You are here: HomeRSS FeedsThe Lamka Post

The Lamka Post | April 30, 2016

Saturday, 30 April 2016 22:17

DC/Ccpur Office tung leh Khominthang ah huihpi’n inn 1 mutsia

LAMKA, April 29: Tuni, April 29 zinglam dak 1:45 vel in Lamka khopi sung ah vuah, gial leh huihpi hattak kithuahnung hi. Huihpi hatdan kibanglou in mun khenkhat ah hat mahleh mun khenkhat ah bel hat lawlou hi. Hiai huihpi nung in Khominthang, New Lamka ah tenna inn khat belhtheihlouh ding in mutsia a, huai ban ah Tuibuang a DC/Ccpur office tung pehna room 4 tung a langva teng leng mutkhia in mun tuamtuam a singkung a mutpuk banah dai (fencing) bangzahhiam leng mutsia hi.

 

Khominthang, New Lamka a huihpi’n inn a mutsiat ahihleh G. Liansang (30) s/o (L) G. Hauzathang & Mrs Khanngai’ inn hi a, inn­tung langva teng a mutkhiak banah innkam leng a mutsiat ziak in belhtheih ding dinmun in om nawnlou hi. Huihpi nun lai in G. Lian­sang leh a innkuante mi 5 a inn ah giak ua, inn kil khat ah phek kikhuhkhum in om ua, amau ahihleh bangmah chi omlou in huihpi nung a ven in a inn ua pan taikhia uhi. Inn ahihleh huihpi’n nihvei naktak in nawk a, a nawk ziak a kisia hidan in inntekte’n gen uhi.

 

Hiai thu theihphet in YPA, Khominthang unit, VDC, Khominthang, bialtu MDC M. Gou­zamang Guite, EM/ADCC leh CT Lian Guite, MDC, New Lamka West in kidelhhuan uhi. Huihpi’n inntung langva teng banah innkam khenkhat a tuahkhiak ziakin mipi’n ‘social work’ in inn phelkhia ua amaute ahihleh New Lamka SSA Residential Hostel ah ah omsak hi ua, tuni’n a vanteng uh leng hiai mun ah tuahlut ngal uhi. Huai banah bialtu MDC in IAY Scheme om masa penpen pe ding ahihdan chiam kawm in panpihna ding in Rs 4,000/- pia hi.

 

Tu zingkal lam a huihpi nung in Khomin­thang EBCC Sunday School baang a mutsiat banah Khominthang a om mah Manzanem’ inn leng mutsia a, mipi’n tuni’n social work in bawl uhi. Sunday School baang kisia leh Manzanem inn kisia panpihna ding in bialtu MDC in Rs 1,000/- tuak pia hi.

 

Huailou in, DC’ office tung a BRGF Resouce Centre toh opposite a om room 4 - Ballot Box leh BSNL machine koihna store room leh latrine tung langva teng leh innsunte leng huihpi’n tuahkhe vek , DC/Ccpur office lutna gate bul a vicks kung nih leng mutpuk hi. Tua banah Tu­ibuang Peace Ground a singkung bangzahhiam leng mutpuk ziak in lamlian khaktan a, tuzing­kal in JCB zang in hemkhia uhi.

 

 

NFSA sepsuahna di’n Govt in antang 11796 Mts guang

Imphal, April 29: Govt. of India in Manipur a tu kha, April a kipan National Food Security Act (NFSA) sepsuahna ding in antang 11796 Mts koihkhia hi. Antang hiai zah koihkhiak (alloca­tion) a om ahihleh Ma­nipur Govt in NFSA nuai a antang hilou wheat leh a dangdangte antang a khekkhe vek (convert) dia ngetna a bawl dung­zui a allocation bawl a om hi’n thusuak in taklang hi. State Govt. in state sung a NFSA sepsuahna ding toh kisai a State in a thohkhiak (share) ding in Budget 2016-17 nuai ah Rs. 30 crores sepkhia hi. April 24, 2016 a NSFA honkhiak ahih toh kiton in Manipur tuh India gamsung a state-te lak a NFSA zangkhe dingte lak a simtel in omta hi.

