You are here: HomeRSS FeedsThe Lamka Post

The Lamka Post | September 17, 2016

Saturday, 17 September 2016 16:43

AP CM leh MLA 43 in Congress nusia in People’s Party of Arunachal Pradesh zom

Itanagar, Sept-16: Arunachal Pradesh state Chief Minister Pema Khandu leh Congress MLA 43 in zan nitak nung in a omna party uh Congress nusia in Peo­ple’s Party of Arunachal Pradesh (PPA) zom uh a, Congress government dinglai pen PPA govern­ment suak sak uh hi’n offi­cial thusuak in taklang hi.

 

Congress MLA nut­siat a om sun ahihleh Nabam Tuki hi a, party sung a kiphinna khenkhat a om ziak a July 2016 a Congress government dinkhiak sak a om nawn hun a Chief Minister len ding lai amah mun ah Pema Khandu guan in om hi. PPA party a CM leh MLA dang 43 a lut nung in PPA in BJP zom ding hiam chih bel hiai thu kaihkhawm tan in thuchian omlou hi. PPA ahihleh North East bial a non-Congress party teng election toh kisai a pang­khawm dia kikhaikhawm­na North East Democratic Alliance (NEDA) kichi apaisa May 24, 2016 a kibawlkhia a member khat hi a, BJP ah indirect a lut chih theih dinmun ah om veve hi.

 

Arunachal Pradesh state assembly ah tulel in MLA 60 om lak ah BJP in member 11 nei in inde­pendent leng 2 om uhi. AP state ah apaisa January 2016 a President’s Rule koih a om nung in Kalikho Pul makaihna nuai ah gov­ernment dinkhiak sak in om a, himahleh July 2016 in Supreme Court thutanna bang a Congress government dinkhiak sak a om thak nawn nung July 13, 2016 in Chief Minister hihna apan kitawp di’n Kalikho Pul phutluih in om a, CM apan a kitawp nung Au­gust 9, 2016 in kikhailum zawmah hi.

 

Arunachal Pradesh a Congress party MLA te’n party nusia a People’s Par­ty of Arunachal Pradesh (PPA) a zop toh kiton in North East bial a Con­gress vaihawmna state 4 apan 3 in kiamsuk a, huaite ahihleh Manipur, Mizoram leh Meghalaya state hi uhi. Union Min­ister of State for Home Kiren Rijiju in tuni a New Delhi a thuthsaite toh a kihouna ah Arunachal Pradesh ah Congress government om nawnlou ahihthu gen hi. Aman a genna ah MLA te’n Con­gress a nutsiat nop ua leh midang in bang I gen thei dia chi kawm in Supreme Court in leng Arunachal ah Congress government dingkhe sak thak a, hile­leng MLA-te deihtelna thutawp hita hi’n gen hi.

 

 

AMWJU 43RD FOUNDATION DAY:

Gambuai hiaizah lak a Journalist sep pen mipi a dia kipiakna diktak ahi: CM

Imphal, Sep 16: Tuni, Sintawpni in Ma­nipur Press Club ah All Manipur Working Jour­nalist Union (AMWJU) 43rd Foundation Day zatna om hi. Hiai hun ah chief guest, president leh guests of honour in Chief Minister O. Ibobi Singh; AMWJU President Wangkhemcha Sham­jai; veteran journalist A. Madhumangol leh Direc­tor Information and Pub­lic Relations Meghachan­dra Kongbam pang uhi.

 

Hiai hun a Chief Minister in a genna ah, Manipur kichi ‘complex society’ mahmah hi a, nam (tribes) tuamtuam 30 val tengkhawm hi’n gen hi. Nam tuamtuam tamtak tenkhawmna mun ahih dungzui in nam khat in amah kip­atna nam ngaisang in huai ding in theihtawp a pang in nasem a, hiai bang a ‘complex society’ lak a journalist semte tuh mipi a dia kipiakna dik­tak neite ahi uh chi hi.

 

Huai ban ah press tellou in society in khovak mu­lou ding a, huaiziak mah in press kichi society a dia khuam poimoh 4na (fourth pillar) chih a om ahihdan gen in press in mipite leh khotang lampi dik a pi hi’n gen hi. Tua ban ah journalist-te ham­phatna ding a bangkim a kithuahpih ding leh a poimoh bang a gov­ernment in panpihna pe ding ahihdan leng Chief Minister in gen hi.

