You are here: HomeRSS FeedsThe Lamka Post

The Lamka Post | May 26, 2017

Friday, 26 May 2017 10:48

Manipur a RS bye-poll ah BJP Bhabananda vualzou

IMPHAL, May 25: Tuni Ningani a Manipur a pan Rajya Sabha seat omsun a bye-election ah BJP’s Kshetrima­yum Bhabananda Singh in a kibeihpih Congress nominee Elangbam Dwi­jamani Singh zoukhia hi. Tuni a State Assembly secretariat a state Assem­bly member 60te’n bye-election a vote a khiakna uah Bhabananda in vote 39 mu a, Dwijamani in vote 21 mu hi.

 

February 2017 a state a sitting MP Md Haji Ab­dul Salam in sihna a tuah nung a seat awng huk­dimna ding in bye-elec­tion neih in om hi. Tuni a bye-poll ah ruling BJP leh opposition Congress-te tangtak in kikantuah uhi. Rajya Sabha mem­ber ding a telchingthak Bhabananda Singh ahi­hleh March 1, 1960 in pi­ang a, N Marina Devi toh kiteng uhi. Kum 1969- 1976 sung Sainik School, Goalpara, Assam ah kai a, kum 1980 in Hansraj College, Delhi a kipan English Honours zoukhia hi. Manipur University a kipan in LLB leng zoukh­ia hi. Kum 1999 a kipan in Bar Council of India, NE region advocate ding a guan in om hi.

 

Ksh Bhabananda Singh in kum 1995 in BJP zom , booth level a kipan state level tan in dinmun poimohtak luahtou den a, political toh kisai nas­epnate ah leng thanu­amtak in pangtou den hi. Kum 2010 in Pravesh Prashikhan Varg ah khatna in pang hi. Kum 2009 in BJP state presi­dent election saina ding in SRO (State Returning Officer) BJP, Manipur Pradesh ding a guan in om hi. Booth level sec­retary, general secretary leh president chihte len­tou a, kum 2008 in BJP, Sagolband Mandal presi­dent ding a guan in om hi. Tutan in BJP presi­dent post lentou den hi. Nitaklam dak 5.30 a re­sult puankhiak ahihnung sawtlou in, Manipur BJP unit in party office ah bye-election a vualzohna kipahpihna program zat­pih hi. Nitaklam dak 4 in vote khiakna khak in om a, nitak dak 5 in vote sim­na kipan a, minute tam­lou sung in result puang ngal uhi.

 

 

Chief Minister N Biren in Class-XII commerce topper pahtawi, mi tamtak in panpihna pia

IMPHAL, May 25: Council of Higher Sec­ondary Education, Ma­nipur saina nuai a Class XII examination, 2017 result suak ah part-time a niteng a nektawm zong a kiloh migenthei Thou­naojam Loyangamba Meitei in commerce stream ah 4th position luah in, sangtak in Class XII zoukhia hi. Gen­thei leh zawng mahmah Thounaojam Loyangam­ba Meitei in sangtak a exam a zohkhiak ziak in, chief minister tel in mi tamtak in pahtawi ua, a tupte tangtunna ding in lametna kong lianta hon­sak inleng om hi.

 

Meitei in a insung a poimohte suktuahna ding leh a laisimna ma­ban a sutzopzel theihna ding in construction site ah part-time in kiloh in nna sem hi. Local media a sangtak a exam zoukhia ahihdan suahkhiak ahih hun in, chief minister N Biren Singh tel in deih­saktu tamtakte’n pan­pihna khutvan ngal in, panpih sum tamtak leng pekhawm uhi. State chief minister N Biren Singh in a office ah Meitei leh a nu-leh-pate kimuhpih ding in chial ngal a, Loy­angamba Meitei of Keibi Khullem Makha Leikai of Imphal East district kiang ah huhna sum leh incentive dangdang pe­khia hi. Singh in maban a class sangzaw zilna ding admission bawlna ding, laibu leina ding in dis­cretionary fund a kipan in Rs 50,000 pekhia hi. Loyangamba in niteng a kiloh a nasep a neihte a khawlsan theihna ding in chief minister in a ki­vakna ding a bank loan Rs.2 lakh leng saisak ding in chiam hi. Biren in Loy­angamba kiang ah maban a kuhkalzaw sem a pan­gtou ding leh state leh a inkuante tawisang ding a, hasuan kawm in, govern­ment’s housing scheme nuai a Rs 1.20 lakh pe ding hidan inleng chiam hi. Govern­ment school student-te lak a rank sangtak a ngah kipahpihna in CM in Loy­angamba kiang ah incen­tive hunkhop leng pekhia hi.

