You are here: HomeRSS FeedsThe Lamka Post

The Lamka Post | November 14, 2016

Monday, 14 November 2016 19:03

Nov 15 a pan Class a telta di’n MUTSU in theisak

LAMKA, Nov 13: Information & Publicity Secy., Manipur Universi­ty Tribal Students’ Union (MUTSU) in tuni, Nov 13, 2016 a thusuah a bawlna ah, All Tribal Students Union Manipur makai­hna nuai a tribal student-te’n Manipur University a seat reservation toh kisai a constitutional rights ngen a kha 2 phial kiphi­nna a neihsung ua kithu­ahpih tribal mipite leh pawlpi tuamtuamte tung ah tung ah kipahthu tak­lang hi. Mipite kithuahpi­hna leh tawsawnna ziak a tunitan kipumkhatna toh kiphinna paitou thei ahi­hdan leng taklang hi.

 

Himahleh seat res­ervation thubuai toh ki­sai MU thuneitute toh genkhawm ahihnung a genveng hita leh MU Vice Chancellor inleng tribal student-te lungkimlouh­na leh haksatnate etkai­pih a ST reservation 31% paipih hiding a chiam hi’n taklang hi. Tua toh kiton in MUTSU in November 15, 2016 a kipan tribal student-te University a kiknawn ding leh class a tel ding in theisak hi. Hiai toh kisai in zingchi­ang, November 14, 2016 sunma dak 10 a tribal stu­dent teng Adimjati Hostel Complex a kingakkhawm ding leh huai a kipan MU huangsung lutkhawm vek ding inleng theisak hi.

 

Huailou in, ATSUM/ MUTSU in theihsakna a bawl ngaihsaklou a, MU hostel a om den leh class lakna a tel tribal student-te November 20, 2016 sunma dak 11 tan a AT­SUM office a ki-report chiat ding leh theihsakna ngei ngaihloute tung a ‘action’ khauhtak lak hid­ing hi’n leng Information & Publicity Secy., MUT­SU in taklang hi.

 

 

Centre in kihouna nei di’n UNC chial; SSUM in ‘Mass Counter Blockade’ patsawm

IMPHAL, Nov 13: Manipur a buaina (eco­nomic blockade) pailel toh kisai in Government of India in kihouna nei dia United Naga Coun­cil (UNC) chial ahih­dan muanhuaitak a pan thusuak in taklang hi. Himahleh Govt of India a pan chialna om pen UNC in bangchibang a dawnna pe ding leh bang thupuk­na bawl ding hiam chih bel theihchet hinailou hi.

 

Economic Blockade ziak in niteng in Ma­nipur mipite haksatna uang deuhdeuh a, niteng in thautui man khan­lam manoh hiaihiai hi. District thak bawlkhiak ding deihlouhna in UNC in hunchiam omlou in National Highway-te ah economic blockade bawl a, tua ziak in state sung a thautui zuakna munteng kikhak in Imphal ah pet­rol litre khat ah Rs 250- 300 kikal in bazar ah ‘black’ in kizuak hi.

 

UNC in ahihleh Ma­nipur Govt in Sadar Hills tungtang a Memoran­dum of Understanding (MoUs) 4 bawl a omte a thu leh a tak (letter and spirit) a zahtak ding in deih hi. Sadar Hills toh kisai a MoUs suaikai a omte ahihleh December 14,1981 in Government of Manipur leh ANSAM in kilemna suaikai ua; November 10, 1992 in Government of Mani­pur leh Naga Students’ Federation(NSF) in suai­kai in; September 27, 1996 in Government of Manipur leh UNC & AN­SAM in kilemna suaikai nawn ua, June 23,1998 inleng Naga pawlpite’n Government of India toh kilemna suaikai uhi. Huai ban ah November 24, 2011 in Ministry of Home Affairs (MHA), Govern­ment of India in district thak bawlkhiakna ding a Nagate’n pupa a pan a luahna gam uh inch 1 lel leng hetkhak ahihlouh ding chih gelhthoh in ana peta hi.

