You are here: HomeRSS FeedsThe Lamka Post

The Lamka Post | June 26, 2016

Sunday, 26 June 2016 21:12

PM Modi in Pune ah Smart City Projects hongkhia

PUNE, June 25: Tuni Kiginni in Prime Minister Narendra Modi in, Pune a programme khat a zatna hun ah, Pune’s smart city plan nuai ah project masa 14 hongkhia a, hiai hun Ma­harashtra Chief Minister Devendra Fadnavis in­leng uap hi.

 

Smart City Projects hon­na hun a Maharashtra Chief Minister Devendra Fadnavis in a thugenna ah, mifel leh taimate omna khopi chia kigen Pune a hiai programme zang ding a hong kalsuan PM Modi tung ah kip­ahthu gen hi. Urbanisa­tion kichi kihamsiatna dan a ngaihtuahna lung­sim i neih mawk uh ka theisiam kei a, urbaniza­tion kichi hun manpha leh lemtang khat dan a na muh ziak in ka kipahna a liam mahmah chi’n PM theisak hi. Hiai smart cities panlakna in migen­thei leh hausate enkai a, kuapeuh huamkhavek a kivaipuakna tungtawn a khopite khenlamdang ding tup in nei chi’n De­vendra Fadnavis in gen hi. Hiai zoh in, Prime Minister Narendra Modi in Pune ah smart city project hongkhia hi.

 

Union Minister M Ven­kaiah Naidu in a gen­dan in, khopi thak pi­ankhiaksakna pailel a, khopi a mite khosakna in a hoihzaw sem ding in bawlkhiak hiding chi’n gen hi. PM Modi inleng a thugenna ah, India mip­ite etlawm pen ua, a sia­mnate uh a zatkhiak hun­hun ua, bangzahta a thil lamdang piangkhe ding hiam chih i mu mai ding uh chi’n gen hi. Kei hon kimuhpih official-te’n khopite bangchi telkh­iak ding chih lamdang a sak thu uh a hon gen ua, telkhiak bangmah a kinei kei a, telkhiak a om khopi a tengte’ mah in a min hoihna tang ding uh ahi chi’n gen hi.

 

Smart City project kichi leng mipite panlakna ahi a, etkhiakna neih a omte leng lohching mahmah ahi chi a gen in genthei zaw sem a khosa ding a kitaitehna hun leh nite a pailiam khinta a, ma­ban kalsuantou zel ding a kitaiteh i hi ua, hiai pen khantouhna lampi ahi chi’n PM Modi in gen hi. Khantouhna nasepna toh kisai a kitaitehna lung­sim neih kichi Jan Bhagi­dari lungsim ahi chi’n leng gen hi. Kihelkhak vek ding lungsim neihna poimoh mahmah chi’n gena, khopite kichi khan­na munpite kia a hikei a, i khopite un zawnna suk­beina ding a hatna leh hi­htheihna nei i hi uh chi’n PM Modi in gen hi.

 

 

ALL POLITICAL PARTY MEETING AH THUPUKNA 3 BAWL:

Assembly Session nawn chiang in tualsuak­mite humbit ding Bill thak puaklut hiding

IMPHAL, June 25: Tuni, June 25, Kiginni sunnung dak 3 in, Mani­pur Chief Minister O Ibobi Singh makaih in CM Sec­retariat, Imphal a Cabinet Hall ah ‘All Political Party Meeting’ poimohtak om a, huai ah Manipur a tualsuakmite humbitna ding dan toh kisai a dan bawlkhiak ding tungtang genkhawm uhi.

 

Hiai hun ah President of India Pranab Mukher­jee in, ‘Protection of Ma­nipur Peoples Bill, 2015’ (PMP 2015) suaikailou a “withheld” a, a koihnung a, Manipur state sung a gam neitute humbitna leh kepbitna ding toh ki­sai a Bill thak gelhkhiak (draft) ding chih thupuk uhi.

 

Tuni a All Political Party Meeting a thu­puknate taklatna ah meeting makaihtu Chief Minister O Ibobi Singh in suaikai hi. Hiai meet­ing a thupuknate taklat ahihna ah, President in PMP, 2015 lemsakpihna suaikailou a, nawlkhin (withheld) ziak in, a kintheipen a state sung a tualsuakmite humbitna ding dan (Bill) bawlkhiak poimoh hi’n taklang hi. Tualsuakmite humbitna ding a Bill thak bawl a om ahihleh state sung a nam chih in a pomtheih dia bawl hiding hi’n thu­suak in taklang hi.

