You are here: HomeRSS FeedsThe Lamka Post

The Lamka Post | August 21, 2017

Monday, 21 August 2017 08:31

26th Manipuri Language Day zat in om

Currency note a Manipuri language/script telsakna di’n panlak hiding: IPR Minister

IMPHAL, AUG 20: Tuni Pathianni in Iboyai­ma Shumang Leela Shan­glen Palace Compound, Imphal ah pawlpi 14 omna 26th Manipuri Language Day State Level Celebration Committee-te saina toh August 20,1992 a 8th Schedule of Indian Constitution a Manipur Language guanlut a hih ni theih gigena na ding in 26th Manipuri Language Day zat in om hi.

 

Hiai hun a Chief Guest a pang Minister for Information and Public Relations (IPR) Thon­gam Biswajit in a thugen­na ah, India sum note-te ‘Manipuri language’ or ‘Manipuri laimal’ guanlut a hihtheihna ding in gov­ernment in panla chi’n gen hi. Indian currency note panel ah pau 17 om khin chi’n gen hi. A po­imohleh hiai toh kisai in State cabinet in thupukna la ding chi’n gen hi. In­dian currency note a Ma­nipuri laimal guanlutna ding leh i pau uh ‘classical language’ tan a dopsang ding thu toh kisai Chief Minister N.Biren thei­sak ding hi’n leng gen hi. Currency note a Manipu­ri pau telsakna ding leh i pau uh classical language tan a dopsangna ding a, pangkhawm a panlak po­imoh ding ahi chi’n gen hi.Manipur language i chih lingua franca a hih bang in, state sung a teng nam tuamtuamte’n leng amau paute hatsak sem­na ding a pan a lak uh po­imoh ahi chi’n gen hi.

 

Thongam Biswajit in a thugenna ah, maban khangsawnte ading a, Manipur language kepbit leh khansak semna ding in, tulel a khang om po­imoh mahmah ahi chi’n gen hi. Manipur language kepbit leh hatsak semna ding in, Directorate of Information and Public Relations a Information Education and Commu­nication programme nuai ah awareness bawlkhiak hiding chi’n chiam hi.

 

Education minis­ter Th. Radheshyam in a thugenna ah, laigel­hte, la gelhte, lasate leh thugelh te’n Manipur language kepbitna ding a mohpuakna liantak a lak uh poimoh ahi chi’n gen hi. Manipuri language haktsak semna ding a, level tuamtuam a debate, recitation, essay writing chihte i sai tam uh po­imoh ahi chi’n gen hi.

 

 

Naupangte hinkhua a theihsiamna neih­sak poimoh ahi: Education Minister

Imphal, Aug 20: Tuni Pathianni a Khang­abok Government High School a United De­velopment Association (UDA)-te saina toh lai­siam tungtuan student-te leh mimal lohchinnate kipahpihna program zatna hun a Chief Guest a pang Education Minis­ter Th. Radheshyam in a thugenna ah, hinkhua ua deihtelna leh thupukna chiangtak nei ding a nau­pangte bawlkhiakna ding in, thil khatpeuh thei­hsiam a hihkeileh baih samzaw a bawl poimoh ahi chi’n gen hi.

 

Chief Guest in a gendan in, naupangte neuchik a hih ua kipan thil khatpeuh, siamsinna, thupukna bawlna a hi­hkeileh nasep khatpeuh theihsiamsak poimoh chi’n gen hi. Naupangte lungtang sung a om thil theihnopna omte nu-leh-pa leh teacher-te’n lungkiakpih mailou a, a theihsiamsak mengmeng uh poimoh ahi chi’n gen hi. School a khantouhna nasepna khatpeuh in pansan a neih poimoh a, thil banghiam diklou sepkhiak a om leh tawp­san pah ding ahi chi’n gen hi. Thil dikloute diklou mah a hihdan theihsiam­sak poimoh chi’n gen hi.

 

Tuni a program zat­na hun ah laisiam tung­tuan student-te kiang ah kipahman pekhia hi. Hiai hun in Chairman, Coun­cil of Higher Secondary L. Mahendra Singh, Secre­tary, Board of Secondary Education leh teacher, student leh tualsung mi tamtak tel uhi.

