You are here: HomeRSS FeedsThe Lamka Post

The Lamka Post | February 09, 2017

Thursday, 09 February 2017 08:05

SoO nuai a helte desiganated camp apan vakkhesak kei un: Joint CEO

IMPHAL, Feb 8: State assembly election kisakkholna pailel ah, Suspension of Operation (SoO) nuai a om Manipur a helpawl tengteng kiang a, amau designated camp pawlam a vakkhelou ding a theihsak a om khin uh hidan in official-te’n gen uhi.

 

Maban a assembly poll a ding a kisakkholna omte enkhe ding in, zan Sepnawnni in, Manipur Joint CEO Hreeshikesh Modak in Chandel, Kak­ching, Thoubal, Chandel leh Tengnoupal district-te va ban veh hi. March 4 leh 8 in Manipur in phase nih in election nei ding hi.

 

Joint CEO in a zinkh­iak sung in, ceasefire leh Memorandum of Under­standings (MoUs) nuai om helpawl tuamtuam a cadre-te amau desig­nated camp chiat uah a kikhumvekna uh hiam chih leh amaute nasepte enkai ding a theihsak a om security agency palaite leh civil official-te kimuhpih uhi. District administration-te kiang ah leng, Suspension of Operation (SoO) nuai a om helpawl tuamtuam akipan cadre-te, amau designated camp paw­lam ua, vakkhesaklou ding a panla ding inleng theisak hi. Meeting sung in, Modak in, official-te kiang ah, Joint Moni­toring Group in zuih ding thupiak a bawlte khauhtak a zuichiat ding inleng theisak hi.

 

 

UNC eco-blockade in Manipur ah poll process naktak in sukha

IMPHAL, Feb 8: District thak bawlkh­iakna thubuai toh kisai a, November 1,2016 a kipan Manipur a National High­way nih a United Naga Council (UNC) indefinite economic blockade koih a om in, state election cam­paign naktak in sukha hi. Thautui taksapna in poll campaign toh kisai a tak­tak in sukha hi. Election hun ding kha khat leng in samta mahleh Manipur mipite’n assembly elec­tion thu hilou in, UNC’s economic blockade thu gen pipen in neichiat uhi.

 

Manipur a elec­tion rally leh meeting neih ahih hun chiang in, political party leh can­didate-te’n mipite tung ah kiviallehna ding gari poimoh bangkim pekhe sek uhi. Abik in singtang bial a, gari a tamzoh peuh leh mipi kikhopkhawm­na ah mipi tam chihna suak hi. Hill district-te a political meeting ahi­hkeileh campaign pro­gramme khatpeuh ah, ann nekkhawm kichi a louthei bang in ngai uhi. Economic blockade ziak a vanman sangtak leh van koihkhol kiam hulhulte’n election meeting-te na­ktak in sukha hi. Hich­ibang thiltungte’n state a election vai toh kisai a nasepna omte ze-olsak mahmah hi.

 

District bawlkhiakna thubuai ziak mah in phai­zang bial ah leng dinmun sousang denlai hi. Civil society organization-te leh mipi makaite leng assembly election vai sang in, tulel a din­mun toh kisai sukvengna ding in kihel tamzaw uhi. February 3, 2017 a New Delhi a Manipur Govern­ment leh United Naga Council leh Government of India kal a ‘tripartite talk’ neih a hih zoh in, UNC in Februry 7 a meet­ing a neih zoh hunhun ua, economic blockade lakhe pah ding uh hi­dan in gintakna liantak om mahleh February 7, 2017 a UNC ‘Presiden­tial Council meeting’ in blockade sunzomzel ding a thupukna a lak in phai­zang bial mipite nguaisak zou mahmah hi.