 

Tuni a All Political Party Meeting a thu­pukna 3 bawl a omte ahihleh 1na ah, Bill thak bawl a om ding pen legal leh constitutional expert-te’n a gelh ding ua mohpuakna piak ding leh huai Bill pen state sung a tualsuakmite humbitna dia zat ahihtheihna dia state Govt in a pompih ding chih thupuk uhi.

 

2na ah, Bill thak bawlkhiak a om ding pen zohsiang leh sukfel ahi­hma ngei a, a kisaikhak­pih ding (stakeholders) singtang leh phaizang bial mipite’n genkhawm­na (consultation) neih ding chih ahi.

 

3na ah, state sung a tualsuakmite humbitna ding a Bill thak bawlkh­iak a om ding pen state assembly session neih nawn hunhun a pom ahihtheihna dia Assem­bly innpi a luikhiak ding chih thupuk uhi. Huailou in, Manipur Assembly session nawn chiang a luikhiak ding tualsuakmite humbit­thei ding Bill thak bawl­na kipanta ahihman in, ‘All Political Party’ palaite’n Manipur mip­ite kiang ah lemna leh muanna kembit chiat ding in ngen uhi. Huai banah dan thak bawlkh­iak a om ding tungtawn a state sung a tualsuak­mite humbit ahihtheih­na dia All Political Party palaite leh state govern­ment panlaknate peu­hmah mipi’n kithuahpih chiat ding in ngen uhi.

 

Hiai meeting hun­sung in JD(U) President N Tombi in JCILPS convener lui Kh Ratan tung a ‘wanted tag’ puankhum a om toh ki­sai tangkoupih a, Govt in hiai thu enthak ding in ngen hi. Himahleh hiai tungtang ahihleh meeting a genkhawmlou uh hidan in thusuak in taklang hi.

 

 

Directorate of education in PwD-te thangpaisak

IMPHAL, June 25: Manipur a vualphaloute tung a chouna liantak omte kimangngilh bawl hihleh kilawm in, direc­torate of education Ma­nipur in Office Assistant leh Multi Tasking Staff (Group D) lakna ding a, form piaklutna ding counter tuam bawlsak ding semsuah lou uhi.

 

Department ading recruitment pelut ding a mipi sahtak lak a dakkal sawttak kivolh ding hak­sa sa vualphalou pawl khat te’n a gendan un, education department in section 47 of the person with Disabilities (Equal Opportunities, Protec­tion of Rights and Full Participation) Act, 1995 dungzui a, PwD-te theih­siampihlou leh theihpihna pelou hikha ding hi’n tak­lang uhi. Disabilities com­missioners in a bildohpih ding ngiat kawm in, PwD-te’n buaina a tuahte uh enkaipih ding in ngen uhi. Form man leng unreserved leh OBC-te a ding in Rs 500 bikhiahsak ua, SC/ST a ding in Rs. 250 bikhiah ua, PwD-te a ding bikhiah bangmah neilou in, nelh­siah khum uh hidan inleng taklang hi.

 

 

Police Constable (Male)- 2013 candidate -te’n July 11 tan hun pia; kiphinna patsawm

IMPHAL, June 25: Manipur state govern­ment 2013 a, a sai po­lice constable candidate 2000te recruitment pro­cess result suahkhe ut­lou uh chi’n All Manipur Written Test Success­ful Candidates of Police Constable (Male), 2013 in Manipur state govern­ment ngawh hi.

 

Candidate-te maban ding buaihuaipi a koihsak leh panlakna ze-oltak a paipih state government mohsa mahmah kawm in, All Manipur Written Test Successful Candidates of Police Constable (Male), 2013 –te’n tuni Kiginni in, press statement bawl ua, July 11, 2016 tan a withheld result-te gov­ernment in a puankhiak keileh kiphinna huaise­tak nei ding uh hi’n vau uhi. Candidate-te’n thiln­get a neihte uh pichinsak ding deihna ziakin, tunai zek in kiphinna nei khin­ta ua, himahleh state gov­ernment in dawnna lung­tunhuai neilou in tuni tan thubuai genvenglouh in koihdap chi uhi.

