You are here: HomeRSS FeedsThe Lamka Post

The Lamka Post | April 28, 2017

Friday, 28 April 2017 08:22

April 14 gangrape case:

Sualluih a omte tung a thudik a vaihawm ding phutna in mass protest rally om

Imphal, April 27: Manipur khangthu a ma­sapen hilai ding in, tuni, Ningani in April 14, 2017 a Phaknung, Imphal a tuailai pasal bangzah­hiam in numei naupang nih a pawngsualna uh toh kisai deihlouh lahna in, Imphal khopi sung ah mass protest rally thupi­tak om hi.

 

Core Committee Against Phaknung Gan­grape of Two Minor Girls saina in mass protest rally thupitak om a, huai ah singtang leh phaizang bial a pan mipi tamtak ban aj civil society organ­isation, student pawlpite leh club tuamtuam tel uhi. April 14 a kumchin­glou numei naupang nih pawngsualna deihlouh taklatna in chi-leh-nam leh sahkhua khentuam omlou in Manipur a nu­mei tengteng leh nam teng ban ah palaite’n placard tuamtuam tawi in Ima Khunthok-Nganbi, DM College campus a ki­pankhia in, Khoyathong, Dingku Road, Lamlong leh Minuthong tawnsuak in in Ima Khunthok-nganbi ah public meeting nei uhi.

 

Rally a telte’n pawng­sual a om numei naupangte tung a, a kintheipen a thudik a thukhenna bawlsak ding in ngen uhi. Public meet­ing a thugen pawl tua­mtuam a makaite’n state Government kiang ah, kizeksaklou a thuaktute tung a thudik a thukhen­na bawl ding in ngen uhi.

 

April 14, 2017 in Imphal East district sung ah numei naupang nihte a tangvalte uh toh gari a tailai, lamkal ah pasal hon khat in ana lam­tan ua, a tangvalte uh a vuaknung un, mun tuam a pikhia in pawngsual uhi. Hiai thiltung toh ki­sai in police-te’n tuailai tamtak man in thudotna neilel uhi.

 

Rose Mangshi Ha­okip in a gendan in, hiai kipawngsualna thubuai toh kisai a dik mah ahih ziak in, a kisai­pih thuneite’n migiloute tung a, a kituahpih bang gawtna sangtak a piak uh poimoh leh damsung suangkul tansak poimoh hi’n gen hi. Huai ban ah pawngsual a om kum­chinglou numei nau­pang 2-te kitundingna ding leng piak poimoh hi’n gen hi. BJP makaih government thak in thil­phutte a pichin ngei lam-en ahihdan leng gen hi.

 

 

Mohpuakna limsaklouh ziak in Govt in PHE AE leh SO suspend

IMPHAL, April 27: Yaiskul Chingakham Lei­rak a drainage leh sewer­age bawlna mun a tuahsia ziak a mi khat in liamna nasatak a tuahnung in chief minister N Biren Singh makaih Manipur government in tuni, April 27 in Public Health Engi­neering (PHE) official nih in a mohpuakna uh leh a nasep uh ngaihsaklou chih ziak in a sepna ua pan khawlsak (suspend­ed) hi.

 

Addl. Chief Secre­tary (PHE) Shambhu Singh in order a suahna ah Assistant Engineer Laishram Irish Singh leh Section Officer Keisham Patel Singh, tuni a kipan a sepna ua pan suspend ahihdan taklang hi. PHE official nihte suspend ahihsung un a kivakna ding khom uh allowance piak hiding ua, Imphal pawtsan theilou ding uh hidan inleng order in tak­lang hi.

 

 

Extra Judicial killing verdict:

Centre in curative petition a khiak SC in nawlkhin

Imphal, April 27: Tuni, Ningani in Supreme Court Division Bench in July 2016 a thukhenna omsa bawlthak ding deih a Centre in curative peti­tion a khiak nawlkhinsak hi. April 12, 2017 in cen­tral government in cura­tive petition pia hi.

