna zan sunnung dak 1:00 in ZPCS Sunday School Hall, Lailam Veng ah om hi. Hiai hun zatna M. Gouzamang Guite, EM/ADCC in Chief Guest hihna toh uap in, Chief Host in Chinlunthang, President, UZO GHQ pang a, B. Dongzalian Simte, President, Simte Tribe Council leh Th. Jamchinthang, Thanlon MDC te’n Guest of Honour leh Function President hihna toh hiai hun zatna ah kihel ua, mun tuamtuam apan deihsaktu leh ngainatu tamtak kihel uhi.

Chief Guest a pang M. Gouzamang Guite, EM/ADCC in a thugenna ah, mihing te’n mahni mohpuakna thei kawm a nna I sep chiang in gamsung leh khotang ah khantouhna om pan a, mahni mohpuakna pel a gamtang a om chiang in khantouhna sang in nawngkaina a tut banah mipite lak ah kitheihsiamlouhna tun zaw ahih dan gen a, polam a te’n hon etdan uh ahihleh singtangmi te’n Bill 3 toh kisai a kipumkhatna thupitak om pen bang tan a kembit zou ding ua chih hi gige ahih man in, thil banghiam I sai chiang in inclusive pen kuapeuh in poimoh ngaih thei leng hoih mahmah ding ahih dan gen hi. Tuaban ah, hichibang album kibawlte nam leh gam a dia gou thupitak ahih dan thei kawm a I lasa siamte uh nungthuap a tawisang poimoh mahmah ahih dan gen hi.Programme hunsung in mi poimoh chial a omte’n thugenna nei in, Chief Guest in “Mangpa Phatna Mama Nuompen hi” kichi Gospel Music Video Album hongkhia IN Rev. Hangpi Manlun, Bieltu Pastor, Lamka District ZPCS in Pathian kiang ah latna ni hi. “Mangpa Phatna Mama Nuompen hi” kichi Gospel Music Video Album ahihleh Zou Gospel Artiste Association in a bawl hi a, hiai album a laa 13 om in, laa teng Joseph Doulunlal in a sak hi’n kigen hi.

XXXXXXXXX

Chairman, Central Working Committee, PTC GHQ deihna bang in hongtung ding June 18, 2016 sunma dak 11:00 in PTC Conference Hall, Hiangtam Lamka ah CWC Tutkhawmna a 16veina nei ding uhi. Hiai meeting ah member paikhawm te’n 67th PTC Rasing Day lopna ding toh kisai a programme bawl a omte tkhawmna nei in, PTC Mizoram Headquarters General Assemble cum Election ding toh kisai genkhawm ding ua, CWC Tutkhawmna a 15veina a thupukna tuamtuam omte etkikna om in, genkhawm ding omlai teng leng hiai meeting ah genkhawm hiding hi’n thutut kingah hi.

XXXXXXXXX

Baptist Children Department (BCD), Zenhang Lamka EBCC in lasak lam a nuapangte talent pholhsuahna ding in BCD Star leh BCD Mini-Star kichi sai in zan nitak in Naupangte Ni zatna toh thuah in Zenhang Lamka EBCC ah Final Round leh Result puankhiakna nei uhi. BCD Star leh BCD Mini-Star ahihleh May kha bul a kipan hi a, BCD Star ah naupang 20 a kihel banah Mini Star ah naupang 48 kihel ua, May kha tawp leh June kha bul a Audition Round leh Elimination Round zoh ahih nung in, Final Round a ding in BCD Star ah mi 3 leh Mini Star ah mi 5 telkhiak in om a, zan nitak a Final Round ah mi 8 te’n kidemna nei nawn in, result puankhiakna in zom ngal hi. Thutut kingah dan in, BCD Zenhang Lamka EBCC in naupangte talent pholhsuahna ding leh Pathian vanzat mi tamsem seksuah ahih theihna ding tupna in 2009 kum in BCD Star leh BCD Mini-Star kichi pankhia in lohching mahmah a, kum bangzah hiam sailouh a aom nung in 2014 kum in BCD Zenhang Lamka in kum 1 hal zel a sai hita dia Year Plan a guang ua, tukum a pen a 3veina hita hi’n kigen hi.