 

Chief Minister in a genzelna ah, tuma a Directorate of Informa­tion and Public Relations inntekna a government department teng in press conference a neih leng government leh mipite kal a kizopna taklangtu ahihban ah maban a leng saitouh zel dia hoih ahih­dan gen hi.

 

M e g h a c h a n d r a Kongbam, Director, DIPR in a genna ah, teacher-te’n naupangte a sinsak bang ua press in mipite lak a thuthak leh thu po­imoh theisak ahihdan gen hi. Huai ban ah nidang banglou in tuni chiang in AIR Imphal ah houlimna hun bang om a, local TV channel-te ah mipite hak­satna tuamtuamte taklat leh genkhawm a omtheita ahihman in huaite tung­tawn a mipite lak a buaina omte hihveng zel a om hidan in gen hi. Huai ban ah DIPR in journalist-te hamphatna ding leh jour­nalism khantouhna dia scheme tamtak pankhia hidan in gen hi.

 

 

 

EBC/LSD Missions Khawmpi kipan

LAMKA, Sep 16: Tuni, September 16, 2016 nitak dak 6 in EBCC Dorcas Veng ah Lamka South Division Missions Khawmpi 10veina kipan a, September 18, 2016 in zou ding uhi. Hiai hun ah, ‘Gam lak ding tampi a omlai” [Joshua 13:1] chih thupi zang in Rev V Thangkhan-gin, Director of Missions, EBC; Rev V Nenglian, DS/LSD, EBC leh Rev T Thangzasiam, Field Supt., Dhemaji Mis­sions Field, EBC in thu­gen ding ua, Rev Ginmal­sawm, Director, Social Development, EBC in Bi­ble Study makaih ding hi.

 

Tuni, September 16 ni­tak dak 6 in DS/LSD, EBC in Khawmpi hong a, Upa N Vungzathang, Vice Chair­man, DMC in vaidawnthu gen in Director of Missions, EBC in thugen hi.

 

Zingchiang, Septem­ber 17 sunma dak 10 in mipi biakna kikhop om ding a, huai ah DS/LSD, EBC in thugen ding hi. Kiginni sunnung dak 1 a pan dak 4 sung in Business Chairman Upa K Khupzathang makaih in vaihawmna om ding a, nitak biakna kikhop ah Field Supt., Dhemaji Mis­sions Field, EBC in thugen ding hi.

 

September 18 (Pathi­anni) sunma dak 10 in mipi biakna kikhop om ding a, huai ah Director of Missions, EBC in thugen ding hi. Pathianni sun­nung dak 1 a kipan in Fel­lowship leh Missions Field Report om ding a, huai ah Dhemaji Missions Field team a pan Field Report om ding hi. Pathianni ni­tak biakna kikhop ah DS/ LSD, EBC in thugen ding a, Pastor Dr M Gousuan in khawmpi khak ding hi.  

 

 

BJP ST Morcha National Vice President in Lamka hongpha

LAMKA, Sep 16: Tuni zingkalkam dak 8 in Imphal a pan BJP ST Morcha National Vice President & Incharge President Ramesh Chan­dra Meena in Lamka hongpha hi. Amah ahi­hleh T.T. Haokip, Ex- MLA, 57-Henglep leh former Deputy Speaker in hon makaih a, Michael Dangmei, President, BJP ST Morcha Manipur, Mathew General Secre­tary BJP ST Morcha Ma­nipur in hon zui uhi.

 

Amaute vaidawnna Ccpur District BJP Of­fice, Light House Lane ah om a, hiai hun Hauneilal Vaiphei, Gen. Secy (Or­ganisation) in makaih a, K. Vungzalian President, BJP Ccpur District in vaidawn thugen hi.

 

BJP National Vice President in a mit mahmah a Ccpur District a muh nuam ziak a hun sawtlou lel om thei ding himahleh hong pha ahi­hdan gen in kum nawn a Manipur assembly elec­tion om ding a BJP in vualzohna ngah ding ahi­hdan gen hi.

