You are here: HomeRSS FeedsLatest News

Angels Vision News | February 13, 2017

Monday, 13 February 2017 19:52

Hongtung ding March 4, 2017 chiang a 11th Manipur Legislative Assembly Election First Phase neihna ding toh kisai in Candidate te’n kisakkholna nasatak a paitouhpih in, tuni’n mun 3 ah Flag Hoisting leh Office honna neih in om hi. Tuni zinglam dak 10:00 in 58- CCpur A/C a National People’s Party (NPP) candidate Phungzathang Tonsing in a tenna inn Salem House, Hebron Veng, New Lamka ah Campaign Launching cum Flag Hoisting Programme nei a, hiai hun ah Thangminlen Kipgen, NPP State, Manipur leh Vivek Raj, General Secretary te’n a uap banuah, Meitei Society tel in mun tuamtuam apan amah deihsaktu leh gumtu mi a sang a sim paikhawm in, CCpur Assembly Constituency huamsung a om kho hausa leh MDC hunkhop a kihel ua, Manipur State NPP President Thangminlen Kipgen in NPP Flag kaipalh hi.

Hun zatna ahihleh V. Chinkhenpau in makaih in Upa LS Gangte in hun zatna Pathian khut ah latkhiakna nei in, Khanthang Tonsing in vaidawnna thu gen hi. Programme hunsung in Rev. Khen P. Tombing in NPP Candidate Phungzathang Tonsing a ding in thumsakna nei a, H. Tunzakham of Pearsonmun leh NPP President tel in mi tuamtuam apan thugen ngaihkhiakna om in, Phungzathang Tonsing apan thugen ngaihkhiakna om hi. NPP Candidate Phungzathang Tonsing in a thugenna ah, NPP party pen party thak liklek ahih banah kuamah a dia leng mi poi ding hihna nailou ahihman in, muanhuai a sakthu gen a, Politics hitawk leh leng kilawp pipi leh zuau pipi gen pen heutu dia kisa te’n chiin tamlouh hoih a sakthu gen hi. Vision omlouhna ah mipite a mangthang a, Pathian in mangthat ding hon phal naikei mahleh haksatna thuak bel phal hi. Tu hun paita sung in amah ziak in mipi’n haksatna tamtak thuak in, aman leng mipi ziak a haksatna tamtak ana thuak ahih dan gen in, hiai bang haksatnate Pathian in i diklouhnate kimuhkhiakna hon bawl ahih man in, amah hihkhelna tung ah ngaihdam ngen in, maban ah kituaktak a Pathian deih dan a mipi toh kalsuan ding ahih dan gen hi. 57-Henglep BJP Candidate Thangzalam Haokip @ TT Haokip in a tenna inn IB Road, Headquarters Veng ah Flag Hoisting Ceremony nei hi. Hiai hun ah Henglep A/C huamsung a om kho hausa tuamtuam banah mun tuamtuam apan deihsaktu leh gumtu tamtak paikhawm ua, Pastor Paojalhun in hun zatna Pathian khut ah latkhiakna nei in, Paosei Haokip in keynote address gen a, K. Vungzalian, President, BJP CCPur District in BJP Flag kaipalh hi. Programme hunsung in Haoneilal Vaiphei, Co-Ordinator, ML Akhu Kamei, President, BJP Henglep Mandal, Seilenmang Khongsai, MDC/Khousabung, K. Vungzalian, President, BJP CCPur District te’n hasotna thu gen ua, Hilkholun, Chief of Gothol in kipahthu gen in flag hoisting programme zou uhi.


