You are here: HomeRSS FeedsLatest News

Angels Vision News | December 21-23, 2016

Friday, 23 December 2016 01:00

 

Churachandpur Consumers' Club in tuni sunnung dak 3:30 in New Bazar Bus Parking ah khopi sung dawr tuamtuam a van hun beisa kizuak a matte uh Press/Media-te mai ah haltum vek uhi. Thutut kingah dan in, Blockade ziak in November 1, 2016 apan tuni tan Lamka khopi a ding van bangmah hong tunglou a, huchikawmkal ah, dawr bawl khenkhat in van lui hun beisa a neihte pholhkhe thak in zuak ua, CCpur Consumer Club in hiai toh kisai report a zak nung un December 17, 2016 apan Lamka khopi sung a dawr tuamtuamte etkhiak pan ua, dawr tuamtuam apan van hun beisa a kizuak tamtak mankhia uhi. Hun beisa a van kizuak matkhiak a omte ahihleh a tangpi in theitui leh nektheih tel in chii 50 vel phazou a, a sum a tuat in Rs. 50,000 val man hu hiding in kigen hi. Hiai toh kisai in CCpur Consumer Club in drive sunzomtou zel ding ahihna ah dawr bawl kuapeuh in van hun beisa ana zuak nawnlou ding in theihsakna bawl ua, mipi lam in leng thil lei ding khempeuh hoih tak a ahun a bei leh beilou enchian masa ding in ngetna bawl uhi.

XXXXXXX


District Election Officer/CCpur in Society of Fast Justice toh kithuah in District Training Centre, Tuibuang ah Ethnical Voting, Electoral Participation toh kisai in Joint Consultative Meeting nei in, Advent Christmas zatna nei uhi. Hiai hun ah DC/CCpur Lunminthang Haokip, IAS banah Election Department staff teng kimtak in kihel ua, NGO leh social organization tuamtuam apan makai hunkhop in hiai hun zatna uap uhi. Hun zatna ahihleh Rev. Dr. Goikhanmung Zou, Moderator-Vice President, SFJ in makaih in, Rev. T. Janglhun in thumna in hongkhia a, Rev. Dr. Ruth Niengpi Singson-President SF I -CCpur in vaidawnna thugen a, Elder Thangkhomang Haokip, Gen. Secy-SFI in keynote address gen hi. Ng. Haokip, Joint Secy. SFJ in Christmas leh Kumthak message gen a, S. Thienlaljoy Gangte, MCS in ethical voting tawh kisai gen hi. Amana genna ah, mihing in vaihawmtu ding deihtel theihna ineih i vote manphatak azatdan siam poimawh a, vote zuak leh lei kichi a hoihlouh dan kibang ahihan ah maban election omding ah siangthou leh feltak a kuapeuh gam vaihawmtu ding itel theihna din mahni vote chiat kembit dingin ngen hi. Lunminthang LAS, DC/CCpur in model code of conduct tawh kisai agenna ah, maban election om ding ah election commsion of India in candidate leh mipi'n azuiding dan abawlte hoihtak a sepsuah hiding ahihdan gen in, huaidia election department in naktak in panla chi hi. James T. Singson, IRS, Joint Commissioner IT/New Delhi in candidate te'n election campaign hun ah sum tawmchik zatbei a poimawh dan leh bangchi zat ding chihte sinsak hi.


XXXXXXXX


Churachandpur District Chiefs' Association in tuni sunnung dak 2:30 in KIC Office, Tuibuang ah Press/Media-te kimuhpih in MGNREGS toh kisai a fund hong paite state government in a hentang toh kisai poisak thu gen in, naktak a mohpaih uh ahih dan gen uhi. Th. Thangboi, President, CCpur District Chiefs' Assoication in a gendan in, Centre Government in Ministry of Rural Development nuai ah Manipur State kiang ah MGNREGS a ding sum Rs. 66 Crores val apaisa November 17, 2016 in bank account tungtawn in pia a, himahleh State Government in tuni tan mipite kiang ah hawmkhelou hi'n gen a, guideline dungzui in hiai sum hong paite State Government account ah ni 3 sang a tamzaw om theilou chih ahih dungzui in State Government in a kintheilam a mipite kiang ah hawmkhe ding in ngetna bawl hi.


XXXXXXXX


Churachandpur District a BJP makai te'n tuni sun dak 12:00 in BJP CCpur District Office, Light House Lane ah kithuahkhawmna leh Consultative Meeting nei in, maban a election maituah ding dan tel in thu tuamtuam genkhawm uhi. Hiai Consultative Meeting ah Mandal tuamtuam a makaite banah BJP Intending Candidate-te leng kihel ua, Hauneilal, District General Secretary in hun zatna makaih in Elder Kaineipau, District Executive Member in thumna in hun zatna hongkhia a, Pumkhosiam, District Vice President in vaidawnna thu gen hi. Programme hunsung in District Morcha President te'n thugenna hun a zat banuah K. Vungzalian, District President in Keynote Address gen a, BJP makaih paikhawm te'n intending candidate-te pumkhat a om a, ticket mulou te'n leng ticket mute tosawn a, CCpur District sung a Assembly Constituency 6 om lak ah AC 5 bek ah vualzohna a ngah theihna ding ua panlak pih ding in gen ua, Rev. Gintinthang, MPCS in Intending Candidate-te a ding in thumsakna nei hi. Tuni a Consultative Meeting cum Fellowship neihna hun ah intending candidate kihelte ahihleh CCpur AC apan Paukhansuan Khuptong, Singngat AC apan Chinlunthang, Tipaimukh AC apan Ngursanglur leh Dr. lallukhum Fimate, Henglep AC apan Mrs. Tinkhonei, Mangcha Thangzom leh Letzamang banah Saikot AC apan Paokholal Haokip hi uhi.


XXXXXXXX


Headquarters Veng a om 25 Assam Rifles te'n Lamka Damdawi Inn a damlou a etkol a om Pa Ngulzathang (95) of Beulahlane a ding sisan Unit 4 tuni'n Lamka Damdawi Inn Blood Bank ah pia uhi. Pa Ngulzathang a dia sisan manphatak pete ahihleh Rifleman P. Kendrajit, Rifleman SK Chandel, Rifleman Arjun Chhetri leh Rifleman Gabriel hi ua, amau teng in sisan Unit 1 chiat pia uhi. Pa Ngulzathang ahihleh Zomi lasa siam kumlui S. Chingnu pianna pa hi a, damlouhna ziak in tu Pathiannni (December 18) in Lamka Damdawi Inn puaklut a om in, sisan poimoh ahih dan theihsak ahih nung in CT Lian Guite, New Lamka (West) MDC in Headquarters Veng a om 25 Assam Rifles-te' kiang ah sisan pe dia ngetna a bawl dungzui a Assam Rifles te'n phatuamngai tak a Pa Ngulzathang a ding sisan Unit 4 a piak uh hi'n kigen hi. Pa Ngulzathang ahihleh hiai sisan unit 4 teng khai zoh ahih chiang in kha 1 sung a dinmun etkhiak hiding a, huai zoh chiang a test tuamtuam pat hiding hi'n doctor te'n gen uhi.


XXXXXXXX


Zomi Mothers Association (ZMA) in Only Grace Home a om naupangte panpih ut khempeuh te'n panpihna a piak theihna ding un khopi sung mun 2 - Lamka Police Station kong leh New Bazar ah Donation Box koih in tutpih ua, mi tuamtuam te'n a neih khomkhom uh sum-le-pai hiai box ah khia uhi. Only Grace Home ahihleh Zomi Mothers Association GHQ in kemtu neilou naupangte etkolna dia 2006 kum a hon patkhiak uh hi a, a kipatkhiak tung lai in gamdangte toh kizom in panpihna leng kum teng in mu zel ua, himahleh 2010 kum apan in partnership teng sukbei a om in, tu in mi phatuamngai mimal leh pawl tuamtuamte panpihna ban ah Buallian leh Pearsonmun kho khung a donation box a koih uh tungtawn a sum lutte zang in naupangte etkol a om h i'n kigen hi. Tulel in Only Grace Home ah naupang pasal 3 leh numei 10 om in Care manager 1, Senior Warden 1, Junior Warden 1 leh Cook 1 etkolna nuai a khosa lel uh hi'n kigen hi. ZMA GHQ in tuni a khopi sung a Donation Box a koihna ua kiphaltak a sum-le-pai pekhawmte tung ah kipahthu gen uhi.