 

Thusuak in a taklat­na ah, Manipur Govern­ment in tulel a Manipur in buaina a tuah toh kisai a Indo-Naga peace talks a interlocutor R N Ravi kigolh ding a ngen ahih­dan leh UNC in hunchiam omlou a economic block­ade a bawl a baihtheipen a lakkhiak ahihna ding a Ibobi Singh Gov­ernment in R N Ravi ki­ang ah panlakpih ding a ngen hidan in taklang hi.

 

Tunaizek a “Emer­gency United Naga Council (UNC) Presi­dential Council Meeting’ ah All Naga Students’ Association, Manipur (ANSAM), Naga Women Union (NWU) leh makai tuamtuam in tulel a in­definite economic block­ade bawl a om khauhsak sem hiding leh Trans Asian Railways bawlna ban ah Naga area sung a National Projects om­teng leng khak (ban) hiding in thupuk uhi. Huai ban ah Nagate’n a gam leitang tung ua rights a neihte uh, iden­tity, history, tradition, culture, custom chihte mansuahna dia kuamah toh kilemna bawllou ding leh district dang bawlkhiak ding ahihle­leng Nagate luahna a hetkhaklouh ding chih Government of India a kipan gelhthoh a thuchi­am om ma economic blockade khawlsanlou ding uh ahihdan namkip thak uhi. A ziak ahihleh Nagate’n huituam nei Government of Mani­pur toh kilemna tamtak bawlta mahle uh huaite zahtak ahihlouh ziak in Government of India a kipan gelhthoh a thuchi­am ngiat uhi. Manipur Government in Sadar Hills leh Jiribam sub division full fledged dis­trict a puankhiak a sawm ziak a UNC in hunchiam omlou a NH a economic blockade a bawl ahi hi.

 

Tua bangkal ah, So­cialist Students Union Manipur (SSUM) in tuni a thusuah a bawlna ah, zingchiang, November 14 tan a UNC in ‘eco­nomic blockade’ a lakkh­iak keileh ‘mass counter blockade’ pan ding uh hidan in vauna thusuah bawl uhi.

 

Zan inleng Imphal- Ukhrul road ah Imphal East district sung Khurai area a pawlpi khenkhat makaih in ‘indefinite counter-blockade’ pat in om hi. Khurai Kon­sam Leikai a nupi khat in a genna ah, UNC in National Highways tegel a economic blockade a lakkhiak mateng ‘coun­ter-blockade’ khawlsan hilou ding hi’n gen hi.

 

 

Inter-State Bus Terminal zat hita: State transport minister in bus khahkhia

IMPHAL, Nov 13: State transport minister Dr Kh Ratan Kumar in ISBT Imphal a kipan a masapen ding a, passen­ger bus khat a khahkhiak toh kiton in, tuni Pathi­anni a kipan in Khuman Lampak, Imphal mun a kibawl Inter-State Bus Terminal kichi official a zat hita ding in honkhiak hita hi.

 

Centre a UPA vai­hawm hunlai a UPA Chairperson Sonia Gan­dhi theihpihna toh PM Dr Manmohan Singh in December 3, 2011 a, a honkhiak ISBT kichi, tuni a nasem thei ding a bawlkhiakna ding in, kum 5 sung lut hi. Himahleh honkhiak a hihzoh in, state in termi­nal poimohna liantak nei mahleh state government in kum 5 sung zunlouh in nusia hi. Tuni a bus khah­khiakna hun ah, trans­port department official-te leng tel uhi.

 

 

PCS makaih in Paite Dress Code hongkhia

LAMKA, Nov 13: Zan, November 12, 2016 in Paite Cultural Soci­ety (PCS) in Paite Nam­puan pasalte silh ding a bawl uh sunma dak 11 in YPA-GHQ Hall, Hiang­tam Lamka ah honna, latna leh hawmkhiakna om hi. Hiai hun zatna N. Ginzakham in makaih a, Rev. G. Haukhomang in thumna a hun pan in L. Nengkhopau, Director, PCS in vaidawm thugen hi.