 

 

V.K. Tawna College luh­tu Police in mankhia

LAMKA, Aug 20: August 17, 2017 zankal a Red Cross Road a om V.K. Tawna College luhtu Mr Paulianhau Vaiphei @ Romeo Vaiphei (19) s/o Lianboi Vaiphei of L. Muncham, Sugnu Road, A/P Red Cross Road, zan, August 19 nitak dak 11 in Ccpur Police a 2nd OC James Vaiphei makaih in Police-te’n Lamka Dam­dawi Inn kong IB Road a mankhia uh hi’n police a pan thutut kingah hi. Aman VK Tawna College office sung a om Lenovo Laptop 1 leh charger 1, Ball Laptop 1 leh charger 1, Fee payment register book 1, College Recept book 1, Council registra­tion application 70 a guk ban ah Principal’ table ah Rs 2 lakh ngetna ‘de­mand letter’ koih hi. Mat ahihnung in Police-te’n thudotna nei in, huai a pan a van gukteng leng mukiknawn uh hi’n po­lice a pan thutut kingah hi.

 

Mr Paulianhau Vai­phei in ahihleh August 18, 2017 in College thunei­tute thuzak in, sum ‘de­mand’ a bawlzah a piak ua leh a van gukte pekik ding leh a piakkei ua leh suse ding ahihdan gen a, tua ziak in College lam inleng Rs 50,000/- pe­khe man uhi. College-te sum piak Rs 50,000 zang in mobile phone Sam­sung Galaxy J7Pro khat Rs 21,000/- in lei a, a zat nailouh Rs. 25,000/- ahi­hleh police-te tungtawn in mukiknawn uhi. Hiai thu ah Police in FIR No. 64(8)2017 CCP PS u/s 457/380/384/511 IPC bulh uhi. Mr Paulianhau ahihleh tulel a New Lam­ka a om Rayburn College ah BA 1st semester sinlel ahi.

 

 

Guta 1 in truck phukha in liam

LAMKA, Aug 20: Tuni zingkal dak 5:30 vel in Lamka Police Station kong a Truck (Public Car­rier) khawllai khat cycle a tuang guta hidia muan­moh khat in phukha a, kipuk in khophawklou in om hi. Huainung in police-te’n kintak in Lamka Damdawi Inn ca­sualty pawtung ua, tu in damdawi inn a etkol a om in khua phawk nai­kei mahleh oxygen piak in om hi. Amah ahihleh Kamminlian (40) s/o H. Thangchinmang of Zo­gam Road, Vengnuam, New Lamka hi’n thutut kingah hi.

 

Thutut kingahdan in, tuni zingkal baihtak in Kamminlian in Lam­ka Damdawi Inn kong a Chingtam Hotel luh di’n kisa a, himahleh a kiim a omte’n a phawk ziak un matsawm in delh uhi. Himahleh aman amah matsawmte temta in dawt sawm a, huchi’n cycle zang in kintak in Lamka Police Station lam manoh in tai hi. A taina lam ah Lamka Po­lice Station kiang a Truck khawllai khat phukha hi. A sungkuante gendan, amah ahihleh inn a leng pai ginalou ban ah inn a an leng ne tamlou leh kholak a vakthap a om hi­dan in gen uhi.

 

Huailou in, zan nitak inleng Lanva ah Mansialching (45) inn, gutate’n luh ua, inn sung a om gas cylinder khat gu uhi. Huai ban ah tuni zingkal biakna kikhop kal sunma dak 11:30 vel inleng gutate’n Mrs Ngaikhoniang (65) w/o (L) Ngulpau of Nehru­marg’ inn baang (rhino) hihsia in inn sung ah lut uhi. Innsung a om singlem teng kalsia in pheklek ua, Rs 500 gu uhi. Tua ban ah, Mung Thomte of Dorcas’ Veng, New Lamka inn leng gutate’n luh uh hi’n thutut kingah hi. Tulai in Lamka khopi sung ah gutate laang mahmah ua, kuapeuh pilvan mahmah poimoh hi.

 

 

CMRF ah Rs.1,40,300 thoh

Imphal, Aug 20: State a tuilian thuakte panpihna ding in pawlpi leh association tuamtuam in Chief Minister’s Relief Fund (CMRF) ah sum thoh zomzel uhi.