XXXXXXXX


Chin Baptist Association (CBA) Lanva Local Church in saptuam kiphutkhiak nung kujm 50 chinna Golden Jubilee tuni'n CBA Lanva Biakinn ah thupitak in lawm uhi. Hiai hun ah CBA Lanva saptuam mipi teng kimtak a akihel banuah Chin Baptist Association sung a heutu lian teng in leng hiai hun zatna uap uhi. Hun zatna masa ahihleh sunma dak 11:00 in kipan a, huai ah Upa Do Khan Thang, Founder Member in Golden Jubilee Suang kibawl hongkhia in, Rev. Dr. JM Ngul Khan Pau, Senior Consultant, DAI in Pathian kiang ah latkhiakna nei a, heutu teltuam mi 50 te'n Jubilee Dak tum uhi. Hun 2na ahihleh Sun dak 12:00 in kipan a, huai ah Upa T. nang Khan Thang, Chairman, LCC in vaidawnna thu gen in, Rev. Dr. Sut Khan Thang, Executive Secretary, CBA in Golden Jubilee Souvenir hongkhia in Pathian kiang ah latkhiakna nei a, Pastor Palet Thuomngell, Lamka Khawk Sia makai in heutu ana mualliamsate suunna hun zat a om in, a nutsiat a innkuanpihte a ding in thumsakna nei hi. Programme hunsung in Rev. Dr. JM Ngul Khan Pau, Senior Consultant, DAI in Jubilee Message gen in, makai masate pahtawina a om banah Pu Do Khan Thang, Founder Member in CBA Lanva tangthu pulakna nei in, LANVA CBWS te'n Jubilee Drama lahna nei ua, saptuam mipi paikhawm te'n Jubileel Annkuang umkhawm uhi. Thutut kingah dan in, CBA Lanva saptuam ahihleh 1966 kum a kiphutkhia hi a, tulel in innkuan 60 val om in, Pastor Palet Thuomngell, Lamka Khawk Sia etkaina nuai ah omlel hi'mn kigen hi.


XXXXXXXX


Siamsinpawlpi JHQ Lamka in Class X exam dingte khualna in January khasung in Siamsin Free Coaching kichi sai sawm ua, Fund Drive na dan in tuzingkal in "Marathon for a cause" chih thupi zang in Mini Marathon nei uhi. Hiai hun ah SSPP JHQ Lamka nuai a om Branch tuamtuam apan mi 20 val kihel in, tuzigkal dak 6:00 in SSPP JHQ Lamka Office, SSPP Tower, Hiangtam Lamka ah Flag-off Programme saulou zat in om a, Paukhansuan Khuptong, 58-AC Intending Candidate tel in mi hunkhop kihel uhi. Hiai hun ah SSPP JHQ Lamka President T. Tuanzakhup in vaidawnna thu gen in, apaisa December 18, 2016 nitak a ana mualliam Khupzousuanlal, Vice President, SSPP Ebenezer Branch suunna hun zat in om hi. Mini Marathon a telte Pastor D. Kamchinmang, Local Pastor, EBCC Hiangtam Lamka in thumsakna nei in, Ricky Vanlallawm Guite, Chairman, Standing Committee, SSPP GHQ in Flag-off hi. Mini Marathon a telte SSPP JHQ Lamka Office ah kipankhia in Tipaimukha Road zuisuk ua, Police Station kong apan Tedim Road zuitou in, Dorcas Road ah luttou in, Marian Street apan Tipaimukh Road man nawn ua, a kipatkhiakna mun uh SSPP JHQ Lamka Office ah zou uhi. Mini Marathon a tel mi 20 valte lak ah mi 12 kia taitung in, Rayburn College a kai Lalsonlian in 1na la in, VK Tawna High a kai Ginsuanlian in 2na a lak banah St. Paul's Institute a kai Khuplianding in 3na la a, certificate leh kipahman ahihleh Siamsin Free Coaching honkhiakna hun ah hawmkhiak hiding hi'n kigen hi.


XXXXXXXX


Mc Muan S. Ngaihte in lasa siam minthang Phamsa Muana Ngaihte theihgigena dia a bawl "Zingsol" kichi music video album honkhiakna hongtung ding December 23, 2016 nitak in Hornbill Studio, Mission Road, Hiangtam Lamka ah om ding hi. Hiai hun zatna ahihleh Langkhanpau Guite, Chairman, ADC/CCpur in Chief Guest hihna toh uap in hongkhe ding a, Gouzamang Guite, EM/ADCC leh T. Goukhomang, ZEO/CCpur te'n Functional President hihna toh a uap ding banauh Hiangtam Lamka Hausa Thangkhosuanmung Guite, EM/ADCC in inntekpa hihna toh hiai hun zatna uap ding hi. Programme hunsung in Mc Muan S. Ngaihte tel in lasa siam tuamtuam Zakim, S. Chingnu, Pauginmuan, RD-i chih te'n mipi paikhawmte zaila in awi ding uhi.


XXXXXXXX


All Tribal Women Union (ATWU) makaih numei pawl te'n zan (December 20, 2016) nitak dak 5:30 in YPA Hall, New Lamka ah a 2veina ding in Delhi Hohna Report leh Mass Awareness Campaign nei nawn uhi. Hiai hun ah mun tuamtuam apan mipi tamtak paikhawm in, Nu Niangzaman in hun zatna makaih a, mipi paikhawm te'n Nu T. Gouzavung makaih in Pathian buan in thumkhawmna nei ua, Nu Manngaihkim makaih in Slogun salpna nei uhi. Programme hunsung in Nu Nianglian, President, ATWU in Delhi hohna toh kisai mipi theih ding in report pia in thugenna hun zang a, 58-AC Intending Candidate Paukhansuan Khuptong, CT Lian Guite, DK Mang leh Thangbiaklian Hangzo te'n leng uap a thugenna hun zang ding chih himahleh Thangbiaklian Hangzo kia hia hun ah kihel a, aman diktatna a kilamthak a poimoh dan leh i gam pen humbitna dia kuapeuh in pan lak hunta ahih dan gen a, mipi lam apan dotna tuamtuam omte dawng hi.


XXXXXXXX


Bungmual Veteran Football Association (BVFA) saina a Lalpuithluii Foundation School Ground, Bungmual a Under 50 Kg 9-men Football Tournament pailel Group match teng tuni'n zohsiang a omta in, zingchiang in Quarter Final match kipan ngal di ng hi. Hiai Tournament ahihleh apaisa December 11, 2016 a kipan hi a, Lamka leh a sehvel apan team 17 kihel in Pool 4 in kikhen ua, niteng in match 4 zel om in tuni'n group match teng zohsiang in om hi. Tua toh kiton in, Group A ah V. Munhoih Club leh Ngeisok FC te'n point 7 tuak laisuah mahle uh V. Munhoih in goal defference a neih hoih zawk ziak in group champion hihna la ua, Ngeisok FC 2na ah om hi. Group B ah Maukot Lensiam FC in match 3 ah vualzohna ngah vek in point 9 toh group champion hihna la ua, Dorcas Road Soccer in point 6 toh 2na luah in Quarter Final lut hi. Group C ah Khemkhem FC in point 9 toh 1na luah in quarter final lut a, Pallai Junior FC te'n point 4 toh 2na luah in quarter final lut hi. Group D ah Munhoih United FC in match 3 ah vualzohna ngah vek in point 9 toh group champion hihna la ua, Simsung FC te'n match 1 ah vuallel mahle uh point 6 toh Munhoih United nungzui in Quarter Final lut hi. Zingchiang sunma dak 11:30 in Quarter Final kimawlna kipan ngal ding a, Indian Footballer minthang Jamkhansiam Hanghal @ J. Hanghal in Chief Guest hihna toh kimawlna uap di ng hi'n thutut kingah hi.