 

Langkhanpau Guite, Chairman, ADCC in khuallian hihna toh hiai hun uap a, Inpipa a L. Pumlianpau, President, PTC-GHQ pang in T. Singneng, Ex-President, PTC-GHQ; C. Hangshing, President, PLS; T Khaili­anthang, President, YPA-GHQ leh Nangmuansang Lethil, General Secretary, SSPP-GHQ in Intekpa, Thallouh, Thusapi leh Tanupi hihna toh hiai hun uap uhi.

 

TP Sianzaneng, Trea­surer PCS in nampuan pulak in, Inpipa L Pum­lianpau Ngaihte, Presi­dent, PTC-GHQ in nam­puan hongkhia a, Rev. S. Vung Minthang, General Secretary, EBC in Pathian min in nam­puan laan hi. Hiai hun ah Dr. Tualchin Neihsial, T. Singneng, Ex-President, PTC-GHQ, C. Hangsh­ing, President, PLS, T. Khailianthang, Presi­dent, YPA-GHQ, Nang­muansang Lethil, Gener­al Secretary, SSPP-GHQ leh MDC-te’n thugen uhi. Honkhiak a om pasal silh ding nuampuan ahihleh mipi leitheih ding a zuak in om ngal hi. 

 

 

Healthy Baby Show om ding

LAMKA, Nov 13: November 16, 2016 sunma dak 10 a kipan in Lamka Damdawi Inn huangsung ah NHM, Ccpur saina in ‘Healthy Baby Show/Competition 2016’ om ding hi. Hiai Healthy Baby Show ahi­hleh category thum: 6 Months - 11 months; 12 months - 23 months leh 24 months - 36 months in kikhen ding hi.

 

Hiai Healthy Baby Show a kipahmante Ma­nipur pumpi a, a kibat theihna ding in kipah­man in 1na, 2na leh 3nate kiang ah sumtang in Rs 3000/-, Rs 2000/- leh Rs 1000/- chiat piak hiding uhi. Hiai com­petition siangthoutak a sai ahihtheihna ding in Health & FW Employee-te’ tate hiai competition a, a tel uh phal hilou ding hi.

 

Category teng a pan khatnate kia November 19, 2016 chiang a State Level Healthy Baby Show a tel ding a sawl hiding uhi. Hiai compe­tition a tel utte’n MCP Card/Immunization Card, Birth Registration Certificate leh Village Authority/District a pan Residential Certificate tawi ngai ding hi. 

 

 

Black market ah petrol litre ah Rs 250 in zuak in om

IMPHAL, Nov 13: IOC Imphal a Petrol Oil leh Lubricants (POL)-te ‘dead stock level’ tan sukha a, a kiamsuk toh kiton in, tuni Pathianni in Imphal khopi sung a dawr neu chikchikte ah black market in petrol litre khat Rs 250 tan in zuak in om hi.

 

Buai liantak nih- UNC indefinite eco block­age leh Rs.500 leh 1000 note sihsak a omte ziak in, Imphal kongzingte leh bazar munte hawmthei mahmah hi. Himahleh Imphal khopi sung Bank-te’n tatsatlou in nasemtou den uhi. Report in a tak­latdan in, Imphal kim ah petrol man litre ah 300 – 400 kikal in khang hi. IOC official-te’n Imphal a Petrol Oil leh Lubricants (POL) poimoh omte lak­lutna ding in, CAF & PD Commissioner kiang ah security convoy sai ding in ngetna bawlkhinta uhi.

 

Chingmeirong depot, Imphal ah stock a dead stock level sukha phial a Motor Spirit (MS) 133 KL lel a om ziak in, Indian Oil Cooperation in November 10 a kipan in mipite kiang a hawmzak ding in MS suahkhiak ding khawlsak hi. Nil stock ziak mah in Nov 7 a kipan in Sekmai- BP Bottling khawlsak in om khinta hi. Himahleh High Spirit Diesel leh Superior Kerosene Oil-te a hihleh ngeina bang in supply in omtou denlai uhi.