 

Centre in SC ah, Ma­nipur a, a khengval a se­curity force-te gamtatna leh thukkikna thagum zangtheilou ding a Indi­an Army leh Paramilitary force dangte tung a thu­piak leh complaint om tengteng suikhevek ding a July 2016 a thukhen­na om bawlthak ding in ngen hi. Curative peti­tion ngaihkhiaksak in om a, judge 5 makaih SC division bench in Rupa Ashok Hurra vs Ashok Hura leh a dangdang (2002)-te kawkmuh in, petition khiak a om nawlkhinsak hi.

 

 

Police-te’n LPG leh thautui a matsakte uh pekik

LAMKA, April 27: Addl SP (L&O) makaih in Police team in April 21 in Lamka khopi sung mun tuamtuam ah black a kizuak petrol litre 992; diesel litre 478; SK oil litre 30 leh LPG refilled cylinder 22 man uhi. Hiai toh kisai in tuni’n thau­tui leh LPG neite’n DSO/ FCS, Ccpur toh suaikai (bond sign) ua, tuni nita­klam dak 4 vel in thautui leh LPG neite’n Lamka Police Station a pan in lakhia uhi.

 

Phalna neilou a thautui leh LPG refillled cylinder zuak a om mat a omzah leh a neitute ahihleh Haopu (40) s/o Seikhothang of Tuibong a pan in petrol litre 40 leh diesel litre 5; Haopu (40) s/o Ngetthang of Khol­mun a pan in petrol litre 5 leh diesel litre 80; Mang­cha (40) s/o Haukholen of Bijang a pan in petrol litre 660, diesel litre 65, koresene litre 30 leh LPG cylinder 22 hi a, huai lak ah cylinder hawm 5 leh refilled 17 ahi.

 

Huai ban ah Thaibe­ma Lubricants, Thaibe­ma (51) s/o Sanatomba of Zenhang Bazar a pan in petrol litre 40; Dong­zakhup Guite (50) s/o (L) Damkhotuan of Vengnuam (S) a pan in petrol litre 150 leh diesel litre 118; Lynda Biaklun (27) w/o Thangkhosiam of Lanva a pan in pet­rol litre 7 leh diesel litre 5; S. Lampu (32) s/o S. Pumvuh of Lanva a pan in petrol litre 60 leh die­sel litre 200; Bisho Singh (36) s/o (L) Achaoba Singh of Hill Town a pan in petrol litre 30 leh die­sel litre 5 ahi.

 

 

Raja Goukhothang Guite’ Statue hongkhe ding

LAMKA, April 27: April 29, 2017 (Kiginni) sunma dak 10 a kipan in G. Tonjang, Lamka, Ccpur district ah sing­tangmite suangtupa Raja Goukhothang Guite’ Stat­ue honkhiakna om ding hi. Hiai hun zatna mi po­imoh tuamtuam in uap ding ua, Innpi 15 a kipan thugen om ding hi.

 

Hiai hun zatna Ricky Vanlallawm Guite in makaih ding a, Recording Secretary in Khupchin­thang Guite, Asst Secy., Guite Innpi pang ding hi. Upa Henkholun Doungel, Chief of Saihenjang, Cc­pur in thumna in hun pan ding a, Rev. G. Haukho­mang, Chairman, Guite Innpi in vaidawn thugen ding hi.

 

Thangkhosei Guite, Innpipa in introductory speech gen ding a, Pau­minthang Guite, Innpipa in Statue hongkhia in Upa Thangchinlian Guite, Se­nior Adviser, Guite Innpi in thumna in laan ding a, tua zoh in minute 1 sung sunna om in pakkhi piakna in zui ding hi.

 

Hiai hun ah Guite In­npipa, Guite Innpi Chief Adviser, Doungel Innpi, Kipgen Innpi, Haokip In­npi, Sitlhou Innpi, Chon­gloi-Hangshing Innpi, Khuptong-Valte Innpi, Tonsing Innpi, Ngaihte Innpi, Hmar Innpui, Vai­phei Innpi, Gangte Innpi, Zou Innpi leh Hangmi Innpi a pan thugenna om ding hi.