Tuabangkal ah, 60-Singngat A/C NPP Candidate Henlianthang Thanglet in leng Hangzou Pausuanlal Complex, Red Cross Road ah Election Office honna leh Flag Hoisting Programme zang uhi. Hiai hun zatna ahihleh Thangminlen Kipgen, President, NPP Manipur leh Vivek Raj, General secretry te’n a uap banauh Singngat A/C huamsung a om Sangaikot Area, Singngat Area leh Guite Kual apan mipi tamtak paikhawm in, Lamka leh a sehvel apan deihsaktu leh gumtu tamtak hiai hun zatna ah kihel uhi. 60-Singngat A/C NPP Election Office ding ahihleh Rev. Jerry Zoliansanga in hongkhia in, Thangminlen Kipgen, President, NPP Manipur in NPP Flag kaipalh hi. Hun zatna ahihleh S. Chinsuanlian in makaih in Khaimuanthang, Chief Agent in vaidawnna thu gen a, Candidate pu apan thugen ngaihkhiakna om in, Jamlet Haokip in kipahthu gen in Programme zou uhi. 60-Singngat NPP Candidate Henlianthang Thanglet in a thugenna ah, maban ah telching ahihleh Behiang Trade Centre tunitan a dinkhawl a om taksuah ahih theihna dia panla masapen ding ahih dan gen a, NPP Party tuppen Medical, Education leh kikawmtuah bawlhoih a, nekgukna doudalna beisakna dia panla ding ahih dan gen hi.


XXXXXXXXX


SSPP JHQ Lamka saina in tukum BSEM nuai a Class X exam dingte a ding in Lamka College, New Lamka ah kha 1 sung daih ding Siamsin Free Coaching kipan a, tuzingkal dak 6:30 in honkhiakna hun zat in om hi. Hiai hun zatna ahihleh Rev. Khen P. Tombing, Adviser, SSPP JHQ Lamka in Chief Guest hihna toh uap in hasotna thu a gen in hongkhia a, Siamsin Free Coaching a dia registration bawl student-te leh teacher-te kimtak in kihel uhi. Hiai hun ah T. Tunzakhup, President, SSPP JHQ Lamka in vaidawnna thu gen in, Siamsin Free Coaching hong kipat khiak dan pulakna nei a, aman a gendan in, siamsin Class X exam dingte khualna a Siamsin Free Coaching sai theihna ding in SSPP JHQ Lamka in Mini-Marathon leh Awareness Programme a sai banah Patron Member tuamtuamte panpihna tungtawn a mualsuah thei ahih dan gen in, hiai toh kisai a sum-le-pai leh tha-le-zung thohkhe tute tengteng tung ah kipahthu gen a, mi 40 tan kia lak ding chih himahleh Coaching a tel ut mi a tam ziak in mi 81 lak in om a, Coaching a peng Manipur Board nuai a Top 10 a telkhate SSPP JHQ Lamka in a admission fee uh a kimkhat sengsak ding hi’n gen hi. Programme hunsung in, mangbiakmuan, Secretary (Sports) makaih in Mini-Marathon a telte kiang ah Certificate hawmkhiakna om a, Rev. Khen P. Tombing in Siamsin Free Coaching hongkhia in Pathian kiang ah latkhiakna nei a, hasotna thu gen hi. Aman a thugenna ah, tulai in siamsinte lak ah thadahna guu nasatak om in, huai in hon niamkiaksak mahmah ahih dan gen a, siamsin te’n tup kichian nei a pan lak hunta ahih dan gen in, hiai Siamsin Free Coaching pen laisimna mun a zanglou a, theihlouhte puaklutna a zang ding in hasuan a, khovel in hon poimohlou a, khovel poimoh dia om sawm ding ahi chi’n gen hi.


XXXXXXXXX


Hongtung ding March 4, 2017 chiang a MLA Election neihna ding toh kisai in 58-CCpur A/C a intending candidate Thangbiaklian Hangzo in tuni’n press note bawl in candidate na ding toh kisai a tribal issue dinpih a panlakna masapen hiding in Dr B. R. Ambedkar in 1956 a ana patkhiak Republican Party of India ticket a tutung MLA Election tuh ding ahih dan taklang hi. Hiai party Manipur a ding in a hong lut patna hi a, tulel in phualpi ah Shri Ramdas Athawale in party president hihna lenlel in, aman Central Government ah Minister of State for Social Justice and Empowerment lenlel hi. Republican Party of India in India gamsung a nam niam (Schedule Caste leh Schedule tribe) te’ khantouhna leh kepbitna ding panlak a nasep pi pen in nei hi. Thangbiaklian Hangzo in a taklat zelna ah, hiai party ticket a din a sawmna ziak ahihleh tulai buaina – tribal issue - pen hon address sakthei pen ding leh Manipur State a dal tuomlou a zalentak a singtangmite dikna tangkoupih theih ding ngimnate ziak ahih dan taklang in Nomination file na ding toh kisai in bangkim saifel khit hita a, February 14, 2017 (Sepnawnni) in RPI (A) ticket zang a nomination file hiding hi’n taklang hi.