 

State home depart­ment in Police Constable (Male), 2013- te result a puankhiak ma a, police constable can­didate 2052 lakna ding recruitment process dang khat a neihzel toh kisai leng vangtahhuai mahmah a, hiai in can­didate masate lungsim suna mahmah chi’n leng thusuak ah taklang uhi. Kum 2013 police con­stable candidate 2000 -te’n written test, physi­cal test leh viva voce June 10, 2016 a zousiang pan uh hidan inleng thu­suak in taklang hi. July 4, 2016 in Chief Minister Okram Ibobi Singh toh meeting om ding a, loch­inna ngahsa candidate-te kiang a government in thuchiam chiangtak piak ding a nawlkhinsak lai leh kiphinna pankhe ding uh hi’n leng All Ma­nipur Written Test Suc­cessful Candidates of Police Constable (Male), 2013 –te’n a press state­ment a suahna uah tak­lang uhi.  

 

 

ZSP in Award Distribution nei

LAMKA, June 25: Tuni sunma dak 10:30 in Zogal Hall, Zoveng ah Zou Sangnaupang Pawlpi, GHQ saina in ZSP Career Share cum Award Distri­bution -2016 nei uhi. Hun masa zingkallam pen ca­reer share hun in zang ua, hiai hun ah penalist in M. Lawrence Kapkhenmang, MPS; M. Thangsuansang Zou, (Success in UPSC Exam 2015), M. Kham­suanhang Zou, (Success in MPSC Exam 2015) leh P. Tongkholian Zou, (Suc­cess in MPSC/MSPDCL Exam -2015) a pang in award mu dingte kiang ah a tup-le-ngimte uh dong uhi.

 

Hun nihna, Award Distribution function in zang ua, hiai hun ah chief guest, functional presi­dent leh guests of honour in Lunminthang Haokip, IAS, DC/Ccpur, Chinlun­thang, President UZO-GHQ leh M. Lawrence Kapkhenmang, MPS, M. Thangsuansang Zou, M. Khamsuanhang Zou leh P. Tongkholian Zou pang uhi.

 

Tuni a award sangte ahihleh BSEM nuai a HSLC ah Vungdoini­ang d/o Thangsuanlal of Donbosco School in (L) Thangkhanlal Meritori­ous Award sang a, aman over all Topper in Class – X, (L) Tongzapau Memo­rial Award (highest mark in class-X Maths) leh (L) Rev. Doupu Memorial Award (highest mark in Class- X MIL Zou) sang hi. Class X mah ah Nieng­deikim d/o T. Goukho­mang of Donbosco High School in (L) Tongzapau Memorial Award (highest mark in Class- X Maths) sang hi.

 

Class-XII (Science) ah Marina d/o Marcus Mangkhankhai in (L) Thangkhenkhup Meri­torious Award (Over all topper in Class- XII Science) leh (L) Suahza­hau Meritorious Award (Overall topper in Class- XII) sang hi.

 

Class-XII (Arts) ah Lalmuankhup Zou d/o Kaphinthang in (L) Da­vid K. Samte Meritorious Award (Highest mark in Art Stream) leh Ka Pu Saipu Memorial Award (highest mark in Class- XII MIL Zou) sang hi.

 

CBSE nuai a Class-X ah P. Nengminlun Zou s/o P. Dalminthang Zou in (L) Jem Douzakham Tungnung, JCO Meri­torious Award (Overall topper in Class- X CBSE) sang a, CBSE nuai a Class- XII ah Olivia Lhingneini­ang d/o Ginzamuan in (L) Chinniang Meritorious Award (Overall topper in Class-XII(CBSE) sang hi.

 

 

MARC ah 5th Unau Meet 2016 nei

LAMKA, June 25: Tuni sunma dak 9:30 in Pearsonmun a Malsawm Ability Resource Centre ah ‘The 5th Unau Meet – 2016’ programme zang uhi. Hiai hun Ashely leh Minlian in makaih ua, Thangsuanpau in thum­na in hongkhia hi. Ngai­sangching in thugenna saulou nei a, Elcy Niang Lun Ching in activities re­port pia hi.