 

Tua zoh in Lang­khanpau Guite in kip­ahthu gen ding a, Rev. Jangkholam Doungel, Chief of Kotsohoi village, Ccpur in ankuang latna leh hunkhakna thumna nei ding hi. Hiai hun ah Dony, Moibiaklian, Khampu, Chingngaihl­ian, Boijang Haokip in lasa ding uhi. Hiai hun kuapeuh in uap chiat ding in Thangkhosei Guite, Chief of G. Tonjang vil­lage in chialna bawl hi.

 

 

March 27 a accident tungtang inquiry report pia

IMPHAL, April 28: March 27, 2017 a Mani­pur state sung National Highway-2 (Imphal-Di­mapur road) leh NH-37 (Imphal-Jiribam road) a tuahsia ziak a mi 28 sihna toh kisai in tuni’n Manipur government ah inquiry report piaklut in om hi.

 

Director (Transport) Smt. H. Roshita in re­port a, a taklatdan in, gari tuahsia a permit piak a om ah validity taklat ahi­hlouh ban ah Ranjit Ku­mar (27) s/o Badhu Ram leh Deepak Rasaily (29) s/o (L) Khadka Bahadur Rasaily kiang a driving licence piak a om leng bawltawm hidan in tak­lang hi. Hiai thu suizui ding in Chief Minister N. Biren Singh in Director General of Police, Ma­nipur theisak a, hiai thu suizui ding Committee bawlkhia a ni 15 sung a report pe lut ding in thei­sak hi.

 

Huai ban ah DGP, Manipur in Transport Department toh pang­khawm a driving licence, gari registration/permit ban ah validity chihte sui­zui a enchian ding inleng Chief Minister in theisak hi. Committee in report a piaklut zoh chiang a driv­ing licence, gari registra­tion/permit petute lak a mohna nei om leh gawt­na piak hiding hi’n leng Chief Minister in gen hi.

 

 

OC/TCP in workshop neite kihoupih

LAMKA, April 27: Tuni, April 27 sun dak 12 in OC/Traffic Control Po­lice in Lamka khopi sung a bik in Light House a pan New Lamka/Lanva kikal Tedim Road zul a gari worskhop neite sam­khawm in meeting neih­pih hi. Hiai hun ah OC/ TCP in khopi sung a lam­liante kawchik gawpta ahihman in lamlian zul a bik in Tedim Road zul a workshop neite’n lamlian nawl a khe a paina dia kibawl ‘footpath’ tung a gari bawl nawnlou ding in ngen hi. Huai ban ah work­shop a sem naupang kum­chingloute gari test-saklou ding leh gari bawlzohnung a test a taikhete’n leng hel­met khuchiat ding in ngen hi. Hiai hun ah Tedim Road zul a gari workshop nei mi 10 vel paikhawm uh hi’n thutut kingah hi.

 

 

April 29 & 30 in River Bank music festival om ding

Imphal, April 27: April 29 leh 30 in Lei­pung Wah Entertainment in Imphal Turel luipang kiang a Bhagyabati Lei­kai, Imphal East district a Nongmaishang ah a 4veina ding in River Bank Music Festival, 2017 sai ding uhi. Hiai festival in maban a khangsawnte khualna in, Manipur a lui­tui buahsak a omte sukbei ahihtheihna ding thu puangkhe ding hi. Festi­val honna hun ah theme song Tapta khahkhiak hiding hi. Leipungwah Entertainment Director leh Festival Co-ordinator Tom Maisnam in thuthak­saite kiang a, a gendan in, mi tawmchik in Imphal khopi tawnsuak Manipur a luite kepbittuak ahihdan thei ua, hiai luite siangth­outak a kep ahihtheihna ding a awareness neihna ding a music festival sai a om hi’n gen hi. April 16 in festival saitute’n kikhekna chih thupi zang in, One Day Cycle Rally Qware­ness Campaign leng neikhin ua, hiai hun in Manipur Legislative As­sembly Speaker Yumnam Khemchand in cycle rally khahkhia hi.