XXXXXXXXX


11th Manipur Legislative Assembly election neihna ding toh kisai in tuni tan in nomination paper la mi 16 in Nomination File ta uhi. Thutut kingah dan in, 55-Taipaimukh A/C ah mi 5 in nomination paper la in, tuni’n Dr. Chaltonline Amo (INC) leh Dr. L. Fimate (BJP) te’n nomination file in, Ngursanglur, Ngurrivung leh Thangthatling te’n ahihleh file nailou uhi. 56-Thanlon A/C ah mi 5 mah in nomination paper la in, tuni tan in mi 3 – Vungzagin Valte (BJP), T. Nengzakham (NPP) leh Dr. Chinkholal Thangsing (INC) te’n nomination file tau a, Thangkhangin Ngaihte (LJP) leh Khamsanglian te’n file nailou uhi. 57-Henglep A/C ah mi 7 in nomination paper la in, T. Manga Vaiphei (INC), TT Haokip (BJP) leh Thongjamlen (NPF) te’n tuni’n nomination file in Mangcha Thangzom, Dr. Jainson Haokip, Letzamang Haokip leh Mangboi Haokip te’n bel file nailou uhi. 58-CCpur A/C ah mi 10 in Nomination Paper la in, tuni’n Phungzathang Tonsing (NPP), CT Lian Guite (Ind) leh V. Hangkhanlian (BJP) te’n tuni’n nomination file in, Khamminthang Suantak, Thangbiaklian Hangzo, Paul lalchhanhima, Paokhogin, Paukhansuan Khuptong, DK Mang leh haukhanthang te’n bel file nailou uhi. 59-Saikot A/C ah mi 4 in nomination paper la in, sitting MLA leh INC Candidate TN Haokip kia in nomination file pan a, Paokholal Haokip (BJP), Joseph Lalrothang leh Holkholhun Lhungdim te’n bel file nailou uhi. 60-Singngat A/C ah mi 3 in nomination paper la in tuni’n a vek un nomination file tau a, amaute ahihleh Ginsuanhau (INC), Chinlunthang Zou (BJP) leh Henlianthang Thanglet (NPP) hi uhi. Nomination file theih hun ahihleh zingchiag (February 14) tan hiding a, February 16 in Scrutiny om in, March 4, 2017 in vote khiak hiding hi.


XXXXXXXXX 

February 11, 2017


Khuga Battalion in Red Shield Division kithuahpihna tungtawn in CCpur District sung a om Ex-Service-te a ding in tuni’n Khuga Dam ah Ex-Servicemen Rally thupitak nei uhi. Hiai hun zatna ahihleh Brig. Ajay Kumar, Commander, 27 Sector Assam Rifles in Chief Guest hihna toh uap in hongkhia a, DC/CCPur R. Sudan, IAS, SP/CCpur Rakesh Balwal, IPS leh Col. Murty, Dy. Commander, 27 Sector Assam Rifles banah Lt. Col. (retd) ON Singh, OIC ECHS leh Maj. (Retd) J. Gangte, President, Ex-Servicemen League te’n uap in, CCPur District sung a Ex-Servicemen Association apan mi 750 banah Veer Naries (galmun a sepaih site’ zite) mi 11 kihel uhi. Khuga Battalion in Ex-Servicemen-te buaina leh haksatna tuamtuamte a hunhun a suk veng ahih theihna ding banah Ministry of Defence in policy thak a bawlkhiakte ex-servicemen te’n a theih ua, hamphatna tuamtuam omte a ngah theihna ding uh tupna a kha 3 dan hichibang rally sai a om hi’n kigen hi. Tuni a Ex-Servicemen Rally neihna hun ah Pension toh kisai a buaina neite a ding in Suvigya Cell honkhiak a om in, Free Medical Check-up leng neih in om a, Canteen facility koih ahih banah Axis Bank leh Airtel te’n leng counter khat tuak hongkhia in, bank account neiloute a ding in Zero balance in bank account a honsak banuah SIM Card leng a thawn in pia uhi. Thutut kingah dan in, pension toh kisai a buaina nei mi 155 te’n a buainate uh suk vengsak ding in ngetna pelut in, Khuga Battalion in Pension sum tang Rs. 84,26,981 omte bawl dik ding in PDA ah thot sak ua, tuni tan in Ex-Servicemen 83 te’n a pension sum uh a kigawm in Rs. 41,50,420 muta in, midang te’n leng mupahta ding uh hi’n kigen hi. Suvigya Cell banah CCpur District sung a om siamsinte a ding in Khuga Battalion in leng in Khuga Dam ah Career Counselling sai in, exam tuamtuam pe nuamte banah sepaih pang utte hoihtak in training pia ua, tuni tan in student 14 te’n SSC Exam ah lohchinna a ngah banuah mi 5 in Army Recruitment Rally ah lohchinna ngahta ua, hiai bang panlakna Ex-servicemen te’n kipahpih mahmah in, CCpur District mipite a dia hichibang thil hoih hih sunzop touh deih huai a sakthu uh gen uhi.