 

Tuni a BJP National Vice President vaidawnna hun ah Ccpur district a BJP intending candidates T.T. Haokip, V. Hang­khanlian, Ngursanglur, Chinlunthang leh midang bangzahhiam in thugenna saulou zang in kipulak uhi. BJP National Vice President ST Morcha ahihleh Delhi a pan hong zin hi a, Lamka Damdawi Inn huang a morgue a Tribal Martyr-te zahna pe ding (pay tribute) chih himahleh Joint Action Committee Against Anti- Tribal Bills (JAC-AATB) in lem a saklouh ziak in Lamka Damdawi Inn phalou in sunma dak 9:30 in Imphal ah kiknawn hi.

 

 

Petrol man 58 paise/litre in khang; diesel man 31 paise/litre in kiam

NEW DELHI, Sept 16: Zan Ningani nitak zankim a kipan in, Petrol man 58 paise/litre in khang a, diesel man a hihleh 31 paise/litre in kiam hi. Tu in Delhi ah Petrol litre in Rs 64.05 in zuak in om a, diesel leng litre in Rs 52.63 in zuak in om hi. Tukha sung a petrol leh man nihvei khansak a hi­hna hita a, diesel a hihleh Rs 2.67 a litre a khansak a hihnung in 31 paise/litre in sukkiam in om hi.

 

 

YLS in School Exhi­bition Day zang

LAMKA, Sep 16: Young Learner School, YLS in School kiphuhkh­iak nung kum 25 chinna Silver Jubilee lopna ding programme tuamtuam a sai uh paitou zel in tuni’n School Exhibition Day zang uhi. Hiai hun ah, Hoih Betty, Headmistress, VK Tawna High in School Exhibition Day leh Stall tuamtuam ban ah Jubilee Song Book leng hong hi.

 

Exhibition ah YLS student-te’n khutsiam silbawl a bawl tuamtua­mte uh lak ua, Literary Club, Eco Club, Momen­to Club, Science Club, History Room, Video Room, Art Gallery, Photo Gallary ba ah, live performance leng nei ua, huai ah, student-te’n lasa in laam chituamtu­am lak uhi.

 

Huailou in, tuni a Exhibition Day zatna a Photo Gallery leh Video Room ah Young Learn­ers School phuhkh­iaknung a pan limlak tuamtuam a kepte uh ban ah, YLS toh kisai a documentary a bawlte uh takkhia uhi. Young Learners School in ahi­helh October 7, 2016 in Silver Jubilee Day zang ding uhi.

 

 

Political Party leh mimal in ham­phatna di’n Tribal Martyr-te zang theilou ding: JAC-AATB

LAMKA, Sep 16: August 31, 2015 a Ma­nipur Legislative As­sembly in Anti-Tribal bills 3 a passed a kipan singtangmite’n Bill 3 dou­dalna leh singtanggam leh singtangmite rights leh identity humbitna dia pan a lakna uh tuni chiang a kum khat valta ahihdan Joint Action Committee Against Anti- Tribal Bills (JAC-AATB) in tuni’n thusuah bawl hi.

 

Tribal Martyrs 9 in a hinna uh ana piakna san uh singtangmite lungsim ah thamden lai a, amaute kipiakna leh a maban uh sunzop a zohsiang lung­gulhna lungsim niteng in kibehlap deuhdeuh hi.

 

Kum khat val kip­hinna neih ahihnung in singtangmite ngaih­tuahna leh lungsim nat­nate bangmah a ngailou a, singtanggam leh sing­tangmite a dia hinna pia Tribal Martyr-te tung­tawn a politics a ham­phatna ngahsawm po­litical party tuamtuam leh mimal tuamtuam om hidan in JAC-AATB in taklang hi. Hun bangtan­hiam paisa a kipan Tribal Martyr-te zahna pe ding (pay tribute) mimal leh political party kibehlap dan et in maban a Mani­pur assembly election om ding etna ziak ahihdan kilang hi’n JAC-AATB in taklang hi.

 

 

Manipur ah by-election om ding gintakhuailou

Imphal, Sept-16: Manipur Legislative Assembly Speaker Th Lokeshwor in Naga Peo­ple’s Front (NPF) MLA 4 leh Yumkham Erabot in MLA apan kitawpna lai a piaklutte uh Septem­ber 14, 2016 a, a pomsak nung in Manipur Assem­bly a member 60 om lak ah tu’n member 55 tung­suk in seat 5 awng hi.

