You are here: HomeRSS FeedsLatest News

Angels' Vision News | November 07, 2016

Monday, 07 November 2016 20:49

Olympic Medalist MC Mary Kom, Rajya Sabha MP in tuni'n CCPur District hong pha in, Sansad Adarsh Gram Yojana (SAGY) nuai a model Village dia telkhiak a om Saidan Model Village hongkhiakna hon nei hi. Saidan Model Village honkhiakna hun ahihleh DC/CCPur Lunminthang Haokip, IAS tel in District Level Officer hunkhop kihel ua, Hmar namsung a pawl tuamtuam Hmar Inpui, Hmar Youth Association leh Hmar Women Association tel in makai hunkhop paikhawm ua, Saidan khua leh a sehvel a om kho hausa tamtak hiai hun zatna ah kihel uhi.

 

Programme ahihleh zinglam dak 10:30 in kipan a, DC/CCPur Lunminthang Haokip, IAS in keynote Address gen in, Boxi ng khovel a tallang mahmah MC Mary Kom ziak in CCpur District in MP 2 kinei in Model Village leng 2 kineita ahih dan gen in, hiai tungtawn a development tuamtuam omte department tungtawn a sepsuah ding ahihna ah, Village Authority leh kho mipi te'n a kinlam a proposal pelut ding in theisak hi. MC Mary Kom pasal K. Onler Kom, managing Director, Mary Kom Regional Boxing Foundation in a thugenna ah, singtangmite lak ah MC Mary Kom bang a min thang thei ding mi hunkhop om ahih dan gen in, kumnawn January kha in session thak pat hiding a, Boxing kimawl lunglut kuapeuhte kiang ah vanzat leh siamsinna a thawn a piak hiding ahih man in, "na puansilhlai kia toh hong lut le chin kou a dang teng ana ngaihtuah vek di ng ka hi uh" chi hi. Programme hunsung in Saidan kho hausa Rohminglien tel in mi tuamtuam in thugenna hun zang in, Saidan HYA Cultural Troupe te'n nam laam lahna nei in, Saidan khomi lasa siam tuamtuamte apan lasak ngaihkhiakna om hi. MC Mary Kom in a thugenna ah, politician hikei mahleh Prime Minister deihsakna ziak a Rajya Sabha MP hihna len thei ahih dan gen a, Police Department nuai ah sepna piak himahleh mipite a dia nna tamtak a sep theihna dia hiai bang thupukna a lak hi'n gen hi. Boxing kimawlna khawmsan sawm nailou ahihna ah, 2018 Commonwealth Games ah kihel ding ahih dan a gen banah 2020 Olympics ah leng kihel sawm a panla ahih dan gen in, kuapeuh in thumna ah phawk chiat ding in ngetna bawl a, Saidan Model Village hongkhia hi.


XXXXXXXX


Lamka khopi sung a Artistes Association 4 (Hmar Artistes Association, Kuki Artistes Progressive Union, Mizo Zaimi Inzom leh Zogam Artistes Association) te'n hong tungding November 12,2016 (Kiginni) chiang in "Campaign For Unity Through Music" chih thupi a nei in khopi sung mun tuamtuam ah Gam ngaih laa leh U leh Nau ki-itna laate sa in Unity Campaign sunzom nawn ding uhi. Campaign neihna mun dingte ahihleh sunnung dak 3:00 apan dak 5:00 kikal in Chengkonpang bazaar ah nei in, nitak dak 6:00 apan dak 8:00 kikal in Bungmual ah nei nawn ding uhi. Hiai hun ah Artistes minthang taktakte banah laa leh music lam a dinmun poimoh taktak ana luahte kihel ding ua, gamngaih laa leh Unau ki-itna la manpha taktakte sak hiding hi'n kigen hi. Unity Campaign Team-te ahihleh tulai gamsung buaina leh Election vai banah U-leh-Nau kal a kitheihsiamlouhna omsak thei thubuaite ah kigolhlou in, Khua-khat Tui-khat a tengkhawm Unau Laizomte laka kitanauna hoihzawsem bawlkhiak ding tupna a hiai bang a pan a lak uh hi a, hiai nasepna hatzaw sem a apai theihna ding in mipi kuapeuh in kithuahpihna pechiat ding in ngetna bawl in, kipumkhatna lou in i Gam a dingsuah ngei himhimlou ding hi'n gen uhi.