 

Analyst BB Sharma in a gendan in, state gov­ernment in district tam­tak a poll kisakkholnate zousiang thei taktak ding hiam chih thu buaipih­pen khat suakta chi’n gen hi. Chief Election Com­missioner Nasim Zaidi makaih Election Com­mission of India (ECI) full-team member-te’n Manipur a Assembly election toh kisai a ki­sakkholna omte enkhe ding in, state hong veh sawm zomah uhi. Chik­chiang a Election Com­mission team-te’n state hongpha ding uh hiam chih thu chiang naikei mahleh state in haksat­na tawpkhawk maituah leh leng ECI in election sai sawm teitei hidan in kilang hi.

 

Tuma deuh in, Min­istry of Home Affairs (MHA) in, Manipur a hun sawttak economic block­ade koih a om, Okram Ibobi Singh government in a sukbei zohlouh thu awlmoh huai a sak thu taklang a, ECI kiang ah election ma ngei a block­ade hongkhe ding a pan­lakpih ding inleng ngen hi.

 

 

PM Modi in Imphal leh Lamka ah election rally hong nei maithei

IMPHAL, Feb 8: March 4 leh 8, 2017 chi­ang a 11th Manipur as­sembly election om ding toh kisai in kisakkholhna paitou lel a, political par­ty tuamtuam inleng cam­paign leh rally neita uhi. Hiai toh kisai in Prime Minister Narendra Modi inleng nipikal nawn sung a BJP a dia election cam­paign bawl a Manipur hong pha maithei ding hidan in thusuak in tak­lang hi.

 

Union Minister lui leh BJP makai Thounou­jam Chaoba Singh in zan in New Delhi ah Prime Minister Modi kimuhpih a, huai ah Manipur as­sembly election ding toh kisai a kisakkholhna leh Congress government phuk dingdan genpih hi. Hiai toh kisai Chaoba in thuthaksaite kiang a, a genna ah, PM Modi toh minute 30 vel ka kihouna uah, Manipur hongpha a Imphal leh Lamka (Cc­pur) a BJP a dia election rally a thu hong gen ding a ka chialna PM in lem hon sakpih chi hi. Tua toh kiton in nipikal nawn sung in Prime Minister in Manipur hong pha mai­thei ding hi.

 

Manipur BJP elec­tion committee chairman Tha Chaoba in a genna ah, BJP chief ministe­rial candidate guan ding tungtang leng PM Modi in ngai poimoh mahmah hidan in gen hi.

 

Huailou in, Manipur BJP in zan in a thum­veina ding leh a tawpna ding in candidate list 2 suahkhia hi. Huaite ahi­hleh Bishnupur AC a can­didate ding in Congress makai leh state indus­tries minister K Govin­das’ sanggampa (naupa) Krishna Kumar Singh leh Lamsang AC a BJP candi­date ding in Minister lui S Rajen Singh guang uhi. BJP in candidate list 2 a suahkhiak beh toh kiton in Manipur assembly seat 60 a ding candidate guang khinta uhi.

 

 

MPCC in Ram Madhav kalh in complaint thehlut

Imphal, Feb 8: Manipur Pradesh Con­gress Committee(MPCC) in BJP national general secretary Ram Madhav kalh in chief election officer ah complaint thehlut hi.

 

Press Meet a MPCC thupuangtu Kh Joykis­han Singh in a gendan in, BJP national makai in a thugenna a mimal politi­cian khat minsesak hidan in gen hi. Mimal khat minsiatsakna in Code of Conduct kalh a, Ram Madhav in tupmawng in Inpi makai leh state chief minister minloh in nei chi’n gen hi

 

 

CDDU in DC/Ccpur kipahpihna nei

LAMKA, Feb 8: Ccpur District Disabled Union (CDDU) President T. Sianmuanthang leh General Secretary Nem­boi Zou in tuni’n DC/ Ccpur thak R. Sudhan, IAS vaidawnna leh kipah­pihna nei in tribal shawl ‘Puanlaisan’ pia uhi. Hiai hun ah CDDU in DC/Cc­pur kiang ah tulel a kibawl Mini-Secretariat a vual­phaloute a dia paitheihna ding (ramp) omlou ahih­dan theisak in, CDDU toh kisai thu poimoh tuamtu­am genkhawm uhi.