 

Manipur Assembly election ding ahihleh kumthak bul March 2017 beima a neih ding a puan­sa ahih ziakin kha tawm­chik lel omta a, mun awngte luahtu ding telna dia Election Commission in by-election a sai ding gintakhuailou hi’n thu­suak in taklang hi.

 

NPF member 4-te’n ahihleh apaisa Septem­ber 4, 2015 in Assembly Speaker kiang ah kitawp­na lai pelut uh a, Y Erabot ahihleh September 12, 2016 kitawp in MLA apan mi 5-te kitawpna September 14, 2016 in a vek ua pomsak in om hi. NPF member MLA hihna apan kitawpna pomsak a omte ahihleh L Dikho, 48-Mao constituency (ST reserved); Samuel Rison, 44-Ukhrul constituency (ST reserved); Victor Nunghlung, 41-Chan­del constituency (ST reserved);Dr V Alexan­der Pao, 47-Karong con­stituency (ST reserved) hi ua, a 5na pen ahihleh MLA leh MPCC primary membership apan kitawp a BJP zom Yumkham Erabot ahi.

 

 

DLSA in essay writing compe­tition a kipahmante hawmkhia

LAMKA, Sep 16: A paisa July 10, 2016 in District Legal Service Au­thority, Ccpur saina in Lalpuithluaii Foundation School, Bungmual ah, ‘Fundamental Rights & Duties of a Citizens’ chih thupi zang in essay writ­ing competition om hi. Hiai competition ahihleh category 2 - Class VIII a pan Class X tan leh Class XI a pan Class XII catego­ry om a, a result uh puan ahihtoh kiton in tuni sun­nung dak 1 in Foundation School mah ah, “One Day Legal Awareness-cum- Prize Distribution Pro­gram” zang kawm in kip­ahmante hawmkhia uhi.

 

Hiai hun zatna Ch­ingmalsawm, Class X in makaih a, Albert Tangth­asiem, Advocate, Presi­dent, Ccpur Bar Assn. in vaidawnna thugen a, Zakir Hussien, Advocate in, “Right to Education” (RTE) toh kisai ban ah Free Legal Service toh ki­sai gen hi.

 

Awareness pro­gramme zoh in essay writ­ing competition a prize-te hawm ua, Category-I, Class VIII a pan Class X kikal ah, Siamthianngai, Class X of Young Learn­ers School in khatna la in Thangzuanlian Langel, Class IX of Young Learn­ers School in nihna la a, Chingmalsawm, Class IX of Lalpuithluaii Founda­tion School, Donlunching, Class IX of Young Learn­ers School leh Vungnun­siam, Class X of Lalpuith­luaii Foundation School in thumna la uhi.

 

1na latu’n kipahmann in Rs. 1500 leh certificate sang a, 2na in Rs. 1000 leh certificate sang in 3nate’n Rs. 800 leh certificate sang uhi. Huai ban ah, midang 10 kiang ah consolation prize in Rs. 500 chiat pia uhi.

 

Category-2, Class XI leh Class XII ah, Hoihlun­vung, Class XII of Rayburn College in khatna la in kip­ahman Rs. 2500 leh certif­icate sang a, Thenhoi Kip­gen, Class XI of Sielmat College in nihna la in Rs. 2000 leh certificate a sang in Tunminsang Khup­tong, Class XII of Rayburn High School in thumna la in Rs. 1500 leh certificate sang hi. Huai ban ah, hiai category mah ah, midang 10 kiang ah consolation prize in Rs. 1000 chiat pia uhi. Tuni a prize kihaw­mte ahihleh Kimneinieng Shoute, Advocate, Albert Thangthasiem, Advocate, Letkho Kipgen, CJM, Za­kir Hussien, Advocate leh T. Vunglallian, Principal, Lalpuithluaii Foundation School in pekhia uhi.

 

 

Mizoram ah pasal sang in numei voter tamzaw

Aizawl, Sept-16: Mizoram state Election department in final vot­ers’ list suahkheta a, huai dungzui in state sung pumpi a voter 7,22,739 lak ah numei 3,68,757 om in pasal sang a numei voter 14,775 a tamzaw hi’n Joint Chief Electoral Officer F J Liantluanga in tuni’n Aizawl a thuthak­saite kiang ah gen hi.