XXXXXXXXX


Tuzingkal dak 8:00 in Zomi Council Secretriate, Khominthang, New Lamka ah Zomi Council in Bolero leh Laptop a lei thakte uh Pathian kiang ah latkhiakna nei uhi. Hiai hun zatna ah Zomi Council khaikhawmtu num 9-te apan makaite banah Zomi Council nuai a Frontal Organization tuamtuam a makaite leng kimtak in kihel ua, Rev. Harry Muanlal, Executive Director, EOC in Pathian kiang ah latkhiakna nei hi. Thutut kingah dan in, Zomi Council chairman leh a seppih te'n a kul leh poimoh hun a zat ding gari nei nailou in, Zomi Council office a zat ding computer leh printer nangawn leng a neihlouh banah fund leh budget kichian leng bawl theilou in hun sawttak ana omta a, tukum apan Pawlpi fund teng Zomi Council khut a lutta dia thupukna om dungzui in, Zomi Council in Hausate tungtawn in fund la pan a, mipi'n pawlpi a dia a thoh khawmte zang a Second Hand Bolero Rs. 4.5 lakhs man leh Laptop leh Printer Rs. 60,000 man a laikhiak uh hi'n kigen hi.


XXXXXXXX


International Day of Persons with Disabilities 2016 zatna ding toh kisai in tuni'n District Social Welfare Officer A. Umarani Devi makaih in DSWO/CCPur office ah a kisaikhakpihte'n meeting nei uhi. Hiai meeting ah Goukhomang, ZEO Ccpur, Centre for Community Initiative (CCI), Churachandpur District Disabled Union (CDDU), Mercy Home/ FCC leh PASS-te tel ua, hiai hun pen songnawite'n amau hihtheihna (talent) lahkhiak theihna ding a hun lemchang bawlna a zat ding in pha sa in, November 15, 2016 chiang a programme zat ding dan toh kisai genkhawm hinawn ding in gen uhi. Thutut king ah dan in, WHO in khovel pumpi a vualbanloute a ding liauliau in December 3 pen sehtuam in, kum teng in International Day of Persons with Dasabilities zat hi gige a, kum paita in leng DSWO/CCPur leh Centre for Community Initiative kithuah in District Level ah zat in ana omta hi.


XXXXXXXX


YPA Khominthang Unit in kum masa lam apan vengsung a zu leh khamtheih doudalna a pat uh paitouhpih zel in, zan in pasal khat apan khamtheih tamtak mankhia in, Media-te mai ah haltum vek uhi. Matkhiak a om ahihleh Thangthiansong (28) s/o Tualgou of Khominthang hi a, amah satung apan khamtheih No. 4 tuun 44, leh WY tang (tablet) 41 hi a, matkhiak a om teng a sum a tuat in a vek in Rs. 6,860 val man phazou di ng in kigen hi. Thangthiansong ahihl eh khamtheih hih zongsang hi a, amah kipuan dan in, aman Kwakta ah va lasawn in Khominthang leh New Bazar ah pesawn zel hi'n gen hi. YPA Khominthang Unit in a gamtatdan apan ginlel huai sa in, ni bangzah hiam a taang nung un zan zingkal in tuak lemtang in a taksa tung a dapna uah hiai khamtheihte mukhia in amah toh mankhawm uhi. YPA Khominthang Unit in thuhilhna hoihtak a neih nung in khamtheih matkhiak a om teng haltum sak vek in, hiai bang thil chiin hoihlou hih nawnlou dia kichiamsak in khah khia uhi. Thutut kingah dan in, YPA Khominthang Unit in Village Development Committee leh Saptuam toh kithuah in khum bangzah hiam paita apan vengsung a zu leh khamtheih hih leh zuak kham bikbek in, tu kum paita sung in vengsung apan zu zuak inn 2 leh khamtheih zuak inn 3 nohkheta ua, thu tawp a piak uh leng mi bangzah hiam omta hi'n kigen hi. YPA Khominthang Unit in vengsung hoihna ding in pan nasatak a la in, naupang curfew a puan uh leng paitou zel a, kuaman Khominthang pen zu leh khamtheih hihna mun dia zang nawnlou ding in theihsakna bawl ua, hiai thusuah palsat a gamtang teitei matkhiak a om leh YPA thupukna bangbang kuamah khase theilou ding uh hi'n leng thusuah bawl uhi.