 

 

National Deworming Day toh kisai meeting nei

LAMKA, Feb 8: Dr. Kimngaihching Simte, CMO/Ccpur makaih in tuni, Feb 7, 2017 sunma dak 10:30 in CMO Mini Confer­ence Hall, CMO Complex ah District Level Des­simination Workshop on National Deworming Day nei uhi. Hiai hun ah CMO/CCpur in vaidawn­na thu gen in National Deworming Day toh ki­sai pulak a, Dr. Robinson Lalnunpuia, DNO, RKSK in naupang kum khat a pan kum 19 kikalte, huut­lou (Albendazole) piak ding dan toh kisai ban ah piak ahih hun ua form kipia a gelhlut ding leh report piak ding dan sin­sak hi.

 

Kisinsakna zoh in CMO makaih in hong­tung ding Feb 10, 2017 chiang a National De­worming Day zatna ding toh kisai tel in, School leh Anganwadi Centre tungtawn a damdawi/ huutlou hawm ding dan leh Monitoring Team in etkhiakna neih dingdan ban ah Education leh So­cial Welfare Department in National Deworming Day Report a piak ding­dan uh genkhawm uhi.

 

Hiai Workshop leh Meeting hun ah Ccpur District sung a Block tua­mtuam a pan Block Program Manager leh Medical Officer in-charge-te, ICDS a pan ban ah Educational In­stitution a pan palaite paikhawm uhi. National Deworming Day ahihleh District Health Society (DHS), Ccpur saina in Gandhi Memorial Gov­ernment High School ah Feb 10, 2017 sunma dak 9:30 in R. Sudhan, IAS, DC/Ccpur leh Chairman, District Health Society, Ccpur in hongkhe ding hi.  

 

 

UNLF Chairman MPA 30th Rising Day chibai buk

Imphal, Feb 8: Tuni Nilaini in, United National Liberation Front(UNLF) Millitary Affairs Committee(MAC) in armed wing Manipur People Army(MPA) 30th Rising Day a tun toh kiton in, bialsung mipite tung ah deihsakna chibai buk hi.

 

Press thusuah a MAC chairman Kh Pambei in a gendan in, nidang a Kum­pi khat vaihawmna nuai a om Manipur a zalenna leh thuneihna omte tund­ing thak nawn ding tup a nei in, kum 1964 in UNLF piangkhia a, February 9, 1987 in galvantawi pawl MPA phuhkhiak in om chi’n gen hi. MPA in kum 30 sung kidouna phualpi 200 ah colonial army-te tung ah thagum suahkhum khinta chi’n gen hi.WESEA bial a tup kibang nei helpawlte toh pangkhawm in gam lei­tang luah army-te dou zomzel hiding chi’n gen hi. Zalenna ngah kik ahi­htheihna ding a, bialsung a teng namchihte’n za­lenna toh pangkhawm ding a thupukna a lak uh poimoh ahi chi’n gen hi.Nam khat kia zalenna in bialsung a thilhoih tunlou ding hi’n leng tak­lang uhi.

 

 

Congress in thuneihna luah­kik ding: MLA K Ranjit

Imphal, Feb 8: Tuni Nilaini a Yaiskul Assembly constituency a Elengbam Chand flag kaihpalhna program zat­na hun a MLA K Ranjit in a gendan in, 11th Mani­pur Legislative Assembly ah Congress government in thuneihna lenkik ding chi’n gen hi.

 

K Ranjit in a gendan in, BJP in Centre ah thu­neihna len mahleh state a thuneihna a lettheihna ding lampi omlou ahi chi’n gen hi. Economic blockade pailel ziak a state mipite’n haksat­na tawpkhawk a tuah hun un, BJP in dai dide in etthoh chi’n mohsa mahmah hi. Mipite tung a haksatna thiltungte lungkhampih leh awlmoh Congress party ahi chi’n K Ranjit in gen hi.