 

Liantluanga in a genna ah, Mizoram state a Mamit, Lunglei leh Lawngtlai district a final electoral roll suahkhiak ding Election Commis­sion of India (ECI) in a dal ziak a state vot­ers’ list final publication suahkhiak hun zekai hi’n gen hi. Election Com­mission of India apan theihsakna ahihleh State sung a Non-government organization(NGO) tua­mtuam in Tripura state a Bru relief camp 6 a sum­mary revision of electoral rolls sai dia state election official-te a kuan ding uh a phallouh ziak uh hi’n taklang hi.

 

State NGO Co­ordination commit­tee in Tripuara state apan Mizoram a galtai kiknawnte kia state vote’s list a khumlut ding leh Tri­pura a omlaite khumlut louh di’n nasatak in phu uh a, huainung in Elec­tion Commission of India apan theihsakna thak om in Mamit, Lawngtlai leh Lunglei district a voter’s list-te ah Bru voter-te guanlut a om thak nawn hi’n taklang hi.

 

 

Bank A/C 1 chiat pe di’n theisak

LAMKA, Sep 16: CEO/ADCC nuai a JB School 57 a pan School Management Development Committee (SMDC) nuai a Bank Account nih leh thum (multiple account) om ziak in SMDC in Bank Account number a zat pen uh a kinlam a Inspector of School ADCC kiang a Bank Pass Book xerox copy pe lut ding a theihsak hi uhi. SMDC nuai a multiple account nei school min list leng CEO/ADCC office notice board ah ettheih ding hi. SMDC account teng September 19 - 22, 2016 sung in State Project Office Conference Hall, Imphal ah web­site a khumlut hiding a, fund hong paite huai account tungtawn in lut ding hi.

 

 

 

SSPP Mizoram in ‘Felicitation Program 2016’ zang ding

LAMKA, Sep 16: Hongtung ding October 1, 2016 sunma dak 10:30 in I&PR Auditorium, Aizawl ah Siamsinpawlpi Mizoram in ‘Felicita­tion Program 2016’ zang ding uhi. Hiai hun ah khuallian in awardee-te pang ding ding ua, khual­zahtak-huai in H Rohlu­na, Education Minister, Mizoram pang ding hi.

 

Hiai Felicitation Pro­gramme 2016 ahihleh tu kum sung a Mizoram state sung a SSPP mem­ber phattham a lohchinna ngahte pahtawina hun hiding hi. Hiai hun zatna Kamminthang Hangsh­ing leh Niangngaihvung in makaih ding ua, gelhluttu in Rodinglian, Inf. Secy., pang ding hi.

 

Siama Changsan, Fin. Secy in thumna in hun pan ding a, K Muanlal, Vice President in vaidawn thugen in, PL Rolian, Gen. Secy a pan report om ding a, tua zoh in President a pan thugenna om ding hi. Huai ban ah Muana Hang­shing, President, PTC Mizoram in hasotna thu­gen ding a, MZP leh MSU a pan inleng thugenna om ding hi.

 

Tua zoh in Award hawmna om ding a, Rohlu­na, Education Minister a pan thugenna zoh in Pro Pastor Khairoding, PCI Bethlehem a pan kipahthu genna om in PH Vanlal­muan, Asst Secy., Standing Committee in thumna in hunkhak ding hi.

 

Hiai hun a award ngah dingte ahihleh Thawnsan­glian (1st position, BA-So­cialogy); Thuamthansang (1st position MSc-Phys­ics); Zamkhankhual Guite (1st position MA-History & Ethnography); L Sia­mmuanlian (2nd posi­tion BA-Philosophy); KC Lalhluna (2nd position BA-Socialogy); Mangc­hungnung (3rd position BA-Public Administra­tion); Chinmuanthang (4th position BA-History); Evelyn Lalremmawii (5th position BA-Psychology); Christopher Laldingliana (6th position BA-Socia­logy); Ginngaihlian (6th position BA-History); Lalrammawi (10th posi­tion BSc-Chemistry); TC Rokimi (10th position BA-Mizo); Lianding Varte (8th position BSc-Geography); M Chinlampiang, PhD leh Vungngaihlun, PhD hi uhi.

 

Hiai hun ah lasiam tuamtuam G Sanglian, David Biaklun, Thangro­mawia Thomte, Elizabeth leh Lalnunpui in lasa ding uhi.