XXXXXXXX


All Tribal Women Union (ATWU) makaih numei pawl te'n khopi sung mun tuamtuam a 6th Schedule toh kisai Awareness Programme a neih uh paitou zel in, tuni tak a Nehru Marg Junction a lohchingtak a programme a neih nung un, zingchiang (November 8, 2016) nitak in Kanaan Veng (Auto Parking), New Lamka ah nei nawn ding uhi. Hiai hun zatna ahihleh Nu Lalmalsawm in makaih ding a, mipi paikhawm te'n Nu Gouzavu ng makaih in gam leh nam a ding in thumkhawmna nei ding uhi. Programme hunsung in Tualchin Neihsial leh Nu Nianglian, President, ATWU te'n 6th Schedule toh kisai gen ding ua, Nu Manngaihkim makaih in mipi paikhawm te'n slogun sapna nei in, Pastor Thangchinlun in thohlawm latna leh hun khakna bawl in programme zou ding uhi. Hiai hun ah diktatna tangkoupih ngam banah gam-le-nam a ding ding ngam mipi kuapeuh a tam theilam kihel ding in ATWU in chialna bawl hi.


XXXXXXXX


Zomi Council Chairman B. Dongzalian Simte in tuni zingkal dak 9:00 in Zomi Secretriate, Khominthang, New Lamka ah Lamka pansan press/media-te kimuhpih in Zomi Council paidan toh kisai pulakna a neih banah Chairman hihna a let khak dan leh maban a election ding toh kisai a Zomi Council dinmun mipi theih ding in pulak hi. Aman gam leh leitang a dia hinna ana pia salpha mi 9-te zahna sangpen pia in, Bill 3-te ziak in Manipur singtangmi te'n buaina nasatak tuak in, hiai in Zomi Council sung naktak in tok kha a, tua ziak mah in heutu muanhuai LB Sona leh Vungzathang te'n Zomi Council Chairman hihna apan kitawp in, Zomi Council pen pukse thei di ng dinmun in om hi. Hiai bang dinmun pen Pawlpi (ZRO) in ngaikhawk mahmah in, Zomi Council tundin tha k nawnna ding in nam 9 teng samkhawm in lottery system in Chairman ding telna nei ua, huai apan Interim Chairman hihna len a, tua nung sawtlou in constitution dungzui in election neih a om in, delegate tuamtuam paikhawm te'n Zomi Council Chairman dia telching uh ahih dan gen hi. Zomi Council ahihleh Zosuan nam tuamtuam 9-te khaikhawmtu ahih dungzui in tribe 9 te'n CWC member ding in delegate 5 chiat sawl in, tulel in Zomi Council in Frontal Organization 10 nei lel a, thubuai-labuai genvengna ding Zomi Court leng puah thak a om ahih dan gen hi. Zomi Council in JAC-AATB leng naktak a nungthuap in, JAC ngetna bang in delegate leng sawl a, thusuah kibawlte leng endorse ahih dan a gen banah Pawlpi leng naktak a kithuahpihna pia ahih dan gen hi. Maban Election ding toh kisai a genna ah, Zomi Council Cabinet in apaisa October 15, 2016 in free & fair election om theihna ding in gup tuam neilou ding uh ahih dan thupukna bawl khinta uh ahih dan gen in, lauhthawngna bangmah omlou a kuapeuh in mahni vote chiat khe ding in ngetna bawl a, kuaman zu-le-sa hiam ahihkei leh sum-le-pai a mahni vote zuaklou a, intending candidate te'n leng huchibang thil chiin hoihlou chinglou ding in ngetna bawl hi.