 

 

 

Letzamang in campaign flaf-off; BJP a pan mass resignation bawl

LAMKA, Feb 8: Tuni sunma dak 11:30 in B. Vengnuam Commu­nity Hall ah Letzamang Haokip, intending can­didate, 57-Henglep AC in Public Meeting-cum- Campaign Flag-off hi. Hiai hun ah amah (Letja­mang Haokip) Executive Member BJP makaih in Henglep AC a worker mi 6000 val in BJP a pan a lompi a kitopna (mass res­ignation) bawl uhi. Thang­khomang Haokip, Vice President BJP Cc­pur makaih in BJP ac­tive member 47 in BJP a kipan kitawpna suaikai in zingchiang in a kitaw­pna lai uh pe ding uhi.

 

Hiai hun zatna ahi­hleh John Thanglal in makaih a, Upa Nehpu of B. Aijalon in thumna a hun pan in Seikholun Kipgen, Chief of Mol­pheitampak in vaidawn thugen a, Pastor Henk­hosei, Lecturer, DTS in vualzawlna ngetsak hi.

 

Hiai hun ah Paotin­lal, Chairman, Henglep Chief Assn; Thangkho­mang, Ex-MDC; Alin Kamei, New Canan; Brownson, Chairman, Charoi Khulen; Seik­holet Singson, Secy. BJP Henglep Mandal; D. Siema Gangte, Sant­ing Area; Khaikhohao Gangte, Secy. KSDC; Kh. Thiena Vaiphei leh intending candidate Letzamang Haokip in thugen uhi.

 

Letzamang Haokip in a genna ah, BJP kichi thudik leh chihtakna toh pai ding a lam-en himahleh maban a Ma­nipur assembly elec­tion om ding toh kisai a party ticket hawmdan a khentuam neihna lung­sim (groupism) om ahi­hdan muhkhia hi’n gen hi. Tua toh kiton a amah gumtu mi 6,000 val leh BJP active member 47 in BJP a kipan mass resig­nation bawl a suaikai uh hidan in gen hi.

 

Hiai hun ah D. Diama of Maumual makaih in mipi’n pan­pihna dongkhawm ua, huai ah Rs 10,920 dong­khia uhi. Hiai panpihna donkhawm a omte ahi­hleh election committee in nomination file-na a zat ding in koihsak uhi. Tuni a public meeting ah Henglep bialsung a kho hausa (chiefs) 120 val tel uh hidan in thutut kingah hi.  

 

 

NPF Manipur State Unit Working President Solomon Veino kitawp

SENAPATI, FEB 8: Tuni Nilaini in NPF Ma­nipur State Unit Working President Solomon Veino in tulel a post leh party a primary membership ahi­hna akipan in kitawpna lai pia hi.

 

Maban a Manipur assembly poll tuhna ding a NPF in ticket piak ding a nawlkhinsak ziak a kitawp hidan in Solomon Veino in a kitawpna ziak gen hi. Central NPF Pres­ident kiang a kitawpna lai a piakna ah, Solomon Veino in, party in Mani­pur assembly election tuh ding a ticket piak ding nial kawm a, party a ding a thasiallou a kipumpiak­na a neihte nawlkhinsak a om hidan in gen hi. Voter tamtak in candidate khat ka hih ding hon pom­pih khin mahle uh ticket nawlkhinsakna in party a ka sep zomzel ding po­imoh nawnlou uh ahih­dan langsak chi’n gen hi.

 

 

NERCORMP nuai project bangzahhiam hongkhia

LAMKA, Feb 8: Tuni zingkal dak 8 a pan in Sammulamlan block sung a NERCORMP nuai a Good Samaritan Foun­dation phase 11 tungtawn a kibawl Common Facil­ity Centre, Water Tanky leh Poultry Farm honkh­iakna om hi. Hiai hun ah D. Khuala Vaiphei, Project Manager, NERCORMP, Ccpur in kho 3 a NER­CORMP project a kibawl community hall 1, water tanky 3 leh poultry farm 2 hongkhia hi.