 

 

NSCN-IM in ‘Fasting & Prayer Day’ zang ding

Dimapur, Sept-16: North-east India bial a helpawlte’ nu (mother of insurgency) a theih a om National Social­ist Council of Nagaland (Isak-Muivah) helte’n hongtungding Septem­ber 24, 2016 in khelhna tawpsan tupna in Pathian kiang ah ngaihdam ngen in annngawl thumna neih sawm uh hi’n thusuak in taklang hi.

 

NSCN(IM) in ahi­hleh Centre government toh ceasefire kithukimna suai a kaih uh kum 20 val chingta a, huaima kum 17 sung vingveng sisan-nai­san suahna apan khawl uhi. NSCN (IM) ahihleh apaisa kum 1988 in par­ent organization NSCN toh a kikhen apan in Isak Chisi Swu leh Th Muivah makaihna nuai ah om a, huai hun apan a tup-le-ngim a neih ahihleh ‘Greater Nagaland/Nag­alim’ bawlkhiak ding chih ahi. Huai ding in Nagate tenna Arunachal Pradesh, Manipur leh Assam ba­nah Nagaland teng terri­torial integration neihna di’n panla uhi.

 

Council of Nagalim Churches (CNC) a General secretary Seeksim Kasar in zanhal, September 14, 2016 in Council thupukna toh kisai a puankhiakna ah September 24, 2016 a ‘National Workers’ Fast­ing & Prayer Day’ a zat ding hi’n taklang hi. A thupuan tungtawn a a taklat khenkhatte ahi­hleh Nagate lunggulh leh deih kia buaipih hilou a, leitung noptalna a kibual tamtak leng omta a, tup-le-ngim paipeel a omta hihna ah Pathian ngaih­damna poimoh chi hi.

 

 

Delhi ah ADCC Chairman zin

LAMKA, Sep 16: Langkhanpau Guite, Chairman, ADCC & Leader Hill Peoples’ Alliance(HPA) leh Gen­neikhup Vaiphei, EM/ ADCC in zan in Lamka nusia in Delhi zuan uhi. Amau ahihleh Delhi a om­sung un Manipur a Au­tonomous District Council tungtang, DRDA thu leh thu poimoh tuamtuam buaipih in Union Minister tuamtuam kimuhpih ding uhi. Hiai toh kisai mah in September 19, 2016 chiang in Ukhrul ADC Chairman makaih in ADC Chairman bangzahhiam inleng Delhi zuan nawn ding uhi.

 

 

Scholarship hawmkh­iak hunding bikhiah

Imphal, Sept-16: Director, Tribal Affairs, Hills & SC department, Manipur in tuni a theih­sakna a bawl in a taklat dan in, Manipur a kum 2015-2016 session a Tribal student-te Schol­arship tuni tan a hawm­khiak louh a omte lak ah Post Matric Scholarship pen September 20, 2016 a hawmkhiak hiding leh Pre-Matric Scholarship ahihleh hongtungding October 7, 2016 a hawm­khiak hiding hi’n taklang hi. Huai banah student tutan a Scholarship form online tungtawn a sub­mit theilou te’n offline tungtawn in submit thei ding ua, submit theih hun leng suan gamlat a om in November 30, 2016 tan hithei ding hi’n taklang hi.

 

 

YPA New Lamka Block in 35th Rising Day zang

LAMKA, Sep 16: Young Paite Associa­tion (YPA) New Lamka Block in tuni sunnung dak 3 in YPA New Lamka Hanmual ah, YPA New Lamka Block kiphuhkh­iaknung kum 35 chinna Rising Day zang uhi. Hiai hun zatna YPA New Lamka Block nuai a Unit 12 a pan Executive Mem­ber teng ban ah, YPA General Headquarter heutute’n uap uhi. Hiai hun ah, New Lamka huamsung a mi phatu­amngai pen a telkhiak a om mi 7 - G. Thanglian­mung @ Kala of Hebron Veng; T. Luanzathang @ LT Paite, Dorcas Veng; L. Pauchinlian @ Pau­lian of Vengnuam; L. Khamkhansuan of Veng­nuam; L. Ginsuanlian of V. Munhoih; Samson of Vengnuam leh Sangpu @ Ningthou of Dorcas Veng kiang ah pahtakna pia uhi.