 

 

Combined Force-te’n USRA helpawlte galvan mankhia

IMPHAL, April 27: Security force-te’n tuni, Ningani zingkal baihtak in Imphal East district sung a inn khat a buluhna uah innsung a pan in gal­van leh thautang tamtak mankhia uhi.

 

Imphal West SP N Herojit in a genna ah, tuni zingkal baihtak a Suantak Lamthianlal Vai­phei (37) of Heiroklen vil­lage, Kangpokpi district, innsung a pan galvan leh thautang matkhiak a om hi’n gen a, himahleh op­eration bawlna area ahi­hleh Imphal East district sung Andro police station nuai a om hi’n gen hi. Huai ban ah 6 Assam Rifles leh state police commando-te’n Imphal West district police toh pangkhawm a Suantak Lamthianlal Vai­phei’ inn a buluhna ua inn sung a pan galvan matkh­iak a om hidan inleng gen uhi. Combined force-te’n thuguk a ngah dungzui un tuni zingkal baihtak dak 2:30 vel in operation bawl uhi. Galvan matkh­iak a omte ahihleh AK-47 assault rifle nih, MA-3 as­sault rifle khat, pistol khat, magazines sagih, camou­flaged pouches thum leh thautang 215 hidan in po­lice thusuak in taklang hi.

 

Galvan matkhiak a omte ahihleh United So­cialist Revolutionary Army (USRA) helpawlte a hidan in SP/Imphal West in gen hi. Galvan matkhiakna inn neitu Mr Lamthian­lal Vaiphei leng thudot ding a mat hi a, huainung in Andro police station a piakkhiak a om hidan SP/ Imphal West in gen hi.

 

 

Zillai-GHQ in khakhe di’n ngen

LAMKA, April 27: Zillai (Vaiphei Students’ Assn) GHQ in tuni a thusuah a bawlna ah, Imphal West District Commando leh 6th Assam Rifle, Andro Post, Imphal East kigawm combined force-te’n operation a bawlna ua Mr. Lamthianlal s/o Thanggen of Hei­roklian village a mat uh bangmah lohlou a khahkhe di’n ngen uhi. Helpawl hidia muanmohte’n hiai kho­sung ah galvan nusia ua, helpawlte ahihleh combined force-te khosung a lutna ua kihemkhia uh hidan in taklang uhi.

 

Zillai-GHQ in a khonung a khosung a mohna neiloute’n bang thuak ding uh ahia chih ngaihtuahna neilou a kho­sung a va lut helpawlte tung ah lungkimlouh thu taklang uhi.

 

Heiroklian Village Authority leh Saptuam makaite’n a gendan un, Mr. Lamthianlal ahi­hleh Saptuam Upa hi a, helpawl toh kizopkhakna bangmah neilou hidan in gen uhi. Suichetna bang­mah bawllou a muan­mohna ziak lel a com­bined force-te’n Saptuam Upa khat a mat uh toh ki­sai a thil omdan suichian a, a baihtheipen a khah­khe ding in Zillai-GHQ in ngetna bawl uhi.

 

 

Miz Govt leh HPC-D in peace talks 4veina nei ding

AIZAWL, April 27: Zingchiang, Sintawpni sunma dak 11 in State Guest House, Chalt­lang, Aizawl ah Mizoram government leh Hmar People’s Convention- Democratic in peace talks round 4na nei ding uhi. Kihouna ah Additional Secretary (Home depart­ment), Lalbiakzama in Mizoram state govern­ment palaite makaih ding a, HPC-D Working Presi­dent L T Hmar in HPC-D palaite makaih ding hi. Hiai kihouna ah Hmar makaite lak ah Manipur a pan saptuam makai Lalthalien, Dr. John Pu­lamte, David Buhril leh Mizoram a pan Lalthl­amuana Hmar leh Lal­rammuanpuia leng tel ding uhi.

 

Hmar makai Lalthalien in a gendan in, kihouna hun ah gov­ernment leh HPC-D kal a lemna leh muanna kiptak leh dettoutak phuhkhiak ahihtheihna ding in agen­da tuamtuam genkhawm hiding hi’n gen hi.