XXXXXXX

GAMSUNG THUTHANG

November 1, 2016 apan United Naga Council in Manipur state sung lutding Highway nihte ah Economic blockade a bawl ziak ua, a diak a phaizang a tengte'n haksatna thupitak a tuah uh lungkimlouhna a Counter blockade a patkhiak nung un, Counter blockade bawltute'n counter blockade a bawl uh khauhsak semsem in, tuni in leng Imphal leh Sekmai kikal a om Khongampat ah gari taituah hunkhop khensia uh hin Police thusuak in gen hi. Hiai lamlian ah ahihleh sepnawni in leng Senapati SP leh DC gari zat leng Counter blockade gumpawlte'n hihsiat sak uh a, Kangpokpi Community Health Centre apan Ambulance khat in Imphal a Doctor pidia a kuanlai in, counter blockade gumtute mah in Sekmai ah suang in ana deng uh a, huai ah Ambulance mai dengsia uh hin kigen hi. Tunin ahihleh Police hunkhop tua lamlian ah duty mahle uh counter blockade bawltute'n maingal tak in gamtang thouthou ua, gari taituah tea pan van kipua om hiam chih check na a neih touh ban uah, Auto nasan hoihtak a check in om hi. Imphal khopi sung curfew kipuang lel toh kisai in, a hun behlap in om a, tuni in Imphal east ah dakkal 9 sung khahkol himahleh curfew akkhiak a om nailouh banah, Imphal area a buaina in Thoubal leng peh theidia a kilat ziak in, Thoubal District Magistrate M Joy Singh in zan sepnawnni apan hunchiam omlou in Thoubal district sung pumpi ah Curfew khauhtak puang hi. Imphal East district ah ahihleh Curfew puan a om zingkal dak 9 apan nitaklam dak 6:30 tan lakkhiak in om a, himahleh Imphal apan Ukhrul zotna lamlian in a totkhak Lamlong apan Yaingangpokpi kikal teng lamlian apan a nawl tuak metre 300 huamsung ah bel curfew puan in om denlai hi. Huailou in, Khonghampat ah counter blockade bawlte'n suang zang a lamlian lai a khaktan ziak un, Police in thagum in JCB zang in lamlian khaktan na ding a suang kikoih te phukhia uh a, mun tuamtuam a Counter blockade gumtute toh Police kal a kinawk tuahna om ban ah, tear gas tanpha zat in om hi. Manipur state government in ahihleh December 15 a ambush a sihna tuak Police mi 3 te innkuanpihte kiang ah dangka Lakh 20 chiat piak hiding chin thupuan bawl a, liamna tuak Police 14 te ki-etkol man teng leng a vek a state solkal in sensak ding hin thupuan bawl uhi. UNC in hunchiam omlou economic blockade abawl ziakin gari taituah ding te' adi'n buaina nasatak tun a, Imphal khopi ngial ah Blockade ziak in thautui zuakna mun te ah mipi thautui deih, sautaktak kivual a ding muhding om hi. Economic blockade tungtang a phaizang pansan pawlpi leh singtang gam a pawlpi tuamtuam kal a kikan tuahna omlel toh kisai in ahihleh UNC in ngetna a bawlte uh state solkal in a pichin ma teng inches khat lel leng nungtolhlou ding uh ahihdan taklang uhi. Blockade toh kisai in apaisa 2011 kum in leng July 31 nitak apan Sadar Hills Districthood Demand Committee (SHDDC) in National Highways 39 (Dimapur-Kohima-Imphal) leh National Highway 53 (Imphal-Jiribam-Silchar) a blockade bawl a Naga group - United Naga Council (UNC) in leng Naga te tenna bial a District dang bawl ding deihlou a a kinangtuah ziak un, ni 93 sung vingveng Economic Blockade om man in, van man nasatak a khang in Thautui Diesel litre khat in 150 val man man hidan a gen hi a, Gas cylinder khat in 2500 val man hin kigen a, Manipur solkal in blockade sung in dangka crore 260 val mansuah zou hin leng kigen hi.


xxxxxxxxx


Khalui November 25, 2016 a Imphal west Police Commando te'n UNC President gaidon Kamei leh UNC Information secretary Sankhui Stephen a mat nung un, tu in Police custody ah omlai mahle uh, court a dinsak ahihnung un, Nungba Police station in a thak in matna neinawn uhi. United Naga Council (UNC) president, Gaidon Kamei leh UNC Information and publicity secretary Sankhui Stephen ahihleh Tadubi Police custody a ni 7 a omnung ua, sepnawnni a Chief Judicial Magistrate (CJM) Imphal East (IE) mai a dinsak a om nung ua, Nungba Police in a mat nawn uh hi'n kigen hi. Tadubi Police in a custody ua a koih ma uh tua UNC makai nihte tung ah FIR No. 4 (11) 2016 TBI PS pansan in thubuai chiamteh khum hi ua, November 21 nitak a National Highway a tai Ak (Chicken) pua MN01-9194 haltumna toh kisai a kigolh pipen hidan a ngoh a om Dili Mao leh Athili Mao te leng Police in matding in zong mahle uh tuni tan tua minihte matkhiak in om nailou uhi. Sepnawnni a Imphal East Chief judicial magistrate mai a UNC makai nihte dinsak ahih hun un, CJM in tulel dinmun ah tua minihte khahkhiak thil hitheilou hidan a gen in January 3, 2017 tan Judicial custody a omlai ding in thutanna la hi. Himahleh tua UNC makai nih Nungba Police in a matthakna uh toh kisai in, ahihleh Nungba Police Te'n UNC makai nihte, under section 435/506/120-B/124-A/153-A IPC pansan a FIR No, 45 (11) 2016 Nungba Police station bulhkhum a om ahihziak un, man ding in Court ah ngetna nei uh a, Court in lemsakna a piak dungzui a mat a om hi uhi. Tua dungzui in Court in UNC makai nihte Nungba Police te khut ah ni 14 sung om theiding in phalsak a, January 2, 2017 chiang a Court a tonpih ding in leng theisak hi. Huailou in, United Naga Council (UNC) in Manipur buaina toh ksai in Union Home Minister Rajnath Singh kimuhpihna nei in, huai ah Manipur ah kintak a President Rule koihding in ngetna nei uhi. UNC makai Delhi a omlel te'n a gendan un, UNC makaite'n ahihleh Sepnawnni zingkal in Union Home Minister Rajnath Singh kimuhpihna nei ua, huai ah Manipur buaina toh kisai Congress solkal in vaihawmna a let zohlouh ziak uh ahihman in, kintak a President rule koihding in ngen uh chi uhi. UNC makaite ngetna toh kisai in Union Home Minister Rajnath Singh in tulel in phualpi solkal in Manipur state sung buaina a dakkal teng a hoihtak a enkhe gige hin gen a, Manipur state sung buaina hihvengna ding a thil poimoh omleh kintak a President rule leng koih dia mansa a om hin gen hi. UNC makai te'n President Rule koihding a Union Home Minister kiang a ngetna a neih kawmkawm un, UNC President leh Information Secretary leng kintak a khahkhe ding in ngetna nei ua, Manipur a teeng Naga te'n Manipur solkal ah muanna himhim nei nawnlou uh ahihdan leng zasak in, zan zek a District 7 dinkhiak thak a omte leng Nagate'n chikmah a pom ngeilou ding uh ahihdan zasak uhi. UNC makai te'n ahihleh Manipur buaina toh kisai mah in hun lemtang masa pen ah India President Pranab Mukherjee leng kimuhpihna neiding uhi.


xxxxxxxxx

GAMDANG THUTHANG

Myanmar gamsung mallam pang a om Kachin states leh Shan state ah tulel in Kachin helpawlte toh Myanmar sepaihte kal a kkaptuahna nasatak om ziak in, China gamsung ah minautang tamtak tailut uh hin kigen hi. United Nations thusuak in a gendan in, Kachin helpawlte toh Myanmar sepaihte kha masa apan nasatak a a kikaptuah nawn ziak un, Myanmar leh china gamgi zul a om Kachin state leh Shan state apan minautang 15,000 val China gamsung a tailut uh hin gen a, buaina in venlam nawt lou a siatlam a nawtlai ziak in, minautang tamzaw China ag galtai lai ding ua gintak in om chi hi. UN Office for the Coordination of Humanitarian Affairs (OCHA) in in a gendan in, khalui November apan kikaptuahna in siatlam a nawtzawk ziak in, minautang tamtak galtai kipan uh hin gen a, Myanmar leh Malaysia kigam gitna a om luipi khat ah leng Malaysia gamsung lutsawm Myanmar mi hunkhop tui ah kelum uh chin gen hi. Amnesty International in leng kikaptuahna mun ah Myanmar sepaihte'n minautang tamtak thagum a zatkhum ziak un, human rights bohsiatna uang mahmah hin gen ua, satellite apan kimu dan in, Rakhine state, Shan state leh Ka chin state ah minautang tenna inn tamtak tukum October apan haltum a om khin ahihdan theihtheih in om hi.