XXXXXXXX


GAMSUNG THUTHANG

Manipur state sung a singtangmi student pawl tuamtuam te kikhaikhawmna All Tribal Students' Union Manipur (ATSUM) in thusuah a bawlna uah tuni a reservation issue thubuai genna Final call neih a om toh kiton in, post graduate post a ding singtangmi bangzah hiam in admission ana bawlna tung uah kipah huai a saklouh thu uh taklang uhi. Manipur University thubuai toh kisai in, tuni in ATSUM leh Manipur state solkal in kihouna nei uh a, himahleh news puan ahihtan in bang thupukna la a kihoulem uh hiam chih theihzui hilou hi. Prof Amar Yumnam in Manipur University Vice Chancellor incharge hihna a letsung kha 3 sung in MU a post graduate admission bawlna nawngkai tak in om a, himahleh hiai hun sung in singtangmi student khenkhat online leh personal a kilang khenkhat admission piak in om uh chi hi. Hiai thu toh kisai in, ATSUM Information and Publicity secretary Micah Kamei in singtangmi kuapeuh in MU thubuai a venma a admission bawllou ding a a theihsak ngeingaihlou a admission a guk a bawlte ATSUM in thei mahmah hin gen a, tuabang a ATSUM theihpihna tellou a Post graduate a ding admission ana gukbawlte' tuni sunma dak 9 tan a ATSUM office a ki-report ding a theihsak ahih ban uah, hiai thupiak ngeingaihloute a kituahpih bang uh penalty piak hiding uh chin ATSUM thusuak in gen hi. ATSUM thusuak in a genzel dan in, singtangmi nam tuamtuam omte lak ah section teng in India danbupi pansan a singtangmite dikna leh tanvou ngah sawm a naktak a a suallai un, ATSUM in MU buaina a vema siah admission kuaman bawllou ding in theisak mahleh, Post graduate course tuamtuam a ding admission bawl hunkhop om uh hin gen a, tua in ATSUM panlakna ban ah singtangmi student pawl tuamtuam te thupiak nelhsiah hin gen hi. Tua bang a singtangmite kipumkhatna suse theiding a lampi dang zongtute tribal society ah ATSUM in mun neisak lou ding hin gen a, a guk a admission ana bawl teitei te zalentak a omsak hilou ding uh a chih ban ah, a tuh gah uh a aat ding uh ahi chi hi. MU academic council in 2006 Act of the Central Educational Institutions (Reservation in Admission) zatding chih thupukna a lak nung un, ST te a ding in 7.5 percent bikhiah hi a, SC a ding in 15 percent leh OBC a ding in 17 percent bikhiah in om hi. Hiai hun toh kituak in admission bawl theih hunsung leng October 29 tan a ding a bikhiah hi a, himahleh Prof Adya Prasad Pandey in MU vice Chancellor mohpuakna a laknung MU thuneitute'n ST te seat reservation ding in 31 percent in kaltou sak uh a, himahleh student a tamluat ziak in, classroom leh laboratories ah student tamtak te bangchi kaisak ding uh hiam chih gen haksa mahmah hin kigen hi,. MU ah tulel in department chih ah seat capacity omzah class room khat ah mi 70 apan 80 kikal om theiding chih hi a, himahleh ST te seat punsak a om toh kiton in, seat reservation masa pen zuih ahihsung a, SC leh OBC tamtak in admission bawlkhin uh ahihman in ST te'n admission bawl le uh classroom khat ah student 150 val omzou ding hidan a gen in om hi. Tuabangkal ah, JAC against the implementation of state reservation policy in admission in MU in MU thuneitute kiang a ngetna a bawldan un, Manipur university in November 7 a Post graduate a ding admission bawlteng in class panding hidan a thupuan a bawlsa zuiding in ngen uh a, 3rd semester te'n class panta uh ahihman in, November 5 tan a ding a admission bawl hun kihon sung a admission bawlloute department khatpeuh in admission bawlsak nawnlou ding in leng ngetna nei uhi.


xxxxxxxxxx


2014 kum a Manipur state solkal nuai a Sericulture department a semding post tuamtuam lakna omte diklou tak a recruitment bawl a om hidan a BJP in a puanzak nung un, zan Pathianni in Sericulture minister Govindas Konthoujam in thuthak saite kimuhpihna nei in, huai ah 2014 kum a sericulture department sung a post tuamtuam a semding lakna pailel cancel hiding hin gen hi. Govindas Konthoujam in a genna ah, Sericulture nuai a DPC pailel cancel hiding a, himahleh a sung a diklou tak a thilhihte a kituahpih uh gawtna khauhtak piak hiding chi hi. Sericulture department nuai a post tuamtuam a sem ding lakna diklou tak a hih a om ahihdan ahihleh niteng a kisuah local daily khenkhat in zan zek in, Sericulture department nuai a Inspector a semding lakna Written test ah exam peloute min leng ching uh hidan a puankhiak a om hin gen ngeita ua, hiai thu toh kisai in Govindas Konthoujam in Director level a result puankhiak a om ahihman in theikha lou hin gen a, himahleh tuni nitak tan a thudik zongsuah teitei ding ahihdan thuthaksaite zasak a, a thilmuh te media tungtawn mah a genkhe ding hin leng zasak hi. BJP in congress solkal tung a ngohna dang a bawl uh, Govindas Konthoujam in hilhchetna a bawldan in, 1999 apan Manipur state sung a department tuamtuam a post awng omte hukdimna ding lak ahihhun ah strict tak a hih a om gige hin gen a, kum dang sang a strict tak a hih ahihlouh ziak in, department chih ah man power kitaksapna liantak om hin gen a, BJP in ngohna bangchi teng in bawl le uh leng mipite'n congress taisan louding uh ahi chi hi.


