You are here: HomeRSS FeedsLatest News

Angel's Vision News | May 5, 2016

Saturday, 07 May 2016 10:19

Henglep Sub-Division huamsung a om tuma a vuahpi leh gial in a nuaina khuate ah panpihna tuamtuam pe ding in tuni’n SDO/Henglep makaih in District Disaster Management Authority (DDMA) Team te’n tuni’n Henglep Sub-division zuan uhi. Panpihna pe dia zinkhete ahihleh Tuibuang Peace Ground ah kingak khawm ua, huai ah DC/CCPur Lunminthang Haokip, IAS in Flag-off a, Mannuamching, CEO/ADCC in thumsakna nei a, zingkal dak 7:30 in kipankhia uhi.


 

Thutut kingah dan in, apaisa April 23, 2016 zingkal baihtak in Huihpi leh Gialpi kithuah in Chongkhozou leh Santing huamsung lak naktak a nuai in, gial in Munpi Area ah tenna inn 175 a dengsiat banah inn 102-te luah theihlouh ding khop in om a, Saichang Area ah tenna inn 87 dengsia in inn 31-te luah theihlouh in om hi. Santing area ah gial in tenna inn 89 dengsia in tenna inn 45 luah theilouh in om a, Ainah area ah tenna inn 56 kisia in huaite lak tenna inn 19-te kise dimdem a, Tuilaphai Area ah gial in tenna inn 14 dengsia in, huaite lak tenna inn 11-te kise dimdem a, Henglep Sub-Division huamsung ah huihpi leh gialpi ziak in kho 27 in haksatna nasatak tuak lel uh hi’n kigen hi. Hiai toh kisai in District Administration in theih tawp suah a panla in, zan zel in State Government apan in panpihna sum Rs. 1 crore hong tung a, hiai sumte zang in District Administration in anntang leh langva lei in, sub-division dang a hichibang haksatna tuakte a ding leng tunung chiang a hawmkhiak hiding in kigen hi.

 

XXXXXXX

 

Manipur Cabinet in daltu kuamah omlou a Bill 3 a pass-te uh India President in assent a piak kin ding deihna a Joint Committee on ILPS in Manipur pumpi ah dakkal 36 sung Public Curfew a puan uh All Tribal Movement of Lamka (ATML) in chin leh haa suang a dal ding uh ahih dan thusuah bawl uhi. Thusuak in a taklat dan in, ATML in Lamka khopi sung a Anti-Tribal Bill gupna a thil kisai himhim Manipur singtang bial ah phallou in, hichibang thilte kuamah Singtangmite luahna gam ah hih theilou ding uh hi’n taklang a, hi teitei a om leh a tung ua thil tung bangbang a maituah uh ngai ding hi’n a thusuah uah taklang ua, mipi kuapeuh in leng kithuahpihna pelou ding in ngetna bawl uhi.

 

XXXXXXX

 

Zomite a dia lasa siam minthang Miss Nemsiam in a sak “Itna Lamdang” kichi Gospel Music Video Album honna tuni zinglam dak 10:30 in Pasikhawm Restaurant ah neih in om hi. Hiai hun ah Miss Nemsiam deihsaktu leh ngainatu mipi hunkhop paikhawm in, program saulou zat in om a, H. Kamsuankham in album hong piankhiak dan pulakna nei in, Rev. Dr. Luaichinthang in hongkhia in Pathian kiang ah latna nei hi. Hiai Music Video Album ahihleh Neo Vision in Miss Nemsiam debut album dia a bawlkhiak hi a, kum khat val vengveng a buaipih nung ua tuni a honkhiak theih a om hi’n kigen hi. Album ah V. Siampu, Lianding Guite, Lal Guite, T. Kammuanthang, V. Kaisianlun leh Saves Valte te’n a phuah uh laa 10 om a, Recording bawlna ding in Roulngul, Vision Studio, Faith Tune, Sould Slave leh Max Wave zat a om in, audio teng G. Suanchinpau, Lungthul MDC in a sponsor vek hi’n kigen a, music video ahihleh Neo Vision leh Khaute Videogranphy & Filming te khutsuak hi’n kigen hi. Neo Vision in Nemsiam debut album dia a bawlsak “Itna Lamdang” kichi Gospel Music video album tuni a honkhiak ahih toh kiton in agent tuamtuam-te kiang ah lei theih ding in omta hi.