xxxxxxxxxx


Kallui Kiginni a China navy-te'n South China Sea a thilkhat (unidentified) mukhia a, US Navy te zat tuinuai apan etkhiakna drone khat a matsak nung un, US ngetna bang in China in piakkik hiding chi mahleh US president thak ding a telching a om Donald Trump in piakkik ngailou hin gen hi. Hiai toh kisai in US in U.S. Chinese warship in U.S. underwater drone matsak hidan in taklang a, Philippines a pan maltumlam Subic Bay a kipan 50 nautical miles bel a gamla a Chinese long sepaihte'n US unmanned underwater vehicle (UUV) man uh hidan in U.S. official thusuak in taklang khinta hi. Beijing pansan Global Times in a taklatna ah, Chinese naval vessel in "unidentified equipment" khat mukhia in tuinuai leh tuipi tung bitna ding toh kisai a man hidan in taklang hi. Himahleh hiai toh kisai in China defense leh foreign ministries in ahihleh bangmah taklanglou hi. Hiai toh kisai US in a taklatna ah, UUV ahihleh South China Sea a dan toh kituak a koih a om hi a, US a mah ahi chi'n taklang hi. Pentagon inleng hiai thu pen thudik mah hi'n taklang a, China in hon piak ding ahi chi'n Pentagon spokesman Jeff Davis in gen hi. China in US UUV a matsak in South China Sea a China in a thuneihna keklian zel ahihdan langsak leh gamdangte thuneihna laksak sawm a pan a lakna khawllou ahihdan kilang hi'n US thusuak in taklang a, China panlakna etkhiakna a kizang hilou in, tuinuai a thil omte etna dia US in a zat uh hizaw hin gen hi.


xxxxxxxxx


Angels' Vision News | December 22, 2016

60-Singngat Assembly Constituency a Intendi ng Candidate Chinlunthang in a tenna inn Zoveng, Zenhang Lamka ah Candidate ding puankhiakna leh Pute thumsakna hun zang hi. Hiai hun ah Singngat Assembly Constituency huamsung a om Gunpang Area, Sangaikot Area, Behing Area, Singngat Area leh Guite Kual apan kho hausa leh Village Authority member a sang a sim kihel in kho hausa 100 val in hiai hun zatna ah a kihel banuah Singngat MDC Hausuanthang leh Muallum MDC Grace Zamnu te'n leng uap ua, Simte Tribe Council GHQ, UZO GHQ, PTC GHQ banah tribe leh philantrophic organization tuamtuam apan makai hunkhop in hiai hun zatna uap uhi. Hun zatna ahihleh Daniel, Secretary (Finance), Singngat Vision in makaih in Pastor Kammang, ZCBC in thumna in hun zatna lankhia a, Sabastian Lunsuanpau in vaidawnna thu gen hi. Programme hunsung in MDC-te apan thugen ngaihkhiakna om in, kho hausa leh makai tuamtuamte apan hasotna thugen om a, Th. Tuanchin, Co-Ordinator, BJP Singngat Area in kipahthu gen in, Pu-te leh mi kiphal tuamtuam te'n a thohkhawm uh Bawng 3 leh Vok 1 gou in kho hausa leh Village Authority Member paikhawm te'n itna annkuang umkhawm uhi. Pu-te lam apan Rev. Stephen Chinzathang, Sr. Executive Secretary, ZPCS in hasotna thu gen in, Chinlunthang pen a pianna pa Ex-Minister (L) Pu Thangkhanlal suulnung zui a gam bawl dia hong kisakhia ahihna ah hausa leh VA member paikhawmte muanna liantak nei ahih dan a gen banah neih ziak hilou a, gam itna ziak a hong kisakhia ahihman in sum kia lamente a ding in hih theih bangmah neilou ding ahih dan gen a, bangchi hiam a lohchinna hon ngah a, sep-le-bawl lam a dem kai a aom ngeingei leh a doudal masapen ding ahihdan gen a, a lutung ah khut nga in Pathian kiang ah vualzawlna ngetsak hi. Intending Candidate Chinlunthang in a thugenna ah, Party chihte a buailou leh Party ticket a muh kei leh leng a lungtup mualsuahna dia paisuak veve ding ahih dan gen hi. Tulai politics pen singtangmite a dia mahni constituency kia ngaihtuah hun hi nawnlou ahih dan gen a, development programme tuamtuamte a omsa ahihna ah huaite bel agam mipi'n a tangdia sehsa hi 'n gen a, tuhun pen nidang politics taw h kibang nawnlou in, Gam leitang politics hita ahihna ah Manipur singtanggam bepbitna din Hill Areas Committee (HAC) puahthak poimawh chi hi. Manipur Assembluy in August 31, 2015 a Bill 3 a pass ban ah reservation tawh kisai a hamphatna kituh in, ethics issue tuamtuam piangkhia a, Phaijang mite tawh thagum a kidelh ding hileng zawh vual hilou ding uh ahiman in khuak, dan leh dun a kibeipih hunta hi'n gen a, work programme kia buaipih hun hinawnlou in issue based a politics saihun hita hi'n gen hi.


Zodwn a om te 'n leng kamawl chih hun hinawnlou a, mailam ah politics chituam mahmah khuak leh dan (law) a kibeihna hong om ding ahihna ah mipi'n huai douthei ding palai mipi'n tel poimawh hi'n gen hi.


XXXXXXXX


Manipur Civil Services Combined Competitive (Main) Exam, 2016 result zan (December 21, 2016) a puankhiak a om ah Siamsin Member mi 5 in lohchinna ngah in, SSPP GHQ in kipahpihna thusuah bawl hi. Siamsin Member MCS a lohchinna ngahte ahihleh Miss Teresa Tangpua, Lianminthang Samte, T. Chinkhansiam, Glory Chi ngthiankim SP elh Pauminlian Guite hi a, Miss Teresa Tangpua in ST ah Topper hihna a ngah banah Manipur pumpi ah 6th Rank in pang a, Lianminthang Samte in ST ah 3rd Rank a muh banah Manipur pumpi ah 10th Rank in pang hi. Siamsinpawlpi GHQ in amaute lohchinna kipahpih petmah a, i Toupa kiang ah lungtang tawng apan lungdam thu tun kawm in, lohchinna ngahte kipahpihna sangpen khak hi. Lohchinna ngah te'n maban a nna a hon septouhna diing uah Toupa' deihdante lenkip tinten kawm a minam itna taktak toh ahong kalsuan uh i deihsak thu Siamsinpawlpi GHQ in khak hi.


XXXXXXXX


Rayburn College Higher Secondary Section Evangelical Union in "To Save a Life" kichi Gospel film siangtangmite pau tuamtuam zang a aletkhiak uh tuni zinglam dak 10:30 in Rayburn College Auditorium ah honkhiakna hun zang uhi. Hiai hun ah Rayburn College (Higher Secondary Section) Evangelicval Union a member-te a kihel banuah student leh staff hunkhop in hiai hun zatna uap ua, Brother Lem, Secretary, Rayburn High School EU un vaidawnna thu gen in, Brother Abhisek, President in "To Save a Life" kichi Gospel film toh kisai pulakna nei hi. Aman a gendan in, Rayburn College Evangelical Union in hiai Gospel film pen ei singtangmite hindan toh kituak leh hiai film tungtawn a zilkhiak ding tamtak a om ziak a kuapeuh in a thu hoihtak a theih ua a zuih theihna ding uh tupna a singtangmite pau teng zang a kilet khia ahih dan gen a, khopi sung a dawr tuamtuam ah leitheih dia koih ahih ding banah hiai tungtawn a sum kimukhe teng Rayburn College Evangelical Union in Sound System leina dia zat hiding ahih dan gen hi. Rayburn College Evangelical Union in pau tuamtuam zang a aletkhiak "To Save a Life" kichi Gospel film ahihleh Rev. Khen P. Tombing, Rayburn College Principal in hongkhia in Uncle T. Tualkam, Senior Adviser in Pathian kiang ah latkhiakna nei hi.