 

NFSA lohching leh lamzangtak a sepsuah ahihtheihna ding in NFSA beneficairy-te ‘identifica­tion’ leh ‘digitization’ toh kisai leng zohsiang hita a, a kisaipih DSOs/SDO-te tungtawn in Ration Card hawmna pailel hi. Hiai Act hamphatpih thei ding maihkhak a omte kha nawn sung a zonkhiak leh guanlut hiding ua, NFSA beneficiary list kimtak en utte’n www.pdsmanipur. nic.in. ah ettheih ding hi.

 

NFSA nuai a provi­sion dungzui in, singtang (rural) a teng 70% leh phaizang (urban) a teng 50% in hiai Act ham­phatpih ding uhi. 2011 census dungzui in Mani­pur a milip 28,55,794 om lak ah mi 25, 05, 651 in NFSA hamphatpih ding ua, huai lak ah Antyodaya Anna Yojna (AAY) nuai ah innkuan 63,600 omkha ding hi. NFSA beneficiaries teng lak ah singtang a kipan mi 17,90,364 in hiai Act hamphatpih ding ua, phaizang ah mi 7,15,287 in hamphat ding uhi.

 

NFSA Section 2(1) dungzui in, Priority household-te’n kha khat in antang Kg 5 ngah ding ua, AAY innkuante’n ahihleh kha khat in an­tang Kg 35 ngah ding ua, innkuan chih kiang ah Ration Card piak hiding uhi.

 

NFSA toh kisai in consumer-te’n a lungkim­louhna uh a tuttheihna ding uh state government in bawlsak a, huai dung­zui in a kisaipih district teng a ADM-te District Grievances Redressal Of­ficer (DGRO hingal ding ua, huai banah State Consumer Helpline num­ber 18003453821 leng bawlkhiak in om hi. On­line tungtawn a lungkim­louhna taklang utte a ding inleng www.pdsmanipur. nic.in. ah tuttheih ding a, huai banah State Con­sumers Commission leng State Food Commission chi a khek in omta hi.  

 

 

BJP in IMC polls tuh ding candidate 7 puang

IMPHAL, Apr 29: June 2, 2016 a Imphal Municipal Corporation (IMC) polls om ding tuh ding in, tuni Kiginni in Manipur BJP in party candidate 7 puangkhia hi. BJP party president Thounaojam Chaoba Singh in party office a press meet neihna hun a, a gendan in, IMC polls tuh ding lunggulh candi­date 7 te pompihna leng ka pekhinta chi’n gen hi. Chaoba Singh in a gen­zelna ah, IMC polls a seat 8 tuhna ding in BJP nominee-te kiang ah leng party ticket piakkhiak hita chi’n gen hi.

 

Maban a polls a ding in Indian National Con­gress (INC) in zingchiang Kiginni in form hawm pan ding hi. Manipur Pradesh Congress Com­mittee (MPCC) Secretary (Administration) thusuah dungzui in, May 8 tan in form piaklut ngai ding hi. Party upa mahmah Con­gress in ward 27 a IMC polls om ding ah BJP-te khauhtak in kibeihpih ding hi. Manipur People’s Party (MPP) inleng party ticket zang a IMC polls tuh nuamte candidate-te ading in May 3 in form hawmkhiak sawm hi. Party thusuak dungzui in, May 15 tan in form piaklut ngai ding hi. Municipal polls om ding toh kisai, BJP leh INC ading in, kum nawn a state assembly polls om ding cheplawkna masa dan in ngaihtuah in om hial hi.