 

Hiai hun ah Pau­zagin Tonsing leh a innkuante’n a tapa uh (L) Ginmalsawm theih­gigena ding a Disability Award Rs. 5000/- a bawl uh piakkhiakna leng nei ua, hiai hun ah Letkhol­un s/o Jangthang of T. Kananphai, Ccpur Govt High School a pan class X passed in award sang hi.

 

 

Simte Inn ah Simte MIL lopna om

LAMKA, June 25: Tuni sunma dak 11:30 in Simte MIL Celebration Committee saina in Simte Inn, Sim Veng ah BSEM leh CoHSEM in Class X leh XII tan a Simte MIL tawitheih dia phalna a piak ziak in lopna nei uhi.

 

Hiai hun ah chief guest, guest of honour, functional president leh chief host in Th. Jamchinthang, MDC, Thanlon; M. Gouzamang Guite, EM/ADCC; T. Gouk­homang, ZEO/Ccpur leh B. Dongzalian Simte, Presi­dent, STC-GHQ pang uhi. Hiai hun Rev. Th. Lalpu Simte in thumna in hong a, Rev. Dr. L. Liankhanlal, Chairman, SMCC in vaidawn thugen hi.

 

 

Chief Guest in a genna ah, tu kum a kipan Class X & XII subject a Simte MIL tawitheihna dia om ziak in vaisaitute tung ah kip­ahthu gen a, Simte Litera­ture makaite panlak ziak a hiai bang piangthei ahi­hdan gen hi. Huai banah student-te’n leng mahni pau a laisim theih ahihtak man in la chiat ding in ngen hi.

 

Guest of Honour in a genna ah, Simte MIL lop theiha om pen Simte nam a dia gou thupitak ahih­ban ah masawnna ahih­dan gen a, student-te’n leng poimoh ngaih ding in ngen hi. Functional President in a genna ah, student-te’n mahni pau a letter mark mutheita ding ahih ziak un student-te kuhkal­tak a pang ding in hasuan hi.

 

Chief Host in a genna ah, Simte namsung a dia tutung a Simte pau Class X & XII subject a tawitheih dia hong om pen Simte mipi in loptak mah ahihthu gen a, Simte MIL Celebration Commit­tee panlak na kipahpih mahmah ahihdan gen hi. Hiai hun ah Simte MIL lopna dia sum thoh tam­pente kiang ah memento pia uhi.

 

Simte Literature So­ciety saina a open essay writing competition a kip­ahmante Th. Jamchin­thang MDC in sponsor a,huaite hawmkhiakna leng nei uhi.

 

Hiai kidemna ah S. Soimuansiam in khatna la in Rs. 3000/- sang a, H. Mangminlian in 2na la in Rs. 2000/ leh T. Kham­lianmang in 3na la in Rs. 1000/- sang a, midang 7 in consolation cash prize in Rs. 500/- chiat sang uhi.

 

Simte Literature So­ciety saina mah in Essay Competition, ‘Nam khat khantouhna tehna chu a literature ahi’ chih thupi zang a kidemna a kipah­mante T. Kammuanlal Simte, MCS, AC to DC/ Ccpur sponsored hi. Hiai kidemna ah 1st in T. Henminlun pang in Rs. 3,000/- sang a, 2na ah Tabitha Chingnunsiam pang in Rs. 2,000/ leh 3na ah Kamsuanthang pang in Rs. 1,000/- sang hi. Huai banah midang 11 in consolation cash prize Rs. 200/- chiat sang uhi. Kipahmante ahihleh T. Kammuanlal Simte, MCS, AC to DC/CCPur in pe­khia hi. Tuni a Simte MIL lopna hun ah bawng 2 leh vok 1 gou in mipi’n an­kuang um uhi.

 

 

Govt in Thoubal shopping com­plex kichip thu suizui hen: BJP

Imphal, June 25: Tuni Kiginni in, ex-Minis­ter Nimaichand Luwang makaih state BJP leader team khat in media-te toh kithuah in, Thoubal Shopping complex build­ing kichipna mun va-enkhia ua, hiai hun in L Basanta Singh makaih BJP Thoubal Mandal-te’n leng kithuahpih ua, shop­ping complex kichim in a sukkhak kim-leh-kiangte leng enkhia uhi.