 

XXXXXXX

 

Tuni zinglam dak 10:30 apan in District Veterinary Office, Tuibuang ah World Veterinary Day zatna dan in “Free Anti-Rabies Vaccination” om hi. Thutut kingah dan in, World Veterinary Day ahihleh kum teng in April 30 teng in zat in om a, bandh leh buaina tuamtuam om ziak in CCpur District in April 30 ni a zang theilou in tuni zat a om hi’n kigen a, mun tuamtuam apan Ui ngaina leh Ui khoi mi 50 val in Ui-Hai dalna damdawi va kapsak uhi. Hun bangtan hiam paita apan CCPur District sung ah Ui Hai natna toh kisai zak ding om nawnkei mahleh kha 2 paita apan Lamka Damdawi Inn Dog Bite case 60 vel om a, Veterinary & Animal Husbandary Department in pan nasatak a la in tu kha 2 paita sung in Lamka khopi leh a sehvel ah Ui 300 val kap in, tu in bel hichibang case zak ding om nawnlou phot a, tuni a department in Free Anti-Rabkes Vaccination a neih uh leng tamtak in phatuampih mahmah uh hi’n kigen hi.

 

XXXXXXX

 

Tuni zinglam dak 10:30 vel in PT Sports Complex ah truck apan electric post suah khe lai tangkhial kha in electric post in Umesh Mahato (18) s/o Ganaur Mahato of Bihar delh kha a, liamna nasatak tuak a, tu in Imphal ah etkol ding in puaksuk in om hi. Thutut kingah dan in, hiai electric post-te ahihleh Guwahati apan hong kipan hi a, liamna tuak Umesh Mahato ahihleh Truck handyman a pang hi’n kigen hi. Tuni zinglam dak 10:30 in nasem te’n suahkhiak sawm a akisak lai un, a douna kitan in a gintaklouhna lam uah electric post-te tuuk khiak om electric post 10 val in truck kiang a om Umesh Mahato delh khum hi’n kigen hi. Hiai thu theih phet in PT Sports Complex kiim leh kiang a omte kidelh huan in electric post-te khat khat a lakkhiak ahih nung a panpih theih phet hi a, bialtu MDC M. Gouzamang Guite, EM/ADCC zang a Lamka Damdawi Inn tan tut ahih nung in, a liamna a nasat deuh ziak in Damctor te’n Imphal a etkol ding in refer in om a, sunnung dak 12:30 vel in Imphal ah puaksuk in om hi. Liamna tuak Umesh Mahato in bel khua phawk mahleh a lu lak naktak a liam in a bil ah sisan pawt den a, a pheipi guh leng kitan hi’n kigen hi.

 

XXXXXXX

 

Presbyterian Women Fellowship, Lailam Veng in tuni’n ZPCS Biakinn, Lailam Veng ah PWF kiphutkhiak nung kum 25 chinna Silver Jubilee leh PWF Day lopna nei uhi. Hiai hun ah ZPCS, Lailam Veng a bial chih apan PWF member tamtak paikhawm in, Kum 25 chinna theihgigena dia Silver Jubilee suang kibawl Rev. Hangpi Manlun, Bial Pastor in hongkhia in Pathian kiang ah latna nei a, PWF Member apan teltuam mi 25 te’n Jubilee Dak tum uhi. Thutut kingah dan in, Presbyterian Women Fellowship, Lailam Veng ahihleh 1991 kum a kiphutkhia hi a, tulel in Bial 6 a kikhen in bial chih in amau hih theih tawktawk a panla in Pathian min a thumkhawmna leh kithuahkhawmna hunte ana zang zel zel uhi. Zinglam kikhopna hun ah Nu Thangneivah in PWF Lailam Veng hongkipat khiak dan pulakna nei in, Rev. hangpi Manlun in Jubilee Message gen a, member tuamtuam te’n Jubilee Thilpiak piakna nei uhi. Sunnung lam in member te’n kisuklimna hun zang in, huai ah bial chih in Bible Quiz leh Action Laa ah kidemna nei in, Nu Mankhanngai makaih in “Biakinn sung a lusuk pen Thugentu ziak hia ahihkei leh mahni mimal ziak” chih thupi zang in Debate competition nei uhi. Nitak kikhopna hun ah Nu Lalneihtluang, M.Th. in thugenna hun zang in Silver Jubilee lopna program zou uhi.

 

XXXXXXX