 

April 27 in IMC polls ading numei leh Sched­uled Tribes candidate-te ading a Reserved seat omte puankhiak hiding hi. ST candidate-te ading in Ward Nos 1, 21 leh 24 limsit in om hi. Ward No- 24 ahihleh numei ST can­didate ading in koihsak in om hi. Ward Nos 8, 12, 16, 18, 22, 19, 23 leh 25-te a hihleh ST numei tellou numei candidate dangte ading in koihsak in om hi.

 

 

Thangsianbiak Zou ‘kidnapped’ in om

LAMKA, April 29: 60th Singngat A/C MLA Ginsuanhau’ Private As­sistant (PA) Mr Thang­sianbiak @ Biabiak, a pai­sa April 26, 2016 nitak dak 5:00 vel a bazar kai dia car a pawtkhia inn tungkik nawnlou hi. Amah ahi­hleh TRA helpawlte’n a pimang uh hidia muan­moh hi a, helpawlte’n Singngat MLA kiang a sum lakh bangzahhiam ngen uh hidan in thutut kingah hi. Thangsianbiak ahihleh tulel a Imphal a Zou Youth Organisation a vice president lenlel hi’n thutut kingah hi.

 

 

Jettwings Selection test ah mi 225 tel

LAMKA, April 29: Department of Tribal Affairs & Hills, Govt. of Manipur sponsored-na leh CEO/ADCC saina in tuni, April 29 sunnung dak 1:00 in B. Vengnuam a Greenwood Academy ah Jettwings Institute of Airlines & Hospital­ity, Tourism & Manage­ment a ding in selection test exam om hi. Hiai hun ah class- XII passed student 225 tel ua, exam sungteng in KSO, ZSF leh HSA makaite’n ompih in buaina bangmah omlou in zousiang uhi.

 

 

KIM leh KSO in Mary Kom kipahpih

IMPHAL, April 29: Kuki Inpi Manipur (KIM) leh KSO GHQ in Member of Parliament (RS) Mang­te Chungneijang Mary Kom guan a om kipahpih thu taklang uhi. Mary Kom in Manipur kia hilou a NE a dia minhoihna a tut banah kimawlna lam a lohchinna banah MP dia guan a om ziak in kipah­pih mahmah uh ahihdan leh a hinkhua a hong lo­hchin touh zel deihsakthu khak uhi.

 

 

Sielmat Christian Hospital ah Councelling training nei

LAMKA, April 29: District AIDS Control Officer/CCPur saina in tuni sunma sunma dak 11:00 in Sielmat Chris­tian Hospital ah Councel­ling knowledge to nurses in health set up tungtang ah Councelling train­ing nei uhi. Hiai hun ah Dr. Phirthanglien Buhril, District AIDS Controlled Officer(DACO)/CCPur in Councelling training hong­khia hi. Huai zawh in Ben­zamin AIDS tungtang sin­sak a, hiai hun ah Sielmat Christian Hospital leh Pri­vate Hospital tuamtuam apan Nurse 50 val tel uhi.

 

 

DHS 1st Execu­tive Meeting nei

LAMKA, April 29: District Health Soci­ety, Ccpur in National Health Mission (NHM) programme toh kisai a financial year 2015- 2016 a dia Executive Committee meeting ma­sapen ding in tuni sun­ma dak 11:00 in Chief Medical Officer/Chura­chandpur Office Cham­ber ah meeting nei uhi. Hiai hun ah Community Health Centre/Primary Health Centre a Medi­cal Officer incharge teng ban ah BPMU staff-te tel uhi. ASHA toh kisai leh financial toh kisai banah physical performance leh family planning & immunization tung­tang a panlak dingdan genkhawm uhi. Hiai hun ah, a kisaipihte kimtak in tel uhi.

 

 

Press Team in Spot verification bawl di’n Henglep zuan

LAMKA, April 29: Lamka khopi leh Imphal pansan a printed media team in Vuahpi, huihpi leh gialpi thuak zodawn a omte amun mahmah a velchian ding in tuni’n kuankhia ua, amaute Pas­tor D. Kamchinmang, Local Pastor, Hiangtam Lamka in Lamka Press Club apan khakkhia hi.