 

Kum 2013 a kihouna nanungpen ah, Suspen­sion of Operation (SoO) behlap ding thu a ki­houna a lohsapnung in, August 2016 in Mizoram government leh HPC-D kal a peace talks sutzop thak in om hi. Ni tamlou paisa a Mizoram Home minister, R. Lalzirliana in a gensa bang in, Hmar political buaina sukveng dingdan zongkhe ding in, Mizoram government leh HPC-D in 8vei peace talks nei khinta uhi. November 11, 2010 in peace talks masapen nei ua, 2013 sung in bouruak thoveng leh kingainat­uahtak in peace talks 4vei nei ua, himahleh Suspension of Opera­tion (SoO) hun suksau ding thu a kithukimna a om theihlouh ziak in, hun sawttak kihouna khawlsan uhi. Hiai zoh kum 3 nung August 2016 in peace talks sumzom nawn uhi.

 

August 10, 2016 in peace talks masapen nei ua, October 5-6 in second round nei ua, December 16, 2016 in round 3na nei uhi. Hiai kihounate ah kum 1994 a HPC leh Mizoram government kal a kilemna suaikaih tungtawn a kibawlkhia Sinlung Hill Develop­ment Council (SHDC) a autonomy leh power tamsem piak ding thu­puk uhi. Kum 1994 a HPC a kipiakkhiak zoh in HPC-D bawlkhiak in om hi. HPC-D in Hmar-te luahna bial Manipur toh kigamgi North Mizoram a ‘separate autonomous district council’ bawl ding ngetna phuzomtou uhi.

 

 

ADC nuai a teacher leh staff teng sepna mun a om chiat di’n theisak

LAMKA, April 27: Soiminlian Lengen, MCS, CEO/ADCC in April 20, 2017 a theihsakna a bawlna ah, Autonomous District Council nuai a education system puah­phatna ding toh kisai in Right of Children to Free and Compulsory Edu­cation (RTE) Act 2009 nuai a Section 24 pansan in ADC Ccpur nuai a om school-te zuih ding in point 4 taklang hi.

 

Huaite ahihleh sub­stitute/proxy teacher muhkhiak ahihleh dan dungzui a action lak ding; Teacher leh non-teach­ing staff tengteng amau posting-na school chiat a kai vek ding; Headmas­ter/Headmistress teng in staff-te monthly at­tendence report a piak ding uh leh huai report pen a kisaipih kho hausa in countersign a bawl ding; School teng in office kong ah teaching leh non-teaching staff teng limlak, min, hihna (designation), omna khua leh mobile number takkhe chiat ding in theisak hi.

 

Teacher leh non-teaching staff-te leng utilisation chih om thei­lou ding a, a loutheilou a utilised a pai utte’n Ma­nipur government a pan lemsakpihna a lak masak uh ngai ding hi. District Board of Education a Ex-officio Chairman pen Deputy Commissioner hi a, Chief Executive Officer, ADCC toh pangkhawm in hiai theihsakna toh kisai khauhtak in enzui ding uhi.

 

 

19th Amamba Numit zat in om

Imphal, April 27: Hun paisa a chiindan omsa sutzopna in, tuni Ningani in Thoubal Apunba Lup (TAL) leh In­ternational Peace and So­cial Advancement, (IPSA) Kangleipak Manipur in Thoubal Melaground Community Hall ah kum 1891 a Anglo-Manipur Battle a Manipur a vuallel­hnung a nung a Manipur in zalenna a mansuah ni theihgigena in 19th Ama­mba Numit (Dark Day) zang uhi. Hiai hun zatna ah chief guest in Manipur Titular king Leishemba Sanajaoba pang a, func­tional president in TAL president Samom Raghu­mani leh special guest in national awardee Kh Ibotombi leh social sci­entist Dr Dhanabir Laish­ram pang uhi.