XXXXXXXXX


SSPP JHQ Lamka in tutung Class X exam dingte a ding in Siamsin Free Coaching 2017 kichi sai sawm in, hongtung ding February 13, 2017 zingkal dak 6:30 in Lamka College, New Lamka ah honkhiakna nei ding uhi. Hiai hun ah t. Tunzakhup, President, SSPP JHQ Lamka in vaidawnna thu gen in, Mangbiakmuan, Secretary (Sports) makaih in Certificate hawmkhiakna om ding a, Rev. Khen P. Tombing, Adviser, SSPP JHQ Lamka in Siamsin Free Coaching hongkhia in Pathian kiang ah Latkhiakna nei ding hi.


XXXXXXXXXX


Evangelical Free Church of India (EFCI) Saikawt Presbytery in kum 50 chinna Presbytery Golden Jubilee lopna leh Presbytery Conference a 50veina Saikawt EFCI biakinn ah nei in, tuni’n Golden Jubilee suang honna leh Jubilee Dak tumna nei uhi. Tuni zinglam dak 10:30 in Jubilee Suang honna leh Jubilee Dak tumna om a, Upap N. Joulien Joute in hun zatna makaih in heutu masa damlaite leh tulel a heutu tuamtuam te’n Golden Jubilee Dak tum ua, Rev. Lallienvel Pakhuongte, President, EFCI in Jubilee Suang hong in Pathian kiang ah latkhiakna nei hi. Thutut kingah dan in, tulel in Evangelical Free Church of India (EFCI) nuai ah Presbytery 17 om in, Mission Field 4 leh Presbytery pichinglou 3 omlel a, Saikawt Presbytery ahihleh 1968 kum a kiphutkhia in, huai hunlai in Local Church 12 lel om in, milip 700 val zek lel om a, tu in ahihleh Local Church 17 om in, Innkuan 1,300 val a om banah milip leng 6,000 val omta hi’n kigen hi. Tusun Jubilee Lopna kikhop ah Local Church 17 apan saptuam mipi tamtak paikhawm in, Rev. Lallienvel Pakhuongte, President, EFCI in thugenna hun zang a, Rev. Dr. J. Huoplien Nietham, Moderator, EFCI in Jubilee Souviner hongkhia in Pathian kiang ah latkhiakna nei a, khawmpi hunsung a biakna kikhop hunte ah Rev. John L. Thilsong, Assembly Secretary, EFCI, Rev. Lalbiektluong, Vice President, EFCI leh Rev. Jessai Neitham, Presbytery Superintendent te’n thugenna hun zang ding uhi. 50th Presbyterys’ Conference leh Presbytery Golden Jubilee lopna ahihleh apaisa February 9, 2017 a kipan hi a, February 9 leh 10 in Business Session neih a om in, Local Church tuamtuam apan agenda tuamtuam piaklut a omte genkhawmna om a, agenda kigen tengteng kum nawn a Halflong a General Assembly neihna hun a puaklut ding in thupuk ua, Business Session ah local saptuam tuamtuam apan palai 150 val paikhawm uhi.