 

 

Dawn School in Children’s Day zang

LAMKA, Nov 13: The Dawn School in zan, November 12, 2016 sun­ma dak 10 a pan in amau School Campus, Thing­kangphai ah ‘Childrens Day’ zatlokna dan in pro­gram zang uhi. Hiai hun ah student-te’n khutsiam silbawl (arts and craft) ban ah painting tuamtuam a bawlte uh lak ua, kimawl­na chituamtuam kimawl in, naupangte gam tua­mtuamte (China, Japan, Korea leh Malaysia) nam­puan in kizem uhi.

 

Huailou in, Class III a pan IX student-te’n stall (nektheih zuakna) bawl ua, amau khutsuak nektheih chituamtuam a bawlte uh nu-le-pate nek di’n zuak ua, huai a sum a muhte uh November 14, 2016 a ‘Childrens Day’ chiang in Lamka Dam­dawi Inn a Children Ward a naupang damloute veh­na in zang ding uhi.

 

 

Manipur State Level Sikpui Ruoi 2016 zang ding

LAMKA, Nov 13: Hongtung ding Decem­ber 13, 2016 in Saikot ah Manipur State Level Sik­pui Ruoi 2016 zatna om ding hi. Hiai ding toh ki­sai in zan, November 12 in Organizing Committee in HSA Hostel, Rengkai ah Joseph R. Hmar, Con­venor leh Alan Famhoite, Secretary (Administra­tion) makaih in meeting nei uhi.

 

Hiai hun program zat dingdan tangpi bawl­fel ua, huai ban ah Sikpui Pa ding in H.K. Joute, 1st President, Hmar Inpui, Gen. Hqrs. (Hmar Supreme House), Chief Guest in Lalbiak­zuala, President, Cen­tral YMA leh Guest of Honour in Lalsangzula Ngente, President, MZP Gen. Hqrs. chial ding thupuk uhi. Huai ban ah December 13 nitak inleng program om ding a, huai ah chief guest in MC Mary Kom, MP (Ra­jya Sabha) pang ding hi.

 

Hiai hun ah Tra­ditional Fashion Pa­rade, Cultural items leh lapawl, solo leh a dang­dang om ding hi. Mani­pur State Level Sikpui Ruoi 2016 ahihleh “Fes­tival of Brotherhood: Back to the roots” chih thupi zang a zat hiding a, hiai hun zatna ahihleh Mizoram a kipan inleng lasiam tuamtuam in uap ding uhi. 

 

 

Pasal naupang hangsan luang ni 3 nung in mukhia

IMPHAL, Nov 13: Ni 3 vel paita a, Imphal lui a nupi khat leh a ta hutkhiak sawmlai, buai­sia a tuilak a tummang kum 14 a upa pasal nau­pang hangsan Loukrak­pam Rajeshwori tuni Pathianni in Manipur Arong Lairembi lui kiang ah tuitung a kilamkhia in, kaihkhiak in om hi.

 

November 10, 2016 a Loukrakpam (O) Kebisa­na, kum 3 a upa a tanu leh sihna tuak Rajeshwori-te’n Arong Mayai Leikai a Manipur lui kantan sawm a sing a kibawl lei a zuih­lai un, kum 3 a upa Kebi­sana kipuk in, lei a awng­kal ah kia in tuilak tu hi. Tuileuh theilou a nu uh Kebisana in tuikia a tanu hunkhe ding in, lui ah tawmkhe suk hi. Rajesh­wori inleng buaitak a om nuta hunkhe ding in tui ah tawmkhe suk a, nu­tate hinna va hunkhia in amah tuahmang hi.

 

 

MHJU & DIPR saina in ‘One Day Seminar’ nei

LAMKA, Nov 13: Zan, November 12, 2016 sunma dak 9:30 a kipan nitaklam dak 4 tan Hotel Imphal ah Manipur Hill Journalist Union saina leh Directorate of Infor­mation and Public Rela­tions, Govt of Manipur sponsored-na in, ‘Role of Media for Development in the Hill Areas of Ma­nipur’ chih thupi zang in ‘One Day Seminar’ om hi.