 

Hiai hun zatna ah Awnsuanhau, Secretary, YPA New Lamka Block in report pia a, S. Man­lian, President, YPA New Lamka Block in Presiden­tial Speech gen in Luah­khanchin, Vice President, YPA General Headquar­ter in kipahthu gen in programme zou uhi.

 

S. Manlian, Presi­dent, YPA New Lamka Block in a thugenna ah, heutu masate’n thil a nutsiat tuamtuamte uh a kepbitna michih mohpuak hi a, YPA mot­to-te mangngilhlou a panlatou zel ding uh mip­ite ngen hi.

 

Programme hunsung in YPA New Lamka block a member ana mualliam­sate ban ah, Manipur singtanggam hum bitna ding a hinna pia, Salpha 9-te zahna leh sunna hun leng zang ngal uhi.

 

Secretary in report a bawldan in, YPA New Lamka Hanmual ahihleh 1991 kum a pan zatpat hi a, tunitan in misi 1927 kivuita a, 2011 a mi 180 kivui in misi vui tampen kuma chiamteh a om hi’n taklang hi.

 

 

Police Inspector 40 zan apan MPS-Grade II in kaisang

Imphal, Sept-16: Government of Mani­pur, Department of Per­sonnel & Administra­tive Reforms( Personnel Division) min a Deputy Secretary A. Subhash Singh in zan a Order a suahkhiak in a taklat dan in, Manipur Police a Inspector (Subedar/ Subedar Major) 40 a sepna uh kaisang sak a om in Manipur Police Service Grade-II ding in dopsang hi uhi.

 

Huai Order in a tak­lat dan in, Police officer 40-te kaisangna ahihleh a join ni ua pan in March 1, 2007 a effective hiding hi’n taklat hi a,Pay band 2 of Rs.9,300-34,800 plus Grade pay of Rs. 5,400 p.m. with other allowances hamphatna mu ding uhi.Inspec­tors of Police/subedar/ Subedar Majors apan Manipur Police Service Grade-II a kaisangte ahihleh:

 

1. T Arunkumar Singh

2. S. Nandakishore Singh

3. Thamei Gaipuril Kabui

4. Sh Jugeshore Sharma

5. Rk Khomdom Singh

6. S. Somorjit Singh

7. Th. Nungshi Singh

8. M. Mubi Singh

9. L Deben Singh

10. A Ghanashhyam Sharma

11. Thy. Sharat Singh

12. K. Mangi Singh

13. A Surendra Sharma

14. l.Kulachadra Singh

15. S Shamu Singh

16. Akhuba Kabui

17. S Ingo Singh

18. S Punyaban Singh

19. S Meghachadra Singh

20. H. Gyanneshore Singh

21.M Kumarjit Singh

22. Y Rajendro Singh

23. P Binod Ranjin Singh

24. I Chitaranjan Singh

25. Mangkhojang Kipjen

26. Seikhomang Thouthang

27. K Ajit Kumar Sharma

28. N Manglemba Singh

29. K Pukeho Mao

30. L Thangboi Kuki

31. N Angam Ningshen

32. T. Thangjapao

33. JS Peter Makanmi

34. H. Pearson TKL

35. Ningam Siro

36. NL Kongam Anal

37. Swelling Hope Chiru

38. G. JemkhansuanPaite

39. Ch. Adani Mao

40. Ginjamang Vaiphei.

 

 

Pethuel EBCC in a inntuan ding biakinn suangphumna nei

LAMKA, Sep 16: Tuni zinglam dak 7 in Jordan Street, Vengnuam South, New Lamka ah, EBC biakinn thak ding suangphumna om hi. Tuni a suangphum a om pen, EBCC Pethuel in a inntuan ding uh hi a, Rev. V. Nenglian, DS/Lamka South Division, EBC in Pathian min in suang­phum phuum a, Pethuel EBCC mipite pangkhawm a bawl ding ahihdan et­sakna in Pastor K. Pum­suanthang, Local Pasto makaih in TBSUC, Dor­cas Pawl, Building Com­mittee, BYF leh Sunday School a chairman teng in suangphum vuk uhi.