 

Th Banamali Meitei leh Ichal Leima-te tapa Loyangamba in, a khan­vualpihte toh kibanglou in, thilbawlna mun ah ki­loh in nasem sek a, high school a lai a zil kawm in tupi toh pang in panla hi. Loyangamba in amah mimal a company khat phuhkhiak ding lunggulh a hihdan gen a, mizawng leh genthei inkuante a kipan student-te laizilna panpih leh a tupte uh tangtunna ding a sepna piak ding tup in nei hi. Class-X exam ah 70% marks mu a, tutung Class XII result ah total mark 500 lak ah 346 mu hi. Government institution student tamtakte lak a top 5 tan luahpha student masapen hilai hi. Tulel in Churachand Higher Sec­ondary School Imphal ah kai hi.

 

Tuni Ningani in­leng private company khat Mangal Lunar in sum a huhnate ban ah solar lighting system pia uhi. Information Cen­tre for Hill Areas Mani­pur (ICHAM) President N Rajendro in a maban laizilna ding a poimoh admission fee sensak ding leh a laizilna ding a kha khat a Rs 3000 leh poultry firm peding a hi­hdan chiam hi.

 

 

Miz Assembly in kituaktak in GST Bill pom

AIZAWL, May 25: Mizoram Legislative As­sembly in tuni, Ningani in kituaktak in Mizoram Goods and Services Tax (GST) Bill, 2017 passed ua, India gamsung a state tuamtuamte lak a hiai bill passed 12na in pang uhi.

 

GST bill ahihleh state Taxation minister, Lalsawta in pawlut a, member 8 in nouneltak a, a gennung un pom uhi. State sung a Goods and Services Tax (GST) bill pass-na ding in Mizoram Governor, Lt. Gen. (Rtd) Nirbhay Sharma in tuni’n assembly special session sam hi.

 

Mizoram Taxation minister, Lalsawta in bill toh kisai a phulakna ah, GST in state government a dia tax revenue khang­sak ding hidan in gen hi. Huai ban ah tulel a siah toh kisai a dan kizang pen GST in phiat mahleh siah lak a om item tuamtua­mte GST nuai a guanlut a om veve hidan in gen hi.

 

Governor Lt. Gen (Rtd) Nirbhay Sharma in a genna ah, GST in mipite a dia niteng poimoh van tuamtuamte kimanzaw a ngahtheihna ding a pan­pih ding hidan in gen hi. Huai ban ah Mizoram in­leng state dangte toh July 1, 2017 a pan gamsung pumpi uap a GST kizang ding pen zangtheita ding hidan inleng gen hi.

 

Assembly member tamzaw inleng siah toh kisai a dan bawlthak a om pen government leh mipi a dia hamphatna om tuak ding a lam-en ahihdan uh gen in kipahpih thu puang uhi.

 

Mizoram in tuni a GST bill a passed toh kiton in India ah state 12 in hiai Bill pomta uhi. GST Bill pomsa state dangte ahihleh Telan­gana, Bihar, Rajasthan, Jharkhand, Chhattisgarh, Haryana, Uttarakhand, Goa, Andhra Pradesh, Uttar Pradesh leh Maha­rashtra ban ah May 17 in Union Territo­ry Puducherry in pom hi.

 

Mizoram Legislative Assembly in tuni mah in Lalsawta in a puaklut Mizoram Value Added Tax (VAT) amendment bill pom uhi.

 

Lalsawta in a genna ah, Mizoram VAT Act bawlthak a poimoh ziak ahihleh alcoholic liquor, petroleum crude, motor spirit, high speed diesel, natural gas leh aviation turbine fuel chihte GST a telsak ahihlouh ziak hi’n gen hi.

 

Governor Lt. General (Rtd) Nirbhay Sharma in tuni a Mizoram Legisla­tive Assembly special ses­sion a sap ahihleh Goods and Services Tax (GST) pomna ding hi a, hiai bill pom ahih toh kiton in As­sembly Speaker, Hiphei in assembly session khak hi.  