XXXXXXXXX


National Legal Services Authority leh Manipur State Legal Services Authority thupiak dungzui in CCpur District Legal Services Authority te’n tuni’n Chief Judicial Magistrate Court, Tuibuang ah One Day National Lok Adalat nei in, case tuamtuam 20 genvengsak uhi. Thutut kingah dan in, hiai One Day Lok Adalat ah thubuai tuamtuam Criminal Compoundable Matters, NI Act Case, Bank Recovery Case, MACT Case, Matrimonial Dispute, Labour Dispute, Land Acquisition Case, Electricity, Water leh Revenue thubuai nei case 87 la in, case 20, a sum a tuat in Lakhs 28 val man thubuai genveng hi a, sungkuan thubuai case 5 put-up a omte ahihleh genveng theih ding dinmun in om nailou hi’n thutut kingah hi.


XXXXXXXXX


Manipur Synod nuai a om Presbytery tuamtuam te’n tuni’n Lamka Presbyterian Church, IB Road ah Manipur Synod Annual Session a 40veina nei in zingchiang in Ordination Service nei ding uhi. Manipur Synod Annual Session a 40veina ahihleh zan nitak a kipan hi a, zan nitak a biakna kikhop hun ah Manipur Synod nuai a om Presbytery tuamtuam te’n report pia in, tuni zinglam dak 10:00 apan Business Session nei ua, Presbytery tuamtuam te’n Agenda a puaklutte uh genkhawm in nitaklam dak 4:00 in zou uhi. Hiai hun ah Manipur Presbytery nuai a om Khuga Sadar Presbytery, Tuithaphai Presbytery leh Eastern Manipur Presbytery apan palai 200 vel paikhawm ua, Business Session neihna Yangkhongam Baite, Moderator in makaih a, Pastoral Ministry, General Administration leh Finance Matter toh kisai genkhawm uhi. Zingchiang zinglamd ak 10:00 in Ordination service om ding a, huai ah Pro Pastor 3 kiang ah ordination pia in, Rev. R. Lalnunmawia in hasotna thu gen ding a, nitak biakna kikhop hun ah Out-goinf Moderator Rev. Vanmawia in thugenna hun zang in Manipur Synod Annual Session a 40veina khak ding hi.