 

Press team in district sung a major natural ca­lamities ompen amun mahmah ah etkhiak ding lunggulh in bialtu Minis­ter kiang ah thautui man ding leh a poimoh bang sensak ding in ngen mahle uh lohsam uhi. Himahleh, Chongkhozou EM/ADCC in Delhi a om himahleh hiai thu a zak in awlmo­hhuai sa in a poimoh bang sensak a, huai banah DC/ CCpur inleng a poimoh bang diesel a sensak ba­nah, Letzamang, PO/ DRDA in leng singpi dawn­na ding pia hi. Amaute kith­uahpihna ziak a, press team te kuankhe thei ahihna uah amaute tung ah press te kipak mahmah uhi. Press team kuankhete ahihleh zingchiang a hong tungkik ding ua lamet hi uhi.

 

 

PTC-GHQ CWC meeting nei

Lamka, April 29: Paite Tribe Council (PTC) General Headquarters a Central Working Com­mittee (CWC) in tuni, April 29 sunnma dak 11.00 in PTC-GHQ Con­ference Hall, Hiang­tam Lamka ah meeting nei uhi. Huai hun ah Mizoram veh a zin PTC-GHQ makaite lak a pan in John K Ngaihte, General Secy., PTC-GHQ in report tomkim gen a, a zinna uh toh kisai report lai pek 7 dim a kigelh hawmkhia hi. Tua zoh in Mizoram Paite Tribe Council elec­tion ding tungtang leh thu poimoh tuamtuam genkhawm uhi.

 

 

AMTWU in Tribal Colony a report pia

Imphal, April 29: New Delhi a Cen­tre makai tuamtua­mte kimuhpih a zin All Manipur Tribal Womwn Union, Ccpur makaite a hongtun­nung un tuni, April 29 sunnung dak 12:00 in EBCC Sunday School Hall, Tribal Colony ah a khualzinna uh toh ki­sai report pia uhi. Hiai hun zatna ahihleh Paite Tribe Women Union, Tribal Colony Area, New Checkon, Imphal saina a neih hi a, hiai hun ah PTWU a pan Donngaihvung in sec­retary report pia in G. Nangkhanthang, Presi­dent PTC, Tribal Colo­ny Unit in hunkhak hi.

 

 

Bengal Assembly Polls Phase 5:

District 3 huap in seat 53 ah voter 1.2 crore te’n vote khe ding

Kolkata, April 29: Zingchiang Kiginni in South 24 Parganas, Kol­kata south leh Hooghly district-te ah constitu­ency 53 ah West Bengal assembly polls phase 5na ding in vote khiakna om nawn ding hi. South Kol­kata a polling booth khat, transgender booth chia minlohna mun a presid­ing officer ding a, a khat­veina di’n transgender te a kipan Riya Sarkar guan ahih toh kiton in, zingchi­ang poll om ding in trans­gender te hamphatna suak ding hi. West Bengal a voter 6.5 crore om lak ah third gender a kipan in voter 758 vel om uhi.

 

Kiginni zinglam dak 7 in polling booth 14,500 val ah voter 1.2 crore – te’n South 24 Parganas, Kolkata south leh Hoogh­ly district-te huamsuak a constituency 53 tuh ding a kisa numei 43 tel in candidate 349-te a ding in, nitaklam dak 6 tan in vote khe ding uhi. Voter-te’n a polling booth a ki­vual dendon a vote khiak ding ngak sang in, amau booth chiat uh a phak hun ding uh mobile app ‘Q4U’ pansan in SMS tung­tawn in theihsak in om ding uhi. Tua toh kiton in voter-te’n kivual ses­elou a, amau vote khiak hun ding a theih ut uleh Google Playstore apan in app a download uh ngai ding hi. Queue manage­ment app zang siamlou te’n amau EPIC number pia in 7022192666 ah SMS khak le uh baihlam­tak in a vote khiak hund­ing uh dawnna ngahpah ding uhi.