 

 

Biometric Enrolment Camp ah mi 888 val kilata

LAMKA, May 25: Jeevan Pramaan (Digi­tal Life Certificate for Pensioner) chih thupi pansan in District e-Gov­ernance Society (DeGS) Ccpur makaih in Com­mon Service Centre-te’n Tuibong a District Trea­sury Office ah May 12 a pan May 31 tan daih ding in Civil Pensioners Aadhar Enrolment Camp nei uhi. Hiai enrolment camp ahihleh May 31 a bei ding chih himahleh June 10 tan neih ding in a hun behlap uhi. Tuni tan in civil pensioner/ family pensioner mi 888 val biometric kilata uhi. Ccpur district sung a pensioner 4,751 val lak ah 3,000 vel biometric kilak poimoh ding hi’n thutut kingah hi.

 

 

K. Sumkhanson vuakliam in om

LAMKA, May 25: Zan, May 25 nitak dak 5:30 vel in Zenhang Ba­zar ah pasal 3 vel in Mr K. Sumkhanson s/o K. Tuanzahau of Zenhang Lamka vua in a lutang mun 4 vel liam a, kintak a Lamka Damdawi Inn tut a om in doctor-te’n a liamna khuisak ua, tu’n damdawi inn ah etkol in om lel hi. K. Sumkhan­son ahihleh 1st IRB a semlel ahihban ah UBI/ Ccpur a security guard a omlel ahi. Zan nitak a Zenhang Bazar a vuak ahihlai in pistol leng kap­ging a om hi’n huai kiim a omte a pan thutut kingah hi. Mohna neilou sisan suah a om ban ah numei-naupang patausak thei dia gamtangte Zenhang Lamka Village Author­ity, YPA Zenhang Lamka Unit leh Zenhang Lamka Youth Club in mohpai­hna sangpen a mohpaih uh ahihdan thusuah bawl uhi.

 

 

Police-te’n zu litre 310 man

LAMKA, May 25: Tuni sunma in Ccpur Police OC makaih in Tui­bong bazar area ah zu check ua, huai ah numei khat a pan in tualsuak zu (DIC) litre 310 mankhia uhi.

 

 

ZAA in sunthu puang

LAMKA, May 25: Zogam Artistes Associa­tion (ZAA) founder mem­ber Nengzachin Thomte of Mualveng, Lamka, tulel a Meisavaih, Saiha, Mizoram a khosa lel dam­louhna ziak in tuni, May 25, 2017 zingkallam dak 5 in mualliam hi.

 

ZAA a dia khuam poimohtak ban ah Asst Secy dinmun ana lenngei Nengzachin Thomte in a hunloutak a sihna a tuahna tung ah T. Thangthuam, Persident leh Siam Suantak, Sec­retary, ZAA in sunthu puang ua, a nutsiat a innkuanpihte Pathian in khamuanna a piak deih­sakthu taklang uhi.

 

Nengzachin Thomte ahihleh mi chitak leh tupguhna nei mi hi a, ZAA abum ‘Tulmoh Hen’ chih album a, a tel ban ah ‘Luansiam Pengpelep’ leh ‘Nanglou Ngal’ chih late ziak in minthang mahmah hi.

 

 

BDF, Tonglawn(P) in pan­pihna ankuang lui ding

Lamka, May 25: November 2, 2017 chiang a Baptist Dorcas Fellow­ship (BDF), Tonglawn (P), EBC Lamka South Division, kum 50 chinna Golden Jubilee lopna ding vai toh kisai in, tualsung Baptist Dorcas Fellowship in, Kiginni (May 27, 2017) nitaklam dak 4.30 leh dak 6 kikal in Lamka South Division Office Campus ah panpihna ankuang lui sawm uhi. Ngainatu kua­peuh kiang ah panpihna ankuang sawkpih ding in chialna bawl uhi.

 

 

Henglep block sung Centre 3 ah NFSA antang koih ding

LAMKA, May 25: Henglep block sung Tipaimukh Road line a dropping centre 3 ah National Food Security Act (NFSA) antang April 2017 quota koih hiding hi. Huai ding in San­gaiprou Godown a pan contractor-te’n truck in antang va paw ding ua, May 27, 2017 zingkal dak 7 in Tuibong Peace ground ah gari dang toh kipetuah ding uhi.