 

 

Salvation Army IET in Aizawl ah Centenary zang lel

AIZAWL, April 27: Salvation Army India Eastern Territory kum 100 chinna Aizawl ah zat in omlel hi. Mizoram a Salvation Army a lutnung kum 100 chinna Aizawl Mualpui Veng, R. Dengthuama Indoor Stadium ah zat in om a, hiai hun zang ding in khovel pumpi a Salvation Army heutu lianpen General Andre Cox leh a zi Commis­sioner Silvia Cox-te International Head­quarters, London a kipan kuan uhi.

 

Indoor Stadium kong a Centenary honna ding a bawl a om, Centenary Mei ahihleh IET Territorial Commander Commissioner Lalngaihawmi in zan Nilaini nitak in de-kuang a, Pathian ki­ang ah khawmpi latna nei in, kikhopna hun in zui ngal hi.

 

Zan a Centenary lopna ahihleh Mizoram Governor, Lt. Gen. Nirbhai Sharma leh a zi in leng uap ua, Salvation Army India Eastern Territory kum 100 chinna lopna a, a kihel theih kipahhuai a sakthu Governor in gen hi. Salvation Army nasepnate ana theizel ahihdan gen in, phat-huai a sakthu leng gen hi. Pathian in Salvation Army a vualzawl a, vualzawlna bulpi ahih ding a deihsak thu gen hi.

 

Hiai hun ah General Andre Cox in Pathian thugen a, nitaklam in General in Salvation Army Officer Training Col­lege ah Lt. Col. Kawlkhuma lim hon­gkhia hi. Mualpui a Centenary lopna ahihleh zingkal, sun leh nitak teng in Pathianni tan om ding hi.

 

April 26 ahihleh Mizoram a Sal­vation Army phutkhetu Lt. Colonel Kawlkhuma in Shimla a Salvation Army Officer a sinzoh a Aizawl a lutni hi a, hiai ni ahihleh India Eastern Territory in Territory a Salvation Army a lut ni a pom in, kumteng in hiai ni pen ni po­imoh in zang zel hi.

 

 

Mizoram ah Cricket Stadium bawl hiding: Mizoram CM

AIZAWL, April 27: Mizoram Chief Minister Lal Thanhawla in khovel a cricket stadium lianpen pawl a kigen Melbourne Cricket Ground (MCG), Australia a om chia a lian Mizoram a bawl hiding hi’n gen hi.

 

5vei Chief Minister hihna ana lenta leh school leh college a kailai a As­sam ai-oh a football leh hockey ana kimawl Lal Thanhawla in a genna ah, Sairang football ground kiang ah cricket ground bawl hiding hi’n gen hi. Hiai cricket ground ahi­hleh Melbourne Cricket Ground (MCG), Australia a om chia chia a lian leh entu mi 100,024 tatthei­hna dia bawl hiding hi’n gen hi.

 

Sairang ahihleh Mizoram state capital Aizawl a kipan gari a min­ute 30-40 kikal a tun ahi. Cricket stadium bawlkh­iak ding tup-le-ngimte a genna ah, Lal Thanhawla in world-class cricketer bawlkhiakna ding ahi chi hi. Hiai thu ahihleh Su­preme Court in Mizoram tel a northeast state-te a Justice R.M. Lodha panel in voting rights a piak­nung a, a gen ahi hi.

 

Chief Minister in Mizoram Cricket As­sociation (MCA) in full voting rights a ngahthei­hna dia pan nasatak a la ahihdan gen a, himahleh Board of Control for Cricket in India (BCCI) in ngaihsaklou ahi chi hi. Tuabangkal a, Lodha panel in northeast state-te a theihpihna a piak pen kipak mahmah ahi­hdan gen hi. Lal Than­hawla ahihleh tulel a MCA President ahi hi.

 

Tulel in Assam leh Tripura kia in BCCI a kipan theihpihna ngah a, tua ziak in Ranji Tro­phy leh BCCI-sanctioned tournament-te ah kihel thei uhi. Sharad Patel leh Arun Jaitley in BCCI Af­filiation Board Chairman hihna a letlai ua kipan in, MCA theihpihna piak hileh kum 5 sung a world class player bawlkhe ding ahihdan Lal Thanhawla in gen hi.