XXXXXXXXX


Bukpi Times Award Committee te’n tuni’n YPA Hall, Dorcas Veng, New Lamka ah Bukpi Times Award 2016 hawmkhiakna leh tukum a Class XI leh Class XII exam dingte thumsakna hun zang uhi. Hiai hun ah mun tuamtuam apan Bukpi khosuak mi hunkhop paikhawm in, Langkhanpau Guite, Chairman, ADC/CCPur leh CT Lian Guite, New Lamka (West) MDC te’n Special Guest hihna toh uap in, Bukpi kho hausa N. Liantungnung, Adviser BAC leh Phungzakham, Chairman, BKK te Special Invitee in pang uhi. Thutut kingah dan in, Bukpi khosuak mun tuamtuam a omte kithuzak tuahna dia kibawl Bukpi Times te’n siamsinna lam khansakna ding tupna in kum bangzah hiam paita apan Bukpi Times Award kichi pankhia in, Bukpi khosuak siamsinna lam a hih hoih tungtuante kiang ah Pahtawina an ape zel ua, Donor-te kipiakzohna tungtawn in tuni tan tatsatlou in paitou thei zel hi’n kigen hi. Tuni a hun zatna hun ah, N. Thangsianmung, Chairman, BAC in vaidawnna thu gen in, Special Guests leh Special Invitee-te apan hasotna thu gen ngaihkhiakna om a, Rev. T. Kaikhotuan in tukum a Class X leh Class XII exam dingte a ding in thumsakna nei hi. Programme hunsung in K. Dongsiamding, Secretary, BAC in Award hawmkhiakna makaih a, BA Exam a a mark mutampen Vungmuansiam d/o Vungzadong of Chiimtung Veng, New Lamka in BA Toppers Award sang a, hiai Award ahihleh New Delhi a om Damsawmthang leh a sungkuan te’n a donate uh hi a, Award sangtu in Rs. 2,500 leh memento sang hi. B. Com a Mark mutampen Joshua Nangchinhau Tonsing s/o Ginzathang Tonsing of Siloam Veng, Bungmual in B.Com Toppers Award sang a, hiai award ahihleh USA a om Nu Chinghoihmoi leh a sungkuan te’n a donate uh hi a, award sangtu in Rs. 2,500 leh Memento sang hi. Tuaban ah, Khai Johnpaul s/o Chinkamlian of Bethel Veng, New Lamka in Sianmung Naulak leh a sungkuan te’n a donate uh Meritorious Award for Theologian sang a, CoHSEM nuai a Class XII exam a mark mutampen Nekkhankhual s/o N. Khamzakhen of Thangdong Veng, gangpimual in Nu Chiinkhoniang leh a sungkuan te’n a donate uh (L) Ngailianmoi Memorial Award sang a, CBSE nuai a Class XII exam a mark mutampen Miss Siamlalnem d/o S. Lianzakham of Vengnuam, New Lamka in Dr. H. Nengkhanpau leh a sungkuan te’na donate uh (L) H. Khamlian Memorial Award sang a, Class X exam a mark mutampen Miss Ruthi Manngaihlian d/o Khamkhosiam of Vengnuam South, New Lamka in Bukpi kho hausa N. Liantungnung leh a sungkuan te’n a donate uh (L) N. Gouthawng Memorial Award sang a, Award dawngtu te’n Rs. 2,500 leh Memento sang uhi. Tuaban ah, Exam tuamtuam Class X apan Graduate Level tan a mark mutampen Miss Siamlalnem d/o S. Lianzakham of Vengnuam New Lamka in Overall Topper Award ngah in, N. Goulian leh a sungkuan te’n a donate uh (L) Pamngaihchiin Memorial Award dawng a, aman Rs. 5,000 leh Memento sang hi.


XXXXXXXXX 


February 10, 2017


India Government in kum 1 apan kum 19 kikal naupangte lak ah huut chikhat Soli Transmitted Helminths (STH) kichi beisakna ding tupna in tuni (February 10, 2017) pen National Deworming Day (Naupangte Huutlou neksak ni) a puang in, tuni’n India gamsung pumpi ah naupangte kiang ah Huutlou (Albendazole) neksak hi. Tuni zinglam dak 9:00 in Molnom a om Gandhi Memorial High School ah National Deworming Day inauguration programme om in, DC/CCpur in Chief Guest hihna toh uap in hongkhia a, Langkhanpau Guite, Chairman, ADC/CCpur, Dr. Kimngaihching, CMO/CCpur, Dr. J. Son Goukham Samte, Medical Supdt., T. Goukhomang, ZEO/CCpur leh mi poimoh bangzah hiam in uap uhi. Hiai hun ah Dr. Robinson Lalnunpuia, District Nodal Officer, RKSK in vaidawnna thu gen in, Dr. Kimngaihching, CMO/CCPur in keynote Address gen a, aman a thugenna ah, India gamsung ah Huut chikhat Soil Transmitted Helminths (STH) kichi naupangte lak ah tam mahmah a, naupangte lak ah hiai natna sukbei ahih theihna ding in tuni pen National Deworming Day (Huutlou neksak ni) a puang in India gamsung pumpi ah naupang kum 1 apan kum 19 kikalte kiang ah Albendezole kichi Huutlou neksak in om hi. Hichibang Huut nei te’n ann a duhlouh banuah a sisan uh chau in, a lungsim ngaihtuahna uh buaisak a, hiai in siamsinna lam bahsak thei ahih man in India Government in ngai poimoh mahmah a hichibang programme hon patkhiak uh ahih dan gen in, nu-le-pa kuapeuh in ngai poimoh chiat ding in ngetna bawl hi. DC/CCPur R. Sudhan, IAS in a thugenna ah,

 