XXXXXXXX


Districe Election Officer, CCpur in Joint Artiste Fellowship toh kithuah in tuni'n khopi sung mun tuamtuam ah Ethical Voting toh kisai Awareness Programme leh Christmas Carol hun zang uhi. Hiai hun ah Lamka khopi sung a nam tuamtuam apan lasa siam tamtak paikhawm ua, hun zatnate ah DEO/CCpur Lunminthang Haokip, IAS, DC/CCpur leh Thienlaljoy Gangte, returning Officer te'n maban a election om ding toh kisai a zuih dia kibawl Code of Conduct leh mipi theih tuak tuamtuamte mipi paikhawmte mai ah pulak in, Joint Artiste Fellowship apan lasa siam tuamtuam te'n mipi paikhawmte Christmas laa toh awi uhi. Hun zatna ahihleh khopi sung mun 4 ah neih hi a, sunnung dak 12:30 in Kangvai Bazar, sunnung dak 2:00 in Sumkong Kaimun, Tuibuang Bazar, sunnung dak 3:00 in Rengkai Bazar leh hun nanungpen New Lamka Petrol Pump kong ah zat in om hi.


XXXXXXXX


Mc Muan S. Ngaihte in lasa siam minthang Phamsa Muana Ngaihte theihgigena dia a bawl "Zingsol" kichi music video album honkhiakna hongtung ding December 23, 2016 nitak in Hornbill Studio, Mission Road, Hiangtam Lamka ah om ding hi. Hiai hun zatna ahihleh Langkhanpau Guite, Chairman, ADC/CCpur in Chief Guest hihna toh uap in hongkhe ding a, Gouzamang Guite, EM/ADCC leh T. Goukhomang, ZEO/CCpur te'n Functional President hihna toh a uap ding banauh Hiangtam Lamka Hausa Thangkhosuanmung Guite, EM/ADCC in inntekpa hihna toh hiai hun zatna uap ding hi. Programme hunsung in Mc Muan S. Ngaihte tel in lasa siam tuamtuam Zakim, S. Chingnu, Pauginmuan, RD-i chih te'n mipi paikhawmte zaila in awi ding uhi.


XXXXXXXX


CCpur District Sports Association (CDSA) saina in tuni sunnung dak 2:30 in Tuibuang Peace Ground ah (L) Damien Letminlun Gangte District 2nd Division League final kimawlna leh Closing Programme om a, Final Match ah Lenlai Club leh Zeal Sproting Club kimawl in Lenlai Club te'n vualzohna ngah in Second Division League ah champion hihna la uhi. Hiai hun ah Letjamang Haokip, 57-Henglep AC Intending Candidate in Chief Guest hihna toh uap in, Guest of Honour in Holkholun Lhungdim, 59-Saikot AC Intending Candidate pang a, Mahajon Lallunmawia in Functional President hihna toh a uap banah K. Haopu Gangte, General Secretary, KSDC in Chief Host hihna toh hiai hun zatna uap in, mi poimoh chial a omte apan thugen ngaihkhiakna om a, Miss Tracy Ngaihching apan lasak ngaihkhiakna om hi. Thutut kingah dan in, (L) Damien Letminlun Gangte District 2nd Division League ahihleh apaisa November 21, 2016 a kipan hi a, CDSA nuai a om affiliated club 30 kihel in, Pool 5 a kikhen in Pool khat ah team 6 zel om a, Group chih a point mutampente First Division ah luttou in, Division League a hih hoihlou team 10 3rd Division ah relegate/kesuk uhi. First Division a luttou team 5-te Semi-Final kimawl ua, huai ah Group D champion Zeal SC leh Group E Champion Lenlai Club te tuni'n Final match kimawl ua, Lenlai Club in vualzohna ngah in (L) Damien Letminlal Gangte District 2nd Division League ah Champion hihna la uhi. Champion Team Lenlai Club in kipahman in Rs. 15,000 sang in Runners Up Zeal SC in kipahman in Rs. 8,000 a sang banuah Lenlai Club apan Haokhomang in Man of the Tournament hihna la in match 5 a goal 7 khumtu Muansang of Khallai FC in Top Scorer hihna la a, Zeal SC keeper Mama in Safe Hang/Best Goalkeeper hihna la hi. 2017 Season a First Division a dia Promotion ngah team-te ahihleh FC Zotal, Zillai FC, Khallai FC leh tuni a final kimawl Zeal SC leh Lenlai Club hi ua, 3rd Division a dia relegate a om Team 10-te ahihleh Lungthul (T) YC, KimComisaret FC, Tuaitengphai Youth Athletic Union, Lontang FC, Khengjang YC, Tuinom FC, Red Ribbon Club, Hill Town FC, Molbem FC leh Muolvaiphei YC hi uhi.


XXXXXXXX

GAMSUNG THUTHANG

Naga te lak a student pawlpi lianpen Naga Student Federation (NSF) in Manipur state sung lutding gari peuhmah tung a blockade a puankhum uh thukkikna in, Meetei Youths' for Human Rights Organisation of Assam (MYHROA) makaihna in Assam state sung ah Organisation tuamtuam 9 kigawm khawm te'n United Naga Council in hongtung ding December 25, 2016 tan a Manipur lutding lamlian te ah Economic blockade a bawl uh a lakkhiak kei uh leh Assam state apan Nagaland zotna lamlian teng ah Nagaland lutding gari himhim taisak hilou ding chin vauna bawl uhi. Meetei Youths' for Human Rights Organisation of Assam (MYHROA) thusuak in a gendan in, UNC leh NSF in Manipur lutding gari taisak a phallouh ziak ua, Manipur state sung buaigawp hidan a gen in, Christmas tan a lakhe ding in theisak ua, tua hunchiam tan a UNC in a pichin keileh Karbi-Anglong district, Golaghat district leh Jorhat district apan Nagaland lutna lamlian teng ah counter Economic blockade patkhum hiding chi uhi. Hiai thu toh kisai in, Meetei Youths' for Human Rights Organisation of Assam (MYHROA) in All Assam Students' Union kiang ah tua Counter blockade bawl a sawm uh kthuahpihna peding in ngetna nei uh a, All Assam Bodo Students' Union leh Tribal student tuamtuam te kiang ah leng kithuahpihna peding in ngetna neihsawm uhi. Meetei Youths' for Human Rights Organisation of Assam (MYHROA) makaih Civil Society Organisation 9 te'n ahihleh December 26 chiang in Surpathar bazar, Golaghat ah tua Counter blockade bawlding tungtang ah kikup khawmna nei ding ua, huai hun ah thutawp lading uh hin kigen hi. Meetei Youths' for Human Rights Organisation of Assam (MYHROA) in ahihleh UNC kichi NSCN (IM) tawsawn pawlpi hin ngoh uh a, SC Jamir leh Rishang Keishing te'n NSCN (IM) thu a zuihlouh ziak ua NSCN (IM) in thah ana sawm ngei hidan a gen in, helpawl tawsawn pawlpi ahi chi hi.


xxxxxxxxx


Manipur state sung a phaizang bial a om Thoubal District leh Imphal East district kikawmtuahna a ding a poimoh mahmah Mutum Phibou bridge kichi leikhat meltheihlouh pawlkhat in halsia uh hin kigen hi. Halsiat a om lei ahihleh Thoubal district sung a Irong Khunou leh Imphal East district sung a om Mutum Phibou kal kawmtuahna leipi hi a, zan nitak in meltheih louh pawlkhat in gari tyre sia leh loupa keu zang in tua lei halsia uh a, gari a lutsuak theihlouh ziak in, tua lei zang a kikawmtuahte a ding in nawngkaina liantak tun hi. Tua lei halsiat a om ahihleh Irong Khunou leh Mutum Phibou khote nekzonna lampi ahihban ah, Bishnupur district toh leng kikawmtuahna ding a tua kiim a teng kho tuamtuam in a zat uh hin kigen hi. Tua lei halsiat ahihma in leng halsiat sawm na tamveitak om khin hin Irong Khunou Youth Development Union in gen ua, pucca a bawlsak ding in state solkal kiang ah bangzah veihiam ngetna neikhin mahle uh, ngaihsak a omlou uh hin leng gen uhi.