 

Pawar in BCCI Presi­dent a letlai a tamveitak hiai toh kisai a kimuhpih ahihdan gen a, himahleh khutvuak a kikgige hi’n Chief Minister in gen hi. Himehleh tu’n bel gam­sung maikaite’n tuailai tamtakte kiang a cricket tungtawn a, a hihthei­hna uh lahkhiakna ding a kong honsak uh ahi chi hi.

 

Lal Thanhawla in Mizoram a kipan top class cricketer piangkhe­sak thei ding ahihdan gen a, Mizo-te’n lungsim za­tak leh tupguhna nei uh ahi chi hi. Mizo tuailaite’n pianpih taksa hoih nei ua, fielding siam mahmah uh ahi chi hi. Local tourna­ment bangzahhiamte a mun a va en ahihdan gen in, hiai mun a talent hoih mahmah ka muhte’n hon thathousak chi hi.

 

 

RD Minister in MKSP leh Digital SHG Book Keeping System hong

AIZAWL, April 27: Mizoram Rural Development Min­ister, R.Lalzirliana in zan, Nilaini in Mahila Kisan Sashaktikaran Pari­yojana (MKSP) leh Digital Self Help Group Book Keeping System hong­khia hi.

 

MKSP in a tuppen ahihleh singtanglou neimite a dia paidan detdouzaw leh sawt daihzaw ding kawkmuhna, ganvulhna toh kisai a masawnna leh non-timber forest produce leh theigahte sawt daihzaw ding a kholkhawm a etkol ding ban ah haichi tuhgah zuakkhiak theihna dia panlakna ahihdan RD Minister in gen hi.

 

MKSP panlakna nuai a sung­kuan enkoltute sum laklut a punzel a, nekzonnna detdou a neihtheihna ding uh lametna ahihdan leng Min­ister in gen hi. Fair chituamtuam ban ah florist exhibition-te neihna ding mun leh khutsiam silbawlte phoukhiakna ding mun hoihtak neihtheihna ding in NEDP nuai ah hiai bang mun bawl ding in Agri­culture Directorate puahphatthak hiding ahihdan Minister in gen a, khutsiamsilbawl a nekzongte’n hamphatna a ngahtheihna ding ua panlakna paizel pen kipahhuai a sakthu gen hi.

 

Rural Development Minister in Mizoram a Self Help Group-te’n data tuamtuamte baihlamzaw leh awlsamzaw a lakkhawm ahihthei­hna ding a Digital SHG Book Keep­ing System (e-SHG) bawlkhiak a om a phatuam theipen a zang ding in mipite ngen hi. Lohchinna ding in diktatna, kipumpiakna leh gin-omna toh theihtawpsuah a pan ngai ahi chi hi.

 

Mizoram a MKSP bulpatna ding in Mizoram State Level Ru­ral Livelihood Mission nuai ah Resource Block 4 - Thingdawl, Bilkhawthlir, Serchhip leh East Lungdar RD Block-te telkhiak in om a, hiai RD Block-te ah ahihleh kum 3 sung paipih hiphot ding hi. Hiai Resource Block-te a kipan MzSRLM nuai a Self Help Group a tel, lounei­tu sungkuan 5000-te ahihleh MKSP huangsung a etkol sawm hi a, kum 4na a kipan in MzSRLM a lutnasa RD Block tuamtuam ah hiai proj­ect patkhiak sawm in om hi. Digital SHG Book keeping System (e-SHG) ahihleh India gam pumpi a SHG-te sum paidan sianthoutak a ettheihna ding a kibawl hi a, Ministry of Rural Development in a bawl e-SHG pen “My SHG App” ahihleh tablet ahih­keileh phone zang a download a, vil­lage organization teng a zat ding hi a, hiai app tungtawn in SGH paidan baihlamtak in theihtheih ding hi.