 

Nimaichand Luwan (ex-Minister) in a gendan in, state government in Thoubal Shopping com­plex kichip thu toh kisai, a kintheipen a suizuina khat pankhe ding a state BJP in ngen ahi chi’n gen hi. Shopping complex kichim in a sukkhak kim-leh-kiangte etkhiakna a neihzoh un, Nimaichand Luwang in thiltung toh kisai ngeina a vangsiatna thiltung leng hilou chi’n vangtahhuai a sak thu gen hi. State government kiang ah leng Shopping complex bawlna ding a fund luikhiak a omte ni 15 sung ngei a bukimtak a white paper a suahkhe ding inleng ngen hi. Shopping complex bawl­na a panla khate tung a state government in ac­tion lak ding a limsak kei leh BJP in kiphinna khat pankhe ding a, con­tractor-te leng dan toh kituak a matkhiak teitei hiding chi’n gen hi. Hiai thilngette pichin a hi­hma teng, BJP in a kisai­pih thuneite phuden ding hi’n leng gen hi. Thoubal Shopping Market bawl a hihhun a foundation khuampi a omlouh ziak a, thakhat a kichimse pah hidan inleng taklang uhi.  

 

 

Lamlai mipite’n NFSA card pe­kik di’n vau

IMPHAL, June 25: Mipite kiang a thuchiam bawlsa leh a sepsuahna kikal a, kal awng zatak om ziak a thangpaih mahmah Lamlai Assembly Constit­uency a Sekta Meira Paibi Apunba Lup-te’n hoihtak a National Food Security Act zangkhelou a minister uh ban ah Con­sumer Affairs Food and Public Distribution (CAF&PD) enkaitu Kh Bi­ren Singh mohsa mahmah uhi.

 

Tuni Kiginni a Mani­pur Press Club, Imphal a thuthaksaite kiang a, Lup Secretary Pheijam Ibemma in a gendan in, local MLA leh CAF & PD enkaitu Kh Biren Singh in NFSA nuai a antangte, inkuan khat a Kg 5 zel a hawmkhiak hiding chi’n Lamlai Assembly Con­stituency mipite tung ah thuchiam diklou bawlkhia chi’n ngoh hi. Minister in thuchiam omsa tangtun­pih nak sang in, inkuan tawmchikte tung a antang tamzaw pekhia hi. Local MLA leh CAF&PD Minis­ter Kh Biren in, tukha ni 30 tan a, inkuan khat tung a, antang Kg 5 piak ding a tangtunpih keileh Sekta Awang Leikai mipite’n, Makha leh Mayai Leikai-te NFSA card tengteng a kisaipih thuneite khut ah piakkik hiding chi’n gen hi.

 

 

PTC Mizoram HQ President di’n Muana Hangshing telching in om

LAMKA, June 25: Paite Tribe Council Mizoram Headquarter in vaipaw ding telna tuni’n Teikhang Com­munity Hall, Mizoram ah lohchingtak nei uhi. Tutung election ahihleh Presidential election in nei ua, election sai ding in PTC-GHQ a pan John K. Ngaihte, General Secretary, Chinkhanmang Ngaihte, Secretay (Organisa­tion) leh H. Pauzalal, Secretary (Internal) kuan uhi.

 

Tuni a kitelna hun ahihleh sehnih in khen ua, ses­sion masa a election nei in session 2na ah Business session nei uhi. Election a ding in Paite Tribe Council Mizoram Headquarter sung a om unit tuamtuam 19 a pan palai 112 pai­kawm in vote khia uhi.

 

Hiai presidential elec­tion a ding in mi 2 - H. Dalkhenkhai leh Muana Hangshing in nomina­tion file in amau gel kituh uhi. Election sai ding a kuan, PTC-GHQ lam a pan thutut kingahdan in, palai 112 in hoihtak a khia in huai ah, Muana Hangshing in vote 64 mu in Paite Tribe Coun­cil Mizoram Headquarter President ding a telching in om a, H. Dalkhenkhai in vote 48 mu in invalid vote omlou hidan in gen uhi.

 

Huai ban ah, tutung a PTC Mizoram Headquar­ter a Presidential election neih a om pen a etkh­iakna (trial) dan a neih hi a, term khat 2016-2019 sung Presidential coun­cil dan in kipaw ding ua, hoih a sak zawk uh leh hiai dan in maban ah pai­pihta ding uhi. Election neihzoh banah result puan zoh in election com­mission ding a kuan PTC-GHQ a pan John K. Ngai­hte, General Secretary, PTC-GHQ in President dia telching a om Muana Hangshing kichiamsak a, Rev. Nengdoulian, Di­visional Superintendent, Mizoram EBC in hasotna thugen in commissioning prayer nei ngal hi.