 

Hiai hun ah chief guest, guest of honour leh special guests in O Ibobi Singh, Chief Minister; Gaikhangam, Dy. Chief Minister; Ahongsangbam Mobi, President, Editors’ Guild; Wangkhemcha Shamjai, President, All Manipur Working Jour­nalists’ Union leh Megha­chanchandra Kongbam, Director, DIPR, Govt of Manipur pang uhi. Huai ban ah I Hemochandra, Minister (Forest and Revenue) inleng hiai hun zatna uap hi.

 

Seminar kipatma in Hotel Imphal huangsung ah Chief Minister, Dy Chief Minister, President, Editors’ Guild leh Presi­dent, AMWJU in singnou suan uhi.

 

Hiai hun ah Mr Ramkung Pamei, Vice President, Manipur Hill Journalist Union vaid­awn thu gen hi.

 

Chief Minister in mipi vaihawmna gam a ‘fourth estate’ chih a om press leh media hi a, Govt leh mipite kal zomtuahtu leng press/media ahih­man in gamsung bawlhoi­hna ding leh khantouhna ding a press/media lam in poimohna liantak nei ahihdan gen hi. Huai ban ah Manipur Hill Journal­ist Union in a poimohte uh kisuanglahlou a gen ding leh panpih ding a Govt kimansa a om gige ahihdan leng gen hi.

 

Dy Chief Minister in a genna ah, Manipur a tengkhawm nam tuamtu­amte lak a kipumkhatna omna ding a Press/Media-te’n khentu­am neilou a panlak a, kip­umkhatna, kituahna leh lemna omna dia panlak poimoh ahihdan gen hi.

 

John Basco, Edi­tor, The Herald Today in Technical Session-I makaih a, Dr A Ibomcha Sharma, News Editor, AIR, Imphal in ‘Role of electronic media for the development in the hill areas of Manipur’ chih thupi zang in sinsak hi.

 

Agui Kamei, Core­spondent, The People’s Chronicle in session-II makaih a, ‘Mrs Valley­rose, Editor, The Aja in, ‘Role of Print Media for the development in the hill areas of Manipur’ chih thupi zang in sinsak hi.

 

Mr Addie Chiphang, Editor, The Dawn Tan­tak in Session-III makaih a, Mr Sobhapati Sonam, Correspondent, The As­sam Tribune in, ‘Role of electronic media for the development in the hill areas of Manipur’ chih thupi zang in sinsak hi. Tua zoh in Sothing Shim­ray, President, MHJU in kipahthu gen in hiai hun zatzoh in om hi.

 

 

Imphal-Ukhrul road ah hunchiam omlou counter-blockade kipan

IMPHAL, Nov 12: Sadar Hills leh Jiribam district bawlkhiak sawm a om tungtang a United Naga Council in hun­chiam omlou a national highway-te a economic blockade a bawlnung ni 12 chinni zan, November 12 sunnung a kipan in Imphal East district sung Khurai area ah pawlpi khenkhat makaihna in Imphal-Ukhrul road ah ‘indefinite counter-block­ade’ kipan hi.

 

Khurai Konsam Leikai a nupi khat in a genna ah, UNC in Na­tional Highways tegel a economic blockade a lakkhiak mateng ‘coun­ter-blockade’ khawlsan hilou ding hi’n thuthak­saite kiang ah gen hi.

 

October 30, 2016 zankim a kipan economic blockade kipan tunitan a paitouh ziak in state sung ah thautui tel in niteng poimoh tuamtuam tak­sapna lian mahmahta hi. Allu Kg 1 in Rs 40 manta a, thatui leng ‘black’ in bazar ah Rs 250-300 ki­kal a zuak in om hi.

 

Huai ban ah state sung a thautui zuakna munte thautui omlouh ziak a, a kikhak vek ziak in All Manipur School Students Tranporters’ Association in service khawlsan ua, tua ziak in school tamtak in ‘holiday’ puang uhi.