BCD Star leh Mini-Star tungtawn in lasa siam tamtak pholhsuah a omta hi’n organizing committee te’n gen ua, BCD in amaute a ding in thil thupi lua hisak zoukei mahle uh maban ah project liantak nei uh ahih dan leng gen uhi. Zan nitak a final round neihna hun ah Judge in Damhoihching, Hangpu leh Mrs. Ngailianchiin (Pastor Nu) te pang in contestant te’n la 2 sa ua, judge-te mark piak dan dungzui in Siammuanlian s/o V. Khambiaklal in BCD Mini-Star hihna la in, Khammuansang s/o V. Daikhenmang in BCD Star hihna la a, amau kipahman in Trophy leh memento sang in, kipahmante Pastor MT Khanlal, Local Pastor, Zenhang Lamka EBCC in pekhia hi.

XXXXXXXXX

Malaria Department in tu May khasung in CCpur Distict sung ah Malaria Positive 5 mukhia in, mi 5-te lak ah khat pen Malaria PF hi’n taklang hi. Report in a taklat dan in, tu May khasung in PHC/CHC leh Sub-Centre tuamtuam apan damlou mi 1,416-te blood slide lak a om in, huaite lak ah Positive 5 banah Malaria PF 1 muhkhiak in om a, tu May kha sung in Malaria natna ziak a si a omlouh banah Lamka Damdawi Inn a etkol leng omlou hi’n taklang hi. Thutut kingah dan in, Malaria Department in tu January kha apan in damlou 6,518-te Blood Slide lak a om in, February kha in Malaria Positive 2 leh May kha in Positive 5 muhkhiak ahih banah Positive 7 muhkhiakte lak ah 2-te Malaria PF hi’n report in taklang hi.

XXXXXXXXX

Nationwide Gospel Music Festival Organizing Committee te saina a hongtung ding June 25, 2016 in EBC Gospel Ccentenary Hall, Hebron Veng, New Lamka a “Hong un Toupa kiang ah i kik ding uh” chih thupi zang in Prayer-cum-Youth Fellowship thupitak neihna ding toh kisai in Worship Team te’n zanhal a Dorcas Hall a rehearsal a neih nung un zan sunnung dak 1:00 apan in Molnom ECA Biakinn ah a 3veina ding in rehearsal nei nawn uhi. Thutut kingah dan in, Prayer cum Youth Fellowship ah Lamka khopi leh a sehvel a a denomination tuamtuam apan tuailai tamtak Pathian phat leh be khawm ding in paikhawm ding ua, saptuam lian taktak a lapitu poimoh taktakte makaih in lasak khawmna a om ding banah hiai hun a lasak khawm dingte labu tuamtuam a omsate pau tuamtuam a letkhia in biakinn chih ah copy hawmkhiak hita hi’n thutut kingah hi.

Programme zatna ahihleh hunbi 2 in kikhen ding a, Hunbi khatna zinglam dak 10:00 apan sunnung dak 1:30 sung hiding a, huai ah Rev. H. Nengzatun, Chairman, Haleluiyah Prayer Band in thugenna hun zang in, Rev. Kh. Khaizakham makaih in mipi paikhawm te’n thumkhawmna om ding a, Rev. LB Angam, General Secy, Kuki Church Leaders Forum in thugenna nei ding hi.Nitak hun ah Rev. L. Jessai Neitham, District Supdt, EFCI leh Rev. Ros Infimate, Chairman, Hmar Christian Leaders Forum te’n Tanchinhoih gen in, Rev. S. Vungminthang, General Secy, EBC makaih in thumkhawmna om nawn ding hi. Hiai hun ah Toupa Phatkhawm ding leh a vualzawlna tangkhawm ding in saptuam mipi a tamthei pen kihel ding in Organizing Committee te’n chialna bawl ua, hiai hun subuai thei dia bandh, total shutdown chihte kuaman ana bawllou ding in Organizing Committee te’n ngetna bawl uhi. Zingchiang in Worship Team te’n Dorcas Veng EBCC ah rehearsal nei nawn in, June 19, 2016 sunnung dak 1:00 in Rengkai ICI Biakinn ah final rehearsal nei ding uh hi’n thutut kingah hi.