 

 

Bodo MP leh Romeo Hmar in Lamka hongpha

LAMKA, June 25: Assam state sung a Bodoland Peo­ples Front (BPF) a pan MP (Rajya Sabha) Biswajit Daimary leh Ma­nipur Tribal Forum Delhi (MTFD) Convenor Romeo Hmar in tuni, June 25 in Delhi a pan Lamka hongpha uhi. Amau ahihleh tuni sun dak 12 in Lamka hongtung ua, Lamka Police Station kong ah All Manipur Tribal Women Union (AMTWU), All Tribal Movement Lamka (ATML) leh mipi tamtak in ana vaidawn in, huai mun a kipan gua zang a kibawl tuttheihna tung­tawn in mipi’n Lamka Damdawi Inn a morgue tan zawngtung uhi. Mipi’n lampai kawm in slogan tua­mtuam sam in, ‘Sixth Sechedule’ ka deih uh, Biswajit Daimary, MP. damsawt hen, Romeo Hmar, Con­venor, MTFD damsawt hen’ chi’n kikou uhi.

 

Lamka Damdawi Inn a tun­nung un Hospital Morgue a Tribal Martyr 9-te luang ‘Cold Storage’ a kikoihte a banban in ensuak ua, huai zoh in Biswajit Daimary in amah mimal in thumna nei hi.

 

Tribal Martyr-te luang Morgue sung a et ahihlai in salphate sung­kuante leng lutsak hi ua, amaute’n MP Biswajit Daimary kiang ah, “Panpihtu ding ka neihlouhlai ua na hongphak ziak in ka kipak uh, hon panpih in” chi’n kahkhuam ua, Biswajit Daimary leng a mit a pan khitui pawt in amah hihtheihna tantan a panpih ding ahih­dan chiam hi.

 

Tua zoh in Salphate sun­na mun ah programme zang ua, hiai hun ah Ro­meo Hmar in thugen masa hi. MTFD Convennor in a genna ah, tutung innkuan vai a Lamka hongphak sawm in ticket la a, ticket a lakzohnung in MP Biswa­jit Daimary in Lamka pha ding ahihdan ana theikha in, “Na buaina uh a mun mahmah a hong enkhe ut ka hi” a chih ziak a hongzui ahi. Amah ahihleh ana pai masa in Guwahati ah ana ngak a, tuni a Guwahati a kipan hong kiton uh ahihdan gen hi. Huai banah Biswajit Daimary ahihleh chikmah a hon taisan ngeilou leh Parliament a leng i buaina thu uh hon gensak khat ahi chi’n Romeo Hmar in gen hi.

 

Bodoland Peoples Front MP Biswajit Daimary in a genna ah, Manipur singtangmite buaina tungtang ah Delhi a om a bik in Lamka mi Parliament a sem tam­takte ziak leh MTFD panlakna ziak in ka na thei a, ken leng Parliament ah kon na gen sak ban ah a kisaipih Minister-te kiang ah leng genta mahleng tutan in bangmah dawnna om­lou ahi chi hi. Manipur singtanggam buaina toh kisai in Parliamentary Committee Forum ki­ang ah panlakpih ding in phu mahleh tutan action omlou leh action om thei­hna dia tuni a ka taksa mahmah a hong pha a, Tribal Martyr-te luang hon enkhia ka hi chi hi.

 

MP Biswajit in a gen­zelna ah, Tribal Martyr 9-te helpawl member leh helpawlte gamtatna hi­dan a gen a om ziak a, a mit mahmah a thil omdan mu nuam a hong pha ahi­hdan gen hi. Himahleh tu a, a mit mahmah a mu leh Salphate helpawl member ahihlouhdan uh leh hiai buaina toh kisai a Nute panlakna a muh a khase mahmah ahihdan gen hi. Tua banah Assam state sung a Bodoland Teritorial Council ngetna a mi 4,000 val bang in a hinna uh tan ahihdan gen hi.