 

Huaite ahihleh Lailam­pat khua ah NERCORMP III Ccpur 2016-2017 nuai a NEC fund Rs. 4 lakh bei a kibawl Common Facil­ity Centre leh Water tanky ban ah S. Gangpijang khua a Water Tanky 1 leh Poultry Farm khat ahi. Huai ban ah T. Cananphai khua ah water tanky 1, Poultry Farm 1 leh Tent & Catering centre 1 hongkhia ua, T. Cananphai a Tent House ah hun saulou zang uhi.

 

Hiai hun ah D. Khuala Vaiphei, Project Manager in a genna ah, Centre Govt a pan fund hong paite NERCORMP tungtawn a mipi a dia sepkhiak theih a om ziak in kipahthu gen a, hamphatna ngahte’n chihtakna toh sem a phattuampih sawm chiat ding in ngen hi. Tuni a project honkhiak a omte lak ah mun nih a poultry farm kibawlte ahihleh lo­hching mahmah ahihdan mukhia uhi.

 

 

JNV/Tuinom ah SVEEP Programme zang

LAMKA, Feb 8: JNV Tuinom ah tuni’n SVEEP Programme nuai a EVM Familiarisation Awareness Campaign and Mock Poll kichi nei ua, huai ah Soiminlian Lengen, CEO/ADCC leh Chairman of SVEEP core committee in vaidawn thugen hi. Central Aware­ness Observer Shri Kripa Shankar Yadav, IIS in hiai hun special guest hihna toh uap in EVM Familiari­sation Awareness toh kisai gen in tuailaite lak ah vote khiak dingdan sinsak hi. Hiai hun zatna ah ZEO/ Ccpur in kipahthu gen hi.

 

 

LJP in candidate list suahkhia

IMPHAL, Feb 8: Hong tung ding Mani­pur Legislative Assembly election a ding in Lok Jana-shakti Party (LJP) in party office Babupara, Imphal ah a khatveina ding in media-te’ ma ah candidate list, 11 suah­khia hi.

 

Hiai candidate list ah MLA Karam Shyam, Langthabal constituency, Takhellambam Samanan­da, Keirao constituency, Konthoujam Monoran­jan, Naoriya Pakhan­glakpa constituency, Wungshim Angkhang, Phungyar constituency leh Northington, Ukhrul constituency te hi uhi.

 

 

Ccpur district ah mi 19 in nomination form lata

LAMKA, Feb 8: March 4 leh 8, 2017 chiang a 11th Manipur Legislative Assembly election om ding toh ki­sai a zan a election noti­fication suahkhiak ahih toh kiton in tuni, Feb 8, 2017 tan in Ccpur dis­trict sung a AC 6 a ding in intending candidate 19 in a kisaipih Return­ing Officer-te a pan in nomination form la uhi.

 

Huaite ahihleh 55-Tiapimukh AC a di’n Ngurivung, IND; Dr. Chaltonlien Amo, INC; Dr. L. Fimate, BJP leh Ngursanglur, IND.

 

56-Thanlon AC a di’n Vungzagin Valte, BJP; Thangkhangin Ngaihte, LJP leh Dr. Chinkholal Thangsing, INC.

 

57-Henglep AC a di’n T. Manga Vaiphei, INC; TT Haokip, BJP; Mangcha Thangjom, IND.

 

58-Ccpur AC a di’n Phungzathang Tonsing, INC; V. Hangkhanlian, BJP; C.T. Lian Guite, IND; Dr. DK Mang, IND; Khamminthang, IND.

 

59-Saikot AC a di’n TN Haokip, INC.

 

60-Singngat AC a di’n Chinlunthang, BJP; Henlianthang Thanglet, IND leh Ginsuanhau, INC hi uhi.