 

Tuni Pathianni inleng, Teachers’ and Medical Officers’ Asso­ciation (TAMOA), RIMS, Imphal-te’n Chief Minis­ter’s Relief Fund (CMRF) ah Rs. 1,40,300 thoh uhi. Chief Minister’s Secretar­iat a program zatna hun a sum thohte uh Chief Min­ister N. Biren Singh khut ah pia uhi.

 

Chief Minister in CMRF a sum thoh Teach­ers’ and Medical Officers’ Association (TOMOA), RIMS-te tung ah kipahthu gen a, mipite kiang ah panpihna sum thoh zom­zel ding inleng ngen hi.

 

 

Singngat MLA in Upa Lam­suanthang zonna mun pha

LAMKA, Aug 20: Khuga Dam a kia hidia muanmoh, Upa Lam­suanthang of Phaibem, Singngat Sub-Division zonna paizom zel in tuni, August 20, 2017 in bi­altu MLA Ginsuanhau, Chairman, MANIREDA in Phaibem khua pha in Upa Lamsuanthang’ tenna inn a phak ban ah Khuga Dam mun a zonna munte leng va pha hi.

 

Singngat MLA in Phaibem khua a Recep­tion/Information Centre a nungak-tangvalte dawn ding in chini Kg 5 leh bawngnawi Kg 2 ban ah Rs 5,000 pia a, Upa Lam­suanthang’ tenna inn ah pha in, a zongte’n a muhkhiak uh a kawlzal leh a sung a hakkol leh a khedap veilam pang va en hi.

 

Singngat MLA in a genzelna ah, Khuga Dam kibawl pen a zatna ding bangtak a mipi’n ham­phatpihlou kia hilou in hinna tampi lata ahihdan Chief Minister theisak ahihdan gen a, govern­ment dan in ex-gratia piaktheih hichiahkei mahleh panpihna a om thei bangbang ngaihtuah­sak ding leh a luang muh­khiak ahih hunhun a post­mortem leng bawl ding in theisak hi. Huai ban ah District in-charge Minis­ter, V. Hangkhanlian in­leng hong phak ut mahleh meeting poimohtak a neih ziak a hong phatheilou hi’n gen a, DC leh SP’n leng a tang ding ua SDO leh SDPO hon sawl uh ahihdan gen in, dahte ki­dahpih a kitaisan mailou ding in ngen hi.

 

Thangboi Gangte, SDO/Ccpur in hiai hun ah damlouhna ziak a si hilou a, innsung nek-le-tak zonna toh kisai a sihna tuak kichi govern­ment in hon ngaih po­imoh mahmah ding leh panpih ngai i hihdan DC kiang a hoihtak a gensak ding hi’n gen a, lusuun innkuante thuakpih thu genkawm in amah a pan panpihna petheikei mahleh a semsuahtu ding ahihna ah, pan laktheih om bangbang a panla ding ahihdan gen hi.

 

Johnny Sharma, SDPO/Ccpur in Upa Lamsuanthang zonna toh kisai a Army-te’n leng panpih ahihdan gen a, maban ah police in hi­htheih om bangbang sem dia mansa ahihdan gen hi.

 

Upa Lamsuanthang ahihleh August 18, 2017 a Khuga Dam gal T. Kot­lian khenlam a singsat a kuan, sunnung dak 1:30 vel a inn lam zuan a longneu (boat) a pai, a sulnung theihlouh a om inn tunglou hi a, phatu­amngai pawl tuamtuam leh khokimte’n huai ni a kipan tunitan khawllou in zong uhi.

 Upa Lamsuanthang’ van tuilak apan muhkhiak te

 

 

AR-te’n Rs 89 lakh man ding khamtheih pawtu man

IMPHAL, AUG 20: Assam Rifle-te’n Kiginni in Tengnoupal district a vehicle check post, Khudengthabi ah Moreh town a kipan Imphal zuanlai van khat a kipan in Rs 89 lakh man ding damdawi khamtheih pawtu pasal khat mankh­ia uhi.

 

Khudengthabi check post a gari a check hun un Rs 89.50 lakh man ding heroin No. 4 gram 60, WY tab­let 11900 mukhia uhi. Khamtheih pawtu leh a khamtheih matteng uh Customs authority, Moreh khut ah pekhia uhi.