Programme hunsung in Langkhanpau Guite, Chairman, ADC/CCpur tel in mi tuamtuam in thugenna hun zang ua, hiai hun zatna a kihel mi poimoh tuamtuam te’n naupangte kiangah Huutlou Albendazole neksak in, T. Goukhomang, ZEO/CCPur in kipahthu gen in inauguration programme zou uhi. Thutut kingah dan in, school leh Anganwadi Centre tuamtuam ah Huutlou Albendazole kichi damdawi hawmsuak vek a om in, school chih in amau student-te kiang ah nesak in, CMO/CCPur leh a team-te group 2 a kikhen in hoihtak in enkai ua, school kai nailou naupangte Anganwadi Centre ah neksak a om in, kuamah maihkhak omlouhna ding in hongtung ding February 16, 2017 chiang in Mop-up programme om nawn ding a, mahni ta leh tute nesak khalou te’n huai hun ah neksak theih ding hi.


XXXXXXXXX


Hongtung ding March 4, 2017 chiang a 11th Manipur Legislative Assembly Election neihna ding toh kisai a Election Notification suahkhiak ahih toh kiton in CCpur District sung a Assembly Constituency tuamtuam a dia candidate tamtak in Nomination Paper la khinta ua, CCpur District a dia a masapen ding in tuni’n 56-Thanlon Assembly Constituency BJP Candidate leh tulel a Sitting MLA hilel Vungzagin Valte in tuni sunma dak 11:45 in Nomination File hi. BJP Candidate Vungzagin Valte in nomination a file hun ah a zi leh a tate banah Chief Agent leh Thanlon MDC Th. Jamchinthang tel in amah gumtu tamtak in hon zui ua, Thanlon A/C a Returning Officer W. Ibohal Singh, MCS kiang ah lai poimoh teng pia in, kichiamna leng nei ngal hi. Vungzagin Valte ahihleh 10th Manipur State Assembly a Congress ticket ah MLA telching a om in, Parliamentary Secretary tanpha piak himahleh Congress government ah muanna nei nawnlou in BJP zom a, BJP apan deihsakna tang tutung ah BJP party zom in ticket piak hi a, BJP ticket ah MLA tuhding ding. Amah CCpur district ah assembly constituency 6 omlak ah candidate teng lak a nomination file masapen hilai hi'n leng kigen a, aman Feb. 16, 2017 zinglam dak 11:00 in scrutiny maituah ding hidan kigen hi.


XXXXXXXXX


60-Singngnat Assembly Constituency a National Peoples' Party (NPP) ticket zanga MLA tuh ding Henlianthang Thanglet in tuni zinglam dak 11:30 in Red Cross Road ah ama election office-cum-information centre ah workers meet leh election agent ding puankhiakna nei hi. Huai hun ah Singngat A/C huamsung adiak in Saingaikot leh Guite kual area apan worker tamtak paikhawm ua, mun tuamtuam akipan deihsaktu paikhawm te'n thugen uhi. Huai hun ah Election Agent dingin Khaimuanthang of S. Geltui puangkhia in, committee member ding ahihleh zingchiang in puangkhe ding hi'n kigen hi.

 

XXXXXXXXX

 

Autonomous District Council, CCPur nuai a om School tuamtuam a Headmaster/Headmistress-te a ding in hongtung ding February 14, 2017 in District Council Hall, Tuibuang ah Primary Level a Co-curriculum activity a poimoh dan kisinsakna Teacher’s Orientation om ding hi. Teacher’s Orientation ahihleh sunma dak 11:00 in kipan ding a, Soiminlian Lengen, MCS, CEO/ADCC in hongkhia in, Nemzathuam, Inspector of Schools, ADCC in Co-curriculum activity a poimoh dan gen in, Paokhothang, DI of Schools, ADCC in Co-curricular activity tuamtuamte pulak ding a, Shanta Singh, DI of Schools, ADCC in Guidance leh Counselling nei in Orientation Programme zou ding uhi. Hiai hun ah school chih a Headmaster/Headmistress banah Assistant Teacher khat chiat kihel ding in Soiminlian Lengen, CEO/ADCC in theihsakna bawl hi.

 

XXXXXXXXX