xxxxxxxxxx


Congress solkal in sadar hills huamsung teng district piching a koihding a chihsa a khen lamdang thak thu ah, Joint Action Committee for Sadar Hills in sadar Hills a kipan MLA 3 leh ADC sadar hills nuai a Congress min a ching MDC teng kiang ah November 9 chiang a Kangpokpi a Sadar hills tungtang genna leh kikupkhawmna om hun ah a dinmun diktak uh sungkhe ding in theisak uhi. JAC general secretary, Paoboi in a gendan in, Manipur CM Ibobi panlakna toh November 1 ni a Kangpokpi a Kut zat hun ah District piching a Sadar hills puankhiak ding chih himahleh simmoh huaitak a zekhem a om ziak un, Sadar hill apan MLA dia telching a om mi 3 leh Congress min a MDC dia telching a om mi 20 te'n a dimun uh leh tulel a koilam gum uh hiam chih November 9 chiang a, Kuki Inpi Sadar Hills, SAHILCA, Thadou Inpi, KSO, KWU, TSA, TWA leh organisation tuamtuam in meeting a neih hun uah a puankhiak uh ngaiding hin gen hi. Sadar hills district a puankhiak ding tungtang ah Sadar hills sung a teeng nam tuamtuam te kal ah leng ngaihdan kibanglou tamtak om hidan a gen hi a, lawikhat in , maban election ah Congress paryy himhim sadar hills huamsung ah boycott ahihding deih in, khenkhat in lah total bandh, blockade chihte patding hoihsa ua, khenkhat te'n ahihleh DC leh SP Sadar hills a koih ahihma siah Senapati DC leh SP boycott puankhum ding hoihsa uh hin kigen hi


xxxxxxxxxxxx


Telangana state sung a khutdoh khat in a zi sisa luang ambulance a puakna man ding a neihlouh ziak in pushcart zang in a zi luang km 60 val a sau hawt tung hin kigen hi. Thusuak in a gendan in, a zi luang Km 60 val hawttung tu ahihleh Ramulu hi a, amah leh a zi Kavitha in phaak natna (Leprosy) neituak uh hin gen hi. Ramulu in Hyderabad khopi a damdawi inn ah a zi Kavitha ensak ut mahleh damdawi inn a tunma un, Hyderabad khopi nawl a om Lingampally Railway station a tun un a zi si a, huai apan a pianna khua uh ambulance zang a puantun ngaiding chih himahleh sum a neihlouh ziak in, pushcart zang in a zi sisa luang Km 60 val hawt tung a, lampi leng haih zomah hin gen uhi. Vikarabad a tun phet in huaimun a teeng mipite'n Ramulu in a zi luang pua ahihdan Police te theisak ngal uh a, a nung in Police te panlakna toh mipi paikhawmte sum kithoh khawm in, Medak District a Sangareddy kichihna mun tan puaktung sak uh hin kigen hi. Tua nupate a nih ua phaak natna vei ahihman un, Ramulu in a zi luang a haltum ding in leng midang kuamah hohlou in, amah kia in haltum hin kigen hi.