 

Huai banah Manipur singtangmite’n Centre Govt ah State, Autono­mous Hill State leh Sixth Schedule na ngen ua, a hoihlou omkei mahleh kivaihawmna tuam po­imoh na hi uh chi hi. Hiai toh kisai in Indian Constitution sung a om­sate nget hileh baihlam ding a, a omlou nget ahihle leng Constitution bel bawlthak (amend­ment) bawltheih ahi chi hi. Huai banah kei leng singtangmi ka hih ziak in Manipur state sung a singtangmite ka hon tai­sankei ding a, noute a dia ka hihtheih bangbang in ka pang ding chi hi. July nipikal nanung a Parlia­ment Session om ding ah leng Manipur singtang­mite buaina ka tun ding a, ka tung a thuneitute kiang ah leng ka hon gen­sak ding chi hi.

 

Morgue a hun zat­zoh in JAC leh Innpi makaite’n MPC Office, Hmuia Veng, Lamka ah Bodoland Peoples Front MP Biswajit Daimary leh MTFD Convenor Romeo Hmar vaidawn kawm in meeting neihpih uhi. Hiai hun ah tribal move­ment toh kisai nouneltak a genkhawm in maban panlak dingdan leng ki­kumkhawm uhi. MP leh MTFD Convenor ahihleh tuzan Lamka ah giak ua, zingchiang a YPA-GHQ Hall, Hiangtam Lamka a Tribal Movement ni 300 chinna hun zatna uap in nitaklam in Delhi ah kiknawn ding uhi.  

 

 

NGMF saina in ‘Prayer-cum-Fellowship’ zohsiang hita

LAMKA, June 18: Nationwide Gospel Music Festival saina in tuni June 25, 2016 in “Hong un Tou­pa Kiang ah I Kik Ding Uh” (Hosia 6:1) chih thupi zang in EBC Gospel Centena­ry Hall, New Lamka a biakna leh phat­khawmna om hi.

 

Hiai hun ah Lamka khopi leh a seh­vel a biakinn (denomination) pawl tua­mtuam leh biakinn chih a pan Pathian phatkhawm ding leh be khawm ding in Tuailai tamtak paikhawm ua, Sap­tuam lian taktakte a lapitu poimohte leh NGMF Worship Team-te pangkhawm in Worship makaih uhi.

 

Thutut kingahdan in, Gospel Music Festival neih hun a Phatna la sakkhawm dingte NGMF in labu pau tuamtuam kigawmkhawm in bawl uhi. Programme ahihleh tuni zinglam dak 10:30 in kipan a, Rev. H. Nengzatun, Chairman HPB in short message gen a, Rev Kh. Khaizakham in mipi thum­khawmna makaih hi. Nitak hun dak 6:30 in kipannawn a, Rev. L. Jessai Neitham, District Superintendant, EFCI in thugen a, Rev S. Vungminthang, Gen. Secretary, EBC in mipi thumkhawmna makaih hi. Hiai programme ah Church Leaders po­imoh taktakte tel ua a, sun hun in Rev LB. Angam, Gen. Secretary, Kuki Church Leader Forum (KCLF) in thutak gen a, nitak hun in Rev. Ros Infi­mate, Chairman, Hmar Christian Leaders Forum (HCLF) in thutak gen hi.

 

Hiai Gospel Music Festival in a tup ahihleh khovel ah siatna uang mahmahta in hon bawltu Pathian sang in milian milal tawisang masa sek in mahni nam kia pibawl in kihuatna leh kideidanna uang lawta a, Toupa Path­ian zonsuahsa namte i hi­hna uah, pau tuamtuam a Phatna lasakkhawm a, huai tungtawn a ki-unau­na leh kipumkhatna hong omtheihna ding tupna leh Pathian thupina latsak ding tupna a hiai bang a ‘Prayer-cum-Fellowship’ sai a om ahi.

 

 

KVK Ccpur in 1-Day Training nei

LAMKA, June 25: Krishi Vigyan Kendra (KVK) Ccpur leh ICAR Research Complex for NEH Region saina in ICAR Centre Ccpur ah ‘Hill Rice Improvement through participatory va­riety election” kichi ‘one day training’ a neih uh lohchingtak in zousiang uhi. Hiai hun zatna Dr Narendra Prakash, Joint Director, ICAR RC for NEH Region, Manipur Centre in uap hi.