 

Nomination form la intending candidate-te’n a submit hunchi­ang un Rs 5,000/- toh a piakkhawm uh ngai ding hi. Ccpur district sung a AC sung 6 a nomina­tion form laktheihna leh piaklutna ding munte ahihleh 55-Tipaimukh AC leh 56-Thanlon AC a di’n ADC/CCPur (RO), 57-Henglep AC leh 60-Singngat AC a di’n ADC/Pherzawl(RO), 58-Ccpur AC leh 59-Saikot AC a di’n DC/ DEO (SDO/Ccpur) (RO) hiding hi.

 

 

Irom Sharmila in Khurai AC nusia in Thoubal AC kia ah tuh ding

IMPHAL, Feb 8: Manipur Human rights activist Irom Sharmila in maban a Manipur assem­bly elections om ding ah amah kipatna constituency nusia a Thoubal AC kia a tuh ding ahihdan gen hi. Sharmila in a genna ah, lemtanlouhna khenkhat om ziak in Khurai constituency a election tuh ding ka tawpsan chi hi. Khurai AC a nutsiat ziak ahihleh election campaign a, a inn uh pansan theilou ding chih ziak hi a, aman Armed Forces (Special Pow­ers) Acts (AFSPA) lakkhiak ahihma a nu mel mulou ding in ana kichiamta hi.

 

Sharmila in a genzelna ah, tulel in tenna inn inn ka neikei a, Khurai a elec­tion campaign ka neihlai inleng pansan tuambik neilou in mun tuamtuam ah ka kisuan chi hi. Hiai bang a mun tuamtu­am a, a kisuan ziak in amah gumtute’n vasa bang a omna mun neilou a hiai bang a na kisuansuan in bangchi’n nang a di’n campaign i bawlthei ding ua hon chi uh chi’n Sharmila in gen hi.

 

Kum 44 a upa Sharmila in ahihleh kum paisa in amah omna constituency Khurai leh tulel a Chief Minister O Ibobi Singh ai-oh Thoubal AC a election tuh ding ahihdan ana puangta hi. Huai nung October 2016 in political party khat People’s Re­surgence and Justice Al­liance (PRJA) kichi phut­khia hi.

 

Thoubal AC sung a election campaign a bawl toh kisai a genna ah, bicyle a tai a Thou­bal AC sung a election campaign bawl ahihdan gen hi. Aman a genna ah, Congress in kum 15 sung vaihawmna a letnung a mipite’n kikhekna lung­gulh leh politics lam a hiai bang a lut numei omsun ahihman a mipi’n pakta uh hidan inleng gen hi.

 

CM Ibobi ahihleh Thoubal constituency ah a kizom in thumvei telching hita a, mipite nungthuapna leng ngah mahmah hi. Himahleh Sharmila in bel ching ding ahihdan kimuangn­gamtak in gen hi. Elec­tion kichi thagum hat ziak leh sum hauhziak a chin ahikei a, tuailaite lungsim ah principle leh ideology lam ah khanloh­na a omta chi’n Sharmila in gen hi.

 

 

Morgue a thumna neihnung kum 1 chinna zang

LAMKA, Feb 8: Tribal Movement tung­tang a Salphate luang omna mun District Hos­pital morgue ah All Tribal Women Union (ATWU) GHQ makaih a thumna neihnung kum khat chin­na tuni, Feb 8, 2017 sun­ma dak 11:00 in zatna om hi. Hiai hun Liannem in makaih a, recording Secy. in Miss Zualte pang hi. Nu Gouzavung makaih in thumna om a, Nu Manngaihkim makaih a slogan samna om in Pas­tor M. Ginzatun in thum­na in hun pan hi.

 

Tua zoh in ATML makaih in Salphate sunna om a, Nu Nian­glian, President, ATWU in keynote address gen hi. JACAATB Chief Convenor inleng hiai hun a thugen ding chih himahleh Delhi a, a zin ziak in teltheilou a, YPA-GHQ Preisident leh Mrs. Ramthienglhim, Vice President, ATWU in thugen ua, Rev. N. Pum­suanmung a pan Living Message om hi. Hiai hun zatna ahihleh lasa tua­mtuam inleng uap in lasa uhi.