 

Biakinn thak mun ding ahihleh a paisa 2011 kum a Rs 13 lakh a, a leikhiak uh hi a, biakinn ahihleh a dunglam feet 72 in sau ding a, a vailam feet 36 hiding hi. Biakinn thak lamna ding suang­phum phum zoh ahihtoh kiton in nasep kipan ngal a, mistry ding bangzah­hiam la mahle uh, a tam zaw bel mipi’n sem ding uh hidan in thutut kingah hi. Pethuel EBCC Sap­tuam ah tulel in innkuan 390 omlel a, biakinn thak bawlzoh ahihchiang in inn 100 vel tuankhe ding uhi.

 

 

Meghalaya Assembly ah CM Mukul Sangma kapnawn


Shillong, Sept-16: Meghalaya Chief Minis­ter Mukul Sangma in zan in State Assembly House ah MLA dia telching a omna Ampati Assembly constituency huamsung teng bandh puankhum a om nawn chih a theih in bial mipite kankuahna ziak a kap hi’n thusuak in taklang hi.

 

Mukul in Ampati Assembly constituency a teng mipite’n haksatna liantak tuak den uh ahi­hdan gen in a chihtakna uh thupi leh phattham ching hi’n gen a, Garo National Liberation Army (GNLA) helte’n bandh mahle uh state pumpi enkawm a thu­akzoutak a om dia mipite ngen ahihdan leng tak­lang hi.

 

Mukul Sangma ahi­hleh tutung kia a kap hilou in hundang inleng Assembly House sung ah kap ngeita a, March 2016 a CM kahna ziak ahihleh Lok Sabha Speaker-lui PA Sangma sih puaknat ziak hi’n thusuak in tak­lang hi.

 

 

 

NEWS TOMKIM

 

Observer makaih in meeting

LAMKA, Sep 16: Tuni sunma dak 10 vel in Imphal a pan in Yaiskul Meetei, Roll Observer (Director CAF & PD) in Lamka hongpha a, DC/Ccpur office ah kum nawn, 2017 a MLA election om ding toh kisai in SDO/BDO teng toh meeting nei uhi. Hiai hun ah kumnawn a election om ding toh kisai a kisakkholhna tutan a bangtan tungta hiam chih leh electoral roll tungtang genkhawm uhi.

 

 

ECI in Video Conference neihpih

LAMKA, Sep 16: Surdip Jani, General Director, Election Commissioner of India (ECI), New Delhi in tuni nitaklam dak 5:30 in Manipur a Deputy Commissioner teng Video Conference neihpih in kum nawn a Manipur Legislative Assembly election om ding toh kisai thu poimoh tuamtuam dotna bawl hi. Hiai hun ah Lunminthang Haokip, DC/ Ccpur inleng DC/Ccpur office a pan in dotnate dawng hi.

 

 

Artists Association 3 in joint meeting nei ding

Lamka, Sept-16: Vengnuam, Hiangtam Lamka a Lengtonghoih Recording Studio ah zingchiang, September 17, 2016 zingsang dak 7.00 in Hmar Artists, Kuki Artists Progressive Union leh Zogam Artists Association in joint meeting nei ding uhi. Jt meeting ah khokhat-tuikhat a tengkhawm unau laizomte lak a inkuan khat hihna thukzaw sem a pholhkhiak ahih theihna dia ‘Joint Artists Fellowship’ neih khawm dingdan tel in thu tuamtuam genkhawm ding uhi.

 

 

SUNNA:

S. Hauthianlal (53) s/o (L) S. Khamtinthang of Chimtung Veng, New Lamka, tuni zingkallam dak 1 vel in BP Stroke in Shija Hospital, Imphal ah si a, a luang tuni zingkal dak 6 vel in Lamka puantung hi a, tuni mah in New Lamka YPA hanmual ah kivui hi. Amah ahihleh “thau bawlpa” chi a mite theih ahi. RIP.

 

Zamkhat (90) h/o Tinkhokim of Gangpimualkoi, teknat in tuni zingkal dak 7:40 vel in si a, tuni mah in Gangpimualkoi hanmual ah kivui hi. RIP.

 

Vahneilhing Singson w/o (L) Dr. Rev. D. Singson, Laizon Veng, Tuibong, tuni sunnung dak 2 vel in si a, zingchiang in kivui ding hi. RIP.

 

 

 

…for more detail : Here