 

 

Thoubal Police-te’n Ngha­thal ah mi 1 hong man

LAMKA, Aug 20: Tuni, August 20 zing­kal dak 8 vel in SDPO/ Thoubal leh OC/Heirok Police Station makaih in police-te’n naupang pimang sawmna toh ki­sai in Nghathal tuilou zau, Lamka a pan Moi­rangthem Lukhoi Singh (22) s/o M. Ibomcha Singh of Heirok Part- I hong mankhia uhi. Amah ahihleh Diesel auto a numei naupang pimang sawm hidan a ngoh hi a, mat ahihnung in Lamka Police Station ah paipih ua, huai zoh in Thoubal a paipih uh hi’n police a pan thutut kingah hi.

 

 

Singngat MLA in Lamka leh Singngat kikal lamlian enkhia

LAMKA, Aug 20: 60-Singngat AC MLA, Ginsuanhau @ GS Hau­pu, Chairman, MANI­REDA in tuni, August 20, 2017 in Lamka leh Singngat kikal lamliam, Tedim Road enkhia hi. Singngat leh Lamka kikal Tedim Road ahihleh kum bangzahhiam paisa a pan puahlouh a om hi a, tuk­tui a luan toh kiton a gari lut a tam ziak in buannawi in lampi kisiatna kuakte thukthei mahmah hi.

 

Singngat leh Lamka kikal lamlian toh kisai a buaipih a August 8, 2017 a pan Delhi a zin ahihdan Singngat MLA in gen a, social media a lampi ki­siatdan kapkhiak a omte leng Delhi a omlai a mukha ahihdan gen hi.

 

Hiai lamlian bawlna ding toh kisai in Social and Infrastructure De­velopment Fund (SIDF) in National Highway & Infrastructure Develop­ment Corporation Lim­ited (NHIDCL) tungtawn in ‘tender’ bawl himahleh lampi bawlna dia rate bikhiah toh ‘tender’ kibawl tuhtu omlouh ziak a cancel a om in, tua ‘ten­der’ thak suahkhiak hid­ing hi’n gen hi. Himahleh lampi kise lua pen bawl­pah poimoh ahihman in lampi bawltu ding kichi­antak om a mipi haksat­na dawnzangkhaina dia zingchiang a pan Special Contractor Khamthang etkaina a bawl hiding hi’n gen hi.

 

Huai ban ah Lamka leh Singngat kikal lam­lian pen Assembly Con­stituency nih in huamkha ahihna ah, Ccpur AC MLA V. Hangkhanlian, Minister in Lamzang tan bawl ding leh Singngat a pan Lamka manoh leh Lamzang a pan Singngat manoh a lampi bawl hid­ing a, nipikal khat sung a lampi siatna diakte bawl­zoh hiding hi’n gen hi.

 

Singngat leh Lamka kikal lamlian bawlna pat ahih toh kiton a Lamka- Sugnu road bawlna leng patkhawm hiding a, fund omsa omlou himahleh amah mimal sum leh Lo­cal Area Development Fund zang a bawl hiding ahihna ah lamlian in a totkhak khohausate ban ah mipi’n kithuahpih ding in ngen hi.

 

 

Phaitong ah Health Check-up nei

LAMKA, Aug 20: Dr. Chingou, MO i/c Sinzawl PHC leh a staff-te’n tuni, August 20, 2017 in Phaitong khua ah health check-up nei uhi. Hiai health check-up ahi­hleh Singngat Sub-Divi­sion sung Kangkap khua a natna hii leng om toh kisai a neih a om hi a, hiai hun ah kum 1 a pan kum 12 kikal naupang damlou tamtak en ua, a poimoh bang in damdawi leng a thawn in pia uhi. Damlou ki-ensak tamzaw ahihleh khosik, luaksuak leh lua, luna, taksa kham leh a dangdang hi ua, a natna uh theihchiang hikei mahleh a natna uh toh kituak (symtomatic treat­ment) piak hi uhi.

 

 

 

 

EBC/LND BCD vaipaw ding tel

LAMKA, Aug 20: Division Baptist Chil­dren Department Com­mittee (DBCDC), Lamka North Division, EBC in tuni, August 20, 2017 sunnung dak 1:30 in EBCC Zenhang Lamka ah 2017-2020 sung DBCDC vaipaw ding telna nei uhi. Hiai hun zatna Paubiak­thang Samte, Secretary, Music Sub-Committee, DBCDC, LND in makaih a, Khupsuan Ngaihte, Asst Secy., Prayer Sub- Committee, DBCDC, LND in thumna in hun pan a, B. Kaichinmung Ngaihte, Chairman, DBCDC, LND a pan vaid­awn thugenna om hi.