xxxxxxxxx


GAMDANG THUTHANG

Indonesia Capital Jakarta ah sahkhua khat gensiatna blasphemy toh kisai a mohna nei hidan a kigen Jakarta Governor a kitawp ding deihna in kallui sintawpni apan mipi tamtak in kiphinna a neih uh paitou zel in, tuni tan kiphinna neih in omlai hi. Tua kiphina neih ahihlai in Jakarta Police te'n mipi 10,000 val kiphinna neite hawldalh sawm a mipi lam ah tear gas leh water canon a kap ziak un mikhat in sihna tuak hi. Kiphinna nei mipite'n ahihleh Jakarta a Christian governor in Muslim te sahkho laibu Quran gensia hin ngoh uh a, khailup ding ahi chi uhi. Jarkata Governor Basuki Tjahaja Purnama ahihleh Christian hi a, aman Quran laibu gensia hin mipite'n ngoh uh a, kumnawn February a Jakarta Governor dinmun lending kitelna ah Quran a kigelhte zang a amah gumlou pawlte khen hin ngoh uhi. kiphinna nasatak a pat a om toh kiton in, kiphinna neite'n Police tamtak barricade bawl dia kisate thawl hawm khawng a deeng uh hin Police thusuak in gen a, buaina in venlam nawtlou a sousang sem a nawt toh kiton in, Indonesia solkal in Police officer 18,000 sawllut be hi thil omdan enkaisak lel hin kigen hi. Purnama ahihleh November 2014 kum in Jakarta governor ding a guan hi a, huaikum mah a Widodo in Indonesia President dinmun lending a telching a om ziak a, Governor dinmun letsak a om hi a, mipi telching bel hilou hin kigen hi.


xxxxxxxxxxxxx


Khovel pumpi in a bildoh mahmah uh US president dinmun lending kiteelna zingchiang November 8, 2016 a om ding ahih toh kiton in, tuni sunnung dak 2 tan a kua telching a om ding uh hiam chih poll suahkiak a om ah Trump sang in Hillary Clinton in point nih in tam muzaw hi. US president kitelna om hun chiang in America mi million 120 val te'n a vote uh kheding uh a, US gamsung a state tuamtuam apan palai dia sawlkhiak a omte Electoral College ah telching a om President penpen in vote 270 sang a tawm zawlou a uh ngaiding hi. Vote khiakna bangkim zohsiang ahihnung in November 9, 2016 in vote simna neih hiding a, huai a telching a om hidan a puankhiak a om penpen January 2, 2017 in official tak in President ding a puankhiak hiding a, January 20, 2017 chiang in White House ah kichiamna neiding hi. Hillary Clinton Email leaked tungtang ah Hillary Clinton Email Account suitu FBI in a taklat dan un, kumdang a Email thubuai a neihsate chih louh ngal om beh nawnlou ahihman in, moh khuksak theih hilou ding hin FBI Director James Comey in Congress theisak a, dakkal khat leng khawllou a FBI in Clinton Email thubuai a suina uah US secretary of state a a panlai a Account leaked omte chihlouh amah mohpaih theihna ding a Email bangmah khakkhe lou leh lut omlou hin gen hi. Pathianni nitaklam a Washington Post-ABC Tracking Poll in a muhdan uh a suahkhiakna uah Clinton in Trump sang in point 5 in hatzaw a, tulel dinmun ah Clinton in US gamsung pumpi ah gumtu 55 percent nei in, 43 percent in Trump gum uh a, 2 percent in ngaihdan pelou uhi.


xxxxxxxxxxxx


Bangladesh gamsung ah khalui paita apan Hindu sahkhua zuite naktak a bawlsiat leh hin gentheih a om nung un, India solkal in Bangladesh kiang ah minority te humbit ding a theihsakna a piak toh kiton in, Bangladesh in leng pan nasatak a la ngal in tu in mi bangzah hiam hindu sahkhua zuite tung a gamtatna kigolh hidia muanmoh mankheta uhi. Khalui October apan tukha kikal in Bangladesh gamsung ah Hindu sahkhua zuite tenna inn 100 val banah temple 17 val suksiat leh buluh hi a, siampu khenkhat leng thah in om uhi. Bangladesh a Hindu sahkhua zuite thuak tamna mun deuh hidan a kigen ahihleh, Bangladesh gamsung suahlam pang a om Brahmanbairs district hi a, kallui in leng hiai mun ah Hindu te temple khat suksiat a omlai lemlak Facebook ah post khiak a om in, Muslim tem un poimoh Masjid al-Haram mun ahih ziak a suksiat a om ahi chin kigelh hi. - Tuabang a Bangladesh solkal in a gamsung ua Hindu sahkhua zuite tung ah thagum suahtu zonna a neih uh paizel ah, tuni tan in mun tuamtuam apan mi 53 mankheta uh hin Nasir Nagar Police station Officer incharge Abu zafar in gen a, midang mat nailouh a omte leng zonna pailel hin gen hi.


xxxxxxxxxxxx