XXXXXXXXX

Lamka khopi Mal-suah lampang Thutha Luidung a om Saidan khua in khosung a kipumkhatna leh kitanauna hoihzaw om theihna ding tupna in tuni’n Saikhawpui Games & Sports cum Award Ceremony leh Entertainment Nite kichi programme zang uhi. Hiai programme ahihleh Saidan khosung a organization tuamtuam HSA, HWA, HYA leh Val Upa-te kithuah a asai uh hi a, tuni zinglam dak 9:00 in Pastor Thangdaivel in hongkhia in, Saidan Playground ah outdoor programme zat in om a, item tuamtuam ah kidemna om hi. Thutut kingah dan in, Saidan khua ahihleh 1941 kum a kisat hi a, tulel in Rohminglien in kho hausa hihna len lel a, Saidan khua ah inn 300 a om banah milip 2100 vel om hi’n kigen a, Group 4 – Neilal Group, Sura Group, Lalruong Group leh Liendo Group in kikhen ua, tusun hun ah Bamboo Dance, Football, Volleyball leh Tug-of-War tel in item tuamtuam ah kidemna nei uhi. Nitak dak 7:00 in Saidan Community Hall ah Award hawmkhiakna leh kisuklimna programme zat in om nawn a, hiai hun zatna Lalhrillien, Saikot MDC in Chief Guest hihna toh uap in, Guest of Honour in Lalrohim, Saidan VA Member a pang banah Functional President in Rohminglien, Chief of Saidan pang hi. Programme hunsung in Saidan khomi tukum a Class X leh Class XII a lohchinna ngahte kiang ah award piakkhiakna om in, khosung a dia phatuamngaitak a nna ana semte kiang ah pahtawina piak hi ua, Rev. Challienkung in Award sangkhate leh khosung mipite a ding in thumsakna nei hi.

XXXXXXXXX

Paite Cultural Society (PCS) in tuni sunma dak 11:00 in PTC Conferenc Hall, Hiangtam Lamka ah meeting nei in, Paite Dress Code toh kisai genkhawm in, Paite Puandum Ngong-oh (Neck-tie) leh Bow-tie kibawl lahkhiakna nei uhi. Thutut kingah dan in, Paite Cultural Society in Dress Code bawlna ding toh kisai in pan nasatak a la in, design teng bangkim zousiangta in, New Delhi ah company khat toh kizom in company te’n leng sample hon thon khinta ua, apaisa April 12, 2016 ni a meeting a neihna hun uah lahkhiakna nei in, member te’n leng approval ana pe khinta uhi. Company te’n dress code sample hon khak uh mawk koihdap ding member te’n pammaihsa in Neck-tie leh Bow-tie in bawl bawl uhi. Hiai Neck-tie leh Baw-tie deih te’n PTC Office, Hiangtam Lamka ah lei theih ding a, Neck-tie man ahihleh Rs. 250 leh Bow-Tie ahihleh Rs. 100 hiding hi’n thutut kingah hi.

XXXXXXXXX

Zan Jun 12, 2016 pen EBC saptuam pumpi tel a saptuam tuamtuam te’n Naupangte Ni (Children’s Day) dia bikhiah ahih dungzui in EBC saptuam pumpi in amau biakinn chiat ah programme tuamtuam bawl in Naupangte Ni zang uhi. Central Lamka EBCC in Naupangte Ni pen Traditional Day toh thuah in hun zatna Session 3 a khen in programme nuamtak in zang ua, Upa L. Vungzamuan in thugenna hun zang hi. Hiai hun zatna ah naupangte leh heutute nampuan a kithuam in a nalh theipen in kichei ua, zing kikhopna hun ah Pastor Letzathang, Local Pastor, EBCC Central Lamka in naupangte a ding in thumsakna nei hi. Sunnung dak 1:00 in BCD Hall ah Second Session zat in om a, huai ah Senior pawl te’n nam laam lahna nei in, Intermidiate pawlte leh Heutute’n lemchiin lahna a neih banuah Heutute’n Zangtam Laam lahna nei ua, heutu te’n BCD Hall mun kilkhat ah stall khat bawl in huai ah nidanglai van lui tuamtuamte kuapeuh et theih ding in koihkhia uhi. Programme hunsung in Beginer A apan Senior Pawl te’n Traditional Couple Show nei ua, nitak programme ah Upa T. Thangzakhum in Children’s Day cum Traditional Day zatna khak hi.

XXXXXXXXX