xxxxxxxxxx


Himachal Pradesh state sung a khota khat apan ISIL helpawl a tel hidia gintak khat National Investigation Agency (NIA) leh Police kithuah te'n mankhia uhi. Matkhiak a om pasal ahihleh kum 23 a upa Abid Khan kichi tulel a Bengaluru khopi a teeng hi a, Himachal Pradesh khopi Shimla apan Km 250 vel a gamla a om Kullu District sung a Banjar khota a o matkhiak hi a, hun lemchang khat a Syria lutsawm ahihdan leng theihsuah in om hi. Police thusuak in a gendan in, Abid Khan ahihleh Bengaluru khopi a teeng himahleh kha 5 paita apan Kullu ah khosa in, huai ah indentity bawltawm zang in helper in sem a, Police in muanmoh huai sa a naktak a a sulnung a suinung ua matkhiak theih a om hin gen uhi. Mat khiak a om hun in, Mobile phone leh Laptop muhkhiak in om a, tu in muhkhiak a om van nihte forensic test bawlding a thot in om hi. Abid Khan kipuan dan in, hun lemchang masa pen ah Indonesia tawn a Syria gamsung lutsawm hin gen a, nidang in leng bangzah veihiam Sri Lanka gamsung pha a, himahleh sri Lanka a zinlai a bang va hih hiam chih puankhiak hilou hi.


xxxxxxxxx


GAMDANG THUTHANG

Seppatni nitak a Germany khopi Berlin a Christmas market a mi tamtak omna lak truck khat in a phut ziak a mi 12 si a, midang 50 val in liamna a tuah uh toh kisai in, ISIL in amau khutnung hidan in tunin thupuan bawl uhi. German police thusuak in a taklatna ah, Berlin khopi laizang a mipi lak phutu ruck driver hidia gintak khat Christmas market a mi honpi lak a tailut matkhiak a om hi'n taklang himahleh thudotna neih a omlel lai ziak in thuchian bangmah puankhiak theih hinailou chi hi. thiltung toh kisai in German media in a taklatna ah, hiai thiltung ahihleh market a om mipite lak tupna hi a, World War II hunlai a bomb a hihsiat a om Kaiser Wilhelm memorial church omna mun lak hidan in gen uhi. Hiai thiltung ahihleh July kha a France gamsung a Tunisia a piang mi khat in 19-tonne a gik truck khat a mi 86 a gawilupte theihgigena leh phawkna hun zatna toh kituak a thiltung hin kigen hi. July kha in France ah Bastille Day zatna a firework en ding a omkhawm mipi lak a truck in phugawp a, huai ah mi 86 si uhi. seppatni a thiltung ahihleh Berlin khopi laizang a Christmas market a mipi tamna laitak ahihban ah, ngeina dan a sing a kibawl inn sung a nektheih leh Christmas van chituamtuam zuak a omte lei leh nekhawm a mipi omkhawmlaitak truck khat tailut guih hin gen uhi. Thiltung theihphet in Police car leh ambulance in kintak in thiltunna mun delh ua, security tamtak in operation bawl ngal mahle uh ISIL toh kizom hidia gintak kuamah matkhiak neilou uhi.


xxxxxxxxxx


Mexico gamsung a Tultepec khopi sung a puakthei thil kizuakna market ah puakthei tamtak zuak a omte a puahzak ziak in, mi 32 si in, midang 70 val in liamna tuak uhi. Mexico solkal thusuak in a gendan in, thiltunna mun ahihleh tultepec khopi sung a San Pablito marketplace kichi hi a, Mexico khopi Mexico City apan km 32 lel a gamla ahihban ah Mexico mipi tamtak in Christmas lopna ding a puakthei tamtak a lei laitak ua thiltung hin gen a, tua puakthei thil a puahzak ziak in, a mun ah mi 32 si in, midang 70 val liam uhi. Liamna tuakte lak ah khenkhat a taksa pum uh 90 percent velding a katsiat ziak in, damzou ding ua gintak in omlou uh chi uhi. Tu in hiai thiltung toh kisai in, Mexico solkal in puakthei thil puakzak saktute zonna neilel ua, Dan toh kituak a gawtna sangpen piak hiding chin thupuan bawl uhi. mi khenkhat in a gendan un, puakthei thil a puahzak lai in, tua bazaar ah puakthei crackers kizuak lel tonnes 300 val omzou ding hin gen ua, Mexico President Enrique Pena Nieto in thiltung ziak a sihna tuakte sunthu puang in, tuban tuabang a thiltung omlouhna ding a panlak hiding chi hi.


xxxxxxx


Youtube a minthang mahmah leh a diak a US a minthang mahmah Social media star Adam Saleh in London apan New York khopi zuan a lenna a tuan lai in, lenna sung ah mikhat Arabic pau a a houpih khak ziak in, lenna neitu Delta in lenna apan nohkhia uh hin kigen hi. Hiai thu ahihleh Adam Saleh in a lawmte khat Arabic pau a houpih maimai hidan in Twitter tungtawn in taklang mahleh Delta plane enkol tute'n helpawl banah tulel a ISIL te kampau toh kibang ahihman in, a thu ngaikhawk mahmah uh hin gen ua, a thupukna tung uah kisikna neilou uh hin gen uhi. Thiltung toh kisai Adam Saleh in Twitter tungtawn a a post khitnung in, a video post pen 3,00,000 vei kishared sawn hin gen uhi. Adam Saleh ahihleh Youtube star minthang tak hi a, youtube a a thil post te ngaina tu subscriber 1.5 million omzou hin gen uhi.


xxxxxxxxxxx

Angels' Vision News | December 23, 2016

Tuni zingkal baihtak in pawlkhat in District Hospital Morgue kongkhak kalsia in Salpha Khaijamang Touthang luang pokhia ua, tu in KIC Office, Tuibuang ah a luang koih in omlel a, Kuki Inpi CCpur makaih in Kuki Khanglai Lompi leh KSO/CCpur te'n a luang vuikhiak hun ding tuni sunnung dak 4:00 in genkhawm ua, hiai thu bawl ahih tan in thuzak bangmah om nailou hi. Thutut kingah dan in, tuzingkal phalvak in pawlkhat in District Hospital Morgue kongkhakpi kalsia in Cold Storage sung a ni 400 val thudik a vaihawmna ngak a along koih a om gam leh leitang a dia hinna ana pia Salpha Khaijamang Touthang luang pokhia ua, tu in a luang KIC Office, Tuibuang ah koih in omlel a, vui di ng ngak in nupi-papi leh nungak-tangval te'n tutpih lel uhi.

Hiai thu toh kisai in tuni sunnung dak 3:30 in B. Aijalon ah Chief Minister makaih in genkhawmna om a, demand dungzui in Chief Minister in Khaijamang Thouthang nu kiang ah sumtang in Rs. 5 lakhs a piak banah Cheque in Rs. 5 lakhs a kigawm in Rs. 10 lakhs pekhe ngal a, Khaijamang Touthang sanggampa kiang ah DRDA nuai ah LDC nna pe ding ahih dan gen in, zingchiang mahmah a appointment order suahkhiak hiding in gen a, vuina programme a zat di ng Rs. 1 lakhs pia in kihoulem ua, hiai kihouna ah MLA leh Minister-te banah Kuki Inpi CCPur, KKL GHQ leh Khaijamang Touthang sungkuante tel uhi. Kihouna zoh in Chief Minister leh a team te'n Lamka nusia in Imphal zuan in paisuk ngal ua, KIC leh KKL te'n misi vui ding dan toh kisai genkhawm in, hiai thu bawl ahih tan in thuzak bangmah om nailou hi.