 

Hiai kitelna ah, can­didate pasal 18 leh numei 9 om a, huai lak ah pasal 10 leh numei 5 telkhia uhi. Amaute ahihleh T. Chinkholian, T. Jambiak­lal, T. Jamkhenthang, B. Kaichinmung Ngaihte, T. Kapmuanding, Khup­thansang, Sinkhanthang Naulak, T. Thangkhan­siam, T. Thangkhan­siam, H. Tualsonding, Local Upa Vungzamuan, Chingzavung, Dina Ch­ingliankim, Ngaibiak­lun, Niangngaihlian leh Thangngaihnem hi uhi. Amaute Pastor MT Khan­lal Guite, Local Pastor, EBCC Zenhang Lamka in thumsak hi.

 

 

Khupnou Cement Store hongkhia

LAMKA, Aug 20: Zan sunnung dak 1 in He­bron Veng, New Lamka a Lanva Lei kiang ah “Kh­upnou Cement Store” honkhiak in om hi. Hiai cement dawr ahihleh Thanga Tonsing, Secy, ST Morcha, BJP Ccpur in hongkhia a, hiai mun ah cement ban ah langva, sik chituamtuam, sikkilh leh rhino tile kimantak a lei­theih ding leh van leite’n a kipuak uh ngailou a, dawr neite’n a thawn a, a inn tan uh tutsak ding ahihdan gen hi. Huai ban ah cement leh sik ban ah van tuamtuam deihte’n Phone No. 7085962241 leh 8258941491 tung­tawn a leng order bawl­theih ding leh a inn mun ua va koihsak hiding ahihdan Mahajon K. Lamthang in gen hi.

 

 

MPCC in 75th Rajiv Gan­dhi pianchampha zang

Imphal, Aug 20: Tuni Pathianni a Mani­pur Pradesh Congress Committee( MPCC)-te saina toh Congress Bha­van, Imphal a Prime Minister lui Rajiv Gandhi pianchampha kum 75na zatna hun ah Congress party makai Okram O Ibobi Singh in, tu hun a India kilamtouhna a Con­gress party nasepkhiak leh kipumpiaknate gen­kik hi. Hiai hun in Raji Gandhi tung ah zahna sangtak leng pia uhi.

 

Hiai hun a Okram Ibobi in a gendan in, Congress party kichi tu­ipi bang ahi a, kuama’n pawng sukbei theilou chi’n gen hi. Party in thuneihna lel a delhlouh ziak in, khualzinna ah niamkiak hun leh din­mun sangtak let hun om zel ding chi’n gen hi. Ma­ban a Congress party in thuneihna a luahkik hun hong om ding ahi chi’n gen hi. Kha 4 ahihkeileh kha 5 sung thuneihna letlouhna ziak a, Con­gress thuneikik nawnlou ding chihna hituanlou ahi chi’n gen hi. Con­gress party in thuneihna kia a delh kei a, paidan a neihte kiptak in paipih chi’n gen hi. Congress party kichi khovel a po­litical party lianpen khat ahi chi’n gen hi. Kum bangtan hiamsung thu­neihna len kei mahleh party kiptak in hing den ding chi’n gen hi.

 

Tuni a PM lui Ra­jiv Gandhi pianchampha zatna hun ah MPCC pres­ident TN Haokip, Con­gress MLA-te leh worker-te leng tel uhi.

 

 

 

 

 

 

NEWS TOMKIM

 

Khuga Dam tuikai ginalou

LAMKA, Aug 20: Lamka khopi sung a tuinek ding lakna leh mi tamzawte kingakna Khuga Dam a pan tuikai tulai in ginaloutak in om hi. Nidang a regular-tak a tuikai zel pen tulai in kai ginalou a, a kaisun chiang inleng sawtlou kai in beipah zel a, permit nei a tuilate a di’n kingakna taklou toh kibang hi. Huai ban ah nidang in tuikai siang mahleh tulai in niin thei mahmah a, pipe niin hia ahihkeileh tanky niin hizaw hia chih theih ahihlouh ban ah tu hun pen khokhallai hilou in, tuuktui luan hun leh tui kiningchingtak a om hun laitak a tuikai mumalloutak a om pen a kisaipih thuneitute’n enkai thei le uh chih deihthu mi tamtak in press ah hongtun uhi.