 

 

North East India Development Party (NEIDP) in candidate list puangkhia

IMPHAL, Feb 8: North East India Develop­ment Party (NEIDP), re­gional party in tuni in Ma­nipur assembly poll, phase 2 a ding candidate list 10 puangkhia hi.

 

Hiai political party tup-leh-ngim ahihleh Gan­dhi sulnung zui a North East ah bang lam peuh ah ‘democracy’ vaihawmna hi ding hi.

 

Congress leh BJP in constituency teng a ding candidate list puangkhe khin vekta uhi. Cangress in a kizom in Manipur ah term 3 sung thuneihna len ta ua, Assembly election nanung pen, 2012 a neihna ah Congress in seat 42 toh vualtung tuanna ngah hi.

 

Chief Minister, Okram Ibobi Singh in leng Con­gress ticket in ah Thou­bal constituency, ah ‘Iron Lady’, Irom Sharmila toh kituh ding uhi. Hill district te ah, a diak in Naga area ah, Congress in mipite’ kithuahpihna tasam deuh a theih in om hi.

 

 

 

 

 

NEWS TOMKIM

 

Ccpur College ah training ding

LAMKA, Feb 8: March 4 leh 8, 2017 chiang a 11th Manipur assembly election om ding toh kisai a Ccpur district sung a polling personnel dia guan a om mi 1528 in zingchiang, Feb 9 a kipan in Ccpur College, IB Road ah training pan ding uhi.

 

 

Jan. in gari thak 115 kibehlap

LAMKA, Feb 8: District Transport Office Ccpur ah January 2017 sung in gari thak 115 registratin bawl ua, huai tungtawn in revenue collection Rs. 10,03,334/- mukhia uhi. January khasung a gari thak kibehlapte ahihleh Heavy Truck 1, Truck (LGV) 4, Diesel Auto 6, Van 5, Car 22, Jeep 6, Activa/Scooter 71 ahi. Huailou in, April 2016 a pan January 2017 tan, kha 10 sung in Lamka ah gari tuamtuam 1,104 in kibehlap zou hi.

 

 

Mission Indradhanush Phase IV hongkhia

LAMKA, Feb 8: Tuni sunnung dak 1 in DFWO/ Ccpur Conference Hall ah Dr. Kim Simte, CMO/Ccpur in chief guest hihna toh Mission Indradhanush Phase-IV, 2017 first round hongkhia hi. Hiai hun ah special guest in Dr. J. Son GoKham, MS, District Hodpital Ccpur; Sarat Yadav, Sr. Project Officer, UNDP; Dr. Nanda Kishore, SNO, UNDP leh Rome Hiyam, Recourse Officer pang uhi. Hiai hun ah CHC & PHC a pan Medical Officer leh nurse hunkhop tel uhi.

 

 

SP/Ccpur makaih security meeting nei

LAMKA, Feb 8: Tuni sunnung dak 4 vel in SP/Ccpur Office a Conference Hall ah SP/CCpur makaih in maban a assembly election om ding toh kisai a security personnel allocation tungtang meeting nei uhi. Hiai hun ah BSF Officerte, SDO/BDO-te leh EE/PWD, EE/PHED, EE/Electric a pan officialte tel uhi. Hiai hun ah security-te omna leh giahna ding toh kisai leh meivan ban ah dailenbuk toh kisai genkhawm uhi.

 

 

SUNNA:

Mrs Tomnu m/o Mrs Ngaihvung of Lower Chapellane, Hiangtam Lamka, tuni, Feb 8 in si a, tuni mah in Lamka hanmual ah kivui hi. RIP.

Baby Chinglunkim (4) Upa N. Chinzabiak of Zoar Veng, Bungmual, tuni sunnung dak 1 vel in Lamka Damdawi Inn ah si a, zingchiang, Feb 9 in Bungmual hanmual ah kivui ding hi. RIP.

 

 

 

 

 

 

 

…for more detail : here