 

West Bengal Assem­bly polls phase 5na ding a vote khiakna om ding za­len leh siangthoutak a sai ahih theihna ding in, polls neihna mun ding district 3 ah central leh state police force personnel 90,000 koih in om uhi. Election Commission official-te’n a gendan un central po­lice force company 680 vel leh state police per­sonnel 20,000 val zat a om hi’n gen uhi. April 5 leh 11 polling phase masapen neihna hun ah venbitna peding in cen­tral force company 400 kia zat in om hi. Phase 2na ah central paramili­tary force company 700 val zat in om uhi. Phase 5na a polling toh kisai bangkim enkaitu ding in general observers 34 guan in om ua, amaute panpihtu ding in micro-observers 823 guan in om hi.

 

 

Taret lok lui ah siluang nih muhkhiak in om

Chandel, April, 29: Tuni Sintawpni in Chan­del District sung Teng­noupal Police Station nuai a om Moirengthel kho kiang a Taret Lok lui ah, kaplup hiding a muanmoh siluang nih, tuitung a kilaam muhkhia uhi. Hiai mi nihte ahihleh gamlak a, a hon a sabenna a pang, April 22 a nung a intung kik nawnlou uh hi­dan in thusuak in taklang hi. Hiai thil tung toh ki­sai in kuamah a kipuang omlou a, muanmoh ding leng thei nailou uhi.

 

 

 

NEWS LAKTOM

 

EBC Bye-Law kisinsakna nei

EBC, Lamka North Division saina in tuni sunma dak 10:30 in Bungmual, Zo-ar Veng a EBCC Bethany biakinn ah EBC Bye-Law (Danbu) thak kisinsakna om hi. Hiai hun ah EBC Lamka North Division sung a saptuam chih a pan Local Upa Committee, BYF leh BDF Committee member-te tel ua, Dr. N. Tualkhankham in sinsak hi.

 

 

Hearing Aid hawm na leh assessment nei ding

Zingchiang, April 30, 2016 (Kiginni) sunma 10:30 in IED/ SSA Manipur leh Centre for Community Initiative (CCI) kithuah in IED-SSA CCpur Resource Centre, Thangzam Road, Laitui Medico sak ah khozakna hoihloute a ding a etchetna leh hearing aid hawmna (assessment and distribution & fitting of hearing aid) om ding hi. Hiai hun ah naupang kum 18 nuailamte a utpeuh teltheih ding hi.

 

 

Hornbill Cable suaklou ding

North East a dia Cable Network masapen Hornbill Cable Network, Mission Road, Hiangtam Lamka in a zat Generator a siat ziakin zingchiang April 30, 2016 Hornbill Cable khahkhiak hilou ding a, subscriber ten ana theisiam ding in ngen uhi.

 

 

SUNNA:

 

Lamkhosat Vaiphei @ Arrow of Leilon Saronphai, Sadar Hills damlouhna khenkhat ziak in tuni, April 29 zingkallam dak 4:30 vel in si a, tuni mah in Leimakhong Champhai hanmual ah kivui hi. Amah ahihleh ZRA cadre lui (3rd batch) ahi. RIP.

 

Chongzavung (88) m/o Zamkhankap, L. Mission Veng, tuni nitaklam dak 5:30 in si a, zingchiang in Lamka hanmual ah kivui ding hi. RIP.

 

Khupmuanlal (3) s/o Mangsuankap, Khajang, damlouhna ziakin tuni’n si a, a khua uah vui hiding hi. RIP.

 

Haulianthang s/o (L) Upa Kamkhogin, Mata, kal natna ziak in tunitak 6:00pm velin si a, zingchiang in Mata ah kivui ding hi. RIP.

 

 

 

...for more details : Click here