 

 

Ex-Chairman ADCC in ZPYF Tournament hong ding

LAMKA, Aug 20: Zou Presbyterian Youth Fellowship (ZPYF) saina in zingchiang, August 21 sunma dak 10:30 in ZPCS Compound, Zomi Colony, Lamka ah ‘Khanglaini Volleyball Tournament’ om ding hi. Hiai hun Elder Langkhanpau Guite, Moderator, General Assembly, Presbyterian Church in India (Reformed) & Ex-Chairman ADCC in chief guest hihna toh uap in hongkhe ding hi. Hiai hun ah functional president, guest of honour leh chief host in Pumtulthang, MDC/ Sangaikot; Genneikhup Vaiphei, MDC/Chongkhozou leh Grace Zamnu, MDC/ Muallum pang ding uhi.

 

 

Red Cross Road bawlna kipannawn

LAMKA, Aug 20: Lamka khopi sung a lampi bawlna sutzop a om in tuni, August 20, 2017 a pan Red Cross Road bawlna kipan nawn hi. Red Cross Road ahihleh hun bangtanhiam paisa a pan kibawl himahleh vuah zuk ziak a nasepna khawl hi a, tuni a nasepna pat ahih toh kiton in DC Bungalow a pan VK Tawna College kong lampi kuaknate (pot hole) suang sekneen leh alkatara (bitumen) in hubit uhi.

 

 

EBC/LSD BYF Khawmpi zousiang

LAMKA, Aug 20: August 17 nitak a kipan EBC Gospel Centenary Hall, New Lamka ah Evangelical Baptist Convention nuai a Lamka South Division, Division Baptist Youth Fellowship Khawmpi 10veina kipan tuni, August 20 nitak in zousiang uhi. Hiai khawmpi ahihleh Rev V Nenglian, DS/EBC Lamka South Division in hongkhia a, “Thutak leh Diktatna a Kilamtou Tuailai” [Paunakte 14:34] chih thupi zang in Rev K Kamchinkhup, DS/EBC Imphal Division in thugen in Dr. Niang­sangching, Lecturer, GBC in seminar makaih hi. Khawmpi sung in 2018- 2020 sung BYF Lamka South Division vaipaw ding telna om ban ah kidemna chituamtuam sai ua, tuni August 20, 2017 nitak in Upa S. Laln­gailian, Chairman, DWC Lamka South Division in khawmpi khak hi. EBC Lamka South Division sung ah tulel in khua/ saptuam 22 om hi.

 

Khawmpi sung a kidemna chituamtuam a kipahman sangte hiai bang ahi. Bible Recita­tion ah 1st BYF Mualpi, 2nd BYF Lamzang. Bible Action ah 1st BYF He­bron, 2nd BYF Dorcas Veng, 3rd BYF NLBC. Solo (Pasal) ah 1st Thangchinkhum, Beth­lehem; 2nd Thanglun­mang, Pethuel; 3rd Alex Douthianmuan, Pethuel leh consolation Sonmang, Vengnuam leh Thang­thiansong, Kanaan. Solo (Numei) ah 1st Mansi­ankim, Bethlehem; 2nd Salomi, Dorcas Veng; 3rd Mercy Ngaimuan­kim, Vengnuam leh con­solation Vunglianmawi, Vungngaihkim leh Ni­anngaihlun. Best Choir Conductor: Khamkhan­siam, Dorcas Veng. Musi­cal band ah 1st Vengnu­am; 2nd Zion Veng; 3rd Dorcas Veng.

 

Lapawlpi category- A ah 1st BYF Mualpi, 2nd BYF Lamzang leh 3rd BYF Lanva. Category-B ah 1st BYF Mata, 2nd BYF College Veng leh 3rd BYF G. Mualkawi. Category- C ah 1st BYF Vengnuam, 2nd BYF Dorcas Veng leh 3rd BYF Bethlehem ahi.

 

 

 

 

 

…for more detail : here

 

 

 

 

RELATED

 

The Lamka Post | August 19, 2017

The Lamka Post | August 20, 2017