 

Mipi lam a kipan in blockade khawlsan ding a ngetna om mahleh UNC in kiphinna khauhsak sem hiding a thupukna a bawl ziak in buaina uang semsem ding in kilang hi. UNC in ahihleh Mani­pur government in Sadar Hills leh Jiribam full-fledged revenue districts a puankhiak a sawm dei­hlouh taklatna a kiphinna a neih ahi ahi.

 

Zan a Imphal-Ukh­rul road a ‘indefinite counter-blockade’ kipan ah, Imphal a kipan Ukh­rul district zuan a pai van poimoh pua garite Khurai Konsam Leikai ah thagum a khawlsak hi ua, huai ah YOS Club, Khurai Konsam Leikai, AWON Lup Khurai Kon­sam Leikai Chaokhat Khongthang Nupi Lup a pan volunteer-te’n gari tuamtuam a pan van puak a omte lakkhiaksak in paizak uhi.

 

Counter-blockade ahihleh hill district zotna lampi teng a leng pat hiding hi’n kigen a, Imphal West district sung Khoyathong area ah leng nupi pawlkhat in Senapati district zuan garite khawlsak in, gari in a puak van tuamtua­mte lakkhiaksak uhi.

 

 

 

 

 

 

NEWS TOMKIM

 

Rs 100 & 2000 Note Lamka hongtung

LAMKA, Nov 13: Zan, November 12, 2016 in SBI/ Ccpur Main Branch ah Rs 100 leh Rs 2000 note thak hongtung a, Rs 100 note-te ATM ah koih mahle uh hun sawtlou sung in beipah hi. Rs 2000 note thakte ahihleh tulel a ATM machine kizangte toh a kituahlouhna om ziak in ATM a koihthei nailou uh hidan in thutut kingah hi.

 

 

Die-in-Harness Forum phutkhia

LAMKA, Nov 13: ADC Ccpur nuai a semtute’n tuni, November 13, 2016 in ‘Die-in-Harness Forum’ phutkhia in 2016-17 sung a Convenor ding in kituaktak in Mr Ginzakham guang ua, aman Die-in-Harness toh kisai a case pending omteng leng Forum sik-le-tang in saitou ding hi.

 

 

Dansiangthou in kiteng ding

LAMKA, Nov. 13: Miss Jenny Chingnunmuang d/o Upa Zamlian leh Mr. Francis Khupthanlian s/o G. Mangkhenpau, hong tung ding 17th November 2016 chiang in Saptuam dan siangthou in kiteng ding uhi. Hiai toh kisai in Upa Zamlian in a tanu 2na pasal nei ding khakna programme YMA Hall, Hmuia Veng, Lamka ah 16th Nov 2016 sunnung dak 1 in khakna programme nei ding hi.

 

 

Tuailai 1434Pro saina in Workshop nei

LAMKA, Nov 13: Tuailai 1434Pro saina in November 11-13, 2016 sung EBCC Dorcas Veng, New Lamka ah, ‘Mega Workshop’ om a, tuni nitak in zousiang uhi. Tuni, November sunnung dak 1 in Rev. K. Kamchinkhup, DS, EBC Imphal Division in, “Christianity & Politics” chih thupi zang in sinsak hi.

 

 

SUNNA:

Khuphang (78) f/o Dr. Ding Tombing of Vengnuam South, New Lamka, zunkhum ziak in tuni sunma dak 11 in si a, tuni mah in New Lamka YPA hanmaul ah kivui hi. RIP.

 

Lalkhoniang (95) w/o (L) Hanggin of Nehrumarg, Lamka, teknat ziakin zan zinglam 12-11-16 zinglam dak 5:00 vel in si a, zan mah in kivui hi. RIP.

 

Kimkhonem @ Nema m/o Ginjangam Neihsial of Kangpokpi in damlouhna ziakin zan 12-11-16 zinglam dak 4:30 vel in si a, zan mah in kivui hi. RIP.

 

 

 

 

…for more detail : Here

 

 

 

 

RELATED

THE LAMKA POST | NOVEMBER 12, 2016