XXXXXXXX


Young Paite Association (YPA) New Lamka block in thupuan a bawl uh kimu dungzui in, maban Christmas leh kumthak hunpite nuamtak leh thoveng tak a zat ahih theihna ding in, YPA New Lamka block in theihtawp suah in panlak sawm uhi. Hiai toh kiton in, New Lamka a teeng mipi kuapeuh in vengsung kepbitna dia thupuan kibawlsate hoihtak a zui a, heutute kithuahpih ding in theihsakna bawl uhi. Tua dungzui in New Lamka huamsung ah numei-naupang hih patau theiding thawmging ngaihlua, Crackers kham a om hin gen ua, zu leh damdawi khamtheih ziak a vengsung buaina bawl phallouh bikbek hin tua thusuh in taklang hi.


xxxxxxxxxx


Indian National Congress (INC) CCpur District saina in tuni'n Tuibuang Peace Ground Indoor Stadium ah maban a aAssembly Election om ding toh kisai a kisakkholna dan in Political Conference om hi. Hiai hun zatna ahihleh Manipur Chief Minister Okram Ibobi Singh in Chief Guest hihna toh uap in, Functional President in TN Haokip, Saikot MLA pang a, 60-Singngat MLA Ginsuanhau, 58-CCpur MLA Phungzathang Tonsing, HAC Chairman Dr. Chaltonlien Amo, PHED Minister T. Manga Vaiphei, Thanlon MLA Vungzagin Valte, Nambol MLA N. Loken Singh leh Dy. Chief Minister Gaikhangam te'n Guest of Honour hihna toh uap ua, CCpur District sung a Congress MDC teng leng hiai hun zatna ah kihel in, Mandal tuamtuam apan mipi a sang a sim te'n hiai hun zatna uap uhi. Hun zatna ahihleh sunma dak 11:00 in kipan a, Seiboi Haokip, Secretary, Saikot Block Congress Committee in hun zat ding dan toh kisai pulak in, Chief Minister leh Dy. Chief Minister tel in MLA teng in thugenna hun zang ua, Khaipao Haokip, MDC in kipahthu gen in programme zou uhi. 58-CCpur MLA Phungzathang Tonsing in a thugenna ah, buaina a om leh a suk veng di ng dan leng lampi om ahihna ah, bandh, strike, blockade, shutdown chih te'n a hoihlam sang a a se lam tun zaw ahih man in hichibang thilte kuaman bawl nawnlou ding in ngetna bawl a, buaina leh haksatna om hun chiang a a thu pen tutkhawm gen pen in phatuamna liantak tun zaw ahih dan gen hi. Manipur ah nam tuamtuam tamtak om te'n a kilawmna langsak ahihman in kuapeuh in kituakta a tenkhawm theih ding dan ngaihtuah a, i maban ding uh houlim a genkhawm pen poimoh mahmah ahi chi'n gen hi. Chief Minister O. Ibobi Sing in a thugenna ah, Manipur kichi community tuamtuam tengkhawm himahleng kikhen thei ki-omlou a, gam kichi government ahih dungzui in anei tuam omlou a government in a ut hunhun in decision bawlthei a, abawl tak inle compensation apiak ding chi hi. District 7 kibawlthak tawh kisai leng population ki-en hilou in administrative convenience ding tupna bawlkhiak a om hidan in gen a, tulel in district 16 omlak ah valley ah district 6 leh hills ah 9 omta a, huai tawh kisai valley lam in tamsakthu gen mahle uh maban ah a dang leng bawlbeh poimawh lai ding ahihdan hi. District 2 bawlkhiak dia ngetna ompen leng tuletu a bawltheih hilou a, district piching bawlkhiakna dia infrastructute leh manpower ngai a, maban ah government thak om chianga ettouh hiding in gen hi.


XXXXXXXX


Paite Triba Council (PTC) GHQ President L. Pumlianpau in Christmas leh Kumthak Thuchah bawl in, kuapeuh in Lemna Kumpi pianni nuamtak a zang chiat ding in vaikhak hi. Christmas Thupuak in a taklatna ah, hun leh kum pailiam zungzung in Hondampa Jesu Kris; Lemna Kumpi pianni hun ah i minam sung ah kituahna, kilemna, muanna banah khat-le-khat ki-ittuahna hon tun a deihthu taklang in, Kum thak 2017 ah Pathian vualzawlna i minam in a tan kum hong hih a, kuapeuh kituak dialdial a khosak khawmna kum hong hih a deih thu puak hi.


XXXXXXXX


Bungmual leh District Council Office, Tuibuang a development fund tuamtuam zang a ADC te'n a bawlte uh ana suse leh van tuamtuam gumang pawl om a, hiai toh kisai in Langkhanpau Guite, Chairman ADC/CCpur in poisa mahmah in, kuaman anan suse nawnlou ding in ngetna bawl hi. Hichibang a gamtang theihkhiak leng omta ahihna ah, dan toh kituak a mat a om leh kuamah khase theilou ding hi'n gen hi.


XXXXXXXX


Elim Veng leh Hebron Veng gamgi Lamka College fencing bul, Damkam Bazar a Niin kipai tamtak omte tuni zinglam in Village Authority te'n JCB zang in hahsiang ua, maban ah kuaman hiai mun ah niin va pai nawnlou ding in theihsakna bawl uhi. Thutut kingah dan in, kum bangzah hiam paita apan hiai mun pen niin paihna mun ding in kizang a, a kiim leh kiang a omte a dia damtheih huailou ahihman in Elim Veng leh Hebron Veng VA te'n theihsakna bawl in, kuaman hiai mun ah niin pai nawnlou ding in theihsakna bawl mahle uh hiai theihsak kuaman zuilou in niin pai thouthou ua, a kiim leh kiang a omte a dia a namsiat mahmah banah damtheih huailou ahih man in Village Authority te'n ngai poimoh mahmah in bialtu MDC M. Gouzamang Guite, EM/ADCC kiang ah tai in, thil omdan theisak ua, bialtu MDC in leng JCB a than a zangsak in, District Council-te Sanitary Truck zangsak in tuni'n hahsiang uhi. Maban ah hiai mun ah kuaman niin pai nawnlou ding in Elim Veng leh Hebron Veng VA te'n theihsakna bawl ua, niin pai teitei a om a matkhiak ahihleh a tung a thil tung bangbang ah kuamah khase theilou ding uh ahih dan gen uhi.


XXXXXXXX


ANGELS VISION A KIPAN THEIHSAKNA: Christmas hiding ahihtak toh kiton in, zingchiang Christmas kisakkholhna hun ahih ziak in, Angels Vision News hongsuak lou ding a, December 28, 2016 nitak apan in ngein bang in News hongsuak zom nawn ding hi. Angels Vision News ngaina a entute tengteng na vek un Christmas zatnuam.