 

Henglep block sung a dropping centre 3-te ahihleh Tuilaphai drop­ping centre ah Bungkot, Lhanjang-A, Lhanjang- B, Vungbuk, Tuilaphai, Tuilumjang, Thingkeu, V. Munlai, Chongkhojou, Mongken leh Mualdak a ding koih hiding a, L. Sadananda Singh, CSI leh Lalhriatrenga, CSI in enkai ding uhi.

 

Santing dropping centre ah Lailong (S), Saichang, S. Chongchin, Santing leh Nungsai a ding koih hiding a, NG. Washington Singh, CSI leh N. Nicky, CSI in enkai ding uhi.

 

Henglep dropping centre ah Kolhen, Song­phu, Henglep, Khanpi, Napphou leh Najang a ding koih hiding a, SH. Deepanker Sharma, CSI leh B. Joshi Kumar Shar­ma, CSI in enkai ding uhi.

 

Hiai toh kisai in a kisaipih official-te’n hoi­htak a enkai in antang hawm dan hoihtak in chiamteh ding ua, FPS Agent-te kiang tungna hiam chihte kanchian in enkai ding uhi. Hiai toh kisai mah in May 29, 2017 chiang in DC/Cc­pur in Henglep pha ding a, NFSA antangte FPS Agent-te’n a hawmna mun un enkhe ding a, SDO/Henglep in kithu­ahpih ding hi.

 

 

 

 

 

NEWS TOMKIM

 

JSY/JSSK sum hawm ding

LAMKA, May 25: Zingchiang, May 26, Sintawpni a pan in Lamka Damdawi Inn a April 2017 a pan JSY/JSSK sum hawmlouh a omte kihawm ding a, a kisaipihte’n ngaihven ding in a saitute’n theihsakna bawl uhi. Hawmkhiak nailouh a om a dangte ahihleh awl a hawmkhiak hinawn ding hi’n thutut kingah hi.

 

 

Biometric leh Aadhar tungtang meeting ding

LAMKA, May 25: DC/Ccpur makaih in May 27, 2017 sunnung dak 2:30 in DC/ Ccpur office a BRGF Hall ah biometric enrolment pailel leh Aadhar toh kisai meeting om ding hi. Huai hun ah Ccpur district sung a SDO teng ban ah a kisaipih agency-te tel ding uhi.

 

 

ESE Anniversary zang ding

LAMKA, May 25: Zingchiang, May 26 sunma dak 11 in Exelsior Spoken English in 7th anniversary zang ding ua, chief guest leh guest of honour in R Sudhan, IAS, DC/Ccpur leh Rakesh Balwal, IPS, SP/Ccpur pang ding uhi.

 

 

VDF personnel vawtu police in mankhia

LAMKA, May 25: Police a pan kizadan in, VDF a semlel Mr Ginlian John (28) s/o Josai of HQ Veng, May 23, 2017 nitak dak 10:30 vel in Lamka Damdawi Inn morgue kiang a vawtu Songginlian Ngaihte (30) s/o B. Ginkhozam Ngaihte of Dorcas Veng, New Lamka, zan sunma dak 10 vel in Police-te’n mankhia uhi. Amah ahihleh zan in CJM court ah dingsak ua, court in police custody a May 30, 2017 tan om ding in theisak hi. Hiai thu ah Police in FIR No. 30 (5)2017 CCP PS U/S 186/325 IPC bulh uhi.

 

 

Food Safety registration bawl ngai

LAMKA, May 25: Zonal Education Office, Ccpur leh CEO/ADCC nuai a midday meal hamphatpih school-te a headmaster/headmistress-te’n State Food Safety Commissioner order dungzui in Designated Officer Food Safety Office, CMO/Ccpur Office campus ah June 10, 2017 tan a registration bawl ngai ding hi’n T. Goukhomang, ZEO/Ccpur in theihsakna bawl hi.

 

 

SUNNA:

P Chingzamang @ Mangte (58) s/o (L) P Chintong of Red Cross Road, Lamka, damlouhna ziak in zan, May 24 nitak dak 11 vel in si a, tuni’n kivui hi. RIP.

 

 

 

 

 

…for more detail : Here