 

 

South Tuipui bial khantouhna di’n Rs. 22 crore val zat in om

AIZAWL, Apr 27: South Tuipui bialtu MLA leh Mizoram State Law Commission Chairman John Siamkunga in a genna ah, term 2 sung a, a bial­sung a kho 5 a khantouhna nasep a Rs. 22 crore val zat a om ahih­dan gen hi.

 

Tuni a South Vanlaiphai Com­munity Hall No. 2 a South Van­laiphai Group YMA Conference zatna ah hiai thu gen in, term 2 sung a Darzo, South Vanlaiphai, Muallianpui, Lungpuitlang leh South Lungleng a khantouhna nas­epna a Rs. 22,4,36,407 zat a omta ahihdan gen hi.

 

John Siamkunga in Hnahthial leh Thingsai kikal lampi black­top a bawlvek ahih theihna ding a panla lel ahihdan gen a, ban ah New Ngharchhip leh Lungdap kikal lampite, Thingsai a kipan Triau zotna lampite, Ngharchhip leh Triaukikal lampi, Cherhlun a kipan Triau kikal lampite, Bualpui H a kipan Tuipui zotna lampite, Muallianpui a kipan Tuipui tan a lampi sial ding a panla lel ahi­hdante gen a, hiai lampite bawl­zoh ahih chiang in Myanmar toh kisumdawntuahna hoihtak om theita ding hi’n gen hi.

 

 

 

 

 

 

 

NEWS TOMKIM

 

1-Day Legal Awareness programme nei

LAMKA, April 27: Tuni sunma dak 11 in Bethany Multipurpose Hall ah District Legal Services Authority, Ccpur leh Ccpur United Club Organisation (CUCO) saina in ‘One Day Legal Awareness Programme’ om hi. Hiai hun S.L. Seiminlal Haokip, Asst. Headmaster, Bethany Christian High School in makaih a, M. Biteshwor @ John Singh, Headmaster, Bethany Christian High School in chief guest hihna toh Legal Awareness programme hongkhia hi. Functional president in S.K. Mangang, President, CUCO pang a, W. Lata Devi, Advocate in National Food Security Act (NFSA), Righ to Education, Protection of Children from Sexual Offence Act (PICSO) & Child Labour’ chih thupi pansan in sinsak hi. Hiai hun ah Bethany Christian High School a pan student tamtak tel uhi.

 

 

Disability Certificate pe ding

LAMKA, April 27: Hongtung ding April 29, 2017 sunnung dak 1 in ZEO/Ccpur office ah T. Goukhomang, ZEO/Ccpur in SSA nuai a Disability Cetificate ngente kiang ah Disability Cetificate pekhe ding hi. SSA nuai ah Disability Certificate ngen mi 39 vel om a, certificate ahihleh a ngentute mahmah khut a piakkhiak hiding hi’n thutut kingah hi.

 

 

Court in medical ground in bail

LAMKA, April 27: April 15, 2017 sunnung dak 2:30 vel in 25-Assam Rifle-te’n Gounchinkhup Veng, New Lamka a pan M-16 rifles 1, magazine 1 ban ah sumtang in Rs.10,300/- leh mobile handset nih toh Suankhankhual (47) s/o (late) Kamkhenthang of New Lamka (G) leh Dalkhanlian (38) s/o Gindoulian of New Lamka (G) mankhia in police ah pekhia uhi. Amaute tuni, April 27 in police in CJM Court ah dingsak a, mat a om mi nihte a damtheihna uh a hoihlouh ziak in court in medical ground in bail hi. Hiai thu ah Police in FIR No. 22(4)2017 CCPPs, U/S 25(1-C) A. Act & 34 IPC chiamteh uhi.

 

 

Mualnuam SDO/Hq ah MLA lawm

LAMKA, April 27: Mualnuam SDO/Hq., Mualnuam ah tuni, April 27 sunma dak 11 a pan in 11th Manipur assembly election 2017 a 56-Thanlon AC a pan BJP ticket a telching a om Vungzagin Valte, MLA & Chairman MTDC kipahpihna programme om hi. Hiai hun ah MLA lopna in bawng gou ua, mipi ankuang umkhawm uhi.

 

 

 

 

 

…for more detail : here