You are here: HomeRSS FeedsLatest News

Angel's Vision News | April 01, 2016

Sunday, 03 April 2016 09:54

27 Sector Assam Rifles nuai a om 7 AR leh JCRE Skill Solution toh pangkhawm a tuailai sepna neiloute a ding in zan leh tuni’n Rayburn College leh Tuibuang Community Hall ah Skill Development Program nei ua, mun tuamtuam apan student leh sepna zong mi 500 vel kihel uhi. Thutut kingah dan in, zan (March 31) in Rayburn College ah neih in om a, huai ah mun tuamtuam apan student leh sepna zong mi 250 val paikhawm in Hotel Management (Hospitality), Plumbing leh Electrician a ding in sinsakna om hi.

Tuni a Tuibuang Community Hall a Skill Development Program neihna hun ah mun tuamtuam apan student leh sepna zong mi 240 val paikhawm ua, sunma dak 11:30 in SP/CCPu L. Mangkhogin Haokip, IPS leh Brig. RK Sharma, DIG, 27 Sector Assam Rifles te’n program zatna mun pha in , Brig RK Sharma in thugenna hun zang hi. Aman a thugenna ah, Lamka khopi kichi mun tuamtuam a om student te’ siamsinna munpi ahih dungzui in 27 Sector Assam Rifles in organization tuamtuam toh pangkhawm in siamsinte leh sepna zonglelte lungtup mualsuahna dia panla ding ahih dan gen in, tupna a om naknak leh thil khempeuh ah zohlouh ding bangmah omlou hi’n gen a, JCRE panlakna kipahpih mahmah in, hiai Skill Development Program neih a om pen leng a bul patna hipan ahihman in CCpur District ah hiai bang nasep hong sunzomtou zel ding in JCRE Skill Solution kiang ah ngetna bawl hi. Program hunsung in Lairenjam Niranjan Singh, CEO, JCRE in JCRE nasep tuamtuamte pulakna nei in, National Skill Development Corporation (NSDC) theihpihna nuai a JCRE May 21, 2013 a kiphutkhia ahih dan gen in, Manipur a dia a masapen ahih banah North East a dia a 2na hi’n gen a, 2023 tan a North East pumpi ah tuailai lakh 1 kiang ah skill development training piak sawm a panla uh ahih dan gen hi. Tulai in mun tuamtuam ah certificate baihsakmtak a muh ding a tam mahmah ziak in siamna toh kituaklou certificate nei tamtak omta a, huai in sepna zonna lam ah haksatna nasatak tun ahih dan gen a, JCRE Skill Solution in bel tuailai sepna zongte a siamna uh banah a lunglutna utoh kituak a training piak a tuppen ahih dan gen hi. Tuni a Skill Development Program neihna hun ah Imphal apan JCRE Skill Solution staff mi 7 hong paitou in program a tel student-te counseling neihpih in, fund leh sponsor omdan dungzui a tunung sawtlou in lunglutna taktak nei student-te kiang ah training pe dia hong pai nawn ding uh hi’n thutut kingah hi.


XXXXXXXX


Gam leh leitang itna ziak a huihpi leh vuahpi thuak a Sinzawl leh Tuivai kikal Guite Road bawl a omte giah buk zan (March 31) nitaklam in huihpi in mutsia a, thil omdan enkhe ding in tuni’n Manipur Tribal Road Construction makai te’n Sinzawl khua zuan in zintou ngal uhi. Thutut kingah dan in, zan nitaklam dak 5:30 vel in huihpi leh vuahpi kithuah in Tuivai luidung lak naktak in nuai a, Tuivai lei bul a Sinzawl leh Tuivai kikal lampi bawlte giahbuk huihpi in mutsia in nasemte a zan a zan in Sinzawl khua ah taisia in zan nitak in Sinzawl Guest House ah giaklut uhi. Thil omdan enkhe ding in tuzingkal dak 7:30 in G. Nengdouthang, Chairman, MTMRC makaih MTMRC team khat in Sinzawl khua zuan ngal ua, zinkhe dingte Dorcas Hall kong ah kingak khawm in, huai ah Lalniropuia, Secretary, MTMRC in Press/Media-te mai ah thil omdan pulakna nei in Upa Vungzasiam in thumsakna nei hi.


XXXXXXXX


EBC Central Dorcas Sub-Committee in Division tuamtuam a Dorcas Committee-te a dia “Toupan nang hon phut bang ahia?” chih thupi zang a apaisa March 30 apan Gilead Tlang, Kawnpui a Camp a neih uh lohchingtak a paitou zel in tunitak in zousiangta ding ua, zingchiang zingkal in campers te’n camp nuseta ding uhi. Thutut kingah dan in, EBC Dorcas Sub-Committee in Division tuamtuam a Dorcas makaite a dia hichibang camp a sai uh a 4veina hita hi’n kigen a, tutung in Lamka South Division, Lamka North Division, Imphal, Vangai, Thanlon leh Singngat Division banah Shillong apan Dorcas Committee mi 54 kihel uhi. Hiai Camp ahihleh March 30, 2015 nitak in Rev. Paukhanmang Guite, Director of Ministries, EBC in hongkhia a, Camp hunsung nitak teng in Rev. S. Vungminthang, General Secretary, EBC in thugenna hun zang in, Miss Liankhoman, Dorcas Co-ordinator, EBC in Bible Study leh Devotion neihna makaih a, sun hun in Rev. Paukhanmang Guite, Director of Ministries, Mrs. Pumsiankim, Asst. Prof., CCPur College, Mrs. Pari, Miss Manzavung Thomte, Headmistress, Dawn School, Miss Muani Tombing, Director, Lainat Ministries leh Dr. Niangsangching, Lecturer, GBC te’n thupi tuamtuam zang in sinsakna nei ua, tunitak in Rev. Paukhanmang Guite, Director of Ministries in thugenna hun zang in Camp khakna nei hi’n thutut kingah hi.