xxxxxxxx

GAMSUNG THUTHANG

Manipur state sung a singtangmite dopsangna ding in, Manipur state solkal in singtanggam district 5 ah Tribal Area Inclusive Growth Infrastructure Project pankhe lellel hin kigen hi. Hiai Project in ahihleh district thak 7 khenzak a omma a a lui district 5 huamsung a Tribal Development block 27 huamding a, planning department huaihotna nuai a hiai project patkhiak a om ahihban ah bial tuamtuam a mipite kithuahpihna tungtawn in tua project guan a om Lanva TD Block, Samulamlan TD Block, Saikot TD Block, Tipaimukh TD Block, Sangaikot TD Block, Lamka TD Block, Chandel district a om Machi TD Block, Senapati district sung a om Island TD Block leh Saitu Gamphazol TD Block, Tamenglong district apan Khoupum TD Block, Tamei TD Block, Ukhrul district apan Chingai TD Block leh Lungchong TD Block banah Senapati apan Willong TD Block ah hiai nasepna zohsiang in omta hi. Hiai Tribal Area Inclusive Growth Infrastructure Project sepsuahna toh kisai in, Planning Commission of India kiang tut hi a, huai hun ah Planning commission of India in hoihsa mahmah in bangmah nialna neilou uh hn kigen hi. Hiai Tribal Area Inclusive Growth Infrastructure Project ahihleh Manipur state solkal nuai a Planning department panlakna nuai a Special Plan Assistance (SPA) in 2012 apan 2017 tan daihding 12 th Five Year Plan a guan uh sepna chikhat hidan a gen hi a, phualpi solkal in Financial Inclusion Policy a bawl pansan a sepsuahna a kipat nung in, phase nih in kikhen a, phase nihte ah nasep pat ahihnung in TD Block 14 zohsiang a omta in, TD Block 13 zohsiang hi nailou hi. Tribal Area Inclusive Growth Infrastructure Project sepsuahna toh kisai in TD Block khat ah hiai project sepsuahna ding in dangka Crore 11.98 zel luikhiak a om hin kigen a, Phase-I in TD Block 10 ham in, phase 2 ah TD Block 17 huamsak in om hi. Tulel in ahihleh Chandel district in TD Block 3 nei a, Churachandpur district in 9 nei in, Tamenglong district ah 4 om a, Ukhrul ah 4 mah om in, Senapati district in TD block 7 nei hi. Tribal Areas Inclusive Growth Infrastructure Project sepsuahna ding a TD block 27 a ding a fund luikhiak a omteng Special Plan Assistance (SPA) tungtawn in 323.65 crore pha a, huailak ah phualpi solkal in tua fund kiluikhe teng lak ah 90 percent dagka Crore 291.28 pawsuah in, a dang 10 percent teng state solkal in a puaksuah hin kigen hi. Tu in Special Plan assistance a ding in phualpi solkal in Manipur state a ding in dangka Crore 269.38 state solkal kiang ah pekhe khin a, tunung in, crore 21.50 pekhe nawn ding hin kigen hi. Phase-1 sepsuahna ding in, 2011 leh 2012 kum in dangka crore 119.87 sanction khit in omta a, tua sumte zang in, Tengnoupal TD block, Lamka TD Block, Samulamlan TD Block, Saikot TD Block, Tousem TD block, Tamei TD Block, Nungba TDBlock, Chingai TD Block, Kasom Khullen TD Block leh Paomata TD block ah Tribal Area Inclusive Growth Infrastructure Project sepsuahna ding in tua sumte zat in om hi. Phase-2 sepsuahna ding a 2012 le h 2013 a sanction a om dangka Crore 203.04 ahihleh Machi TD Block, Khengjoy TD Block, Thanlon TD Block, Henglep TD Block, Tipaimukh TD Block, Sangaikot TD Block, Vangai TD Block, Lanva TD Block, Khoupum TD Block, Phungyar TD Block, Lungchang Maiphei TD Block, Purul TD Block, Willong TD Block, T Waichong TD Block, Phaibung Khullen TD Block, Saitu Gamphazol TD Block leh Island / Champhai TD Block ah hiai Project sepsuahna ding a zat in om hi. Tribal Area Inclusive Growth Infrastructure Project sepsuahna pailel teng ahihleh Special Plan assistance nuai ngen a sep hi a, District chih a DC leh area MLA te thuzak kawm a MDS in a sep uh hin leng gen uhi. TD Block 14 zohsiang himahleh Kasom Khullen, Phungyar, Purul, Phaibung, Paomata leh T Waichong TD Block bel Type-III quarter leh BDO office building zohsiang a om nailou in, Block dang khenkhat sepsuah nailouh a omte Phase-III huamsak hiding hin kigen hi.


xxxxxxxxxx


Asia gambuppi sung a Sahang lian mahmah pawl a kigen Asiatic Lion kichi khat Gujarat state sung a om Amreli District sung a Virpur-Gadhia khota ah va lut in, hun bangtan hiam om mahleh khomipite panlakna ziak a mat ahihnung in, tu in ganhing etkolna mun ah etkol ding a puakkhiak in om hi. Forest Department thusuak in a gendan in, tua sahang Asiatic Lion ahihleh khosung a om ahihdan theihphet in, mihing hinna a sukkhak ding lauhna ziak in, mipi tamzaw a inntung uah om uh a, nitak tan a leng matkhiak theihlouh a om nilouh nung in, zinglam dak 3 in Sahang khumna dia kibawl bawm liantak khat zang in mat theih in om a, a nung in Jasadhar medical centre ah etkol ding a puakkhiak in om chi uhi. Sahang etkolna toh kisai in T Kapaswami, Deputy Conservator of Forest, Amreli in thuthak saite a theihsakna ah tua sahang kepna in hoihlam a nawt chiang in, mat a om sahang pen gammang ah khahkhiak hinawn ding hin gen hi. Sahang lutna mun khota ahihleh sahang 511 omna Gir Wildlife sanctuary apan Km 10 lel a gamla hin kigen hi.


xxxxxx


GAMDANG THUTHANG

Kha 18 sung gamdang a, a taikhiaknung in tuni December 23 in Pakistan ah Pakistan President lui Asif Ali Zardari kiknawn ta hi'n a tapa leh Pakistan Peoples Party (PPP) chairman Bilawal Bhutto-Zardari in gen hi. Pakistan a longkhawlna khopi chih a om Karachi a Bilawal Bhutto-Zardari in thuthaksaite kiang a, a genna ah, doctor-te'n a pa khualzin thei ding a phalna a piak uh toh kiton a, tuni a Karachi hongtung hidan in gen hi. Asif Zardari in ahihleh June 2015 a Pakistan military leadership vauna kampau khauhtak a neihnung in Pakistan pawtsan in zinkhia hi. Hiai hun ah Zardari in military leadership in Pakistan Peoples Party tung a 'character assassination' a bawlte a tawpsan keileh general-te thil hihkhelhte taklang ding hidan in gen hi. Hiai hun in Zardari in kua'n a party (PPP) 'character assassination' bawl hiam chih chiangtak in taklangkei mahleh huai hun lai a army chief General Raheel Sharif kawk ahihdan kilang hi. Huai ban ah Zardari in, "Hiai ah kum 3 sung lel om ding na hi a, kou ahihleh hun sawtpi om ding ka hihman un kou a ding in buaina bawl ken" chi'n gen hi. Hiai thu a genkhiaknung ni khat sung in Dubai ah Zardari taikhia hi. Kha paisa a, a sepna a pan Gen Raheel Sharif a khawlma in Asif Ali Zardari in Pakistan a kiknawn pah ding ahihdan ana genta hi. Aman a genna ah, "Politics kichi hun ahi a, Bilawal in politics ah ma a kai ding a, tu inleng a hihhoihtou lel ban ah nipikal tamlou nung in kei leng Pakistan ah muh in ka omta ding" chi hi. Nawaz Sharif naktak a dem kawm in, PPP in Zardari 'skill' zat siam poimoh hi'n Bilawal in gen hi. Huai ban ah National Assembly ah two-third majority ngah mahleh Sharif government in PPP in a ngiat chi 4 pomsak hi'n gen hi. PPP in 'demands' chi 4 a neihte ahihleh Panama Papers leak Inquiries Bill 2016 zatkhiak ding; China-Pakistan Economic Corridor toh kisai a all parties conference's recommendations sepsuah ding; national security enkai ding a parliamentary committee bawlkhiak ding leh full-time foreign minister guan ding chihte ahi. PPP in ahihleh Government kiang a hiai ngetna chi 4 a bawlte sepsuah ahihkeileh Benazir Bhutto sihchampha, December 27 chiang a government kalh a kiphinna nasatak nei ding uh hidan in vauna thusuah bawl uhi.


xxxxxxxxx


March 8, 2014 a passenger 239 pua Malaysia khopi Kuala Lumpur a kipan China khopi Beijing zuan a lenglai Malaysia Airlines Flight 370 mangthang toh kisai zonna paitou zel mahleh tunitan muhkhiak hinailou hi. MH370 official-te'n a genna uah, hiai lenna mang zonna pailel mahleh lenna pen tulel a zonna neih a omna a kipan mallam a kia hiding in gintakthu gen uhi. Huai ban ah lenna mang zonna pen maban neitak a omlai ahihman in kha nawn sung sutzoplai hiding hi'n gen uhi. International investigators team in kum nih val hiai lenna zongta mahle uh lenna kia toh kisai a, a sulnung ding a muanmoh khat leng muhkhiak nei nailou ua, Indian Ocean a gintakna munlakteng dapsuak phialta mahle uh tunitan lenna a kipan van/thil hidia muanmoh leng muhkhiak nei nailou uhi. Himahleh lenna mang zongtute'n a thukhupna uh ahihleh tulel a lenna zonna a kipan mallampang a kia hizaw ding in muanmohthu gen uhi. Australian Transport Safety Bureau in report dungzui in tu in lenna mangthang zonna in a uap sung neusak in om hi. Tu in hiai lenna mang toh kisai a data kaikhop theihteng leh satellite imaga pansan a zonna sutzop hilai ding hi'n thusuak in taklang hi. MH370 zonna ahihleh simlam pang (southern hemisphere) a tuisuahgiat tung leh a sung 120,000-square km a lian zonna neih hita mahleh bangmah muhkhiak hinailou hi.


xxxxxxxxxx