 

Hiai hun zatna ahi­hleh Dr. Nirangan Lal, Programme Coordinator, KVK Ccpur in chairman hihna toh uap a, Dr W Rajen Singh, ACTOm Dr Sudhir Kumar, Scientist ICAR RC for NEH Region, Manipur leh Mrs Bhuvan­shwari, Scientist ICAR RC for NEH Region, Manipur in president hihna toh uap uhi.

 

Huai banah ICAR Manipur Centre a pan Dr Sudhir Kumar leh Mrs Bhuvanshwari, Scientist ICAR RC for NEH Region in sinsak ua, tua zoh in hiai hun a telte’n kikupkhawm­na nei in zou uhi.

 

 

Khuga Dam ah Ex-servicemen rally om

LAMKA, June 25: Tuni sun dak 11 in Khuga Dam ah Sikh Reg. CO Vijay Hooda saina in ex-servicemen rally om a, huai ah mi 300 val kihel uhi. Hiai hun Lunmin­thang Haokip, DC/Ccpur leh Brigadier Ajay Ku­mar, 27 Sector Assam Ri­fle leh Col Aditya Verma inleng uap uhi.

 

Hiai hun a DC/Cc­pur in a genna ah, Khuga Dam mun pen tourist centre ahihtheihna dia Army lam in pan hon lak­pihthei le uh chih a dei­hthu gen hi. Brigadier Ajay Kumar in a genna ah, Army pen­sioner innkuante leh mipi kuapeuh mah haksatna nei leh buaina neite pan­pih dia army-te kimansa a om gige uh ahihdan gen hi.

 

Hiai rally ah Army-te’n medical camp, bank stall leh pensioner-te lak ah khaloh toh kisai a buaina neite etsakna ding counter bawl ua, hiai counter bawl a om mi tamtak in phattuampih uhi. Huai banah army pension welfare toh kisai a buaina neite’n tunung a leng theisak zel ding in CO in ngen hi.

 

 

 

NEWS LAKTOM

 

Meira Paibi-te’n dharna nei

Zan, zingkal dak 6:15 vel a meltheihlouh khat in Ningthoujam Abung h/o Ningthoujam Ongbi Naobi of Khumujamba, thau a, a kap ziak a lungkimlouh taklatna in tuni’n Khumujamba ah Meira Phaibi-te’n sunma dak 9 a kipan nitaklam dak 3 tan dharna nei uhi.

 

 

EBC doctrine leh kivaipuakdan kisinsak

Tuni sunma dak 10:30 in EBCC New Lane, Bungmual ah Lamka North Division sung a BCD heutute’n EBC Doctine leh kivaipuakdan kisinsakna nei uhi. Hiai hun ah Rev L Kham Kho Lun in sinsak a, EBC Lamka North Division sung a naupang heutute tel uhi.

 

 

Lamlian ah hawktui luang

Tuni sunnung dak 2:00 vel a Lamka khopi sung a vuah tamtak a zuk ziak in hawkguam a pan hawktui let in lamlian lai ah luang a, khe a paite leh gari a taite a ding in haksatna liantak tun hi.

 

 

Intl. Day Against Drug Abuse zang ding

DSWO/Ccpur, IRCAs NGOs Ccpur leh DSSS-CBIRDAT saina in June 27 sunma dak 11 in DIC, LRRC-TI ah ‘International Day Against Drugs Abuse & Illicit Trafficking’ zatna om ding hi. Hiai hun Chingson, ORW, LRRC-TI in makaih ding a, John L Hauzel, Councellor LRRC-IRCAs in documentation nei ding hi. T Lalboi, PC DSSS-CBIRDAT in welcome leh keynote address gen ding a, LRRC-IRCAs Team a pan special item om ding hi. T Kamthianlal, Yoga Therapist, LRRC-IRCAs a pan sharing om dinhg a, huai zoh in chief guest Dr Phirthanglien leh chief host Smt Umrani Devi, DSWO/Ccpur in thugen ding ua, Mr Lalbiaktluanga in kipahthu gen ding hi.

 

 

Sunna: Gin Gou Kap @ Kapnou (58) h/o Nu Ciinno Penglamzawi, New Lamka (G), Near St.Paul’s lnstitute in tuni 25-6-16 dak 8:45pm velin damlouhna hon mualliam san hi. Zingchiang in CYA inteekna in kivui diing hi. RIP

 

 

…for more detail : Here