XXXXXXXX


Evangelical Baptist Convention (EBC) in kum 1 sung Contract a Grade IV (Mali) nna sem ding mi 1 laksawm a, EBC mi kuapeuh lunglutna nei khempeuh in ngaihven theih ding hi. Hiai post a dia chitna poimohte ahihleh Class VIII pass, Kum 18 apan kum 35 kikal mi khalam a pianthakna kichiantak nei, khamtheih chi tuamtuam hihlou leh tep-le-muam a kikem siangthou banah EBC saptuam a Full Communicant member leh EBC thu-up pom a zui mi ahih uh ngai ding a, sing leh lou, pak leh thil cheimawina lam a lunglutna neite deihsakna piak hiding a, Zi/Pasal neisa sepna mun peuhmah a nupa a paikhawm theilou ding te’n bel kingetna piaklut ngailou ding hi’n taklang hi. Lunglutna nei te’n Baptisma certificate leh saptuam recommend n alai tel in lai poimoh teng toh thuah in Kingetna April 18, 2016 nitaklam dak 4:00 tan in Dorcas Hall, New Lamka ah piaklut theih ding hi. Presonal Interview ahihleh April 20, 2016 zinglam dak 10:30 in Dorcas Hall ah om ding a, lampaina, giahna chihte kingentu in a kisen ngai ding hi’n thutut kingah hi.


XXXXXXXX


Tangnuam leh a sehvel a om NTBC saptuam te’ biakinn naihna lemtangzaw ding gelna in Tangnuam ah New Testament Baptist Church in biakinn khat dinkhe thak in tuni sunma dak 11:00 in honna leh Pathian kiang ah latna nei uhi. Hiai hun ah saptuam mipi hunkhop paikhawm in, Officiating Minister in Rev. K. Hangnung, Executive Secretary, NTBCA pang a, Vungminthang, Local Chairman in vaidawnna thu gen in, Rev. S. Kaikhanmang, Director of Missions, NTBCA in Tanchinhoih gen hi. Thutut kingah dan in, Tangnuam leh a sehvel a om NTBCA saptuam mipi te’ a dia biakinn naihna a gamlat deuh ziak in July 5, 2015 apan Pa Lamkhankap tenna inn ah fellowship dan in kikhopna ana pan ua, NTBCA in saptuam mipite ngetna dungzui in November 22, 2015 in saptuam piching a puang in, saptuam mipi’n theih tawp suah a panla in, Tangnuam playground kiang ah biakinn mun ding leikhia in February 20, 2016 in Rev. K. Hangnung, Executive Secretary, NTBCA in Ground Breaking bawl in biakinn bawlna pan ngal ua, zohsiang ahih toh kiton in tuni a honkhiak a om hi’n kigen hi. NTBC/Tangnuam ahihleh NTBC Simveng in a inn tuan hi a, tulel in hiai saptuam ah innkuan 20 om in, saptuam milip 100 phazou ua, Pastor Chinlamthang etkaina nuai ah om ding hi’n kigen hi. NTBCA nuai a local saptuam 29na ding NTBC Tangnuam biakinn ahihleh Rev, K. Hangnung, Executive Secretary, NTBCA in hongkhia in Pathian kiang ah latna nei hi.


XXXXXXXX


All Manipur Tribal Women Union in tribal movement suk hatna ding leh salpha sungkuante hehnem a District Hospital Morgue a thumkhawmna a neih uh tuni tan in tatsatlou in lohching tak in paitou zel a, tuni in leng veng leh kho tuamtuam apan mipi hunkhop paikhawm nawn ua, thumkhawmna leh lasak khawmna a neih banuah Salpha Thangjamang Touthang pianna nu Mrs. Nemneilhing in mipi paikhawmte kiang ah lungsim a puak gik a neihte genkhiakna nei in Manipur a om singtangmi te’ a dia 6th Schedule poimoh mahmahta ahih dan gen hi. Aman a thugenna ah, a tapa Salpha Thangjamang in a muan mahmah leh khoih dial eng a gintaklouh Manipur Government khut a sihna a tuah pen pona mahmah in, lungkhamna meipi in naktak a tuam ahih dan gen a, hiai sihna tungtawn a singtangmi te’n suahtakna ngah ding uh ahih dan gen hi. Manipur government hoihlouh ziak in a neite mah khang hulhul in, dai kilkal a om niteng a nektawm zongte a ding in haksa mahmah a, gam leh leitang a dia hinna ana pia salphate mihau hile uh a buaipih ding leng tam ding a, tuni tan a FIR kibawllou leng baihsamtak a bawlzoh hita ding hi’n gen hi. Government hoihlouh ziak mah in lai siam sum-le-pai nailou te’n a sep ding uh semkhalou in a semlou ding te’n thil tuamtuam a sai ziak ua hiai tan kitung hi’n gen a, 6th Schedule piak hi leng diktatna tuailai tamtak mun dang a sepna ding zong a akuankhiak uh ngailou in, sum-le-pai seng lou a mahni siamna dungzui a sep theita ding uh ahih dan gen hi.


XXXXXXXX